གསོལ་བ་ཕུར་ཚུགས་སུ་འདེབས་རྒྱུའི་ཆེད་དུ་ཡིན།

འགྱུར་བ་འདི་ནི་དམངས་གཙོའི་འཕེལ་རིམ་དང་ཁྲིམས་བཟོའི་ལམ་ནས་བྱུང་བ་ཞིག་ཡིན་པས། དགའ་ལྡན་ཕོ་བྲང་གཞུང་གི་རྒྱུན་བར་མ་ཆད་པར་གནས་ཡོད་པ་ཁོ་ན་ལས་གསར་བརྗེ་གྱེན་ལངས་ལྟ་བུས་གཞུང་གསར་རྙིང་བརྗེ་བ་ཞིག་གཏན་ནས་མིན་པས། དགའ་ལྡན་ཕོ་བྲང་གཞུང་གི་སྲིད་དབང་རྒྱུན་མ་ཉམས་པར་གནས་ཡོད་པ་དང་། ༸གོང་ས་མཆོག་གི་སྐུ་དབང་དང་མཉམ་དུ་ཁྲིམས་མཐུན་གྱི་གནས་བབ་ཀྱང་རྩིས་སྤྲོད་གནང་བ་ཞིག་ཡིན་པས་ཁྲིམས་མཐུན་གྱི་གནས་བབ་ལ་ཉམས་ཆག་གང་ཡང་ཕྱིན་མེད་ཟེར།

དེ་རིང་ཞོགས་པའི་ཆུ་ཚོད་དགུ་དང་ཕྱེད་ཀའི་སྟེང་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་དེ་ངྷ་སྟེང་བོད་ཁྱིམ་ཚོགས་ཁང་དུ་དབུ་འཛུགས་གནང་ཡོད་ཅིང་། མཛད་སྒོའི་ཐོག་མར་བཀའ་བློན་ཁྲི་པ་མཆོག་དང་། བོད་མི་མང་སྤྱི་འཐུས་ཚོགས་གཙོ་གཞོན་གཉིས་བཅས་ནས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་འཁོད་རྗེས། ཚོགས་ཞུགས་པ་ཡོངས་ནས་བོད་རྒྱལ་ཁབ་ཆེན་པོའི་རྒྱལ་གླུ་གྱེར་འདོན་གནང་ཞིང་། དེའི་རྗེས་བོད་བསྟན་སྲིད་མི་རིགས་ཀྱི་དོན་དུ་ཚེ་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་འདུད་བཅས་གནང་སོང་།

ཚོགས་ཐོག་ཏུ་བཙན་བྱོལ་བོད་གཞུང་གི་དམངས་གཙོ་ཀ་བ་གསུམ་གྱི་མཛད་གཙོ་རྣམ་པ་དང་སྤྱི་འཐུས་ཡོངས། སྐབས་རྗེས་མའི་བདམས་ཐོན་བཀའ་བློན་ཁྲི་པ་དང་སྤྱི་འཐུས་རྣམ་པ། བཀའ་ཟུར་དང་སྤྱི་ཟུར་རྣམ་པ། བཙན་བྱོལ་བོད་ཏགཞུང་གི་གཞུང་ཞབས་ཟུང་དྲུང་ཡན་དང་། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། ཕྱི་རྒྱལ་བོད་རིགས་ཚོགས་པ་ཁག་གི་སྐུ་ཚབ། དེ་མིན་རྒྱལ་བལ་འབྲུག་གསུམ་དང་ཕྱི་རྒྱལ་ཁག་གི་དང་བླང་ཚོགས་ཞུགས་པ་དང་། ཆོས་རྒྱལ་ཁག་གི་སྐུ་ཚབ་བཅས་ཁྱོན་བསྡོམས་ཚོགས་ཞུགས་པ་ ༤༢༥ ཙམ་ཕེབས་ཡོད་འདུག  

