༢༠༡༡ ལོའི་བོད་ཀྱི་མཛངས་མ་འགྲན་བསྡུར་དབུ་འཛུགས།

ད་ལོ་ནི་བོད་ཀྱི་མཛངས་མ་འགྲན་བསྡུར་དབུ་འཛུགས་བྱས་ཏེ་ལོ་ངོ་ ༡༠ འཁོར་བའི་ལོ་ཡིན་ཞིང་། འདི་ལོའི་བོད་ཀྱི་མཛངས་མ་འགྲན་བསྡུར་ཁྲོད། རྒྱལ་ཁབ་ ༤ ནས་ཕེབས་པའི་བོད་རིགས་བུ་མོ་ ༦ ཙམ་ཞུགས་འདུག  

དེ་རིང་སྔ་དྲོའི་ཆུ་ཚོད་ ༡༠ སྟེང་ངྷ་སར་གནས་བཞུགས་བློ་བཟང་དབང་རྒྱལ་ལགས་ཀྱི་ལས་ཁུངས་ནང་། ཕྱི་ལོ་ ༢༠༡༡ ལོའི་བོད་ཀྱི་མཛངས་མ་འགྲན་བསྡུར་སྐོར་གྱི་གསར་འགོད་གསལ་བསྒྲགས་ཤིག་བསྐྱངས་སོང་། ད་ལོའི་བོད་ཀྱི་མཛངས་མ་འགྲན་བསྡུར་ནང་ཞུགས་མཁན་བུ་མོ་ ༦ ལས་བྱུང་མེད་པ་དང་། དེ་དག་ཁྲོད་ཨ་རི་ནས་ཕེབས་པའི་བུ་མོ་བསྟན་འཛིན་མཁས་ཆོས་རང་ལོ་ ༡༩ དང་། ཨོ་སི་ཊོ་ལི་ཡ་ནས་ཕེབས་པའི་དངོས་གྲུབ་སྒྲོལ་མ་རང་ལོ་ ༢༥ ། སུད་སི་ནས་ཕེབས་པའི་བསྟན་འཛིན་དབྱངས་སྐྱིད་རང་ལོ་ ༡༧ རེད། གཞན་གསུམ་རྒྱ་གར་ནས་ཡིན་ཞིང་། རང་ལོ་ ༢༤ ཡིན་པའི་འཆི་མེད་ལྷ་འཛོམས་དང་། རང་ལོ་ ༢༤ ཡིན་པའི་སྒྲོལ་མ་ཚེ་རིང་། རང་ལོ་ ༢༣ ཡིན་པའི་བསྟན་འཛིན་བཟང་མོ་བཅས་རེད།

གསར་འགོད་ལྷན་ཚོགས་ཐོག་བློ་བཟང་དབང་རྒྱལ་ལགས་ཀྱིས། ད་ལོའི་མཛངས་མ་འགྲན་བསྡུར་ནང་བོད་རིགས་བུད་མེད་ན་གཞོན་ ༦ བྱུང་ཡོད། སྤྱིར་ད་ལོ་ལ་མཚོན་ན། བོད་ཀྱི་མཛངས་མ་འགྲན་བསྡུར་སྐབས་གྱོན་ཆས་འདྲ་མིན་དང་རྩེད་རིགས་སྣ་ཚོགས། དེ་བཞིན། ཤོག་སྦག་སྒྲོན་པ་སོགས་བྱས་ན། བོད་ཨ་མདོ་རྔ་པ་ས་ཁུལ་དཀའ་ངལ་དང་་ཛ་དྲག་འོག་གནས་ཡོད་སྟབས། ཞེ་དྲག་ཡག་པོ་མེད་པར་མཐོང་མཁན་ཡོད་སྲིད་ཀྱང་། ད་ལོ་ནི་བོད་ཀྱི་མཛངས་མ་འགྲན་བསྡུར་མགོ་བཙུགས་ཏེ་ལོ་ ༡༠ འཁོར་བ་ཞིག་ཡིན་སྟབས། ང་ཚོས་རྒྱུན་མ་ཆུད་པའི་ཐོག་ནས་ལས་འགུལ་གོ་སྒྲིག་བྱས་པ་ཡིན། བོད་ནང་གི་དཀའ་ངལ་བརྗེད་སོང་བ་མིན། བོད་ཀྱི་མཛངས་མ་འགྲན་བསྡུར་འདི་ལ་འཛམ་གླིང་གང་ས་ནས་གསར་འགོད་པ་ཡོང་ཡོད་པ་རེད། གོ་སྐབས་འདི་བརྒྱུད་དེ་བོད་པའི་རྩ་དོན་ཁྱབ་བསྒྲགས་ཐོག་ཤུགས་རྒྱག་གི་ཡོད། ཅེས་བརྗོད་བྱུང་།

