སྐུ་ཚབ་དོན་གཅོད་གསར་པ།

ཕྱི་ཟླ་༤ ཚེས་༢༩ ཉིན་སྤྱི་ནོར་༧གོང་ས་མཆོག་ལ་འཆར་འབུལ་ཕྱག་རྟགས་ཞུས་པ་ལྟར། ཧྥ་རན་སིར་གནས་བཞུགས་སྐུ་ཞབས་ཐུབ་བསྟན་རྒྱ་མཚོ་ལགས་ཡུ་རོབ་སྐུ་ཚབ་དོན་གཅོད་དུ་བསྐོ་བཞག་གནང་ཡོད་པ་དང་། ཁོང་གིས་ཕྱི་ཟླ་ ༦ ཚེས་ ༡ ནས་དོན་གཅོད་ལས་འཁུར་མགོ་འཛུགས་གནང་རྒྱུ་ཡིན་འདུག

སྐུ་ཞབས་ཐུབ་བསྟན་རྒྱ་མཚོ་ལགས་ནི་ཕྱི་ལོ་ ༡༩༧༡ ལོར་མདོ་སྨད་རྒྱལ་རོང་ཁྲོ་ཆུར་སྐྱེས་ཤིང་། ཕྱི་ལོ་ ༡༩༩༡ ལོར་བཙན་བྱོལ་དུ་འབྱོར་རྗེས་སྔ་ཕྱིར་སྦིར་སུ་ཇ་སློབ་གྲྭ་དང་ཝ་ར་ནྰ་སི་མཐོ་སློབ་དུ་ཟུར་ཞུགས་གནང་ཡོད་ཅིང་། ཕྱི་ལོ་ ༡༩༩༨ ལོར་སྒེར་ངོས་ནས་ཧྥ་རན་སིར་སློབ་སྦྱོང་དུ་ཕེབས་ཏེ་གཞི་རིམ་འཛིན་རིམ་བཅུ་གཉིས་ཐོན་ཡོད་པ་དང་། ཕ་རི་སིའི་སོར་བྷོན་གཙུག་ལག་སློབ་གཉེར་ཁང་ ( Sorbonne Université Paris ) དུ་ལོ་བཞིའི་རིང་ཁྲིམས་ཀྱི་སློབ་སྦྱོང་གནང་ཡོད། ཕྱི་ལོ་༢༠༠༣ ལོར་ཧྥ་རན་སི་བོད་རིགས་ཚོགས་པའི་ཚོགས་གཙོར་བདམས་ཐོན་བྱུང་བ་བཞིན་ད་བར་སྐབས་བཞིའི་རིང་གི་ཚོགས་གཙོའི་ལས་འཁུར་གནང་ཞིང་། ཕྱི་ལོ་ ༢༠༡༠ ལོར་ཡུ་རོབ་བོད་རིགས་མི་མང་ཚོགས་ཆེན་གྱི་ཚོགས་འདུའི་ཚོགས་གཙོའི་ལས་འཁུར་ཡང་གནང་ཡོད་འདུག ཕྱི་ལོ་༢༠༠༩ ཁོང་གིས་མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་ Charter of the United Nations བོད་བསྒྱུར་གྱིས་བོད་ཀྱི་གྲོས་ཚོགས་དང་སྲིད་བྱུས་མཉམ་ལས་ཁང་གིས་དཔར་སྐྲུན་བྱས་ཡོད།  

ཕྱི་ལོ་༢༠༠༩ ལོར་བཀའ་ཤག་གིས་ཧྥ་རན་སི་སྐུ་ཚབ་དོན་གཅོད་ཁང་དང་བྷེལ་འཇམ་སྐུ་ཚབ་དོན་གཅོད་ཁང་གཉིས་ཟླ་སྒྲིལ་གྱི་ཡུ་རོབ་སྐུ་ཚབ་དོན་གཅོད་ཁང་དུ་བསྒྱུར་ཡོད་འདུག

ཧྥ་རན་སིའི་འདི་གའི་གསར་འགོད་པ་ཟླ་བ་ཚེ་རིང་ལགས་ཀྱིས་བཏང་འབྱོར་བྱུང་།