༢༠༡༡ ལོའི་ནང་༸གོང་ས་མཆོག་གིས་ཕྱོགས་ཕེབས་མཛད་འཕྲིན་བསྐྱངས་པའི་གནས་ཚུལ་ཁག་ཕྱོགས་བསྡུས།
ཟླ་དང་པོ། ཕྱི་ཚེས་ ༤ ཉིན་༧གོང་ས་མཆོག་གིས་བཞུགས་སྒར་ཕོ་བྲང་དུ་ཊེ་ཊེར་ (Twitter) དྲ་ལམ་བརྒྱུད་རྒྱ་ནག་སྐམ་ས་ཆེན་མོའི་རྒྱ་རིགས་ཚོར་བཀའ་ལན་བསྩལ། ཚེས་ ༡༢ ནས་ ༡༦ བར་གནས་མཆོག་ཝ་རཱ་ཎ་སིར་བོད་ནས་ཆོས་ཞུ་བ་ ༡༨༠༠ གཙོས་པའི་ཁྱོན་མི་ ༣༠༠༠༠ ལྷག་ལ་བཀའ་ཆོས་གསུངས། ཚེས་ ༡༧ ཉིན་བྷིང་ལོར་སེན་ཇོ་སེབ་ཡེ་ཤུའི་སློབ་གྲྭའི་དགེ་ལས་སློབ་ཕྲུག་ ༣༠༠༠ ཙམ་ལ་འཛམ་གླིང་ཞི་བདེ་བསྐྲུན་ཐབས་སྐོར་དང་། མང་ཚོགས་ལ་དཀའ་རྙོག་གི་དུས་སུ་བདེ་སྐྱིད་འཚོལ་ཐབས་སྐོར་གྱི་བཀའ་སློབ་བསྩལ།
ཟླ་གཉིས་པ། ཚེས་ ༡ ཉིན་མོན་གྷོ་འདོད་རྒུ་གླིང་གཞིས་ཆགས་ཀྱི་ལས་བསྡོམས་ཚོགས་ཆེན་སྟེང་བོད་རིགས་མི་མང་ ༡༠༠༠༠ བརྒལ་བར་བཀའ་སློབ་དང་། གཞིས་ཆགས་དེའི་མང་ཚོགས་ཀྱིས་ཟམ་གདོང་རིན་པོ་ཆེར་གཟེངས་རྟགས་ཤིག་ཕུལ་བ་དེ་༧གོང་ས་མཆོག་སྐུ་དངོས་ཀྱིས་ཟམ་གདོང་རིན་པོ་ཆེར་བསྩལ། ཚེས་ ༩ ཉིན་རྒྱལ་པོ་ཇ་སིངྒ་གི་མཧཱ་ལཀ་ཤི་མེན་བུད་མེད་སློབ་གྲྭར་བུད་མེད་ཀྱི་ཀུན་སྤྱོད་སྐོར་བཀའ་སློབ་བསྩལ། ཚེས་ ༡༠ ཉིན་ཧ་རི་ཏཱ་ཇི་མགྲོན་ཁང་དུ་ཇོ་ཌ་པུར་རྒྱལ་པོའི་འཁོར་དང་གྲོས་ཚོགས་འཐུས་མི། གྲོང་ཁྱེར་སྤྱི་ཁྱབ། ས་གནས་བོད་མི་བཅས་ལ་བཀའ་སློབ་བསྩལ། ཚེས་ ༡༨ ཉིན་མུམ་བྷེ་སློབ་ཆེན་དུ་སྲོལ་རྒྱུན་ལེཊ་བཤད་དང་དེང་རབས་སློབ་གསོའི་སྐོར་བཀའ་སློབ་བསྩལ། ཚེས་ ༡༩ ཉིན་གྲོང་ཁྱེར་མུམ་བྷེ་རུ་ཀླད་ཁམས་ཚན་རིག་ཚོགས་ཆེན་ ༡༦ སྟེང་ཚོགས་ཞུགས་གནང་།
