ཉེ་སྔོན་བོད་ཀྱི་བུད་མེད་ལྷན་ཚོགས་ཀྱིས་བསྟན་འཛིན་སྒང་དུ་མི་སྣ་ཆེད་གཏོང་བྱས་ཏེ། ཉིན་གཉིས་རིང་བུད་མེད་རིག་འཛིན་དང་འབྲེལ་བའི་དོན་རྐྱེན་ཐད་འབྲེལ་ཡོད་མི་སྣ་ཁག་དང་གོ་བསྡུར་གྱིས། བུད་མེད་རིག་འཛིན་དང་བསྟན་པ་གཉིས་མཉམ་དུ་འདུག་རྒྱུའི་ཐག་གཅོད་བྱུང་འདུག
ཉེ་སྔོན་བསྟན་འཛིན་སྒང་བོད་མིའི་གཞིས་ཆགས་ནང་བུད་མེད་དམར་ཧྲང་དུ་ཁྲོམ་སྐོར་བྱས་པའི་དོན་རྐྱེན་དེ་བྱུང་རྗེས། བོད་ཀྱི་བུད་མེད་ལྷན་ཚོགས་ཀྱིས་གནད་དོན་དེ་དྲང་བདེན་ཐག་གཅོད་བྱུང་ཡོད་མེད་དང་། མ་འོངས་པར་ཞི་འགྲིག་དང་ལམ་ཁ་ཡག་པོ་ཞིག་ཏུ་བསྐྱོད་ཕྱིར་ཚོགས་གཞོན་བསམ་གཏན་ཆོས་སྒྲོན་ལགས་དང་ལས་བྱེད་གཞན་གཅིག་བཅས་བསྟན་འཛིན་སྒང་ལ་ཆེད་གཏོང་གནང་སྟེ། ས་གནས་བདེ་དོན་གི་བཀའ་འཁྲོལ་འོག་ཕྱི་ཟླ་ ༩ ཚེས་ ༣ ནས་ ༥ བར་གྱི་ཉིན་གཉིས་རིང་དོན་རྐྱེན་དེའི་འབྱུང་རྩར་གྱུར་པའི་བུ་མོ་རིག་འཛིན་དང་པ་སངས། བསྟན་པ་གསུམ་གཙོས་པའི་འབྲེལ་ཡོད་ཚང་མར་སྐད་ཆ་དྲིས་ཏེ་གནས་ཚུལ་ལ་རྟོག་ཞིབ་གནང་ཡོད་པ་དང་། སངས་དང་བསྟན་པ་གཉིས་ཀྱིས་སོ་སོའི་བྱིས་པ་ཚོར་བསམ་བློ་བཏང་སྟེ། བཟའ་ཚང་བསྐྱར་འགྲིག་ཡོང་རྒྱུར་ཐེངས་འབད་བརྩོན་བྱས་ཀྱང་གྲུབ་འབྲས་སོན་མི་འདུག
པ་སངས་དང་བསྟན་པ་གཉིས་ཀྱིས་དེ་སྔོན་ནས་བཟའ་ཚང་ཁ་ཁ་བྱ་རྒྱུར་བློ་ཐག་གཙང་བཅད་བྱས་ཡོད་པ་མ་ཟད། བྱིས་པ་གཉིས་ནས་ཀྱང་ཕ་མ་གཉིས་ཀྱིས་དུས་རྒྱུན་འཁོན་འཛིང་བྱས་ཏེ་མི་ཚེ་བསྐྱལ་རྒྱུ་ལས་ཁ་ཁ་བྱས་ན་ལེགས་པའི་བསམ་ཚུལ་བཏོན་ཡོད་སྟབས། བསྟན་པས་ཟླ་རེར་བྱིས་པ་གཉིས་ལ་སློབ་ཡོན་ཧིན་སྒོར་ ༥༠༠༠ རེ་དང་། པ་སངས་ལ་སྡོད་ཁང་གསར་རྒྱག་དང་ཟླ་རེར་འཚོ་སྣོན་ཧིན་སྒོར་ ༥༠༠༠ རེ་བཅས་སྤྲོད་རྒྱུའི་གན་རྒྱ་བཞག་ཡོད་འདུག
