སེང་གེའི་བཀའ་ཤག་གི་མདུན་ལམ།

ཤར་ཕྱོགས་ཁུག་རྟ།

༡ སེང་གེའི་བཀའ་ཤག་ངོ་སྤྲོད་སྔོན་མེད་མ།

སྐབས་ ༡༥ པའི་ཚོགས་དུས་གཉིས་པ་མཇུག་སྒྲིལ་བ་དང་། བཀའ་ཤག་གསར་བས་གྲོས་ཚོགས་ལ་འགན་ཁུར་སྟངས་ཐད་སྲིད་དོན་པ་དག་གིས་དཔྱད་བརྗོད་སྤེལ་བཞིན་པའི་སྐབས་འདིར། ཨ་རི་དང་ཡུ་རོབ། ཐའེ་ཝན་ན་ཡོད་པའི་གྲོགས་པོ་སྐོར་ཞིག་གི་མཉམ་དུ་གླེང་མོལ་གྱིས་སེང་གེའི་བཀའ་ཤག་གི་མདུན་ལམ་ལ་རོབ་ཙམ་བལྟས་པ་ཡིན། ངའི་གྲོགས་པོ་ཚོས་སོ་སོའི་གནས་ཡུལ་གྱི་སྲིད་དོན་གནམ་ངོ་དང་འབྲེལ་ནས་སེང་གེའི་བཀའ་ཤག་གི་མདུན་ལམ་ལ་བསམ་ཚུལ་རེ་རེ་གསུང་གི་འདུག ང་ཚོས་སེང་གེའི་བཀའ་ཤག་གི་མདུན་ལམ་ལ་ལྟ་དགོས་ན། གཙོ་བོ་བཀའ་ཁྲི་དང་བཀའ་བློན་གཞན་གྱི་ནུས་པ་དང་རྣམ་དཔྱོད་ལའང་ལྟ་དགོས།

བཀའ་ཁྲི་འདི་ཉིད་རང་གི་བློ་ཡུལ་ལས་འགོངས་པའི་སྲིད་ཁྲིར་བསླེབས་པ་ལ། སྲིད་དོན་པ་མང་པོས་ཁོང་གི་རྨི་ལམ་མངོན་གྱུར་བྱས་པར་གླེང་གི་མེད་ལ། ཁོང་ལ་འདི་འདྲའི་རྨི་ལམ་ཞིག་ཡོད་པར་ཉེ་བོ་དང་འདྲིས་བོ་ཚོས་ངོས་འཛིན་གནང་མེད། དེ་ལས་ལྡོག་སྟེ་འོལ་ཚོད་དོན་དངོས་གྱུར་བ་དང་། རླུང་རྟ་ཡག་རབས་ཀྱི་གཏམ་གྱིས་སྡོམ་ཚིག་བཀོད་ཡོད། ཡིན་ནའང་། ཁོས་འོས་འགྲན་སྐབས་ནས། ” རྩ་དོན་གསུམ་“ཟེར་བའི་དམ་བཅའ་ཁྲི་བརྩེགས་སུ་ཟློས་ཤིང་། བཀའ་བློན་འབྲོང་ཆུང་དངོས་གྲུབ་ཀྱི་ཤུགས་རྐྱེན་ཡོངས་གྲགས་ཀྱིས་ཉོས་ཤིང་། བུད་མེད་དང་ཆོལ་ཁ་རིས་མེད་ཟེར་བའི་བཀའ་བློན་ཡོང་ཁུངས་ཀྱིས་ཁོང་ལ་རོགས་འདེགས་རླབས་ཆེན་ཐུབ་ཡོད། ཡིན་ནའང་། དོན་དངོས་ལག་བསྟར་ཁྲོད། ཁོང་གིས་བཀའ་བློན་འདེམས་ཕྱོགས་ཀྱིས་མི་རྣམས་ཧ་ལས་ཤིང་ཧང་སང་དུ་བཅུག་ཡོད། གསལ་བོར་བཤད་ན། བཀའ་བློན་འབྲོང་ཆུང་དངོས་གྲུབ་དང་ཚེ་རིང་དོན་གྲུབ་རྣམ་གཉིས་ཞལ་རས་ནག་ཅིང་བཞུགས་སྟངས་བརྗིད་པོའི་རྣམ་པ་དེས། སྲིད་དོན་པ་མང་པོར་སེང་གེའི་བཀའ་ཤག་གི་ལྗིད་ཁོག་ཚོད་བགམ་ཐུབ་པ་བྱུང་ཡོད།