ཚོགས་ཆེན་གྱི་ཐོག་མར་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་ཚོགས་ཆེན་དབུ་འཛུགས་ཀྱི་གཏམ་བཤད་གནང་དོན། དེ་རིང་ང་ཚོ་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་འཆར་ཟིན་དུ་འཁོད་པའི་བཅའ་ཁྲིམས་ཀྱི་སྔོན་གླེང་དང་དོན་ཚན་དང་པོའི་ཐོག་༸རྒྱལ་བ་རིན་པོ་ཆེར་གསོལ་འདེབས་སྙན་ཞུ་འབུལ་རྒྱུ་དང་། བཙན་བྱོལ་བོད་མིའི་བཅའ་ཁྲིམས་རིན་པོ་ཆེར་བསྐྱར་བཅོས་གཏོང་རྒྱུའི་སྐོར་ལ་གཞི་རིམ་མང་ཚོགས་གྱི་བསམ་ཚུལ་བསྡུ་རུབ་ཞུ་རྒྱུ་དམིགས་ཡུལ་དུ་བཟུང་ནས་ཚོགས་པ་རེད།  ཐེངས་འདིའི་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་ངོས་ནས་བཅའ་ཁྲིམས་བསྐྱར་བཅོས་ཀྱི་ཟིན་བྲིས་ཁག་གཉིས་བཟོས་ཏེ། ཟིན་བྲིས་དང་པོའི་ཐོག་བཟོ་བཅོས་ཐེངས་བཞི་དང་ཟིན་བྲིས་གཉིས་པར་བཟོ་བཅོས་ཐེངས་གཉིས་ཞུས་པ་རེད།

ཟིན་བྲིས་དང་པོའི་ནང་དོན་རོབ་ཙམ་འགྲེལ་བཤད་ཞུས་ན། ༸རྒྱལ་བ་རིན་པོ་ཆེ་དང་། བོད་དང་བོད་མིའི་དབར་ཁ་འབྲལ་ཐབས་མེད་པ་དང་། ལོ་རྒྱུས་དང་མངའ་དབང་ལྡན་པའི་བོད་མིའི་མངོན་འདོད་ཀྱི་ཐོག་ནས་༸རྒྱལ་བ་རིན་པོ་ཆེར་རང་ཆས་སུ་ཡོད་པའི་མཛད་འགན་ཁག་ཅིག་བཅའ་ཁྲིམས་སུ་འགོད་དགོས་པ་དངོས་ཡོད་གནས་སྟངས་དང་དུས་ཀྱི་དགོས་མཁོར་མཐོང་། ད་རེས་ཚོགས་ཆེན་གྱི་བརྗོད་གཞི་གཙོ་ཆེ་ཤོས་ཀྱང་གནད་དོན་འདི་གཉིས་ཀྱི་སྐོར་ལ་ཡིན་པ་དང་། བཀའ་སྤྱི་གཉིས་ནས་ལས་རིམ་སྒྲིག་སྐབས་ཚོགས་ཆེན་གྱི་དུས་ཚོད་མང་ཆེ་བ་གནད་དོན་འདིའི་ཐོག་ལ་གོ་སྒྲིག་ཞུས་ཡོད། ཅེས་གསུང་བྱུང་།

ཚོགས་གཙོ་མཆོག་གིས་ཟིན་བྲིས་གཉིས་པའི་སྐོར་གསུངས་དོན། ཟིན་བྲིས་གཉིས་པའི་ནང་། དེང་སང་ཡོངས་གྲགས་སུ་ཡུལ་མིའི་རྒྱལ་ཁབ་ཅེས་འབོད་པའི་འགྲོ་སྟངས་དང་མཐུན་པ་ཡོང་ཆེད། མང་གཙོའི་ཀ་བ་གསུམ་གྱི་སྟེང་དུ་མི་རིགས་འགན་འཛིན་ཞིག་འདེམས་བསྐོའི་ཆ་རྐྱེན་བསྐྲུན་ཡོད། དེ་ལྟའི་མི་རིགས་འགན་འཛིན་ཞིག་བསྐོ་གཞག་བྱེད་པ་ལ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་དབུས་ཁྲིམས་ཞིབ་པ་རྣམ་པ་དང༌། བཀའ་བློན་ཁྲི་པའི་དབུས་བཀའ་བློན་རྣམ་པ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོའི་དབུས་སྤྱི་འཐུས་རྣམ་པ་བཅས་ནས་གསང་བའི་འོས་འདེམས་བྱེད་དགོས། དེ་ཡང་མི་རིགས་འགན་འཛིན་གྱི་འོས་ཆོས་སུ་རང་ལོ་ ༥༥ ཕུད། གཞན་ཕལ་ཆེ་བ་བཀའ་བློན་ཁྲི་པ་དང་བཀའ་བློན་ལྟར་ཡིན།  སྤྱིའི་ཆ་ནས་བཤད་ན། བཅའ་ཁྲིམས་བསྐྱར་བཅོས་ཀྱི་ཟིས་བྲིས་དང་པོའི་ནང་། ད་ལྟའི་དངོས་ཡོད་གནས་སྟངས་དང་དགོས་མཁོ་གཞི་ལ་བཞག་སྟེ་བསྐྱར་བཅོས་ཞུས་པ་ཞིག་ལས། རྒྱལ་ཁབ་ཀྱི་དབུ་ཁྲིད་མི་མང་གིས་ཐད་ཀར་འོས་འདེམས་བྱ་རྒྱུའི་ཆ་རྐྱེན་ཡོད་པའི་ཡོངས་གྲགས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་ཆགས་ཐུབ་མེད། ཅེས་གསུངས་བྱུང་།

