རྒྱ་ནག་གི་གནོན་ཤུཊ་རྒྱ་གར་གཞུང་བརྒྱུད་དེ་བསླེབས་པ་རེད།

བོད་གཞུང་མང་རྒྱལ་ཡོངས་ཚོགས་ཆེན་མཇུག་བསྒྲིལ་བ་དང་བསྟུན་ཏེ། ཐེངས་འདིའི་ཚོགས་བཅར་བ་པདྨ་ཚེ་དབང་ཤཱསྟྲི་ལགས་སུ། ༧གོང་ས་མཆོག་གིས་བོད་མིའི་ཆབ་སྲིད་དང་འཛིན་སྐྱོང་གི་འགན་དབང་མཚམས་འཇོག་གནང་བ་དང་། གཞུང་ས་དགའ་ལྡན་པོ་བྲང་དང་བཙན་བྱོལ་བོད་གཞུང་བཅས་ཀྱི་ཐ་སྙད་འགར་བསྒྱུར་བཅོས་བཏང་བའི་ཐད་བཅར་འདྲི་ཞུས་ཡོད།

དྲི་བ། ༧གོང་ས་མཆོག་གིས་བོད་མིའི་ཆབ་སྲིད་དང་འཛིན་སྐྱོང་གི་འགན་དབང་མཚམས་འཇོག་བྱེད་ཀྱི་ཡོད་པ་དང་། བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱི་མཚན་བྱང་ལ་བསྒྱུར་བཅོས་གཏོང་གི་ཡོད་པའི་ཐད་དགོངས་འཆར་གང་འདྲ་ཡོད་དམ། 

ལན། ༧གོང་ས་ཏཱ་ལའི་བླ་མ་མཆོག་གིས་ད་ལོ་སྤྱི་འཐུས་གྲོས་ཚོགས་ནང་། ང་རང་གིས་བོད་མིའི་ཆབ་སྲིད་དང་འཛིན་སྐྱོང་གཉིས་ཀའི་འགན་དབང་མཚམས་འཇོག་རྒྱུ་ཡིན། བཙན་བྱོལ་བོད་མིའི་བཅའ་ཁྲིམས་ལའང་བསྒྱུར་བཅོས་གཏོང་དགོས་གསུངས་པ་དེ་ནི། བྱུང་རབས་ལོ་རྒྱུས་ནང་ཧ་ཅང་གལ་གནད་ཆེ་བའི་དཀྱོག་མཚམས་ཤིག་རེད། སྤྱིར་བོད་མི་ས་ཡ་དྲུག་གི་བརྒྱ་ཆ་ ༩༩ ཙམ་གྱི་མངོན་འདོད་ངོ་མ་དེ་༧གོང་ས་མཆོག་གིས་བོད་ཆོས་སྲིད་ཀྱི་ཐུགས་འགན་མུ་མཐུད་བཞེས་རྒྱུ་དེ་རེད། འོན་ཀྱང་ང་རང་སྒེར་གྱི་བསམ་ཚུལ་ཞུས་ན། རྒྱལ་སྤྱི་དང་རྒྱ་ནག བོད་ཕྱི་ནང་གི་གནས་སྟངས་སོགས་ལ་བལྟས་ཡོང་ན། ༧གོང་ས་མཆོག་གི་ཐག་གཅོད་དེ་དུས་ཚོད་རན་པོ་ཞེ་དྲག་ཅིག་ལ་ཁེལ་འདུག་བསམ་གྱི་ཡོད། གང་ཡིན་ཞེ་ན། ད་ལྟའི་དུས་ཚོད་ལ་༧གོང་ས་མཆོག་གི་སྐུ་གཟུགས་བདེ་ཐང་རེད་ལ། ཁོང་གི་མཛད་པ་འཕྲིན་ལས་ཀྱང་ཉིན་རེ་བཞིན་རྒྱས་བཞིན་པའི་སྒང་རེད། དུས་ཚོད་རན་པོ་འདི་འདྲ་ཞིག་ལ། ང་ཚོས་ཁྲིམས་དང་སྒྲིག་གཞི་ཁག་ལ་བསྐྱར་བཅོས་བྱས་ཤིང་། བཙན་བོད་མིའི་སྒྲིག་འཛུགས་དང་སྤྱི་ཚོགས་ཁྱོན་ཡོངས་ལ་གྲ་མ་དག་པ་དང་གྲུ་མ་འགྲིག་པ་གང་ཡང་མེད་པ་བཟོས་ཏེ། ༧གོང་ས་མཆོག་མེད་པ་ལྟར་འགྲོ་ཐུབ་པ་ཡིན་ན། ༧གོང་ས་མཆོག་སྐུ་མ་བཞུགས་པ་ལྟ་བུའི་གློ་བུར་རྐྱེན་ངན་གང་འདྲ་བྱུང་ཡང་། བཙན་བྱོལ་སྤྱི་ཚོགས་མུ་མཐུད་བརྟན་བརླིང་ངེར་འགྲོ་ཐུབ་པ་དང་། རྩ་དོན་འཐབ་རྩོད་ཀྱི་སྒྲིག་འཛུགས་འདི་ཡང་མུ་མཐུད་གནས་ཐུབ་ཀྱི་ཡོད།

