ཉེ་སྔོན་ཀྲུའུ་ཝེ་ཆོན་གྱིས་རྒྱ་ནག་དམར་ཤོག་སློབ་གྲྭའི་ཚགས་པར་སྟེང་རྩོམ་ཡིག་ཅིག་སྤེལ་ཏེ། མི་རིགས་རང་སྐྱོང་སྲིད་ཇུས་མེད་པ་བཟོས་ཏེ་ཀྲུང་ཧྭ་རྒྱ་རིགས་ཆེན་པོའི་འདུ་ཤེས་སྐྱེད་སྲིང་བྱ་དགོས་སྐོར་བརྗོད་འདུག
ཕྱི་ཟླ་ ༢ ཚེས་ ༡༣ ཉིན། རྒྱ་ནག་དབུས་དམར་ཤོག་སློབ་གྲྭའི་༼ སློབ་སྦྱོང་དུས་བབ ༽ཞེས་པའི་ཚགས་པར་སྟེང་། རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་འགན་འཛིན་གཞོན་པ་ཀྲུའུ་ཝེ་ཆོན་གྱིས་༼ ཉེ་བའི་མི་རིགས་ས་ཁུལ་གནད་དོན་ཐད་ཀྱི་བསམ་གཞིགས་འགའ༽ཞེས་པའི་མི་རིགས་སྲིད་ཇུས་བཅོས་བསྒྱུར་སྐོར་གྱི་རྩོམ་ཡིག་ཅིག་སྤེལ་ཏེ། མི་རིགས་ས་ཁུལ་རང་སྐྱོང་གི་སྲིད་ཇུས་ཕྱིར་བསྡུ་བྱས་ཏེ། མི་རིགས་མཉམ་བསྲེས་གཅིག་གྱུར་བཟོ་དགོས་པའི་བསམ་ཚུལ་བཏོན་ཡོད། ཀྲུའུ་ཝེ་ཆོན་ནི་རྒྱ་གཞུང་གི་མི་རིགས་ལས་དོན་ཐད་ཀྱི་མགྲིན་ཚབ་པ་གཙོ་གྲས་དང་། ལྷག་པར་དུ་བོད་རྒྱ་ཞི་མོལ་བྱ་སའི་ཐད་ཀའི་དཔོན་རིགས་ཤིག་ཆགས་ཡོད་སྟབས། རྒྱལ་སྤྱིའི་སྤྱི་ཚོགས་དང་ཆབ་སྲིད་དཔྱད་བརྗོད་པ་མང་པོས་ཀྲུའུ་ཡི་རྩོམ་ཡིག་དེས་རྒྱ་གཞུང་གི་མི་རིགས་ལས་དོན་ཐད་ཀྱི་སྲིད་ཇུས་དེའི་དོན་དངོས་ཁ་ཕྱོགས་སྟངས་གང་ཡིན་པ་མཚོན་ཡོད་ལ། ལྷག་པར་དུ་བོད་ཐོག་འཛིན་པའི་མི་རིགས་དབང་སྒྱུར་སྲིད་ཇུས་དེ་སྔར་ལས་ཤུགས་ཆེ་རུ་གཏོང་རྒྱུ་ཡིན་པའི་དོགས་སློང་དང་དཔྱད་བརྗོད་སྣ་ཚོགས་སྤེལ་འདུག
ཀྲུའུ་ཡི་རྩོམ་ཡིག་དེའི་ནང་། སྲིད་གཞུང་གི་ད་ལྟའི་མི་རིགས་རང་སྐྱོང་དང་མི་རིགས་རང་སྐྱོང་གྲོང་རྡལ་གྱི་སྲིད་ཇུས་མེད་པ་བཟོས་ཏེ། ནུབ་ཕྱོགས་གྲངས་ཉུང་མི་རིགས་ས་ཁུལ་གྱི་མི་རིགས་ཁག་རྒྱ་ནག་ཤར་ཕྱོགས་མཚོ་རྒྱུད་ས་ཁུལ་ཁག་ནང་སྤོ་ཤུགས་ཆེ་རུ་བཏང་སྟེ། མི་རིགས་ས་ཁུལ་དང་མི་རིགས་ཚོགས་སྡེ། མི་རིགས་གྲོང་ཚོའི་རྣམ་པ་མེད་པ་བཟོ་དགོས་པ་དང་། མི་རིགས་སོ་སོའི་སློབ་མ་ཡོངས་རྫོགས་མཉམ་བསྲེས་ཀྱིས་མི་རིགས་གཅིག་སྡུད་བཟོས་ཏེ། རྒྱ་ནག་གི་སྤྱི་སྐད་དང་རྒྱ་ཡིག་ཁྱབ་བརྡལ་གཏོང་དགོས་པ་མ་ཟད། གྲངས་ཉུང་མི་རིགས་ཚང་མས་རྒྱ་ནག་མེས་རྒྱལ་ངོས་ལེན་དང་། ཀྲུང་ཧྭ་མི་རིགས་ངོས་ལེན། ཀྲུང་ཧྭ་རིག་གནས་ངོས་ལེན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ཕྱོགས་ངོས་ལེན་ཡོང་བ་བཅས་བྱེད་དགོས། དེ་བཞིན། ད་ལྟའི་སྲིད་གཞུང་གི་སྡོད་དམངས་ལག་ཁྱེར་སྟེང་གི་མི་རིགས་ངོས་འཛིན་རེའུ་མིག་དེའང་མེད་བ་བཟོ་དགོས་སྐོར་བཀོད་ཡོད་པ་མ་ཟད། ཀྲུའུ་ཝེ་ཆོན་གྱིས་ “ སྤྱི་ཚོགས་དཔལ་འབྱོར་ཡར་རྒྱས་ཁོ་ནའི་འཆམ་མཐུན་དང་བརྟན་ལྷིང་གི་གནད་དོན་དང་། ལྷག་པར་དུ་ཁ་བྲལ་རིང་ལུགས་ཀྱི་གནད་དོན་ཐག་གཅོད་ཐུབ་པ་མཚོན་མི་ཐུབ” ཅེས་བརྗོད་དེ། ཐད་ཀར་ཆབ་སྲིད་ཀྱི་རྣམ་པའི་ཐོག་ནས་མ་ཡིན་པར། དངོས་ཤུགས་བརྒྱུད་གསུམ་ཀྱི་བྱ་ཐབས་སྤྱད་དེ་མི་རིགས་མཉམ་བསྲེས་བྱ་དགོས་པའི་ལྟ་ཚུལ་བཏོན་ཡོད།
