ནང་བའི་སྐྱབས་འོག་ནས་འབུད་ནུས་པའི་བོད་མི་ག་ཚོད་ཡོད།

གཉའ . འབྲོང་ཐུ་བུ།

གཅིག

བཙན་བྱོལ་བོད་མིའི་ཆབ་སྲིད་ཀྱི་འཕོ་འགྱུར་ལས་བོད་རྒྱའི་གནད་དོན་ད་དུང་ཐག་ཆོད་མེད་པས་བོད་མི་སྤྱི་བོ་གནམ་བསྟན་མང་ཆེ་བར་བོད་ཀྱི་གནད་དོན་ཐད་སེམས་ཁུར་དང་ཅི་བྱ་གཏོལ་བྲལ་དུ་གྱུར་དང་འགྱུར་བཞིན་པའི་གནས་སྟངས་ཉིན་རེ་ནས་ཉིན་རེར་ཇེ་གསལ་ནས་ཡང་གསལ་དུ་འགྲོ་བཞིན་ཡོད། ༡༩༥༩ ལོར་༸གོང་ས་སྐྱབས་མགོན་ཆེན་པོ་སྐུ་འཁོར་བཙན་བྱོལ་དུ་ཕེབས་པ་ནས་བཟུང་བོད་མིའི་གྲངས་འབོར་དང་བསྡུར་ན་སྐུ་རྗེས་འབྲངས་ནས་སྐྱབས་བཅོལ་དུ་ཕེབས་མཁན་གང་འཚམ་བྱུང་ཞིང་། དེ་དག་གིས་༸གོང་ས་མཆོག་གི་བཀའ་དགོངས་བཞིན་དཀའ་ལས་རིམ་པར་བརྒྱབ་པར་བརྟེན་དེང་སྐབས་བཙན་བྱོལ་བོད་མིའི་སྒྲིག་འཛུགས་ཀྱི་ཆབ་དཔལ་རིག་གསུམ་སྲ་ཐག་ཐག་ཅིག་ཟེར་ན་དཀའ་མོ་ཡིན་ཡང་སྐྱབས་བཅོལ་བ་ཞིག་གི་ངོས་ནས་བལྟས་ན་འགྲིག་ཐག་ཆོད་རེད་སྙམ། ༸གོང་ས་མཆོག་གི་རླབས་ཆེན་དགོངས་གཞི་ནི་འཚེ་བ་མེད་པའི་ཉམས་བཞེས་དང་། དབུ་མའི་ལམ་ལག་ལེན་གྱིས་བོད་ཀྱི་བདེན་མཐའ་གསལ་རྒྱུ་དང་། འཛམ་གླིང་ཞི་བདེ་དང་མི་རིགས་འདྲ་མཉམ། ལྷག་པར་འཚེ་མེད་ཞི་བ་རྩ་བར་གྱུར་བའི་བོད་གངས་ཅན་གྱི་ཆོས་དང་རིག་གཞུང་གིས་འཛམ་བུ་གླིང་ལ་བག་ཆགས་བཟང་པོ་ཞིག་བསྐྲུན་རྒྱུ་དེ་རེད་སྙམ།

