ནག་ཆུ་ས་ཁུལ་གྱི་བོད་མི་ཁག་ཅིག་གིས་ད་ལོའི་གསུམ་བཅུའི་དུས་དྲན་ཉིན་ངོ་རྒོལ་བྱེད་འཆར་ཡོད་པ་རྒྱ་གཞུང་གིས་ཤེས་རྟོག་བྱུང་སྟེ་འཛིན་བཟུང་བྱས་ཡོད་འདུག
འདི་གར་གནས་ཚུལ་བཏང་འབྱོར་ལ། ཟླ་འདིའི་ཕྱི་ཚེས་ ༩ ཉིན་བོད་མི་འཛོམས་ལྷ་དཀར་གཙོས་བློ་ཁ་མཐུན་པའི་མི་སྣ་མང་པོ་ཞིག་ནག་ཆུ་ཁུལ་ཐོག་ཏུ་ཡོད་པའི་༼ བསོད་ནམས་ཞིང་བོད་ལུགས་གསོལ་ཚིགས་ཁང ༽ ཞེས་པར་འཛོམས་ཏེ། རྒྱ་དམར་སྲིད་གཞུང་གིས་དམྱལ་བ་མི་ཡུལ་ལ་འཕོས་པ་ལྟ་བུའི་གསོད་རྡུང་མནར་གཅོད་སོགས་བྱས་ནས་མི་ལོ་ཧྲིལ་པོ་ ༥༣ དྲན་གསོའི་ཉིན་མོར་ཞི་རྒོལ་བྱེད་འཆར་དང་། འབོད་ཚིག་ནང་བོད་ལ་རང་དབང་དགོས་པ། རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་འཇུག་དགོས་པ། དགོན་པ་སྒོ་རྒྱབ་པ་རྣམས་སླར་ཕྱེ་དགོས་པ། གྲྭ་པ་རྣམས་ལ་སློབ་གཉེར་གྱི་རང་དབང་སྤྲོད་དགོས་པ། འགྲོ་བ་མིའི་ཐོབ་ཐང་དགོས་པ་སོགས་ཀྱི་སྐད་འབོད་བྱེད་འཆར་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་དོན། “ རྒྱ་དམར་གསང་བའི་ཉེན་རྟོག་པས་ལས་འགུལ་སྤེལ་འཆར་དེ་སྔ་ཉིན་ནས་ཤེས་ཏེ། ཟླ་ཐང་ཞང་ནས་ཡིན་པ་ཀརྨ་ཐར་ལམ་དང་རྩ་ལ་ཞང་ནས་ཡིན་པ་སྲིད་དགའ་གཉིས་ཚེས་ ༩ མཚན་མོ་ཆུ་ཚོད་ ༣ པའི་ཐོག་འཛིན་བཟུང་བྱས་པ་དང་། ཚེས་ ༡༠ ཉིན་གྱི་ཞོགས་པ་ཆུ་ཚོད་ ༨ པ་ཙམ་ལ་འཛོམས་ལྷ་དཀར་ཡང་འཛིན་བཟུང་བྱས་འདུག དེ་བཞིན། ཚེས་ ༡༤ ཉིན་ཟླ་ཐང་ཞང་ནས་ཡིན་པ་འབྲུག་གྲགས་དང་། ཆགས་ཟེ་ཞང་ནས་ཡིན་པ་ཚེ་མགོན་གཉིས་གནས་ཚུལ་དེའི་རྐྱེན་པས་འཛིན་བཟུང་བྱས་འདུག་ལ། ད་ལྟ་ཁོང་ཅག་གར་ཡོད་གར་འཁྲིད་ཀྱི་གནས་སྟངས་ཤེས་རྟོགས་ཐུབ་ཀྱི་མི་འདུག” ཅེས་སོགས་བརྗོད་འདུག
ཀརྨ་ཐར་ལམ་དང་། འཛོམས་ལྷ་དཀར་ནི་ཁམས་ནགས་ཤོད་འབྲི་རུ་རྫོང་ཟླ་ཐང་ཞང་ནས་ཡིན་པ་དང་། སྲིད་དགའ་ནི་རྩ་ལ་ཞང་ནས་ཡིན་འདུག
རང་ཉིད་ཀྱི་གདམ་ཀ་ལ་འགྱོད་གདུང་མེད་ཅིང་། ཕྲག་ཏུ་བབས་པའི་འོས་འགན་ལ་ཕྱི་ནུར་མེད། ཁྲག་གིས་མཚན་རྟགས་བཀོད་དུས་འཇིག་རྟེན་འདིར་སྡོམས་ཚིག་བཀོད་ཚར།