བློ་བཟང་དབང་རྒྱལ་ལགས་ཀྱིས་འདི་ལོའི་མཛངས་མ་འགྲན་བསྡུར་གྱི་ལས་རིམ་ངོ་སྤྲོད་གནང་དོན། དེ་རིང་ནས་ཉིན་ ༧ རིང་ལ་འགྲན་ཞུགས་བུད་མེད་དྲུག་ལ་སྦྱོང་བརྡར་སྤྲོད་རྒྱུའི་ལས་རིམ་བསྒྲིགས་ཡོད། དེའི་ནང་བཙན་བྱོལ་བོད་གཞུང་གི་ལས་ཁུངས་ཁག་དང་། ངྷ་སའི་ཉེ་འཁོར་གྱི་སློབ་གྲྭ་ཁག་ལ་ལྟ་སྐོར་དུ་འཁྲིད་རྒྱུ་དང་། གཟུགས་པོའི་འཕྲོད་བསྟེན་གྱི་རྩ་རླུང་སྒོམ་སྟངས། ལུས་རྩེད་དང་ཞབས་བྲོ་འཁྲབ་སྟངས་བཅས་ལ་ཟབ་སྦྱོང་སྤྲོད་རྒྱུ་ཡིན། ཕྱི་ཟླ་ ༦ ཚེས་ ༣ ཉིན་ཆུ་རྐྱལ་འགྲན་བསྡུར་ཡོད། ཚེས་ ༤ ཉིན་གཏམ་བཤད་དང་སོ་སོའི་ཐུན་མིན་གྱི་ཁྱད་ཆོས་ངོམས་རྒྱུ་རེད། ཚེས་ ༥ དགོང་མོ་མཐའ་མའི་འགྲན་བསྡུར་སྟེང་རིམ་པ་བཞི་ཡོད། དང་པོ་སོ་སོ་ངོ་སྤྲོད། གཉིས་པ་ཕྱི་ལུགས་ཀྱི་ཆས་གོས་འགྲན་བསྡུར། གསུམ་པ་རང་ལུགས་ཀྱི་ཆས་གོས་འགྲན་བསྡུར། བཞི་བ་དྲི་བ་དྲིས་ལན་བཅས་བརྒྱུད་དེ། ཕྱི་ལོ་ ༢༠༡༡ ལོའི་བོད་ཀྱི་མཛངས་མ་ཐག་གཅོད་བྱ་རྒྱུ་རེད། ཅེས་དང་།

