ཉེ་ཆར་དབྱིན་ཇིའི་རྒྱལ་ཁོངས་སུ་ས་གནས་རང་སྐྱོང་གི་བདག་དབང་ཡོད་པའི་སི་ཁོ་ཊི་ལན་ཌ་(Scotland)ས་གནས་གྲོས་ཚོགས་ནང་རང་ཐག་རང་གཅོད་ཀྱི་མང་མོས་འོས་བསྡུ་ཞིག་བྱས་ཡོད། འོས་བསྡུའི་གྲོས་མགོ་འདོན་མཁན་གཙོ་བོ་སི་ཁོ་ཊི་རྒྱལ་གཅེས་ཚོགས་པ་(Scottish Nationalist Party)ཞེས་པ་དེ་ཡིན་ཞིང་། མང་མོས་འོས་བསྡུ་དེ་ནི་སི་ཁོ་ཊི་ལན་ཌི་དབྱིན་ཇིའི་འོག་སྔར་བཞིན་ས་གནས་རང་སྐྱོང་གི་སྒྲོམ་གཞིའི་འོག་གནས་རྒྱུའམ་ཡང་ན་དབྱིན་ཇི་དང་ཁ་བྲལ་ཏེ་རང་བཙན་བྱ་རྒྱུ་དེ་རེད།
ཟླ་འདིའི་ཕྱི་ཚེས་ ༥ ཉིན་རང་ཐག་རང་གཅོད་ཀྱི་མང་མོས་འོས་བསྡུའི་གྲུབ་འབྲས་ཁྱབ་བསྒྲགས་བྱས་པའི་གྲུབ་དོན་ལྟར་ན། གྲོས་ཚོགས་ནང་འཐུས་མི་ ༡༢༠ ཡོད་པ་ལས་འཐུས་མི་ ༦༥ ཙམ་གྱིས་རང་བཙན་ལ་འོས་བླུགས་ཡོད་སྟབས། ཐེངས་འདིའི་འོས་བསྡུའི་ཁྲོད་སི་ཁོ་ཊི་ལན་ཌི་དབྱིན་ཇིའི་འོག་ནས་ཁ་བྲལ་ཏེ་རང་བཙན་བྱ་རྒྱུར་བརྒྱ་ཆ་ ༥༠ ལས་བརྒལ་ཡོད་འདུག སི་ཁོ་ཊི་རྒྱལ་གཅེས་ཚོགས་པའི་ཚོགས་གཙོ་སྐུ་ཞབས་ཨ་ལེག་སི་(Alex Salmond)ལགས་ཀྱིས་སི་ཁོ་ཊི་རང་བཙན་བྱ་རྒྱུར་ཐེངས་དང་པོར་གྲོས་ཚོགས་ནང་མང་མོས་རྒྱལ་ཁ་ཐོབ་པ་འདི་ནི། སི་ཁོ་ཊིའི་ལོ་རྒྱུས་ཐོག་གི་རྒྱལ་ཁ་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད། ཅེས་བརྗོད་འདུག འོན་ཀྱང་། དབྱིན་ཇི་གཞུང་གིས་དེ་ལ་རྣམ་འགྱུར་ཡག་པོ་བསྟན་མེད་པ་མ་ཟད། དབྱིན་ཇིའི་སྲིད་བློན་ཌ་ཝེ་ཌི་( David Cameron) ལགས་ཀྱིས་ང་ལ་དབྱིན་ཡུལ་མཉམ་འབྲེལ་རྒྱལ་ཁབ་ལ་ཡིད་ཆེས་ཡོད། ངས་བཤད་འདོད་པ་ནི་དབྱིན་ཡུལ་མཉམ་འབྲེལ་རྒྱལ་ཁབ་དང་དེའི་ཡལ་འདབ་རེ་རེ་བཞིན་ད་ལྟ་གང་ཡོད་པ་ཡོངས་རྫོགས་ཆིག་སྒྲིལ་ངང་གནས་དགོས་རྒྱུ་དེ་ཡིན། ཞེས་གཏམ་བཤད་ཅིག་སྤེལ་འདུག
