སྐྱ་མདའ།
ད་ལྟ་ང་ཚོའི་འཐབ་རྩོད་འདི་ཨ་རབ་ཀྱི་དཔྱིད་ཀ་ལྟར་རྒྱ་མི་ཆེ་ཡང་། དཔའ་སྟོབས་དང་ཆོད་སེམས་ཀྱིས་མདུན་དུ་བསླེབས་པའི་ཁ་ཕྱོགས་གསར་པ་ཞིག་ཏུ་མདུན་སྐྱོད་བྱེད་ཀྱིན་ཡོད། ཇི་སྲིད་མདོ་དབུས་མཐོ་སྒང་ན་རང་དབང་གི་དཔྱིད་ཀ་མ་འཆར་བར་དེ་སྲིད་དུ་བོད་མི་རྣམས་ལྷིང་འཇགས་གེར་གཉིད་མི་སྲིད། འ་ཆད་འུ་ཐུག་གི་འཐབ་རྩོད་ཀྱི་ཁ་ཕྱོགས་གསར་པ་དེ་ཡང་རྒྱ་གཞུང་རང་ཉིད་ཀྱིས་བསྐྲུན་པ་ཞིག་ལས། གཞན་སུ་ཞིག་ལ་ཡང་ངན་ཁག་དཀྲི་ས་མེད། རང་ཉིད་ཀྱིས་བསྐྲུན་པའི་རང་དབང་འཐབ་རྩོད་ཀྱི་ཁ་ཕྱོགས་འདིས། རྒྱ་གཞུང་རང་ཉིད་ཀྱང་ཅི་བྱ་གཏོལ་མེད་དུ་འགྱུར་གྱིན་ཡོད། ད་དུང་ཡང་རང་དབང་འཐབ་རྩོད་ཀྱི་འགུལ་སྐྱོད་གསར་པ་གང་དང་གང་དུ་ཁ་ཕྱོགས་མིན་སུས་ཀྱང་ཚོད་དཔག་དཀའ་བ་ཞིག་རེད། རྒྱ་གཞུང་གི་བསམ་ཚོད་ལྟར་ན། བདེན་པ་དང་རྒྱལ་ཁ་གོ་མཚོན་གྱི་སོ་ཁ་ན་ཡོད་པར་རློམས་ཀྱང་། འགྲོ་བ་མིའི་རིགས་ཀྱི་ཤེས་རིག་རྫོགས་ལྡན་གྱི་དུས་འདིར་རྨི་ལམ་འདི་ལྟར་གཏོང་བ་ནི་ཆེས་གླེན་རྟགས་ཤིག་ལས་མ་འདས།
དཔེ་མཚོན་ནི། ཨི་རག་གི་དམག་འཁྲུག་ནང་དེང་རབས་ཀྱི་གོ་མཚོན་བཟང་བའི་ཨ་རིའི་དམག་མི་བཞི་སྟོང་ལྷག་གི་ཚེ་སྲོག་ཤོར་བ་རེད། ཨབ་གྷ་ནི་སི་ཏན་ནང་ཨ་རིའི་དམག་མི་བརྒྱ་ཕྲག་ཚེ་སྲོག་ཤོར་བ་རེད། ད་དུང་ཡང་ཕྱོགས་གཉིས་ཀའི་ནང་ཉིན་རེར་དམག་མིའི་ཚེ་སྲོག་ཤོར་གྱིན་ཡོད། ཨ་རིའི་མི་དམངས་མ་ཟད་ད་ལྟ་ཆབ་སྲིད་ཀྱི་མགོ་ཁྲིད་ཚོ་ཡང་སྐད་ངན་ཤོར་གྱི་ཡོད། འདི་ལོའི་ལོ་མཇུག་ནང་ཨི་རག་ནང་ཡོད་ཨ་རིའི་དམག་ཡོངས་སུ་རྫོགས་པ་ཕྱིར་འཐེན་བྱེད་འཆར་རེད། ཉིས་སྟོང་བཅུ་བཞི་ལོར་ཨབ་གྷ་ནི་སི་ཏན་ནང་གི་དམག་མི་ཕྱིར་འཐེན་བྱེད་པ་རེད། འོན་ཀྱང་ད་དུང་ཨ་རིར་ཕྱོགས་གཉིས་ཀའི་དམག་འཁྲུག་གི་རྒྱལ་ཁ་ལེགས་པར་ཐོབ་མེད་ལ་འཐོབ་ཀྱང་མི་སྲིད་པ་རེད། རྒྱ་ནག་གཞུང་གི་བོད་ནང་དཔལ་འབྱོར་གྱི་བསླུ་བྲིད་དང་དམ་དྲག་གི་སྲིད་ཇུས་འདིས་ཉིན་འཁྱོལ་ཡང་མཚན་སྐྱེལ་མི་ཐུབ། འགྲོ་བ་མི་ཙམ་ཟད་ཐ་ན་དུད་འགྲོ་ཡང་ལྕགས་དྲའི་ནང་དུ་འདུག་པ་ལས་རང་དབང་གི་ཁོར་ཡུག་འཚོལ་བར་བརྩོན་གྱི་ཡོད། དེས་ན་ཇི་ཙམ་དམ་དྲག་དང་བཙན་གནོན་ཆེ་རུང་དེ་ཙམ་གྱིས་ཁ་བྲལ་དང་འཐོར་ཞིག་ཏུ་འགྲོ་བ་འཇིག་རྟེན་ཆོས་ཉིད་ཡིན།
རྒྱ་ནག་གཞུང་གིས་བོད་ནང་གི་རང་དབང་འཐབ་རྩོད་ཀྱི་ལས་འགུལ་འདིའི་ངན་ཁག་༧གོང་ས་མཆོག་ལ་དཀྲི་བ་དང་ཆོས་ལུགས་དང་འགལ་ཚུལ་ཟེར་ཡང་། ཁོང་ཚོས་གང་བཤད་ལ་ང་ཚོ་དང་རྒྱལ་སྤྱི་མ་ཟད་རྒྱ་ནག་ནང་དུ་ཡང་ཡིད་ཆེས་བྱེད་མཁན་མེད། དཔེར་ན་བོད་ནང་དུ་རྒྱ་གཞུང་གི་ཆབ་སྲིད་དྲིལ་བསྒྲགས་ཡོ་ཆས་བརྙན་འཕྲིན་དང་རླུང་འཕྲིན་སོགས་གསར་འགྱུར་གྱི་གཏམ་དཔེར། རྒྱལ་ནང་བཀྲ་ཤིས་བདེ་ལེགས་དང་། རྒྱལ་སྤྱི་ཁ་ཆག་སྣ་རལ། ཞེས་ཡོངས་སུ་གྲགས་པ་ལྟར་རེད། འོན་ཀྱང་དོན་གནད་ཅན་གྱི་རིགས་ལ་ང་ཚོས་བདེན་པ་མཐའ་གསལ་གྱིས་ལན་འདེབས་བྱེད་དགོས་ངེས་རེད། དཔེར་ན་༧གོང་ས་མཆོག་ལ་ངན་ཁག་དཀྲི་བ་དང་ལོ་རྒྱུས་ལ་འཁྱོག་བཤད་བྱེད་པ་སོགས་རེད། དེ་མིན་ཆོས་ལུགས་དང་མཐུན་མིན་གླེང་བ་སོགས་གལ་འགངས་ཅི་ཡང་མེད་པ་དེ་ཚོར། ང་ཚོས་ཆེན་པོར་གླེང་ནས་འགལ་བརྟག་བྱེད་དགོས་དོན་ཅི་ཡང་མེད།
སྤྱིར་ན་ང་ཚོའི་ལས་འགུལ་འདི་ཆོས་ལུགས་ཀྱི་དགོངས་དོན་དང་འགལ་ཡང་རུང་ལ་མ་འགལ་ཡང་ཆོག དོན་དངོས་འགྲོ་བ་མི་ཞིག་གིས་གཞན་གྱིས་གདུག་རྩུབ་དང་བཙན་གནོན་འོག་འདུག་བཟོད་མ་ཐུབ་པར། འུ་ཐུག་ཐབས་ཟད་ཀྱིས་ལས་འགུལ་འདི་འདྲ་ཞིག་སྤེལ་བ་རེད། ཁ་ཕྱོགས་འདི་འཇིག་རྟེན་མི་ཆོས་དང་ཡོངས་སུ་མཐུན་པ་འདིས་ང་ཚོའི་ལ་རྒྱ་དང་སྙིང་སྟོབས། སྤོབས་པ་ཞིག་རེད། གཞན་དུ་ན། ང་ཚོས་སངས་རྒྱས་ཀྱི་མདོ་ལུང་འདྲ་མིན་ཁྱེར་ནས། བྱང་སེམས་རྟག་ངུ་དང་མི་ནག་མདུང་ཐུང་ཅན་སོགས་དགྲ་གཉེན་དང་ཕྱོགས་རིས་མེད་ཅིང་། ང་རྒྱལ་དང་ཞེ་སྡང་སོགས་ཀྱིས་དྲིས་ཀྱང་མ་གོས་པའི་ཁོང་ཅག་གི་མཛད་པར་མཐུན་ཐབས་འཚོལ་བ་ནི་ངལ་བའི་ལས་སུ་ཟད། གལ་ཏེ་ང་ཚོས་འཇིག་རྟེན་གྱི་སྲིད་ལུགས་དང་འཇིག་རྟེན་གྱི་བྱ་བཞག་ནང་ཆོས་ཀྱི་དགོངས་དོན་དང་ཡོངས་སུ་མཐུན་པར་སྨྲ་ན། ཁེ་དང་རྒྱལ་ཀ་གཞན་ལ་སྟེར།། གྱོང་དང་ཕུང་ཁ་རང་གིས་ལེན།། ཞེས་དང་། གཞན་ལ་འཚེ་བ་དགེ་སྦྱོར་མ་ཡིན་ནོ།། ཞེས་གཞན་ལ་འཚེ་ཚུལ་ཡང་ལུས་ངག་ཡིད་གསུམ་གྱི་རྣམ་འགྱུར་ཕྲ་མོ་ཚུན་ཆད་ནས་ཡོད་པས། གོང་གསལ་གྱི་ཚུལ་ཁྲིམས་དེ་དག་སྲུང་གིན་ང་ཚོས་རང་ཉིད་ཀྱི་ཁ་གཏད་ཀྱི་ཕྱོགས་ནས་རྒྱལ་ཁ་ཞིག་ལོན་ཐུབ་བམ།།
བོད་མི་རིགས་དང་རིག་གཞུང་གི་ཆེད་དུ། འདི་ལྟར། གཅིག་རྗེས་གཉིས་མཐུད་ཀྱི་རླབས་ཆེ་བའི་ལས་འགུལ་འདིའི་རིགས་ནི། ཆོས་སྲིད་གང་ལ་ཡང་འགལ་འདུ་ཡོད་པ་མ་རེད། རྒྱུ་མཚན་ནི། བོད་མི་རིགས་འདི་གསོན་དགོས་ན། མི་རིགས་འདིའི་སྲོག་ཤིང་དུ་གྱུར་པའི་རིག་གཞུང་རྣམས་ཁྱབ་སྤེལ་བྱ་སའི་ཁོར་ཡུག་ཅིག་དགོས་པ་ནི། མ་མཐའི་ཆ་རྐྱེན་ཞིག་རེད། དེ་འདྲ་ཡིན་དུས། ཁོང་རྣམ་པའི་ངོས་ནས་རང་ལུས་དྲོད་མོ་འདི་ཆེས་ཚ་བའི་དམར་བོ་མེ་ལ་བསྒྲོན་དགོས་དོན་ནི། བོད་མི་རིགས་ལ་ལྷན་སྐྱེས་ནས་ཡོད་པའི་རང་དབང་དང་ཐོབ་ཐང་གི་ཆེད་དང་། ད་རུང་མི་རིགས་འདིའི་བླ་སྲོག་ངོ་མ་རིག་གཞུང་རྣམས་གནས་པའི་ཆེད་དུ། འདི་ལྟར། རླབས་པོ་ཆེའི་ལས་འགུལ་སྤེལ་བ་ཞིག་རེད།