དེའི་རྗེས་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གཏམ་བཤད་གནང་དོན། ད་རེས་ཚོགས་ཆེན་འདིའི་དགོས་དམིགས་གཙོ་བོ། རིང་མིན་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་འཕར་མའི་ནང་བཙན་བྱོལ་བོད་མིའི་བཅའ་ཁྲིམས་བསྐྱར་བཅོས་གནང་སྐབས་བཅའ་ཁྲིམས་རིན་པོ་ཆེའི་དོན་ཚན་ཁག་གི་ནང་གསལ་༸གོང་ས་མཆོག་གི་སྐུ་དབང་དང་འབྲེལ་བའི་དོན་ཚན་ཡོངས་རྫོགས་བསྐྱར་བཅོས་གནང་སྟེ་བཅའ་ཁྲིམས་ཀྱི་སྒྲོམ་གཞི་ལ་འགྱུར་བ་འགྲོ་རྒྱུ་ཡིན་སྟབས། དེའི་སྐབས་༸གོང་ས་མཆོག་དང་བོད་མི་རིགས་ཀྱི་བར་བཅའ་ཁྲིམས་ཀྱི་བརྒྱུད་ལམ་ནས་འབྲེལ་བའི་ཆ་རྐྱེན་གཏན་མེད་དུ་སོང་ན་བློས་འགན་བཟོད་བྲལ་ལ་བརྟེན། ༸གོང་ས་ཆེན་པོའི་ཐུགས་རྗེ་ལྕགས་ཀྱུ་དང་བོད་མི་རིགས་ཀྱི་དད་པའི་ཨ་ལོང་འབྲལ་ཐབས་མེད་པའི་འབྲེལ་བ་དེ་བཅའ་ཁྲིམས་ཀྱི་ཚིག་བརྗོད་དུ་གསལ་བ་ཞིག་ཡོང་ཐབས་དང་། དེའི་ཆེད་བོད་མི་ཡོང་རྫོགས་བསམ་འདུན་གཅིག་མཐུན་གྱི་ལམ་ནས་༸གོང་ས་མཆོག་ལ་དེ་འདྲའི་ཚིག་བརྗོད་ཅིག་འགོད་འཐུས་བཀའ་འཁྲོལ་ཡོང་བའི་གསོལ་བ་ཕུར་ཚུགས་སུ་འདེབས་རྒྱུའི་ཆེད་དུ་ཡིན་པ་ཚང་མས་དགོངས་གསལ་རེད། ཅེས་དང་།

