༢༠༡༡ ལོའི་བཙན་བྱོལ་ནང་གི་གནས་ཚུལ་ཕྱོགས་བསྡུས།

༢༠༡༡ ལོའི་བཙན་བོད་མིའི་སྤྱི་ཚོགས་ནང་གི་གལ་ཆེའི་གནས་ཚུལ་ཆེ་ཁག་དག་ཕྱོགས་བསྡུས།

ཟླ་དང་པོ། ཕྱི་ཚེས་ ༦ ནས་ ༡༠ བར་ས་རཱ་མཐོ་སློབ་ཏུ་རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་ལྔ་པ་དེ་ཚོགས་ཡོད་ཅིང་། ཚོགས་ཆེན་ཐོག་བཀའ་ཁྲི་ཟམ་གདོང་རིན་པོ་ཆེ་དང་རྒྱལ་བ་ཀརྨ་པ། སྤྱི་འཐུས་ཚོགས་གཞོན་རྒྱ་རི་སྒྲོལ་བ་བཅས་ཀྱིས་མཐོ་སློབ་ཁག་ ༢༤ ནས་ཕེབས་པའི་སློབ་མ་ ༨༢ ཙམ་ལ་གཏམ་བཤད་གནང་། ཚེས་ ༡༩ ཉིན་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། དབུས་འོས་བསྡུ་ལྷན་ཁང་གིས་སྐབས་གསུམ་པའི་བཀའ་བློན་ཁྲི་པ་དང་། སྐབས་བཅོ་ལྔ་པའི་བོད་མི་མང་སྤྱི་འཐུས་ཀྱི་དངོས་གཞིའི་འོས་མི་གསལ་བསྒྲགས་གནང་། ཚེས་ ༢༩ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་གསར་འགོད་ལྷན་ཚོགས་ཤིག་བསྐྱངས་ཏེ་རྒྱལ་བ་ཀརྨ་པའི་བླ་བྲང་ལ་དངུལ་གྱི་དོན་རྐྱེན་བྱུང་བར་གསལ་བཤད་བྱས།

 ཟླ་གཉིས་པ། རྡེ་ར་རྡུན་བོད་མིའི་གཞིས་སྒར་ནས་ཡིན་པའི་ལྷ་རྒྱ་རི་ཁྲི་ཆེན་རྣམ་རྒྱལ་རྒྱ་མཚོ་མཆོག་གི་བུ་མོ་རྣམ་རྒྱལ་སྒྲོལ་དཀར་ལགས་སུ་ཁྲིམས་ཐོག་ནས་རྒྱ་གར་མི་སེར་ལག་ཁྱེར་ཐོག་མ་ཐོབ། རྒྱལ་བ་ཀརྨ་པའི་བླ་བྲང་ལ་དངུལ་གྱི་དོན་རྐྱེན་བྱུང་བ་དེའི་ཐོག་ནས། ཚེས་ ༡༥ ཉིན་རྒྱུད་སྟོད་དགོན་པའི་ས་ཆའི་བདག་དབང་ཧི་མ་ཅལ་མངའ་སྡེ་གཞུང་གིས་རྩིས་ལེན་བྱས། ཚེས་ ༢༢ ཉིན་སྟག་འཚེར་རིན་པོ་ཆེའི་སྲས་འཇིགས་མེད་ནོར་བུའི་ནང་མིས་གསལ་བསྒྲགས་ཤིག་སྤེལ་ཏེ། ཕ་ཤུལ་བུ་འཛིན་དང་བུ་ཤུལ་ཚ་བོས་བཟུང་སྟེ། བོད་རང་བཙན་གྱི་གོམ་བགྲོད་མཇུག་བསྐྱང་རྒྱུའི་དམ་བཅའ་བཞག 

