‘‘དུས་ནམ་ཞིག་བོད་མི་ཉིས་སྟོང་གིས་རང་ལུས་མེར་བསྲེགས་བཏང་ཚེ།’’

ཧྥེ་ལེ་ཕཱི་རྒི་ལྦང་གཞོ་ལྦོས་བརྩམས། སྙན་བཟང་གཡུང་དྲུང་ཚེ་རིང་གིས་བསྒྱུར།

སྤྱི་ཟླ་གསུམ་པའི་ཚེས་བཅུ་བདུན་ཉིན། ཕྲུ་གུ་བཞིའི་ཕ་རྒན་དུ་གྱུར་པའི་རེབ་གོང་ལུག་རྫི་ཞིག་གིས་རང་ལུས་མེར་བསྲེགས་བཏང་ཡོད། བོད་ཀྱི་རང་དབང་གོ་དོན་དུ་རང་ལུས་མེར་བསྲེགས་དང་རྒྱ་གཞུང་གི་དྲག་གནོན་ལ་ཞི་རྒོལ་གནང་མཁན་དག་དང་འཕྲད་པ།

རང་ལུས་མེར་སྲེག་གཏོང་མཁན་ཁོང་གི་བྱིས་པ་བཞི་ལས་གསུམ།

རོང་པོ་དགོན་ཆེན་གྱི་ནང་དུ་གློ་བུར་དུ་རྒྱུན་ལྡན་མིན་པའི་ཟང་ཟིང་ཞིག་མཆེད་པ་དང་། གྲངས་འབོར་མང་བའི་མཇལ་བ་དང་འདུ་འཛི་ཆེ་བའི་ལམ་འགྲོ་བ་རྣམས་སྒྲོལ་མའི་ཐང་ཆེན་བརྒྱུད་དེ་འཚིག་དྲི་འདྲེས་མའི་དུད་སྤྲིན་འཕྱུར་པའི་ཕྱོགས་དེར་བསྐྱོད། རེབ་གོང་གི་ཚོང་པ་རྡོ་རྗེའི་ངག་ཞུམ་ཞུམ་གྱིས་‘‘ངས་ཚུལ་འདི་མཐོང་མ་ཐག ང་མི་ཚོགས་ཀྱི་འཚང་ཁའི་ནང་དུ་འཛུལ་ནས་དོན་དག་ག་རེ་བྱུང་མེད་ལ་བལྟས་པ་ཡིན་’’ཞེས་དང་། ‘‘མི་ཚོགས་སྐྱོ་ལྷང་ལྷང་གིས་བཀྱགས་ཏེ་ཀི་ལྡིར་བྱེད་ཅིང་། ཁ་ཤས་ཀྱིས་གསོལ་བ་སྨོན་ལམ་འདེབས་བཞིན་འདུག ང་ཉེ་སར་བསླེབས་པ་ན། ངས་འབར་གྱིན་པའི་མི་ཞིག་ཐང་དུ་ཡོད་པ་མཐོང་བྱུང་། ངས་ཀྱང་མི་གཞན་པ་ཚོ་དང་འདྲ་བར་དཔར་བརྒྱབ་པ་ཡིན་’’ཞེས་བཤད་རྗེས། ཁོང་གིས་ལག་འཁྱེར་ཁ་པར་ལས་གསལ་པོར་ཐེབས་མེད་པའི་སྐུ་པར་བསྟན་བྱུང་ལ། ཁ་བཏགས་དཀར་སེར་གྱིས་གཡོགས་པའི་དཀྱིལ་དུ་འགྲོ་བ་མིའི་གཟུགས་སུ་སྣང་བ་ཞིག་མེས་འཚིགས་ཏེ་ཐང་དུ་འགྱེལ་འདུག