བོད་ནས་འབྱོར་བ་སེར་སྐྱ་རྒན་གཞོན་མེད་པར་འབྲོང་ཆུང་དངོས་གྲུབ་ཚང་གི་རྣ་མིག་མ་འགྲིམས་པ་ཞིག་མེད་ལ། བོད་ནང་ནས་རྩ་དོན་ཐད་ལས་ཀ་མ་འདྲ་བ་གནང་མཁན་གཅིག་ཀྱང་མ་ལུས་པར་ཁོང་ལ་ཐུག་འཕྲད་གནང་ཡོད། ཁོང་གིས་དེ་དག་གི་སེམས་ཁམས་དང་ལྟ་ཚུལ་བཅས་ལ་མཐུན་པའི་བཀའ་མོལ་གནང་ཕྱོགས་ནས་ཐག་གཅོད་ཅི་ཞིག་བྱེད་དགོས་མིན་བར་གྱི་ལས་དོན་ཡོངས་རྫོགས་ཀྱིས། ཆོལ་གསུམ་རིས་མེད་སྐྱེས་བོ་ཀུན་ལ་འབྲོང་ཆུང་དངོས་གྲུབ་ཚང་སྤྱི་མི་ཚད་དང་ལྡན་པ་ཞིག་ཆགས་ཡོད། དེ་བཞིན་ཁོང་ཉིད་འཛིན་སྐྱོང་ནང་ལོ་མང་བཞུགས་པས་ལས་བྱེད་རྣམས་ཀྱི་བརྩི་བཀུར་ཀྱང་ད་ལྟའི་ཆ་ལ་བློ་སེང་ལས་བརྒལ་བ་ཡིན་པ་མིག་མཐོང་རང་རེད། དེ་ལས་ཀྱང་འུ་ཚོའི་ཆེ་དྲགས་དབང་ལྡན་རྣམ་པ་ཚོས་ཀྱང་འབྲོང་ཆུང་ཚང་གི་བབ་བརླིང་ལ་ཞེ་འདར་ཤོར་བའི་བརྩི་བཀུར་བྱེད་ཀྱི་ཡོད། རྒྱུ་མཚན་དེས་ན་སེང་གེའི་བཀའ་ཤག་གི་ཕྱི་ནང་གསང་གསུམ་གྱི་ཤུགས་རྐྱེན་ཆེ་ཤོས་དེ་བདེ་སྲུང་བཀའ་བློན་འདི་བ་ཚང་ལས་གཞན་ཞིག་འཇོག་རྒྱུ་མི་འདུག

དེ་བཞིན་བཀའ་བློན་ཚེ་རིང་དོན་གྲུབ་མཆོག་ཀྱང་བཙན་བྱོལ་བོད་གཞུང་གི་ལས་དོན་ཐམས་ཅད་ལ་གཞན་དྲིང་མི་དགོས་པའི་རྣམ་དཔྱོད་ཡོད་ཅིང་། སྒམ་ཚུགས་ཀྱི་ཆ་ནས་ཞུས་ན་བདེ་དཔལ་བཀའ་བློན་གཉིས་ལ་དམིགས་བསལ་གྱི་མཚུངས་ཆོས་མང་པོ་འདུག མ་ཟད་རྣམ་པ་གཉིས་སྐུ་སྒེར་ནས་ཀྱང་བློས་ཐུབ་ལྟ་བུའི་སྣང་ཚུལ་མངོན་བཞིན་ཡོད། འདི་ནི་ཕལ་ཆེར་སེང་གེའི་བཀའ་ཤག་གི་མ་གདན་དང་ཕྱོགས་དང་མཚམས་གང་དུའང་ཟགས་ནས་དྲུད་མི་འགྲོ་བའི་ཡིད་ཆེས་བྱེད་ས་ཉག་ཅིག་ཏུའང་བཙན་བྱོལ་བོད་མིའི་དཀྱིལ་འཁོར་དུ་ངོས་འཛིན་བྱེད་བཞིན་ཡོད།