ཟླ་གསུམ་པ། ཚེས་ ༡༠ ཉིན་གསུམ་བཅུའི་དུས་དྲན་ཐེངས་ ༥༢ པའི་གསུང་འཕྲིན་བསྩལ། ཚེས་ ༡༤ ཉིན་ཏེ་སྤྱི་འཐུས་གྲོས་ཚོགས་ཚོགས་དུས་ཐེངས་ ༡༡ སྟེང་སྤྱི་འཐུས་ལྷན་ཚོགས་སུ་གསུང་འཕྲིན་བསྩལ་ཏེ། ཁོང་ཉིད་བོད་ཀྱི་ཆབ་སྲིད་འཛིན་སྐྱོང་གི་དབུ་ཁྲིད་ལས་དགོངས་ཞུ་གནང་རྒྱུའི་བཀའ་སློབ་བསྩལ། ཚེས་ ༡༤ ཉིན་བཞུགས་སྒར་དུ་ཐའེ་ལན་ཌིའི་ཆོས་ཞུ་བ་གཙོས་པའི་མི་ ༧༠༠༠ ཙམ་ལ་བཀའ་ཆོས་བསྩལ། ཚེས་ ༢༣ ཉིན་སྨན་རྩིས་ཁང་དབུ་བརྙེས་ཏེ་ལོ་ངོ་ ༥༠ འཁོར་བའི་དུས་དྲན་མཛད་སྒོར་ཕེབས།
ཟླ་བཞི་པ། ཚེས་ ༢ ཉིན་ལྡི་ལིར་ཚོགས་པའི་རྒྱ་གར་སྲིད་འཛིན་ཨར་ཝན་ཀ་ཊ་རཱ་མན་མཆོག་འཁྲུངས་ཏེ། ལོ་ ༡༠༠ འཁོར་པའི་མཛད་སྒོར་ཕེབས། ཚེས་ ༦ ཉིན་ཀང་ར་རྒྱལ་པོའི་འགྲེམས་སྟོན་དབུ་འབྱེད་མཛད་སྒོར་ཕེབས་ཏེ། རྒྱལ་པོའི་སྐུ་འཁོར་ལ་མཇལ་འཕྲད་དང་མང་ཚོགས་ལ་བཀའ་སློབ་བསྩལ། ཚེས་ ༡༣ ཉིན་ཡུ་རོབ་ཨར་ལན་ཌིར་སྐོང་ཚོགས་གནང་བའི་༢༠༡༡ ལོའི་བཅོས་བསྒྱུར་ཀྱི་གོ་སྐབས་ཞེས་པའི་ཚོགས་ཆེན་སྟེང་མཉམ་ཞུགས་གནང་། ཚེས་ ༢༢ ཉིན་བོད་གཞུང་སྲི་ཞུ་བ་ཡོངས་ཀྱིས་༧གོང་ས་མཆོག་ལ་བརྟན་བཞུགས་ཕུལ། ཚེས་ ༢༩ ཉིན་ཉི་ཧོང་ས་ཡོམ་དང་མཚོ་ལྷགས་ཁྲོད་རྐྱེན་འདས་སུ་གྱུར་བ་ཚོར་བསྔོ་སྨོན་དང་ཐུགས་གསོ་གནང་།
ཟླ་ལྔ་བ། ཚེས་ ༣ ཉིན་ལྐོ་ཀེ་ལི་ཕོར་ནི་ཡཱ་གཙུག་ལག་སློབ་ཆེན་དུ། སློབ་ཕྲུག་དང་མང་ཚོགས་ ༥༠༠༠ ཙམ་ལ་འཇིག་རྟེན་གྱི་བཟང་སྤྱོད་དང་འགྲོ་བ་མིའི་ཐོབ་ཐང་ཐོག་བཀའ་སློབ་བསྩལ། ཚེས་ ༧ ཉིན་ཨ་རིའི་མེ་ནི་སོ་ཊ་གཙུག་ལག་སློབ་ཁང་དུ། ས་གནས་བོད་མི་ ༢༠༠༠ ལྷག་ལ་བོད་མིའི་ཆབ་སྲིད་འགན་དབང་རྩིས་སྤྲོད་གནང་ཕྱོགས་ཐོག་བཀའ་སློབ་བསྩལ། ཚེས་ ༢༡ ནས་ ༢༤ ཉིན་བར་བཞུགས་སྒར་དུ་བཅའ་ཁྲིམས་བསྐྱར་བཅོས་དང་༧གོང་ས་མཆོག་གི་སྐུ་དབང་སྐོར་གྱི་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཚོགས།