ཁོང་གིས་མུ་མཐུད་དུ་གསུངས་དོན། རྒྱལ་སྤྱིའི་ཁྲིམས་ལུགས་གཞི་བཟུང་རང་དབང་ཅན་གྱི་གཞུང་ངམ་བཙན་བྱོལ་གྱི་གཞུང་གང་འདྲ་ཞིག་ཡིན་རུང་ཆབ་སྲིད་ཀྱི་ལམ་སྲོལ་དང་གཞི་རིམ་ཁྲིམས་གཞི་ཁག་དུས་ བསྟུན་འགྱུར་བ་ཇི་ཙམ་བཏང་རུང་མང་ཚོགས་ཀྱི་མང་མོས་རྒྱབ་སྐྱོར་ཡོད་པ་དེ་སྲིད་དུ་ཁྲིམས་མཐུན་གྱི་གནས་བབ་འགྱུར་བ་འགྲོ་གཞི་མེད་ནའང་། འཛིན་སྐྱོང་གི་རྒྱུན་མུ་མཐུད་མ་གནས་པར་བར་མཚམས་ཆད་པ་ཡིན་ཚེ། གཞུང་གསར་པས་རང་གི་ནུས་པས་ཁྲིམས་མཐུན་གྱི་གནས་བབ་བསྐྲུན་མ་ཐུབ་ན་གཞུང་རྙིང་པའི་ཁྲིམས་མཐུན་གྱི་གནས་བབ་རྒྱུན་གནས་མེད་པར་ངོས་འཛིན་བྱེད་སྲིད། རང་རེའི་གནས་སྟངས་ལ་མཚོན་ན་བོད་ཀྱི་ཡུལ་མི་མང་ཆེ་བ་བོད་ནང་ཡོད་པ་དང་། དེ་དག་བཙན་བྱོལ་སྒྲིག་འཛུགས་ཀྱི་ཆབ་སྲིད་དང་འཛིན་སྐྱོང་གི་ལས་རིམ་ནང་ཐད་ཀར་ཆ་ཤས་ལེན་མི་ཐུབ་པའི་དབང་གིས་དགའ་ལྡན་ཕོ་བྲང་གཞུང་གི་རིགས་རྒྱུན་ཆད་ཚེ། བཙན་བྱོལ་བོད་མི་རྐྱང་པས་ཁྲིམས་མཐུན་གྱི་གནས་བབ་ཡོད་པའི་བོད་གཞུང་གསར་པ་ཞིག་བསྐྲུན་ཐུབ་ཐབས་མེད།

བཀའ་ཁྲི་མཆོག་གིས་མུ་མཐུད་དུ་གསུངས་དོ། ༸གོང་ས་མཆོག་གི་སྐུ་དབང་འོས་བསྡུ་བྱས་པའི་མགོ་ཁྲིད་ལ་བཅའ་ཁྲིམས་གཞིར་བཟུང་སྐུ་དབང་ཆ་ཚང་ཡོད་པའི་༸གོང་ས་མཆོག་རང་གིས་ཐུགས་འདོད་ལྟར་རྩིས་སྤྲོད་གནང་བ་དང་། རྩིས་ལེན་ཞུ་མཁན་བཅའ་ཁྲིམས་གཞི་བཟུང་ཁྲིམས་མཐུན་འོས་བསྡུའི་ལམ་ནས་ཐོན་པའི་མང་ཚོགས་ཀྱི་བཀའ་ལུང་ཡོད་པ་ཡིན་པ། རྩིས་སྤྲོད་གནང་བའི་བརྒྱུད་རིམ་ཡང་བཅའ་ཁྲིམས་བསྐྱར་བཅོས་ཀྱི་ཁྲིམས་བཟོའི་ལས་རིམ་བརྒྱུད་ནས་གནང་བ་ཡིན་པ་བཅས་ལ་བརྟེན། འགྱུར་བ་འདི་ནི་དམངས་གཙོའི་འཕེལ་རིམ་དང་ཁྲིམས་བཟོའི་ལས་རིམ་གྱི་བརྒྱུད་ལམ་ནས་བྱུང་བ་ཞིག་ཡིན་པས། དགའ་ལྡན་ཕོ་བྲང་གཞུང་གི་རྒྱུན་བར་མ་ཆད་པར་གནས་ཡོད་པ་ཁོ་ན་ལས་གསར་བརྗེ་གྱེན་ལངས་ལྟ་བུས་གཞུང་གསར་རྙིང་བརྗེ་བ་ཞིག་གཏན་ནས་མིན་པས། དགའ་ལྡན་ཕོ་བྲང་གཞུང་གི་སྲིད་དབང་གི་རྒྱུན་མ་ཉམས་པར་གནས་ཡོད་པ་དང་། ༸གོང་ས་མཆོག་གི་སྐུ་དབང་དང་མཉམ་དུ་ཁྲིམས་མཐུན་གྱི་གནས་བབ་ཀྱང་རྩིས་སྤྲོད་གནང་བ་ཞིག་ཡིན་པས་ཁྲིམས་མཐུན་གྱི་གནས་བབ་ལ་ཉམས་ཆག་གང་ཡང་ཕྱིན་མེད། ཅེས་གསུངས་སོང་།