སྤྱི་ཟླ་༣པའི་ཚེས་༡༧ཉིན་གྱི་ཞོགས་པར། རྡོ་རྗེ་ལགས་ཀྱིས་ལོ་གཅིག་གི་རིང་བྱུང་བའི་བོད་མིས་རང་ལུས་མེར་བསྲེགས་གནང་བའི་ཐེངས་ཉེར་དགུ་བ་མཐོང་བ་རེད། ཁོང་ཡང་སྐྱར་དངངས་འདར་རྒྱག་བཞིན་‘‘མི་རྣམས་ཀྱིས་མེ་ལྕེ་གསོད་པར་འདོད་རྔམ་མི་བྱེད་ནའང་། མཆོད་པའི་དོད་དུ་སྐུའི་མཐའ་འཁོར་དུ་ཁ་བཏགས་འཕེན་བཞིན་འདུག’’ཅེས་དང་། ‘‘ཉེ་ཆར་བོད་ཀྱི་སྤྱི་ཚོགས་ཁྲོད་དུ་གཏམ་ཡན་ཞིག་ཁྱབ་ཅིང་། དེས་མི་མང་པོ་ཞིག་གི་སེམས་པར་ཡིད་ཆེས་ཤིག་དྲངས་པ་ནི། མི་རྣམས་ཀྱིས་ནམ་ཞིག་བོད་མི་ཉིས་སྟོང་གིས་རང་ལུས་མེར་བསྲེགས་བཏང་བ་ཡིན་ན། བློས་བཏང་འདིར་ལྷ་དང་ལྷ་མོའི་ཚོགས་ཀྱིས་རྫུ་འཕྲུལ་ཞིག་སྟོན་ངེས་པ་དང་། མཐར་བོད་ལ་རང་དབང་འཐོབ་རྒྱུ་དེ་རེད’’ཟེར།

ཁ་བཏགས། ཉིན་དེར་སྐྱེས་བུ་ཞིག་དཔའ་འབར་གསོན་པོར་གྱུར་མཁན་ཞིག་བྱུང་བ་དེའི་མཚན་ལ་བསོད་ནམས་དར་རྒྱས་ཞུ་ཞིང་། ཁོང་ནི་དགུང་ལོ་བཞི་བཅུ་ཞེ་བཞིར་སོན་ཞིང་ཕྲུ་གུ་བཞིའི་ཕ་རྒན་ཞིག་རེད། ཁོང་གིས་ནང་མི་འཚོ་ཐབས་ཀྱི་ཆེད་དུ་རོང་པོ་དགོན་ཆེན་དུ་ཤིང་ལས་ཕྱོགས་ཀྱི་ལས་ཀ་གནང་བ་དང་། ཁོང་ནི་མཐོ་སར་ཆགས་པའི་ཤ་སྦྲང་གྲོང་ཚོར་བཞུགས་ཤིང་། ས་དེ་ནི་རོང་པོ་དགོན་ཆེན་ནས་ཀི་ལོ་མི་ཊར་བརྒྱད་ཀྱི་མཚམས་སུ་ཡོད། ཡུལ་དེར་འགྲོ་བར་ཧ་ཅང་དོགས་གཟབ་བྱེད་དགོས་ཀྱི་ཡོད་འདུག རང་ལུས་མེར་སྲེག་གི་ལུས་འགུལ་འདི་བོད་ཁམས་ཡོངས་དང་། ལྷག་པར་དུ་སི་ཁྲོན་ཞིང་ཆེན་དང་མཚོ་སྔོན། ཀན་སུའུ་ཞིང་ཆེན་ཁག་ཏུ་ཁྱབ་རྗེས། སྲིད་གཞུང་གིས་ཕྱི་རོལ་གྱི་གསར་འགོད་པ་རྣམས་ས་ཁུལ་དེ་དག་ལ་བསྐྱོད་མི་ཐུབ་ཆེད་ལམ་ཁ་ཚང་མ་བཀག་དགོས་བྱུང་ཡོད།