ཟླ་དྲུག་པ། ཚེས་ ༣ ནས་ ༥ ཉིན་བར་ངྷ་སྟེང་བོད་ཁྱིམ་ཚོགས་ཁང་དུ། མཐོ་སློབ་འགྲིམས་བཞིན་པའི་བོད་རིགས་སློབ་ཕྲུག་དང་གཞོན་སྐྱེས་ ༣༠༠༠ ཙམ་ལ་ནང་ཆོས་ངོ་སྤྲོད་གནང་། ཚེས་ ༦ ཉིན་ནེའུ་ཛི་ལན་ཌིའི་ཁིར་སི་ཆར་ཅི་ (Christchurch) ཞེས་པའི་ས་ཡོམ་རྒྱག་སར་ཕེབས་ཏེ། མི་མང་ ༥༠༠༠ ལ་དཀའ་ངལ་ལ་གདོང་ལེན་བྱ་དགོས་སྐོར་བཀའ་སློབ་བསྩལ། ཚེས་ ༡༠ ཉིན་ཨོ་སི་ཊོ་ལི་ཡའི་མེལ་བྷོན་གྲོང་ཁྱེར་གྱི་བྱིས་པ་ཉམ་ཐག་ཐེབས་རྩ་ (Footscray) རུ་ཕེབས་ཏེ། བདེ་སྐྱིད་ཀྱི་མི་ཚེ་སྐྱེལ་ཐབས་སྐོར་གྱི་བཀའ་སློབ་གནང་སྟེ། ཐེབས་རྩ་དེར་ཨ་སྒོར་ ༡༠༠༠༠ ཞལ་འདེབས་གནང་། ཚེས་ ༡༡ ཉིན་མེལ་བྷོན་གྲོང་ཁྱེར་དུ་མི་མང་ ༣༠༠༠ ལ་སྤྱོད་འཇུག་བཀའ་ཁྲིད་གནང་། ཚེས་ ༡༢ ཉིན་ཡུལ་དེར་གནས་སྡོད་བོད་པ་དང་སོག་པོ། འབྲུག་པ་བཅས་ལ་བཀའ་སློབ་བསྩལ། ཚེས་ ༡༤ ཉིན་ཡུལ་དེའི་ཕྱོགས་འགལ་ཚོགས་པ་དང་རྒྱལ་ཡོངས་ཚོགས་པ། ལྗང་ཁུ་ཚོགས་པ། ཤེས་ཡོན་བློན་ཆེན་བཅས་ལ་མཇལ་འཕྲད་གནང་། ཚེས་ ༢༨ ཉིན་བཞུགས་སྒར་དུ་ཝེ་ཐི་ནམ་གཙོས་པའི་མི་ ༤༠༠༠ བརྒལ་བར་རྟེན་འབྲེལ་བསྟོད་པ་བཀའ་ཁྲིད་གནང་།
ཟླ་བདུན་པ། ཚེས་ ༦ ཉིན་ཨ་རིའི་རྒྱལ་ས་ཝ་ཨིན་ཊོན་དུ་༧གོང་ས་མཆོག་དགུང་གྲངས་ ༧༦ ལ་ཕེབས་པའི་འཁྲུངས་སྐར་སྲུང་གཙི་དང་འབྲེལ། བོད་མི་ ༥༠༠༠ གཙོས་པའི་མི་ ༢༠༠༠༠ ལ་བཀའ་སློབ་བསྩལ། ཚེས་ ༡༣ ནས་ ༡༥ བར་རྒྱལ་ས་ཝ་ཤིན་ཊོན་དུ་རྒྱལ་ཁབ་འདྲ་མིན་ནས་ཕེབས་པའི་ཆོས་ཞུ་བ་ཁྲི་ ༢ ལ་དུས་འཁོར་དབང་ཆེན་ཐེངས་ ༣༡ པ་བསྩལ། ཚེས་ ༡༧ ཉིན་ཆེ་ཁཱ་གྷོ་གྲོང་ཁྱེར་དུ་མི་མང་ ༡༠༠༠༠ བརྒལ་བར་ཆོས་ལུགས་མཐུན་སྒྲིལ་སྐོར་བཀའ་སློབ་བསྩལ།