མཛངས་མ་ཨང་དང་པོར་མཛངས་མའི་དབུ་རྒྱན་དང་སྦྲགས་ཧིན་སྒོར་འབུམ་གཅིག་གི་གསོལ་རས་ཡོད། ཨང་གཉིས་པར་ཧིན་སྒོར་ལྔ་ཁྲི། ཨང་གསུམ་པར་སྒོར་ཉིས་ཁྲི་ལྔ་སྟོང་བཅས་སྤྲོད་འཆར་ཡོད། བོད་ཀྱི་མཛངས་མ་འགྲན་བསྡུར་འདི་ལ་མི་ཚང་མ་བསྒུག་བསྡད་ཡོད་པ་རེད། ལྷག་པར་དུ་གཞོན་སྐྱེས་ཚོས་དགའ་མོས་དང་དོ་སྣང་ཆེན་པོ་བྱེད་ཡུལ་ཞིག་ཆགས་ཡོང་གི་འདུག ལོ་བཅུའི་རིང་བོད་ཀྱི་མཛངས་མའི་འགྲན་བསྡུར་ནང་ཞུགས་མཁན་བུ་མོ་ ༣༢ ཙམ་བྱུང་འདུག བོད་ཀྱི་མཛངས་མ་བཞི་དང་འཛུལ་ཞུགས་པ་གཅིག་བཅས་བུ་མོ་ ༥ ཙམ་རྒྱལ་སྤྱིའི་སྡིངས་ཆའི་ཐོག་གི་འགྲན་བསྡུར་ ༧ ཙམ་གྱི་ནང་མཉམ་ཞུགས་གནང་ཐུབ་པ་བྱུང་ཡོད།  ཅེས་ངོ་སྤྲོད་གནང་བྱུང་།

མཇུག་ཏུ་ཁོས་བོད་ཀྱི་མཛངས་མ་འགྲན་བསྡུར་གྱི་འགྲོ་གྲོན་སྐོར་བརྗོད་དོན། མི་མང་པོ་ཞིག་གིས་བོད་ཀྱི་མཛངས་མ་འགྲན་བསྡུར་གྱི་འགྲོ་སོང་སུ་ཞིག་གིས་གཏོང་གི་ཡོད་ན་བསམ་གྱི་ཡོད་པ་རེད། གཙོ་ཆེ་ཤོས་ང་རང་སྒེར་གྱིས་ཐབས་ཤེས་བྱེད་ཀྱིན་ཡོད། ཕྱི་ལོ་ ༢༠༠༨ ལོར་བལ་ཡུལ་དུ་བཞུགས་པའི་བོད་རིགས་ཚོང་པ་རྒྱལ་ནོར་ཚེ་དབང་ལགས་ཀྱིས་སྒོར་ཁྲི་ལྔ་ཡི་ཞལ་འདེབས་གནང་སོང་། ༢༠༠༩ ལོར་རྒྱ་གར་གྱི་བཟོ་གྲྭ་ཆེན་པོ་ཞིག་གིས་སྒོར་འབུམ་ལྔ་ཡི་རོགས་སྐྱོར་བྱས་སོང་། ངའི་ཨ་མ་དང་སྤུན་ཆུང་གཉིས་ཨ་རིར་བཞུགས་སྟབས། ལོ་ལྟར་ཁོང་གཉིས་ཀྱིས་ལས་གཞི་འདི་ཐོག་ང་ལ་ཨ་སྒོར་ཉིས་སྟོང་རེ་གནང་གི་ཡོད། དེ་ལས་གཞན་པའི་ཡོང་ཁུངས་མེད། ཅེས་བརྗོད་བྱུང་།

