ཁ་སང་གཟའ་ལྷག་པའི་ཉིན་ཡེ་མན་སྲིད་འཛིན་གྱིས་སྲིད་དབང་རྩིས་སྤྲོད་བྱ་རྒྱུའི་ཁས་ལེན་བྱས་པར། ཨ་རི་སོགས་ཀྱིས་ཡེ་མན་མི་མང་ལ་རྟེན་འབྲེལ་འཚམས་འདྲི་དང་། གང་མགྱོགས་དམངས་གཙོ་བཅོས་སྒྱུར་བྱ་དགོས་པའི་སྐུལ་མ་ཡང་བཏང་འདུག
ཟླ་འདིའི་ཕྱི་ཚེས་༢༣ཉིན་སོའོ་ཌེ་ཨ་རབ་(Saudi Arabia) ཀྱི་བར་འདུམ་འོག ཡེ་མན་(Yemen)སྲིད་འཛིན་སཱ་ལེ་(Ali Abdullah Saleh) ཡིས་སྲིད་དབང་རྩིས་སྤྲོད་བྱ་རྒྱུའི་ཁས་ལེན་མཚན་རྟགས་བཀོད་ཡོད་ཅིང་། སོའོ་ཌེ་ཨ་རབ་ཀྱི་བར་འདུམ་འོག་རྗེས་ཕྱོགས་སྲིད་འཛིན་ཁོང་ལ་ནག་ཉེས་མི་ཡོང་པའི་གན་རྒྱ་ཡང་བཞག་འདུག་ལ།འབྱུང་འགྱུར་ཟླ་གསུམ་ནང་ཡེ་མན་རྒྱལ་ཡོངས་འོས་བསྡུ་བྱ་རྒྱུའི་ཐག་གཅོད་ཀྱང་བྱས་འདུག
ཡེ་མན་སྲིད་འཛིན་གྱིས་སྲིད་དབང་རྩིས་སྤྲོད་བྱ་རྒྱུའི་ཐག་གཅོད་བྱུང་འཕྲད། ཨ་རིའི་སྲིད་འཛིན་ཨོ་བྷ་མས་ལོ་༣༣རིང་སྲིད་དབང་སྒེར་འཛིན་བྱེད་མཁན་སཱ་ལེ་ཡིས་སྲིད་དབང་རྩིས་སྤྲོད་བྱ་རྒྱུར་ཁས་ལེན་བྱས་པ་དེ། ཡེ་མན་མི་མང་གིས་གང་མགྱོགས་ལག་བསྟར་གྱིས་དམངས་གཙོ་བཅོས་སྒྱུར་བྱ་དགོས་པའི་སྐུལ་མ་བཏང་ཡོད་འདུག ཨ་རི་ནི་མུ་མཐུད་ཡེ་མན་མི་མང་གི་ཕྱོགས་སུ་ལངས་ཏེ་ལོ་རྒྱུས་རང་བཞིན་གྱི་སྲིད་དབང་འཕོ་འགྱུར་ལ་རོགས་འདེགས་བྱ་རྒྱུ་ཡིན་ཞེས་བསྒྲགས་འདུག
སྲིད་འཛིན་སཱ་ལེ་ཡིས་ཁས་ལེན་མཚན་རྟགས་བཀོད་རྗེས། གྱེན་ལངས་པ་མང་པོས་མུ་མཐུད་སྲིད་འཛིན་སཱ་ལེ་ལ་རྗེས་ཕྱོགས་ནག་ཉེས་མི་ཡོང་པའི་གན་རྒྱ་བཞག་པ་དེ་ནི། བར་འདུམ་པ་དག་གིས་འདས་པའི་ཟིང་འཁྲུག་ཁྲོད་རྒྱལ་གཅེས་དཔའ་བོ་མང་པོའི་ཚེ་སྲོག་ཤོར་པའི་རིན་ཐང་རྩིས་མེད་བཏང་པ་ཞིག་ཡིན་པར་བསྒྲགས་ཏེ། རྒྱལ་ས་སཱ་ནཱ་(Sanna)ནང་ངོ་རྒོད་སྐད་འབོད་བྱས་པར་སྲིད་འཛིན་སཱ་ལེ་ཕྱོགས་གཏོགས་དམག་གིས་དྲག་གནོན་དང་། ངོ་རྒོལ་པ་མི་ ༥ ཙམ་ལ་མེ་མདའ་བརྒྱབ་སྟེ་དམར་གསོད་བཏང་ཡོད་འདུག
གསར་འགོད་པ། བནྡེ་སྐྱབས།
སྲིད་དབང་སྒེར་འཛིན་པ་ནི་མི་དམངས་ཀྱི་གཉའ་གནོན་ཡིན། ཚོད་མ་ཟིན་ན་མི་དམངས་ཀྱིས་ཐལ་བའི་རྡུལ་དུ་བརླག་ངེས་ཡིན། ཀྲུང་གོའི་སྲིད་དབང་སྒེར་གཅོད་དེ་ནི་ཏང་གི་མཁར་གྱང་ནང་ཡོད་པས་འདི་ལྟར་ལས་སླ་བོ་ཞིག་མིན་པས། ཏང་མི་རེ་རེ་ནས་འཕག་འཚག་རྒྱག་ཐུབ་མིན་དེ་ནི་མཁར་གྱང་འདིར་གཡོ་འགུལ་སློང་ཐུབ་མིན་གྱི་གནད་འགག་ཅིག་ཀྱང་ཡིན།