གཞན་པད་མ་ཆོས་འབྱོར་གྱི་ན་རྒ་རྫི་ལྡིབ་དང་། རྒྱ་རི་སྒྲོལ་མའི་ལྷག་བསམ་མིག་ཆུ། གསར་བུ་གསར་མོ་གཞན་བཅས་དུས་ཚོད་ལ་ལྟོས་ཏེ་ཅི་ཆགས་ལྟ་རྒྱུ་ལས་དཔྱད་གླེང་བྱེད་རིན་མ་མཐོང་།

༢ སེང་གེའི་ཤག་གི་ལས་ཀ་རབ་རིབ་མར་དཔྱད་པ།

འོ་ན། ད་བཀའ་ཤག་འདི་ཉིད་ལས་དོན་ཐོག་ཅི་ལྟར་མདུན་བསྐྱོད་བྱ་རྒྱུ་ཡིན་ནམ་ཟེར་ན། དེ་ནི། བློ་སེང་གིས་སྔོན་ནས་གཡར་དམ་ཅི་ལྟར་བཅས་པ་བཞིན། བོད་མི་རྒན་གཞོན་ཚོར་སྐྱོར་རྒྱུ་ཡོད་པའི་ ” ཆིག་སྒྲིལ། གསར་གཏོད། རང་མགོ་རང་ཐོན། ” གསུམ་ཡིན་ཞིང་། ཚིག་འདི་དག་ཐོན་མ་ཐག་བློ་སེང་གཞན་གྱི་ཆབ་སྲིད་ལ་དབྱིངས་ཡོད་པ་རྟོགས་ཤིང་། བསམ་ཚུལ་དེས་མི་རབས་གསར་བར་ལས་འཆར་གསར་བ་འདྲ་སྟོན་རྒྱུ་ཨེ་ཡོད་བསམས་ནས། དམ་འབུལ་གཏམ་བཤད་ནས་ཁ་སང་ཚོགས་དུས་གཉིས་པའི་བཀའ་ཤག་གི་གསལ་བཤད་བར་བོད་མི་འགན་ཁུར་ཅན་རྣམས་ཀྱིས་ས་ཆའི་ཁ་ཐག་ལ་མ་ལྟོས་པར། མིག་གོར་གོར་དང་རྣ་ཅོར་ཅོར་བྱས་ཏེ་བསྡད་པ་རེད། ཡིན་ནའང་། བློ་སེང་གིས་ཚོར་སྣང་ཤུགས་ཆེན་གྱི་ཐ་ཀ་ཐད་ཀར་གང་དྲན་རྣམས་ཡིག་ཐོག་ཏུ་ཕབས་བཅུགས་ནས་བཤད་རྐྱང་བྱས། གཏམ་བཤད་གང་དེ་དང་འབྲེལ་བའི་སྔར་གནས་ལ་མིག་བཤེར་ཙམ་ཡང་མི་འཕེན་པར། དམ་འབུལ་གཏམ་བཤད་དང་། མང་གཙོའི་གཏམ་བཤད། གྲོས་ཚོགས་གསལ་བཤད། ཆོས་ཚོགས་གཏམ་བཤད་བཅས་རིམ་པར་སྤེལ་ཡང་། གྲོས་ཚོགས་འཐུས་མི་ཚོའི་འདོད་བློ་ཁེངས་པ་ཞིག་གཏན་ནས་མ་བྱུང་། དཔལ་ལྡན་ཚོགས་གཙོ་མཆོག་གིས་མཇུག་སྡོམ་གསུང་བཤད་དུ་མ་འོངས་པར་བཀའ་ཤག་གི་གཏམ་བཤད་ཡར་རྒྱས་འགྲོ་རྒྱུའི་རེ་སྐུལ་གནང་། གཏམ་གང་བཤད་དང་ལས་གང་བྱེད་ལ་གཟབ་ནན་དང་གཞུང་ལུགས་དགོས་ཚུལ་གྱི་ཚིག་མདའ་ཅིག་ཀྱང་མཉམ་དུ་འཛིན་སྐྱོང་བཀའ་ཤག་ལ་བསྩལ།