ངའི་མིང་ལ་བསྟན་འཛིན་དབྱངས་སྐྱིད་ཟེར། ད་ལྟ་ལོ་ ༡༧ ཡིན།  ང་རང་འཚར་ལོངས་བྱེད་ས་སུད་སི་ཡིན་ལ་ད་ལྟ་ཛོ་རེ་སློབ་གྲྭ་ནས་འཛིན་རིམ་བཅུ་པ་ཐོན་པ་ཡིན། ང་རང་ཆུང་དུས་ནས་བོད་ཀྱི་གཞས་སྣ་འཁྲབ་སྟོན་གྱི་རིགས་ལ་དགའ་མོས་ཡོད་ལ། དེ་བཞིན་སུད་སི་ནས་ཀྱང་ཐེངས་མང་པོ་ཞིག་ལ་གྱོན་ཆས་དང་ཐོན་རྫས་ཁྱབ་བསྒྲགས་ཀྱི་བྱ་འགུལ་མང་པོའི་ཁྲོད་ཞུགས་མྱོང་ཡོད།  ང་རང་བོད་ཀྱི་མཛངས་མའི་འགྲན་བསྡུར་ནང་ཞུགས་པའི་དམིགས་ཡུལ་གཙོ་བོ་ནི། བོད་ཀྱི་བུ་མོ་གཞོན་སྐྱེས་ཚོར་སོ་སོའི་མི་ཚེ་ཡི་ལས་དོན་དང་གོ་སྐབས་རྩོད་ལེན་བྱ་ཆེད་དང་། ང་ཙམ་མ་ཡིན་པར་བོད་པའི་བུ་མོ་ཉམས་ཆུང་ཚོ་ལ་སོ་སོའི་དམིགས་ཡུལ་ཆེད་འབད་བརྩོན་བྱ་རྒྱུར་སེམས་ཤུགས་སྤར་ཆེད་ཡིན། གལ་སྲིད་ང་ལ་བོད་ཀྱི་མཛངས་མའི་རྒྱལ་ཁ་ཐོབ་པ་ཡིན་ན།  ཕྱིར་སུད་སི་ལུང་པར་ལོག་རྗེས་བོད་དོན་ལས་འགུལ་ཁག་ལ་འཛུལ་ཞུགས་དང་། བོད་པའི་རིག་གཞུང་འཁྲབ་སྟོན་སོགས་བོད་ཀྱི་མཛངས་མའི་ངོ་ཚབ་མཚོན་པའི་ཐོག་ནས་ལས་འགུལ་སྣ་ཚོགས་སྤེལ་རྒྱུ་ཡིན།

ངའི་མིང་ལ་དངོས་གྲུབ་སྒྲོལ་མ་ཟེར། ད་ལྟ་ལོ་ ༢༥  ཡིན། ང་རང་ལོ་བརྒྱད་ཀྱི་སྟེང་བོད་ནས་རྒྱ་གར་ལ་བཙན་བྱོལ་དུ་བསླེབས་པ་ཡིན། ངའི་ཕ་ལགས་བོད་ནང་དུ་ཆབ་སྲིད་བཙོན་པ་ཡིན་པས། ཁོང་གི་མཚན་ཐོག་ནས་ཨོ་སི་ཊི་ལི་ཡར་ཆབ་སྲིད་སྐྱབས་བཅོལ་དུ་ཕྱིན་ཏེ། སྨན་གཡོག་གི་སློབ་སྦྱོང་བྱས་པ་ཡིན། ཕ་ལགས་ཀྱིས་ནམ་རྒྱུན་ང་ལ། ཁྱོད་ཀྱིས་བོད་དོན་ཐོག་ལ་རང་གི་ནུས་ཚོད་ཀྱིས་ལས་ཀ་སྒྲུབ་དགོས་པ་དེ་མ་བརྗེད་གསུང་གི་འདུག་སྟབས། ད་ལྟའི་བར་ཨོ་སི་ཊི་ལི་ཡའི་ནང་རང་གི་འཇོན་ཚོད་ཀྱི་ལས་ཀ་ཆུང་ཚེགས་རིགས་གང་འཚམ་སྒྲུབ་པ་ཡིན། ང་རང་བོད་ཀྱི་མཛངས་མའི་འགྲན་བསྡུར་ནང་ཞུགས་པའི་དམིགས་ཡུལ་གཙོ་བོ་ནི། རང་དང་འདྲ་བའི་བོད་པའི་བྱིས་པ་རྣམས་རྒྱ་ནག་གི་བཙན་འོག་ནས་སོ་སོའི་ལུང་པ་དང་ཕ་མར་ཁ་བྲལ་ཏེ་བཙན་བྱོལ་དུ་འབྲོ་དགོས་བྱུང་པའི་གནས་སྟངས་རྒྱལ་སྤྱིའི་སྒང་ལ་གསལ་འདོན་བྱ་རྒྱུའི་ཆེད་དུ་ཡིན། ང་རང་ལ་བོད་ཀྱི་མཛངས་མའི་རྒྱལ་ཁ་ཐོབ་རྒྱུ་དེ་གལ་ཆེན་པོ་རེད་བསམ་གྱི་མེད།   གལ་སྲིད་ཐོབ་པ་ཡིན་ན་ཡག་པོ་རེད། བོད་ཀྱི་མཛངས་མའི་མིང་ཐོག་ནས་བོད་དོན་ལ་ཞབས་ཞུའི་ལས་ཀ་སྒྲུབ་རྒྱུར་ཕན་ཐོགས་ཡོང་གི་རེད།

