ཁ་སང་སྔ་དྲོར་བོད་མི་མང་སྤྱི་འཐུས་གྲོས་ཚོགས་མཇུག་བསྒྲིལ་ཏེ་སྤྱི་འཐུས་ཚོགས་གཙོ་མཆོག་གིས་ཐེངས་འདིའི་གྲོས་ཚོགས་ནང་སྤྱི་འཐུས་གཉིས་ལས་གཞན་ཚང་མ་ཕེབས་ཡོད་པ་མ་ཟད། བགྲོ་གླེང་གི་ཆ་ཤས་ལེན་སྟངས་དང་བོད་ཕྱི་ནང་གི་གནད་དོན་སྤྱི་བྱེ་བྲག་གི་ཐོག་ཏུ་དཔྱད་ཞིབ་གནང་སྟངས་ཡག་པོ་འདུག་སྐོར་དང་། བོད་ནང་གི་བོད་མི་ཚོའི་རང་སྲོག་བློས་གཏོང་གི་ལས་འགུལ་དེ་དག་ལ་འདི་ནས་མཐུན་འགྱུར་གང་ཐུབ་ཞུ་ངེས་ཡིན་ཚུལ་གསུངས་སོང་།
ཁ་སང་སྔ་དྲོའི་ཆུ་ཚོད་ ༡༡།༤༠ ཙམ་ལ་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་ཡོངས་སུ་མཇུག་བསྒྲིལ་སོང་། ཐེངས་འདིའི་གྲོས་ཚོགས་དེ་ཟླ་སྔོན་མའི་ཕྱི་ཚེས་ ༡༦ ནས་ཟླ་འདིའི་ཚེས་ ༡ བར་ཚོགས་ཏེ་བཅའ་སྒྲིག་བསྐྱར་བཅོས་ཁག་གཏན་འབེབས་དང་བཀའ་བློན་ཁྲི་པའི་ཕྱག་རོགས་བཀའ་བློན་དྲུག་བསྐོ་བཞག་གནང་ཡོད་ལ། སྐབས་བཅུ་བཞི་བའི་བཀའ་ཤག་གིས་གྲོས་ཚོགས་ལ་གསལ་བཤད་དང་། ལྷན་ཁང་ཁག་གི་ལོ་འཁོར་ལས་བསྡོམས་ཐོག་བགྲོ་གླེང་དོགས་འདྲི་དང་། དེ་ལ་འབྲེལ་ཡོད་ལྷན་ཁང་སོ་སོའི་བཀའ་བློན་རྣམ་པས་ལན་འདེབས་བཅས་གནང་གྲུབ་རྗེས་སྤྱི་འཐུས་ཚོགས་གཙོ་མཆོག་གིས་མཇུག་བསྡོམས་གསུངས་བཤད་གནང་སོང་།
དེའི་རྗེས་སྤྱི་འཐུས་ཚོགས་གཙོ་མཆོག་གིས་མཇུག་བསྡོམས་གཏམ་བཤད་གནང་དོན། ཐེངས་འདིའི་གྲོས་ཚོགས་སུ་བླ་ཆེན་གཅིག་དང་བཀའ་ཟུར་གཅིག ཉིན་ཤས་སྔོན་གྲོས་ཚོགས་རྭ་བ་འདིའི་ནང་ཆ་ཤས་བླངས་ཤིང་འདས་པའི་ལོ་བཅུ་ལྷག་གི་རིང་བོད་མི་མང་སྤྱི་འཐུས་ཀྱི་ལས་དོན་བསྒྲུབ་མཁན་སྤྱི་འཐུས་གཅིག་བཅས་ལ་མྱ་ངན་གུས་འདུད་ཀྱི་གྲོས་ཆོད་བཞག་ཏེ་མི་རབས་རྒན་པས་དཀའ་ལས་བརྒྱབ་པའི་གྲུབ་འབྲས་ལ་ཐུགས་རྗེ་དང་བསྔོ་སྨོན་དང་། བཀའ་བློན་གཞན