ད་ཐེངས་བློ་སེང་གི་མཉམ་སྡེབས། མགོ་སྦྲེལ། ཆིག་ཁྲི་ཆིག་འབུམ། གདན་ཞུ། ཤེས་ཡོན་སྲིད་བྱུས་བཅས་ཀྱི་ཐད་གྲོས་ཚོགས་འཐུས་མི་ཚོར་གསལ་ཁ་དེ་ཙམ་མ་བྱུང་བ་དེ། བཙན་བྱོལ་བོད་མིའི་དཀྱིལ་འཁོར་དུ་རེ་དོགས་གང་ཡོད་མ་ཐོས་མོད། ཁོ་བོས་བསམས་ན་དེ་ནི་ཁོང་གི་ཤེས་བྱའི་ནང་ཁོག་དང་འབྲེལ་བ་ངེས་ཅན་ཞིག་ལོས་ཡོད་དེ། འཆར་གཞི་རེ་རེར་ཚུལ་མཐུན་སྒྲུབ་ལུགས་ཀྱི་གཞུང་ལུགས་གསར་གཏོད་བྱ་རྒྱུ་མ་རྙེད་པ་དེས་ངེད་ལ་ཁོང་གི་འབུམ་རམས་པའི་ཤེས་ཚད་ལ་དོགས་གཞི་ནམ་མཁའ་འདྲ་ཞིག་བྱུང་།

ཁོང་གི་མགོ་སྦྲེལ་ལ་མཚོན་ན། ད་ལྟ་ཁ་ཎ་སྒྲ་དཔེ་མཚོན་ཞིག་ཏུ་གྱུར་ཟིན་པ་ལྟར་ཁོང་གི་རེ་བ་དེ་མ་མཐའ་སློབ་མ་གཅིག་གི་སློབ་ཡུན་གྱི་སྟེང་དུ་བབས། དེ་བཞིན། མཉམ་སྡེབས་ཀྱང་མཐར་གཏུག་ན་སྒོར་འབུམ་ཁ་ཤས་ཀྱི་མཐུན་རྐྱེན་ལ་ཐུག་ཡོད་པ་ཙམ་ལས། ཞིབ་འཇུག་པ་འདེམས་སྒྲུག་བྱེད་སྟངས་ཚིག་ཟུར་ཙམ་ཡང་ཐོན་མེད། དེ་ནི་གཅིག་བྱས་ན་ཚད་ལྡན་ཞིག་གིས་ཁོང་ལ་ཁས་ལེན་མ་གནང་བས་ཀྱང་ཡིན་སྲིད།

ཆིག་ཁྲི་ཆིག་འབུམ་ནི་རི་བོང་གི་རྭར་གྱུར་མིན་ལ་མ་ལྟོས་པར། ༧གོང་ས་མཆོག་ནས་ཀྱང་བསྟོད་བསྔགས་གནང་ཡོད། སྤྱིར་བཏང་༧གོང་ས་མཆོག་གི་བསྟོད་བསྔགས་དེ་བེད་སྤྱོད་ལོག་པར་བཏང་ན་མི་རེ་འགའ་མགོ་འཁོར་ངེས་ཀྱང་། ཅི་ལྟར་སྤྱི་འཐུས་གནས་ཚད་མཐོ་གྲས་བོན་པོ་བ་སྨོན་ལམ་མཐར་ཕྱིན་པས་བཤད་པ་ལྟར། དང་པོ་བཙན་བྱོལ་དུ་བོད་ཡིག་ཐོག་ཁྱད་ལས་པ་ ༥༠༠ ཐོན་ཐུབ་བྱས་ན་ཟེར་བ་དེ་གནད་འགག་དང་དོན་དངོས་ཐག་ཉེ་བོ་འདུག ཅིའི་ཕྱིར་ལོ་ཉི་ཤུའི་དམིགས་ཚད་བཟུང་བ་རེད་དམ། ལོ་ཉི་ཤུར་དེ་འདྲ་ཞིག་ཐོན་ཐུབ་བམ། བོད་ནང་གནས་སྐབས་བཞག་ནས། བཙན་བྱོལ་དུ་ཁྱད་ལས་པ་དེ་དག་ས་ཆ་གང་ནས་འདེམས་སྒྲུག་བྱ་རྒྱུ་ཡིན་ནམ་ཟེར་ན། བློ་སེང་ལ་འདིའི་དྲིས་ལན་གསལ་བོ་ཞིག་མེད། དེ་བས་ལོ་ཉི་ཤུ་འདི་ནི་ལོ་ལྔ་ཚན་ཕྱི་མ་དེའི་མ་གདན་ནམ་འོས་ཤོག་དངོས་གནས་དེ་རེད།

