— བོད་ནང་དུ་མེ་ལྕེ་རེ་མཆེད་གིན་འདུག་ལ། མེ་ལྕེ་དེ་དག་མེ་མདའ་བརྒྱབ་ནས་གསོད་གིན་འདུག
གལ་སྲིད་མིའི་རིགས་ཀྱིས་དཀར་ནག་དང་བདེན་རྫུན་གྱི་དབྱེ་བ་ཅུང་ཕྱེ་ནས་ད་ལྟའི་བོད་ནང་ལ་བལྟ་དུས་མ་མཐར་ཡང་འདི་ལྟ་བུ་ཞིག་མཐོང་དགོས་པར་འདུག རྒྱ་ནག་གི་ཉེན་རྟོག་པ་དང་དྲག་ཆས་མི་སྣ། བཅིངས་འགྲོལ་དམག་མི་དག་གིས་གོ་མཚོན་ལྗིད་པོ་དག་བོད་ནང་དུ་ཁྱེར་ཡོང་ནས། མི་དམངས་ཀྱི་དཀྱིལ་ལ་རང་འདོད་ལྟར་མེ་མདའ་རྒྱག་པ་དང་། ཆབ་སྲིད་ཀྱི་དོགས་གཞི་ཡོད་པའི་རིགས་ལ་ཡང་མེ་མདའ་བརྒྱབ་ནས་གསོད་ཀྱིན་ཡོད་པ་རེད། ཁོང་ཚོ་ནི་རི་དྭགས་རྔོན་དུ་ཡོང་བ་ལྟ་བུ་ཞིག་ཡོད་པ་རེད།
ཁོང་ཚོས་ད་བར་དུ་བསད་པའི་བོད་མི་དེ་དག་སུ་གཅིག་གི་ལག་ཏུ་མེ་མདའ་ཕར་ཞོག ཐ་ན་གྲི་ཆུང་རེ་བཟུང་ནས་རྒྱུག་མཁན་དང་ངོ་རྒོལ་ཁྲོམ་སྐོར་བྱེད་མཁན་བྱུང་མྱོང་མེད། འདས་པའི་ལོ་ ༣༠ ནས་ ༤༠ བར་དུ་བོད་པ་མེ་མདའ་བཟུང་མཁན་ཞིག་ཁྲོམ་ལ་འབུད་མྱོང་མེད་ལ། རྒྱ་ནག་གི་ཉེན་རྟོག་པ་དང་དམག་མི་སུ་གཅིག་ཀྱང་བོད་པ་ཞིག་གིས་བསད་པའི་གནས་ཚུལ་བྱུང་མེད། ཡིན་ཡང་། རྒྱ་ནག་གཞུང་གིས་དུག་རྫས་དང་གོ་མཚོན་གང་བདེ་སྤྱད་དེ་བོད་པ་ཚོ་གསོད་ཀྱིན་པའི་གནས་ཚུལ་དེ་ཡོངས་གྲགས་ནས་རྒྱུན་ལྡན་དུ་གྱུར་ཡོད། འདས་པའི་ཉིན་དྲུག་གི་རིང་ལ་དོན་རྐྱེན་དེ་འདྲ་ཐེངས་གཉིས་ལ་བྱུང་ཞིང་། གཅིག་ནི་མདོ་སྨད་བླ་བྲང་ཨ་མཆོག་ཚོ་བ་དང་། ཅིག་ཤོས་དེ་མདོ་སྨད་རྔ་བ་རྫོང་རེད།
