འབྲུག་ཐར་རྒྱལ། གོ་པལ་པུར་བོད་ཁྱིམ།
མི་ལོ་ལྔ་བཅུའི་ཡར་སྔོན་དུ་གངས་རིའི་མགོན་པོས་ཕ་ས་ཕ་ཡུལ་བཞག་སྟེ་ཀྱག་ཀྱོག་དང་གཡང་གཟར་ཆེ་བའི་ལམ་ལ་ཆས། ལ་ལུང་རི་ཆུ་ནགས་གསུམ་བརྒལ་ཏེ་མི་ཡུལ་དུ་ཞབས་སོར་འཁོད། འདི་ནི་ཁོང་ལྟ་བུ་ཞིག་ལ་མཚོན་ན་རང་ཡུལ་ནས་གཞན་ཡུལ་དུ་ཕེབས་པ་དང་། ས་མཐའ་ནས་འགྲུལ་བཞུད་རིང་མོ་འདིའི་དབུ་འཁྱུད་བྲིས། དེ་ཡང་འགྲུལ་བཞུད་རིང་མོ་འདི་དང་ལེན་དང་གཞན་ཡུལ་པང་དུ་མི་ལེན་ཀ་མེད་བྱུང་། དེ་བས་འགྲུལ་བཞུད་ཀྱི་བརྒྱུད་རིམ་ཁྲོད་ཁོང་སླར་ཡང་ཕ་ཡུལ་ལ་ཕྱིར་ཕེབས་ཏེ་པོ་ཏ་ལའི་མདུན་ཐང་ཆེན་མོར་གཞིས་བྱེས་ལྷན་འཛོམས་གྱི་རེ་སྒུག་བྱེད་བཞིན་མཆིས། ཡུན་རིང་རེ་ཞིང་སྒུག་པའི་གངས་ཅན་པ་དང་གངས་རིའི་མགོན་པོས་རེ་སྨོན་དང་རྨི་ལམ་འདི་ད་དུང་ཡང་རབ་རིབ་ངང་ལུས། མཆི་མ་དང་ཟུངས་ཁྲག་དབར་ནས་སྒུག་གིན་པའི་རྨི་ལམ་འདིི་མངོན་འགྱུར་ཡོང་བར་ཁ་ཐག་ཅི་ཙམ་རིང་ངམ།
འདས་པའི་ལོ་ངོ་བཅུ་ཕྲག་ལྔ་ལྷག་རིང་གཞིས་ལུས་རྒྱ་ཆེའི་མི་མང་གིས་གངས་རིའི་མགོན་པོ་དང་ས་མཐའི་སྤུན་ཟླ་རྣམས་ལ་རེ་སྒུག་ཟབ་ཅིང་། ལོ་ཟླའི་འགྱུར་ཁུགས་ཁྲོད་ནས་རང་དབང་དང་བདེན་དོན་ཆེད་གཅེས་པའི་ལུས་སྲོག་ཀྱང་ བློས་བཏང་ཏེ་གཅིག་རྗེས་གཉིས་མཐུད་ངང་རང་ལུས་མེ་རུ་བསྒྲོན། འོན་ཀྱང་ཕ་ས་ཕ་ཡུལ་ན་ད་དུང་འགྲོ་འདུག་རང་དབང་དང་། སྨྲ་བརྗོད་རང་དབང་། ཆོས་དད་རང་དབང་སོགས་མེད་པ་མ་ཟད་གཞི་རྩའི་འགྲོ་བ་མིའི་ཐོབ་ཐང་ལ་ཡང་གུས་བརྩི་མི་ཞུ་བར་ཉིན་རེ་ནས་ཟླ་རེ། ཟླ་རེ་ནས་ལོ་རེ། ལོ་ནས་ལོ་བསྟུད་དེ་དྲག་གནོན་བྱས་རྐྱེན་ནང་སེམས་ལ་བཟོད་མེད་ཀྱི་རྨ་ཁ་ཆེས་ཆེར་བཟོས་བས་མཐར་འུ་ཐུག་ཐབས་ཟད་ཀྱི་གནས་སུ་ལྷུང་དུས་ཡོད་ཚད་བློས་གཏོང་གི་ ལས་འགུལ་འདི་ཡང་མི་སྤེལ་ཀ་མེད་ཆགས་ཀྱིན་ཡོད་པ་རེད།
ཨ་རབ་དཔྱིད་ཀྱི་གསར་བརྗེ་ཞེས་ཨ་རབ་ཀྱི་རྒྱལ་ཁབ་མང་དག་ཅིག་སྲིད་དབང་སྒེར་སྤྱོད་པ་དང་། དམག་མིའི་སྟོབས་ཤུགས། སྐུ་དྲག་དང་བླ་དཔོན་འོག་ཏུ་ལོ་ངོ་བཅུ་ཕྲག་མང་པོའི་རིང་གཉའ་གནོན་འོག་ཏུ་བསྡད་པའི་རྒྱལ་ཁབ་མང་དག་ཅིག་རེད། ཊོའུ་ནེ་ཤི་ཡའི་ཉམ་ཆུང་ཚོང་པ་གཅིག་གིས་རང་ལུས་མེར་བསྒྲོན་སྟེ་ངོ་རྒོལ་བྱས། དེས་རིམ་གྱིས་གསར་བརྗེའི་མེ་ལྕེ་ཨ་རབ་ས་ཕྱོགས་མང་པོར་ཁྱབ་པ་ལྟར་རྒྱལ་སྤྱིའི་དཔའ་བོ་བཀྲ་བྷེས་རང་ལུས་མེ་བསྲེགས་བཏང་བ་ནས་བཟུང་ད་བར་དུ་མེ་ལྕེ་སྔར་བས་ཇེ་ཆེ་ནས་ཇེ་ཆེར་མཆེད་བཞིན་གནམ་ས་འགུལ་ཀྱིན་འདུག་ལ། མེ་ལྕེ་དྲག་ཏུ་འབར་ཐེངས་རེར་མེ་མདའ་དང་དབྱུག་པས་གསད་ཐབས་དང་སྒྲིབ་ནག་འབར་འཛིན་བྱ་ཐབས་ཡང་བྱེད་ཀྱིན་འདུག ཨ་རབ་དཔྱིད་ཀྱི་གསར་བརྗེ་བྱུང་སྟེ་ལོ་ངོ་གཅིག་ཟིན་པ་དང་བོད་ནང་རང་ལུས་མེར་བསྲེགས་ཀྱི་གསར་བརྗེ་ལ་ཁ་ཕྱོགས་ནས་ལོ་གཉིས་ཟིན་ལ་ཉེ་བའི་དེ་རིང་ཕ་ཡུལ་གྱི་ས་ཁུལ་འདྲ་མིན་ནས་རང་ལུས་བོད་མི་རིགས་ཀྱི་བསྟན་སྲིད་ཀྱི་ཆེད་སྒྲོན་མཁན་བཅུ་བདུན་ཙམ་བྱུང་འདུག་ལ། བོད་ནང་གི་དངོས་ཡོད་ཀྱི་གནས་སྟངས་ལ་འགྱུར་བ་མ་བྱུང་ཚེ་ད་དུང་ཡང་སྐྱ་སེར་ག་ཚོད་ཀྱིས་ལུས་སྲོག་མེ་རུ་སྒྲོན་པ་ནི་ཚོད་དཔག་བྱེད་དཀའ་བ་ཞིག་རེད།
ཨ་རབ་དཔྱིད་ཀྱི་གསར་བརྗེ་ལ་ཕྱིར་མིག་ཅིག་བལྟས་ཚེ་རང་གཞུང་མགོ་གཏིང་སློག་ཅིང་སྲིད་དབང་སྒེར་འཛིན་པ་དམར་གསོད་བཏང་བ། ཁོང་ཚོས་དབང་ཤུགས་དང་མེ་མདའི་སོ་ཁ་ནས་ཉམ་ཆུང་མི་སེར་སྟོང་ཕྲག་མང་པོ་སྡུག་ བསྔལ་གྱི་མཚོ་མོའི་ནང་དུ་ལྷུང་བ། ཁྱོད་ཤིི་ང་གསོན་གྱི་འཐབ་རྩོད་དང་འཇིགས་རུང་གི་གསར་བརྗེ་ཞིག་ཀྱང་རེད། འོན་ཀྱང་། ཁོང་ཚོའི་རྒྱབ་ན་སྟོབས་ལྡན་ཨ་རིའི་ནེ་ཀྲོ་༼ NATO ༽དམག་དཔུང་དང་མང་གཙོ་ལ་དགའ་བའི་འཛམ་གླིང་མི་མང་གིས་རྟག་ཏུ་རོགས་འདེགས་བྱེད་ཀྱིན་འདུག དམངས་གཙོའི་ལམ་ཆེན་དང་བདེ་སྐྱིད་འོད་ཟེར་སྟོང་ལྡན་གྱི་གནས་ཤིག་ཏུ་འཁྲིད་ཀྱིན་འདུག