ཟླ་བ་གསུམ་པའི་ཚེས་བཅུ་བདུན་ཉིན་རང་ལུས་མེར་སྲེག་གཏོང་མཁན་བསོད་ ནམས་དར་རྒྱས་ལགས་ཀྱི་མ་དང་བཟའ་ཟླ།

བོད་མི་རྣམས་ཀྱིས་བརྗོད་པ་ལྟར་ན། ཉིས་སྟོང་བརྒྱད་ཀྱི་ས་བྱི་ལོའི་ཞི་རྒོལ་ཆེན་མོ་བྱུང་བ་ནས་བཟུང་‘‘བོད་རང་སྐྱོང་ལྗོངས་’’ནི་བཀག་སྡོམ་གྱི་ཨ་ལོང་ནང་དུ་བཅུག་རྗེས། ལོ་བཞིའི་གོང་ནས་བཟུང་གསར་འགོད་པ་རྣམས་ཀྱང་ས་ཁུལ་དེར་བགྲོད་དཀའ་བ་བཟོས་ཤིང་། ཐབས་ཤེས་འདི་ལ་བརྟེན་ནས་པེ་ཅིན་སྲིད་གཞུང་གིས་བློ་ཡུད་དུ་ཤོང་དཀའ་བའི་བོད་མིའི་བློས་བཏང་དང་གནས་ཚུལ་ཛ་དྲག་ཁག་ཇེ་ཆུང་དུ་གཏོང་ཞིང་འགེབ་བསྲུང་བྱེད་ཀྱི་ཡོད་ནའང་། བཙན་བྱོལ་དུ་ཡོད་པའི་བོད་པ་ཚོས་ཕ་ཡུལ་གྱི་གྲོང་དང་གྲོང་ཁྱེར་གྱི་ཕ་ཡུལ་མི་དག་ལ་འབྲེལ་བ་བྱས་ཏེ་གནས་ཚུལ་དག་ཁྱབ་བསྒྲགས་བྱེད་ཐུབ་ཀྱི་ཡོད། རེབ་གོང་དང་དེ་བཞིན་བོད་མི་གཉུག་སྡོད་བྱེད་པའི་གྲོང་ཁྱེར་ཁག་ཏུ་ཉིན་མཚན་མེད་པར་དམར་དམག་སྐོར་ཚོ་དང་སྐོར་ཚོ་བྱས་ཏེ་འགོག་རྒོལ་གྱི་སླད་དུ་སྐོར་གཡེང་བྱེད་པ་དང་། དེ་བཞིན་དུ་རྒྱ་བོད་གཉིས་ཀ་ཡིན་པའི་བདེ་འཇགས་ཉེན་རྟོག་པས་ཀྱང་ལམ་ཁ་ཚང་མར་བྱ་ར་བྱེད་ཀྱིན་ཡོད་སྟབས། ཉེ་ཆར་གསར་འགོད་པ་རྣམས་བོད་ཡུལ་དུ་བསྐྱོད་པར་འདོད་རྔམ་འཕྱུར་ནའང་ཁོང་ཚོ་ཕྱིར་ལོག་གནང་དགོས་བྱུང་ཡོད། གང་ལྟར་ལམ་ཁ་ཡག་ཤོས་ནི་གསང་ལམ་ཕྲ་མོར་ཞུགས་རྒྱུ་དེ་རེད།