བུད་མེད་ལྷན་ཚོགས་ཀྱི་སྐུ་ཚབ་གཉིས་ངོས་ནས་པ་སངས་དང་བསྟན་པ་གཉིས་མཉམ་དུ་མི་ཚེ་བསྐྱལ་རྒྱུར་རེ་བ་མེད་པ་མཐོང་རྗེས། བུ་མོ་པ་སངས་དང་བུ་མོ་རིག་འཛིན་གཉིས་ཀའི་ཚེ་འཕྲོ་བརླག་ཏུ་འགྲོ་བ་ལས། རིག་འཛིན་དང་བསྟན་པ་གཉིས་ལྷན་དུ་སྡོད་ཐབས་སུ་རེ་རེ་སྐུལ་ཞུས་པར། དེ་ལ་བསྟན་པ་དང་རིག་འཛིན་གཉིས་ཀྱང་མོས་མཐུན་བྱུང་ཞིང་། པ་སངས་ཀྱི་གཅུང་པོ་ཆོས་གྲུབ་ཀྱིས་ཀྱང་ཁོང་ཅག་གི་ཕྱོགས་ནས་དགག་བྱ་མེད་པའི་ཁས་ལེན་བྱས་ཏེ། མཐར་རིག་འཛིན་དང་བསྟན་པ་གཉིས་མཉམ་དུ་སྡོད་རྒྱུའི་ཐག་གཅོད་བྱས་ཤིང་། བུད་མེད་ལྷན་ཚོགས་ཀྱི་ངོས་ནས་རིག་འཛིན་ལ་ཉེས་རྡུང་སྐབས་རྨས་སྐྱོན་ཕོག་པར་སྨན་བཅོས་ཆེད་ཧིན་སྒོར་ ༣༠༠༠༠ སྤྲད་ཡོད་འདུག
ཕྱི་ཟླ་ ༡༠ ཚེས་ ༡༢ ཉིན་གསར་འགོད་པ་དབུས་བུད་མེད་ལྷན་ཚོགས་ཀྱི་ལས་ཁུངས་སུ་བཅར་ཏེ། བུད་མེད་ལྷན་ཚོགས་ཀྱི་བསྟན་འཛིན་སྒང་གི་རྙོག་གླེང་དེ་ཐག་གཅོད་གནང་ཕྱོགས་སྐོར་ལ་བཅར་འདྲི་ཞུས་པར། ཚོགས་གཞོན་བསམ་གཏན་ཆོས་སྒྲོན་ལགས་ཀྱིས་ངོ་སྤྲོད་གནང་པར། དང་ཐོག་བུ་མོ་རིག་འཛིན་གྱི་ཁྱིམ་དུ་བཅར་ཏེ་དོན་རྐྱེན་གྱི་བྱུང་རིམ་དང་མ་འོངས་མི་ཚེ་སྐྱེལ་སྟངས་ལ་འཆར་གཞི་གང་ཡོད་དྲིས་པ་ཡིན། དོན་རྐྱེན་འདིའི་ཁྲོད་ཁོ་མོའི་ལུས་སེམས་གཉིས་ལ་ཕོག་ཐུག་ཆེན་པོ་བཟོས་ཡོད་སྟབས་གཉའ་ཞུམ་སྟེ་སྐད་ཆའང་བཤད་ཐུབ་ཀྱི་མི་འདུག ང་ཚོས་ངོས་ནས་གང་ཐུབ་ཀྱིས་ཁོ་མོར་སེམས་གསོ་བྱས་མཐར་ཕན་ཚུན་གླེང་མོལ་བྱ་ཐུབ་པ་བྱུང་སྟེ། བུ་མོ་རིག་འཛིན་མོ་རང་གིས་སོ་སོར་ནོར་འཁྲུལ་ཡོད་པ་ངོས་ལེན་གནང་གི་འདུག