ཕྱོགས་གཞན་ཞིག་ནས་བསམ་གཞིགས་རེ་བྱས་ཚེ། ད་ལྟ་བོད་ཡུལ་རྒྱ་ཡུལ་དུ་བསྒྱུར་བཞིན་པ་དང་། རང་ཡུལ་ན་རང་གི་སྐད་ཡིག་ལེགས་བྱང་དང་བཅས་བ་ཕལ་བར་འགྱུར་ཀྱིན་པའི་དུས་འདིར། ངའི་ཕ་ཡུལ་རྔ་པ་གཙོས་ཡུལ་ལུང་མང་པོའི་ནང་དུ་བོད་མི་ཚོས་སྡུག་བསྔལ་བཟོད་ཐབས་བྲལ་ཏེ་རང་ཉིད་ཀྱི་གཅེས་པའི་སྲོག་ཀྱང་མི་གཏོང་ཀ་མེད་ཆགས་བཞིན་ཡོད། ཁོང་ཚོས་རང་ཉིད་ཀྱི་བླ་མ་བོད་ལ་གདན་འདྲེན་ཞུ་དགོས་པ་དང་། ཆོས་དད་རང་དབང་དང་། འགྲོ་འདུག་རང་དབང་། མི་གཅིག་གི་གཞི་རྩའི་རང་དབང་དང་ཐོབ་ཐང་དགོས་ཞེས་འབོད་ཚིག་སྒྲོག་བཞིན་བོད་ཀྱི་བསྟན་པ་ཆབ་སྲིད་ཀྱི་ཆེད་དུ་རང་ལུས་མེ་རུ་སྒྲོན་བཞིན་པ་རེད། ཁོང་ཚོས་སྙིང་སྟོབས་ཆེན་པོས་དགྲ་བོར་མི་རྒོལ་བར་འཚེ་བ་མེད་པའི་ལྟ་གྲུབ་ཡིད་ལ་སྒོམ་བཞིན་འདི་ལྟར་མི་ཡུལ་དང་གཏན་དུ་བྲལ། ཁོ་ཚོར་སྟོབས་ཆེན་དཔོན་པོས་རྒྱབ་སྐྱོར་མེད་ལ། དེ་བས་ཤི་མ་གསོན་ལ་མེ་མདའི་སོ་ཁ་གཏད་ཅིང་དྲག་གནོན་བྱས་པ་ཉུང་ཉུང་ག་ལ་ཡིན། ཕྱིའི་གདུག་རྩུབ་དང་མནར་གཅོད་ཀྱིས་ནང་སེམས་བཅུན་ཐབས་དབེན་པ་རེད། འདི་ནི་གནད་དོན་མང་དག་ལ་ཐ་དད་དང་ཐ་དད་ལས་བྱུང་བའི་ཆ་མི་སྙོམས་པའི་གནས་སྟངས་འགས་གསལ་འདོན་བྱས་པ་ཡིན།
མདོར་ན། རང་ལུས་མེ་རུ་སྒྲོན་པའི་དཔའ་བོ་དཔའ་མོ་དག་གཙོས་གཞིས་ལུས་རྒྱ་ཆེའི་མི་མང་གི་མངོན་འདོད་ནི་༸སྐྱབས་མགོན་རིན་པོ་ཆེ་ཕྱིར་ཕ་ཡུལ་ལ་ཕེབས་རྒྱུ་འདི་རེད་ལ། བཀའ་ཁྲི་མཁས་དབང་བློ་བཟང་སེང་གེའི་ལས་འགན་གཙོ་བོ་ཡང་༸སྐྱབས་མགོན་རིན་པོ་ཆེ་བོད་དུ་གདན་འདྲེན་བྱེད་རྒྱུ་ཡིན་པ་ཐེངས་མང་བརྗོད་མྱོང་ཡོད། ས་མཐའི་སྤུན་ཟླ་ཚོས་ཉིན་དང་མཚན་གྱི་རྨི་ལམ་ཡང་དེ་ཁོ་ན་རེད། ༸གོང་ས་མཆོག་ནས་ཀྱང་བོད་དུ་ཕེབས་རྒྱུའི་གོ་སྐབས་བྱུང་ཚེ་ཕེབས་རྒྱུ་ཡིན་ཞེས་གསུངས་མྱོང་། ཁོང་འགྲུལ་བཞུད་ཀྱི་བརྒྱུད་རིམ་ཁྲོད་ཉི་མ་ལྷ་སར་ཞབས་སོར་འཁོད་པ་དང་གཞིས་བྱེས་ལྷན་འཛོམས་ཀྱི་ཉིན་མོ་ཏེ་མི་ལོ་ལྔ་བཅུའི་རྨི་ལམ་མངོན་འགྱུར་ག་དུས་བྱུང་ངམ། འདི་ནི་རང་དབང་ཆེད་དུ་དཔའ་བོ་དཔའ་མོ་སྟོང་ཕྲག་མང་པོས་ཡོད་ཚད་བློས་བཏང་བའི་ཕུགས་འདུན་ཡང་རེད་ལ། འདིི་ནི་རང་དབང་དང་ཞི་བདེའི་འོད་སྟོང་འབར་བའི་ཉིན་མོ་ཁོ་ན་ཡིན།
ཁྱེད་རང་གིས་སེམས་ཚོར་དྲག་པོའི་སྒོ་ནས་རྩོམ་ཡིག་འདི་བྲིས་པར་བཀའ་དྲིན་ཆེ། འོན་ཀྱང་ཁྲུ་ནི་ཤི་ཡཱ་ཡི་གནས་སྟངས་དང་བོད་ཀྱི་གནས་སྟངས་གཉིས་ཏོག་ཙམ་མི་འདྲ་བ་ཡོད་ངེས་རེད། དེ་ཡང་ལོ་རབས་ལྔ་བཅུ་པའི་ནང་ཧྥ་རན་སིའི་འོག་ནས་རང་བཙན་ཐོབ་རྗེས་ཁྲུ་ནི་ཤི་ཡཱ་དེ་རང་རིགས་རང་གིས་སྐྱོང་བའི་རང་བཙན་རྒྱལ་ཁབ་གཅིག་ཆགས་པ་རེད། འོན་ཀྱང་ཁྲིམས་འཛིན་ལམ་ལུགས་མི་ཉུང་བ་ཞིག་ཧྥ་རན་སིའི་ལམ་ལུགས་ནས་ལེགས་ཆ་ལེན་ཏེ་ལག་སྟར་བྱེད་བཞིན་ཡོད་པར་གྲགས། རང་བཙན་ཐོབ་ནས་རང་རིགས་རང་གིས་སྐྱོང་བའི་དུས་མཚམས་སུ་ཡུལ་གྲུ་དེའི་དཔོན་རིགས་ཚོས་སྲིད་དབང་སྒེར་སྤྱོད་པ་ཚོས་རང་ཉིད་ཀྱི་དབང་ཆ་བརྟན་བསྲུང་ཆེད་མི་མང་གི་དབང་རང་མི་ཉུང་བ་ཞིག་བརྡལ་བཤིག་བཏང་བ་རེད། མདོར་ན་རང་རིགས་གཅིག་པའི་དཔོན་ངན་གྱིས་རང་གིས་སྐྱོང་དགོས་པའི་མི་མང་རྣམས་བཙིར་བ་རེད། དེ་ལྟ་བུའི་ཁོར་ཡུག་འོག་ནས་མི་མང་རྣམས་འ་ཆད་འུ་ཐུག་ཆགས་ཏེ་ཡར་ལངས་བྱས་པ་རེད། གཞུང་གིས་དཔུང་དམག་བཏང་ཀྱང་རང་རིགས་གཅིག་པའི་དམག་དཔུང་གིས་རང་ཉིད་ཀྱི་སྤུན་ཟླ་རྣམས་དམར་གསོད་བྱེད་མི་སྲིད་པ་ཞིག་རེད། འོན་ཀྱང་རྒྱ་དམར་ལ་མཚོན་ན་ཁོ་ཚོ་ང་ཚོའི་འགོ་འདོན་འཚོ་སྐྱོང་བྱེད་མཁན་ཞིག་མ་རེད། དེ་བས་ཁོ་ཚོ་བཙན་འཛུལ་བ་རེད། ང་ཚོས་རང་ལུས་མཆོད་མེར་སྒྲོན་ཀྱང་ཁོ་ཚོས་ཡ་ང་བག་ཚ་གང་ཡང་བྱེད་ཀྱི་མ་རེད། དེ་གཅིག་ཡིན། ཁྲུ་ནི་ཤི་ཡ་ལ་མཚོན་ན་ཡུལ་གྲུ་དེའི་མི་མང་ཚང་མས་འོས་ལངས་དེར་རྒྱབ་སྐྱོར་ཡོད་པར་བརྟེན་ཁོ་ཚོའི་སྲིད་གཞུང་གི་ནུས་པ་རང་བཞིན་གྱི་ཉམས་པ་རེད། འོན་ཀྱང་ང་ཚོར་མཚོན་ན་ང་ཚོའི་འཐབ་བརྕོད་དེར་རྒྱབ་སྐྱོར་བྱེད་མཁན་ང་ཚོ་བོད་མི་མང་ལས་རྒྱ་མི་དེ་ཙམ་མེད་ཁར་རྒྱ་མི་མང་མོས་སྲིད་གཞུང་ལ་རྒྱབ་སྐྱོར་བྱེད་ཀྱི་ཡོད་པ་རེད། དེ་ནི་ཁོ་ཚོའི་དྲིལ་སྒྲགས་རྫུན་མའི་ནུས་པ་རེད་ཅེས་བརྗོད་ཆོག། རྒྱལ་སྤྱིའི་སྟེང་ནས་བརྗོད་ན། འཇིགས་སྐུལ་རིང་ལུགས་ནི་དེང་རབས་འཛམ་གླིང་གི་བདེ་འཇགས་ལ་ཉེན་ཁ་ཆེ་ཤོས་ལ་ངོས་འཛིན་བྱེད་བཞིན་ཡོད་ལ་འཇིགས་སྐུལ་བའི་ཡོངས་ཁུངས་གཅོ་བོ་ཞིག་ཁ་ཆེའི་ཆོས་ལུགས་ལ་དད་ཞེན་བྱེད་མཁན་ཁྲོད་ནས་ཡོང་གི་ཡོད། དེ་བས་ཀྱང་གཙོ་ཆེ་བ་ཞིག་ལ་འཇིགས་སྐུལ་བར་རྒྱབ་སྐྱོར་བྱེད་མཁན་ནི་ཁ་ཆེའི་སྒེར་གཅོད་དཔོན་རིགས་ཚོར་ངོས་འཛིན་བྱེད་ཀྱི་ཡོད། དེར་བརྟེན་ནུབ་ཕྱོགས་པ་ཚོས་ཁ་ཆེའི་རྒྱལ་ཁབ་རྣམས་མང་གཙོར་བསྒྱུར་རྒྱུར་འབད་བརྩོན་མངོན་ལྐོག་གཉིས་ཀ་ནས་བྱེད་ཀྱི་ཡོད་པ་རེད། ཕྱོགས་གཞན་ཞིག་ནས་ཁོ་ཚོའི་ཡུལ་གྲུར་རྡོ་སྣུམ་ཡོད་པ་རེད། རྒྱུ་མཚན་དེ་དག་ལ་བརྟེན་ནས་ཁོ་ཚོར་རྒྱལ་སྤྱིའི་རྒྱབ་སྐྱོར་རག་གི་ཡོད་པ་རེད། མདོར་ན་ཡོད་ཚད་རང་ཉིད་ཀྱི་ཁེ་ཕན་ལ་ཐུག་ཡོད།
རྔ་སྒྲ་ལགས་་་་་་ང་རང་ཚོའི་ཕོ་བྲང་འདི་ཨ་རུ་ལ་ཡོད་ན་་་གཞིས་བྱས་གཉིས་ད་གང་ཤེས་་་་བྱས་འབྱོར་བ་ཚང་མཛོམས་བྱེད་ཐུབ་ངེས་རེད་པ།
རང་དབང་དང་ལྷན་འཛོམས།
མི་ལོ་ལྔ་བཅུ་ལྷག་ཕྱི་ཡུལ་དུ་གྱར་བའི་སྤུན་ཟླ་ཚོ། ང་ཚོ་ནམ་ཞིག་ཕོ་བྲང་པོ་ཏ་ལའི་མདུན་ཐང་དུ་གཞིས་བྱེས་མཉམ་འཛོམས་འབྱེད་ཐུབ་བམ། ༸གོང་ས་་མཆོག་ནམ་ཞིག་ཕོ་བྲང་པོ་ཏ་ལའི་མདུན་ཐང་དུ་གདན་འདྲེན་ཞུ་ཐུབ་བམ། དེ་རིང་གི་ང་ཚོ་ནམ་ཡང་རྨི་ལམ་མངོན་འགྱུར་ཡོང་བར་བློ་སློབས་སྐྱེས་ཏེ་མདུན་བསྐྱོད་ཀྱི་དཔུང་ཤུགས་ལྷན་ཏུ་སྒྲིལ་བའི་དུས་ཤིག་ལ་སླེབས་འདུག་གོ