དྲི་བ། ཏཱ་ལའི་བླ་མ་སྐུ་ཕྲེང་རིམ་བྱོན་གྱིས་གཞུང་ས་དགའ་ལྡན་ཕོ་བྲང་འཛིན་སྐྱོང་སྤེལ་གསུམ་བྱས་ཏེ་ཡོང་བ་རེད། ༧གོང་ས་བཅུ་བཞི་བ་མཆོག་གིས་ཆབ་སྲིད་ཀྱི་འགན་དབང་ཡོངས་རྫོགས་བོད་རྒྱ་ཆེའི་མི་མང་གིས་འོས་འདེམས་བྱས་པའི་མགོ་ཁྲིད་དག་ལ་རྩིས་སྤྲོད་གནང་པ་ཡིན་ན། བོད་པའི་ཆོས་སྲིད་ཟུང་འབྲེལ་མཇུག་བསྒྲིལ་བ་ཞིག་ལ་གཟིགས་ཀྱི་ཡོད་དམ།

ལན། བཙན་བྱོལ་བོད་མིའི་བཅའ་ཁྲིམས་ནང་ཆོས་སྲིད་ཟུང་འབྲེལ་མང་གཙོའི་གཞུང་ཞེས་བཀོད་ཡོད་པ་ལྟར། བཙན་བྱོལ་གཞུང་འདི་ཡང་ད་བར་ཆོས་སྲིད་ཟུང་འབྲེལ་གྱི་ཐོག་ནས་འགྲོ་བཞིན་ཡོད། ༧གོང་ས་མཆོག་གིས་ཆབ་སྲིད་ཀྱི་ཐུགས་འགན་མ་བཞེས་པ་ཙམ་གྱིས་ང་ཚོའི་ཆོས་སྲིད་གཉིས་ཁ་ཁ་བྱས་པ་ཞིག་ལ་ངོས་འཛིན་བྱེད་ཀྱི་མེད། ཇི་སྲིད་བཅའ་ཁྲིམས་ལ་འགྱུར་བ་མ་བཏང་བ། དེ་སྲིད་ང་ཚོའི་བཙན་བྱོལ་བོད་མིའི་སྒྲིག་འཛུགས་འདི་ཆོས་སྲིད་ཟུང་འབྲེལ་ཐོག་མུ་མཐུད་འགྲོ་རྒྱུ་རེད་ལ། ཆོས་སྲིད་གཉིས་ཐ་དད་བྱ་དགོས་པ་ཞིག་ལའང་མཐོང་གི་མེད། གང་ཡིན་ཞེ་ན། དམངས་གཙོ་ཡང་དག་པ་ཞིག་དང་། གཞུང་གི་སྲིད་བྱུས་དྲང་བདེན། ཆ་སྙོམས། སྨྲ་བརྗོད་རང་དབང་ལྡན་པ་ཞིག་ཡོང་དགོས་ན། གཞུང་དེའི་ལམ་ལུགས་ནང་ཆོས་སྲིད་གཉིས་ཁ་འབྲལ་ཐབས་མེད་པ་ཞིག་རེད། གཞུང་འཛིན་སྐྱོང་བྱེད་མཁན་དག་གི་ཕྱིའི་ཀུན་སྤྱོད་གཙང་མ་ཞིག་དང་། ནང་གི་ཀུན་སློང་དྲང་བདེན་ཞིག་ཡོང་མིན་ཡང་གང་ཟག་དེའི་རྒྱུད་ན་ཆོས་ཀྱི་བག་ཆགས་སྲབ་མཐུག་ལ་རག་ལས་ཡོད། ཆོས་ཀྱི་བག་ཆགས་ཙམ་ཡང་མེད་པའི་ཆབ་སྲིད་པ་དག་གི་འོག་ཏུ། ལྐོག་ས་རུལ་སུངས་དང་གཉའ་གནོན་བརྙས་བཅོས། དྲག་སྤྱོད་སོགས་ཡོང་གི་ཡོད། བཙན་བྱོལ་བོད་གཞུང་ལ་ཆ་མཚོན་ན། ང་དགུའི་སྔོན་ངས་ཤེས་ཀྱི་མེད། བཙན་བྱོལ་གཞུང་མགོ་བཙུགས་རྗེས་སྲི་ཞུ་ལས་བྱེད་ཚོའི་ཁྲོད་ལབ་རྒྱུ་གླེང་རྒྱུ་ཕྲན་བུ་རེ་བྱུང་ཡོད་ཀྱང་། ཁུངས་སྐྱེལ་ར་སྤྲོད་གསལ་བོ་ཡོད་པའི་ལྐོག་ཟ་རུལ་སུངས་རིགས་ཤུགས་ཆེན་པོ་གཅིག་ཀྱང་བྱུང་མེད།