ཟླ་བརྒྱད་པ། ཚེས་ ༨ ཉིན་བཀའ་ཁྲི་གསར་པའི་ཁྲི་འདོན་ཉིན་མོར་ལོ་རྒྱུས་ཐོག་གི་བོད་མིའི་ཆབ་སྲིད་འགན་དབང་ཆ་ཚང་བཀའ་ཁྲི་བློ་བཟང་སེང་གེ་མཆོག་ལ་རྩིས་སྤྲོད་གནང་། ཚེས་ ༡༣ ཉིན་ཧྥ་རན་སིའི་གྲོས་ཚོགས་འཐུས་མི་ཁག་ལ་མཇལ་འཕྲད་གནང་རྗེས། གྲོང་ཁྱེར་ཐོ་ལོ་སིའི་ནང་མི་མང་ ༩༠༠༠ ལ་སྒོམ་རིམ་བར་མ་བཀའ་ཁྲིད་གནང་། ཚེས་ ༡༥ ཉིན་མི་མང་ ༡༥༠༠༠ ཙམ་ལ་བདེ་སྐྱིད་ཀྱི་འབྱུང་རྩ་སྐོར་གྱི་བཀའ་སློབ་བསྩལ། ཚེས་ ༢༡ ཉིན་འཇར་མན་གྲོང་ཁྱེར་ཧམ་བྷག་ཏུ་ཆིབས་བསྒྱུར་བསྐྱངས་ཏེ། རྒྱལ་སྤྱིའི་མཁས་པའི་ལྷན་ཚོགས་ཐོག་ཆིབས་བསྒྱུར་གནང་། ཚེས་ ༢༣ ཉིན་ཧ་སེ་མངའ་སྡེའི་གྲོས་ཚོགས་སུ་ཕེབས་ཏེ་བོད་དོན་ཐོག་བཀའ་སློབ་དང་གྲོས་ཚོགས་འཐུས་མི་ ༢༠ ལ་མཇལ་འཕྲད་གནང་། ཕྱི་དྲོ་གྲོང་ཁྱེར་ཨེ་སུ་ཕོ་ཞེས་པའི་བྷ་རོ་ཎ་ཚོགས་ཁང་དུ། མི་མང་ ༧༠༠༠ ཙམ་ལ་བྱམས་བརྩེའི་ནུས་སྟོབས་ཞེས་པའི་བརྗོད་གཞིའི་ཐོག་བཀའ་སློབ་བསྩལ། ཚེས་ ༢༤ ཉིན་ཨིན་ངྷ་རཱ་གྷན་ངྡི་གཙུག་ལག་སློབ་ཆེན་གྱི་འབུམ་རམས་པའི་ལག་འཁྱེར་བཞེས།
ཟླ་དགུ་བ། ཚེས་ ༧ ཉིན་ཁེ་ན་ཌའི་མོན་ཁྲི་རིལ་ཧྥི་ལཱ་སེ་ཌེ་སི་ཀོ་རེ་ཚོགས་ཁང་དུ། ཁུལ་དེའི་མི་མང་སྟོང་ཕྲག་ལྷག་ལ་བཟང་སྤྱོད་ཐོག་བཀའ་སློབ་བསྩལ། ཚེས་ ༩ ཉིན་མེག་སི་ཁོའི་སྲིད་འཛིན་དང་སྲིད་འཛིན་ཟུར་པ་ཝེ་སེན་ཊ་པོ་སིེ་གཉིས་ལ་མཇལ་འཕྲད་དང་། རྒྱལ་ཁབ་དང་ས་གནས་འདྲ་མིན་གྱི་གསར་འགོད་པ་ ༤༠༠ ཙམ་ལ་བོད་ནང་གི་གནས་སྟངས་སྐོར་ངོ་སྤྲོད་གནང་། ཚེས་ ༡༡ ཉིན་རྒྱལ་སའི་རྩེད་ཐང་ཆེན་མོར་མི་མང་སུམ་ཁྲི་ཙམ་ལ་རྙོག་འཛིང་གི་སྐབས་སུ་བདེ་སྐྱིད་འཚོལ་བ་ཞེས་པའི་བཀའ་སློབ་བསྩལ། ཚེས་ ༡༣ ཉིན་ཨར་ཅིན་ཊེ་ནར་ཕེབས་ཏེ། ཡུལ་དེའི་གྲོས་ཚོགས་འཐུས་མི་ཚོར་མཇལ་འཕྲད་དང་། མི་མང་ ༢༠༠༠ ཙམ་ལ་གཞོན་སྐྱེས་ཚོར་སློབ་གསོ་སྤྲད་དེ་འཛམ་གླིང་བཟང་དུ་གཏོང་ཐབས་ཞེས་པའི་བཀའ་སློབ་བསྩལ། ཚེས་ ༡༦ ཉིན་བྷར་ཛིལ་དུ་ཕེབས་ཏེ། ཡུལ་དེའི་བཟོ་ཚོང་སྡེ་ཁག་གི་མགོ་ཁྲིད་ཚོར་མཇལ་འཕྲད་དང་མང་ཚོགས་ལ་བཀའ་སློབ་བསྩལ། ཚེས་ ༢༢ ཉིན་གཞུགས་སྒར་དུ་ཚོགས་པའི་བོད་བརྒྱུད་ནང་བསྟན་ཆོས་བརྒྱུད་ཆེན་མོ་བཞི་དང་གཡུང་དྲུང་བོན་གྱི་ཚོགས་ཆེན་ཐེངས་ ༡༡ སྟེང་ཕེབས་ཏེ། རྒྱལ་བའི་ཡང་སྲིད་ཕེབས་ཕྱོགས་ཐོག་བཀའ་སློབ་བསྩལ།
ཟླ་བཅུ་པ། ཚེས་ ༡ ཉིན་བཞུགས་སྒར་དུ་ཐེ་ཝན་གཙོས་པའི་ཆོས་ཞུ་བ་ ༦༠༠༠ ཙམ་ལ་ཆོས་དབྱིངས་བསྟོད་པ་བཀའ་ཁྲིད་གནང་། ཚེས་ ༡༩ ཉིན་གོང་ས་མཆོག་དབུ་བཞུགས་ཐོག་ངྷ་སའི་སེར་སྐྱ་མང་ཚོགས་ ༥༠༠༠ གིས་བོད་ནང་རང་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་པ་ཚོར་ཟས་བཅད་སྨྱུང་གནས་གནང་། ཚེས་ ༢༣ ཉིན་བཞུགས་སྒར་དུ་ཀོ་རི་ཡ་གཙོས་པའི་མི་ ༤༣༣༦ ཙམ་ལ་ལམ་རིམ་ཆེན་མོ་བཀའ་ཁྲིད་གནང་།
ཟླ་བཅུ་གཅིག ཚེས་ ༡ ཉིན་ནས་བདུན་ཕྲག་གཅིག་རིང་ཉི་ཧོང་ས་ཡོམ་རྒྱག་ཡུལ་ (Sendai) དང་ (Osaka) བཅས་སུ་ཕེབས་ཏེ་མང་ཚོགས་ལ་ཐུགས་གསོ་དང་། ཉི་ཧོང་ཚན་རིག་པའི་བར་བགྲོ་གླེང་། གཞུང་འཛིན་ཚོགས་པ་དང་ཁ་གཏད་ཚོགས་པའི་ཚོགས་མི་ཁག་ཅིག་ལ་མཇལ་འཕྲད་གནང་། ཚེས་ ༣༠ ཉིན་ལྡི་ལིར་ཚོགས་པའི་འཛམ་གླིང་ནང་པའི་ཚོགས་ཆེན་སྟངས་ཕེབས་ཏེ། རྒྱལ་ཁབ་ ༤༢ ཙམ་གྱི་ཚོགས་ཞུགས་པ་ ༨༠༠ བརྒལ་བར་བཀའ་སློབ་བསྩལ།
ཟླ་བཅུ་གཉིས། ཚེས་ ༡ ཉིན་ནུབ་བྷང་གྷིལ་རྒྱལ་ས་ཀ་ལི་ཀ་ཏར་ཡེ་ཤུའི་བཙུན་མ་ཁྲེ་རེ་སཱ་སྐུ་འཁྲུངས་ཏེ། ལོ་ ༡༠༠ འཁོར་བའི་དུས་དྲན་མཛད་སྒོར་ཕེབས། ཚེས་ ༢ ཉིན་ལྡི་ལི་ཌི་ཡཱ་མོ་ཊེ་ཐེབས་རྩ་ཁང་གིས་འདི་ལོའི་ཐེབས་རྩ་ཁང་དེའི་གཟེངས་རྟགས་༧གོང་ས་མཆོག་ལ་ཕུལ། ཕྱི་ཚེས་ ༣ ཉིན་ལྡི་ལི་ (Shiksha