རྒྱལ་སྤྱིའི་སྟེང་ནས་ཀྱང་བོད་རྒྱའི་བར་གྱི་དཀའ་རྙོག་འདི་སེལ་དགོས་པར་བཤད་མཁན་དང་། བོད་པ་ཚོ་ཡང་འགྲོ་བ་མིའི་རིགས་སུ་བརྩིས་ཏེ་ཁོང་ཚོའི་གཞི་རྩའི་ཐོབ་ཐང་ལ་བརྩི་བཀུར་བྱ་དགོས་ཚུལ་བཤད་མཁན་ཡོད་རུང་། འདི་ལྟར་མི་དམངས་ཀྱི་ཞི་བའི་ངོ་རྒོལ་དང་གཞུང་གི་དྲག་པོའི་བཙན་གནོན་བར་ན་ཆ་མི་སྙོམས་ལ། རྣམ་འགྱུར་མི་མཚུངས་པ། ངོ་ཡ་བྱེད་སྟངས་ཀྱི་ངོ་བོ་མི་གཅིག་པའི་འགལ་བ་ཆེན་པོ་ཞིག་ཡོད་པ་དེ་གླེང་མཁན་མི་འདུག
སྲིད་གཞུང་ཞིག་གི་ངོས་ནས་མི་དམངས་ཀྱི་ངོ་རྒོལ་ལ་འགོག་རྒོལ་དང་སྟངས་འཛིན་བྱེད་པ་ནི་རྒྱལ་ཁབ་ཚང་མའི་ལུགས་སྲོལ་ཡིན་རུང་། རྒྱ་ནག་གཞུང་གིས་བོད་པ་ཚོ་དམིགས་བཀར་གྱིས་གསོད་ཆོག་ཆོག་ཅིག་ཏུ་ལྟ་གིན་ཡོད་ལ། བོད་ས་ཁུལ་ལ་བཀྲམས་པའི་དམག་དཔུང་དེ་དག་ནི་སྤྱི་ཚོགས་བརྟན་ལྷིང་དང་ཞི་བདེ་ལ་སྒྱུར་མཁན་མིན་པར། བོད་པ་ཚོ་ཚར་གཅོད་མཁན་དང་། དཔུང་ངོམ་བྱེད་མཁན་ཁོ་ནར་གྱུར་ཡོད།
ཉིན་ཤས་གོང་ངས་རླབས་གསུམ་པར་ཉན་སྟངས་ཞེས་པའི་ཟིན་བྲིས་ཐུང་ཐུང་ཞིག་བྲིས་པ་ཡིན། དེའི་རྗེས་ནས་ངས་བོད་པ་གང་འཚམ་ཞིག་ལ་ཁ་བརྡ་བྱས་སྐབས། ཁོང་ཚོའི་བརྒྱ་ཆ་ ༩༠ ལྷག་གི་སེམས་ན་རླབས་གསུམ་པ་ཞིག་གཡོ་གིན་འདུག་ལ། ད་ནི་འུ་ཐུག་སོང་ཟེར་མཁན་དང་། ད་ནི་དངོས་གནས་སྡོད་འཇུག་གི་མི་འདུག་ཟེར་མཁན། གོ་སྐབས་ཤིག་ཡོད་རྒྱུ་ན་ཟེར་མཁན། གཏོར་རྒོལ་རེ་སེམས་ལ་མི་ཤར་རང་ཤར་རེད་ཟེར་མཁན་སོགས་འདུག
ད་ནངས་ཞོགས་པར་དྲ་རྒྱ་ཁ་ཕྱེ་དུས་སླར་ཡང་ཛ་དྲག་གི་གནས་ཚུལ་ཞིག་མདོ་སྨད་རྔ་པ་རུ་བྱུང་ཞིང་། རྒྱ་ནག་གི་ཉེན་རྟོག་པ་ཚོས་མང་ཚོགས་ཀྱི་དཀྱིལ་ལ་མེ་མདའ་སྐོར་བ་སོགས་རེད། སྔོན་ཆད་ཕ་ཡུལ་གྱི་གྲོགས་པོ་ཚོས་ ༼བོད་སེམས་བོད་ཀྱིས་ཤེས།༽ ཞེས་བཤད་མྱོང་བ་ལྟར། ད་ནི་བོད་མི་རིགས་ཀྱི་སེམས་ཁམས་དེ་གང་ཞིག་ཏུ་གཡོ་བཞིན་པ་ནི་ཅུང་ཚོད་དཔག་ཐུབ་པ་ཞིག་རེད།