འོན་ཀྱང་དམར་ཧྲང་ལ་ཁྲོམ་དུ་ཁྲིད་པ་དེས་སེམས་ཧ་ཅང་ཕམ་པོ་བྱུང་སྟེ། སྤྱི་ཚོགས་ཁྲོད་མགོ་བོ་བཏེགས་ཏེ་མི་ཚེ་བསྐྱལ་རྒྱུའི་བློ་སྟོབས་མེད་པ་ཆགས་ཡོད་ཀྱང་། ཁོ་མོའི་མ་ཡར་གྱིས་ཕར་ཕྱོགས་ནས་མིང་སྲིང་སྤུན་མཆེད་མདུན་ནས་བུད་མེད་ཅིག་དམར་ཧྲང་ལ་འཁྲིད་རྒྱུར་ངོ་ཚ་མེད་ན། ཁྱོད་རང་ངོ་གནོང་དགོས་དོན་ཡོད་པ་མ་རེད་ཅེས་སེམས་གསོ་གནང་སྟེ་མོ་རང་གིས་གདོང་པ་ཕྱི་ལ་སྟོན་རྒྱུའི་སྤོབས་པ་ཕྲན་བུ་བསླེབས་འདུག མ་འོངས་པའི་མི་ཚེ་སྐྱེལ་སྟངས་ཐད། མོ་དང་མཉམ་དུ་མི་ཚེ་སྐྱེལ་མཁན་ཞིག་རག་གི་མ་རེད་ལ། གལ་སྲིད་རག་ཀྱང་རྗེས་མ་རང་ཉིད་དང་བྱིས་པ་གཉིས་ལ་མཐོང་ཆུང་བྱས་ཏེ་མི་ཚེ་མཐར་འཁྱོལ་གྱི་མ་རེད་དྲན་ཏེ་མོ་ཧྲང་དུ་འདུག་རྒྱུ་ཡིན་ཟེར། ཞེས་བརྗོད་བྱུང་།
བསམ་གཏན་ཆོས་སྒྲོན་ལགས་ཀྱིས་མུ་མཐུད་དུ་བརྗོད་ན། བུ་མོ་རིག་འཛིན་གྱིས་གནས་ཚུལ་འདི་ས་གནས་བདེ་དོན་དང་བུད་མེད་བཅས་ལ་སྙན་སེང་མ་ཞུས་པ་གང་ཡིན་དང་། ཁྲིམས་ལ་གཏུགས་རྒྱུར་དཀའ་ངལ་ཡོད་ན་བུད་མེད་ལྷན་ཚོགས་ཀྱིས་རོགས་རམ་གནང་ཆོག་སྐོར་བརྗོད་སྐབས། ཁོ་མོས་ས་གནས་བདེ་དོན་དང་བུད་མེད་ལ་གནས་ཚུལ་དེ་སྙན་སེང་ཞུ་དགོས་པ་ཤེས་མི་འདུག་ལ། གནད་དོན་དེ་ཁྲིམས་ཐོག་ལ་བསྐྱལ་རྒྱུར་འདོད་པ་མི་འདུག དེ་བཞིན། ཁོ་མོ་ཕྱི་རྒྱལ་དུ་འགྲོ་འདོད་ཡོད་ཀྱང་བུད་མེད་ལྷན་ཚོགས་ཀྱིས་ཐབས་ཤེས་གནང་ཆོག་སྐོར་བརྗོད་ཀྱང་། ཁོ་མོས་རང་གི་མ་ཡར་གཅིག་པུ་ཤུལ་ཏུ་བཞག་ནས་ཕྱི་རྒྱལ་དུ་འགྲོ་རྒྱུར་མོས་མཐུན་གནང་གི་མི་འདུག་ཟེར།
གཞན་ཡང་། ཚོགས་གཞོན་བསམ་གཏན་ཆོས་སྒྲོན་ལགས་ཀྱིས་པ་སངས་མཉམ་དུ་གླེང་མོལ་བྱུང་བའི་སྐོར་བརྗོད་དོན། པ་སངས་ཀྱིས་དོན་རྐྱེན་དེའི་ཐད་སོ་སོའི་ངོས་ནས་ཐལ་ཆ་ཤོར་ཏེ་ནོར་འཁྲུལ་ཆེན་པོ་བཟོས་པར་གནོང་འགྱོད་དང་། ལོ་ལྔའི་སྔོན་ནས་བཟུང་བསྟན་པ་དང་བཟའ་ཚང་ནང་ཁུལ་མ་འཆམ་པར་དུས་རྒྱུན་རྩོད་རྙོག་བྱུང་སྟེ། ཨི་ཌ་ན་གྷར་དུ་གཅུང་པོ་ཆོས་གྲུབ་ཀྱི་སྐྱེས་དམན་དང་མཉམ་དུ་ཟ་ཁང་གི་ལས་ཀ་བྱས་པ་དང་། ཉིན་ཞིག་བསྟན་པའི་ལག་ཁྱེར་ཁ་པར་ལས་བསྟན་པ་དང་རིག་འཛིན་གཉིས་གབ་མཐུན་བྱས་པའི་པར་འགའ་མཐོང་བས། སེམས་པ་ཧ་ཅང་སྐྱོ་ནས་ཐེངས་གཉིས་ལ་རང་ཤི་རྒྱག་རྩིས་བྱས་ཀྱང་། ཆོས་གྲུབ་ཀྱི་སྐྱེས་དམན་གྱིས་མཐོང་སྟེ་རང་ཤི་རྒྱག་མ་བཅུག་པ་དང་། མཐར་ཁོང་ཁྲོའི་ཐོག་ནས་དོན་རྐྱེན་དེ་བསླངས་དང་། འདས་པའི་ལོ་ལྔའི་ནང་བསྟན་པར་བཟོད་སྒོམ་བྱས་ཀྱང་ཕན་འབྲས་མ་བྱུང་པས། ད་ལྟ་བསྟན་པ་དང་མཉམ་དུ་འདུག་འདུན་རྩ་བ་ནས་མེད་ཟེར། དེའི་རྗེས་ཡང་བསྐྱར་ཁོ་མོར་ཁ་ཏ་སློབ་གསོ་བཏང་སྟེ། བྱིས་པ་གཉིས་ལ་བསམ་བློ་བཏང་སྟེ་བཟའ་ཚང་བསྐྱར་དུ་འགྲིག་ཐབས་ཡོང་རྒྱུར་རེ་སྐུལ་ཞུས་ཀྱང་། ཁོ་མོས་བྱིས་པ་གཉིས་ཀྱིས་ཀྱང་ངེད་གཉིས་རྒྱུན་པར་མ་འཆམ་པར་འདུག་པ་ལས་ཁ་ཁར་བསྡད་ན་ལེགས་ཚུལ་བརྗོད་པར་མ་ཟད། བསྟན་པ་དང་ཁོ་མོའི་བར་གཉེན་འཐོར་བྱ་རྒྱུའི་ཐད་གན་རྒྱའི་ཡི་གེ་བཞག་ཏེ་སེམས་ཐག་གཙང་བཅད་ཡིན་ཚུལ་ཡང་བརྗོད་བྱུང་ཟེར།
དེའི་རྗེས་བསྟན་པ་དང་མཉམ་དུ་གླེང་མོལ་བྱས་ཡོད་པ་དང་། སྐབས་དེར་བསྟན་པས་ཁོ་དང་པ་སངས་གཉིས་བཟའ་ཚང་འཆམ་པོ་མ་བྱུང་བའི་ཐོག་མའི་རྒྱུ་རྐྱེན་ནི་རིག་འཛིན་མ་ཡིན་པར། ནམ་རྒྱུན་གྱི་སོ་སོ་བཟའ་ཚང་ཕན་ཚུན་བྱ་སྤྱོད་འཁྱེར་སྟངས་དང་བསམ་ཚུལ་མཐུན་པོ་མ་བྱུང་བའི་རྐྱེན་ཡིན་པ་དང་། པ་སངས་དང་ཁོ་གཉིས་མ་འཆམ་པར་དུས་རྒྱུན་འཁོན་འཛིང་བྱུང་པར་བརྟེན། བྱིས་པ་གཉིས་ཀྱང་མ་སྐྱིད་པ་བཟོས་ཏེ་ངེད་གཉིས་ཁ་ཁར་བསྡད་ན་ལེགས་པའི་བསམ་ཚུལ་བརྗོད་ཀྱི་འདུག ད་ནི་ཕན་ཚུན་ཁ་ཁར་འགྲོ་རྒྱུ་སེམས་ཐག་བཅད་ཡོད་སྐོར་བརྗོད་བྱུང་ཟེར།