དྲི་བ། ༧གོང་ས་མཆོག་གིས་བོད་མིའི་ཆབ་སྲིད་དང་འཛིན་སྐྱོང་གཉིས་ཐད་ནས་ལོགས་སུ་འཐོན་རྒྱུ་ཡིན་གསུང་གི་ཡོད་ཀྱང་། གཞུང་མང་རྒྱལ་ཡོངས་ཚོགས་ཆེན་སྟེང་ཡང་བསྐྱར་འགན་དབང་གང་འཚམ་ཞིག་ཕུལ་ཡོད་པ་དེས་འབྱུང་འགྱུར་དམངས་གཙོའི་འཕེལ་རིམ་ལ་དོ་ཕོག་འགྲོ་སྲིད་དམ།

ལན། རྒྱལ་ཡོངས་ཚོགས་ཆེན་སྟེང་བཀའ་མོལ་སྣ་ཚོགས་བྱུང་སོང་། ༧གོང་ས་མཆོག་གི་མཚན་ཐོག་ཏུ་འགན་དབང་དེ་འདྲ་ལྷག་བསྡད་ན་མ་འོངས་པར་བོད་མིའི་དམངས་གཙོའི་འཕེལ་རིམ་ཐོག་དཀའ་ངལ་འཕྲད་རྒྱུ་རེད་ཟེར་མཁན་འདུག་ལ། རྒྱལ་སྤྱིའི་ལྟ་སྟངས་ཐོག་ང་ཚོའི་དམངས་གཙོ་དེ་ཡང་དག་པ་ཞིག་ལ་མཐོང་གི་མ་རེད་ཟེར་མཁན། དེ་བཞིན། རྒྱ་ནག་གིས་ང་ཚོར་སྐྱོན་བརྗོད་བྱེད་པའི་གཞི་རྩ་ཞིག་ལྷག་གི་རེད་ཟེར་མཁན་སོགས་བྱུང་སོང་། ང་རང་གི་ལྟ་ཚུལ་ལྟར་བྱས་ན། ཐེངས་འདིར་བཅའ་ཁྲིམས་བསྐྱར་བཅོས་ནང་སྔོན་གླེང་ཞིག་དང་། དོན་ཚན་དང་པོར་ནང་གསེས་དོན་ཚན་གསུམ་ཙམ་བཏོན་ཡོད། དེ་དག་ཕྱི་ཚེས་ ༢༥ ཉིན་༧གོང་ས་མཆོག་ལ་ཞུས་སྐབས་ཞལ་བཞེས་གནང་སོང་བསམ་པ་ཞིག་དྲན་ཡོད། དེ་ཞལ་བཞེས་གནང་བ་ཙམ་གྱིས་ང་ཚོའི་དམངས་གཙོའི་དགེ་མཚན་ཞིག་རེད་མ་གཏོགས། སྐྱོན་གནས་ཤིག་ཏུ་འགྱུར་རྒྱུ་རེད་བསམ་གྱི་མེད། གང་ཡིན་ཞེ་ན། འགན་དབང་དེ་དག་༧གོང་ས་མཆོག་ལ་རང་ཆས་སུ་ཡོད་པ་ཞིག་ང་ཚོས་ནན་སྐུལ་བྱེད་ཀྱི་ཡོད་པ་རེད། ལྷག་པར་དུ་དེ་ལྟར་འཇོག་དགོས་པའི་རྒྱུ་མཚན་ཡང་མི་མང་གི་མངོན་འདོད་རེད། མི་མང་གི་མངོན་འདོད་ལ་གུས་བརྩི་ཞུ་རྒྱུ་དེ་དམངས་གཙོའི་ལྟ་གྲུབ་རེད།

དྲི་བ། དགའ་ལྡན་ཕོ་བྲང་འདི་སྒོ་བརྒྱབ་པ་ཡིན་ན། བོད་མིའི་ཁྲིམས་མཐུན་གཞུང་གི་ངོ་བོ་ལ་དོ་ཕོག་འགྲོ་སྲིད་དམ།

ལན། སྤྱིར་ང་ཚོའི་གཞུང་འདི་ལ་རྒྱལ་སྤྱིའི་ཐོག་ཏུ་ངོས་ལེན་ཡོད་པ་མ་རེད། འོན་ཀྱང་ང་ཚོའི་ངོས་ནས་ཁྲིམས་མཐུན་གྱི་གཞུང་ཞིག་ལ་སྒྲུབ་ཀྱི་ཡོད་པ་རེད་ལ། མི་རིགས་དང་སྐད་ཡིག ས་ཁོངས། བྱུང་རབས་ལོ་རྒྱུས་གང་ཐད་ནས་ང་ཚོ་སྔར་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། ཕྱིས་སུ་རྒྱ་ནག་གི་བཙན་བཟུང་འོག་ཤོར་བ། ངྷ་རམ་ས་ལར་ཡོད་པའི་སྒྲིག་འཛུགས་འདི་བོད་གཞུང་དགའ་ལྡན་ཕོ་བྲང་གི་རྒྱུན་ཡིན་པ་སོགས་གསལ་བོ་རེད་ལ། ཐེངས་འདིར་བོད་གཞུང་དགའ་ལྡན་ཕོ་བྲང་སྒོ་བརྒྱབ་ཀྱང་། བོད་མིའི་ཁྲིམས་མཐུན་གཞུང་གི་རྒྱུན་དེ་བཅད་ཡོད་པ་མ་རེད། བོད་བཙན་པོ་རིམ་བྱུང་ནས་ས་སྐྱ། ཕག་གྲུ། དགའ་ལྡན་ཕོ་བྲང་བཅས་གཞུང་གི་རྒྱུན་དེ་མུ་མཐུད་གནས་ཡོད་པ་རེད། ཐེངས་འདིར་ཡང་༧གོང་ས་མཆོག་གིས་མི་མང་གིས་འོས་འདེམས་བྱས་པའི་མགོ་འཁྲིད་ལ་གཞུང་གི་རྒྱུན་དེ་མར་གནང་བ་རེད་མ་གཏོགས། འོག་ནས་གྱེན་ལངས་བྱས་ཏེ་གཞུང་རྙིང་པ་མགོ་རྟིང་སློག་ནས་གཞུང་གསར་པ་བཙུགས་པ་དེ་འདྲ་མ་རེད། སྤྱིར་དམངས་གཙོའི་གཞུང་ཁག་ལ་མཚོན་ན། ཇི་སྲིད་མི་མང་གི་མངོན་འདོད་གནས་པ་དེ་སྲིད་དུ་གཞུང་གི་རྒྱུན་གནས་ཀྱི་ཡོད་པར་ངོས་འཛིན་གནང་གི་ཡོད།