རྒྱ་ནག་གཞུང་གིས་བོད་རྒྱའི་བར་ན་ཞི་བའི་གྲོས་མོལ་ཟེར་བ་ཞིག་ཡོང་ཐབས་མེད་པར་བཤད་ལ། དགོས་གལ་ལ་ཐུག་དུས་དྲག་པོའི་རྒོལ་རྡུང་ནི་གཡོལ་ཐབས་མེད་པ་ཞིག་ལ་ལྟ་གིན་ཡོད། རྒྱ་གཞུང་གི་ལྟ་ཚུལ་ལྟར་ན། བོད་པ་ཞིག་གིས་རྒྱ་མི་རིགས་ཤིག་ལ་གནོད་པ་ཕྲན་བུ་ཙམ་བྱས་ཚེ་བོད་པ་དེར་ཆབ་སྲིད་ཀྱི་ནག་ཉེས་ཤིག་ཡོད་ལ། རྒྱ་མི་ཞིག་གིས་བོད་པ་ཞིག་བསད་ཚེ་ཉེས་པ་དེ་སླར་ཡང་བོད་པ་དེའི་མགོ་ན་ཡོད། དེའི་རྒྱུ་མཚན་ནི་ཁྱོད་༼བོད་པ་༽ཡིན་པའི་རྐྱེན་ཁོ་ནར་ཐུག་ཡོད།
དེ་བས་བྱང་ཆུབ་ཀྱི་སེམས་སྦྱངས་མཁན་གྱི་སྐྱེ་བུ་དམ་པ་ཞིག་ཡིན་ན་གནས་ཚུལ་ཐ་དད་ཡིན་རུང་། བོད་རིགས་མི་དམངས་དཀྱུས་མ་ཚོའི་སེམས་ན་གནོན་མི་ཐུབ་པའི་ཁོང་ཁྲོ་ཞིག་འབར་བཞིན་པ་ནི་མངོན་གསལ་རེད། ཁྱེད་ཀྱིས་ཟིན་བྲིས་འདི་བཀླགས་རྗེས་སོ་སོའི་སེམས་ལ་ཡང་བརྟག་དཔྱད་ནན་མོ་ཞིག་ཐོངས་དང་། མ་མཐར་ཡང་ཁྱོད་ཀྱི་སེམས་ན་འགལ་འདུ་དང་ཐེ་ཚོམ་གྱི་བསམ་ཚུལ་སྣ་ཚོགས་ཤིག་འཕྱོ་བཞིན་པ་གོར་མ་ཆགས་པར་འདོད། ལྷག་པར་དུ། བོད་ནང་གི་ཞི་བའི་མེ་ལྕེ་དེ་དག་ལ་ཁོ་ཚོས་མེ་མདའ་བརྒྱབ་ནས་གསོད་བཞིན་པའི་སྐབས་འདིར་སེམས་ཁམས་དེ་རྒྱུན་ལྡན་ལ་འབབ་ཐུབ་གི་མེད།
རྒྱལ་སྤྱི་དང་རྒྱ་ནག་གི་སྲིད་དོན་པ་དང་ཤེས་ཡོན་པ་དག་གིས་ད་སྐབས་རྒྱ་གཞུང་ལ་ངེས་པར་དུ་གནོན་ཤུགས་སྤྲོད་རྒྱུ་དེ་ནི། ས་གནས་སོ་སོར་བོད་རིགས་མི་དམངས་ཀྱི་ཞི་བའི་ངོ་རྒོལ་ཅི་ཙམ་ཡོད་རུང་། དེ་དག་གི་སྟེང་ལ་དྲག་པོའི་གོ་མཚོན་ནམ་ཡང་བཀོལ་མི་ཆོག་རྒྱུ་འདི་རེད།