་གྱི་འོས་འདེམས་ཐད་གྲོས་ཚོགས་ཀྱིས་སྤྱི་མོས་རྒྱབ་སྐྱོར་གནང་སྟེ་འཛིན་སྐྱོང་ལ་མཐུན་རྐྱེན་སྦྱར་བ་བཅས་ནི་གཟི་བརྗིད་ཅིག་ཏུ་ངོས་འཛིན། དེ་བཞིན་བཀའ་བློན་ཁྲི་པས་དམ་འབུལ་བྱས་ཏེ་ཟླ་བ་གཅིག་ལྷག་ལས་འགྲོ་གྱི་མེད་ནའང་། དམ་འབུལ་མ་བྱས་གོང་ནས་རྒྱ་གར་དང་རྒྱལ་སྤྱིའི་ནང་འདེམས་ཐོན་བཀའ་བློན་ཁྲི་པའི་མཚན་ཐོག་ནས་འབྲེལ་བ་བྱས་ཏེ་ལས་དོན་ཁག་ཅིག་འགྲུབ་ཡོད་མོད། བཙན་བྱོལ་བོད་མིའི་སྒྲིག་འཛུགས་ནང་ཐད་ཀར་ཕྱག་ལས་གནང་བའི་ཉམས་མྱོང་མེད་སྟབས། བཀའ་བློན་ཁྲི་པས་གསལ་བཤད་དང་དེའི་ཐད་ཀྱི་ལན་འདེབས་ལས། མ་འོངས་བཀའ་ཤག་གི་སྲིད་ཇུས་འཛིན་སྟངས་དང་དགོངས་པ་བཞེས་སྟངས། ལས་རིམ་བང་བསྒྲིག་སྟངས་སོགས་ཀྱི་ཐད་དེ་སྔོན་གསལ་བོ་དེ་ཙམ་ཆགས་མེད་ཀྱང་། ད་ལྟའི་གནས་སྐབས་སུ་གང་འཚམ་གསལ་བོ་ཆགས་ཐུབ་པ་བྱུང་བ་དེ་གྲོས་ཚོགས་འཐུས་མི་དང་བོད་གཞིས་བྱེས་གཉིས་ཀྱི་མི་མང་ལ་གྲོས་ཚོགས་བརྒྱུད་དེ་ངོ་སྤྲོད་བྱེད་ཐུབ་པ་ཞིག་བྱུང་ཡོད་སྐོར་གསུངས་བྱུང་།
ཡང་ཁོང་གིས་ཐེངས་འདིའི་གྲོས་ཚོགས་ཧྲིལ་བོའི་ལས་ཉིན་ ༡༤ ནང་གཞུང་འབྲེལ་གྱི་གྲོས་འཆར་ཁག་ ༢ དང་། གཞུང་འབྲེལ་གྱི་གྲོས་ཆོད་གྲོས་འཆར་ཁག་ ༦ ། སྤྱི་འཐུས་སྒེར་གྱི་གྲོས་འཆར་ ༢ བཅས་གྲོས་ཚོགས་ནང་གཏན་འབེབས་བྱུང་ཐུབ་ཡོད་ལ། ༸གོང་ས་མཆོག་གི་སྐུའི་ཡང་སྲིད་དང་འབྲེལ་བའི་གྲོས་ཆོད་གཏན་འབེབས་བྱུང་བ་དེ་ཐེངས་འདིའི་ཆོས་ཚོགས་སྐབས་བཅུ་གཅིག་པའི་ཐོག་གནང་བའི་༸གོང་ས་མཆོག་གི་བཀའ་ཡིག་དང་ཆོས་ཚོགས་ཀྱི་གྲོས་ཆོད་ཟུར་རྒྱན། ༸གོང་ས་མཆོག་གི་བཀའ་སློབ་བཅས་ལས་བགོས་ས་གནས་སུ་མ་གོ་མ་ཐོས་པར་བཟོ་རྒྱུ་གལ་ཆེན་ཡིན་པ་དང་། གྲོས་ཚོགས་ནང་གྲོས་ཆོད་གཏན་འབེབས་ཀྱི་ཐོག་ནས་༸གོང་ས་སྐུ་ཕྲེང་ན་