དྲི་བ། ཉེ་ལམ་༧གོང་ས་མཆོག་ཨ་རིར་ཆིབས་བསྒྱུར་བསྐྱངས་སྐབས། བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་དེ་དགེ་ལུགས་པ་དང་དབུས་གཙང་གི་གཞུང་ཞིག་ཆགས་ཡོད། གངས་ཅན་པ་ཡོངས་རྫོགས་ལ་ཁྱབ་མི་འདུག ཅེས་གསུངས་ཡོད་པའི་ཐད་དགོངས་ཚུལ་གང་འདྲ་ཡོད་དམ།

ལན། ༧གོང་ས་མཆོག་གིས་བཀའ་སློབ་དེ་འདྲ་ཞིག་གནང་ཡོད་པ་ངས་མཐོང་ཐོས་མ་བྱུང་། ང་རང་སྒེར་གྱི་བསམ་པར། དགའ་ལྡན་ཕོ་བྲང་གཞུང་དེ་དགེ་ལུགས་པ་གཅིག་པུའི་གཞུང་དང་། དབུས་གཙང་གཅིག་པུའི་གཞུང་ཡིན་པ་ཞིག་ལ་ངོས་འཛིན་བྱེད་ཀྱི་མེད། རྩ་བའི་དགའ་ལྡན་ཕོ་བྲང་གཞུང་དེ་ཐོག་མ་རྒྱལ་དབང་ལྔ་པ་ནས་དགེ་ལུགས་པའི་བླ་བྲང་ཞིག་ལས་དབུ་བརྙེས་པ་རེད། རྒྱལ་དབང་ལྔ་པ་ལ་གཞུང་དེ་ཕུལ་མཁན་སོག་པོའི་དམག་དཔོན་གུ་ཤྲི་བསྟན་འཛིན་ཆོས་རྒྱལ་རེད། སྐབས་དེར་སོག་པོས་དབུས་གཙང་གཅིག་པུར་དབང་བསྒྱུར་བྱས་པ་ཞིག་མ་རེད། བོད་ས་གང་ལ་གང་འཚམ་བཙན་བཟུང་བྱས་ཡོད་པ་རེད། སྐབས་དེར་དབང་བསྒྱུར་འོག་གང་ཡོད་པ་དེ་དང་གཞུང་ས་དགའ་ལྡན་ཕོ་བྲང་ལྷན་གཅིག་ཏུ་རྒྱལ་དབང་ལྔ་བ་ཆེན་པོར་ཕུལ་བ་རེད། དེ་གཅིག་རེད། གཉིས་པ་དགའ་ལྡན་ཕོ་བྲང་ཟེར་བ་དེ་དགེ་ལུགས་པའི་ཐ་ཆད་ཙམ་རེད་མ་གཏོགས། སྐབས་དེའི་དབུས་གཙང་མངའ་ཁུལ་དུ་ཕལ་ཆེར་ཆོས་ལུགས་གྲུབ་མཐའ་ཚང་མ་ཡོད་པ་རེད་ལ། དགའ་ལྡན་ཕོ་བྲང་གཞུང་དབུ་བརྙེས་སྐབས། དེ་དག་ཚང་མའི་བརྩི་བཀུར་བྱེད་སའི་གཞུང་ཞིག་ཆགས་ཡོད་པ་རེད།

དྲི་བ། ༧གོང་ས་མཆོག་གིས་ཆབ་སྲིད་དང་འཛིན་སྐྱོང་གི་ཐུགས་འགན་མཚམས་འཇོག་བྱེད་ཀྱི་ཡོད་པའི་དཀྱོག་མཚམས་འདི་དང་བསྟུན་ཏེ། བཙན་བྱོལ་བོད་གཞུང་གི་སྲིད་བྱུས་དང་སྒྲིག་འཛུགས་ལ་འགྱུར་བ་གཏོང་དགོས་ས་འདྲ་མཐོང་གི་ཡོད་དམ།

