གཟའ་ཕུར་བུ་ཉིན་༸གོང་ས་མཆོག་གིས་ལྡི་ལི་གཙུག་ལག་སློབ་གྲྭར་བཀའ་སློབ་སྩལ་སྐབས། རྒྱ་གར་དུ་ནང་པའི་ཤེས་ཡོན་བསྟི་གནས་འཛུཊ་རྒྱུ་གལ་ཆེན་ཡིན་པ་དང་། བོད་རིཊ་གཞོན་སྐྱེས་ཚོས་ནང་ཆོས་ལ་དོ་སྣང་སྤྲོད་དགོས་སྐོར་གསུངས་འདུག
ལྡི་ལི་གཙུག་ལག་སློབ་ཆེན་གྱི་ཇི་ལྟར་གདན་ཞུས་གནང་དོན་ལྟར། ༸གོང་ས་མཆོག་ཟླ་འདིའི་ཕྱི་ཚེས་ ༢༢ ཉིན་གྱི་ཞོགས་པར་བཞུགས་སྒར་ངྷ་ས་ནས་སེར་སྐྱ་མང་ཚོགས་ཀྱི་ཕེབས་སྐྱེལ་ཁྲོད་གྷ་གྷིལ་གནམ་ཐང་བརྒྱུད་ལྡི་ལིར་འབྱོར་ཡོད་པ་དང་། ཉིན་རྒྱབ་ཆུ་ཚོད་གཉིས་པའི་སྟེང་ལྡི་ལི་གཙུག་ལག་སློབ་ཆེན་གྱི་ཚོགས་ཁང་དུ་དགེ་ལས་སློབ་ཕྲུག་ ༢༠༠༠ བརྒལ་བར། ཤེས་ཡོན་ཡས་རྒྱས་དང་མཉམ་དུ་བཟང་སྤྱོད་གོང་སྤེལ་གཏོང་ཐབས་ཞེས་པའི་བརྗོད་གཞིའི་ཐོག་གསུང་བཤད་གནང་འདུག་ལ། གསུང་བཤད་དེར་ལྡི་ལི་མཐོ་སློབ་ཁག་ཏུ་སྐྱོད་བཞིན་ཡོད་པའི་བོད་རིགས་སློབ་ཕྲུག་བརྒྱ་སྐོར་ཞིག་ཆེད་དུ་མཉམ་ཞུགས་གནང་འདུག
མཛད་སྒོའི་ཐོག་མར་གཙུག་ལག་སློབ་ཁང་དེའི་སྤྱི་ཁྱབ་འགན་འཛིན་གཞོན་པ་སྐུ་ཞབས་པུ་རཱ་ཝ་སེ་ཤང་མཆོག་གིས། ༧གོང་ས་མཆོག་སློབ་གྲྭ་དེར་གདན་ཞུ་གནང་དགོས་པའི་དམིགས་ཡུལ་དང་། བཟང་སྤྱོད་ཀྱི་གལ་ཆེན་རང་བཞིན་ངོ་སྤྲོད་གནང་ཡོད་པ་དང་། དེའི་རྗེས་༸གོང་ས་མཆོག་གིས་དགེ་ལས་སློབ་ཕྲུག་ཚོར་བཟང་སྤྱོད་ཐད་ཁོང་ལ་འགྲོ་བ་མིའི་རིན་ཐང་གོང་སྤེལ་གཏོང་ཐབས་དང་། ཆོས་ལུགས་མཐུན་སྒྲིལ། བོད་མིའི་ཆབ་སྲིད་ཐུགས་འགན་འཁུར་རྒྱུ་བཅས་འགན་གསུམ་ཡོད་ནའང་། ད་ཆར་བོད་མིའི་ཆབ་སྲིད་འཛིན་སྐྱོང་གི་ཐུགས་འགན་དེ་མང་ཚོགས་ཀྱིས་བདམས་པའི་མགོ་ཁྲིད་ཚོར་རྩིས་སྤྲོད་གཙང་མ་གནང་ཡོད་སྐོར་དང་། འཚེ་མེད་ཞི་བའི་ལྟ་གྲུབ་ཀྱི་རྩ་བ་ནི་གཞན་ལ་གུས་བརྩི་དང་གཞན་ཕན་གྱི་བསམ་བློའི་ཐོག་ཡོང་དགོས་པ་ཞིག་ཡིན་པ་དང་། དུས་རབས་ཉེར་གཅིག་པ་དེ་ཞི་བདེའི་དུས་རབས་ཤིག་བཟོ་རྒྱུར་གཞོན་སྐྱེས་ཚོར་གོ་སྐབས་ཡོད་པ།མི་ཚང་མས་འགྲོ་བ་མིའི་བསམ་བློའི་ནང་གཞན་ཕན་དང་བྱམས་སྙིང་རྗེའི་བསམ་བློ་སྐྱེས་ཐབས་ལ་འབད་བརྩོན་གནང་དགོས་སྐོར་སོགས་གསུངས་ཡོད། ༸གོང་ས་མཆོག་གིས་མཐོ་སློབ་ཏུ་སྐྱོད་བཞིན་པའི་བོད་རིཊ་སློབ་ཕྲུག་ཚོར་བཀའ་སློབ་བསྩལ་དོིན། “ ང་ཚོས་བོད་པ་རང་ལ་ཡོད་པའི་ཐུན་མོང་མ་ཡིན་པའི་རིག་གཞུང་ལ་དོ་སྣང་སྤྲད་དེ་བདག་གཅེས་བྱ་དགོས་ཀྱི་འདུག དེ་སྔོན་གཞས་པ་གྲགས་ཅན་མེ་ཁུལ་ཇག་སིན་ (Micheal Jackson) གྲོངས་རྗེས། ངྷ་སར་བོད་པའི་གཞོན་སྐྱེས་ཤིག་གིས་མེ་ཁུལ་ཇག་སིན་གྲོངས་ནས་ཁོ་རང་སེམས་སྡུག་ཆེན་པོ་བྱུང་།༧རྒྱལ་བ་རིན་ཆེས་ཐུགས་སྨོན་གནང་རོགས་ཞེས་སྐྱབས་རྟེན་ཞིག་བསྐུར་འདུགསྤྱིར་མི་ཞིག་ཡིན་པའི་ཆ་ནས་ཧ་ཅང་ཡག་པོ་རེད། མེ་ཁུལ་ཇག་སིན་སྐད་གྲགས་ཡོད་པ་ཧ་ཅང་ཡག་པོ་རེད།ཕྱོགས་གཞན་ཞིག་ནས་བསམ་བློ་བཏང་ན་རྣམ་གཡེང་གི་དབང་དུ་ཕྱིན་པ་རེད། གླུ་གཞས་ཁོ་ནར་ཡིད་འཕྲོག་སྟེ་བསྡད་པ་རེད།ཚུར་ཕྱོགས་སུ་སེམས་ཀྱི་བདེ་སྐྱིད་འཚོལ་ཐབས་དང་།སྡུག་བསྔལ་ལ་གདོང་ལེན་བྱེད་སྟངས་ལ་དོ་སྣང་མ་སྤྲད་པར་ཕྱིའི་ལྟད་མོ་ཁོ་ནར་མགོ་འཁོར་ཏེ་བསྡད་ན་ངོ་མཚར་སྐྱེ་རྒྱུ་ཡོད་པ་མ་རེད། མ་གཞི། མེ་ཁུལ་ཇག་སིན་ང་རང་གིས་ངོ་ཤེས་ཀྱི་ཡོད། ཁོང་མི་ཧ་ཅང་ཡག་པོ་ཞིག་འདུགཁོང་ན་བ་རེད་མ་གཏོགས་རྒྱ་གར་ལ་ང་ཐུག་ཏུ་ཡོང་གི་ཡིན་ཞེས་བརྗོད་བྱུང་།ཁྱེད་རང་ཚོས་ཕྱིའི་ཁྲ་ཁྲ་ཟང་ཟིང་ལ་མགོ་འཁོར་ཏེ། ང་ཚོ་བོད་པར་ཡོད་པའི་ལོ་སྟོང་ཕྲག་རིང་གི་དཔལ་ན་ལེནྡྲའི་མཁས་པའི་བསླབ་བྱ་དེ་དག་ལ་དོ་སྣང་མ་སྤྲད་ན་རིམ་བཞིན་བརྗེད་འགྲོ་རྒྱུའི་ཉེན་ཁ་ཡོད ” ཅེས་གསུངས།
༧གོང་ས་མཆོག་གིས་མུ་མཐུད་གསུངས་དོན། “ དེང་སང་ཕྱོགས་གཅིག་ནས་བསམ་བློ་བཏང་ན། ནུབ་ཕྱོགས་ཚན་རིག་པ་རྣམ་དཔྱོད་ཡོད་མཁན་ཚོས་བོད་ཀྱི་སངས་རྒྱས་པའི་ཆོས་ནང་མིའི་སེམས་ལ་བསྒྱུར་བཅོས་གཏོང་སྟངས་སྐོར་གསུངས་ཡོད་པ་དེའི་ཐོག་དོ་སྣང་སྤྲོད་ཀྱི་འདུགབོད་པ་ཚོས་བོད་སྐད་སློབ་དགོས་ཀྱི་ཡོད་པ་མ་རེད། ནུབ་ཕྱོགས་པ་ཚོར་བོད་སྐད་གསར་དུ་བསླབ་དགོས་པའི་དཀའ་ངལ་ཡོད་ཀྱང་ཁོང་ཚོས་དོ་སྣང་བྱེད་ཀྱི་ཡོད་པ་རེད། ང་ཚོར་བསླབ་བྱ་དེ་དག་སོ་སོའི་སྐད་ཡིག་ནང་ཡོད་སྟབས་ངེས་པར་དུ་དོ་སྣང་སྤྲོད་དགོས་པ་རེད། ཉེ་ཆར་ང་རང་རྒྱ་མི་ཞིག་ལ་ཐུག་བྱུང་།སྐབས་དེར། ངས་བོད་མིའི་སེམས་ཤུགས་དེ་ནང་ཆོས་ཀྱི་ལྟ་གྲུབ་ལས་བྱུང་བ་རེད། ནང་ཆོས་ཀྱི་ལྟ་གྲུབ་དེ་ལོ་ ༢༥༠༠ ལྷག་ཕྱིན་ཡོད། གུང་ཁྲན་གྱི་དམར་པོའི་ལྟ་བ་ལོ་ ༢༠༠ ཙམ་ལས་ཕྱིན་མེད་སྟབས། བོད་པའི་སེམས་ཤུགས་མེད་པ་བཟོ་ཐུབ་ཀྱི་མ་རེད་ཅེས་བཤད་པ་ཡིན། ཁྱེད་ཚོ་ཚང་མས་སོ་སོའི་རིག་གཞུང་ཤེས་ཐུབ་པ་བྱ་དགོས།དེ་ནི་ཞེན་ཁོག་དང་རྨོངས་ཞེན་བྱས་པའི་སྐད་ཆ་གང་ཡང་མ་རེད།རྒྱུ་མཚན་དང་གནད་འགག་ཤེས་རྒྱུ་གལ་ཆེན་པོ་རེད་ ” ཅེས་གསུངས་ཡོད།
