ད་ནངས་རྡོར་གདན་མཆོད་རྟེན་ཆེན་མོའི་མཱ་ཧཱ་བྷོ་ཏི་སྲང་ལམ་དུ། བོད་ནས་ཕེབས་པའི་ཆོས་ཞུ་བ་ཞིག་གིས་བཤས་རའི་ར་མ་ཆུང་ཆུང་ ༤ ཉོས་ཏེ་ཚེ་ཐར་ལ་བཏང་སོང་།
ཉིན་ཤས་གོང་ནས་གནས་མཆོག་རྡོ་རྗེ་གདན་དུ་དུས་འཁོར་དབང་ཆེན་ལ་ཕེབས་མཁན་མང་དུ་ཕྱིན་པ་དེས། རྡོར་གདན་ས་གནས་ཀྱི་ར་ལུག་གཙོས་པའི་སེམས་ཅན་གྲངས་མེད་ཀྱི་ཚེ་སྲོག་ཤོར་བཞིན་ཡོད་འདུག་ལ། དུས་དབང་གོ་སྒྲིག་ཚོགས་ཆུང་གིས་འབོད་སྐུལ་ཇི་ལྟར་ཞུས་མིན་ལ་མ་ལྟོས་པར། བོད་མི་ཆོས་ཞུ་བ་ཚོས་དམར་ཟས་སྤྱོད་ཐལ་ཆེ་བའི་དབང་གིས་ས་གནས་ཡུལ་མི་ཚོས་ས་ཚིགས་མང་པོར་ཉིན་ལྟར་ར་མ་བཅུ་ཕྲག་འགའ་རེ་འཚོང་འགྲེམས་བྱེད་ཀྱི་ཡོད་པ་མ་ཟད། ཐ་ན་ཟླ་ཤས་ལས་ཕྱིན་མེད་པའི་ར་མའི་རེའུ་ཆུང་ཆུང་དག་ཀྱང་རིན་གོང་ཐོན་པོས་བཤས་རྭར་འཚོང་བཞིན་ཡོད་འདུག
ད་ནངས་ཞོགས་པ་འདི་གའི་གསར་འགོད་པ་རྡོར་གདན་མཆོད་རྟེན་ཆེན་མོའི་འགྲམ་གྱི་མཱ་ཧཱ་བྷོ་ཏི་སྲང་ལམ་དུ་སྐྱོད་སྐབས། བོད་མི་སྐོར་ཞིག་བཤས་ར་ཆུང་ཆུང་ཞིག་ཏུ་འཚང་ཁ་རྒྱག་བཞིན་པ་མཐོང་སྟེ་དེ་གར་རྒྱུས་ལོན་བྱས་པར། ས་གནས་ཡུལ་མི་ཤ་བཙོང་བ་ཞིག་གིས་བཙས་ཏེ་ཟླ་ཤས་ལས་ཕྱིན་མེད་པའི་རེའུ་ཆུང་ཆུང་ ༤ བཤས་རྭའི་ནང་གསོད་རྩིས་བྱེད་ཀྱི་ཡོད་པ་བོད་ནས་ཕེབས་པའི་ཆོས་ཞུ་བ་ཞིག་གིས་མཐོང་སྟེ། སེམས་ཀྱིས་མ་བཟོད་པར་རེའུ་ཆུང་ཆུང་དེ་དག་གི་ཚེ་སྲོག་སྐྱོབ་ཆེད་ཧིན་སྒོར་ ༨༠༠༠ སྤྲད་དེ་ཉོ་གྲབས་བྱས་སྐབས། མཐར་ལ་དྭགས་པ་སྐོར་ཞིག་གིས་སྐད་བསྒྱུར་རོགས་རམ་འོག་ར་མ་དེ་ཚོར་ཧིན་སྒོར་ ༤༠༠༠ ཙམ་སྤྲད་དེ་ཉོས་སོང་།
གནས་ཚུལ་དེའི་ཐད་གསར་འགོད་པས་བོད་ནས་ཕེབས་པའི་ཆོས་ཞུ་བ་དེར་སེམས་ཚོར་དྲིས་པར། “ང་རང་གནས་མཆོག་རྡོ་རྗེ་གདན་ལ་སངས་རྒྱས་མཇལ་རྒྱུ་དང་དུས་འཁོར་དབང་ཆེན་ཞུ་རུ་ཡོང་བ་ཡིན། ཞོགས་པ་ལམ་ཁ་ནས་ཚུར་ཡོང་སྐབས་རྒྱ་གར་འདིས་རེའུ་ཆུང་ཆུང་འདི་དག་བཤས་རར་གསོད་རྩིས་བྱེད་ཀྱིན་པ་མཐོང་སོང་། དེ་ནས་སེམས་ཀྱིས་མ་བཟོད་པར་ཁ་ཐུག་ཉོས་པ་ཡིན ” ཞེས་བརྗོད་སོང་།