མགྲིན་པ་ཟབ་མོ་ལགས་ཀྱིས་འདིར། ༡། རྒྱལ་སྤྱིའི་གནས་སྟངས་དང་། ༢། བོད་མི་རིགས་རང་གི་ནང་ཁུལ་གྱི་གནས་སྟངས། ༣། ཏཱ་ལའི་བླ་མ་དང་ནང་ཆོས་ཀྱི་ཤུགས་རྐྱེན་ལས་བྱུང་བའི་རྒྱལ་སྤྱིའི་མིག་ནང་གི་བོད་དོན་གྱི་གནས་སྟངས། ༤། ད་ལྟའི་དུས་རབས་ཀྱི་གནས་སྟངས་དང་འཕེལ་ཕྱོགས། ༥། ད་ལྟའི་ལས་འགུལ་གྱི་ཤུགས་རྐྱེན། ༦། ལོ་རྒྱུས་ཀྱི་རྒྱབ་ལྗོངས། ༧། བཙན་བྱོལ་བོད་མིའི་གནས་སྟངས་སོགས་གཞིར་བཞག་ནས་བཤད་འདུག་སྟབས་ཐུགས་རྗེ་ཆེ།
གསལ་ལེ་ལགས། ཁ་ཉིན་གྱི་མེ་མདའི་དོན་རྐྱེན་དེ་དཔེར་ན། ཁྱེད་ཚང་གི་ཁྱིམ་ཚང་ནང་ལ་མེ་མདའ་བརྒྱབ་པ་རེད། ཁྱོད་ཀྱིས་བཟོད་ཨེ་ཐུབ། གཞན་པ་དེ་ནི་དཔེར་ན། ཁྱེད་ཀྱི་སྡེ་མིའི་ནང་དུ་མེ་མདའ་བརྒྱབ་པ་རེད། ཁྱེད་ཀྱིས་བཟོད་ཨེ་ཐུབ།
ཁྱོད་ཀྱིས་ད་དུང་འཚེ་མེད་ཞི་བ་བཤད་ནས་འདུག་ཨེ་ཐུབ། ཁྱེད་ཀྱིས་ད་དུང་ཞེ་བདེའི་མི་རིགས་ཡིན་པའི་ངོ་སོ་ཞིག་ལ་བསྒུག་ནས་འདུག་ཨེ་ཐུབ། མི་ཐུབ་ན་གནས་སྟངས་ངོ་མ་དེ་འདྲ་རེད། འདི་ཚོ་ཁྱོད་ཀྱིས་ད་སྐབས་བཤད་ཀྱིན་པའི་གནས་ལུགས་རྒྱུ་མཚན་གྱི་གྲས་སུ་འགྲོ་གི་མེད་ཀྱང་སྲིད།
ཕྱིའི་རྒྱབ་སྐྱོར་ལ་རྣ་བ་མ་གཡར། ནང་གི་དམ་ཚིག་ལ་བློ་རྩེ་གཏོད།
༡། དེང་སང་ཁ་ཆེ་དུང་ཕྱུར་གཅིག་ཨ་རི་བ་ཚོའི་སྒང་ལ་ཁོང་ཁྲོ་ལངས་ནས་བསྡད་ཡོད་པ་རེད། འདིའི་ཐོག་ལ་ཨ་རི་ཡིས་སླར་ཡང་སྔོན་ཆད་ཀྱི་གྲང་དམག་གི་སྔ་ཕྱི་ལྟར། རྒྱ་རིགས་དུང་ཕྱུར་གཅིག་ལྷག་གི་ཁོང་ཁྲོ་ཉོ་ཐུབ་ཀྱི་རེད་དམ།
༢། ཡོ་རོབ་ལ་སོ་སོ་མགོ་མ་འདུམ་པའི་དཀའ་ངལ་གྱི་ཐོག་ལ། ཨ་རིའི་མཉམ་དུ་དགྲ་བོ་མང་ཙམ་བསགས་ཡོད་པ་རེད། དེས་མ་འདང་བར་ཡོད་པ་རེད་དམ།
