གཅེས་པའི་ཚེ་སྲོག་གཏོང་རྒྱུའི་ཆོད་སེམས་ཡོད་ཟེར།

རྒྱ་དམར་ག་ཚོད་སྟོབས་ཆེན་ཆགས་པ་ཡིན་ནའང་། ང་ཚོ་བོད་པའི་གཞོན་སྐྱེས་ཚོས་བོད་ཀྱི་རྒྱལ་ས་ལྷ་ས་ཡིན་པ་དང་སོ་སོའི་རྒྱལ་ཁབ་བོད་ཡུལ་ཡིན་པ་དེ་ནམ་ཡང་བརྗེད་ཀྱི་མ་རེད་ལ། རང་བཙན་སླར་གསོའི་ཆེད་དུ་གཅེས་པའི་ཚེ་སྲོག་གཏོང་དགོས་ཀྱང་གཏོང་རྒྱུའི་ཆོད་སེམས་བརྟན་པོ་ཡོད་པའི་བརྡ་ལན་གསལ་པོ་སྤྲོད་རྒྱུ་ཡིན་ཟེར།

བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་དབུས་རྒྱུན་ཚོགས་གཞོན་དོན་འགྲུབ་ལྷ་དར་དང་། ཟུང་དྲུང་བསྟན་འཛིན་ནོར་བཟང་། དཔལ་འབྱོར་འགན་འཛིན་དཀོན་མཆོག་ཡར་འཕེལ་ལགས་གསུམ་ནས་རྒྱ་གར་རྒྱལ་ས་ལྡི་ལིར།  དགོས་འདུན་གཉིས་དང་འབོད་སྐུལ་གཅིག་མ་འགྲུབ་བར་དུས་ཡུན་ངེས་མེད་ཀྱི་ཟས་བཅད་ངོ་རྒོལ་གནང་སྟེ། ཉིན་གྲངས་ ༡༤ འདས་པའི་རིང་། ཁོང་ཚོའི་ལས་འགུལ་ལ་རྒྱབ་སྐྱོར་མཚོན་ཆེད་བོད་མི་མང་སྤྱི་འཐུས་ཚོགས་གཙོན་རྒྱ་རི་སྒྲོལ་མ་མཆོག་དང་བཀའ་ཟུར་ཀིརྟི་རིན་པོ་ཆེ་མཆོག དེ་བཞིན་སྤྱི་འཐུས་སྐལ་བཟང་རྒྱལ་མཚན་དང་ཚེ་རིང་གཡུ་སྒྲོན་ལགས་བཅས་ཆེད་ཕེབས་ཀྱིས་འཚམས་འདྲི་ཞུས་ཡོད་པ་དང་།  དེ་མིན་རྒྱ་གར་གནད་ཡོད་མི་སྣ་འགའ་ཡང་ཆེད་ཕེབས་ཀྱིས་ཟས་བཅད་ངོ་རྒོལ་བ་རྣམ་པར་མཚམས་གཟིགས་གནང་ཡོད་པར་མ་ཟད། རྒྱ་གར་སློབ་ཕྲུག་ ༢༠ ལྷག་གིས་ཀྱང་༼རྒྱ་ནག་བོད་ནས་ཕར་རྒྱུགས། ས་ཆ་དེ་ཁྱོད་ཚོས་མ་རེད་བོད་པས་རེད། བོད་ཁ་བ་གངས་ཅན་ཡུལ་ལྗོངས་རེད།  ༽ཞེས་པའི་ཡི་གེ་བྲིས་ཤིང་།  བོད་མི་ལངས་གླུ་བཏང་སྟེ་ཟས་བཅད་ངོ་རྒོལ་བ་རྣམས་ལ་རྒྱབ་སྐྱོར་གྱི་རྣམ་པ་ཤུགས་ཆེན་པོ་བསྟན་ཡོད་འདུག  

འདི་གའི་གསར་འགོད་པའི་ཁ་པར་བརྒྱུད་ཟས་བཅད་ངོ་རྒོལ་བ་རྣམ་པའི་གཟུགས་པོའི་གནས་སྟངས་ག་འདྲ་ཆགས་ཡོད་མེད་སྐོར་ལ་བཀའ་འདྲི་ཞུས་པར། གཞོན་ལྷན་ཚོགས་གཙོ་ཚེ་དབང་རིག་འཛིན་ལགས་ཀྱིས་བརྗོད་དོན། ཕྱི་ཟླ་ ༤ ཚེས་ ༢༥ ནས་ཟས་བཅད་ངོ་རྒོལ་མགོ་བཙུགས་ཀྱིས་ད་ལྟའི་བར་ཉིན་གྲངས་ ༡༣ ལྷག་འགྲོ་བཞིན་པར་བརྟེན། ཟས་བཅད་ངོ་རྒོལ་བ་རྣམ་པའི་གཟུགས་པོའི་ལྗིད་ཚད་རྒྱ་མ་ ༦ དང་ ༧ ། ༡༠ བཅས་སོ་སོར་མར་ཆག་ཡོད་པར་མ་ཟད།  ད་ལྟ་ལྡི་ལིར་ཚ་བའང་ཤུགས་ཆེན་པོ་ཡོད་སྟབས་གཟུགས་པོའི་གནས་སྟངས་རང་བཞིན་གྱིས་ཉམས་ཆག་ཏུ་འགྲོ་བཞིན་འདུག  ཡིན་ནའང་། ཟས་བཅད་ངོ་རྒོལ་བ་རྣམ་པའི་ངོས་ནས་ཆོད་སེམས་བརྟན་པོའི་ཐོག་ནས་ལས་འགུལ་མུ་མཐུད་འགྲོ་བསྡད་ཡོད་པ་རེད།  ཅེས་བརྗོད་བྱུང་།

གཞན་ཡང་ཐེངས་འདིའི་དུས་ངེས་མེད་ཀྱི་ཟས་བཅད་ངོ་རྒོལ་ཁྲོད་ཞུགས་མཁན་གཞོན་ལྷན་ཚོགས་གཞོན་དོན་འགྲུབ་ལྷ་དར་ལགས་ཀྱིས་བརྗོད་དོན།  ང་ཚོས་ཟས་བཅད་ངོ་རྒོལ་བྱེད་དགོས་པའི་ཐོག་མའི་དམིགས་ཡུལ་ལ་དགོས་འདུན་གཉིས་དང་འབོད་སྐུལ་གཅིག་ཡོད་པ་རེད། ང་ཚོར་ཁོར་ཡུག་གི་རང་དབང་རག་པ་ཡིན་ན་དགོས་འདུན་དེ་གཉིས་པོ་དང་འབོད་སྐུལ་དེ་མ་འགྲུབ་བར་དུ་མུ་མཐུད་ནས་ཟས་བཅད་ངོ་རྒོད་དུ་འདུག་རྒྱུའི་ཆོད་སེམས་བརྟན་པོ་ཡོད་ལ། དེའི་ཆེད་དུ་སོ་སོའི་སྲོག་ཤོར་བ་ཡིན་ནའང་བློས་གཏོང་བྱེད་པའི་དམ་བཅའ་ང་ཚོ་རྒྱུན་ལས་གསུམ་ཀར་ཡོད། ང་རང་ལ་ཆ་མཚོན་ན་ཡང་ཟས་བཅད་ངོ་རྒོལ་བྱ་དགོས་པའི་རྒྱུ་མཚན་གཙོ་བོ་ནི། ད་ལྟ་ཨ་མདོ་རྔ་པའི་ནང་བྱུང་བའི་དོན་དག་དེ་དགོན་པ་བྱེ་བྲག་པ་ཅིག་དང་ས་ཁུལ་བྱེ་བྲག་པ་ཞིག་གི་གནས་ཚུལ་གཏན་ནས་ཆགས་ཡོད་པ་མ་རེད།  དེ་རྒྱལ་ཁབ་ཅིག་དང་མི་རིགས་ཤིག་གི་གནས་ཚུལ་ཆགས་ཡོད་དུས་དེ་ལ་བོད་མི་ས་ཡ་དྲུག་ཚང་མ་ལ་ལས་འགན་ཡོད་པའི་ཆ་ནས་སོ་སོ་རང་ཉིད་ལས་འགུལ་འདིའི་ནང་དུ་ཞུགས་པ་ཡིན། ལྷག་པར་དུ་ལས་འགུལ་འདི་བརྒྱུད་ནས་ང་ཚོས་བོད་གཞིས་ལུས་རྒྱ་ཆེའི་མི་མང་ལ་ཁྱེད་ཅག་གི་དཀའ་སྡུག་དང་སྙིང་སྟོབས་དེ་ང་ཚོས་ཉི་མ་རེ་རེ་ལ་ཤེས་རྟོགས་དང་ཚོར་སྣང་བྱུང་བཞིན་ཡོད་ཅེས་ཞུ་འདོད་བྱུང་ལ།  དེ་བཞིན་དགྲ་བོ་རྒྱ་དམར་ལ་ཡང་རྒྱ་ནག་ག་ཚོད་སྟོབས་ཆེན་ཆགས་པ་ཡིན་ནའང་། བོད་ཀྱི་རྒྱལ་ས་ལྷ་ས་ཡིན་པ་དང་ང་ཚོའི་རྒྱལ་ཁབ་བོད་ཡིན་པ་དེ་ང་ཚོ་གཞོན་སྐྱེས་ཚོས་ནམ་ཡང་བརྗེད་ཀྱི་མ་རེད།  དེ་མ་བརྗེད་པའི་ཐོག་ནས་བོད་དང་རྒྱ་གར་ནང་སྐྱེས་པའི་ང་ཚོ་བོད་པའི་གཞོན་སྐྱེས་ཚང་མས་རང་བཙན་སླར་གསོའི་ཆེད་དུ་སོ་སོའི་གཅེས་པའི་ཚེ་སྲོག་གཏོང་དགོས་ཀྱང་།  གཏོང་རྒྱུའི་ཆོད་སེམས་བརྟན་པོ་ཡོད་པ་དེ་དེ་རིང་འདིར་གཞོན་ནུ་ལྷན་ཚོགས་ཀྱི་སྒྲིག་འཛུགས་ཀྱིས་བརྒྱུད་ལམ་འདིའི་ཐོག་ནས་རྒྱ་ནག་ལ་བརྡ་ལན་གསལ་པོ་སྤྲོད་རྒྱུ་ཡིན། ཅེས་བརྗོད་སོང་།