དེའི་ཕྱིར་ན། བཙན་བྱོལ་ནང་གི་རྩོམ་པ་པོ་རྣམས་རྒྱ་གཞུང་གི་བཤད་རྗེས་སུ་མ་སྙེགས་ན་བཟང་གི་མ་གཏོགས། རྒྱ་གཞུང་གིས་བསྙོན་འཛུགས་དང་ཁྱབ་བསྒྲགས་རྫུན་མའི་རིགས་ལ་གོམས་བྱང་ཆེན་པོ་ཡོད་པ་རེད། དཔེར་ན། རྒྱ་འདི་བ་ཚང་གིས་མི་ལོ་སྟོང་ཕྲག་མང་པོའི་རིང་ལ་སུན་ཙིའི་དམག་གི་བསྟན་བཅོས་ལྟ་བུའི་ཆབ་སྲིད་སྐྱོང་ཐབས་ཀྱི་ངན་བྱུས་ཆེས་པོའི་རིག་གནས་ཡོད་པ་རེད། དེ་འདྲ་ཡིན་དུས། བོད་མི་རིགས་འདི་ལ་ཆོས་ཀྱི་ངོས་འཛིན་ཞིག་དང་དེའི་བསྐྱེད་པའི་བསམ་སྤྱོར་དྲང་མོ་འདྲ་ཞིག་མ་གཏོགས་མེད་དུས། དཀའ་སེ་ཡིན་རྒྱུ་རེད།
ཉེ་སྔོན་ནས་བོད་མི་རིགས་འདི་ཡང་། ཆོས་སྲིད་ཐ་དད་དུ་ལམ་དུ་བསྐྱོད་ཚར་བ་མ་ཡིན་ནམ། ཡིན་ན་ཆབ་སྲིད་རིག་པའི་གཞུང་ལུགས་ཤིག་སྐྱེད་སྲིང་བྱ་དགོས་པ་མ་ཡིན་ནམ། མ་གཏོགས་ད་ནི། དུས་འགྱུར་ཚར་བ་ཡིན་དུས། ནང་ཆོས་དང་དེའི་ཐབས་བྱུས་གཅིག་པོས་བོད་མི་རིགས་འདི་སྐྱོབ་ཐུབ་རྒྱུ་ཁག་པོ་ཡིན་རྒྱུ་རེད། འདི་ནི། ཆབ་སྲིད་རྐྱང་བའི་ངོས་ནས་བཤད་ཀྱིན་པ་ལས་སྤྱིར་ན། བོད་མི་རིགས་ལ་བསམ་བློའི་གཞུང་ཤིང་མི་དགོས་ཤེས་བསྒྲགགས་པ་མིན་ནོ།།
སྐྱ་མདའ་ལགས། དགོངས་ཚུལ་ཡག་པོ་གསུངས་འདུག ཁྱེད་ལ་རྒྱབ་སྐྱོར་ཡོད། ཁ་ཅིག་གིས་ད་བར་རང་ལུས་མེར་བསྲེགས་པ་འཚེ་བ་ཡིན་མིན་དང་། ཁ་ཅིག་གིས་སངས་རྒྱས་ཀྱིས་བཀའ་ཡི་གནང་བ་ཐོབ་ཡོད་མེད་སོགས་བཤད་པ་དེ་དག་སྐབས་དང་མ་འབྲེལ་ཞིང་དགོས་པ་མེད་པ་རང་རེད། བོད་ནང་ནས་འ་ཆད་འུ་ཐུག་གིས་འདི་ལྟར་ངོ་རྒོལ་བྱེད་པ་ནི་འགྲོ་བ་མིའི་ཐོབ་ཐང་གི་གནད་དོན་དང་། རང་དབང་གི་གནད་དོན། ས་ཡ་དྲུག་གི་འཆི་གསོན་དང་སྐྱིད་སྡུག་དང་འབྲེལ་བའི་གནད་དོན་ཞིག་ཡིན་པར་འཛམ་གླིང་མི་མང་གིས་ཀྱང་ངོས་འཛིན་བྱེད་བཞིན་ཡོད་ན་ང་ཚོ་བོད་མི་ཞིག་གི་ངོས་ནས་ཨ་ཅང་ཅང་། ཕྱི་རྒྱལ་རང་དབང་ལུང་པར་ཡོད་པའི་བོད་མི་ཞིག་གི་ངོས་ནས་གདུང་སེམས་མཉམ་སྐྱེད་ཙམ་མིན་པར་དུས་ཐོག་ཏུ་གནས་ཚུལ་རྣམས་འཛམ་གླིང་མི་མང་གི་མིག་སྔར་བཤམ་ཐུབ་པ་བྱེད་རྒྱུ་དང་། ལས་འགུལ་སྔར་བས་ཤུགས་ཆེ་རུ་གཏོང་རྒྱུ གུང་ཁྲན་དང་ལྟ་སྤྱོད་མི་མཐུན་པ་དག་གི་སྟོབས་ཤུགས་གཅིག་ཏུ་སྒྲིལ་ཐབས་བྱེད་རྒྱུ་སོགས་ལ་ཤུགས་རྒྱག་རྒྱུ་ལས་བོད་ནང་གི་ངོ་རྒོལ་ཆོས་དང་མཐུན་མིན་སོགས་བཤད་རྒྱུ་བཞག་ན་ཡག
སྐྱ་མདའ་ལགས་ཀྱིས། གནས་ལུགས་རྒྱུ་མཚན་ཡག་པོ་བགྲང་འདུག་པས་ཐུགས་རྗེ་ཆེ།
དྲ་གྲོགས་སྐོར་ཞིག་གིས་འདིའི་རིགས་བགྲོ་གླེང་མ་གནང་ན་ལེགས་པར་བཤད་ཀྱང་། བགྲོ་གླེང་མི་བྱེད་ཐབས་མེད་དང་། སྐབས་ཐོག་གི་བྱུང་བ་འདིའི་རིགས་དུས་ཐོག་ལ་བགྲོ་གླེང་བྱ་ཐུབ་དགོས་པ་འདི་ཡང་ཕྱོགས་གང་ཐད་ནས་གལ་ཆེན་པོ་རེད་འདོད།
མི་རིགས་གང་དང་རྒྱལ་ཁབ་གང་ཡིན་རུང་། སོ་སོའི་སྤྱི་དོན་དེ་སྐབས་ཐོག་ལ་གླེང་གི་རེད། བརྒྱུད་ལམ་ཚང་མ་ནས་བགྲོ་གླེང་བྱ་གི་རེད། བྱ་བའི་ལེགས་ཉེས་གང་ཡིན་ཡང་བགྲོ་གླེང་གི་ལམ་ནས་ཡོ་བསྲང་དང་ཁ་ཕྱོགས་འཚོལ་བ་སོགས་བྱ་གི་རེད། དེ་བས་ང་ཚོའི་བགྲོ་གླེང་དེ་ད་རེབ་བརྗོད་གཞི་གཅིག་གཉིས་ཤིག་གི་ཕན་ལ་འདའ་གི་མེད་ཀྱང་། དེ་ཚོ་གླེང་རྒྱུ་ནི་གལ་ཆརན་པོ་དང་དུས་ཐོག་གི་ལས་འགན་རེད་སྙམ།
ཁོང་རྣམ་པའི་དགོང་ཞག་གི་དུས་ཚོད་དེ་ཚོ་ཡང་བང་རིམ་ཞིག་སྒྲིག་ཐུབ་ན་ཕན་ཐོགས་འདུག
སངས་རྒྱས་ཆོས་ལུགས་ནང་དུ་མི་མང་པོའི་ཆེད་དུ་མི་གཅིག་གི་ཚེ་སྲོག་དོར་ཆོག་པ་དང་། དོན་དག་གལ་ཆེན་པོ་ཞིག་གི་ཆེད་དུ་གལ་ཆུང་བའི་དོན་དག་ཅིག་བློས་བཏང་ཆོག་པའི་ལམ་སྲོལ་ཡོད་པར་མ་ཟད། གཞན་དོན་དུ་ཞུགས་པའི་བྱང་ཆུབ་སེམས་དཔའ་ཚོའི་ཁྲིམས་ལུགས་དེ་ངེས་པར་ལག་ལེན་བསྟར་དགོས་པར་བཤད། ཡིན་ན་ཡང་རང་གི་བསམ་བློའི་ཆོད་སེམས་ལ་བརྟགས་ཏེ། ཅི་སྟེ་རང་སྲོག་གཏོང་བར་ཕངས་སེམས་སམ་འགྱོད་པ་སྐྱེ་བའམ་འགྱོད་པ་སྐྱེ་བའི་ཉེན་ཁ་ཡོད