གཉིས།

ལོ་རབས་བརྒྱད་ཅུ་བའི་ནང་ལྷ་སར་ཞི་རྒོལ་བྱུང་བ་ནས་བོད་ཡུལ་སྟོད་སྨད་བར་གསུམ་དུ་མི་རིགས་ཀྱི་འདུ་ཤེས་གོང་མཐོར་སོང་དེ་དེང་སྐབས་བླ་མ་དང་གྲྭ་བཙུན་མི་སྐྱ་ཕོ་མོ་ཉི་ཤུ་རྩ་སྟོད་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་ལ་ཞི་རྒོལ་བྱས་ཡོད། འཐབ་རྩོད་འདིར་ནུས་པ་མངོན་གསལ་ཐོན་ཡོད་པ་སྨོས་མེད་ཡིན་ཡང་བོད་མིའི་མངོན་འདོད་ད་དུང་འགྲུབ་མེད་ལ་འཐབ་རྩོད་འདི་མུ་མཐུད་བསྐྱངས་ཀྱང་དམིགས་ཡུལ་མྱུར་དུ་འགྲུབ་ཐུབ་པའི་གདེང་ཚོད་ང་ཚོར་ཡོད་མེད་མི་ཤེས། བོད་ནང་གི་འཐབ་རྩོད་ཛ་དྲག་ཏུ་ཕྱིན་པ་དང་། ཡང་ན་དོན་རྐྱེན་རེ་རེའི་ཐད་བཙན་བྱོལ་བོད་མིའི་སྒྲིག་འཛུགས་ཀྱི་གཞུང་འབྲེལ་དང་། གཞུང་འབྲེལ་མ་ཡིན་པའི་ཚོགས་པ། མི་སྒེར་སོ་སོ་ནས་ཀྱང་དེ་མཚུངས་ཀྱིས་ལས་འགུལ་སྣ་ཚོགས་ཤིག་སྤེལ་ཡོད། འོན་ཀྱང་གོང་གི་གཞིས་བྱེས་གཉིས་ཀྱི་ལས་འགུལ་ལ་ནི་གནམ་ས་བླ་འོག་ལྟ་བུའི་ཁྱད་པར་བྱུང་ཡོད་པ་དང་། གཉིས་ཀ་འཚེ་མེད་ཞི་བ་ལས་མ་འདས་སྟབས། སྤུན་ཟླའི་རང་སྲོག་བཏང་བའི་ཕངས་སེམས་དང་། བཙན་བྱོལ་བོད་མིའི་ལས་འགུལ་གྱིས་རྒྱ་གཞུང་གིས་བོད་ཐོག་འཛིན་པའི་སྲིད་ཇུས་ལ་ནུས་པ་འདི་ཐོན་སོང་ཟེར་བའི་ཆེ་ཆེ་ཞིག་མིག་སྔར་སྟོན་རྒྱུ་དཀའ་མོ་ཡིན་སྟབས་དེང་སྐབས་འཚེ་མེད་ཞི་བ་དང་། ལམ་དབུ་མ་བློས་གཏོང་བྱེད་པའི་ཚོགས་པ་དང་། མི་སྒེར་ཤེས་ཡོན་ཅན། ད་དུང་སེར་མོ་བའི་ཁྲོད་དུའང་དྲག་པོའི་སྦྱོར་བ་རྩོམ་དགོས་པའི་བསམ་ཚུལ་འདོན་མཁན་རེ་ཟུང་བྱུང་ཡོད།

དཔེ་མཚོན་གཅིག་གཞིར་བཞག་ནས་བཤད་ན། དེ་རིང་རྫ་སྲས་བདེ་ཆེན་གྱིས་བོད་ཀྱི་དུས་བབ་དྲ་བའི་བསམ་ཚུལ་ཚན་པའི་ནང་༼ཞལ་འདོན་གཡོ་སྐྱོར་གྱི་འཁྲབ་ཚན་དང་པེ་ཅན་སྲིད་གཞུང་ལ་སྙིང་རྗེ་སློང་བའི་ལེའུ་མཇུག་སྒྲིལ་རན་རེད་༽ཅེས་པའི་ཁ་བྱང་འོག་བསམ་ཚུལ་དོན་ཚན་གསུམ་བྲིས་ཡོད་པའི་དོན་ཚན་དང་པོའི་ནང་གཞིས་བཞུགས་བོད་མིའི་མངོན་འདོད་ནི་མ་འོངས་པར་རང་སྲིད་རང་སྐྱོང་གིས་རྒྱ་ནག་དང་མཉམ་གནས་བྱེད་རྒྱུ་མིན་ཞིང་། བོད་ནང་གི་བོད་མི་ཚོས་དེ་འདྲའི་གནས་བབ་ལས་ཤི་རྒྱུ་བདམས་ཡོད་པ་དང་། རྒྱ་ནག་གི་དཔོན་ཆེན་ཞིག་གིས་བཤད་པའི་“བོད་རྒྱའི་འཐབ་རྩོད་ནི་ཁྱོད་ཤི་ང་གསོན་གྱི་འཐབ་འཛིང་ཡིན” ཞེས་པ་འདི་དང་། ང་ཚོར་རྒྱུས་མངའ་ཡོད་པའིོ་འབོད་ཚིག “རྒྱ་དམར་བོད་ནས་ཕར་རྒྱུགས། བོད་ཀྱི་བདག་པོ་བོད་མི་ཡིན” ཞེས་པའི་འབོད་ཚིག་འདི་གཉིས་ཞིབ་བསྡུར་གྱིས་བོད་མི་རིགས་དང་རྒྱ་མི་རིགས་མཉམ་གནས་ཡོང་རྒྱུ་མིན་པ་དཔེ་དང་བཅས་ལྟ་ཚུལ་བཏོན་འདུག་ལ། བཙན་བྱོལ་བོད་པ་ཚོས་པེ་ཅིན་གཞུང་ལ་སྙིང་རྗེ་དང་། བསམ་ཤེས་ལ་ངང་སྒུག་བྱས་པ་ནི་དངོས་ཡོད་དང་མི་འཚམ་པ་དང་། བོད་མིའི་བླ་བཙོང་། དགྲ་བོར་མགོ་འདོགས། མི་རབས་ཕྱི་མའི་གོ་ན་ངོ་ཚ་དགོས་པ་དང་། ལོ་རྒྱུས་ཀྱི་ཐེབ་ཐར་ནག་པོ་བཟོ་བྱེད་ཅིག་ཏུ་བལྟས་འདུག