བཀའ་བློན་ཁྲི་པ་མཆོག་གིས་བཅའ་ཁྲིམས་བསྐྱར་བཅོས་ནང་གི་སྔོན་གླེང་དེ་གལ་ཆེན་ཡིན་ཚུལ་གསུངས་དོན། མཁས་དབང་འགའ་ཞིག་གིས་ད་ལན་བཅའ་ཁྲིམས་ཀྱི་དོན་ཚན་རེ་ཟུང་ཙམ་མ་ཡིན་པར་སྒྲོམ་གཞི་འགྱུར་བ་འགྲོ་རྒྱུ་ཡིན་སྟབས་བཅའ་ཁྲིམས་བསྐྱར་བཅོས་གནང་བ་ལས་བཅའ་ཁྲིམས་གསར་པ་ཞིག་གཏན་འབེབས་གནང་ན་ལེགས་ཚུལ་གསུང་མཁན་བྱུང་ཡོད་ཀྱང་། ད་ཡོད་བཅའ་ཁྲིམས་ལེའུ་བཅུ་གཅིག་པའི་ཆ་རྐྱེན་འོག་བཅའ་ཁྲིམས་བསྐྱར་བཅོས་གནང་རྒྱུ་ལས་བཅའ་ཁྲིམས་གསར་པ་གཏན་འབེབས་གནང་རྒྱུ་འོས་འཚམས་མིན་པའི་བསམ་ཚུལ་ཤུགས་ཆེ་བཏོན་དགོས་པའི་རྒྱུ་མཚན་ཡང་ཕྱི་ལོ་ ༡༩༩༡ ལོར་གཏན་ལ་ཕབ་པའི་བཅའ་ཁྲིམས་ཀྱང་ང་ཚོའི་ཁྲིམས་མཐུན་གྱི་གནས་བབ་གྱི་འབྱུང་ཁུངས་ཤིག་ཡིན་པས་དེ་སྲུང་སྐྱོབ་དགོས་པ་འདི་ཡིན། འོན་ཀྱང་བྱུང་རིམ་འདི་དག་གསལ་སྟོན་བྱེད་པའི་ཁྲིམས་ཀྱི་ནུས་ཤུགས་ལྡན་པའི་བརྗོད་ཚིག་གཅིག་བཅའ་ཁྲིམས་རང་གི་ཆ་ཤས་སུ་ཡོད་ན་ནུས་པ་ཆེ་བ་དང་། ཁ་གསལ་བ། དོགས་པའི་གཞི་མེད་པ་བཅས་ཡོང་རྒྱུ་ལ་དགོངས་ནས་བཅའ་ཁྲིམས་ཀྱི་ཆ་ཤས་སུ་གཏོགས་པའི་སྔོན་གླེང་འདི་གསར་འཇུག་གནང་འདུག འདིའི་དགོས་པ་དང་དམིགས་ཡུལ་ལ་ཚང་མས་སྤྱི་མོས་གནང་རྒྱུའི་ཡིད་ཆེས་ཡོད་པ་མ་ཟད། བརྗོད་ཚིག་ལའང་བཟོ་བཅོས་ཆེན་པོ་མི་དགོས་པའི་རེ་བ་ཡོད། འོན་ཀྱང་ལེགས་བཅོས་ཀྱི་དགོངས་འཆར་གནང་ན་རྗེས་སུ་ཡི་རངས་ཞུ་རྒྱུ་ཡིན། ཞེས་རེད་འདུན་བཏོན་སོང་།

