ཞི་བདེའི་ཉིན་མོ་སྲུང་གཙི།

གནས་ཚུལ་བཏང་འབྱོར་ལ། འཛམ་གླིང་མཉམ་འབྲེལ་རྒྱལ་ཚོགས་ཀྱིས་ཕྱི་ཟླ་ ༩ ཚེས་ ༢༡ ཉིན་འདི་འཛམ་གླིང་ཞི་བདེ་ཉིན་མོར་གཏན་འཁེལ་ཡོད་པ་ལྟར། ཉིན་དེར་ཨ་རི་རོཌ་ཨའི་ལེན་ཌི་གཙུག་ལག་སློབ་གྲྭ་ཆེན་མོར་དགེ་སློབ་ཚོས་རྒྱལ་སྤྱིའི་ཞི་བདེའི་ཉིན་མོ་སྲུང་གཙི་གནང་ཡོད་འདུག  

ཐོག་མར་ཉིན་མོ་འདི་འཛམ་གླིང་ཞི་བདེའི་ཉིན་མོ་གཏན་འབེབས་སྙན་ཞུ་འབུལ་མཁན་ནི། དེ་སྔ་དབྱིན་ཡུལ་གྱི་གློག་བརྙན་འཁྲབ་སྟོན་པ་སྐུ་ཞབས་ཇེར་མི་གྷེ་ལི་ཡིན་པ་དང༌། ཁོང་གིས་ཐོག་མར་སྙན་ཞུ་ཕུལ་སྐབས་རྒྱབ་སྐྱོར་དང་ངོས་ལེན་མ་ཐོབ་པ་སོགས་ཀྱི་དཀའ་ཚེགས་དུ་མ་འཕྲད་འདུག་ཀྱང༌། ཁོང་ནས་ཞི་བདེའི་དེད་དཔོན་ྋགོང་ས་མཆོག་གི་མདུན་དུ་ཆེད་བཅར་གྱིས་སྙན་གསེང་ཞུས་པར་ྋགོང་ས་མཆོག་གིས་ཐུགས་སྨོན་རྒྱབ་སྐྱོར་གཙང་མ་ཐོབ་ཡོད་ཅིང་། ཕྱིས་སུ་ཀོས་ཊ་རི་ཀ་དང་དབྱིན་ཇི་གཞུང་གིས་ཀྱང་རྒྱབ་སྐྱོར་ཐོབ་པ་བཅས་ལ་བརྟེན་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ནང་སྤྱི་མོས་གཏན་འབེབས་བྱུང་དོན་ལྟར། ༢༠༠༡ ལོ་ནས་བཟུང་ཕྱི་ཟླ་ ༩ ཚེས་ ༢༡ ཉིན་ནི་རྒྱལ་སྤྱིའི་ཞི་བདེའི་ཉིན་མོར་སྲུང་གཙི་ཞུ་མགོ་ཚུགས་ཡོད།

བསྟན་དར་ལགས་ཀྱིས་གནས་ཚུལ་བཏང་འབྱོར་ལ། ཉིན་དེར་འཛམ་གླིང་མཉམ་འབྲེལ་རྒྱལ་ཚོགས་ཀྱི་བདེ་འཇགས་སྲུང་དམག་དང༌། དེ་བཞིན་རྒྱལ་ཁབ་མང་པོས་ཀྱང་རང་གིས་དམག་འཐབ་དང་གོ་མཚོན་བེད་སྤྱོད་མི་བྱེད་ཅིང༌། སྤྱི་ཚོགས་དང་ཡུལ་མི་ཕན་ཚུན་འཆམ་མཐུན་དང་ཞི་བདེ་ཡོང་ཆེད་དུ་འབད་པ། འཛམ་གླིང་ཁྱོན་ཡོངས་སུ་མི་གྲངས་ས་ཡ་བརྒྱ་ལྷག་གིས་དུས་ཆེན་འདི་སྲུང་གཙི་གནང་བཞིན་ཡོད་པ་ལྟར། འདི་ག་འཚེ་མེད་ཞི་བའི་སློབ་གཉེར་ཁང་དང་དགེ་སློབ་མང་པོས་ཉིན་དེར་ཞི་བདེའི་དར་ཅོག་བསྒྲེངས་པ་དང༌། ཞི་བདེའི་འཕྲིན་ཡིག་དང་མཚོན་རིས་བྲིས་པ། ལམ་ཁ་གཡས་གཡོན་ནས་མི་སུ་ལ་འཕྲད་ཀྱང་ཞི་བདེའི་འཚམས་འདྲི་ཞུ་པ། དེ་བཞིན། ཞི་བདེའི་སྐོར་གྱི་གླུ་གར་དང་རོལ་མོ་དཀྲོལ་བ་དང༌། མར་མེ་འཁྲོམ་སྐོར་སོགས་ཀྱང་བྱས་ཡོད་ཅིང་། དགུང་མོ་དེར་སྐུ་ཞབས་འཇེར་མི་གྷེ་ལིས་འཛམ་གླིང་ཞི་བདེའི་ཉིན་མོ་བྱུང་རིམ་སྐོར་གྱི་གློག་བརྙན་ (Peace One Day) ཞེས་པ་དེ་གཟིགས་འབུལ་ཞུས་ཏེ། སློབ་ཕྲུག་མང་པོས་སོ་སོའི་མི་ཚེ་ནང་འཚེ་བ་སྤང་རྒྱུ་དམ་བཅའ་ཕུལ་ཡོད་འདུག