བོད་ལ་ཕར་ལོག་པའི་དུས་ཤིག་ཤར་སྐབས་ལས་ཀ་ཅི་ཞིག་བྱ་དགོས་ཀྱང་བྱེད་ཆོག་ཆོག་ཅིག་བཟོ་མ་ཐུབ་པ་ཡིན་ན། ང་ཚོ་ཁ་སྟོང་པ་དང་ལག་སྟོང་བྱས་བོད་ལ་ལོག་ཚེ་དམིགས་བསལ་བྱེ་བྲག་ལས་རྒྱུ་ཅི་ཡང་ཡོད་པ་མ་རེད། གསུངས་སོང་།
ཕྱི་ཟླ་ ༣ ཚེས་ ༡༡ ཉིན་ ༸གོང་ས་མཆོག་གིས་གྲོས་ཚོགས་སུ་གསུང་འཕྲིན་བསྩལ་ཏེ་ཆབ་སྲིད་དང་འཛིན་སྐྱོང་གི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་བྱེད་དགོས་པའི་བཀའ་སློབ་གནང་བ་ལྟར། བཙན་བྱོལ་བོད་གཞུང་གི་བཅའ་ཁྲིམས་བསྒྱུར་བཅོས་གཙོས་པའི་གནས་སྟངས་མང་པོ་ཞིག་ཐད་ལ་འགྱུར་ལྡོག་ཆེན་པོ་འགྲོ་བཞིན་པར་བརྟེན། བཀའ་ཟུར་མདོ་བསྔགས་བསྟན་འཛིན་ལགས་སུ་བོད་ཀྱི་བདེན་དོན་འཐབ་བརྩོད་དང་འབྲེལ་བའི་གནད་དོན་འགའི་ཐད་བཀའ་འདྲི་ཞུས་ཡོད།
དྲི་བ། ལོ་རྒྱུས་རང་བཞིན་ལྡན་པའི་༸གོང་ས་མཆོག་གི་སྐུ་དབང་དང་འབྲེལ་བའི་བཅའ་ཁྲིམས་བསྐྱར་བཅོས་ཀྱི་ཐད་ལ། བོད་ཕྱི་ནང་གཉིས་ཀྱི་མི་མང་ཁྲོད་གླེང་སློང་ཤུགས་ཆེན་པོ་ཡོང་གིན་འདུག འདིའི་ཐད་སྐུ་ཉིད་ལ་དགོངས་ཚུལ་ཅི་ཞིག་ཡོད་དམ།
ལན། ༸གོང་ས་མཆོག་གིས་ཆབ་སྲིད་ཀྱི་ཐུགས་འགན་བཞེས་ཀྱི་མིན་པའི་གསུང་འཕྲིན་བཀའ་སློབ་བསྩལ་གནང་པ་ལྟར། ད་ལྟ་བསྐྱར་དུ་ཞུ་བའི་གོ་སྐབས་མེད་པ་ལྟ་བུ་ཞིག་ཆགས་འདུག་ལ། ཉེ་སྔོན་སྤྱི་འཐུས་ལྷན་ཚོགས་ཀྱིས་གསོལ་འདེབས་སྙན་འབུལ་ཞུས་ཀྱང་དགོངས་བཞེས་གནང་མེད་པ་རེད། ཡིན་ནའང་། ཆོས་ཕྱོགས་ཀྱི་ཐོག་ནས་༸རྒྱལ་བ་སྐུ་ཕྲེང་དང་པོ་ནས་བཟུང་འཕགས་པ་སྤྱན་རས་གཟིགས་ཀྱི་རྣམ་སྤྲུལ་ཡིན་པ་ཙམ་དུ་མ་ཟད། ད་ལྟའི་སྐུ་ཕྲེང་བཅུ་བཞི་པ་དང་མ་འོངས་སྐུ་ཕྲེང་བཅོ་ལྔ་པ་ཡིན་ནའང་། ཆོས་ཕྱོགས་ཀྱི་དབུ་ཁྲིད་ཡིན་པ་དེ་བཅའ་ཁྲིམས་ནང་གསལ་མེད་པ་ཡིན་དུས།དེ་དག་གསལ་བོ་ཞིག་དགོས་པའི་བསམ་ཚུལ་ཤུགས་ཆེན་པོ་ཞུ་བཞིན་ཡོད། རྒྱུ་མཚན་ནི་མ་འོངས་པར་རྒྱལ་དབང་སྐུ་ཕྲེང་བཅོ་ལྔ་པ་དེ་སུས་ངོས་འཛིན་དང་བདག་པོ་རྒྱག་པ་བཅས་ལ་དམིགས་བསལ་གྱི་ཆ་རྐྱེན་ཞིག་མེད་པ་ཡིན་ན། བླ་ན་མེད་པ་དང་གོང་ན་མེད་པ་ཞེས་པའི་ཚིག་དེ་དག་ནི་ཁྲིམས་ལུགས་དང་འབྲེལ་བའི་ཚིག་ཅིག་ཆགས་མེད་སྟབས། དབུ་ཁྲིད་དང་དབུ་འཛིན་ཡིན་པ་ཞིག་གསལ་ཁ་དོད་པོ་དགོས་ཀྱི་འདུག གཉིས་པ། ད་ཐེངས་ཀྱི་ཚོགས་འདུ་འདི་མ་ཚོགས་རང་འཚོགས་ཤིག་གི་གནས་སྟངས་འོག་འཚོགས་བཞིན་ཡོད་པ་རེད་ལ། ཐག་གཅོད་ཅིག་ཀྱང་གནང་དགོས་ཀྱི་ཡོད་པ་རེད། ཡིན་ནའང་། གཟབ་ནན་གྱི་སྒོ་ནས་ལོ་གཅིག་གཉིས་རིང་ག་ལེར་བསྐྱར་བཅོས་བྱས་ཏེ། གཏན་འབེབས་ངོ་མ་དེ་ལོ་ཁ་ཤས་ཀྱི་རྗེས་ལ་གནང་རྒྱུ་བྱུང་ན། འཚབ་བེ་འཚུབ་བེ་ཡི་ལས་དོན་མ་ཡིན་པར་བརྟན་པོ་ཡོང་རྒྱུར་ཁྱད་པར་ཆེན་པོ་ཡོད་པ་རེད། དེ་བཞིན་སྒྲིག་འཛུགས་དང་མི་རིགས་ཞེས་པའི་ཚིག་དེ་ཚོའི་སྐོར་ལ་བསམ་འཆར་མང་པོ་ཡོང་གི་འདུག ལྷག་པར་དུ་བོད་བཙན་བྱོལ་གཞུང་ཟེར་བ་དེ་བོད་གཞུང་ཞེས་བཏགས་པ་ཡིན་ན། བོད་ཕྱི་ནང་གཉིས་ལ་ཁྱབ་ཐུབ་ཀྱི་ཡོད་པ་རེད། བཙན་བྱོལ་གཞུང་དང་སྒྲིག་འཛུགས་ཞེས་བརྗོད་དུས་བོད་མི་བཙན་བྱོལ་བ་གཅིག་པུའི་གཞུང་ལ་གཞི་འཛིན་བྱ་བཞིན་པའི་བཟོ་འདྲ་ཆགས་པ་ཡིན་ན། དེ་ཏག་ཏག་བསྡད་མི་འདུག་བསམ་སོང་། དྲི་བ། ད་ལྟའི་བར་བོད་རྒྱ་འབྲེལ་མོལ་དེ་༸གོང་ས་མཆོག་གི་སྐུ་ཚབ་ཀྱི་མཚན་ཐོག་ནས་གནང་གི་ཡོད་པས། ༸གོང་མཆོག་གིས་སྲིད་འགན་མ་བཞེས་ཚེ་བོད་རྒྱ་འབྲེལ་མོལ་ལ་འགྱུར་བ་ཐེབས་སྲིད་མིན་ཐད་སྐུ་ཉིད་ལ་དགོངས་ཚུལ་ག་རེ་ཡོད་དམ།