ངའི་མིང་ལ་འཆི་མེད་ལྷ་འཛོམས་ཟེར། ད་ལྟ་ལོ་ ༢༤ ཡིན། ད་ལྟ་ལྡི་ལི་སི་ཀེམ་མ་ནེ་པལ་མཐོ་སློབ་ཏུ་ཚོང་ལས་འཛིན་སྐྱོང་ཐོག་ཆེས་མཐོའི་རབ་འབྱམས་པའི་སློབ་སྦྱོང་བྱེད་བཞིན་ཡོད། མཛངས་མའི་འགྲན་བསྡུར་ནང་འཛུལ་ཞུགས་བྱེད་པའི་རྒྱུ་མཚན་གཙོ་བོ་ནི། གར་སྟེགས་འདི་བརྒྱུད་ནས་བོད་པའི་ཆབ་སྲིད་དང་། རིག་གཞུང་སོགས་འཛམ་གླིང་སྒང་ལ་ཁྱབ་བསྒྲགས་ཡོང་ཆེད་ཡིན།  ཡིན་ནའང་། ཐོག་དང་པོ་རང་ཉིད་ཀྱིས་སློབ་སྦྱོང་ཡག་པོ་བྱས་ཏེ་བོད་པའི་གནས་སྟངས་སྐོར་ཤེས་རྟོགས་གསལ་བོ་བྱ་རྒྱུ་དེ་གལ་ཆེན་པོ་རེད། ཕྱི་ལོ་ ༡༩༤༩ ནས་བཟུང་རྒྱ་མིས་བོད་ནང་བཙན་འཛུལ་བྱས་ཏེ། ང་ཚོའི་རང་བཙན་དང་རང་དབང་བཙན་འཕྲོག་བྱས་པ་རེད། དེ་རིང་གི་བོད་ཀྱི་མཛངས་མའི་འགྲན་བསྡུར་འདིས་ཀྱང་འཛམ་གླིང་ཐོག་ང་ཚོ་བོད་ནི་རང་བཙན་གཙང་མའི་རྒྱལ་ཁབ་ཅིག་ཡིན་པའི་རྣམ་པ་སྟོན་བཞིན་ཡོད་པ་རེད། ང་ཚོའི་སྤྱི་ཚོགས་ནང་བོད་དོན་སྐོར་ལ་ལས་འགུལ་འདྲ་མིན་སྤེལ་བཞིན་པ་ལྟར།  བོད་པའི་བུ་མོ་ཚོས་མཛངས་མའི་འགྲན་བསྡུར་གྱི་སྡིངས་ཆ་འདི་བརྒྱུད་ནས་བོད་དོན་འཛམ་གླིང་ཐོག་ཤེས་རྟོགས་ཡོང་བར་ནུས་པ་འདོན་ཐུབ་ཀྱི་རེད་བསམ་ཡོད།

ངའི་མིང་ལ་བསྟན་འཛིན་བཟང་མོ་ཟེར། ད་ལྟ་ལོ་ ༢༣ ཡིན། ཕྱི་ལོ་ ༢༠༠༧ ལོར་བྷང་ལོར་གཙུག་ལག་སློབ་གྲྭ་རུ་ཚོང་ལས་རྩིས་ཞིབ་ཐོག་སློབ་སྦྱོང་བྱས་པ་ཡིན།  ད་ལྟ་གནས་སྐབས་རིང་རྡ་རམ་ས་ལར་རྩིས་པའི་ལས་ཀ་ཞིག་བྱེད་ཀྱིན་ཡོད། ང་རང་སྔོན་མ་ནས་བོད་ཀྱི་མཛངས་མའི་འགྲན་བསྡུར་ནང་ཞུགས་འདུན་ཆེན་པོ་ཡོད་ཀྱང་། ད་ལྟའི་བར་སློབ་སྦྱོང་གི་དུས་ཚོད་ཀྱི་རྐྱེན་པས་འཛུལ་ཞུགས་བྱེད་ཐུབ་མ་སོང་། ང་རང་བོད་ཀྱི་མཛངས་མའི་འགྲན་བསྡུར་ཁྲོད་ཞུགས་པའི་དམིགས་ཡུལ་གཙོ་བོ་ནི། བོད་ཀྱི་གནས་ཚུལ་རྒྱལ་སྤྱིའི་སྒང་ཁྱབ་བསྒྲགས་ཡོང་ཐབས་དང་། བོད་ཀྱི་སྐོར་ལ་རང་ཉིད་ཀྱིས་སྔར་ལས་ལྷག་པར་ཤེས་རྟོགས་མང་པོ་ཡོང་ཆེད་ཡིན། ནམ་རྒྱུན་ང་རང་གིས་བཙན་བྱོལ་བོད་པའི་སྤྱི་ཚོགས་ནང་ཕོ་མོ་འདྲ་མཉམ་ཡིན་པར་མཐོང་གི་ཡོད་ལ།  དེ་བཞིན། བོད་ཀྱི་རིགས་གཞུང་མི་ཉམས་གོང་སྤེལ་དང་། རྒྱལ་སྤྱིའི་སྒང་ལ་བོད་དོན་ཤེས་རྟོགས་ཡོངས་ཐབས་སོགས་ལ་འབད་བརྩོན་བྱ་རྒྱུ་དེ་ནི་བོད་པའི་བུ་མོ་ཚང་མས་ལས་འགན་རེད་བསམ་ཀྱི་ཡོད།

ངའི་མིང་ལ་བསྟན་འཛིན་མཁས་ཆོས།  ད་ལྟ་ལོ་ ༡༩ ཡིན།  ང་རང་ཨོ་རུ་སར་སྐྱེས་ཤིང་ལོ་བདུན་གྱི་སྟེང་ནས་བཟུང་ཨ་རིའི་མེ་ནེ་སོ་ཊར་གནས་སྤོར་གྱིས་དེ་གར་འཚར་ལོངས་བྱུང་བ་ཡིན། ད་ལྟ་སློབ་ཆེན་གྱི་ལོ་རིམ་གཉིས་པར་འགྲོ་བཞིན་ཡོད། ཨ་རིའི་ས་གནས་ཁུལ་གྱི་བོད་པའི་མཛངས་མ་འགྲན་བསྡུར་ཁྲོད་བདམངས་ཐོན་བྱུང་བ་ལྟར་ཐེངས་འདིར་ངྷ་རམ་ས་ལའི་འགྲན་བསྡུར་ནང་ཞུགས་པ་ཡིན། གལ་སྲིད་ང་ལ་བོད་པའི་མཛངས་མའི་རྒྱལ་ཁ་ཐོབ་པ་ཡིན་ན། བོད་ཀྱི་མཛངས་མའི་མཚན་བྱང་འདི་བེད་སྤྱད་བཏང་སྟེ་ཨ་རིའི་ནང་གི་རྒྱལ་སྤྱིའི་གསར་ལམ་ཁག་ཏུ་རང་གི་འཇོན་ཚོད་ཀྱིས་བོད་དོན་དྲིལ་བསྒྲགས་བྱ་རྒྱུ་ཡིན། བོད་ཀྱི་མཛངས་མའི་གར་སྟེགས་འདིས་བོད་པའི་བུ་མོ་རྣམས་ལ་རང་གི་ཤེས་འཇོན་གསལ་སྟོན་བྱེད་པའི་གོ་སྐབས་བཟང་པོ་ཞིག་བསྐྲུན་ཡོད་པས། ང་ཚོ་བོད་པའི་བུ་མོ་ཟེར་ནས་དམིགས་བསལ་མངོན་ཆུང་བྱས་ནས་མི་སྡོད་པར། ཚང་མ་མི་ཡིན་པ་གཅིག་མཚུངས་ཀྱི་ཐོག་ནས་གོ་སྐབས་དམ་འཛིན་བྱས་ཏེ། སྤྱི་ཚོགས་ནང་རང་གི་ནུས་པ་འདོན་དགོས་རྒྱུ་དེ་གལ་ཆེན་པོ་རེད།