གདན་ཞུའི་ཐད་ནས་ཉུང་ཙམ་སྤྲོས་ན། དེང་བཙན་བྱོལ་ནང་གི་ལས་བྱེད་པའི་བློ་འགུགས་བྱེད་ཐབས་སུ། བོད་ནང་གི་སྤུན་གཉེན་དག་ལ་ཞི་དྲག་གི་ཐབས་ཤེས་བསྟུད་མར་བྱེད་པ་བདེ་སྲུང་བཀའ་བློན་གྱིས་གསུངས་བ་ལྟར། རྒྱ་ནག་གི་འདོད་པར་མ་བབས་ན་བོད་མི་དཀྱུས་མ་ཞིག་ཀྱང་བོད་དུ་ལོག་རྒྱུ་མེད་པ་རེད། ཕྲན་ལྟ་བུས་ལས་བྱེད་པ་འཐབ་རྩོད་པ་ཐབས་ཆག་ཅིག་ལའང་ཕ་ཡུལ་དུ་ལོག་འདོད་ན་ལས་ཀ་དེ་འདྲ་མ་བྱས་ན་བཟང་བས་འཇིགས་སྐུལ་སླེབས་སོང་། དངོས་ཡོད་དེས་ད་བར་བློ་སེང་གིས་བོད་མིའི་དད་འདུན་སྲིད་དོན་ནང་བེད་སྤྱོད་བྱས་པ་དེ་རྦད་དེ་ནོར་འཁྲུལ་ཆེན་པོ་རེད་ལ། བྱུང་ན། ༧གོང་ས་མཆོག་གདན་ཞུ་ཟེར་བ་འདི་མང་པོ་མ་གསུངས་ན་ཡག་ཅིང་། བོད་ལ་རང་དབང་བྱུང་མཚམས་༧གོང་ས་མཆོག་གི་སྲིད་འགན་མི་བཞེས་རྒྱུ་མ་འོངས་རྩ་ཁྲིམས་སོགས་སུ་བཀོད་ནས་ཁྱབ་བསྒྲགས་གནང་བ་དང་། དེང་སྐབས་ཡོངས་སུ་སྲིད་འགན་རྩིས་སྤྲོད་ཞུས་ཟིན། དེ་དག་རྒྱ་ནག་ལ་༧ཏཱ་ལའི་བླ་མ་མི་གཅིག་གི་ཆེད་དུ་གླེང་རྒྱུ་གང་ཡང་མེད་པ་དང་། ལྷག་ཏུ་༧ཏཱ་ལའི་བླ་མས་ཞིང་བྲན་བསྐྱར་གསོ་བྱེད་ཀྱི་མེད་པས་བརྡ་ལན་མཚོན་ཆེད་ཡིན་པ་གསལ་བོ་ཡིན་སྟབས། དེང་སྐབས་༧གོང་ས་མཆོག་གདན་ཞུ་ཟེར་བའི་ཚིག་འདི་བོད་ཀྱི་རང་དབང་འཐབ་རྩོད་ཀྱི་སྲིད་དོན་སྡིངས་ཆའི་སྟེང་དེ་ཙམ་འབྲེལ་བ་མེད་ལ། འདི་ནི་༧ཏཱ་ལའི་བླ་མར་བཅངས་བའི་དད་འདུན་བེད་སྤྱོད་བྱས་པ་ཞིག་ཀྱང་རེད་འདུག་པས། ཁོང་དངོས་གནས་གདན་འདྲེན་ཞུ་མཁན་ནི་ཆབ་སྲིད་དང་འབྲེལ་བ་མེད་པའི་དགའ་ལྡན་ཕོ་བྲང་བ་ཡིན་ལ། དེས་འབྲེལ་བ་བྱེད་ས་འང་རྒྱ་ནག་གི་ཆོས་ལུགས་སྡེ་ཚན་ཁག་ཡིན་པས། བཀའ་བློན་ཁྲི་པའི་འོས་འགན་དང་དེ་ཙམ་འབྲེལ་བ་མེད།