རྒྱ་གར་སློབ་ཕྲུག་ཅིག་གིས་༸གོང་ས་མཆོག་ལ་རྒྱ་གར་ནི་ཆོས་ལུགས་རིས་མེད་ཀྱི་རྒྱལ་ཁབ་ཅིག་ཡིན་སྟབས། རྒྱ་གར་དུ་ནང་པའི་བསྟི་གནས་འཛུགས་རྒྱུར་གལ་ཆེན་གཟིགས་ཀྱི་ཡོད་མེད་བཀའ་འདྲི་གནང་སྐབས། “ ང་ཚོ་བོད་མི་རྣམས་རྒྱ་གར་གྱི་ཡིད་རྟོན་རུང་པའི་དགེ་ཕྲུག་ཆགས་ཡོད་ལ། ནང་ཆོས་ཀྱི་ཤེས་ཚད་ཐོག་ནས་ཀྱང་དགེ་ཕྲུག་ཚོ་དེ་ཙམ་སྐྱོ་བོ་རང་མེད་སྟབས། རྒྱ་གར་དུ་ནང་པའི་ཤེས་ཡོན་བསྟི་གནས་ཁང་འཛུགས་དགོས་རྒྱུ་ཧ་ཅང་གལ་ཆེན་པོ་རེད་ ” ཅེས་༸གོང་ས་མཆོག་གིས་བཀའ་ལན་གནང་འདུག
གསར་འགོད་པ། དཔལ་ལྡན།
ལེགས་བྱས་ཟླ་བའི་འོད་རིས་འཛུམ་པའི་དཔྱིད།།
ས་ཆེན་དགེ་བར་ཕྱོགས་པའི་མངོན་རྟགས་སུ།།
ཉེ་བར་ཤར་བ་གང་གི་ཐུགས་ཀྱི་བཅུད།།
ངོམས་མེད་རོལ་བའི་བུ་སློབ་སྐལ་བ་བཟང་།།
རང་བྱུང་གླུ་དང་ལྷན་སྐྱེས་མེ་ཏོག་གི་དྲི་ངད།།
ཤག་ཤག་རྦབ་ཆུ་བསིལ་འཇམ་རླུང་བུ་ཡི་རེག་བྱ།།
འདི་ན་གང་ཡོད་ལེགས་པའི་མཆོད་པ་དང་དུངས་པ།།
འོད་སྣང་དཀར་པོའི་ཕྱོགས་སུ་རང་ཤུགས་ཀྱིས་རྒྱུ་སོང་།།
གང་ལ་འཚམ་པའི་ཆོས་དང་ལམ་བསྟོན་གྱིས།།
འགྲོ་བའི་ཡིད་ཀྱི་མུན་པ་སེལ་བར་མཛད།།
གངས་ཅན་འགྲོ་བའི་སྐྱབས་མགོན་འཛམ་གླིང་མིག།
འགྲོ་དྲུག་ཐར་ལམ་འགོད་མཛད་ཁྱེད་ལ་འདུད།།
ལྷ་ཞེས་གྲགས་པ་ཅན་པོ་མ་མཐོང་ཐལ།།
འདྲེ་ཞེས་མ་རབས་ཤིག་ཀྱང་མ་ཤེས་ཐལ།།
དོན་དངོས་སྟོན་ལ་མཁས་པའི་དམ་པ་ཞིག །
སྐྱབས་དང་མགོན་དུ་བཞེངས་པ་ཤིན་ཏུ་སྐྱིད།།
ཁྱེད་ཀྱི་རྣམ་དཔྱོད་ཉི་མ་བཞིན་དུ་འབར། །ངོ་མཚར་ལམ་སྟོན་འཛམ་གླིང་ཁྱོན་ལ་ཁྱབ། །གྲགས་སྙན་ས་ཡི་གོ་ལས་མ་ཁྱོགས་པར། །མེས་པོས་འཇིག་རྟེན་གསུམ་དུ་སྤྲུལ་པར་ངེས། །
གངས་ཅན་བོད་ཀྱི་བདེ་སྡུག་ཁྱེད་ཀྱིས་མཁྱེན། །འདི་ཕྱི་གཉིས་ཀྱི་ལམ་སྟོན་ཁྱེད་ལ་ཞུ། །ལུས་ངག་ཡིད་གསུམ་བླ་མ་ཁྱེད་ལ་འབུལ། །སྐུ་ཚེ་མི་འགྱུར་རྡོ་རྗེའི་བྲག་བཞིན་ཤོག །