དོན་ཚན་གཉིས་པའི་ནང་བར་སྐབས་ཤིག་ནས་ཟམ་གདོང་ཐེ་བའི་བཙན་བྱོལ་དཔོན་ཆེན་ཚོས་ཅི་ཞིག་དཔོག་མདོག་གིས་རྒྱ་ནག་པེ་ཅན་ལ་ཡིད་ཆེ་བླ་མེད་བྱས་ཡོད་པ་དང་། པེ་ཅན་གཞུང་ལ་གྲོགས་བསྒྲིག་རྒྱུའི་ཆེད་གསུམ་བཅུའི་དུས་དྲན་ལ་འཛོམས་པའི་བོད་རིགས་སྤུན་ཟླ་ཚོའི་འཐབ་རྩོད་ཀྱི་འབོད་ཚིག་མེད་པར་བཏང་དེ་བྱང་ཆུབ་སེམས་མཆོག་དང་། ཚད་མེད་ཡོན་ཏན་མ་སྐྱོར་དུ་བཅུག་པ་དང་། དེ་དང་དེ་ལ་སོགས་པའི་སྒོ་ནས་བོད་རིགས་སྤུན་ཟླ་ཚོའི་འཐབ་རྩོད་ཀྱི་ནུས་པ་ཚལ་བ་བརྒྱ་རུ་བཏང་བ་ལོ་རྒྱུས་ཀྱིས་མི་བརྗེད་པ་དང་། ལོ་རྒྱུས་ཀྱིས་བརྗེད་ཀྱང་ཁོ་བོས་མི་བརྗེད་ཅེས་གོང་སྨོས་ཟམ་གདོང་དང་དཔོན་ཆེན་ཚོ་ཞེས་པའི་སྒྲས་བརྗོད་དོན་ངོ་མ་མི་གསལ་ཡང་དེ་ལ་སོགས་པར་སྐྱོན་བརྗོད་ནན་མོ་བྱས་ཏེ་ནག་ཉེས་ཆེན་པོ་ཡིན་པར་གླེང་འདུག་ལ། བོད་དོན་ཛ་དྲག་གི་སྐབས་བོད་ནང་དུ་སྐུ་སྲོག་མེ་ལ་སྦར་བའི་ཡ་ངའི་གནས་སྟངས་ལ་སྡུག་བསྔལ་མི་བྱེད་པར་གཞོན་ནུ་ལྷན་ཚོགས་ཀྱིས་རྒྱ་ནག་གི་རྒྱལ་དར་མེར་བསྲེགས་བཏང་བར་ངུ་འབོད་དང་། རྒྱ་མི་དམར་པོའི་སེམས་ཁམས་ལ་ཕོག་ཐུག་འགྲོ་མིན་ཐད་སེམས་སྡུག་བྱེད་པ་དང་། དེ་ལུགས་གླེང་སློང་བྱས་ཏེ་སེམས་ཁྲལ་བྱེད་ཀྱིན་ཡོད་པ་དང་། དེ་དག་གིས་པེ་ཅིན་ལ་ཡིད་རྟོན་དང་རེ་བཅོལ། ཡང་ན་ཞེད་སྣང་རབ་ཏུ་འཐུག་པ་དག་གིས་རྒྱ་གཞུང་གི་སེམས་ཁམས་སྲུང་སྐྱོབ་ལས་ཨང་དང་པོར་བོད་ནང་གི་སྤུན་ཟླ་ཚོའི་ཚེ་སྲོག་སྐྱོབ་ཐབས་ལ་བསམ་བློ་གཏོང་དགོས་པ་དང་། གནས་སྐབས་འདི་དམ་འཛིན་བྱེད་དགོས་པར་ཡང་གླེང་འདུག