ཤེས་ཡོན་ཐད། བཀའ་ཁྲི་གསར་བས་དམིགས་བསལ་གནང་གི་ཡོད་པ་དེས་མི་རྣམས་ལ་བག་ཆགས་ཡག་པོ་བཞག་ཡོད་ལ། བོད་ཀྱི་རིག་གཞུང་བྱུང་རབས་སྐད་ཡིག་ཚུགས་ཐུབ་མེད་མཁན་ཞིག་ཤེས་རིག་བཀའ་བློན་དུ་བསྡད་ཀྱང་བཙན་བྱོལ་ནང་བསམ་ཚུལ་གང་བྱུང་གི་ཡོད་མེད་ངས་མ་ཐོས་མོད། ཤེས་རིག་སློབ་གསོའི་ལས་དོན་འདི་འཛིན་སྐྱོང་གི་རིགས་ལམ་གཅིག་པུས་མཐའ་འཁྱོངས་པ་ཞིག་མིན་པ་གསལ་བོ་ཡིན་ཡང་། བཀའ་ཁྲིས་གྲོས་ཚོགས་སུ་གསུངས་བ་ལྟར་ན་ཤེས་ཡོན་ཐད་སྔར་མེད་ལས་འཆར་སྒྲིག་དང་སྒྲིག་རྒྱུ་ཡོད་པའི་བསམ་ཚུལ་ཤུགས་ཆེར་བཏོན་ཡོད། འདི་ནི་གཅིག་བྱས་ན་འགལ་རྐྱེན་དུའང་འགྲོ་སྲིད་མོད། ང་ཚོས་ཡོང་རྒྱུར་ལྷགས་པའི་ནོ་བྷེལ་གཟེངས་རྟགས་དུས་དྲན་སྐབས། ཁོང་གི་བོད་ཡིག་ཀློག་སྟངས་ལ་ལྟོས་ན་ཁོང་གིས་ཅི་ཙམ་བོད་སྐད་ཡིག་གི་ཤེས་བྱར་ཅི་ཙམ་དོ་ནན་བྱེད་བཞིན་པ་རྟོགས་ཐུབ་ལ། དེས་ཁོང་ལ་བསྐྱར་གསོ་བྱེད་དགོས་པའི་རང་དང་འདྲ་བའི་བཙན་བྱོལ་བོད་མིའི་བོད་ཀྱི་ཤེས་རིག་གི་འབྱུང་འགྱུར་མཐོང་འཇུག་གི་རེད་ལ། མྱོང་འཇུག་གི་རེད།

དེས་ན་སེང་གེའི་བཀའ་ཤག་གི་ལས་འཆར་ལས་རིམ་འདི་དག་གིས་བོད་མི་ཞིག་ལ་བསམ་ཚུལ་ཅི་ཞིག་སྤྲོད་ཀྱི་རེད་དམ།

