དམར་པོ་མེ་ཡི་མི་རབས།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༥༠སྟེང་གི་རྩོམ་སྒྲིག་པའི་གཏམ།

འདས་པའི་མི་ལོ་ལྔ་བཅུ་ང་གསུམ་རིང་། རྒྱ་གཞུང་གིས་མར་ལེ་རིང་ལུགས་པའི་ཟོར་བ་དང་ཐོ་བ་ཕྱར་ཏེ་ཁ་བ་སྒང་པའི་རི་ཆུ་སྣོད་བཅུད་ཀྱི་མཛེས་སྡུག་ཐལ་བར་བརླགས་ཤིང་། བཟོ་ཞིང་དམག་གསུམ་གྱི་དྲག་དཔུང་དྲངས་ཏེ་དབྱངས་གསལ་སོ་བཞིའི་རྨུ་ཐག་ལ་བརྒྱུས་པའི་གངས་ཅན་བོད་པའི་སྐད་དང་རིག་གནས་ཀྱི་རྨང་རྡོ་ཚལ་བུར་གཏོར་རྗེས།   བོད་མི་རིགས་འདིའང་རྣམ་ཤེས་བརླགས་ཟིན་པའི་མན་ཇུ་བ་ལྟར་བེམ་གཟུགས་སུ་བསྒྱུར་འདོད་ཀྱི་རྨི་ལམ་བཅངས་ཡོད།  ཡིན་ནའང་། བཙན་པོའི་རུས་རྐང་མ་བོར་བའི་ཁ་བ་རི་བའི་ཕ་མེས་ཡང་མེས་རྣམས་ཀྱིས། ས་སྒང་རིལ་མོ་འདིའི་སྤྱི་གཙུག་ནས་བདེན་པའི་ང་རོ་བསྒྲགས་ཤིང་། མི་རིགས་འདིའི་བླ་སྲོག་གི་དར་ཆ་འཛམ་གླིང་གི་རི་ཆུ་ཐང་གསུམ་ཡོངས་ལ་བསྒྲེངས་ཏེ། རྒྱ་གཞུང་གི་སྟོང་འདང་རྨི་ལམ་དེའི་ནམ་མཁའ་ཚལ་བུར་གཤགས་ཡོད།

    དེ་རིང་། ས་ཆེན་འདིའི་མུན་པ་མེ་ལ་བསྲེགས་བཞིན་མཆོངས་འོང་པའི་མི་རབས་གསར་པའི་མེ་རི་འདི་ནི།  ཁྲག་གིས་ཚོས་པའི་རྒྱ་གཞུང་གི་དར་དམར་འོག་མདའ་ཆར་གྱིས་ཕྱེ་མར་འཐག་ཏེ།  འཇིགས་ཡེར་བའི་ ‘ང་དགུ’ ལོའི་ལོ་ཟླ་ནག་པོའི་ཁོང་གསེང་ལ་སྦས་པའི།  བོད་ཁ་བ་ཅན་གྱི་ཕ་མེས་ཡང་མེས་ཚོའི་དཔའ་སྙིང་གི་ཚ་དྲོད་མ་ཡལ་བའི་ཚ་བོ་ཚ་མོ་རྣམས་རེད།  ཚེ་སྲོག་གི་མར་མེའི་འོད་ངོགས་སུ་སྤོབས་པའི་དཔུང་རྡང་ཀྱུག་ཀྱུག་ལངས་བཞིན་པའི་མེ་རི་ལྟ་བུའི་མི་རབས་འདི་ནི། རྒྱ་གཞུང་གིས་བསླུ་བྲིད་བཅིངས་འགྲོལ་གྱི་ཁ་གཡང་སྒྲོག་བཞིན། ཤེས་རྨོངས་མུན་ནག་གི་ ‘རེ་དགུ’ ལོའི་དུས་རབས་ཀྱི་ཡོལ་བའི་རྒྱབ་ཏུ། བཀྲེས་ལྟོགས་མནར་གཅོད་ཀྱི་རྒྱ་མཚོར་བཏབས་པའི་བོད་མི་ས་ཡ་གཅིག་གི་བདེན་དོན་གྱི་འོད་སྣང་མ་ཡལ་བའི་རྣམ་ཤེས་ཀྱི་རུ་དཔུང་རེད།