ངའི་མིང་ལ་སྒྲོལ་མ་ཚེ་རིང་ཟེར། ད་ལྟ་ལོ་ ༢༤ ཡིན། ང་རང་སྦེལ་ཀོབ་གཞིས་ཆགས་ནས་ཡོང་བ་ཡིན་ལ།  ཏཱ་མིན་ན་ཌོ་མངའ་སྡེ་ཡི་ཀོ་ཡེ་མ་དོ་མཐོ་སློབ་ཏུ་གློག་ཀླད་སྐོར་ལ་སློབ་སྦྱོང་བྱས་པ་ཡིན། ང་རང་བོད་ཀྱི་མཛངས་མའི་འགྲན་བསྡུར་ནང་ཞུགས་པའི་དམིགས་ཡུལ་ནི། བོད་པའི་སྐོར་གྱི་གནས་ཚུལ་མང་པོ་ཤེས་རྟོགས་ཡོང་བ་དང་། མཛངས་མའི་འགྲན་བསྡུར་ནང་ཞུགས་མཁན་བོད་པའི་བུ་མོ་ཚོ་དང་ལྷན་དུ་བོད་དོན་སྐོར་གྱི་བསམ་ཚུལ་བརྗེ་རེས་ཡོང་ཆེད་ཡིན།  ཡིན་ནའང་། ངས་རང་ཉིད་ལ་བོད་ཀྱི་མཛངས་མའི་རྒྱལ་ཁ་ཐོབ་རྒྱུ་རེད་བསམ་གྱི་མེད། ངའི་བསམ་པར་བོད་ཀྱི་མཛངས་མིའི་འགྲན་བསྡུར་འདི་བརྒྱུད་ནས་བོད་དོན་སྐོར་གསར་འགྱུར་བརྒྱུད་ལམ་ཁག་ལ་ཁྱབ་བསྒྲགས་བྱས་ཏེ། རྒྱལ་སྤྱིའི་སྤྱི་ཚོགས་ཀྱིས་བོད་དོན་ཐོག་སྔར་ལས་ལྷག་པར་དོ་སྣང་ཡོང་རྒྱུར་ཕན་ཐོགས་ཡོང་བ་དང་། བོད་པའི་གནས་སྟངས་ཤེས་རྟོགས་བྱུང་བ་ལ་བརྟེན་ནས།  བོད་དོན་ཐོག་རྒྱབ་སྐྱོར་དང་བོད་མི་ཚོར་རོགས་རམ་གནང་མཁན་སྔར་ལས་མང་བ་ཡོང་གི་རེད་དྲན་གྱི་ཡོད།

གསར་འགོད་པ། ཚེ་རིང་རྒྱལ།