ང་ཚོ་གསང་ལམ་ཕྲ་མོ་ཞིག་བརྒྱུད་དེ་ཤ་སྦྲང་དུ་ཕྱིན་པ་ཡིན། རི་སྡེ་འདིར་དུད་ཁྱིམ་དྲུག་བརྒྱ་ཡོད་པ་དང་ཡུལ་མི་ཕལ་ཆེ་བ་ནི་ཡིག་རྨོངས་པ་ཤ་སྟག་རེད། རྒྱུ་མཚན་ནི་ཆེས་ཐོག་མའི་སློབ་གྲྭ་ནི་ལོ་གཉིས་ཀྱི་གོང་ཙམ་ལས་འཛུགས་མ་ཐུབ་པས་རེད། ཐུན་རིན་རྫོང་མི་དམངས་སྲིད་གཞུང་གིས་གྲོང་ཚོ་འདིར་ཐོན་མ་ཐག་པའི་མཚམས་དེར་གློག་སྡོང་ཞིག་བཙུགས་ཏེ་དེའི་སྟེང་དུ་གཟུགས་མཐོང་འཕྲུལ་ཆས་བཙུགས་ཡོད་པ་དེར་ཐུན་རིན་རྫོང་ཉེན་རྟོག་ལས་ཁུངས་ཀྱིས་ཐད་ཀར་དུ་ལྟ་རྟོག་བྱེད་པ་མ་ཟད། ཁ་སང་དེ་རིང་གཟུགས་མཐོང་འཕྲུལ་ཆས་ཇེ་མང་དུ་ཕྱིན་པ་དང་། ཉུང་མཐར་ཡང་གཟུགས་མཐོང་འཕྲུལ་ཆས་གཉིས་གསུམ་ཙམ་ཡོད་པ་དེ་དག་ཕར་འགྲོ་ཚུར་འོང་གི་ལམ་ཁ་བཙུགས་ཏེ་རྟོག་ཞིབ་བྱེད། སྐུ་ལུས་མེར་བསྲེགས་བཏང་བའི་སྐུ་གཤེགས་དཔའ་བོ་དམ་པ་ཁོང་གི་ཤུལ་ལུས་ནང་མི་ཚོར་མྱ་ངན་འཚམས་འདྲི་གནང་ཆེད། ཉིན་རེར་བོད་ཁམས་ནས་མི་བརྒྱ་ཕྲག་མང་པོ་མཚམས་མི་ཆད་པར་རླངས་འཁོར་ཆུང་བ་དང་། སྤྱི་སྤྱོད་རླངས་འཁོར། ཁ་ཤས་རྐང་ཐང་གིས་འབྱོར་ཞིང་། མི་རྣམས་གྲལ་བསྒྲིག་སྟེ་ཧ་ཅང་སྐྱོ་ཉམས་ངང་དཔའ་བོ་དམ་པ་དེའི་གདུང་ཐལ་བཞུགས་སའི་ཆེས་སྤྱིར་བཏང་གི་མཆོད་ཁང་དེར་སྐྱོད་པར་བྱེད། འཚང་ཁ་གཡོ་བའི་མཆོད་ཁང་ཆུང་ཆུང་དེའི་ནང་དུ་སྐུ་གཤེགས་དཔའ་བོ་ཁོང་གི་སྐུ་པར་ཞིག་དང་། བཤམས་མི་ཆོག་པའི་རྒྱལ་བ་རིན་པོ་ཆེའི་སྐུ་པར་ཞིག ད་དུང་དར་གོས་སྣ་ཚོགས་ཁྲ་ཆིལ་ལེར་འདུག

ཐོ་གཞུང་། རོང་པོ་དགོན་པའི་གྲྭ་པ་ཚོས་སྐུ་ཕུང་ཞུགས་འབུལ་གནང་བ་དང་། ཁོང་གིས་རང་ལུས་མེར་སྲེག་གི་ལས་འགུལ་སྤེལ་ནས་ཉིན་ཁ་ཤས་ཀྱི་རྗེས་སུ། ཕྱོགས་གང་ས་ནས་མི་མང་པོ་ཕྱོགས་གཅིག་ཏུ་འཛོམས་ཏེ་ཟང་ཟིང་ལང་ལོང་བྱས་ནའང་། ཡུལ་མི་སྲིད་གཞུང་གིས་མི་ཚོགས་ཀྱི་ཁ་གཏོར་ཐུབ་མེད།