ཁྱེད་རང་ཉིན་ཤས་རྗེས་བོད་དུ་ལོག་རྒྱུ་ཡིན་སྟབས། རེའུ་འདི་དག་བདག་པོ་ཇི་ལྟར་རྒྱག་འཆར་ཡོད་མེད་དྲིས་སྐབས། “ངས་གློ་བུར་དུ་རེའུ་འདི་དག་གསོད་བཞིན་པ་མཐོང་སྟེ་ཉོས་པ་ཡིན། ཉོས་ཚར་བའི་རྗེས་འདི་ཚོ་སུ་ལ་སྤྲོད་དགོས་མིན་ཤེས་ཀྱི་མི་འདུག དང་ཐོག་རེའུ་ཆུང་ཆུང་རེ་རེའི་མགོ་ལ་ཁ་བཏགས་རེ་བཏགས་ཏེ་ཕྱི་ལོགས་ལ་གཏོང་བསམས་ཀྱང་། ང་རང་སོང་ཤུལ་དུ་ར་མའི་བདག་པོས་ཡང་བསྐྱར་བཟུང་སྟེ་གསོད་རྒྱུ་རེད། དེའི་སྟབས་ཀྱིས་རེའུ་འདི་དག་ཁྲིད་དེ་དགོན་པ་ཞིག་ལ་འབུལ་རྒྱུ་ཡིན། དགོན་པར་སྤྲད་ན་སྲོག་སླུ་ཡོང་གི་རེད། ” ཅེས་བརྗོད་བྱུང་།
དུས་དབང་གྲ་སྒྲིག་ཚོགས་པས་ཆོས་ཞུ་བ་ཚོར་ད་ལོའི་དུས་དབང་སྐབས་དཀར་སྐྱོང་ཁོ་ན་གནང་རྒྱུའི་འབོད་སྐུལ་ཡང་ཡང་ཞུས་ཡོད་ཀྱང་། རྡོར་གདན་སྲིང་ལམ་ཁག་གི་ཟ་ཁང་དང་། ཆོས་ཞུ་བ་དག་གིས་ཞལ་ལག་མངགས་ཕྱོགས་བཅས་སུ་དཀར་སྐྱོང་གནང་མཁན་ཧ་ཅང་ཉུང་རེད།
རྡོར་གདན་གསར་འགོད་པ། དཔལ་ལྡན།
དུས་དབང་རྒྱུད་སྡེ་དང་མཐུན་པ་ཞུ་ཤེས་མཁན་ཤིན་ཏུ་ནས་ཉུང་།
དེར་བརྟེན་གནས་མཆོག་ཁྱད་པར་ཅན་འདི་རུ་ར་ལུག་རེའི་སྲོག་སྐྱོབས་ནུས་པ་ལུས་དབང་བྲལ་ལ་སྡད་པ་ལས་ཀྱང་ཕན་ནུས་ངེས་པར་ཅན་དུ་ཆེ། སྤྱིར་རྒྱུད་སྡེ་བླ་མེད་ལས་ཤ་ལྔ་བདུད་བརྩི་ལྔར་སྤྱོད་པར་གསུང་ནའང། མི་ཤ་ཟ་ཞིང་མི་གཙང་རྟུག་པ་ལྡག་མི་ནུས་པ་སུས་ར་ལུག་ལ་སོགས་ཀྱི་ཤ་ཟོས་ན། གསང་སྔགས་ཀྱི་རྒྱུད་སྡེ་དང་འགལ། བྱང་སེམས་ཀྱི་བསླབས་བྱ་དང་འགལ། ད་དུང་ཐེགས་ཆེན་གྱི་འདུལ་བ་དང་རོ་རྒྱབ་ཁུར་བཞིན་གྱུར་པས། སོ་སོ་ཤ་ལ་སྲེགས་ཅིང་ཁྲག་ལ་རྐམ་པའི་རང་འཚང་འགེབས་པའི་སླད་དུ་ལུང་རིགས་ལྟར་སྣང་ཁྱེར་ནས་ཤ་ཟོས་ན་ཉེས་པ་མེད་རབ་བཤད་མཁན་ནུ་བཤིན་པའམ་གདོལ་བའི་རིགས་དང་གཉིས་སུ་མེད་པའི་ཐོག ད་དུང་ལས་འབྲས་བླང་དོར་ཤེས་བཞིན་ཁྱད་གསད་བྱས་པའི་རྣམ་སྨིན་ཤིན་ཏུ་ནས་ལྕི་བས་བག་ཟོན་མཛོད།