 སྐད་ཆའི་ཟུར་ངོས་མང་པོ་ཞིག་ན་གཟས་ས་མང་དག་ཅིག་ཡོད་པ་འདྲ་ཡང་སྤྱི་བམ་ཙམ་ལས་གསལ་ཁ་དེ་ཙམ་བཏོད་མེད། ཚང་མར་གསལ་ཁ་གཏོད་རྒྱུ་གནས་སྐབས་བཞག་ཀྱང་གཞོན་ནུས་རྒྱ་མིའི་རྒྱལ་དར་མེར་བསྲེགས་བཏང་བར་ངུ་འབོད་བྱེད་མཁན་ཞེས་ཟུར་མདའ་འཕངས་ཡོད་པ་དེ་ཨ་རིག་དགེ་མཐོང་གིས་དུས་བབ་དྲ་བའི་མི་སྒེར་གྱི་ཟིན་བྲིས་ནང་༼གཞོན་ནུ་ལྷན་ཚོགས་ཀྱིས་བསམ་བློ་ཐོངས།༽ཞེས་དང་།༼གཞོན་ནུ་དང་འཚེ་བའི་ལས་འགུལ།༽ཞེས་པའི་ཁ་བྱང་འོག་གི་བསམ་ཚུལ་དེ་གཉིས་ལ་གཟས་པ་འདྲ། དོན་ཚན་གསུམ་པའི་ནང་པེ་ཅིན་ནས་ཉི་མ་རེ་རེ་བཞིན་སྡིགས་དམོད་དང་། བོད་ནས་དུས་ཚོད་རེ་རེ་བཞིན་གསོད་གཏུབ། བོད་མི་ཚོ་གཅིག་ཤོར་གཉིས་ཤོར་གྱིས་རང་སྲེག ལོ་རེ་བཞིན་བོད་ནང་གི་འཐབ་རྩོད་ཀྱི་རྣམ་པ་གཞན་དུ་འགྱུར་ནའང་བཙན་བྱོལ་དུ་གྲུབ་འབྲས་སྣ་གཅིག་སྟོན་རྒྱུ་མེད་པའི་སྲིད་ཇུས་རྟག་པ་དང་། འགྱུར་བ་སྤུ་ཙམ་མེད་པའི་ལས་འགུལ་བརྫུས་མ་ཞིག་གིས་རང་མགོ་གཡོགས་པར་བརྗོད་ཅིང་། མདོར་ན་བཙན་བྱོལ་ནང་བོད་དོན་དྲིལ་བསྒྲགས་དང་། བསྔོ་བ་སྨོན་ལམ་ཀུན་བརྫུས་མ་དང་གཡོ་ཟོལ་རྐྱང་བ་ལས་མ་འདས་པར་སྨྲས་འདུག རྫ་སྲས་དང་རྫ་སྲས་ལྟ་བུའི་བསམ་ཚུལ་འདི་སྲན་མ་མ་ཆོད་པར་ཡོས་ཞེས་པར་སྨྲ་རྒྱུ་ཡོད་མེད་མི་ཤེས་ཀྱང་ནང་དོན་དང་རྒྱབ་ལྗོངས་གང་ལ་བལྟས་ཀྱང་འཚེ་མེད་ཞི་བ་དང་། དབུ་མའི་ལམ་གྱི་སྲིད་ཇུས་ཀྱིས་བོད་ཀྱི་གནད་དོན་ཐག་ཆོད་རྒྱུ་མིན་པར་ངེས་པར་བོད་རྒྱ་གཉིས་ཁྱོད་ཤི་ང་གསོན་གྱི་ལམ་དུ་འགྲོ་དགོས་པའི་ལྟ་ཚུལ་ཁོ་ན་ལས་མ་འདས་སོ།།

གསུམ།

 སྐབས་འདི་ནས་ང་ཚོས་བསམ་བློ་གཏོང་དགོས་ས་ཞིག་ནི་༸གོང་ས་མཆོག་གི་དགོངས་གཞི་དང་། བོད་གཞུང་གི་སྲིད་ཇུས་ལ་རྒྱབ་འགལ་བྱེད་མཁན་གྱི་བོད་མི་ག་ཚོད་ཡོད་ཟེར་བ་འདི་དང་། ཡང་ན་བཙན་བྱོལ་བོད་མིའི་ཆབ་སྲིད་ཀྱི་ངོ་བ་དྲག་པོར་བསྒྱུར་ཐུབ་བམ། བདག་གིས་བལྟས་ན་འདི་ནི་ལྟ་ཚུལ་འདོན་མཁན་རྫ་སྲས་དང་རྫ་སྲས་ལྟ་བུའི་ཆེས་གནད་འགག་གི་བསམ་བློ་གཏོང་ས་ཞིག་རེད་འདོད། ད་དུང་གནད་དོན་གཞན་ཞིག་ནི་ཆོས་རྒྱལ་བཀའ་དྲིན་ཅན་རྣམས་ཀྱི་སྐབས་ནས་བཟུང་བོད་ནི་སངས་རྒྱས་ཆོས་ལུགས་དང་ཁ་འབྲལ་ཐབས་མེད་པའི་མི་རིགས་ཤིག་ཡིན་ལ། ནང་བའི་ཆོས་ནི་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པ་གཞི་རྩར་བཟུང་བའི་ཆོས་ལུགས་ཤིག་ཡིན་སྟབས་འགག་རྩ་འདི་ལ་སླེབས་དུས་ནང་བའི་སྐྱབས་འོག་ནས་འབུད་མཁན་གྱི་བོད་མི་ག་ཚོད་ཡོད་དམ། རྫ་སྲས་དང་རྫ་སྲས་ལྟ་བུའི་བསམ་བློ་གཞི་ལ་བཞག་ནས་བཤད་ན་ངེས་པར་ང་ཚོ་གྲྭ་བ་ཡིན་མི་ཆོག་ལ་དེ་ལས་ཀྱང་ནང་བ་ཡིན་མི་ཆོག་པའི་གནས་ལུགས་འདི་ངེས་དགོས་པ་ཞིག་རེད།

བསྟན་པར་དགྲ་བྱུང་ན་སྟོན་པས་མདུང་ཟུངས་ཟེར་བ་དང་། དེང་སྐབས་འཛམ་གླིང་མི་མང་ལ་ཆོས་ལུགས་ཀྱི་ཆེད་དུ་འཚེ་བའི་ལས་བྱས་ཀྱང་འཚེ་བར་མི་འགྱུར་བའི་འགྲེལ་བཤད་འདི་འགྲོ་ས་གཏན་ནས་མེད། རྒྱུ་མཚན་ཆོས་ལུགས་དང་སྲིད་ལུགས་གང་གི་གནད་དོན་ཡིན་ཡང་གང་ལྟར་སྦྱོར་བ་དངོས་འཚེ་བ་ཡིན་ན་དེ་ག་རང་ལ་ཆ་འཇོག་རྒྱུ་ལས་མ་འདས་པ་དབྱི་སི་ལན་གྱི་ཆོས་ལུགས་ཀྱི་གནད་དོན་གཅིག་པུས་ཐག་གཅོད་ཐུབ་ལ་གལ་ཏེ་བོད་མི་མང་པོ་ཞིག་དྲག་པོའི་འཐབ་རྩོད་ནང་ཞུགས་ཚེ་བོད་རྒྱའི་གནད་དོན་ངོ་མ་ཐག་ཆོད་མིན་གནད་དོན་གཙོ་བོ་ཡིན་པ་ཤེས་དགོས་ཤིང་། བོད་ཀྱི་གནས་བབ་དེང་སྐབས་ལས་ཀྱང་སྡུག་ཏུ་མི་འགྲོ་བའི་ངེས་པ་ནམ་ཡང་མེད་པས་ན་དེ་དག་རེ་རེར་བསམ་བློ་གཏོང་ཐུབ་དགོས་ལ་ཝ་རྔ་མ་ཤ་ལེར་འབྲོ་བ་ལས། སྟག་འཛུམ་དྲུག་ཉིལ་ལེར་ཤི་ན་དགའ་ཟེར་མཁན་བོད་མི་ཚང་མ་མིན་པའི་གནས་སྟངས་ཀྱང་ར་འཕྲོད་དགོས་པར་འདོད།

མི་རེ་རེ་ལ་ཚུགས་ཐུབ་ཀྱི་བསམ་བློ་དང་། རང་གཤིས་ལ་དཔགས་ཏེ་སྐད་ཆ་ཡོད་ཆོག་ཆོག་ཡིན་པས་བདག་གི་ལྟ་ཚུལ་འདི་ནི་རྫ་སྲས་དང་རྫ་སྲས་ལྟ་བུ་དག་གི་བསམ་བློ་དང་ལྟ་ཚུལ་གོལ་ནོར་དུ་སོང་དེ་༸གོང་ས་མཆོག་གི་དགོངས་གཞི་དང་། འཚེ་མེད་ཞི་བའི་ལྟ་གྲུབ། དབུ་མའི་ལམ་གྱི་སྲིད་ཇུས། བཙན་བྱོལ་བོད་གཞུང་གི་ལངས་ཕྱོགས་ལ་ཁ་གཏད་ཆགས་འདུག་ཟེར་བ་མིན་པར། དོན་ངོ་མར་ང་ཚོར་ལམ་ཁ་གཞན་ཞིག་ཡོད་དམ། དེ་ཡང་དྲག་པོའི་ལམ་ཁ་ཡིན་ནམ། དོན་ངོ་མར་ལམ་ཁ་འདིར་འགྲོ་བའི་བོད་མི་ཁ་བཤད་དོན་ཐོག་ལ་འབེབས་མཁན་མིང་ཐོ་བཀོད་དེ་ས་ཡིག་བསྡུ་རུབ་བྱས་ན་ག་ཚོད་ཡོད་དམ། དེ་གནད་འགག་ཅིག་རེད་བསམས། རྒྱུ་མཚན་ནི། མི་རིགས་ཤིག་གི་གནད་དོན་ནི་མི་རེ་ཟུང་གི་གནད་དོན་མ་ཡིན་པར་མི་རེ་རེར་འགན་ཁུར་ཡོད་སྟབས་བསམ་ཚུལ་འདོན་རྒྱུའི་དབང་ཚད་དང་། ལས་འགུལ་སྤེལ་རྒྱུའི་ལམ་ཁ་སུ་ལའང་ཡོད་པ་ཞིག་ཡིན་སྟབས་ཨ་མིའི་བུ་ལ་འཇོན་ཐང་ཡོད་ན། དགའ་ལྡན་ཁྲི་ལ་བདག་པོ་མེད་ཅེས་པའི་ཁ་དཔེ་འདི་ཚར་གཅིག་སྐྱོར་དགོས་བྱུང་སོང་ལ། འོན་ཀྱང་ང་ཚོ་ནང་བ་པ་ཡིན་པའི་ངོས་ནས་ནང་ཆོས་ཀྱི་ངོ་གདོང་ལ་དྲི་མག་མི་བྱུགས་རྒྱུ་ནི་གནད་ཀྱི་དོན་པོ་ཡིན་པས་རང་ཅག་གི་འཐབ་རྩོད་ཀྱི་ངོ་བོ་ཤི་གསོན་གྱི་འཐབ་འཛིང་དུ་གྱུར་ན་རང་ཉིད་ནང་བ་པ་ཞིག་མ་ཡིན་པའི་བདེན་དཔང་འཛམ་གླིང་མི་མང་ལ་སྟོན་དགོས་རྒྱུ་གལ་ཆེ་བར་སེམས།།

ཟུར་དུ་གསལ་བཤད། འདི་ནི་ང་ཚོ་བོད་ཀྱི་གནས་བབ་ལ་གཞིགས་ཏེ་བསམ་ཚུལ་དྲང་བོར་བརྗོད་པ་ཡིན་པས་ཁྱོད་ལན་ང་ལན་དང་། ཁྱོས་མ་འཇོན་ཚུལ་གྱི་དགོས་མེད་ཀྱི་བསམ་ཚུལ། ཆོལ་ཁ་དང་ཆོས་བརྒྱུད་ཕྱོགས་འགལ་ལྟ་བུའི་སྐད་ཆའི་རིགས་མཆན་དུ་མི་སྤེལ་བར་ཞུ། རྒྱུ་མཚན་ནི་གཞན་ལ་ཕན་མ་ཐོག་ཀྱང་གནོད་སྐྱེལ་རྒྱུའི་བསམ་བློ་བདག་ལ་མེད། །