༣། བོད་ཕྱི་ནང་ནས་བླ་མ་དཔོན་པོ་སྐོར་ཞིག་རྒྱ་ཕྱོགས་ལ་འཁོར་ཡོད་པ་རེད། བླ་མ་དཔོན་པོ་སྐོར་ཞིག་ནུབ་ཕྱོགས་ལ་འཁོར་བསྡད་ཡོད་པ་རེད། མང་ཚོགས་ཀྱང་ཕྱེད་ཀ་གཉིས་སུ་གྱུར་ཡོད་པ་རེད། སྐབས་འདི་འདྲ་ཞིག་ལ་འཛམ་གླིང་གིས་ཁ་གྲག་ཤེས་ཀྱི་རེད་དམ།
༤། ནུབ་ཕྱོགས་པ་ཚོཏཱ་ལའི་བླ་མར་དགའ་བོ་ཡོད་པ་བདེན་སྲིད། རེད་དེ། ཁོང་ཚོ་བོད་པ་ལ་དགའ་ཟེར་བ་རྫུན་རེད། བོད་ཀྱི་ནང་ཆོས་ལ་དགའ་ཟེར་བ་ཡང་རྫུན་རེད། གཙོ་བོ་ཁོ་རང་ཚོ་སོ་སོའི་ཆོས་ལུགས་དང་སྤྱི་ཚོགས་ལ་མ་དགའ་བའི་དབང་གིས་བོད་ཀྱི་སྐོར་བཤད་ཁུལ་དང་དགའ་ཁུལ་བྱེད་ཀྱིན་ཡོད་པ་རེད།
༥། ད་ལྟའི་འཛམ་གླིང་འདི་སླར་ཡང་(ཁོང་ཁྲོའི་དུས་རབས་ )ལ་བསླེབས་ཡོད་པ་རེད། གོ་ལ་གོར་གོར་འདི་ཁོང་ཁྲོས་ཁེངས་བསྡད་ཡོད་པ་རེད། སྐབས་འདི་འདྲ་ཞིག་ལ་བགྲོ་གླེང་དང་གྲོས་མོལ་ཞེས་པ་ཞིག་ཡོང་སྲོལ་མེད་པ་འདྲ་བོ་རེད།
༦། དུས་རབས་ ༢༡ པ་འདི་ལ་རེ་བ་བྱས་ཀྱང་། དེ་ནི་ཉམས་རྒུད་ཀྱི་དུས་རབས་ཤིག་ཏུ་གྱུར་བ་རེད། དམངས་གཙོ་ཉམས་པ་རེད། དཔལ་འབྱོར་ཉམས་པ་རེད། ཁོར་ཡུག་ཉམས་པ་རེད། དེའི་ཉེར་ལེན་ནི་སླར་ཡང་རྒྱལ་སྤྱིའི་ཟིང་ཆ་ཆེན་པོ་ཞིག་ཏུ་གྱུར་བ་རེད།
༧། མེར་སྲེག་གི་ལས་འགུལ་ནི་རླབས་ཆེན་རེད། འོན་ཀྱང་། རླབས་ཆེན་གྱི་ལས་དོན་རིགས་ལ་ཤུགས་རྐྱེན་དགོས་པ་རེད། ཤུགས་རྐྱེན་ནི་གྲུབ་འབྲས་ཀྱི་སྔོན་འགྲོ་རེད། དེང་གི་མེར་སྲེག་ལ་ཤུགས་རྐྱེན་ཞིག་མཐོང་ཁག་པོ་རེད། དེར་བརྟེན་གྲུབ་འབྲས་ཀྱང་ཁག་པོ་རེད། ཤུགས་རྐྱེན་ཅི་ཡང་མེད་པའི་ལས་དོན་ནི་རླབས་ཆེན་ཡིན་ཡང་བློ་གྲོས་ལྡན་པ་ཞིག་ཡིན་ཁག་པོ་རེད།
༨། མིའི་རིགས་ཀྱི་ལོ་རྒྱུས་མགོ་བརྩམས་པ་ནས་བཟུང་ཁྲག་དང་མིག་ཆུ་ཆད་མྱོང་ཡོད་པ་མ་རེད། ད་དུང་ཡང་ཆད་འགྲོ་རྒྱུའི་གོ་སྐབས་ཤིག་ཡོད་སྲིད་ཀྱི་མ་རེད།