ལན། སྲིད་བྱུས་ཀྱི་ཐད་ནས་བཤད་ཐུབ་མ་སོང་། སྒྲིག་འཛུགས་ཀྱི་ཐོག་ལ་བསམ་ཚུལ་ཁ་ཤས་ཡོད། དང་པོ་འོས་བསྡུའི་སྐོར་རེད། ཆོལ་ཁའི་འཐུས་མི་ཚོ་ལ་མི་གཅིག་ལ་འོས་གཅིག་རེད། འོན་ཀྱང་། ཆོས་བརྒྱུད་ཁག་ལ་མི་གཅིག་ལ་འོས་གཉིས་ཀྱི་ཐོབ་ཐང་ཡོད་པ་རེད། ཆོལ་ཁའི་ཁོངས་ནས་འོས་གཅིག་དང་། ཆོས་བརྒྱུད་ཀྱི་ཁོངས་ནས་འོས་གཅིག་གི་ཐོབ་ཐང་ཡོད། འདི་དམངས་གཙོའི་ལམ་སྲོལ་ཐོག་ཏག་ཏག་ཅིག་བསྡད་ཡོད་པ་མ་རེད་བསམ་གྱི་ཡོད། ཐེངས་འདིར་བཅའ་ཁྲིམས་ལ་འཕོ་འགྱུར་ཆེན་པོ་འགྲོ་བཞིན་ཡོད་པ་དང་བསྟུན་ཏེ། དེ་དག་ལའང་བསྐྱར་བཅོས་བྱ་དགོས་པ་རེད་བསམ་ཡོད། སྐྱ་སེར་ཚང་མར་གཅིག་གྱུར་ཐོག་ཆོལ་ཁ་དང་ཆོས་ལུགས་གཉིས་ཀར་འོས་བླུག་རྒྱུའི་ཐོབ་ཐང་སྤྲོད་དགོས་པ་རེད། འོས་ཐེངས་གཉིས་ལ་བླུག་དགོས་ཆགས་ཀྱང་དོན་གནད་གལ་ཆེན་པོ་རེད། དེ་ལྟར་བྱས་ན་ཆོས་བརྒྱུད་སྤྱི་འཐུས་ཚོའི་གནས་ཚད་མཐོ་རུ་འགྲོ་བ་དང་། ལས་དོན་ཚགས་ཚུད་ཡོང་བ། སྤྱི་འཐུས་ལྷན་ཁང་ནང་ཆོལ་ཁ་ཆོས་ལུགས་ཀྱི་འཐེན་འཁྱེར་ཉུང་དུ་འགྲོ་བ་སོགས་ལ་ཕན་ཐོགས་ཡོང་གི་རེད། དེ་ནས་གྲོས་ཚོགས་གོང་འོག་གཉིས་འཛུགས་དགོས་པ་རེད་བསམ་ཡོད། ད་ལྟའི་གྲོས་ཚོགས་འདི་གྲོས་ཚོགས་འོག་མ་དང་། གྲོས་ཚོགས་གོང་མའི་ནང་མི་འབོར་ལ་གཞིགས་པའི་འཐུས་མི་བསྐོ་བཞག་བྱས་ན། སྐབས་རེར་འཛིན་སྐྱོང་གི་ལས་ཀ་བྱེད་ཕྱོགས་འགྲིག་མིན་བྱུང་སྐབས་སྟངས་འཛིན་བྱ་ཐུབ་པ་རེད།

དྲི་བ། སྐུ་ཉིད་ཀྱིས་༧གོང་ས་མཆོག་གིས་བཙན་བྱོལ་བོད་གཞུང་གི་མཚན་བྱང་ལ་བསྒྱུར་བཅོས་གཏོང་དགོས་པའི་བཀའ་གནང་དོན་གཙོ་བོ་གང་ལ་གཟིགས་ཀྱི་ཡོད་དམ། 