པ་སངས་དང་བསྟན་པ་གཉིས་འགྲིག་མཐུན་ཡོང་རྒྱུར་རེ་བ་མེད་སྟབས། བུད་མེད་ལྷན་ཚོགས་ཀྱིས་བསྐྱར་དུ་བསམ་བློ་བཏང་སྟེ། བསྟན་པ་དང་རིག་འཛིན་གཉིས་མི་ཚེ་མཉམ་དུ་བསྐྱལ་རྒྱུ་བྱུང་ན། མ་འོངས་པར་རིག་འཛིན་གྱི་འཚོ་བར་དཀའ་ངལ་མི་འཕྲད་པའི་ཕན་ཐོགས་ཡོད་པར་གཟིགས་ཏེ། དོ་བདག་ཕྱོགས་གཉིས་ལ་ཁ་ཏ་སློབ་གསོ་ཡང་ཡང་གནང་མཐར། བསྟན་པས་བུ་མོ་རིག་འཛིན་གནས་སྟངས་འདིར་ལྷུང་བ་ཚང་མ་ཁོ་དང་འབྲེལ་བ་ཆགས་ཡོད་སྟབས། རིག་འཛིན་ཁོ་དང་མཉམ་དུ་འདུག་འདུན་ཡོད་ན་ཁོ་རང་ཐད་པ་ཡིན་ཚུལ་བརྗོད་པ་དང་། རིག་འཛིན་གྱིས་ཀྱང་རང་གིས་བྱིས་པའི་ཕ་བསྟན་པ་ཡིན་པས་གཞན་གྱིས་དགག་བྱ་དང་། བསྟན་པར་འདོད་མོས་ཡོད་ན་མོ་རང་ཡང་དེ་ལ་ཐད་པ་ཡིན་པའི་རྣམ་འགྱུར་བསྟན་ཡོད་སྟབས། ཚོགས་གཞོན་བསམ་གཏན་ཆོས་སྒྲོན་ལགས་པ་སངས་ཀྱི་གཅུང་པོ་ཆོས་གྲུབ་ཀྱི་སར་བསྐྱོད་དེ་གནས་ཚུལ་དེའི་སྐོར་གསལ་བཤད་བྱས་པར། ཆོས་གྲུབ་ཀྱིས་ཀྱང་རིག་འཛིན་དང་བསྟན་པ་གཉིས་མཉམ་དུ་སྡོད་རྒྱུར་དགག་བྱ་མེད་པ་ངོས་ལེན་བྱུང་སྟེ། བསྟན་པ་དང་རིག་འཛིན་གཉིས་མཉམ་དུ་སྡོད་རྒྱུ་ཐག་གཅོད་བྱུང་པའི་གནས་ཚུལ་དེ་ས་གནས་བདེ་དོན་དྲུང་ཆེ་ལའང་སྙན་གསེང་ཞུས་ཐོག བསྟན་འཛིན་སྒང་དུ་བྱུང་བའི་དོན་རྐྱེན་དེ་ཕན་ཚུན་ནང་འགྲིག་གི་ཐོག་ནས་གཙང་སེལ་བྱུང་ཡོད་པ་རེད།
མཇུག་མཐར་ཚོགས་གཞོན་བསམ་གཏན་ཆོས་སྒྲོན་ལགས་སུ་བུ་མོ་རིག་འཛིན་དང་འབྲེལ་བའི་བསྟན་འཛིན་སྒང་གི་དོན་རྐྱེན་དེ་ཐག་གཅོད་བྱས་པའི་བརྒྱུད་རིམ་ཁྲོད་སེམས་ཚོར་ག་རེ་བྱུང་མིན་དྲིས་པར། ཁོ་མོས་སྤྱིར་བསྟན་འཛིན་སྒང་གི་གནས་ཚུལ་དེ་ཧ་ཅང་ཐབས་སྡུག་གི་གནས་ཚུལ་ཞིག་རེད། གནད་དོན་དེའི་འབྱུང་རྐྱེན་གྱི་ཆ་ནས་བསྟན་པ་དང་པ་སངས། རིག་འཛིན་ཚང་མར་ནོར་འཁྲུལ་འདུག