 ཟླ་གསུམ་པ། ཚེས་ ༡༦ ཉིན་བོད་གཞུང་ཟློས་གར་ཚོགས་ཁང་དུ་སྤྱི་འཐུས་འོས་མི་ ༡༢ ཙམ་གྱིས་སྐབས་བཅོ་ལྔ་པའི་སྤྱི་འཐུས་བགྲོ་གླེང་ཞེས་པའི་བརྗོད་གཞིའི་སྟེང་གཏམ་བཤད་སྤེལ། ཚེས་ ༢༤ ཉིན་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གྲོས་ཚོགས་ཚོགས་དུས་ཉིན་བཅུ་གཅིིག་པའི་ཉིན་བཅུ་བའི་སྟེང་། སྐབས་བཅུ་གཉིས་དང་བཅུ་གསུམ་གྱི་བཀའ་ཤག་གིས་མཐའ་མའི་གསལ་བཤད་གནང་།

 ཟླ་བཞི་པ། ཚེས་ ༤ ཉིན་གངས་སྐྱིད་སྤྱི་ཐབ་ཚོགས་ཁང་དུ། བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་ཐེངས་ལྔ་པ་ཚོགས། ཚེས་ ༢༥ ཉིན་དབུས་བོད་ཀྱི་གཞོན་ལྷན་ཚོགས་གཞོན་གཙོས་རྒྱུན་ལས་གསུམ་གྱིས་ལྡི་ལིར་རྔ་པ་ཀིརྟི་དགོན་པའི་གནས་སྟངས་ཆེད་དུས་ཡུན་ངེས་མེད་ཀྱི་ཟས་བཅད་ངོ་རྒོལ་བྱས། ཚེས་ ༢༦ ཉིན་ཀིརྟི་དགོན་པའི་དགེ་འདུན་པ་ ༡༠༠ ཙམ་གྱིས་རྔ་པ་ཀིརྟི་དགོན་པའི་གནས་སྟངས་ཆེད་ངྷ་ས་ནས་ལྡི་ལི་བར་ཞི་བའི་གོམ་བགྲོད་བྱས། ཚེས་ ༢༧ ཉིན་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་དབུས་འོས་བསྡུ་ལྷན་ཁང་གིས་སྐབས་གསུམ་པའི་བཀའ་བློན་ཁྲི་པ་དང་། སྐབས་བཅོ་ལྔ་པའི་བོད་མི་མང་སྤྱི་འཐུས་ཀྱི་དངོས་གཞིའི་གྲུབ་འབྲས་གསལ་བསྒྲགས་བསྐྱངས་ཤིང་། བཀའ་ཁྲི་བློ་བཟང་སེང་གེ་མཆོག་ལ་འོས་ཤོག་ ༢༧༠༥༡ ཐོབ།

 ཟླ་ལྔ་པ། ཚེས་ ༢ ཉིན་རྒྱ་གར་རྒྱལ་ཡོངས་ས་གནས་ཁག་ ༥༠ ནང་དགེ་འདུན་པ་ ༢༠༠༠༠ ལྷག་གིས་ཉིན་བརྒྱ་དུས་གཅིག་ལ་ཞི་བའི་གོམ་བགྲོད་གནང་། ཚེས་ ༦ ཉིན་གངས་སྐྱིད་སྤྱི་ཐབ་ཚོགས་ཁང་དུ་བོད་ཀྱི་རྩོད་རྙོག་འདུམ་འགྲིག་ལྟེ་གནས་ཁང་དབུ་བརྙེས་ཏེ་ལོ་ ༡༠ འཁོར་བའི་དུས་དྲན་སྲུང་གཙི་བྱས། ཚེས་ ༥ ཉིན་བོད་གཞུང་ཟློས་གར་ཚོགས་རར་ ༢༠༡༡ ལོའི་བོད་ཀྱི་མཛངས་མའི་མཐའ་མའི་རྟིང་རྩོད་འགྲན་བསྡུར་བྱས་ཏེ། སུད་སི་ནས་ཡིན་པའི་བུ་མོ་བསྟན་འཛིན་དབྱངས་སྐྱིད་ལགས་སུ་ཨང་དང་པོ་ཐོབ། ཚེས་ ༢༤ ཉིན་བོད་གཞུང་མང་རྒྱལ་ཡོངས་ཚོགས་ཆེན་གཉིས་པ་དེ་བཞུགས་སྒར་ངྷ་སར་ཚོགས། ཚེས་ ༢༥ ཉིན་སྦེམ་ཇམ་བོད་རིགས་སྤྱི་མཐུན་ཚོགས་པས་བཀའ་ཟུར་ཟམ་གདོང་རིན་པོ་ཆེར་ཆེ་བསྟོད་གཟེངས་རྟགས་ཕུལ།