་ན་སྲོག་དོར་མི་ཆོག་པའང་ཁྲིམས་ལུགས་རེད། དེའི་ཆ་ནས་བལྟས་ན་བོད་མི་ས་ཡ་དྲུག་གི་ཆེད་དུ་བོད་མི་རེ་ཟུང་གི་སྲོག་བློ་གཏོང་བ་འདི་སངས་རྒྱས་ཆོས་ལུགས་དང་ནམ་ཡང་འགལ་མེད་དེ། རྒྱལ་གཅེས་དཔའ་བོ་དེ་དག་ལ་ཕངས་སེམས་དང་འགྱོད་གདུང་གང་ཡང་མེད་པས་སོ།།
ཕྱི་ཕྱོགས་ཀྱི་བདེ་བ་ཅན་འདྲ་བའི་རང་དབང་ཡོད་སར་སྐད་ཆ་འདི་འདྲ་བཤད་ན་ལན་པོ་མི་འདུག འོན་ཀྱང་། རྒྱུ་མཚན་ལོས་ཡོད་བསམ་གྱིན་འདུག
ང་ཚོའི་རང་ལུས་མེར་སྲེག་མ་ཐུབ་རུང་བོད་སྤྱི་པའི་དོན་དུ་དྲང་པོ་དྲང་བཞག་དང་ཧུར་ཐག་བྱས་ན་བོད་མི་རིགས་ལང་ཐུབ་ངེས།
དམིགས་ཡུལ་རང་ཉིད་ཀྱི་རྒྱལ་ཁབ་དང་མི་རིགས་བཟུང་ནས། རྒོལ་ཡུལ་དགྲ་བོར་ཁ་གཏད་པའི་རྒྱལ་གཅེས་དཔའ་བོ་ཚོའི་ལས་འགུལ་འདི་པར། ནང་ཆོས་དང་མཐུན་མིན་སྨྲ་བ་ནི། ཆབ་སྲིད་པའི་གླེན་རྟགས་ཞིག་ལས་མ་འདས།
ད་ནི་ང་ཚོའི་རང་སྲོག་བློས་གཏོང་གནང་མཁན་གྱི་དཔའ་བོ་འདི་དག་གི་ལས་འགུལ་ཏེ་ཆོས་དང་མཐུན་མིན་དང་ས་མིང་ཁྱིམ་མིང་བྲིས་ན་ཡག་མིན།འཚེ་བ་མེད་པའི་ལྟ་སྤྱོད་ཡིན་མིན་སོགས་ཀྱི་རྩོད་གཞི་ཉི་ཚེ་བ་འདི་དག་ལས་བརྒལ་དགོས་པའི་དུས་རེད།་ཁོང་རྣམས་ཀྱི་རང་ལུས་མཆོད་མེར་སྒྲོན་ནས་གཏན་དུ་མི་མཐོང་བའི་ཞིང་ཁམས་གཞན་དུ་གཤེགས་ཟིན།ད་ནི་ཁོང་ཚོ་གཤེགས་པ་ནི་འུ་ཚོའི་ཐུན་མོང་གི་དཀའ་སྡུག་ཡིན་པ་བོད་མི་མི་རེ་ངོ་རེ་ནས་ཤེས་པ་བྱས་ཏེ་རྒྱ་དམར་གྱི་དཔོན་དམག་ཚོའི་སེམས་པ་འགུལ་བའི་ལས་དོན་བསྒྲུབ་དགོས་པར་འདོད།
རྩོམ་ཡིག་འདིར་རྒྱབ་སྐྱོར་ཡོད།
འགའ་ཞིག་ལ་འདྲི་རྒྱུར།
རང་ལུས་མེར་བསྲེགས་གཏོང་བའི་དཔའ་བོ་འདི་དག་དམིགས་ཡུལ་ལམ་རེ་སྨོན་དེ།
༡༽རྒྱ་ནག་དམར་གཞུང་གི་བཙན་དབང་ལ་ངོ་རྒོལ་གྱིས་བོད་དོན་འཐབ་རྩོད་ཀྱི་བདེན་མཐའ་གསལ་ཕྱིར་ཡིན་པར་ངོས་འཛིན་ནམ།