ཐེངས་འདིའི་ཟས་བཅད་ངོ་རྒོལ་གྱི་སྐབས་དང་བསྟུན་ནས།  བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ལྡི་ལི་རྒྱ་ནག་གཞུང་ཚབ་ཁང་ལ་སྔ་ཕྱིར་ཡི་གེ་གཉིས་སྤྲད་དེ།  རྒྱ་གཞུང་གིས་རྔ་པ་ཀིརྟི་དགོན་པར་དྲག་གནོན་བྱེད་བཞིན་པའི་ཛ་དྲག་གནས་སྟངས་མཚམས་འཇོག་དགོས་པའི་བརྡ་ལན་སྤྲད་ཡོད་པར་མ་ཟད།  མཉམ་འབྲེལ་རྒྱལ་ཚོགས་ལྡི་ལི་ཡན་ལག་གི་ཆབ་སྲིད་འགན་འཛིན་དང་། ཡུ་རོབ་མཉམ་འབྲེལ་མཐུན་ཚོགས་ཀྱི་སྐུ་ཚབ་གཞོན་པ། དེ་བཞིན་རྒྱ་གར་སྲིད་བློན་ལས་ཁུངས་དང་། ཁ་ན་ཌ་དང་ཨ་རིའི་གཞུང་ཚབ་ཁང་བཅས་བཅར་ཏེ་རྔ་པ་ཀིརྟི་དགོན་པའི་ཛ་དྲག་གི་གནས་སྟངས་ཐད་རྒྱ་གཞུང་ལ་གནོན་ཤུགས་སྤྲོད་དགོས་པའི་རེ་འབོད་གནང་བར་ཁོང་ཚོའི་ངོས་ནས་ཀྱང་རྒྱབ་སྐྱོར་གྱི་རྣམ་པའི་འོག་སྙན་ཞུ་དེ་དག་འབྲེལ་ཡོད་ལས་ཁུངས་ཨ་མར་འབུལ་རྒྱུ་ཁས་ལེན་གནང་ཡོད་འདུག ལྷག་པར་དུ་ལྡི་ལི་ཨ་རིའི་གཞུང་ཚབ་ཐུག་འཕྲད་སྐབས། ཉེ་སྔོན་ཨ་རི་དང་རྒྱ་ནག་བར་འགྲོ་བ་མིའི་ཐོབ་ཐང་གྲོས་མོལ་སྐབས། བོད་དོན་གླེང་སློང་བྱས་པའི་སྐོར་གསར་ལམ་ཁག་ཏུ་ཐོན་མེད་ཀྱང་། ཨ་རིའི་ངོས་ནས་གྲོས་མོལ་སྐབས་རྔ་པ་ཛ་དྲག་གནས་སྟངས་གཙོས་པའི་བོད་ཀྱི་གནད་དོན་སྐོར་རྒྱ་གཞུང་ལ་བརྗོད་ཡོད་སྐོར་གསལ་བཤད་ཀྱང་གནང་ཡོད་འདུག 