བཙན་བྱོལ་བོད་མིའི་སྒྲིག་འཛུགས་ཀྱི་ཐེ་ཝན་དོན་གཅོད་ཟླ་བ་ཚེ་རིང་ལགས་ཀྱིས། ཀྲུའུ་ཝེ་ཆོན་གྱིས་རྩོམ་ཡིག་དེའི་བརྗོད་སྙིང་གཙོ་བོ་ནི་མི་རིགས་སྲིད་ཇུས་མེད་པ་བཟོས་ཏེ་མི་རིགས་གཅིག་གྱུར་བཟོ་རྒྱུ་དེ་ཡིན་པའི་ངོས་འཛིན་གནང་ཡོད། ཟླ་བ་ཚེ་རིང་ལགས་ཀྱིས་ “ གལ་སྲིད། མི་རིགས་ཞེས་པ་མེད་ན་མི་རིགས་སྲིད་ཇུས་ཟེར་བའང་ཡོད་མི་སྲིད། མི་རིགས་སྲིད་ཇུས་མེད་པ་བཟོས་ནས་སློབ་གྲྭ་མཉམ་བསྲེས་བྱས་ཏེ། བོད་ཡིག་བོད་སྐད་སློབ་མི་དགོས་པ་དང་། དེ་བཞིན། ཡུ་གུར་སོགས་མི་རིགས་གཞན་གྱི་སྐད་ཡིག་ཀྱང་སློབ་མི་དགོས་པ་བཟོས་པ་ཡིན་ན། དོན་གྱིས་མི་རིགས་སློབ་གསོ་མེད་པ་བཟོས་བ་དང་གཅིག་མཚུངས་རེད། དེ་ནི་མི་རིགས་དབང་སྒྱུར་གཅིག་གྱུར་བཟོ་བའི་སྲིད་ཇུས་རེད།” ཅེས་བརྗོད་དེ། ད་ལྟའི་བར་རྒྱ་གཞུང་གིས་བོད་ཐོག་འཛིན་པའི་སྲིད་ཇུས་མཐའ་དག་ནི་རྒྱ་བོད་བར་འདྲ་མཉམ་མིན་པའི་ཕྱོགས་ཞེན་དབྱེ་འབྱེད་ཀྱི་སྲིད་ཇུས་ཁོ་ན་ཡིན་པས། གནས་སྟངས་དེའི་འོག་ཁོ་ཚོས་སྒྲོག་བཞིན་པའི་ཀྲུང་ཧྭ་མི་རིགས་ཀྱི་འདུ་ཤེས་ངོས་ལེན་ཟེར་བ་དེ་ཡོངས་ཐབས་བྲལ་བ་ཞིག་ཡིན་པ་གསལ་སྟོན་བྱས་འདུག
ཟླ་བ་ཚེ་རིང་ལགས་ཀྱིས་བོད་རྒྱ་གཉིས་ལོ་རྒྱུས་ཐོག་མི་རིགས་ཐ་དད་ཡིན་སྐོར་བརྗོད་དོན། “ཀྲུའུ་ཝེ་ཆོན་གྱིས་བཏོན་པའི་ཀྲུང་ཧྭ་མི་རིགས་ཀྱི་འདུ་ཤེས་ཟེར་བ་དེ་ནི་བོད་མི་རིགས་ཀྱིས་ངོས་ལེན་བྱ་ཐབས་བྲལ་བ་ཞིག་རེད། དེ་ལྟ་བུའི་འདུ་ཤེས་ཤིག་ངོས་ལེན་ཡོང་བར་དངོས་ཡོད་ལོ་རྒྱུས་ཀྱི་གནས་བབ་ཅིག་གིས་ཐག་གཅོད་དགོས་ལ། བོད་དང་རྒྱ་ནག་གཉིས་ལོ་རྒྱུས་འཕེལ་རིམ་ཐོག་ཕན་ཚུན་དོ་མཉམ་གྱི་གནས་བབ་ཅིག་གི་ཐོག་ཡོད་པ་མ་ཟད། ཧ་ལམ་མཉམ་འདྲེས་ཀྱི་གནས་ཚུལ་གང་ཡང་བྱུང་མྱོང་མེད། ཆོས་ལུགས་དད་མོས་ཀྱི་ཐད་ནས་ཀྱང་བོད་པའི་ནང་ཆོས་ནི་རྒྱ་མི་རིགས་ལ་མཚོན་ན་གོམས་འདྲིས་མེད་པའི་དད་མོས་ཤིག་དང་། དེ་བཞིན། རྒྱའི་སྲོལ་རྒྱུན་རུའུ་ལུགས་བསམ་བློའི་འདུ་ཤེས་ནི་བོད་མིར་མཚོན་ན་ཕྱོགས་ཡོངས་ནས་རྒྱུས་མེད་ཅིག་རེད།” ཅེས་གསལ་འདོན་གནང་ཡོད་པ་མ་ཟད། ཟླ་བ་ཚེ་རིང་ལགས་ཀྱིས་དེ་ལྟ་བུའི་གཅིག་གྱུར་གྱི་འདུ་ཤེས་འཛིན་སྟངས་ཤིག་ངོས་ལེན་ཡོང་ཐབས་ཀྱི་སྔོན་འགྲོའི་ཆ་རྐྱེན་གཅིག་ཡོད་པ་ནི་མི་རིགས་ཚང་མ་འདྲ་མཉམ་བྱ་རྒྱུ་དེ་རེད། ཡིན་ནའང་། རྒྱ་གཞུང་གིས་ད་ལྟའི་བར་རྒྱ་མི་རིགས་ནི་དབང་འཛིན་པའི་འཐུས་ཚབ་དང་། བོད་མི་རིགས་ནི་དབང་སྒྱུར་བྱ་ཡུལ་གྱི་མི་སེར་གྱི་ལྟ་སྟངས་འཛིན་བཞིན་པ་བརྗོད་འདུག