བཀའ་ཁྲུ་མཆོག་གིས་བཅའ་ཁྲིམས་བསྐྱར་བཅོས་ལས་དོན་ཚན་དང་པོའི་སྐོར་ལ་གསུངས་དོན། ༸གོང་ས་སྐྱབས་མགོན་སྐུ་ཕྲེང་ན་རིམ་གྱི་མཛད་འགན་དང་སྐུ་དབང་དང་འབྲེལ་བའི་ དོན་ཚན་ཡོངས་རྫོགས་བསྐྱར་བཅོས་འགྲོ་རྒྱུར་བརྟེན་བཅའ་ཁྲིམས་ཀྱི་སྒྲོམ་གཞིའི་ནང་༸གོང་ས་མཆོག་གི་མཚན་ཙམ་ཡང་མ་ཐོན་ཚེ། བོད་མིའི་ཆབ་སྲིད་ཀྱི་རང་བཞིན་དང་༸གོང་ས་མཆོག་གི་དབར་འབྲེལ་བ་གང་ཡང་མེད་པའི་རྣམ་འགྱུར་ཞིག་འཐོན་ན་བོད་མིའི་འཕྲལ་ཕུགས་ཀྱི་ཁེ་ཕན་ལ་གནོད་སྐྱོན་ཤུགས་ཆེ་ཡོང་རྒྱུ་མ་ཟད། སྐབས་འཕྲལ་གྱི་དཀའ་ངལ་དུ་མ་ཞིག་ཀྱང་ཡོང་རྒྱུར་ངེས་པས་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་བོད་མི་རིགས་ཀྱི་མགོན་སྐྱབས་དང་མཚོན་རྟགས་ ཡིན་པའི་དངོས་དོན་གསལ་བར་སྟོན་ཆེད་དོན་ཚན་དང་པོ་བསྐྱར་བཅོས་ཀྱིས་བརྗོད་ཚིག་གསལ་པོ་བཀོད་འདུག དོན་ཚན་འདི་༸གོང་ས་མཆོག་གིས་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ཐོག་བསྩལ་བའི་གསུང་འཕྲིན་ནང་། ༼ངོས་རང་བོད་ཀྱི་ཡུལ་མི་ཞིག་ཡིན་པ་དང་། བོད་མི་རིགས་དང་རྒྱལ་དབང་སྐུ་ཕྲེང་དབར་ལས་སྨོན་གྱི་འབྲེལ་བའི་དབང་གིས་རྒྱ་ཆེའི་མང་ཚོགས་ཚང་མའི་ཡིད་ཆེས་བློ་གཏད་ཡོད་པ་དེ་སྲིད་དུ་ངོས་ནས་བསྟན་སྲིད་སྤྱི་དོན་ཡལ་བར་འདོར་མི་སྲིད་ཅིང་༽ཞེས་གསུངས་པའི་དགོངས་དོན་ལ་འཁྲིལ་ནས་༸ གོང་ས་མཆོག་བོད་ཀྱི་ཡུལ་མི་ཙམ་མ་ཡིན་པར་ཁྱད་པར་འཕགས་པའི་ཡུལ་མི་དང་། མི་རིགས་ཀྱི་མགོན་སྐྱབས་དང་མཚོན་རྟགས་ཡིན་པའི་དངོས་དོན་གྱི་གནས་ལུགས་དོན་ ཚན་འདིའི་ནང་གསལ་འཁོད་གནང་བ་འདིས། བོད་མི་རིགས་དང་༸གོང་ས་སྐྱབས་མགོན་སྐུ་ཕྲེང་བཅུ་བཞི་པའི་དབར་མགོ་དང་མཇིང་པ་བྲལ་ཐབས་མེད་པའི་འབྲེལ་བའི་གནས་ལུགས་བཅའ་ཁྲིམས་ཀྱི་ནང་གཞི་རྩ་སྐྲུན་ཐུབ་པ་ཞིག་ཡོང་རྒྱུའི་རེ་བ་ཡོད་པ་ཆགས་འདུག དོན་ཚན་འདིའི་ནང་དོན་ལ་ཚང་མས་སྤྱི་མོས་གནང་བའི་ཡིད་ཆེས་ཡོད་ཅིང་། བརྗོད་ཚིག་ནང་ལེགས་བཅོས་དང་གསར་སྣོན་གྱི་དགོངས་འཆར་ཡོད་ན་ངེས་པར་གནང་དགོས།

གསར་འགོད་པ། དོན་གོ