Kendra) ཤེས་ཡོན་བསྟི་གནས་ཁང་དུ་ཕེབས་ཏེ། སློབ་གྲྭའི་དགེ་སློབ་ཚོར་བཀའ་སློབ་གནང་སྟེ། ཧིན་སྒོར་འབུམ་ ༥ ཞལ་འདེབས་གནང་། ཚེས་ ༤ ཉིན་ལྷོ་ཕྱོགས་རྒྱུད་སྨད་གྲྭ་ཚང་དུ་བོད་ནས་ཕེབས་པའི་ཆོས་ཞུ་བ་གཙོས་པའི་མི་ ༡༠༠༠༠ ཙམ་ལ་གསང་འདུས་ཀྱི་འགྲེལ་བ་བཀའ་ཁྲིད་གནང་། ཚེས་ ༡༡ ནས་ ༡༣ བར་ཅེག་སྤྱི་མཐུན་རྒྱལ་ཁབ་ཏུ་ཕེབས་ཏེ། ཡུལ་དེའི་སྲིད་འཛིན་ཟུར་བ་དང་ཕྱི་སྲིད་བློན་གཉིས་ལ་མཇལ་འཕྲད་དང་། ཨེ་ཤ་ཡའི་འགྲོ་བ་མིའི་ཐོབ་ཐང་ཚོགས་འདུར་མཉམ་ཞུགས་དང་མང་ཚོགས་གཏམ་བཤད་གནང་། ཚེས་ ༡༩ ནས་ ༢༡ བར་བཞུགས་སྒར་དུ་ཨུ་རུ་སུའི་ནང་པའི་དད་ལྡན་པ་ ༢༠༠༠ ལ་བཀའ་ཆོས་གསུངས།
གསར་འགོད་པ། དཔལ་ལྡན།
༼བོད་ཀྱི་དུས་བབ་ཚགས་པར་ལས་འདིར་བཀོད༽
རབ་འབྱམས་རྒྱལ་བ་ཀུན་གྱི་མཛད་པའི་འཁུར།།
སྙིང་སྟོབས་ཕྲག་པར་བཟུང་བའི་རླབས་ཆེན་གྱི།།
འཕྲིན་ལས་ཀུན་ཕན་ནམ་མཁའི་སྙིང་པོ་ཅན།།
བཞེད་པ་ཇི་བཞིན་ལྷུན་གྱིས་འགྲུབ་འགྱུར་ཅིག། ཅེས་༸ རྒྱལ་བའི་ཡོངས་འཛིན་ཟུང་གིས་གསུངས།
མཛད་པ་ཀུན་ལས་གསུང་གི་ནི།།
མཛད་པ་མཆོག་ཡིན་དེ་ཡང་ནི།།
དེ་ཉིད་ཡིན་ཕྱིར་མཁས་པ་ཡིས།།
འདི་ལས་སངས་རྒྱས་རྗེས་དྲན་བྱོས།། ཞེས་རྗེ་ཙོང་ཁ་པས་གསུངས།།
རྗེ་བཙུན་འཇམ་དཔལ་ངག་གི་དབང་པོའི་སྐུ།།
སྙིང་རྗེའི་གཏེར་ཆེན་བློ་གྲོས་བཟང་པོའི་གསུང་།།
ཡེ་ཤེས་མཐུ་སྟོབས་གསང་བའི་བདག་པོའི་ཐུགས།།
༸ རྒྱལ་བའི་དབང་པོ་བསྟན་འཛིན་རྒྱ་མཚོའི་སྡེ།།
ཡོངས་རྫོགས་བསྟན་པའི་བདག་པོར་ཞབས་བརྟན་གསོལ།། ཞེས་སྔ་འགྱུར་རྙིང་མའི་སྐྱབས་རྗེ་འཁྲུལ་ཞིག་རིན་པོ་ཆེས་གསུངས།
ཨོ་སྀ་ཁྲི་ལི་ཡའི་གྲོང་ཁྱེར་མེ་བྷོན་ནང་གིབྱིས་པ་ཉམ་ཐག་ཐེབ་རྩ་ཁང་ལ་ཨ་སྒོར་འབུམ་གཅིག་གནང་ཡོད་བསམ་བྱུང།
༢༠༡༢་ལོ་ལ་དེ་བས་ཁྱེད་ཀྱི་མཛད་འཕྲིན་ཡར་ངོའི་ཟླ་ལྟར་རྒྱས་བ་སྨོན།