    ༡༩༩༨ ལོར་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་མཆོག་གིས་ཚེ་སྲོག་གི་མེ་རི་སྦར་བ་ནས་བཟུང་།  ད་ལྟའི་བར་བོད་ཕྱི་ནང་གཉིས་སུ་བཙན་པོའི་ཁྲག་དྲོན་རྒྱུ་བཞིན་པའི་རྒྱལ་གཅེས་དཔའ་བོ་དཔའ་མོ་ ༣༧ གྱིས་འཁྱག་ལ་འབྱར་བའི་མི་རིགས་འདིའི་བླ་སྲོག་མེ་རུ་སྒྲོན་ཏེ། རྒྱ་གཞུང་གི་འཆམ་མཐུན་ཁ་གཡང་འོག་གི་མི་སེར་སྤེལ་བའི་སྲིད་ཇུས་དེ་དམར་རྗེན་དུ་ཕུད་ཡོད་ལ། དཔལ་འབྱོར་ཁེ་ཕན་གྱི་འདོད་རྔམ་གྱིས་བཟི་སྟེ་སོ་སོའི་བླ་རུ་བཀུར་ཞིང་སྲོག་ཏུ་འཛིན་པར་སྒྲོག་པའི་རང་དབང་ཐོབ་ཐང་གི་རིན་ཐང་ཆུ་ལ་སྐུར་བཞིན་པའི་རྒྱལ་ཚོགས་དང་། འཛམ་གླིང་ཤར་ནུབ་ལྷོ་བྱང་གི་རྒྱལ་ཁབ་ཡོངས་ཀྱི་ངོ་གདོང་ཚ་བེར་བེར་བཟོས་ཡོད། འདི་ནི་མེ་རུ་ལྟར་མཆེད་བཞིན་པའི་ཁ་བ་རི་བའི་མི་རབས་འདིའི་དཔའ་སྙིང་གི་གོམ་སྟབས་དང་པོ་དེ་ཡིན།

    སང་ཉིན། རྒྱ་གཞུང་གི་མི་རིགས་ཚར་གཅོད་ཀྱི་སྙིང་ཁམས་ནག་པོ་དེ། ད་དུང་བདེན་པའི་འོད་སྣང་གིས་འབྱེད་མ་ནུས་ཚེ། ཚེ་སྲོག་གི་མེ་རི་འདི་སྐལ་བའི་མེ་དཔུང་དུ་གྱུར་ཏེ། དམར་པོ་ཏང་གི་གློ་སྙིང་མཆིན་གསུམ་བསྲེགས་ངེས་ཡིན་ལ། བྱ་མོའི་དབྱིབས་ཀྱི་ས་ཁྲ་དེའི་ལོ་ངོ་ལྔ་བཅུར་མངལ་ལ་བཟུང་བའི་ས་སྒང་རིལ་མོ་དེའང་མངལ་ལས་འཆོར་སྲིད། དེ་བཞིན། བདེན་པའི་ང་རོ་འདིས་འདོད་རྔམ་གྱིས་བརླམས་པའི་དམངས་གཙོའི་རྒྱལ་ཁབ་དག་གི་ཁ་མིག་ད་དུང་དཀྲོགས་མ་ཐུབ་ཚེ། མེ་དཔུང་དེའི་རླབས་རྒྱུན་མཉམ་འབྲེལ་རྒྱལ་ཚོགས་ཀྱི་མིག་མདུན་དང་། ཨ་རིའི་ཕོ་བྲང་གི་མདུན་ཐང་། ཡུ་རོབ་གྲོས་ཚོགས་ཀྱི་སྒོ་ཁ། ཐ་ན། འཛམ་གླིང་ས་སྒང་རིལ་མོ་འདིའི་རི་ཆུ་ཐང་གསུམ་ཡོད་ཚད་ལ་མཆེད་སྲིད།