༩། སྲིད་གཞུང་དང་རྒྱལ་ཁང་ཆེན་པོ་དག་ནི་རང་བྱུང་གི་གོད་ཆག་ཁོ་ནས་སྒྱུར་ཐུབ་གི་རེད། དཔེར་ན། ས་ཡོམ་དང་ཆུ་ལོགས། ཐན་པ། ནད་ཡམས་སོགས་འཇིགས་པ་འདི་དག་གི་སྐབས་ལ་སྲིད་གཞུང་ཡང་འཐོར་གི་རེད། རྒྱ་ནག་ལ་ཡང་རེ་བ་འདི་འདྲ་ཞིག་ལས་བརྒྱབ་ཡ་ཡོད་པ་མ་རེད།
༡༠། རྒྱལ་ཁབ་དང་མི་རིགས་བར་གྱི་ཆབ་སྲིད་དང་ཆོས་ལུགས་ཀྱི་འཐབ་རྩོད་ལ་མགོ་འདོགས་ཁོ་ན་མ་གཏོགས། ཞུ་བ་འཐེན་ནས་རྒྱལ་ཁ་ཐོབ་ས་ཞིག་མེད་ལ། ཐོབ་མྱོང་ཡང་ཡོད་པ་མ་རེད། འོན་ཀྱང་། རྒྱུ་འབྲས་དང་ལས་དབང་ཅེས་པ་ནི་སོ་སོར་ཐུག་ཡོད་པ་ཞིག་རེད།
༡༡། དཔའ་བོ་ལ་གུས་འདུད་དང་གཟེངས་བསྟོད་བྱ་དགོས་མོད། དཔའ་བོའི་རྗེས་སུ་མི་འགྲངས་མཁན་དག་ནི་སྡར་མ་དང་གཡོ་འཚོང་མཁན་ཡིན་ངེས་ལ། དེ་དག་གི་བསྟོད་བསྔགས་ནི་སླར་ཡང་གཞན་པ་གཡོ་འཚོང་བྱ་ཐབས་ཤིག་ཡིན།
༡༢། མི་རིགས་ཁ་འཐོར་གྱི་ཉེན་ཁ་ཆེ་ཤོས་ནི་བསམ་བློ་ཁ་འཐོར་ཏུ་ཕྱིན་པ་དེ་ཡིན། བསམ་བློ་ཁ་འཐོར་དུ་ཕྱིན་ན་གཅིག་གྱུར་གྱི་དབུ་ཁྲིད་འཐོན་མི་ཐུབ་ལ། འཐབ་བྱུས་ཀྱང་གཅིག་གྱུར་མི་ཡོང་། རླབས་ཆེ་བའི་ཏཱ་ལའི་བླ་མ་མཆོག་གིས་ཀྱང་མི་རིགས་འདིའི་བསམ་བློའི་ཁ་འཐོར་དེ་ཕྱོགས་གཅིག་ཏུ་འཁྲིད་ཐུབ་མེད།
༡༣། སོ་སོའི་ཕ་ཡུལ་ནས་བཙན་བྱོལ་དུ་བྲོས་ཤིང་། མིའི་ལུང་པ་ནས་སོ་སོའི་ཕ་ཡུལ་བརྩད་དེ་རྒྱལ་ཁ་བླངས་པའི་ལོ་རྒྱུས་ཤིག་ད་བར་དུ་བྱུང་མྱོང་མེད་པས། བོད་པ་ཚོས་ཀྱང་འདི་གསལ་བོར་ཤེས་དགོས་པ་རེད།