 ཟླ་དྲུག་པ། ཚེས་ ༢ ཉིན་སྨན་རྩིས་ཁང་དུ་སྨན་རྩིས་མཐོ་སློབ་དབུ་བརྙེས་ཏེ་ལོ་ ༥༠ འཁོར་བའི་དུས་དྲན་སྲུང་གཙི་བྱས་ཏེ། རྒྱལ་བ་ཀརྨ་པས་མཛད་སྒོའི་གསུང་བཤད་གནང་། ཚེས་ ༨ ཉིན་རྒྱ་གར་ལྷོ་ཕྱོགས་ཚོགས་པ་ཁག་ལྔ་ཙམ་གྱིས་ཚོགས་མི་བཅོ་ལྔ་ཙམ་གྱིས་རྐང་འཁོར་ཞོན་ཏེ་མོན་གྷོ་ས་གནས་ནས་གྲོང་ཁྱེར་པུ་ཎ་བར་ཞི་བའི་གོམ་བགྲོད་གནང་། 

 ཟླ་བདུན་པ། ཕྱི་ཚེས་ ༣ ཉིན་གངས་སྐྱིད་སྤྱི་ཐབ་ཚོགས་ཁང་དུ། འོད་དཀར་དྲ་ཚིགས་ཀྱི་སྐབས་དང་པོའི་བོད་ཀྱི་སྙན་ངག་སྒྲོག་སྦྱངས་བྱས། ཚེས་ ༡༧ ཉིན་གངས་སྐྱིད་དཔེ་མཛོད་ནང་། བོད་སྐད་ཡིག་གི་ད་ལྟའི་གནས་བབ་དང་འབྱུང་འགྱུར་འཕེལ་ཕྱོགས་གླེང་བ་ཞེས་པའི་བགྲོ་གླེང་ཚོགས་འདུ་ཞིག་ཚོགས། ཚེས་ ༢༢ ཉིན་ངྷ་ས་ཁུལ་གྱི་བོད་མིའི་ཁྲོམ་སར་དཀའ་ངལ་འཕྲད་སྐབས། ནང་སྲིད་ལས་ཁུངས་དང་སྤྱི་འཐུས་རྒྱུན་ལས་ཁག་ཅིག་ཀང་རཱ་རྫོང་དཔོན་རིགས་ཚོར་འབྲེལ་གཏུག་གིས་བོད་མིའི་ཁྲོམ་ས་ ༡༢༩ ཙམ་གྱི་དཀའ་ངལ་སེལ། ཨ་རུ་ཎ་ཅལ་བསྟན་འཛིན་སྒང་གཞིས་ཆགས་བུ་མོ་རིག་འཛིན་དང་སྐྱེས་དམན་ཡོད་པའི་ཁྱོ་ག་ཞིག་གི་བར་ལུས་འབྲེལ་བྱུང་སྟབས། ཁྱོ་གའི་གཉེན་ཉེ་ཁག་ཅིག་གིས་བུ་མོ་རིག་འཛིན་གྱི་སྐྲ་བཅད་པ་དང་། སྣ་ལ་ཇེམ་ཙེ་བརྒྱབ་པ། ལུས་པོ་དམར་རྗེན་དུ་ཁྲོམ་སྐོར་བྱས།