ལན། དང་པོ།ད་ལྟའི་རྒྱ་ནག་གི་བཤད་སྟངས་ལ་བལྟས་ན་དེ་ཙམ་གྱི་འགྱུར་བ་འགྲོ་བཞིན་མི་འདུག་བསམ་སོང་། གཉིས་པ།གལ་སྲིད་འགྱུར་བ་ཞིག་འགྲོ་དགོས་པར་ཆ་བཞག་ནའང་། ད་ལྟ་ཐེ་ཝན་དང་རྒྱ་ནག་བར་ཚོང་འབྲེལ་གྱི་ཆིངས་ཡིག་འཇོག་པ་དང་ཕར་འགྲོ་ཚུར་འོང་བྱེད་བཞིན་ཡོད་པ་རེད།དེ་བཞིན་གོ་མིན་ཏང་རྩ་བ་ཉིད་ནས་ངོས་ལེན་བྱེད་ཀྱིན་མེད་ནའང་། གོ་མིན་ཏང་གི་ཚབ་ལ་ཚོགས་ཆུང་དེ་འདྲ་བརྒྱུད་དེ་གྲོས་མོལ་གནང་དང་གནང་བཞིན་ཡོད་པས། ང་ཚོའི་ངོས་ནས་ཀྱང་དེ་འདྲ་ཞིག་བཟོ་མ་ཐུབ་པ་ཡོད་པ་མ་རེད། རྒྱ་དམར་གཞུང་གིས་འཛམ་བུ་གླིང་གི་རྒྱལ་ཁབ་དང་དཔོན་རིགས།རྒྱ་རིགས་ཤེས་ཡོན་ཅན་ཚང་མའི་གནོན་ཤུགས་འོག་འབྲེལ་མོལ་མ་གནང་ག་མེད་ཅིག་ཆགས་ཡོང་གི་ཡོད་སྟབས། མ་འོངས་པར་བརྒྱུད་ལམ་དེ་འདྲ་ཞིག་གི་སྟེང་ལ་ང་ཚོས་འཆར་གཞི་ཞིག་བསྒྲིག་པ་ཡིན་ན། དེ་རྒྱ་མིས་ངོས་ལེན་བྱེད་ཐུབ་ཀྱི་རེད་བསམ་པ་འདུག
དྲི་བ། སྔ་ཕྱིར་བོད་རྒྱ་འབྲེལ་མོལ་ཐེངས་དགུ་གནང་བར་མ་ཟད། རྒྱ་གཞུང་གི་རྩ་ཁྲིམས་ཀྱི་སྒྲོམ་གཞིའི་འོག་བོད་མི་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་ཞིག་ཀྱང་ཕུལ་ཟིན་པ་རེད། ཡིན་ནའང་། རྒྱ་གཞུང་གིས་ངོས་ལེན་མ་བྱས་པའི་རྐྱེན་གྱིས་གྲུབ་འབྲས་མངོན་གསལ་ཞིག་ཐོན་མ་ཐུབ་པ་རེད། སྐུ་ཉིད་ལ་ད་ལྟའི་བོད་རྒྱ་འབྲེལ་མོལ་གྱི་གནས་བབས་ཐད་དགོངས་ཚུལ་ག་རེད་ཡོད་དམ།
ལན། ད་ལྟའི་བོད་རྒྱ་ཞི་མོལ་གྱི་གནས་སྟངས་དེ་རྒྱ་གཞུང་གི་ངོས་ནས་ཡ་ལན་མ་བྱས་པ་ཞིག་ཆགས་ཡོད། ཡིན་ནའང་།ང་ཚོས་དབུ་མའི་ལམ་གྱི་དགོངས་གཞི་དེ་ག་དུས་ཡིན་ཡང་འདོར་རྒྱུ་ཡོད་པ་མ་རེད། ངས་བསམ་ན་ད་ལྟའི་རྒྱ་ནག་སྤྱི་ཚོགས་རིང་ལུགས་ཀྱི་དུས་སྐབས་འདིར། རྒྱ་གཞུང་གིས་ག་དུས་ཡིན་ཡང་དུས་ཚོད་སྐྱེལ་ཐབས་ཤིག་མ་གཏོགས་གྲོས་མོལ་ཕུན་སུམ་ཚོགས་པོ་ཞིག་གནང་གི་མ་རེད། རྒྱུ་མཚན་ནི། བོད་ནང་གཏེར་ཁ་དང་ཆུ་ཕུན་སུམ་ཚོགས་པོ་ཡོད་པ་དང་། མི་འབོར་སྐྱེ་འཕེལ་གཏོང་སའི་ས་ཆ་རྒྱ་ཆེན་པོ་ཡོད་པ། དམག་དོན་གྱི་སྟེང་ནས་ཀྱང་ས་བབས་གལ་ཆེན་ཡིན་པ་དེ་རྒྱ་གཞུང་གིས་བློས་གཏོང་རྩ་བ་ཉིད་ནས་བྱེད་ཀྱི་མ་རེད། ད་ལྟའི་ཆར་རྒྱ་གཞུང་གིས་དུས་ཚོད་སྐྱེལ་ཐབས་ཁོ་ནའི་ཐོག་བསམ་བློ་གཏོང་གི་ཡོད་པ་རེད། ཡིན་ནའང་། དེང་སྐབས་རྒྱ་ནག་ནང་ལ་འགྱུར་བ་ཆེན་པོ་ཞིག་འགྲོ་བཞིན་པར་མ་ཟད། མང་ཚོགས་ཀྱི་བསམ་བློར་ཡང་འགྱུར་ལྡོག་གསར་བ་ཞིག་ཆས་བཞིན་ཡོད་སྟབས། མ་འོངས་པར་རྒྱ་གཞུང་མགོ་ཁྲིད་ཚོས་བསམ་བློ་མི་གཏོང་རང་གཏོང་ཆགས་ཡོང་གི་རེད། གཅིག གུང་བྲན་ཏང་གི་རྩ་བའི་རྩ་འཛུགས་ཀྱི་སྲིད་ཇུས་ལ་མི་མང་འདྲ་མཉམ་དང་། འཚོ་བ་ཁོད་སྙོམས་པོ་ཡོང་དགོས་རྒྱུ་དེ་མ་ཁེ་སི་རིང་ལུགས་ལྟ་གྲུབ་ཀྱི་ནང་དོན་གཙོ་བོ་རེད། ད་སྐབས་རྒྱ་ནག་འགོ་ཁྲིད་ཚོས་རང་གི་རྐུབ་སྟེགས་དང་ཁེ་ཕན་བརྟན་པོ་བཟོ་ཆེད། དྲག་པོའི་ཐབས་ལམ་དང་ལྐོག་ཟ་རུལ་སུངས་བྱས་ཏེ་ད་ལྟ་རྒྱ་ནག་ནང་དབུལ་ཕྱུག་གི་ཧེ་བག་ཆེན་པོ་ཤོར་ཡོད། མ་གཞི་སྤྱི་ཚོགས་ནང་སྟོབས་ཤུགས་ཆེ་ཤོས་ཏེ་མི་མང་གི་སྟོབས་ཤུགས་ཡིན་པའི་དབང་གིས། རྒྱ་ནག་མི་མང་གཉིད་སད་ཡོང་རྒྱུར་རྒྱ་གཞུང་དཔོན་རིགས་ཚོ་ཞེད་སྣང་སྐྱེས་བཞིན་ཡོད་པར་མ་ཟད། ༸གོང་ས་མཆོག་གི་དབུ་མའི་ལམ་ནི་མི་མང་གི་ཁེ་ཕན་དང་འབྲེལ་བ་ཆགས་བསྡད་ཡོད་སྟབས། ཁོ་ཚོས་ ༸གོང་ས་མཆོག་ལ་མཚན་སྨོད་འདྲ་མིན་བྱས་ཏེ་མི་མང་སེམས་ནང་ནས་ནག་བསུབ་གཏོང་ཐབས་ཀྱི་སྲིད་ཇུས་སྤེལ་གྱིན་ཡོད་པ་རེད། གཉིས། རྒྱ་ནག་གུང་ཁྲན་ཏང་དེ་མགོ་རྟིང་ལོག་རྗེས་དམངས་གཙོའི་ལམ་ལ་མ་འགྲོ་རང་འགྲོ་རེད།དེ་དུས་དབུ་མའི་ལམ་གཞི་ནས་རྩ་བ་ཚུགས་ཐུབ་པའི་རེ་བ་ཞིག་ཤར་ཡོང་གི་རེད།
དྲི་བ། བོད་རྒྱའི་གནད་དོན་དེ་ད་དུང་ལོ་བཅུ་ཕྲག་འགའི་རིང་སེལ་མ་ཐུབ་པའི་གནས་སྟངས་བྱུང་ཚེ། ༸གོང་ས་མཆོག་སྐུ་འཚོ་བཞུགས་མེད་པའི་དཀའ་ཉེན་གྱི་དུས་སྐབས་ཤིག་ཡོང་སྲིད་པ་རེད། མ་འོངས་པར་དཀའ་ལ་གདོང་ལེན་ཆེད་ད་ལྟ་ནས་བོད་མི་ཡོངས་ཀྱིས་གྲ་སྒྲིག་དང་དོ་སྣང་བྱེད་དགོས་པ་ལས་དོན་གང་དག་མཐོང་གི་འདུག་གམ།
ལན། ངས་བསམ་པར་གལ་ཆེ་ཤོས་ཤིག་ནི་༸གོང་ས་མཆོག་གིས་མ་འོངས་སྔོན་གཟིགས་ཀྱིས༼རྒྱ་ནག་གུང་ཁྲན་ཏང་གི་དཔོན་རིགས་ཚོར་ཡིད་ཆེས་མེད།རྒྱ་ནག་མི་མང་ལ་ཡིད་ཆེས་ཡོད༽ཅེས་བཀའ་ཕེབས་ཡོད་པ་གཞིར་བཟུང་སྟེ། དེང་སྐབས་ཕྱི་རྒྱལ་གྱི་ས་ཆ་ཁག་མང་པོའི་ནང་རྒྱ་རིགས་མི་མང་དང་མཐུན་ལམ་གྱི་ཚོགས་ཆུང་བཙུགས་ཡོད་པ་ལྟར། ཐོག་དང་པོར་ཁོ་ཚོར་བོད་རང་བཙན་ཡིན་པ་དེ་ཡིན་གཅིག་མིན་གཅིག་ཕར་ངོ་སྤྲོད་གསལ་བོ་གནང་དགོས་ཀྱི་འདུག དེ་བརྒྱུད་ནས་༸གོང་ས་མཆོག་གི་དགོངས་གཞི་ཆ་ཚང་བ་ཞིག་ཡིག་ཐོག་ལ་ཕབ་ནས་ཁོ་ཚོའི་ལག་ལ་སྤྲོད་དགོས་པ་དང་། མཐའ་མ་དེར་རང་བཙན་རྩོད་ཀྱིན་མེད་པར་རང་སྲིད་རང་སྐྱོང་ཆ་ཚང་བ་ཞིག་དགོས་ཀྱི་ཡོད་པ་གསལ་བཤད་གནང་བ་ཡིན་ན། དགོངས་གཞི་དེའི་ཐོག་ལ་རླབས་ཆེན་གྱི་གྲུབ་འབྲས་ཤིག་འཐོན་ཡོང་གི་རེད། གལ་སྲིད། མ་འོངས་པར་གུང་ཁྲན་ཏང་མགོ་རྟིང་ལོགས་ཏེ་དམངས་གཙོར་ཆས་པ་ཡིན་ན། དེ་དུས་ད་ལྟའི་སྒྲོམ་གཞི་འདི་གང་ལ་གང་འཚམ་ཞིག་ཕར་འཁྱེར་ཐུབ་པ་དང་འཛུགས་ཐུབ་པ་ཞིག་ཆགས་ཡོད་སྟབས། དེའི་ཆེད་དུ་ང་ཚོས་ད་ལྟ་ནས་དགོངས་པ་བཞེས་དགོས་ཀྱི་འདུག