ཡིན་ནའང་། པ་སངས་ཀྱིས་དོན་རྐྱེན་ཆེན་པོ་ཞིག་བསླངས་པར་བརྟེན་ཉེས་པ་ལྕི་ཤོས་དེ་པ་སངས་ལ་ཡོད་པ་རེད། གང་ལྟར་ཐེངས་འདིར་བསྟན་འཛིན་སྒང་ལ་སོང་སྟེ་གནད་དོན་ཐག་གཅོད་གང་འཚམ་ཡག་པོ་བྱུང་སོང་། ཞེས་བརྗོད་བྱུང་། བུད་མེད་ལྷན་ཚོགས་ཀྱི་ཐག་གཅོད་དེའི་ཐད་ནང་སྲིད་དྲུང་ཆེ་དངོས་གྲུབ་རྡོ་རྗེ་ལགས་སུ་བཀའ་འདྲི་གནང་བར། གཞུང་ངོས་ཀྱི་ཐག་གཅོད་བཅད་ཁྲ་རྣམས་སྔོན་ནས་བཀྲམས་ཟིན་པ་ལྟར། བུད་མེད་ལྷན་ཚོགས་ཀྱི་ཐག་གཅོད་དེའི་ཐད་ང་ཚོས་ངོས་ནས་བསམ་ཚུལ་གང་ཡང་བཤད་རྒྱུ་མེད་ཟེར།
གསར་འགོད་པ། ཚེ་རིང་རྒྱལ།
༼ བོད་ཀྱི་དུས་བབ་ཚགས་ཤོག་ལས་འདིར་བསྐྱར་འགོད་བྱས། ༽
བུད་མེད་ཚོགས་པས་དཀའ་ལས་བརྒྱབ་འདུག་ཀྱང་། ཐག་གཅོད་གང་ཡང་བྱུང་མི་འདུག རྒྱུ་མཚན། བསྟན་པས་ཟླ་རེར་བྱིས་པ་གཉིས་ལ་སློབ་ཡོན་ཧིན་སྒོར་ ༥༠༠༠ རེ་དང་། པ་སངས་ལ་སྡོད་ཁང་གསར་རྒྱག་དང་ཟླ་རེར་འཚོ་སྣོན་ཧིན་སྒོར་ ༥༠༠༠ རེ་བཅས་སྤྲོད་རྒྱུའི་གན་རྒྱ་བཞག་ཡོད་པ་དེར། དུས་བཅད་མེད་པ་ཡིན་ན་སླར་ཡང་དོན་དག་སློང་རྐྱེན་ཀྱི་རྩ་བ་རེད། རྗེས་མ་སླར་ཡང་བུད་མེད་ཚོགས་པ་ཕེབས་མ་དགོས་ཀྱང་བདེ་དོན་ལ་དཀའ་ལས་ཅུང་ཡོད་རྒྱུ་རེད།
གསར་འགོད་པ་ཚེ་རིང་རྒྱལ་གྱིས་བུ་མོ་རིག་འཛིན་གྱི་ལས་དབང་ལ་ཐུགས་ཁུར་དང་ནུས་པ་རླབས་ཆེན་བཏོན་ཡོད་པས་ཐུགས་རྗེ་ཆེ་ཞེས་ཀྱང་ཞུ་འདོད་བྱུང་། དེ་མ་གཏོགས་གནས་ཚུལ་འདི་ས་འོག་ནས་ཡལ་བར་ཉེན་ཁ་ཡོད།
རིག་འཛིན་གྱི་ཡོད་ཚད་ཕྱིར་བསྟན་པ་དེ་རྐྱེན་ངན་གྲོགས་ཤར་ཆགས་འདུག ད་བསྟན་པ་དང་ཁྱེད་གཉིས་ཀྱིས་ལྐོག་ལྐོག་སུད་སུད་བྱེད་མི་དགོས་པར་ཕོ་མོའི་ཆགས་སྲེད་ཀྱི་བདེ་བ་ལ་དབྱིན་ངི་ལྟར་ས་བསྟན་འཛིན་སྒང་གྲོང་མི་ཡོངས་འདུག་མི་བཟོད་པའི་རྣམ་པའི་ཐོག་ཤུགས་རྒྱོབ་ཅིག
ངས་་ཚོད་དཔག་བྱས་པའི་་སྒྲུང་གཏམ་གྱི་མཐའ་འབྲས་མངོན་འགྱུར་བྱུང་འདུག དེ་བས་བཀྲ་ཤིས་བདེ་ལེགས་ཞུའོ།