 ཟླ་བརྒྱད་པ། ཚེས་ ༥ ཉིན་སུ་ཇཱ་བོད་ཁྱིམ་སློབ་གྲྭའི་སློབ་མ་མཁྱེན་རབ་ཞུ་བ་ཞིག་གིས་སློབ་གྲྭའི་ཉེ་འཁོར་དུ་ཐ་མག་འཐེན་བཞིན་པ་རྒན་བདག་གིས་ཤེས་ཏེ་ཉེས་རྡུང་བཏང་སྟབས། མཁྱེན་རབ་ལགས་དྲན་པ་འཐོར་ཏེ་འདས་གྲོངས་སུ་ཕྱིན། ཚེས་ ༨ ཉིན་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ་བོད་གཞུང་མང་ཚོགས་ཆེན་སྟེང་བཀའ་བློན་ཁྲི་པའི་ལས་འཁུར་དམ་བཅའ་འབུལ་བཞེས་མཛད། ཟླ་འདིའི་ནང་ངྷ་ས་ཚེ་མཆོག་གླིང་དགོན་པའི་ཕྱག་མཛོད་དང་གྲྭ་མང་བར་རྩོད་རྙོག་ཅིག་བྱུང་སྟེ། གྲྭ་བ་ ༦ ཉེན་རྟོག་པས་འཛིན་བཟུང་དང་གྲྭ་བ་ ༢༩ དགོན་པ་ནས་རྩ་དགོངས་བཏང་། བོད་མིའི་སྒྲིག་འཛུགས་ཀྱི་བཀའ་ཤག་སྐབས་བཅུ་གསུམ་པས་ནང་སྲིད་དྲུང་ཆེ་དངོས་གྲུབ་རྡོ་རྗེ་ལགས་སྦར་ཛིལ་སྐུ་ཚབ་དོན་གཅོད་དུ་བསྐོ་བཞག་གནང་། ཟླ་འདིའི་ནང་ཁ་ན་ཌའི་གཞུང་གི་ལས་བྱེད་ཅིག་དང་ཡུལ་དེའི་བོད་རིགས་སྤྱི་མཐུན་ཚོགས་པའི་ལས་བྱེད་གཉིས་ཨ་རུ་ཎ་ཅལ་དུ་ཕྱིན་སྟེ། འཆར་ལོའི་ཟླ་དང་པོའི་ནང་གཞིས་ཆགས་དེའི་ཁྱིམ་ཚང་ཚུད་པའི་བོད་མི་ ༡༠༠༠ ཁ་ན་ཌར་འཐེན་རྒྱུའི་ཐག་གཅོད་བྱས། ཚེས་ ༣༡ ཉིན་བཀའ་བློན་ཁྲི་ཟུར་འཇུ་ཆེན་ཐུབ་བསྟན་རྣམ་རྒྱལ་མཆོག་སྙིང་ནད་དང་ཁྲག་ཤེད་ནད་གཞིའི་རྐྱེན་པས་སྐུ་གྲོངས།

 ཟླ་དགུ་པ། ཚེས་ ༡༨ ཉིན་རྒྱ་གར་འབྲས་ལྗོངས་དང་བལ་བོད་ཀྱི་ས་གནས་ཁག་ཅིག་ལ་ས་ཡོམ་རིམ་པ་ ༦།༨ ཅན་ཞིག་བརྒྱབ་སྟེ་བོད་མི་ཚུད་པའི་མི་ ༡༠༠ འདས་གྲོངས་སུ་ཕྱིན། ཚེས་ ༢ ཉིན་སྐྱབས་རྗེ་འཁྲུལ་ཞིག་རིན་པོ་ཆེ་སྐུ་གཤེགས། ཚེས་ ༢ ཉིན་བཞུགས་སྒར་དུ་བོད་གཞུང་མང་གཉིས་ཀྱི་མང་གཙོ་དུས་དྲན་སྲུང་གཙི་བྱས། ཚེས་ ༢༩ ཉིན་བཀའ་དྲུང་ཡིག་ཚང་གིས་གསལ་བསྒྲགས་བསྐྱངས་ཏེ། བདམས་ཐོན་བྱུང་བའི་བཀའ་བློན་རྣམས་ལྷན་ཁང་ཁག་ཏུ་ལས་བགོས་བྱས། ཚེས་ ༢༢ ཉིན་ངྷ་སའི་སི་ར་ཡཱ་མགྲོན་ཁང་དུ། ཆོས་བརྒྱུད་ཆེན་པོ་བཞི་དང་གཡུང་དྲུང་བོན་གྱི་ཚོགས་ཆེན་ཐེངས་ ༡༡ ཚོགས། ཚེས་ ༢༨ ཉིན་གྲོས་ཚོགས་ཚོགས་དུས་བཅུ་གཅིག་པའི་སྐབས། མདོ་སྨད་སྤྱི་འཐུས་རྒྱལ་རོང་ཟླ་བ་ཚེ་རིང་སྙིང་ནད་དང་ཁྲག་ཤེད་ཀྱིས་གློ་བུར་དུ་སྐུ་གྲོངས།