དཔེ་འཇོག་ཙམ་བྱས་པ་ཡིན་ན། མདོ་དབུས་ཁམས་གསུམ་གྱི་ལམ་ཁ་གཅིག་པུར་མལ་ལེ་སྟོང་ཕྲག་ཁྲི་ཕྲག་ཡོད་པ་རེད། དེ་ལ་དགུན་ཁ་བ་དང་དབྱར་ཆར་བྱོལ་གྱི་རྐྱེན་པས་ག་དུས་ཡིན་ཡང་སྐྱོན་ཤོར་ཡོང་གི་རེད།དེ་དག་ང་ཚོ་རང་ངོས་ནས་བསྐྱར་དུ་བདག་པོ་རྒྱག་ཐུབ་པ་ཞིག་དང་། ཟམ་པ་རྒྱག་པ་དང་གློག་གི་ཆ་རྐྱེན་ཚང་བ་རྒྱ་རིགས་དང་རྒྱ་གར་སོགས་མི་གཞན་ལ་བསྟུན་མ་དགོས་པར་རང་ངོས་ནས་འབྱོན་ཐང་ལྡན་པ་ཞིག་ཡོང་ཆེད། གཞོན་སྐྱེས་ཚོར་ད་ལྟ་ནས་སློབ་སྦྱོང་སྤྲོད་དགོས་ཀྱི་འདུག དེའང་སློབ་སྦྱོང་ཟེར་ནས་རྐུབས་སྟེགས་སྒང་གཅིག་པུར་སྡོད་མཁན་མ་ཡིན་པར། རིགས་གཅིག་རྐང་འཛིན་གྱི་ལས་གཞི་རྒྱ་ཆེན་པོ་སྤེལ་དགོས་པ་དེ་ང་ཚོའི་མ་འོངས་པའི་གལ་ཆེ་ཤོས་ཀྱི་གྲ་སྒྲིག་ཅིག་རེད། བོད་ལ་ཕར་ལོག་པའི་དུས་ཤིག་ཤར་སྐབས་ལས་ཀ་ཅི་ཞིག་བྱ་དགོས་ཀྱང་བྱེད་ཆོག་ཆོག་ཅིག་བཟོ་མ་ཐུབ་པ་ཡིན་ན། ང་ཚོ་ཁ་སྟོང་པ་དང་ལག་སྟོང་པ་བྱས་ཏེ་བོད་ལ་ལོག་ཚེ་དམིགས་བསལ་བྱེ་བྲག་ལས་རྒྱུ་ཅི་ཡང་ཡོད་པ་མ་རེད།
གསར་འགོད་པ། ཚེ་རིང་རྒྱལ།
སྐུ་ངོ་འདི་ཅུང་སྔོན་ཐོན་གྱི་བསམ་བློ་ཡོད་མཁན་ཞིག་རེད། འདི་འདྲ་གང་མང་ཡོད་ན་བོད་དེ་རྩ་བརླག་ཏུ་འགྲོ་མི་ཐུབ་པ་འདྲ། ཡིན་ནའི། བཅའ་ཁྲིམས་བསྐྱར་བཅོས་ཟིན་བྲིས་གཉིས་པ་ཞེས་པ་དེ་ནི་མི་མང་ལ་མགོ་བསྐོར་གཏོང་ཐབས་ཤིག་སྟེ། བསམ་བློ་གཏོང་ཁོམ་མེད་པའི་བར་མཚམས་བེད་སྤྱོད་བཏང་ཡོད་པས། ཆོས་དང་འཇིག་རྟེན་གྱི་ལུགས་གང་ལའང་མི་མཐུན་པ་ཞིག་རེད། གཅིག་བྱས་ན་ཟམ་གདོང་བླ་མས་གསུངས་ཟིན་པ་ལྟར་རྩ་བའི་བླ་མ་གཅིག་པོར་མ་གཏོགས་འགན་འཁུར་གྱི་མེད་པའི་བདེན་དཔང་ཡག་ཤོས་ཀྱང་རེད།