༣ རང་ངོས་ནས་རང་ལུགས་བཞག་སྟེ་བོད་ཀྱི་མདུན་ལམ་ལ་ལྟ་བ།

            གོང་དུ་རོབ་བཤད་བྱས་པའི་བཀའ་ཤག་དང་དེའི་ལས་འཆར་ལས་རིམ་ཐད་དཔྱད་པ་བྱས་ནས་མཚམས་འདིར་བསླེབས་པ་ན། བོད་ནང་ནས་གཅིག་རྗེས་གཉིས་མཐུད་ཀྱིས་རང་ལུས་མཆོད་མེར་སྒྲོན་པའི་ལས་འགུལ་བྱུང་དང་འབྱུང་བཞིན་པས། སེང་གེའི་བཀའ་ཤག་གིས་ལམ་དབུ་མ་རྒྱུན་འཁྱོངས་ཀྱིས་མཆོད་མེ་སྦར་བའི་རྒྱུ་མཚན་ཐག་གིས་གཅོད་ཀྱི་ཡིན་ན། བཀའ་ཤག་སྐབས་གོང་མའི་“དབུས་གཞུང་ལ་ཕུལ་བའི་” “བསམ་འཆར་” དང་དེའི “འགྲེལ་བརྗོད་” ཐད་གསལ་ཁ་བྱེད་དགོས་ཀྱི་འདུག་ལ། སེང་གེའི་བཀའ་ཤག་གི་སྐབས་སུ་བྱུང་བའི་རང་ལུས་མཆོད་མེར་སྒྲོན་པའི་གནས་སྟངས་ནི་ལོ་རྒྱུས་གསར་བ་ཞིག་ཡིན་པས། ” བསམ་འཆར“་དེ་ལ་བསྐྱར་ཞིབ་བྱ་དགོས་མིན་དང་དེས་དེང་བོད་ནང་བྱུང་བཞིན་པའི་མངོན་འདོད་མཚོན་གྱི་ཡོད་ན། “བསམ་འཆར་“དེའི་མཇུག་སྣོན་ཅི་ལྟར་སྐྱོང་མིན་ལ་འབྲེལ་མོལ་གྱི་སྒོ་མོ་ཕྱེས་ཡོད་ཟེར་བའི་ཚིག་ཙམ་གྱིས་འཐུས་བར་མི་འདོད།

            དགའ་ལྡན་ཕོ་བྲང་པའི་སྲིད་དབང་འཕོ་འགྱུར་བྱུང་བ་དང་། ན་ནིང་ཟླ་ ༣ ཚེས་ ༡༠ ནས་འཛམ་གླིང་གི་དོ་སྣང་མ་འདྲ་བ་གནང་གི་ཡོད་ན། རྒྱ་ནག་གི་མཁས་དབང་ཁག་དང་འབྲེལ་འདྲིས་གཏིང་ཟབ་ཡོད་པ་ཡིན་ན། སེང་གེས་བཀའ་ཤག་གིས་ཕྱི་སྡོད་རྒྱ་རིགས་གང་ན་ཅི་ཡོད་རྣམས་ངྷ་སར་མགྲོན་འབོད་ཀྱིས་ཚོགས་ཆེན་དམིགས་བསལ་བ་ཞིག་བསྡུས་ཏེ་བོད་མིར་རང་དབང་ཐོབ་ཐབས་སུ་ཞུ་འབོད་བྱེད་དགོས་ཤིང་། ” བསམ་འཆར་“སྤྲད་པས་རྒྱལ་སྤྱིའི་སྤྱི་ཚོགས་ཀྱི་རྒྱབ་སྐྱོར་དེས་བོད་དོན་ལ་ཕན་མིན་གྱི་གནས་སྟངས་གསལ་བོ་བཟོ་དགོས་པར་སྙམ་ལ། གལ་སྲིད་དེར་ད་དུང་རྔོ་ཐོགས་པ་ཞིག་མེད་ན། རྒྱ་ནག་རང་གིས་རང་གི་རྩ་ཁྲིམས་འབྲུ་འགྲེལ་དང་རྩ་ཁྲིམས་བརྩི་མིན་གྱི་ཡ་ལན་ལ་སྒུག་ནས་མི་སྡོད་པར། བཀའ་ཤག་གསར་བའི་ལོ་གཉིས་ཀྱི་ནང་གནས་སྟངས་དེ་ཁ་གསལ་བཟོ་མ་ཐུབ་ཚེ། སེང་གེའི་བཀའ་ཤག་གི་རྒྱ་བོད་འབྲེལ་ལམ་གྱི་གསར་གཏོད་རི་བོང་གི་རྭ་དང་། ལོ་རྒྱུས་ཀྱི་མགོ་བསྐོར་སྔ་ན་མེད་པ་ཞིག་ཆགས་ཀྱི་རེད་ལ།  “རྩ་དོན་གསུམ་” “ནག་ཉེས་གསུམ་“གྱི་ངོ་བོར་འགྱུར་གྱི་རེད།