ཁྱིམ་ཚང་འདིའི་ཕྱོགས་ཤིག་ཏུ་ཕྱུ་པ་གྱོན་པའི་བུད་མེད་ཚོས་དར་གོས་ཀྱིས་བརྒྱུས་པའི་ལུང་ཐག་ཅིག་ལ་འཇུས་ཏེ་མ་ཎི་འཁོར་ལོ་ཆེན་པོ་ཞིག་བསྐོར་ཅིང་། ན་བཟའ་རྒྱ་སྨུག་བཞེས་པའི་གྲྭ་པ་ཞིག་དང་ལོ་དྲུག་ནས་ཉེར་གསུམ་བར་དུ་སོན་པའི་བསོད་ནམས་དར་རྒྱས་ཀྱི་ཕྲུ་གུ་བཞི་པོས་འབུལ་བ་བསྣམས་ཡོང་བའི་འགྲུལ་བ་ཚོར་སྣེ་ལེན་བྱེད་པ་དང་། རི་སྡེ་འདིའི་ཡིག་ངོ་ཆོད་པ་ཞིག་གིས་འབྲི་དེབ་ཅིག་ཏུ་ཐོ་འགོད་གནང་བཞིན་འདུག

ཤ་སྦྲང་དུ་དཔའ་བོ་ཁོང་གི་མཆོད་ཤོམ་གྱི་མདུན་དུ།

ཁྱིམ་ཚང་དཀྱུས་མ་ཚོས་ཇ་བག་ཆུང་རེ་དང་ཡང་ན་ནས་འབྲུའི་སྒྱེ་མོ་རེ་ཤིང་ཁང་ཞིག་ཡོད་པ་དེར་འཇོག་པ་དང་། ཁ་ཤས་ཀྱིས་ཡུ་སྒོར་སྟོང་ཕྲག་བཅུ་གཉིས་བར་དུ་འབུལ་མཁན་ཀྱང་འདུག འདི་ནི་རྒྱུ་ནོར་ཉུང་ཉུང་ཞིག་མ་རེད། བསོད་ནམས་དར་རྒྱས་ཀྱི་ཕྲུ་གུ་ཞིག་གིས་ལག་ཟུང་ཐལ་མོ་སྦྱར་ཏེ་སྐད་ཤུགས་ཆུང་ངུས་‘‘ཕ་ལགས་ཀྱིས་རང་ལུས་མེར་བསྲེགས་མ་བཏང་བའི་སྔོན་དུ་ང་ཚོར་སྐད་ཆ་ཅི་ཡང་བཤད་མ་སོང་། ཁོང་གིས་དེ་ལྟར་གནང་བ་ང་ཚོའི་སེམས་ནའང་ཡོད་པ་མ་རེད་’’ཟེར། རི་སྡེ་འདིའི་རྒྱ་སྐད་ཤེས་ཤིང་ཡི་གེ་ཤེས་མཁན་ཞིག་གིས་འབོམ་སྐད་དང་བཅས་ཏེ་སྐད་སྒྱུར་བྱས་སོང་། ‘‘ནང་མི་ཚང་མས་ཁོང་གི་བློས་བཏང་འདིར་སྤོབས་པ་ཞིག་ཏུ་ཆ་འཇོག་གནང་གི་ཡོད་དམ་’’ཞེས་འདྲི་སྐབས། ‘‘ང་ཚོས་ཁྱེད་ཀྱིས་དྲི་བ་འདིར་ལན་གསལ་པོ་ཞིག་འདེབས་མི་ཤེས། ཡིན་ནའང་དྲི་བ་འདིའི་ལན་ཁྱེད་ཀྱི་སེམས་ན་ཁྲིགས་ཁྲིགས་ཡོད་པ་རེད་’’ཅེས་ཡི་གེ་ཤེས་མཁན་དེས་དོགས་སྣང་གི་རྣམ་འགྱུར་སྟོན་བཞིན་བཤད་སོང་།