ཀྲུའུ་ཝེ་ཆོན་གྱིས་བཏོན་པའི་གྲངས་ཉུང་མི་རིགས་སྲིད་ཇུས་ཀྱི་གནད་དོན་དེའི་ཐད། ཕྱི་ནང་གི་རྒྱ་རིགས་ཤེས་ལྡན་པ་ཚོའི་ཐུན་མོང་གི་བསམ་ཚུལ་ཞིག་ནི་རྒྱ་གཞུང་གིས་གྲངས་ཉུང་མི་རིགས་ཁག་གི་བསམ་ཚུལ་ལ་ཉན་འཇོག་གནང་རྒྱུ་དེ་ཡིན་པ་དང་། ཉེ་སྔོན་ཕྱི་ཟླ་ ༢ ཚེས་ ༡༠ ཉིན་ཀྲུང་ནན་ཧའེ་རུ་རྒྱ་ནག་གི་སྲིད་བློན་ཝུན་ཅ་པའོ་རྒྱ་གཞུང་གིས་ཐག་གཅོད་བྱས་པའི་པཎ་ཆེན་ལ་ཐུག་འཕྲད་སྐབས་ཀྱང་། སྔར་ལས་ལྷག་པར་བོད་རིགས་ཀྱི་འཚོ་བ་ཡར་རྒྱས་གཏོང་རྒྱུ་གཙིགས་སུ་འཛིན་དགོས་པ་དང་། བོད་ལྗོངས་དང་བོད་ཀྱི་ས་ཁུལ་གཞན་དག་གི་སྐྱེས་ཁམས་ཁོར་ཡུག་དང་རིག་གནས་རྒྱུན་འཛིན་གཙིགས་སུ་འཛིན་དགོས་པ། བོད་མི་རིགས་ཀྱི་ཆོས་དད་རང་དབང་གཙིགས་སུ་འཛིན་དགོས་པའི་ལྟ་ཚུལ་གསུམ་བཏོན་ཡོད།
ཨ་རིར་གནས་སྡོད་དགེ་རྒན་ཆེན་མོ་ཡཱང་ལི་ཡུས་ནི་བོད་དང་ཤིན་ཅང་གནད་དོན་ཐད་རྩོམ་ཡིག་མང་པོ་སྤེལ་མཁན་ཞིག་ཡིན་ལ། ཁོང་གིས་ཀྲུའུ་ཝེ་ཆོན་གྱི་ལྟ་ཚུལ་དེའི་ཐད་བརྗོད་དོན། “ཀྲུའུ་ཡི་བཤད་སྟངས་དེ་ནི་མདུན་སྐྱོད་ཀྱི་སྣང་ཚུལ་ཞིག་མ་ཡིན་པར་ཕྱི་ནུར་གྱི་རྣམ་འགྱུར་ཞིག་རེད། མདོར་བསྡུས་ན་ཀྲུང་ཧྭ་རྒྱ་རིགས་ཆེན་པོའི་སྒྲོམ་གཞིའི་འོག་གི་མི་རིགས་སྲིད་ཇུས་ཟེར་བ་དེ་ནི། དོན་དངོས་ཐོག་མ་འོངས་པར་གྲངས་ཉུང་མི་རིགས་རྣམས་ཀྲུང་ཧྭ་རྒྱ་རིགས་ཆེན་པོར་བསྒྱུར་རྒྱུ་དེ་རེད། ང་རང་དེ་ལ་མོས་མཐུན་མེད། གྲངས་ཉུང་མི་རིགས་རྣམས་ནི་ཉམས་ཆུང་མི་རིགས་རེད། ཡར་རྒྱས་གོམ་ཁ་དལ་ཞིང་དཔལ་འབྱོར་མཐུན་རྐྱེན་རྒྱ་ནང་དང་བསྡུར་ན་བར་ཐག་ཆེན་པོ་ཡོད་སྟབས། ཉམས་ཆུང་གྲངས་ཉུང་མི་རིགས་ལ་སྲུང་སྐྱོབ་བྱ་དགོས་པ་རེད། དེར་བརྟེན། ཉེ་སྔོན་ཝུན་ཅ་པའོ་ཡིས་ཀྱང་གྲངས་ཉུང་མི་རིགས་ཀྱི་ཆོས་ལུགས་དང་རིག་གནས། དཔལ་འབྱོར་བཅས་སྔར་ལས་ལྷག་པར་སྲུང་སྐྱོབ་དགོས་པ་བརྗོད་ཡོད། ཁོའི་སྐད་ཆ་དེ་ནི་གྲངས་ཉུང་མི་རིགས་ལ་དཀའ་ཉེན་འཕྲད་བཞིན་པ་ངོས་ལེན་གྱི་རྣམ་འགྱུར་ཞིག་རེད། ” ཅེས་བརྗོད་འདུག
རྒྱ་གཞུང་གི་བཅའ་ཁྲིམས་ནང་མི་རིགས་ས་ཁུལ་དུ་རང་སྐྱོང་སྲིད་ཇུས་ལག་བསྟར་དགོས་པ་བརྗོད་ཡོད་པ་མ་ཟད། རྒྱ་གཞུང་གིས་ནམ་རྒྱུན་ཀྲུང་གོ་རྒྱལ་ཁབ་ལ་མི་རིགས་ ༥༦ ཡོད་པ་བསྒྲགས་ཡོད།
གསར་འགོད་པ། ཚེ་རིང་རྒྱལ།
༼བོད་ཀྱི་དུས་བབ་གསར་ཤོག་ལས་འདིར་བཀོད།༽
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