            གལ་སྲིད་དེ་ལྟར་དུས་ཡུན་ངེས་ཅན་ནང་རྒྱ་བོད་ཆབ་སྲིད་ཐད་རེ་བ་མ་མཐོང་ཚེ། བཀའ་ཁྲི་གསར་བས་བརྒྱུད་ལམ་སྣ་ཚོགས་ནས་བོད་ཕྱི་ནང་གཉིས་དང་། བོད་དང་རྒྱ་ནག་བར་ལ་རིག་གཞུང་གི་བརྗེ་རེས་གསར་གཏོད་བྱེད་དགོས་པར་འདོད་ལ། བོད་ཕྱི་ནང་གཉིས་སུ་ཡོངས་སུ་འགྲོ་བསྐྱོད་རང་དབང་ལྡན་པ་ཞིག་ཆགས་རྒྱུར་འབད་བརྩོན་གནང་སྟེ། རྒྱ་བོད་བར་ལ་ཆབ་སྲིད་ཀྱི་གནད་དོན་ཕུད་གཞན་རྙོག་གླེང་གང་ཡང་མེད་པ་དོན་དངོས་ཐོག་ལག་ལེན་བསྟར་ཐུབ་པ་ཞིག་ལ་ལས་འཆར་སྒྲིག་དགོས་པར་འདོད། དེ་འདྲའི་མཐུན་ཟབ་ཞི་གནས་ཀྱི་ལྟ་ཚུལ་ལ་ཡ་ལན་བྱེད་རྒྱུའི་རེ་བ་མ་མཐོང་ཚེ། སྐབས་དེ་ནས་བཟུང་འཚེ་མེད་ཞི་བ་བེམ་པོར་གྱུར་སོང་བ་རེད་ལ། དྲང་བདེན་ཀྱང་རུལ་སོང་བ་ཡིན་པས། ཚེ་སྲོག་རྒྱུ་འབྱོར་ཕངས་མེད་ཀྱིས། གསོན་གནས་གཉིས་ཀྱི་གཅིག་བདམས་སྟེ་བློ་ཐག་ཆོད་པོས་ལམ་དུ་བསྐྱོད་དགོས་ཤིང་། ཉི་མ་དེར་ཤི་སོང་བའི་བོད་མི་རིགས་ཤིག་ཡོད་ན་དེ་ནི་སྐྱེ་བ་རླབས་ཆེ་ཞིང་ཤི་བ་གཟི་བརྗིད་ལྡན་པ་ཞེས་པ་དེ་ཡིན། སྐབས་དེ་ནས་བཙན་བྱོལ་བ་འབོར་ཆེན་བོད་དུ་ཞི་བའི་གོམ་བགྲོད་ཀྱིས་སྲོག་གཏོང་དགོས་ཤིང་། བོད་ནང་དུ་ཞི་བའི་ལས་འགུལ་སྤེལ་ཕྱོགས་ཀྱི་བཀོད་གདམ་བཙན་བྱོལ་བོད་གཞུང་གིས་བྱེད་དགོས། དེ་ལྟར་བོད་ཕྱི་ནང་གཉིས་ནས་བོད་མི་འབུམ་གཅིག་གིས་རྒྱལ་ཁབ་ཀྱི་དོན་དུ་སྲོག་དོར་བ་ཡིན་ན། ང་ཚོར་གང་མགྱོགས་རང་དབང་ཐོབ་ཀྱི་རེད།

༢༠༡༡། ༩། ༤། ཉིན།