རིམ་ལ་བཀའ་དྲིན་རྗེས་དྲན་དང་། གྲྭ་ཚེ་དབང་ནོར་བུ་དང་རྔ་པ་ཀིརྟི་དགོན་པའི་དགེ་འདུན་པ་བློ་བཟང་སྐལ་བཟང་དང་བློ་བཟང་དཀོན་མཆོག་གཉིས་ཀྱིས་ལུས་པོ་མཆོད་མེར་ཕུལ་བ་བཅས་ལ་གདུང་སེམས་མཉམ་སྐྱེད་ཀྱི་སྤྱི་མོས་གྲོས་ཆོད་བཞག་པ་དེ་གཟི་བརྗིད་ཅིག་ཏུ་ངོས་འཛིན། གཞན་ཡང་། སྤྱི་འཐུས་རྣམས་ཀྱིས་གྲོས་ཚོགས་རྗེས་མ་འཚོགས་རྒྱུར་སྒུག་མི་སྡོད་པར། གནད་དོན་གང་འདྲ་ཞིག་གི་ཐོག་གཟིགས་ཚུལ་དང་སྐྱོན་ཡོད་མཐོང་ཚེ། ཐད་ཀར་བཀའ་བློན་རྣམ་པར་འབྲེལ་བ་གནང་སྟེ་གསལ་བོ་བཟོ་རྒྱུ་ལས། སྐབས་ཐོག་ལ་སྐྱོན་ཡོ་བསྲང་བྱ་རྒྱུར་འབད་བརྩོན་མི་གནང་བར་གྲོས་ཚོགས་རྗེས་མར་བསྒུགས་ཏེ། གྲོས་ཚོགས་ནང་འདི་དང་གན་འགྲིག་མ་སོང་ཞེས་ལབ་པ་ཡིན་ན། ནོར་བ་ནོར་ཚར་བ་ལས་ཐུགས་ཕན་གང་ཡོང་གསོ་ཐུབ་ཀྱི་མེད་སྟབས། མ་འོངས་པར་དེའི་རིགས་ལ་དོ་སྣང་བྱ་དགོས་པ་གལ་ཆེ་སྐོར་བརྗོད་སོང་།
མཇུག་མཐར་ཁོང་གིས་དེ་རིང་ནས་བཟུང་རྒྱུན་ལས་རྣམས་མ་གཏོགས་སྤྱི་འཐུས་གཞན་ཚང་མ་སོ་སོའི་ས་གནས་སུ་ལོག་དགོས་ཀྱི་ཡོད་ཀྱང་། སོ་སོའི་ས་གནས་སུ་དཔལ་འབྱོར་གྱི་ཐོག་ནས་མི་ལ་ཕན་ཐོགས་པ་དང་། གཏམ་བཤད་དང་མི་སྒེར་གྱི་འབྲེལ་བ་སོགས་བརྒྱུད་ནས་སྤྱི་ཚོགས་ནང་ཞབས་ཞུ་གནང་བར་འབད་བརྩོན་དང་གཅིག་གྲོགས་བྱ་རྒྱུ། འཛིན་སྐྱོང་དང་གྲོས་ཚོགས་མཉམ་རུབ་ཀྱིས་སྔོན་མའི་རྨང་གཞིའི་ཐོག་རྩིག་པ་ག་ཚོད་རྒྱག་ཐུབ་མིན་ལ་ཤུགས་རྒྱག་རྒྱུ་གལ་ཆེན་ཡིན་སྐོར་གསུངས་སོང་ལ། མཇུག་ཏུ་ཁོང་གིས་བོད་ནང་ལ་དམིགས་ཏེ་གསུངས་དོན། “ བོད་ནིང་ལ་གྲོས་ཚོགས་འདི་བརྒྱུད་དེ་བོད་ནང་གི་བོད་མི་ཚོར་ཞུ་རྒྱུ་ཞིག་ལ། རྩ་བའི་ཆབ་སྲིད་ཀྱི་ལས་འགན་ཡོངས་རྫོགས་མི་མང་གི་འོས་འདེམས་བྱས་པའི་མགོ་ཁྲིད་ལ་རྩིས་སྤྲོད་བྱས་ཏེ་འགྱུར་བ་ཆེན་པོ་ཞིག་ཕྱིན་ཡོད་ཀྱང་། ལས་དོན་བྱེད་ཕྱོགས་ཀྱི་ཐད་ནས་ཁྱེད་རང་ཚོས་བོད་ནང་དཀའ་ལས་ག་ཚོད་རྒྱག་གི་ཡོད་པ་དེ་ལྟ་བུ་ཞིག་འདིར་གནང་ཐུབ་ཀྱི་མེད་ཀྱང་། ཁྱེད་རང་ཚོས་རང་སྲོག་འབེན་ལ་བཞག་པའི་ལྷག་བསམ་དང་ཆོད་སེམས། སྙིང་སྟོབས་ཞུམ་པ་མེད་པར་ཕྱག་ལས་གནང་བ་དེར་ང་ཚོའི་ངོས་ནས་མཐུན་འགྱུར་གང་ཞུ་དགོས་ཀྱང་། ཞུ་ཐུབ་པའི་གནས་སྟངས་ཤིག་འདིར་འཛོམས་ཡོད་ཅེས་གསལ་བོ་བྱས་ཏེ་ཞུ་རྒྱུ་ཡིན ” ཞེས་གསུང་སོང་།
སྤྱི་འཐུས་ཚོགས་དྲུང་མཆོག་གིས་གསུངས་པ་ལྟར་ན། ཐེངས་འདིའི་གྲོས་ཚོགས་ཧྲིལ་བོར་དགོངས་པ་ཞུ་མཁན་མདོ་སྟོད་སྤྱི་འཐུས་གཡུང་དྲུང་རྒྱལ་མཚན་དང་འཇུ་ཆེན་དཀོན་མཆོག་གཉིས་ཡིན་ཞིང་། ཚོགས་རྒྱུན་ཕྱེད་ཀར་དགོངས་པ་ཞུ་མཁན་དགེ་ལུགས་སྤྱི་འཐུས་རོང་བོ་བློ་བཟང་སྙན་གྲགས་ལགས་ཡིན་འདུག
གསར་འགོད་པ། དོན་གོ
རྭ་ལོ། དེའི་གོ་དོན་ནི། ཕྱི་ལོགས་འདིར་ཡིད་བཞིན་ནོར་བུ་དང་ཆོལ་གསུམ་ཆིག་སྒྲིལ་གྱི་དམངས་གཙོའི་ཀ་བ་གསུམ་ལྡན་གྱི་སྒྲིག་འཛུགས་སྔར་ལས་ལྷག་པ་ཞིག་ཡོད། འདིས་བོད་ནང་གི་གནས་སྟངས་ཚང་མ་རྒྱལ་སྤྱིའི་ཐོག་ལ་གསལ་བསྒྲགས་དང་དཔལ་འབྱོར་རོགས་དངུལ་སོགས་ཀྱི་མཐུན་འགྱུར་རེ་ཞུ་ཐུབ་ཅེས་པའི་དོན་ལས་ལྷག་པ་ཅང་མེད་པར་འདོད། དཔེར་ན་ཚེ་སྲོག་གི་འགན་ལེན་དང་མྱུར་སྐྱོབ། དམག་རོགས། བཙོན་གྲོལ།་སྐྱབས་བཅོལ་ལ་ལེན་པ་སོགས་ཀྱི་མཐུན་འགྱུར་གནང་ཐབས་བྲལ་བ་ཞིག་རེད་པ།
བོད་རྒྱཞིག་མོལ་བྱ་གི་ཡིན་་་་་་་་་་་་་རྒྱལ་བ་རིན་པོ་ཆེ་བོད་ལ་གདན་དྲངས་ཀྱི་ཡིན་་་་་་་་གཞི་བྱས་ལྷན་འཛོམ་བྱ་གི་ཡིན་་་་་རྒྱལ་སྤྱི་ཐོག་ནས་བོད་པའི་གནས་སྟངས་དོ་སྣང་བྱ་མཁན་མང་དུ་འགྲོ་གི་ཡོད་་་་ལུང་ཚན་དབྱེར་མེད་ཆོས་ལུགས་རིས་མེད་ཟེར་