དུས་སྐབས་འདིར་རྒྱ་མི་སུ་ཞིག་གིས་ང་ཚོས་ཏཱ་ལས་མཇིང་པ་བསྒགས་ཏེ་ཤ་སྲེག་མ་ཟ་དགོས་ཟེར་མཁན་ཡོད་ན། ངས་ཁོ་ཚོའི་བློ་ཁོག་ལ་མཐེ་བོང་སྟོན་རྒྱུ་ལས་མེད། ཀྲུའུ་ཟེར་བའི་གྲངས་ཉུང་མི་རིགས་ཐ་དག་རོ་རུ་བརྩི་བའི་སྤོབས་པ་ཡང་དེ་འདྲ་རེད། ད་གང་ཞིག་ན་བོད་མི་ཞིག་རང་ལུས་རུལ་་དྲི་ཅན་པོ་སྒྲོན་རྩིས་ཡོད་དམ། ཡང་ན་རྒྱ་ཤ་དྲོ་བ་ཅན་པོ་འདི་སྲེག་རྩིས་ཡོད། བོད་མི་ཚོས་གདམ་ཀ་གང་ཡིན། རེ་འདོད་གང་ཡིན།
དྲྭ་གྲོགས་རྣམ་པས་དགོངས་ཚུལ་ཡག་པོ་གནང་འདུག འོན་ཀྱང་། རྒྱ་ནག་གིས་མིག་སྔའི་གནས་ཚུལ་དང་ཁེ་བཟང་གཞི་ལ་འཇོག་པ་ལས་ལོ་རྒྱུས་དང་། ངོ་ཚ་ཁྲེལ་ཡོད་ཟེར་བ་རྩ་བ་ནས་དང་ལེན་མི་བྱེད་པ་རེད། ཀྲོའུ་ཡིས་བསམ་ཚུལ་འདི་ཡིས་མི་རབས་གསར་བ་དང་རྒྱལ་ཁབ་གཞན་དག་ལ་ནན་རྗོད་ཀྱི་རང་ཚུགས་བཟུང་བ་དང་། ཡང་བོད་མི་ཚོར་འདུ་ཤེས་ཐ་དད་ཙམ་ལས། དོན་ལ་གཅིག་གྱུར་གྱི་ཁྱིམ་ཚང་ནང་སྡོད་དགོས་པའི་འགོ་སྐོར་བསླུ་གཏམ་ཡིན་པ་དེ་རེད། ད་ཆ་ང་ཚོར་ནུས་པ་དེ་ཙམ་མེད་ནའང་། འགོ་སྐོར་གྱི་འོག་ལ་ཚུད་རྒྱུ་ཁོང་ཚོའི་སྟོང་བསམ་ཡིན་པའི་ལན་འདེབས་བྱེད་དགོས།
དྲ་གྲོགས་ཡོངས་ལ་མཚམས་འདྲི་དང་བཅས།
གནད་དོན་འདིའི་ཐད་དེ་སྔོན་རྒྱ་ནག་སློབ་ཆེན་ཞིག་གི་སྤྱོབ་སྤྱི་ཞིག་གི་མིང་ཐོག་ནས་རྩོམས་ཡིག་ཞིག་ཀྱང་སྤེལ་མྱོང་ཡོད་པ་རེད། བསམ་ཚུལ་དེ་དག་ནི་རྒྱ་ནག་གི་མི་རིགས་རིགས་ལུགས་ཀྱི་ལྟ་བ་འཁྲིག་པོ་ཡོད་མཁན་དག་གི་རྨི་ལམ་ཞིག་ཡིན་ངེས་ལ། ཕྱོགས་གཞན་ཞིག་ནས་བཤད་ན་ད་ཡོད་རྒྱ་དཔོན་རྣམས་ཀྱིས་འདོད་བྱ་མཐའ་ཐུག་དེ་ཡང་ཡིན་པ་སྐབས་འདིར་གསལ་སྟོན་བྱས་པ་རེད། ལས་འགུལ་དེ་དངོས་སུ་ལག་ལྟར་བྱས་པའི་ཉིན་མོ་དེ་ནི་རིག་གནས་གསར་བརྗེ་ཞེས་པའི་གོ་བ་ཙམ་གྱིས་སྙིང་ལ་ན་ཟུག་རྒྱབ་དགོས་པའི་དུས་སྐབས་དེ་སྐྱར་ལོག་རྒྱབ་པའི་ཉིན་མོ་ཡང་ཡིན་ངེས། བསམ་ཚུལ་དང་བྱེད་ཐབས་དེ་དག་ནི་རྒྱ་ནག་དམར་ཕྱོགས་ཚོགས་པས་༼མ་ཁི་སིའི་༽གཞུང་ལུགས་མེ་ལ་སྲེག་ཟིན་པའི་དཔང་རྟགས་ཞིག་ཀྱང་མངོན་འགྱུར་བྱུང་བ་ཅི་ལ་མིན། འདི་ལྟ་བུ་བསམ་བློ་མཁྱེར་སོ་དང་འདོད་བྱ་འཛིན་མཁན་གྱི་དཔོན་ངན་ཞིག་གི་འོག་ནས་རང་སྲིད་རང་སྐྱོང་ཟེར་བ་ཞིག་ཐོབ་རྒྱུ་རེ་སྒུག་བྱེད་པ་ནི་དོན་དངོས་དང་མི་མཚམས་པ་ཞིག་ཡིན་པས། དགྲ་ཕྱོགས་ཀྱིས་གནས་ཚུལ་དང་ཁ་ཕྱོགས་ལ་གཟིགས་ནས་རང་རང་གི་དམིག་ཡུལ་དེ་ལེགས་འདེམས་དང་ཁ་ཕྱོགས་དེ་མ་ནོར་བ་ཞིག་བྱེད་རྒྱུར་མ་ནོར་བར་བོད་མི་རང་རང་ངོས་ནས་གྲ་སྒྲིག་དང་བསམ་བློ་ཡོད་དགོས་ངེས་རེད།
ཀྲུའུ་ཡིས་སྐད་ཆ་འདི་བསམ་ཚུལ་གསར་བ་ཞིག་དང་གོ་རྟོགས་གསར་བ་གང་ཡང་་མ་རེད། སྲིད་དབང་སྒེར་གཅོད་པ་དམར་པོའི་དབང་འཛིན་པ་དག་གིས་བསམ་ཚུལ་འདི་ཁུར་ནས་ད་ལྟ་པར་དུ་གཉའ་གནོན་དང་སུན་བཙུར་བཟོས་དང་བཟོ་བཞིན་པ་རེད།
འོན་ཀྱང་ཀྲུའུ་ཡི་སྐད་ཆ་འདིས་འཛམ་གླིང་རྒྱལ་སྤྱིའི་སྟངས་བོད་ཀྱིས་མཚོན་གྲངས་ཉུང་མི་རིགས་ལ་དམར་པོ་སྲིད་གཞུང་གིས་དྲང་བདེན་མ་ཡིན་པའི་དབང་བསྒྱུར་གྱི་དམིགས་ཡུལ་དང་། གསར་འགྱུར་རྒྱུད་ལམ་ཁག་ཏུ་མི་རིགས་ལྔ་བཅུ་ང་དྲུག་ལས་གྲུབ་པའི་ཁྱིམ་ཚང་ཆེན་མོ་འདིར་མི་རིགས་འདྲ་མཉམ། ཆོས་ལུགས་དད་མོས་རང་དབང་། སྐད་ཡིག་རང་དབང་སོགས་ཡོད་རབ་འུད་བསྒྲགས་བྱས་པའི་རྫུན་རྐུབ་དམར་རྗེན་དུ་བཏོན་པར་མ་ཟད། ཧུའུ་ཡི་མི་རིགས་འཆམས་མཐུན་གྱི་སྲིད་ཇུས་གཟི་བརྗིད་ཁོག་སྟོང་ལ་འགྲམ་ལྕག་ཚ་བེར་རེ་ཅིག་གཞུས་ཏེ། བཅའ་ཁྲིམས་དང་ལག་སྟར་འགལ་བ་ལྟག་སྤྲོད་སོང་བའི་སྲིད་ཇུས་དེ་ཕམ་ཉེས་སུ་ཤོར་དོགས་ཀྱི་སྡུག་སྐད་ཤོར་བ་རེད།
ཡང་གཅིག་བཤད་ན་བསམ་ཚུལ་འདི་ལྟ་བུས་དམར་དམར་རྗེན་རྗེན་དུ་ཉམ་ཆུང་མི་རིགས་ལ་གཉའ་གནོན་དང་མཐོང་ཆུང་། ཉེས་བཅོས་སོགས་བྱས་པ་ཞིག་ཡིན་པས་བསམ་བཞིན་སྒེར་གཅོད་དབང་འཛིན་པ་དག་འཆི་ལམ་དུ་བརྫང་པ་དང་གཉིས་སུ་མ་མཆིས།
འོན་ཀྱང་སྡུག་ཕྱོགས་ནས་བསམ་ན་ང་ཚོའི་ཕྱོགས་ནས་ཡིད་གཟབ་དགོས་པ་ཞིག་ནི། ཁེངས་དྲེགས་སམ་སྡུག་སྐད་ཀྱི་གནས་ཚུལ་འདི་དང་འབྲེལ་ནས་སྣང་མེད་དུ་ཤོར་བའི་གནད་དོན་ཞིག་སྟེ། གྲངས་ཉུང་མི་རིགས་རྣམས་སྡོག་རྩ་གཅིག་སྒྲིལ་གྱི་སྟོབས་ཤུགས་གསོ་སྐྱོང་དང་འཐབ་རྩོད་བྱ་དགོས་པའི་སྔོན་བརྡ་ཞིག་ཀྱང་ཡིན་པར་སྙམ་མོ།།
ཀྲུང་ཧྭ་མི་རིགས་ཀྱི་བསྐྱར་དར་ཆེན་མོ་ཞེས་པ་ཞིག་ག་ལ་ཡོད་དེ། ཀྲུང་ཧྭ་མི་རིགས་ཟེར་བ་ཞིག་ཀྱང་ཡོད་པ་མ་རེད། མའོ་དང་ཞོ་ཕིང་སོགས་ཀྱིས་གནམ་འོག་དམར་པོར་བསྒྱུར་འདོད་ཀྱི་ཧམ་པ་སྟོང་ཟད་དུ་སོང་བ་མཐོང་རྗེས། རྗེས་རབས་རྒྱ་ནག་དམར་ཤོག་གི་དཔོན་པོ་ཚོ་རིག་གནས་པར་གྲགས་པ་འགའི་རྗེས་སུ་འབྲངས་ཏེ་ཀྲུང་ཧྭ་མི་རིགས་ཀྱི་ལོ་རྒྱུས་དང་རིག་གནས་ཞེས་འུད་ཀྱིས་སྒྲོག་མགོ་བརྩམས་ཤིང་། དེ་སྔ་གཅོད་ཁང་དུ་འཕང་བའི་ཁུང་ཙི་སོགས་ཚིག་གསུམ་གཏམ་དཔེ་སྒྲིག་པ་པོ་དག་གི་འཇུམ་གཟུགས་ལ་སླར་ཡང་ཆེ་མཐོང་སྤྲོལ་ཁུལ་བྱས་ཤིང་། གནའ་རབས་ཀྱི་ཀྲུང་ཧྭ་ཞེས་པའི་གཞི་མེད་ལ་སྒྲོ་བཏགས་པའི་དོན་སྤྱི་མང་པོ་ཞིག་བརྩམས་ཡོང་བ་རེད། དེ་ནི་མི་རིགས་འདིའི་རྨང་གཞིའི་སྙིང་ཁུང་སྟོང་པ་ཡིན་པའི་རྟགས་ཤིག་ཀྱང་ཡིན་ཏེ། རུའུ་ལུགས་ཀྱི་གནམ་ས་གཅིག་གྱུར་དང་། ཁུང་ཙིའི་མི་ཆོས་རིང་ལུགས་གང་ཡིན་ཀྱང་། མགོ་ལོག་གི་གཏམ་དཔེ་ལས་མཐོ་གང་ཙམ་ཡང་འདའ་མེད་ལ། སྙན་ཚིག་སུམ་བརྒྱའི་སྲོལ་ཡིག་དེ་ཡང་མི་ལའི་མགུར་འབུམ་གྱི་ཉང་ལག་ཙམ་དུ་མི་སླེབས། གཞན་དང་གཞན་ནས་གསར་བཏོད་ཆེན་པོ་བརྒྱད་སོགས་ཀྱི་ཆེ་གཏམ་ཇི་