 ཟླ་བཅུ་པ། ཚེས་ ༧ ཉིན་གངས་སྐྱིད་རྩེད་ཐང་དུ་བོད་ཀྱི་གཞོན་ནུ་ལྷན་ཚོགས་དབུ་བརྙེས་ཏེ་ལོ་ ༤༢ འཁོར་བའི་དུས་དྲན་སྲུང་གཙི་བྱས། ཚེས་ ༢༦ ཉིན་ངྷ་སྟེང་བོད་ཁྱིམ་རྩེད་ཐང་དུ་སྒྱུ་རྩལ་པ་བསྟན་འཛིན་རིག་གྲོལ་ལགས་ཀྱིས་བོད་ནས་དབོར་འདྲེན་བྱས་པའི་ས་སྤྱི་རྒྱ་ཁྲི་ ༢ འགྲེམས་སྟོན་བྱས། ཚེས་ ༡༩ ཉིན་རྒྱལ་ས་ལྡི་ལིར་བཀའ་སྤྱི་གཉིས་ཀྱི་དབུ་ཁྲིད་པའི་བོད་མི་ ༣༥༠༠ ཙམ་གྱིས་བོད་ནང་རང་ལུས་མེར་བསྲེགས་གཏོང་བཞིན་པའི་བོད་མི་ཚོར་གདུང་སེམས་མཉམ་སྐྱེད་མཚོན་ཆེད་ཞི་བའི་གོམ་བགྲོད་བྱས། ཧྥ་རན་སིའི་སྟོབས་ཆེན་རྒྱལ་ཁབ་ ༢༠ ཚོགས་འདིའི་སྐབས་བོད་པ་གཙོས་ཡུ་གུར་དང་རྒྱ་ནག་མང་གཙོ་དོན་གཉེར་བརྒྱ་ཕྲག་དུ་མས་རྒྱ་ནག་སྲིད་འཛིན་ཧུའུ་ལ་ངོ་རྒོལ་བྱས། རྒྱལ་ཚོགས་འགྲོ་བ་མིའི་ཐོབ་ཐང་ཉིན་མོ་དང་སྟབས་བསྟུན་ཏེ་སུད་སི་དང་ཨ་རི་བཅས་སུ་བོད་མིའི་གཞི་རྒྱ་ཆེ་བའི་ངོ་རྒོལ་ལས་འགུལ་སྤེལ། 

 ཟླ་བཅུ་གཅིག ཚེས་ ༡༣ ཉིན་བོད་གཞུང་ཟློས་གར་ཚོགས་ཁང་དུ་འོད་དཀར་དྲ་ཚིགས་ཀྱི་སྙན་ངག་སྒྲོག་སྦྱང་འགྲན་བསྡུར་གྱི་མཐའ་མའི་རྟིང་རྩོད་འགྲན་བསྡུར་བྱས་ཏེ། ཨང་དང་པོར་ཧིན་སྒོར་ཁྲི་ ༦ གསོལ་རས་གནང་། ཚེས་ ༡༤ ཉིན་བོད་ཀྱི་གཞོན་ནུ་ལྷན་ཚོགས་ཀྱི་གསལ་བསྒྲགས་ཤིག་སྤེལ་ཏེ། བོད་ཕྱི་ནང་གི་བོད་མི་ཚོས་བོད་ཆུ་འབྲུག་ལོའི་ལོ་གསར་མི་གཏོང་བའི་འབོད་སྐུལ་ཞུས།

 ཟླ་བཅུ་གཉིས། ཚེས་ ༡༠ ཉིན་ངྷ་སར་བོད་གཞུང་མང་གཉིས་ཀྱིས་༧གོང་ས་མཆོག་ནོ་བྷེལ་ཞི་བདེ་གཟེངས་རྟགས་ཐོབ་སྟེ་མི་ལོ་ ༢༢ འཁོར་བའི་དུས་དྲན་སྲུང་གཙི་བྱས།