བོད་པས་ཤ་ཟོས་པས་ཐེགས་ཆེན་གྱི་གྲས་ལས་ཕུད། རྒྱ་གར་གྱི་ཡུལ་མིས་ཕན་ཚུན་བསྲེ་མི་རུང་བའི་རིགས་སུ་བརྩིས། དེ་དག་གི་ཤུགས་རྐྱེན་ངན་པ་དེས་བོད་རྣམས་གང་སར་མགོ་འཕང་ཇེ་དམའ་བྱེད་དགོས་ཀྱི་ཡོད། ཚེ་འདིར་ལུས་ཀྱི་འཕྲོད་བསྟེན་ལ་གནོད་པས་ཚེ་སྲོག་ཐུང་བའི་ཤུགས་རྐྱེན་ཆེ་ཤོས་ཀྱི་རྒྱུ་རུ་གྱུར། ཚེ་ཕྱི་མ་དམྱལ་བ་ཡང་སོས་ཀྱི་གནས་སུ་སྲོག་ལམ་ལྔ་བརྒྱ་འཇལ་དགོས་པ་སོགས་འདི་ཕྱི་གཉིས་ཕུང་གི་བྱ་ངན་འདི་ད་ལྟའི་དུས་འཁོར་དབང་ཆེན་སྐབས་སུ་རང་རེ་ཧི་མ་ལ་ཡི་རི་རྒྱུད་དུ་གནས་པས་སྔོན་གྱི་དུས་འཁོར་དབང་ཆེན་སྐབས་སུ་སྤགས་རིགས་གྱོན་པ་འཚམས་བཞག་པ་ནང་བཞིན་འཚམས་བཞག་ཐུབ་ན་རྒྱལ་བའི་བརྟན་བཞུགས་ལ་དེ་ལས་ལྷག་པ་ཞིག་སུས་ཀྱང་མི་ཐོན།
ང་ཚོ་བོད་པ་དེང་རབས་དང་རྗེས་སུ་ལུས་པའི་གོམས་ངན་གཅིག་ནི། ཁ་ནས་མ་ཎི་དང་སྙིང་རྗེ་ཟེར་ཡང་། ཤ་ལ་སྲེད་པའི་ཆགས་ཞེན་དོར་མ་ཐུབ་པ་དེེ་ཁོ་ནས་ཡིན་པས། ཤ་མེད་བསྟེན་ཅིག་རིགས་ཀྱི་སྤུན་ཟླ་ལགས།
ང་ཚོར་རྒྱ་ནག་ནང་པས་བོད་པའི་དགེ་བཤེས་ཤ་གཟན་དང་། སེངྒ་ལ་པ་སོགས་ཀྱིས་བོད་པའི་དགེ་སློང་ཕྱི་དྲོ་ཁ་ཟས་སོགས་ཀྱིས་བསྙད་དེ་ནང་པའི་ཁོངས་སུ་མི་བརྩིས་པར་ལ་ཡང་དགོསཔའི་གནས་ལུགས་ཀྱིས་ཕོངས་པ་མིན་པས། དུས་ཀྱི་འགྱུར་འགྲོས་དང་བསྟུན་པའི་བསམ་བློ་དང་གོམས་གཤིར་བཅོས་བསྒྱུར་གཏོང་དགོས་པར་སེམས།
ང་ཚོས་འཚེ་མེད་ཀྱི་ལྟ་བ་ཆེས་ཆེར་བསྒྲགས་ཤིང་། སྒོས་སུ་དཔལ་དུས་ཀྱི་དབང་ཆེན། འཛམ་གླིང་ཞི་བདེའི་སྨོན་ལམ་སོགས་དང་དེ་བས་ཀྱང་མི་མཐུན་པས་ཡིད་གཟབ་གནོངས་ཤིག་བོད་པ་ལགས།
བོད་ནས་ཕེབས་པའི་གནས་མཇལ་བ་དེས་སྙིང་རྗེ་དོན་དུ་ལག་བསྟར་མིག་དཔེ་བཟང་པོ་བསྟན་པར་ཡིད་རང་བསྔགས་བརྗོད་ཡོད་དོ།།
གནས་དེར་འདི་ལྟའི་བྲོ་གར་དངོས་དང་ཟོག་པོ་མང་པས་དབྱེ་འབྱེད་ཀྱང་དུས་བསྟུན་འབེན་ལ་འཁེལ་དགོས་པར་ཡིན་ནོ།།
འཕགས་པ་ཀ་ཏ་ཡ་ནས།
ཕ་ཤ་བཟའ་ཤིང་མ་ལ་སྦྱིན། །
སྡང་བའི་དགྲ་བོ་པང་དུ་བླངས། །
ཞེས་སོགས་འཁོར་བར་སྐྱེ་བ་སྔ་ཕྱིའི་འགྱུར་བ་ལ་གོད་བྲོ་བ་དང་། སྙིང་པོ་མེད་ལ་ངེས་པར་འབྱུང་དགོས་པ་མངོན་ཤེས་ཀྱིས་བླང་དོར་སྤང་བླངས་སྐོར་གསལ་སྟོན་གནང་བར་བརྟེན། ང་ཚོ་བོད་རིགས་ཚོས་ཀྱང་དུད་འགྲོའི་སྲོག་གཅོད་དང་། ཤ་པགས་རུས་ལ་ཆགས་པ་ཉུང་དུ་གཏོང་དགོས་པ་མི་འདུག་གམ། ཤ་གཟན་བོད་རིགས་ཚོ།