ཉིན་འདི་འགར་རྔ་པ་ཀིརྟི་དགོན་གྲོང་གཉིས་སུ་རྒྱ་གཞུང་གིས་དམ་དྲག་ཤུགས་ཆེན་བྱེད་ཀྱིན་ཡོད་པའི་ཐད། བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་གསུམ་གྱིས་རྒྱ་གར་རྒྱལ་ས་ལྡི་ལིར་དུས་ཚོད་ངེས་མེད་བར་གྱི་ཟས་བཅད་ངོ་རྒོལ་ཞིག་མགོ་འཛུགས་བྱས་འདུག
ཁ་སང་ཕྱི་ཚེས་ ༢༥ ཉིན་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁག་གི་ཚོགས་གཞོན་དོན་འགྲུབ་ལྷ་དར་ལགས་དང་ཟུང་དྲུང་བཀྲ་ཤིས་ནོར་བཟང་ལགས། དཔལ་འབྱོར་འགན་འཛིན་དཀོན་མཆོག་ཡར་འཕེལ་བཅས་གཞོན་ནུའི་རྒྱུན་ལས་གསུམ་གྱིས་དང་བླང་ཐོག་རྔ་པ་ཀིརྟི་དགོན་པའི་ཛ་དྲག་གི་གནས་སྟངས་ལ་གདུང་སེམས་མཉམ་སྐྱེད་མཚོན་ཕྱིར་ལྡི་ལི་ཅན་ཏར་མཱན་ཏར་ས་གནས་སུ་དུས་ཚོད་ངེས་མེད་ཀྱི་ཟས་བཅད་ངོ་རྒོལ་ལས་འགུལ་ཞིག་མགོ་འཛུགས་གནང་ཡོད།
ལས་འགུལ་དེའི་ཐོག་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས་དེར་ཡོད་མི་མང་ལ་རྔ་པ་ཀིརྟི་དགོན་པའི་གནས་སྟངས་ངོ་སྤྲོད་དང་འབྲེལ་རྒྱ་ནག་གཞུང་ལ་དགོས་འདུན་གཉིས་དང་འབོད་སྐུལ་གཅིག་བཏོན་ཏེ། རྒྱ་གཞུང་གིས་དགོས་འདུན་དེ་དག་དང་ལེན་མ་བྱས་ཚེ། ཟས་བཅད་ངོ་རྒོལ་མཚམས་འཇོག་བྱ་རྒྱུ་མིན་ཚུལ་དང་། བོད་ཀྱི་གཞོན་ནུ་ལྷན་ཚོགས་ཀྱིས་འདས་པའི་མི་ལོ་ ༥༢ ལྷག་རིང་ཁ་ནས་བཤད་པ་གཅིག་པུ་མིན་པར་ལག་ལེན་ཐོག་ནས་རྒྱ་ནག་གཞུང་ལ་ཁ་གཏད་བཅག་ཡོད་ལ། མ་འོངས་པར་ཡང་མུ་མཐུད་རྒྱ་ནག་ལ་ཁ་གཏད་གཅོག་ཐུབ་ཀྱི་ཡོད། ཅེས་བརྗོད་འདུག
ཐེངས་འདིར་གཞོན་ནུ་ལྷན་ཚོགས་ཀྱིས་རྒྱ་གཞུང་ལ་བཏོན་པའི་དགོས་འདུན་གཉིས་ནི། དང་པོ། རྔ་པ་ཀིརྟི་དགོན་པ་རྒྱ་དམག་གིས་བསྐོར་ནས་བཀག་སྡོམ་དམ་དྲག་དང་རྒྱལ་གཅེས་ཆོས་གཅེས་ཀྱི་ལས་འགུལ་སྤེལ་བཞིན་པ་འཕྲལ་དུ་ཕྱིར་འཐེན་དང་། ཉེ་ལམ་རྔ་པ་ཁུལ་ནས་འཛིན་བཟུང་བྱས་པའི་བོད་མི་གཙོས་བོད་ནང་གི་ཆབ་སྲིད་བཙོན་པ་ཡོངས་ཆ་རྐྱེན་གང་ཡང་མེད་པའི་ཐོག་ཀློད་གྲོལ་དགོས་པ། གཉིས་པ། བོད་ནང་གི་ཆབ་སྲིད་བཙོན་པ་རྣམས་ཀྱི་གནས་སྟངས་རྟོག་ཞིབ་བྱ་བར་བོད་ཀྱི་གཞོན་ནུ་ལྷན་ཚོགས་ཀྱི་སྐུ་ཚབ་ཅིག་ངེས་པར་དུ་བོད་ནང་གཏོང་ལེན་བྱ་དགོས། ཞེས་བཏོན་འདུག་ལ། རྒྱལ་སྤྱིའི་སྒྲིག་འཛུགས་དང་ཚོགས་སྡེ་ཁག མི་སྒེར་བཅས་ཀྱིས་བོད་རང་བཙན་གྱི་བདེན་དོན་དང་བོད་རང་བཙན་སླར་གསོ་བྱ་བར་ངེས་པར་དུ་ཁ་གསལ་གྱི་ཐོག་ནས་རྒྱབ་སྐྱོར་ཡོང་བའི་འབོད་སྐུལ་ཡང་ཞུས་འདུག
བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ཟླ་འདིའི་ཕྱི་ཚེས་ ༡༦ ཉིན་རྔ་པ་ཀིརྟི་དགོན་པའི་གྲྭ་ཕུན་ཚོགས་ལགས་ཀྱི་རང་ལུས་མེར་བསྲེག་བཏང་བའི་ཕྱི་ཉིན་ནས་བཟུང་ཁོང་གི་ཆེད་དུ་བསྔོ་སྨོན་མཆོད་འབུལ་དང་མར་མེ་ཁྲོམ་སྐོར་སོགས་ཀྱི་ལས་འགུལ་སྤེལ་ཡོད་པར་མ་ཟད། ཕྱི་ཚེས་ ༡༧ ཉིན་ནས་རྔ་པ་ཀིརྟི་དགོན་གྲོང་གཉིས་ཀྱི་གནས་སྟངས་ལ་གདུང་སེམས་མཉམ་སྐྱེད་མཚོན་ཕྱིར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འགྲམ་དུ་དུས་ཚོད་ངེས་མེད་ཀྱི་ཟས་བཅད་ངོ་རྒོལ་ཞིག་མུ་མཐུད་འགྲོ་མུས་ཡིན་ལ། དེ་བཞིན། བལ་ཡུལ་དང་རྒྱ་གར་ལྷོ་ཕྱོགས། ལྡི་ལི། ཕྱི་རྒྱལ་ཡུལ་གྲུ་ཁག་བཅས་སུ་ཟས་བཅད་ངོ་རྒོལ་དང་སྐད་འབོད་ཁྲོམ་སྐོར་སོགས་ཀྱི་ལས་འགུལ་སྤེལ་གྱིན་ཡོད།
གསར་འགོད་པ། དོན་གོ
ད་རེའི་བོད་ཀྱི་གཞོན་ལྷན་དབུས་རྒྱུན་གསུམ་ནས་མགོ་འཁྲིད་དེ་ཟས་བཅད་མགོ་འཛུགས་བྱས་པ་བསྔགས་བརྗོད་བྱེད་ཀི་ཡོད། འདི་ལྟར་མགོ་འཁྲིད་མང་མང་གིས་ལས་འགུལ་འདྲ་མིན་སྤེལ་བ་ཡིན་ན་ནུས་པ་གང་ཙམ་ཐོན་ངེས་སྙམ་ལ་ཁ་ནས་བཤད་པ་ཙམ་མ་ཡིན་པར་ལས་འགུལ་དངོས་སུ་ཞུགས་པ་མིག་དཔེར་འཇོག་འོས་པ་ཞིག་ཀྱང་རེད།
རྒྱལ་གཅེས་ཀྱི་བསམ་བློ་དང་སྙིང་སྟོབས་ལ་གོང་བཀུར་ཞུ། ཡིན་ཡང་ནམ་ཡང་མི་འགྲུབ་པའི་ཆ་རྐྱེན་དང་རེ་བ་འདོན་པ་འདི་ཁྱེད་ཅག་གི་ཞན་ཆ་གཙོ་བོ་རེད་ལ། དམག་འཐབ་ཀྱི་ལོག་ལམ་ཡང་རེད། ཆབ་སྲིད་བཙོན་པ་དག་གི་གནས་བབ་ལ་རྟོག་ཞིབ་བྱེད་དུ་གཞོན་ནུ་ཚོགས་པའི་སྐུ་ཚབ་ཅིག་ཡོང་གི་འཇུག་ན་ཕྱི་རྒྱལ་བའི་རང་དབང་གསར་འགོད་པ་དག་དེ་སྔ་ནས་ཕེབས་ཚར་ཡོད་ལ། ཟས་བཅད་ངོ་རྒོལ་འདི་ཙམ་གྱིས་བོད་ནང་གི་ཆབ་སྲིད་བཙོན་པ་ཚང་མ་གློད་བཀྲོལ་འབྱུང་འཇུག་ཐུབ་ན་བོད་རང་བཙན་སྔ་ས་ནས་སྤྲད་ཚར་ཡོད།
བཙན་བྱོལ་བའི་གཞོན་ནུ་ཚོ་ངོ་མ་གླེན་པ་ཡིན་ནམ་དངོས་སུ་འཁྲབ་སྟོན་བྱེད་པ་རེད། ང་ངོ་མ་ཡ་མཚར་ཅིང་ཡིད་འཆད་ཀི
གལ་ཏེ་དོན་དངོས་ཀྱི་རྟོག་ཞིབ་ཅིག་བྱེད་ངེས་ཡིན་ན་གསང་མྱུལ་བ་གཏོང་དགོས་པ་རེད། གནའ་ནས་ད་བར་ལ་ལས་དོན་འདི་རིགས་ལ་ཐབས་ཚུལ་འདི་སྤྱོད་ཀྱིན་ཡོད། ཁྱབ་འཇུག་མིའུ་ཐུང་ལ་སྤྲུལ་བ་ལྟ་བུའི་རྫུ་འཕྲུལ་མེད་ན་རང་བཙན་མ་དགོས་རང་སྐྱོང་ཡང་ཁག་པོ་རེད།