འདྲ་བཤད་ཀྱང་རུང་འཛམ་གླིང་ཐོག་རྫ་མ་ཐོག་མར་བཟོ་མཁན་དང་། ཐལ་ཁུ་བསྐམས་ནས་ཤོག་སྦགས་བཟོས་མ་བཟོས་ཙམ་གྱི་ར་བ་ལས་འདའ་ཐུབ་ཀྱི་མེད་། ཆབ་སྲིད་ཀྱི་ཕྱོགས་ནས་ནི་ལོ་ངོ་སྟོང་ཕྲག་མང་པོར་ཨེ་ཤ་ཡའི་འབྲོག་རིགས་དག་གི་ཐུབ་ཚོད་འོག་ནས་མགོ་བོ་དགྱེ་མ་མྱོང་བ་ཞིག་སྟེ། སྟབས་ཡག་ནས་སུང་ཀྲུང་ཧྲན་གྱི་གསར་བརྗེ་ལ་ཨུ་རུ་སིའི་དམར་ཤུགས་འདྲེས་པས་གཟོད་མགོ་བོ་འགྱོགས་ཙམ་བྱས་པ་རེད་མོད། དེ་ཡང་མཐར་རང་མགོ་གཅོག་བྱེད་དུ་གྱུར་སོང་བ་རེད། འདི་ལ་བསྐྱར་དར་གྱི་ཐ་སྙད་ཅིག་གང་ལ་མཛའ་སྟེ་གཏན་ནས་ཡོད་མ་མྱོང་བ་ཞིག་བསྐྱར་དུ་དར་རྒྱུ་ཞིག་སྨོས་མ་དགོས་སོ། ། ད་ལྟ་ནི་དམར་ཤོག་གིས་ཁ་ཕོ་འབྲུག་ལྟར་ལྡིར་ནས་འཛམ་གླིང་གི་རིམ་པ་ཅིག་ཅིག་ལ་སླེབས་སོགས་ཟེར་མོད། ཐ་ན་དྲ་རྒྱ་ཚད་ལྡན་ཞིག་ཀྱང་ཡོད་པ་མ་རེད། འོན་ཀྱང་བོད་བཅས་མི་རིགས་ཞི་བདེ་སྐོར་ཞིག་གི་ཡོད་ཚད་འཐུང་ཞིང་གཞིབས་པ་ལ་བརྟེན་ནས་ཤོག་སྒོར་བརྩེགས་མ་ཅན་གྱི་མི་ནི་མང་ཙམ་ཞིག་ཡོད་འདུག་པ་དངོས་གནས་རེད།
ཀྲུའུ་ཡིས་བཤད་པའི་སྐད་ཆ་དེ་ལ། ཕྱོགས་ངོས་གཉིས་ནས་གླེང་ན། གཅིག་བོད་ཙམ་མ་ཡིན་པར་གྲངས་ཉུང་མི་རིགས་ཁག་གི་རིག་གནས་དང་ཡུལ་གོམས་ལ་སོགས་པ་རྒྱ་བསྒྱུར་གྱིས་སྲིད་ཇུས་ལག་བསྟར་བྱ་དགོས་པའི་གྲོས་འགོ་ཞིག་གམ། དམར་པོའི་གཞུང་གིས་བཅངས་པའི་སྟོང་སེམས་ཕྱིར་བསྒྲགས་བྱས་པ་ཞིག་རེད། གཞན་ནི་ད་ལྟའི་བོད་ནང་གི་གནས་སྟངས་འདི་ཚབས་ཆེ་རུ་གཏོང་སྟེ་བོད་མི་ཚོའི་ཞི་བའི་ངོ་རྒོལ་བྱེད་པའི་རྦ་རླབས་དྲག་ཏུ་འཕྱུར་བར་སྐུལ་འདེད་གཏོང་སྟེ་ཡ་ང་སྙིང་རྗེ་མེད་པའི་དྲག་མནོན་བྱེད་རྒྱུའི་གཡོ་ཐབས་ཤིག་ཡིན་རྒྱུ་རེད། དེ་བཞིན་ང་ཚོས་ཀྱང་གྲ་འགྲིག་སྔ་ས་ནས་བྱས་ཏེ་ངོ་རྒོལ་གྱི་ལས་འགུལ་རྒྱུན་མཐུད་ཀྱི་སྒོ་ནས་སྤེལ་བའི་འཆར་གཞི་འདང་ངེས་དགོས་པ་དེ་རེད།
ཀྲུའུ་ཝེ་ཆོན་གྱིས་རྒྱ་ནག་དམར་ཤོག་སློབ་གྲྭའི་ཚགས་པར་སྟེང་རྩོམ་ཡིག་ཅིག་སྤེལ་བ་ནི་སྤྱི་ཚོགས་ཡོངས་ལ་ཁྱབ་བསྒྲགས་བྱས་པ་ཞིག་ཡིན་ལ་ཚོད་ལྟ་ཞིག་གི་བརྡ་ལན་ཡང་ཡིན།དེ་ནི་མི་སྒེར་བ་ཞིག་གིས་བསམ་ཚུལ་གཏན་ནས་ཡིན་མི་སྲིད།
སྲིད་དབང་སྒེར་འཛིན་གཅིག་སྡུད་ལམ་ལུགས་ཀྱི་ཁ་བཤད་དོན་ལ་མི་གནས་པའི་རང་ཚུགས་དམར་རྗེན་དེ་འཛམ་གླིང་མི་མང་ལ་གསལ་བར་བསྟན་པ་ཞིག་ལས་མ་འདས་པས།འདི་ལ་བཙན་བྱོལ་བོད་གཞུང་དང་མི་མང་གི་ངོས་ནས་ཀྱང་སྣང་མེད་དུ་མི་འཇོག་པར་ཕར་བརྡ་ལན་གསལ་བོ་ཞིག་སྤྲོད་རྒྱུ་ནི་ད་ལྟའི་དུས་ལ་བབ་པའི་བྱ་བཞག་གལ་ཆེན་ཞིག་ཏུ་ཆགས་ཡོད།དེ་མིན་གཉིས་ཕན་དབུ་མའི་ལམ་ལ་ཡང་བསྐྱར་ཞིབ་བྱེད་དགོས་པའི་དུས་ལ་བབ་འདུག་པ་ཚང་མས་མཁྱེན་དགོས་པའི་དུས་ལ་བབ་ཡོད།
