བྷེལ་ཇམ་རྒྱལ་ས་སྤར་སིལ་དུ་རྟེན་གཞི་བྱས་པའི་ཡུ་རོབ་སྤྱི་མཐུན་ཚོགས་པའི་གྲོས་ཚོགས་མཐུས་མི་སྐུ་ཞབས་པོ་རོ་ཝེ་རཱ་ (Provera) ལགས་ཀྱིས། ཟླ་སྔོན་མར་ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་དང་བདེ་འཇཊ་སྲིད་བྱུས་ཆེས་མཐོའི་སྐུ་ཚབ་ལྕམ་ཨ་ཤི་ཊོན་ (Lady Ashton) ལགས་སུ། རྒྱ་ནག་གིས་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པར་སྐྱོན་བརྗོད་བྱ་དགོས་པའི་རེ་འདུན་བཏོན་པ་ལྟར། ཉེ་ཆར་ལྕམ་ཨ་ཤིན་ཊོན་ལགས་ཀྱིས་རྒྱ་གཞུང་ལ་བོད་མདོ་སྨད་རྔ་པ་ཀིརྟི་དགོན་པའི་གནས་སྟངས་ཐོག་སེམས་འཚབ་ཆེན་པོ་ཡོད་སྐོར་བརྗོད་འདུག་ལ། ཁོ་མོའི་འབོད་སྐུལ་ཡི་གེ་ནང་། ང་རང་གིས་ཀིརྟི་དགོན་པའི་དགེ་འདུན་པ་གཅར་རྡུང་དྲག་པོའི་འོག་རྐྱེན་འདས་སུ་གྱུར་པ་དང་། རྡུང་རྡེག་ཚབས་ཆེན་ཕོག་པ། དེ་བཞིན། དགོན་པ་བཀག་སྡོམ་བཅས་བྱས་པར་སེམས་འཚབ་ཆེན་པོ་བྱེད་ཀྱི་ཡོད། ཅེས་དང་།
གནད་དོན་དེའི་ཐོག་རྒྱ་ནག་པེ་ཅིང་དུ་ཡོད་པའི་ཡུ་རོབ་སྤྱི་མཐུན་ཚོགས་པས་དངོས་ཡོད་གནས་ཚུལ་ཤེས་ཐབས་བྱེད་ཀྱིན་ཡོད་ལ། རྒྱ་གཞུང་གིས་ཀིརྟི་དགོན་པ་སྒོ་བརྒྱབ་སྟེ་ཕྱི་མི་ས་ཁུལ་དེ་རུ་ཕྱིར་འཕུད་བྱས་མིན་ལ་མ་ལྟོས་པར། ཡུ་རོབ་སྤྱི་མཐུན་ཚོགས་པའི་སྐུ་ཚབ་ཀྱིས་མུ་མཐུད་ཀིརྟི་དགོན་པའི་གནས་ཚུལ་དངོས་ཤེས་རྟོགས་ཡོང་རྒྱུར་འབད་བརྩོན་བྱ་རྒྱུ་ཡིན། ཡུ་རོབ་སྤྱི་མཐུན་ཚོགས་པའི་ངོས་ནས་རྒྱ་གཞུང་གིས་བོད་མི་ཚོའི་ཆོས་དད་དང་ཤེས་ཡོན། རིག་གཞུང་སྲུང་སྐྱོབ་སོགས་ཀྱི་རང་དབང་ཐོག་ངེས་པར་དུ་བརྩི་སྲུང་ཞུ་དགོས་པའི་རེ་འདུན་ཐེངས་མང་བཏོན་ཡོད་པར་མ་ཟད། མ་འོངས་པར་ཡང་ང་ཚོས་རྒྱ་ནག་གི་འབྲེལ་ཡོད་དཔོན་རིགས་ཚོར་འཆར་ཅན་གྱི་འབྲེལ་བ་གནང་སྐབས། ཀིརྟི་དགོན་པའི་གནས་སྟངས་ཐོག་གླེང་སློང་གིས་དགོན་པ་དེར་དྲག་གནོན་མཚམས་འཇོག་ཡོང་བའི་རེ་འདུན་འདོན་རྒྱུ་ཡིན། ཞེས་བཀོད་འདུག
དཔལ་ལྡན་གྱིས་བསྡུས།