༢༽སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་འཐོབ་པའི་དམ་པའི་ཆོས་ཀྱི་ཕྱིར་ངོས་འཛིན།
༣༽ཡང་ན་དེ་གཉིས་ཀ་ཡིན་པར་འདོད་དམ།
གལ་ཏེ་དང་པོ་རང་ལ་ངོས་འཛིན་མ་གནང་ན་ཁོང་ཅག་གི་སྐད་འབོད་དམ་ཞལ་ཆེམས་དག་ལས་རིང་དུ་འདས་པས་པ་མ་ཡིན་ནམ།
“སྙིང་རྗེའི་བསམ་པ་མ་དག་པར། །ལུས་ནི་གཏང་བར་མི་བྱ་སྟེ། །ཅི་ནས་འདི་དང་གཞན་དག་ཏུ། །དོན་ཆེན་བསྒྲུབ་པའི་རྒྱུར་གཏང་ངོ༌། །”
“དམ་པའི་ཆོས་ནི་སྤྱོད་པའི་ལུས། །ཕྲན་ཚོགས་ཆེད་དུ་གནོད་མི་བྱ། །དེ་ལྟར་བྱས་ན་སེམས་ཅན་གྱི ། བསམ་པ་མྱུར་དུ་རྫོགས་པར་འགྱུར། །”
ལྟ་བུ་སོགས་ལུས་སྲོག་གཏོང་མི་འོས་པའི་ལུང་ཡང་མང་ལ་གཏོང་འོས་པའི་ལུང་ཡང་མངས།
སྤྱིར་ན་གཞན་ལ་གནོད་པ་གང་དང་གང་ཡིན་འཚེ་བའི་ལས་ཡིན་པ་ཡོངས་གྲགས་ཡིན་པས་ཡོངས་སུ་གྲགས་པའི་ས་མཚམས་དེ་ལས་གཞན་ཞིག་གླེང་རྒྱུ་སྐབས་དོན་དགོས་མཁོ་གཏན་ནས་མིན།
དགེ་བཤེས་ཉི་ཟླ་ལྟ་བུ་བཞུགས་པའི་མདུན། །དགེ་སྡུག་བླང་དོར་རྨོངས་པ་བདག་ཅག་གིས། །ཆེ་བའི་ཆོས་གཏམ་བཤད་པ་འོས་མིན་པས། །སྐབས་དོན་སྲིད་ཀྱི་ལས་ལ་འཇུག་པར་རིགས། །ཞེས་ཀྱང་སྨྲའོ།
གང་ལྟར་བོད་ནང་དུ་རང་ལུས་མཆོད་མེ་སྒྲོན་མཁན་ཚང་མའི་བོད་མི་རིགས་ཀྱི་དཀའ་སྡུག་མ་བཟོད་པར་རང་ལུས་མེ་ལ་སྒྲོན་ནས་བདེན་དཔང་བྱས་པ་ཞིག་རེད། འདི་ནི་ཆོས་སྲིད་གཉིས་ཀྱི་གང་གི་ཐོག་ནས་སྒྲུབ་དགོས་ན་བསྒྲུབ་ཐུབ་ཀྱི་ཡོད་པ་ཞིག་ཡིན། སྨྲ་ཤེས་པའམ་དོན་གོ་བའི་མི་ཞིག་གིས་གཅིག་རྗེས་གཉིས་མཐུད་བྱས་ནས་མི་རིགས་དང་ཆོས་ལུགས་ཪིགས་གཞུང་བཅས་ཀྱི་ཆེད་རང་ལུས་མེ་ལ་སྒྲོན་ནས་བདེན་དཔང་བྱས་པ་ཞིག་ཡིན་དུས་ཆོས་སྲིད་གང་གི་ཐོག་ནས་བལྟས་ན་འགལ་ཟླ་ཡོད་ངེས་མ་རེད། མ་ཟད་ཆོས་ལུགས་དང་རང་དབང་འགྲོ་བ་མིའི་ཐོབ་ཐང་གང་ཡང་མེད་པར་དམ་དྲག་དང་བཙན་གནོན་ཁོ་ནས་དབང་གི་མི་ཚེ་སྐྱེལ་མ་ཐུབ་པ་ཡིན་དུས་འདི་ལས་ལྷག་པའི་ལས་འགུལ་ཞིག་སྤེལ་བའི་གོ་སྐབས་མེད་པ་རེད། དེ་འདྲ་ཡིན་པ་ཚང་མའི་ཧ་གོ་བས་ཐོག་ནས་རྒྱབ་སྐྱོར་གནང་རྒྱུ་གལ་ཆེན་རེད།