ལན། འདི་ལ་རྒྱུ་མཚན་ཁ་ཤས་ཡོད་རྒྱུ་རེད། གཙོ་བོ་བཙན་བྱོལ་བོད་གཞུང་འདི་འདས་པའི་ལོ་ངོ་ལྔ་བཅུའི་རིང་བརྟན་པོ་བྱས་ཏེ་བསྡད་པ་རེད། དེ་གཙོ་བོ་༧གོང་ས་མཆོག་གི་གཟི་བརྗིད་དང་ངོ་སོ་ལ་བརྟེན་ཏེ་བྱུང་བ་ཞིག་རེད། འོན་ཀྱང་ང་ཚོས་ཤེས་དགོས་པ་ཞིག་ལ། ང་ཚོ་རྒྱ་གར་གཞུང་གི་འོག་ཏུ་བསྡད་ཡོད་པ་རེད། རྒྱལ་ཁབ་གཅིག་གི་འོག་ཏུ་གཞུང་གཉིས་གནས་ཐབས་ཡོད་པ་མ་རེད། རྒྱལ་ཁབ་གང་ཞིག་ཡིན་རུང་གཞུང་གི་སྲིད་བྱུས་དང་གཞུང་འཛིན་མགོ་འཁྲིད་ལ་རྟག་པ་བརྟན་པ་ཡོད་པ་མ་རེད། ༧གོང་ས་མཆོག་སྐུ་འཚོ་བཞུགས་རིང་ང་ཚོར་དཀའ་ངལ་ཆེན་པོ་འཕྲད་མདོག་ཁ་བོ་མ་རེད་དེ། ང་ཚོས་མུ་མཐུད་བཙན་བྱོལ་བོད་གཞུང་ཞེས་ཡིན་མདོག་མདོག་གིས་འགྲོ་བསྡད་པ་ཡིན་ན། ནམ་ཞིག་༧གོང་ས་མཆོག་མ་བཞུགས་པའི་ཉིན། ང་ཚོའི་བཤད་སྤྱོད་དང་འགྲོ་འདུག་ཕྲན་བུ་མ་འགྲིག་པ་བྱུང་ན་གནས་ཚུལ་ཆེན་པོ་འབྱུང་སྲིད་པ་རེད། གལ་སྲིད་དེ་འདྲའི་གནས་ཚུལ་མི་ལེགས་པ་ཞིག་བྱུང་སྐབས་འགན་དེ་བཟོད་མཁན་ཡོད་པ་མ་རེད། གཉིས་པ། བོད་རྒྱ་གཉིས་བར་འབྲེལ་མོལ་ཐེངས་དགུ་གནང་བའི་བརྒྱུད་རིམ་ཁྲོད། རྒྱ་ནག་གི་མགོ་འཁྲིད་ཚོས། ཁྱོད་ཚོས་དབུ་མའི་ལམ་ཁ་ནས་བཤད་བསྡད་པ་ཙམ་རེད། ཁྱོད་ཚོའི་བཅའ་ཁྲིམས་དང་ཡིག་ཆ་ཁག་ཏུ་བཙན་བྱོལ་བོད་གཞུང་ཞེས་ལབ་ཀྱི་འདུག འདི་ཁ་བྲལ་གྱི་བྱ་སྤྱོད་རེད་ཟེར་ནས་ལབ་བསྡད་ཡོད་པ་རེད། དེར་བརྟེན། ཉེ་ཆར་༧གོང་ས་མཆོག་གིས་གྲོས་ཚོགས་ལ་བསྩལ་བའི་གསུང་འཕྲིན་ནང་། ཐེངས་འདིར་ང་རང་གིས་ཆབ་སྲིད་དང་འཛིན་སྐྱོང་གི་ལས་འགན་མཚམས་འཇོག་རྒྱུ་ཡིན་ལ། འདི་དང་མཉམ་དུ་རྩ་ཁྲིམས་ཟིན་བྲིས་དང་། མ་འོངས་བོད་ཀྱི་ཆབ་སྲིད་ལམ་སྟོན་ཡང་རྩིས་མེད་འགྲོ་དགོས་པ་རེད། ཅེས་བཀའ་གསལ་བོ་གནང་འདུག རྒྱ་ནག་གཞུང་གིས་སྔོན་མ་ནས་རྒྱ་གར་གཞུང་ལ་གནོན་ཤུགས་སྤྲོད་ཀྱི་ཡོད་ས་རེད། འདི་དག་ལ་བལྟས་ཡོང་ན། ཐེངས་འདིར་རྒྱ་ནག་གཞུང་གི་མགོ་འཁྲིད་ཚོའི་གནོན་ཤུགས་རྒྱ་གར་གཞུང་བརྒྱུད་དེ་བསླེབས་པ་མིན་འགྲོ་བསམ་གྱི་ཡོད།