གཅིག་བྱས་ན། ཀྲུའུ་ལྟ་ཚུལ་འདི་ནི་འཆར་ཟླ་ ༣ པའི་ཚེས་ ༥ ནས་བཟུང་པེ་ཅིན་དུ་འཚོགས་རྒྱུ་ཡིན་པའི་རྒྱ་ནག་རྒྱལ་ཡོངས་སྐབས་ ༡༡ པའི་མི་དམངས་འཐུས་མིའི་ཚོགས་ཆེན་ཐེངས་ ༥ པ་དང་། རྒྱལ་ཡོངས་སྲིད་གྲོས་སྐབས་ ༡༡ པའི་ཚོགས་ཆེན་ཐེངས་ ༥ གཉིས་སྐབས་ཀྱི་གླེང་གཞི་ཞིག་ཡིན་ཡང་སྲིད་ལ། ཚོགས་ཆེན་དེ་གཉིས་རྗེས་སུ་གྲངས་ཉུང་མི་རིགས་ས་ཁུལ་དུ་བཅའ་ཁྲིམས་རང་བཞིན་གྱི་དབང་སྒྱུར་སྲིད་ཇུས་ཤིག་སླེབས་ཀྱང་སྲིད། ནུབ་ཕྱོགས་བཅོས་བསྒྱུར་སྒོ་འབྱེད་ནས་བཟུང་སྟེ་ད་ལྟའི་བར། ཤོག་ངོས་ཀྱི་བཤམས་སྟོན་ལྟ་བུའི་མི་རིགས་ས་ཁུལ་རང་སྐྱོང་གི་བཅའ་ཁྲིམས་དེ་ཙམ་ལས། དོན་གྱིས་མི་རིགས་ས་ཁུལ་དག་ཏུ་དངོས་ཤུགས་བརྒྱུད་གསུམ་ནས་འགྱུར་ལྡོག་ག་རེ་བཏང་ཡོད་པའི་དངོས་ཡོད་གནས་ཚུལ་ལ་བལྟས་ནའང་། རྒྱ་གཞུང་གིས་རྒྱ་རིགས་ཆེན་པོར་བསྒྱུར་རྒྱུའི་སྲིད་ཇུས་ཤིག་མངོན་གསལ་དམར་རྗེན་དུ་བཤམས་ཡོད། ཡིན་ནའང་། ང་ཚོ་ནི་ད་ལྟའི་བར་ཤོག་ངོས་ཀྱི་བཤམས་སྟོན་དེ་ལྷ་སྐུའི་ཐང་ཀ་བཞིན་རང་གི་སྤྱི་བོར་བསྒྲེངས་ཏེ་ཐར་འདོད་ཀྱི་རྨི་ལམ་སྒོམ་བཞིན་ཡོད། རྒྱ་གཞུང་གི་ཁྲིམས་ནི་དམར་གཞུང་གིས་བཟོས་པ་རེད་ལ། དམར་གཞུང་གི་འཐུས་མིས་སོ་སོའི་ཁེ་ཕན་ལྟར་བསྒྱུར་ཆོག་གི་རེད། དོན་དངོས་ཐོག་དམར་གཞུང་གིས་ཁ་གཡར་ས་དང་མི་འཕྲུལ་སའི་མི་རིགས་སྲིད་ཇུས་དེ་ག་འདྲ་ཞིག་ཡིན་མིན་དེ། འདས་པའི་ལོ་ངོ་ ༦༠ ནང་བོད་ཁུལ་འགྱུར་ལྡོག་དངོས་ཀྱི་ཐོག་ནས་དམར་དམར་རྗེན་རྗེན་ལ་མངོན་ཡོད་པ་རེད།
མི་རིགས་རང་སྐྱོང་མེད་པ་བཟོས་ཏེ་ཀྲུང་ཧྰ་རྒྱ་རིགས་ཆེན་པོ་གཅིག་བསྒྱུར་བཟོ་དགོས་པའི་ཀྲུའུ་ཝེ་ཆོན་གྱི་རྩོམ་ཡིག་དེ་རྒྱ་ནག་མི་རིགས་ཆེན་པོའི་རིང་ལུགས་ཀྱི་འདུ་ཤེས་ཐོག་ནས་བཏོན་པའི་བསམ་ཚུལ་དང་ཆབ་སྲིད་ཀྱི་ཁ་ཕྱོགས་ཤིག་མངོན་པ་དེ་རེད།
འདི་ནི་རྒྱ་རིགས་ཆེན་པོར་རློམ་པའི་ཀྲུའུ་ཡིས་གཙོས་པའི་མི་རིགས་རིང་ལུགས་པ་དག་གིས་མངོན་འདོད་ཞིག་ཡིན་མོད་བསམ་ཚུལ་འདི་མངོན་དུ་འགྱུར་བར་བྱེད་པར་དོན་དངོས་ཐོག་ལས་སླ་པོ་གཅིག་གཏན་ནས་མེད།
གཅིག་བྱས་ན་རྒྱ་རིགས་ཆེན་པོར་གཅིག་བསྒྱུར་ཡོང་རྒྱུ་དང་ཡང་ན་རྒྱ་རིགས་ཆེན་པོ་ཁ་ཐོར་དུ་འགྲོ་མིན་དེ་ནི་ལྡོག་ཕྱོགས་ཀྱི་གནད་ལུགས་ཤིག་ཀྱང་ཡོང་ངེས་རེད། གང་ལྟར་ནའང་བོད་ཀྱིས་གཙོས་པའི་གྲངས་ཉུང་མི་རིགས་ཁག་གི་ཆོས་དང་། རིག་གཞུང་། སྐད་ཡིག ཐོབ་ཐང་སོགས་གཅིག་མཚུངས་སུ་མ་བྱུང་གི་བར་དུ་ནམ་ཡང་ཀྲུང་ཧྭ་རྒྱ་རིགས་ཆེན་པོ་གཅིག་བསྒྱུར་བྱ་འདོད་ཀྱི་འདོད་དོན་དེ་ཆེས་དཀའ་ཚེགས་ཅན་གྱི་ལམ་འཕྲང་དོག་པོ་གཅིག་ཏུ་འགྱུར་རྒྱུར་དོན་མི་ཟ།