བ་དེ་ཚོ་རྡ་སའི་ཆབ་སྲིད་པ་ཚོས་མགྲིན་པ་ཡན་ཆོད་ཀྱི་སྐད་ཆ་ཞིག་ཡིན་པ་ལས་ཚོེ་སྣང་ཡོད་པའི་སྐད་ཆ་ཞིག་དང་དོན་ལ་གནས་བའི་སྐད་ཆ་ཞིག་མ་རེད་་་་་ལོ་ལྔ་བཅུ་ལ་འདི་རྐྱང་རྐྱང་བཤད་ནས་རྫོགས་པ་རེད་་་་ད་སྐད་ཆ་སྙན་མོ་བཤད་རྒྱུའི་ཚབ་ལ་ལག་ལེན་ངོ་མ་སྟར་བའི་མགོ་མ་འཛུགས་ན་སྒུགས་ཐུབ་མ་སོང་གཏན་ནས་སྒུགས་ཐུབ་མ་སོང་།
ཚོགས་གཙོས་སྐད་ཆ་དེ་ཚོ་ངོ་མ་རེད།
ཁྱོད་ཚོས་བོད་ནང་ནས་དཀའ་ལས་ག་ཚོད་རྒྱགས་ཀྱི་ཡོད་པ་དེ་ལྟ་བུ་ཞིག་ང་ཚོས་འདི་ནས་གནང་ཐུབ་ཀྱི་ཡོད་མ་རེད་གསུངས་པ་དེ་ངོ་མ་རེད།
མི་རིགས་ཀྱི་ཆིག་སྒྲིལ་དང་མི་རིགས་ཀྱི་འདུ་ཤེས་རིག་གཞུང་གི་གོ་རྟོགས་དང་སྐད་ཡིད་སྲུང་སྐྱོབས་དཔལ་འབྱོར་གྱི་གནས་སྟངས་གང་གི་ཆ་ནས་ཀྱང་བཙན་བྱོལ་དང་བོད་གཉིས་མཚུངས་བསྡུར་བྱ་ས་ཞིག་ཡོད་པ་མ་རེད།བདེན་པ་རེད།
བཙན་བྱོལ་ནང་དུ་མི་ལོ་ལྔ་བཅུ་ལོ་ནག་དེ་འཐེན་ཁྱེར་་ཕྱོགས་རིས་ནང་ཁུལ་གྱི་འཐབ་རྩོད་ཀྱིས་བསྐྱལ་འདུག་གནས་ཚུལ་འདི་ལ་བློ་ཕམ་ཡོད།
མ་འོངས་པའི་མི་ལོ་ལྔ་བཅུ་དེ་ཆིག་སྒྲིལ་དང་ཕྱོགས་རིས་མེད་པའི་ཁ་གཏགས་དཀར་པོ་འདྲ་བའི་ལོ་དཀར་ཟླ་དཀར་ཞིག་གིས་བསྐྱལ་ཐུབ་ན་ང་ཚོ་ལ་རེ་བ་ཞིག་ཡོད།
་ད་དུང་ཡང་རྡ་སའི་ཆབ་སྲིད་དེ་མི་མངོན་པའི་སྐུ་དྲག་རིང་ལུགས་ཀྱིས་འཆིང་ཐག་བར་ནས་ཐར་མ་སོང་སྐྱབས་བཅོལ་ལག་དེབ་རྒྱ་མི་གཞུང་ཚབ་ལ་ཕུལ་ནས་ཕ་ཡུལ་གངས་ཅན་དུ་ལོག་རྒྱུ་སེམས་ཐག་བཅད་ཡོད།
༼ཁྱེད་རང་ཚོས་རང་སྲོག་འབེན་ལ་བཙུགས་ཏེ་ལྷག་བསམ་ཆོད་སེམས། སྙིང་སྟོབས་ཞུམ་པ་མེད་པར་ཕྱག་ལས་གནང་བ་དེར་ང་ཚོའི་ངོས་ནས་མཐུན་འགྱུར་གང་ཞུ་དགོས་ཀྱང་། ཞུ་ཐུབ་པའི་གནས་སྟངས་ཤིག་ཀྱང་འདིར་འཛོམས་ཡོད་ཅེས་གསལ་བོ་ཞུ་རྒྱུ་ཡིན་༽ ཅེས་གསུངས་པ་འདིའི་གོ་དོན་ཅི་རེད།