ཕུ་ནུ་ནང་ཁུལ་དུ་འདུམ་འགྲིག་བྱུང་བ་དེ་ཧ་ཅང་དགའ་འོས་པའི་གནད་དོན་ཞིག་རེད་ལ། ད་རེས་བུད་མེད་ལྷན་ཚོགས་ནས་ཕྱག་ལས་ལེགས་པོ་གནང་བར་ཐུགས་རྗེ་ཆེ།
ཧ་ཅང་དགའ་འོས་པའི་སྤྱི་ཚོགས་ཀྱི་ཞབས་ཞུ་་འདི་འདྲ་ལ་གནང་ཡོང་དུས་སེམས་གཏིང་ནས་རྒྱབ་སྐྱོར་ལོས་ཡོད།
སྤྱི་ཚོགས་ལ་འགན་འཁུར་བའི་གསར་འགྱུར་རེད། ནམ་རྒྱུན་ཆབ་སྲིད་རྐྱང་རྐྱང་གླེང་ནས་བསྡད་ན་ཉོབ་ཀི། མཚམས་ལན་རེར་འདི་ལྟ་བུ་རེ་འགོད་རྒྱུ་རེ་བ་ཆེ།
གསར་འགོད་མཆོག་ལ་ཞུ་རྒྱུ་་་་་ཐུགས་རྗེ་གཟིགས་རྗེས་མ་ནས་དོན་མེད་གནས་ཚུལ་འདིར་མ་འགོད་རོགས་་་་་འདི་གསར་འགྱུར་མ་རེད།་
བུ་མོ་རིག་འཛིན་གྱི་བདེ་སྡུག་ཆེད་བུད་མེད་ལྷན་ཚོགས་ཀྱིས་ཐབས་ཤེས་གང་དྲག་གིས་མོ་རང་གི་འཚོ་བའི་ཐད་ལ་ཐུགས་བསམ་བཞེས་པ་དེ་ཞེ་དྲག་ཡག་པོ་རེད། སྤྱིར་འགྲོ་བ་མི་ཞིག་གི་ངོས་ནས་ནོར་འཕྲུལ་ཡོང་སྲིད་ཀྱི་རེད་ལ། ནོར་འཕྲུལ་དེ་ལ་ཡོ་བསྲང་བྱེད་ནས་ཞི་འགྲིག་ཀྱང་ཡོང་རྒྱུ་ཡོད་པ་ཞིག་རེད། བྱས་ཙང་ད་རེས་འགྲིག་འཇག་ཡོང་བ་དེ་ཞེ་དྲག་ཡག་པོ་རེད། ཕན་ཚུན་གཉིས་ཕན་རེད། ད་ནི་བཀྲིས་ལོ་ལེགས་ཡོང་བའི་སྨོན་འདུན་ཡོད།
སྔར་གྱི་གཏམ་དཔེར། ཁྱི་མོ་མཇུག་མ་མ་གཡུག་ན། ཁྱི་ཕོ་འཁོར་གྱི་མ་རེད་ཅེས་པ་དེ། རིག་འཛིན་གྱིས་ངོས་འཛིན་ཐུབ་ནས་མ་འོངས་པར་བསྟན་པ་དང་བཟའ་ཚང་བྱས་ན་ལས་དེ་མིན་མུ་མཐུད་ནས་ཁྱི་མོའི་མཇུག་མ་གཡུག་ན། ཡང་བསྐྱར་ཁྱི་ཕོ་འཁོར་འདོད་པ་ཞིག་རེད།
བུ་མོ་རིགས་འཛིན་སྒྲོལ་མའི་བསམ་དོན་ལྷུན་གྱིས་འགྲུབ་པའི་སྨོན་འདུན་ཞུ། ཁྱེད་གྱིས་ཚེ་ལ་བར་ཆད་མེད་̒པའི་སྨོན་འདུན་ཞུ།
ཇི་སྐད་དུ། “ཁྱི་ཡིས་མི་ལ་སོ་བརྒྱབ་ན་གསར་འགྱུར་མ་རེད། གལ་ཏེ་མིས་ཁྱི་ལ་སོ་བརྒྱབ་ན་གསར་འགྱུར་རེད་” ཟེར་བའི་དཔེ་ལྟར། གསར་འགྱུར་མི་འདྲ་བ་ཞིག་མིན་འདུག ??????
ཨ་ལ་ལ། ད་གསར་འགྱུར་སྟོབས་ཆེན་བྲིས་འདུག་རེས།