༡༤། རྒྱ་བོད་གཉིས་ཀྱི་གནད་དོན་འདི་སེལ་མི་ཐུབ་པའི་གནས་སྟངས་ཁྱད་མཚར་ཞིག་ནི་འདི་ལྟ་སྟེ། འཛམ་གླིང་སྟེང་དམག་མི་ཆེས་མང་ཤོས་ནི་རྒྱ་ནག་ཡིན་ལ། འཛམ་གླིང་སྟེང་ཆོས་བྱེད་དགེ་འདུན་པ་ཆེས་མང་ཤོས་ནི་བོད་པ་ཡིན། དམག་མི་མང་ཤོས་དེས་མུ་མཐུད་ནས་རྒྱལ་ཁབ་རྒྱ་སྐྱེད་ཀྱིན་ཡོད་ལ། དགེ་འདུན་པ་མང་ཤོས་དེས་སོ་སོའི་མི་རིགས་ཀྱི་གྲངས་ཀར་ཡང་ཚོད་འཛིན་ཐེབས་ཀྱིན་ཡོད།
མི་ཞིག་གིས་ཁྱོད་ལ་འགྲམ་ལྕག་གཅིག་བྱིན་ན་ཁྱོད་ཀྱིས་བཟོད་ཨེ་ཐུབ། དེ་ནས་ཁྱོད་ཀྱི་ཐོག་ལ་གཅིན་པ་གཏོང་གི་ཡིན་ལབ་ན་བཟོད་ཨེ་ཐུབ། དེ་ནས་ཁྱོད་ཀྱི་ཁ་ནས་ལ་སྐྱག་པ་འཇོག་གི་ཡིན་ལབ་ན་བཟོད་ཨེ་ཐུབ། དེ་ནས་་་་་དེ་ནས་་་་་བཟོད་ཨེ་ཐུབ། ཁྱོད་ཀྱིས་བཤད་པའི་རླབས་གསུམ་པ་དེའང་འདི་ལྟར་ཡོང་གིན་ལོས་ཡོད་འདོད།
བདེན་པ་རེད། དཔའ་ལུང་གི་བོད་པ་ཚོར་གཅར་ན་སྐྱོན་མེད། བར་སྐབས་ཤིག་ལ་ཨ་ཤི་གོ་ཟེར་གི་རེད། དེ་དུས་གཅར་མི་ཉན་ཞེས་བའི་སྐད་ཆ་ཞིག་ཡོད་བ་རེད། མི་ཟེར་བ་འདིར་ཐུབ་ཚོད་བྱེད་རྒྱུ་མང་དྲག་ན་བར་སྐབས་ཤིག་ནས་བཟོད་པ་སྒོམ་ཐུབ་ཀི་མ་རེད། ད་ཅི་ཡིན་ན་ཡིན། ཐབས་ཤེས་མི་འདུག་ཅེས་འུ་ཐུག་ནས་བ་ན་མི་བ་ན་སྲོག་གི་སྟེང་དུ་བབས་ཀྱང་གྲ་སྒྲིག་བྱེད་ཀྱིན་ཡོད་བ་རེད།
གོང་གི་བསམ་ཚུལ་འདིའི་རིགས་ནི་གསང་བ་མིན་པར་ཤོག སེམས་ཀྱི་དཀའ་ངལ་ངོ་མ་དང་གནས་སྟངས་ཐབས་རྡུགས་དེ་ཚོ་ངེས་པར་དུ་བཤད་དགོས་པ་ལས། ༼ཁོག་ན་མེ་འབར་གིན་ཡོད་རུང་། ཁ་ནས་དུ་བ་མི་ཐོན་པར་སྡོད་རྒྱུ་༽དེ་གདམ་ག་ཡག་པོ་ཞིག་མིན་པར་འདོད་པས་སེམས་ལ་གང་ཤར་བྲིས་པ་ཡིན། ཀློག་མཁན་སོ་སོར་བསམ་ཚུལ་མི་འདྲ་བ་དང་། རེ་བ་དང་འཇིགས་པ་མི་འདྲ་བ་ཡོད་ན་དེ་དོན་བཤད་རྒྱུ་ལས། ངས་གང་བྲིས་པ་དག་དེ་ལྟར་དུ་ཡིན་དགོས་པ་དང་འབྱུང་ངེས་པའི་ཁྱབ་པ་མེད་པ་སེམས་ལ་འཛིན་རོགས།