སི་ཁོ་ཊི་ས་གནས་གྲོས་ཚོགས་སྐབས་སྔོན་མའི་ཚོགས་དུས་ནང་རྒྱལ་གཅེས་ཚོགས་པས་སི་ཁོ་ཊི་རང་བཙན་ཐད་རང་ཐག་རང་གཅོད་ཀྱི་གྲོས་མགོ་བཏོན་ཡོད་ཀྱང་། ཁ་གཏད་ཚོགས་པས་ངོ་རྒོལ་ཤུགས་ཆེན་བྱས་སྟབས། རང་ཐག་རང་གཅོད་ཀྱི་འོས་བསྡུ་བྱ་རྒྱུར་ལམ་ལྷུང་བྱུང་མེད། གང་ལྟར་ཐེངས་འདིའི་གྲོས་ཚོགས་ཀྱི་མང་མོས་འོས་བསྡུ་ལས་རང་བཙན་བྱ་རྒྱུར་རྒྱལ་ཁ་ཐོབ་ཡོད་པ་འདིས། སི་ཁོ་ཊི་མི་མང་ལ་སེམས་ཚོར་དང་རེ་བ་གསར་པ་ཞིག་བསྐྲུན་ཡོད་ཀྱང་། དབྱིན་ཇི་གཞུང་ལ་བློ་འཚབ་དང་བསམ་གཞིག་གསར་པ་ཞིག་གི་མགོ་བསླངས་ཡོད།
སི་ཁོ་ཊི་ལན་ཌི་ནི་ ༡༧༠༧ ལོར་དབྱིན་ཇིའི་དབང་སྒྱུར་འོག་ཚུད་ཡོད་ཅིང་། ད་ཆར་ས་གནས་རང་སྐྱོང་གི་ལམ་ལུགས་ལག་བསྟར་བྱེད་བཞིན་ཡོད་པ་མ་ཟད། སི་ཁོ་ཊི་ས་གནས་གཞུང་དང་གྲོས་ཚོགས་ཀྱང་བཙུགས་ཡོད། འོན་ཀྱང་། འདས་པའི་ལོ་མང་གོང་ནས་དབྱིན་ཇི་དང་ཁ་བྲལ་ཏེ་རང་བཙན་བྱ་རྒྱུའི་ཐད་གླེང་སློང་དང་གྲོས་མོལ་ཐེངས་མང་བྱས་མཐར། ཐེངས་འདིར་སི་ཁོ་ཊིའི་གྲོས་གྲོས་ཚོགས་ནང་རང་ཐག་རང་གཅོད་ཀྱི་འོས་བསྡུ་དེ་བྱས་ཡོད་འདུག
གསར་འགོད་པ། བནྡེ་སྐྱབས།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
འདི་ནི་བརྩོད་མེད་ལམ་ལྷང་ངང་དུ་ཐོབ་ཐུབ་པ་ཞིག་མིན་ནའང་གོམ་པ་རིམ་སྤོ་ཐོག་འགྲོ་རྒྱུའི་གཞི་རྩ་དེའི་སྟེང་དུ་དམིགས་བསལ་གོ་སྐབས་གསར་པ་ཞིག་ཡིན་པ་ངོས་འཛིན་བྱེད་ཤུགས་ཆེ་རུ་ཕྱིན་ཡོད་པ་གསལ་པོ་རེད། སྤྱིར་དེ་འདྲ་བ་འཛམ་གླིང་གི་སྒང་དུ་རྒྱ་ཁབ་ཆེ་ཁག་སོགས་ཁ་ཐོར་རུ་ཕྱིན་པ་ཡིན་ན་དམིགས་བསལ་དགེ་མཚན་འདྲ་གཟིགས་མོས་ཡོད་དམ་ཞེས་ངས་དྲྭ་གྲོགས་ཚོ་ལ་དྲི་པ་ཞིག་འབྲི།
གོ་སྐབས་འདི་མི་སྲིད་པ་ཞིག་མིན་ན་ཡང། མཏའ་གཅིག་ཏུ་དགེ་མཚན་ཆེ་བར་ཐག་གཅོད་དཀའ། འཛམ་གླིང་ཁྱིམ་གཅིག་དང་སྤྱི་ཚོགས་འཆམ་མཐུན་གྱིས་མི་རིགས་དོར་ནས་མིའི་རིགས་ཀྱི་གོ་ལ་གཅིག་བསྐྲུན་པར་ངེས་པར་མི་རིགས་རེ་རེ་ནས་རང་བཙན་བྱེད་དགོས་དོན་མེད། གཙོ་བོ་དམངས་གཙོ་དང་རང་དབང། འདྲ་མཉམ། ཞི་བདེ་ཟེར་བའི་འཚོ་བ་འདི་ཁ་ཡོད་ལག་ཡོད་དགོས་པ་རེད།
བོད་མི་ཚོ་རྡོག་རྩ་གཅིག་སྒྲིལ་གནང་དང་ཉིན་ཅིག་བོད་ལ་ཡང་གོ་སྐབས་དེ་ཡོང་ངེས་ཡིན།