མཇུག་མཐར་ཚོགས་གཙོ་ཚེ་དབང་རིག་འཛིན་ལགས་ཀྱིས་བོད་ཕྱི་ནང་གཉིས་ཀྱི་མི་མང་ཡོངས་ལ་འབོད་སྐུལ་གྱི་ཚུལ་བརྗོད་དོན།  བོད་ནང་ལོག་གི་བོད་མི་ཡོངས་དང་ལྷག་པར་དུ་རྔ་པ་ཁུལ་གྱི་སེར་སྐྱ་མི་མང་ཡོངས་ལ། བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས། ད་ལྟའི་བར་དུ་ཁྱེད་ཅག་རྣམ་པས་བོད་མི་ས་ཡ་དྲུག་གི་ཆེད་དུ་བློས་གཏོང་གནང་གི་ཡོད་པ་དེར། ང་ཚོས་ངོས་ནས་ཀྱང་འགན་བླངས་པའི་སྒོ་ནས་ཁ་ནས་བཤད་པ་ཙམ་མ་ཡིན་པར་གདུང་སེམས་མཉམ་སྐྱེད་ཀྱི་སྒོ་ནས་ལས་འགུལ་སྤེལ་བཞིན་ཡོད་ལ།  ཐབས་ཤེས་གང་ཡོད་བཏོན་ཏེ་རྒྱལ་སྤྱིའི་སྒང་ནས་རྒྱ་གཞུང་ལ་གནོད་ཤུགས་ཡོང་ཐབས་ལ་འབད་བརྩོན་བྱེད་ཀྱི་ཡོད།  རྒྱལ་གཅེས་དཔའ་བོ་གྲྭ་ཕུན་ཚོགས་ལགས་གཙོས་པའི་ཁྱེད་ཅག་ཚང་མར་ཐུགས་རྗེ་ཆེ་ཞུ་རྒྱུ་ཡིན་ལ།  ང་རང་ཚོའི་ངོས་ནས་ཁྱེད་ཅག་ལ་གདུང་སེམས་མཉམ་སྐྱེད་ག་རེ་བྱ་དགོས་ཀྱི་ཡོད་ཀྱང་བྱེད་ཐུབ་ཀྱི་ཡོད་ཅེས་ཞུ་རྒྱུ་ཡིན།  ཅེས་དང་།  ཡང་ཁོང་གིས་ང་རང་ཚོ་རང་དབང་ལུང་པར་ཡོད་མཁན་བོད་ཞིག་ཡིན་པའི་ཆ་ནས་འགན་ཆེ་ཤོས་ཏེ། སོ་སོ་རྒྱལ་ཁབ་དང་མི་རིགས་ཀྱི་ཆེད་དུ་ལས་ཀ་བྱ་རྒྱུ་དེ་ཆགས་བསྡད་ཡོད་པ་རེད།  ང་ཚོ་ཨ་ཁུ་ཨ་ནེ་དང་ཕ་མ་རྒན་རྒོན་རྣམས་བཙན་བྱོལ་དུ་ཡོང་དོན་ནི། དཔལ་འབྱོར་གྱི་སྐྱབས་བཅོལ་བ་མ་ཡིན་པར་ཆབ་སྲིད་ཀྱི་སྐྱབས་བཅོལ་བ་ཞིག་ཆགས་བསྡད་ཡོད་པ་རེད།  དེར་བརྟེན། རང་ལུང་པ་ལ་ཡོད་མཁན་ཚོའི་དེ་དྲན་པ་མ་བརྗེད་པའི་ཐོག་ནས་བོད་མི་ས་ཡ་དྲུག་གི་རྩ་དོན་གྱི་ཆེད་དུ་སྐབས་དུས་ཙམ་མ་ཡིན་པར། དུས་དང་རྣམ་པ་ཀུན་ཏུ་ཕྱག་ལས་གནང་དགོས་ཀྱིན་ཡོད་པ་རེད།  ད་ལྟ་རྔ་པ་ཀིརྟི་དགོན་པ་ལ་ཛ་དྲག་གི་གནས་སྟངས་དེ་འདྲ་ཞིག་གི་འོག་བསྡད་ཡོད་པས།  རྒྱ་བལ་འབྲུག་གསུམ་གཙོས་པའི་ཕྱི་རྒྱལ་ཡུལ་གྲུ་གང་སར་ཡོད་པའི་བོད་མི་ཡོངས་རྫོགས་ནས་སོ་སོ་བོད་པ་ཡིན་པ་མ་བརྗེད་པའི་ཐོག་ནས། རང་རང་གི་ནུས་ཚོད་ཀྱིས་ལས་འགུལ་ག་རེ་སྤེལ་ཐུབ་ཀྱིན་ཡོད་པ་དང་།  གང་ལ་མཉམ་ཞུགས་བྱེད་ཐུབ་ཀྱི་ཡོད་ན་དེར་མཉམ་ཞུགས་བྱེད་དགོས་པ་དེ་ཧ་ཅང་གལ་ཆེན་པོ་རེད།  ཅེས་བརྗོད་བྱུང་།  

གསར་འགོད་པ། ཚེ་རིང་རྒྱལ།