དྲི་བ། བཙན་བྱོལ་བོད་མིའི་གཞུང་དམངས་གཉིས་རྩ་དོན་འཐབ་རྩོད་ཀྱི་ཐད་ནས་ཕྱི་བཤོལ་ནས་ཡང་བཤོལ་བྱེད་ཀྱི་ཡོད་པ་འདི། ཡུལ་དུས་དང་འཚམ་པའི་ཁེ་ཕན་ཞིག་ཏུ་ངོས་འཛིན་གནང་གི་ཡོད་དམ། ཡང་ན་རང་ཚུགས་ཤོར་བའི་ཕམ་ཁ་ཞིག་ཏུ་མཐོང་གི་ཡོད།

ལན། སྦྱིར་བཏང་ང་ཚོ་འབབ་རྒྱུ་ཡོད་ཚད་དེར་བབས་ཡོད་པ་རེད། བོད་རང་བཙན་གཙང་མ་ནས། ཚད་མཐོའི་རང་སྲིད་རང་སྐྱོང་དང་། དེ་ནས་མིང་དོན་མཚུངས་པའི་རང་སྲིད་རང་སྐྱོང་ངམ་དབུ་མའི་ལམ་གྱི་ཐོག་ལ་བབས་པ་རེད། འབྲེལ་མོལ་ཐེངས་བརྒྱད་པའི་སྐབས་སུ་ང་ཚོའི་མངོན་འདོད་ངོ་མ་ཡིན་ཟེར་ནས་ཡིག་ཆ་ཞིག་རྒྱ་གཞུང་ལ་སྤྲད་པ་དེའི་ནང་དུ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་གྱི་སྒྲོམ་གཞིའི་འོག ས་གནས་མི་རིགས་རང་སྐྱོང་བཅའ་ཁྲིམས་ཆ་ཚང་བ་ལག་བསྟར་བྱ་དགོས་ཞེས་བཀོད་ཡོད། ཡིན་ན་ཡང་ཕྱོགས་གཞན་ཞིག་ནས་བསམ་བློ་བཏང་ན། བྱེད་བབ་འདི་ང་ཚོས་རྒྱ་ནག་གཞུང་ལ་བསྟུན་ཐབས་བྱས་པ་གཅིག་པུ་མ་རེད། རྒྱལ་སྤྱིའི་འགྱུར་བ་དང་། བོད་མིའི་འཕྲལ་ཕུགས་ཀྱི་ཁེ་ཕན། དེ་བཞིན། ང་ཚོའི་འཐབ་རྩོད་ཀྱི་གནས་ཚད་སོགས་ཕྱོགས་ཡོངས་ལ་གཟིགས་ཏེ་ཐག་གཅོད་གནང་བ་ཞིག་རེད། འཛམ་གླིང་འདི་འཕེལ་རྒྱས་དང་འགྱུར་ལྡོག་གི་རང་བཞིན་ཅན་རེད། འདས་པའི་ལོ་ངོ་ལྔ་བཅུའི་ཤུལ་ལམ་ལ་བལྟས་ཡོང་ན་ང་ཚོར་འདི་ལས་ལྷག་གི་གདམ་ག་ཞིག་ལྷག་གི་ཡོད་པ་མ་རེད།

གསར་འགོད་པ། དོན་འགྲུབ་བཀྲ་ཤིས།