སྐྱེ་བའི་ཐ་མ་དེ་ཤི་བའི་གནད་ལུགས་དེ་འཇིག་རྟེན་འདིའི་སྟེང་གི་སུས་ཀྱང་བསྒྱུར་བཅོས་བྱ་ཐབས་མེད་པའི་གནས་སྟངས་ཤིག་རེད། རྒྱ་ཁབ་དང་མི་རིགས་སུ་ཞིག་ཡིན་ཀྱང་ཆེས་སྟོབས་ཆེན་ཞིག་ནས་མཐར་ཁ་ཐོར་གྱི་སྟོབས་ཆུང་གཅིག་ཏུ་འགྱུར་རྒྱུ་དེ་ཡང་འཇིག་རྟེན་འདིའི་སྟེང་གི་ཆོས་ཉིད་ཅིག་རེད།
རང་བྱུང་ཀླད་པའི་རྩ་ཁམས་ཀྱི་ནང་དུ་འགྲོ་བ་མིའི་རིགས་ཀླད་པའི་ཆ་ཤས་འགའ་ཤས་ཤིག་ཚང་མེད་པའི་ཀྲུའུ་སོགས་ཀྱི་ཞེ་འདོད་དེ་ནམ་ཡང་རྨི་ལམ་ཙམ་ལས་གཏན་ནས་མངོན་འགྱུར་ཡོང་ཐབས་མེད།
ད་བར་གྱི་རྒྱ་ནག་གི་མི་རིགས་སྲིད་བྱུས་ཀྱང་དམིགས་དོན་འདི་ལས་གཡོལ་མེད་ཅེས་ད་བར་མཁས་མྱོང་ཅན་མང་པོས་བཤད་བཤད་པ་རེད། སྐུ་ཞབས་ཀྲུའུ་སྒེར་གྱི་མཚན་ཐོག་ནས་གློ་བུར་བསམ་ཚུལ་འདི་འདྲ་ཞིག་ཐོན་དོན་ནི་ཚོད་བགམ་ཞིག་མིན་ན་གང་ཡིན། སྐབས་འདིར་རྒྱ་ནག་གིས་བློ་ཁོག་འདི་འདྲ་ཞིག་སྟོན་འཆར་འདི་གཡོ་ཇུས་ཤིག་མིན་ན་གང་ཡིན། ཀྲུང་ཧྭ་རྒྱ་རིགས་ཆེན་མོར་བསྒྱུར་རྒྱུའི་འདོད་རྔམ་ཡིག་ཐོག་ནས་ཀྱང་འདི་ལྟར་ལག་ལེན་བྱས་ཚེ། ཉིན་མོ་དེ་ནས་མི་རིགས་མང་པོས་གྲུབ་པའི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཟེར་བ་དེ་ཚར་སོང་བ་རེད། ཡིན་ནའང་། འདི་ལ་ང་ཚོའི་ཆེ་ས་མཐོ་ས་ནས་ཐད་ཀར་ལན་འདྲ་གནས་སྐབས་མ་བཏབས་ན་ཡག་གི་རེད་འདོད།
ཨོ་ཡ ད་གང་འདྲ་འདུག དམིགས་ཡུལ་ངོ་མ་ལྷང་ལ་བུད་བྱུང་། ད་དུང་ང་ཚོས་རང་སྲིད་རང་སྐྱོང་གི་རྨི་ལམ་སྐྱིད་པོ་གཏོང་བཞིན་པ་མིན་ནམ། ད་རེ་བ་ཞིག་ཡོད་ས་རེད་པས། བོད་མི་ཚོ །
ཡང་འདིས་ཁྱི་སྐད་ཆེན་པོ་ཞིག་བརྒྱབ་བྱུང། རྡོ་ལོག་འགའ་ཞིག་མི་འཕེན་རང་འཕེན་རེད། རྒྱ་ནག་གཞུང་གིས་ད་བར་ལ་མི་རིགས་སྲིད་ཇུས་ཀྱི་ཁ་གཡང་ཅི་ཙམ་ཞིག་བསྒྲགས་པ་ཚང་མ་དོན་སྟོང་ཡིན་པ་དང་གཞི་རྩའི་དམིགས་ཡུལ་ངོ་མ་དེ་གཞི་ནས་ཀྲུའུའི་ཟུག་སྐད་ལས་གསལ་བོར་ཐོས་པ་འདི་རེད། ད་ནི་གྲངས་ཉུང་མི་རིགས་ཚང་མ་གཉིད་ལས་སད་རན་རེད། གལ་ཏེ་རྒྱ་རིགས་ཆེན་པོས་ཀྱང་ཁྱི་སྐད་འདིར་མོས་མཐུན་བྱས་ཚེ་མི་རིགས་ཀྱི་འགལ་བ་ཚབས་ཆེར་འགྲོ་སྲིད་ལ། དེའི་བར་ནས་གུང་ཁྲན་ཏང་ལ་ཁེ་ཕན་ཞིག་འཐོབ་འདོད་ཀྱི་རྨི་ལམ་ཞིག་ཀྱང་ཡོད་ངེས། ད་ང་ཚོས་ཇི་ལྟར་བྱ་འོས་སམ།
འདིའི་ཐད་ལ་དཔྱད་བརྗོད་ཅུང་རྒྱས་ཙམ་ཞིག་འབྲི་འདོད་བྱུང། ལྷག་པར་གཞུང་འབྲེལ་གྱིས་ལན་འདེབས་ཡག་པོ་ཞིག་གནང་ཐུབ་པའི་རེ་བ་ཞུ།
གནད་དོན་འདི་ནི་བོད་མི་རིགས་རྩ་མེད་གཏོང་འདོད་ཀྱི་སྲིད་བྱུས་ཁོ་ནར་ངོས་འཛིན་བྱེད་དགོས། སྐད་ཆ་འདི་ཡག་པོ་ཞིག་གཏན་ནས་མ་རེད།
འདི་ལ་མཐའ་གཅིག་ཏུ་ངོ་རྒོལ་བྱེད་དགོས་གནས་བབ་གལ་ཆེན་ཞིག་རེད།