གང་ལྟར་བོད་ནང་དུ་རང་ལུས་མཆོད་མེ་སྒྲོན་མཁན་ཚང་མའི་བོད་མི་རིགས་ཀྱི་དཀའ་སྡུག་མ་བཟོད་པར་རང་ལུས་མེ་ལ་སྒྲོན་ནས་བདེན་དཔང་བྱས་པ་ཞིག་རེད། འདི་ནི་ཆོས་སྲིད་གཉིས་ཀྱི་གང་གི་ཐོག་ནས་སྒྲུབ་དགོས་ན་སྒྲུབ་ཐུབ་ཀྱི་ཡོད་པ་ཞིག་ཡིན། སྨྲ་ཤེས་པ་དོན་གོ་བའི་མི་ཞིག་གིས་གཅིག་རྗེས་གཉིས་མཐུད་བྱས་ནས་མི་རིགས་ཆོས་ལུགས་ཪིགས་གཞུང་བཅས་ཀྱི་ཆེད་རང་ལུས་མེ་ལ་སྲག་ནས་བདེན་དཔང་བྱས་པ་ཞིག་ཡིན་དུས་ཆོས་སྲིད་གང་གི་ཐོག་ནས་ལྟས་ན་འགལ་ཟླ་ཡོད་ངེས་མ་རེད།
རང་ལུས་མེར་བསྲེགས་ཀྱི་ལས་འགུལ་འདི་ཆོས་ལུགས་དང་མི་མཐུན་ཡང་སྲིད་ལུགས་དང་མཐུན་པ་ཞིག་རེད།
གནས་ཚུལ་འདི་སྲིད་ལུགས་དང་མཐུན་ན་ཆོས་ལུགས་དང་མཐུན་མ་མཐུན་གང་ཡང་མེད།
ཆོས་ལུགས་ལ་མཐུན་པ་སྒྲུབ་མཁན་དག་ནི་དོན་མེད་ལྐུག་པ་ཨུ་ཚུགས་དང་དུས་ཚོད་འཕྲོ་བརླགས་རང་རེད།
དྲ་གྲོགས་འདིའི་སྐད་ཆ་ལ་གནས་ལུགས་འདུག ང་ཚོའི་ལས་འགུལ་འདི་ཆོས་ལུགས་ཀྱི་དགོངས་དོན་དང་འགལ་ཡང་རུང་ལ་མ་འགལ་ཡང་ཆོག དོན་དངོས་འགྲོ་བ་མི་ཞིག་གིས་གཞན་གྱིས་གདུག་རྩུབ་དང་བཙན་གནོན་འོག་འདུག་བཟོད་མ་ཐུབ་པར། འུ་ཐུག་ཐབས་ཟད་ཀྱིས་ལས་འགུལ་འདི་འདྲ་ཞིག་སྤེལ་བ་རེད། ཁ་ཕྱོགས་འདི་འཇིག་རྟེན་མི་ཆོས་དང་ཡོངས་སུ་མཐུན་པ་འདིས་ང་ཚོའི་ལ་རྒྱ་དང་སྙིང་སྟོབས། སྤོབས་པ་ཞིག་རེད། གཞན་དུ་ན། ང་ཚོས་སངས་རྒྱས་ཀྱི་མདོ་ལུང་འདྲ་མིན་ཁྱེར་ནས། བྱང་སེམས་རྟག་ངུ་དང་མི་ནག་མདུང་ཐུང་ཅན་སོགས་ཁོང་ཅག་གི་མཛད་པར་མཐུན་ཐབས་འཚོལ་བ་ནི་ངལ་བའི་ལས་སུ་ཟད།