བོད་ནང་དུ་བཀག་སྡོམ་དང་། བོར་བརླག བཙོན་འཇུག ཡང་ན་མནར་གཅོད་སོགས་འབྱུང་གི་ཡོད་པ་ནི་ཆེས་རྒྱུན་ལྡན་གྱི་སྣང་ཚུལ་ཞིག་རེད། ཐབས་ལམ་ཞིག་ཡོད་པ་ནི་ཁ་རོག་གེར་སྡོད་རྒྱུ་དང་། ཡང་མིན་ན་སྡུག་རྩུབ་ཀྱི་སྲིད་ཇུས་འདིར་རྒྱུན་ཆད་མེད་པར་ངར་ཤུགས་དང་བཅས་ཏེ་ཞི་རྒོལ་བྱེད་རྒྱུ་དེ་རེད། བོད་ཀྱི་སྙན་ངག་པ་སྐལ་བཟང་ལགས་ཀྱིས་‘‘ང་ཚོ་བོད་མི་རིགས་ནི་དད་ལྡན་གྱི་མི་རིགས་ཤིག་ཡིན་སྟབས། བླ་ན་མེད་པའི་ཡིད་ཆེས་དང་ཆོས་ལུགས་མེད་པ་ཡིན་ན་འཚོ་ཐབས་ཡོད་པ་མ་རེད་’’ཟེར། ཡང་། ཁོང་གིས་‘‘ང་ཚོས་དུས་རྒྱུན་བོད་དུ་རང་ལུས་མེར་བསྲེགས་བཏང་བའི་དཔའ་བོ་དང་དཔའ་མོ་རྣམས་ཀྱི་མཚན་ཐོ་ཁག་གློག་འཕྲིན་དང་འཕྲིན་ཡིག་བརྒྱུད་རྒྱ་གར་དུ་བཞུགས་པའི་གོང་ས་རྒྱལ་བ་རིན་པོ་ཆེར་གཏོང་གི་ཡོད་པ་དང་། རྒྱལ་བ་རིན་པོ་ཆེས་གཤིན་པོ་དེ་དག་ལ་བསྔོ་བ་སྨོན་ལམ་གནང་གི་ཡོད་པ་མ་ཟད། སྐུ་གཤེགས་དཔའ་བོ་ཚོའི་མཚན་ལ་གཟིགས་པ་ཙམ་གྱིས་ཀྱང་དགེ་བ་རླབས་ཆེན་གསོག་གི་ཡོད་’’ཅེས་བརྗོད་བྱུང་།

རྒྱ་ནག་པེ་ཅིན་གྱི་ཕྱོགས་ནས་རྒྱལ་བ་རིན་པོ་ཆེར་‘‘ཁ་བྲལ་རིང་ལུགས་པ་’’ཞེས་མཚན་སྨད་གཏོང་བཞིན་ཡོད་ལ། རྒྱ་གཞུང་གིས་དུས་རྒྱུན་དུ་བོད་ཀྱི་གྲྭ་བཙུན་ཚོར་བཙན་སྐུལ་དང་དྲིལ་བསྒྲགས་བྱས་ཏེ་ཁོང་ཚོའི་རྩ་བའི་བླ་མར་མཚན་སྨད་གཏོང་བར་ཁས་ལེན་བྱེད་འཇུག་གི་ཡོད། རྒྱལ་བ་རིན་པོ་ཆེས་རྒྱ་གཞུང་གིས་བོད་ཀྱི་ཡུལ་གྲུ་ཁག་ཏུ་སྤེལ་བཞིན་པའི་མི་སེར་སྤེལ་བའི་སྲིད་ཇུས་དེར་རྒོལ་གཏམ་གཏོང་གི་ཡོད་སྟབས། བདུན་ཕྲག་འདིའི་ནང་དུའང་རྒྱ་ནག་གཞུང་གིས་ཡང་སྐྱར་‘‘ནཱ་ཛི་ལས་གདུག་རྩུབ་ཆེ་བ་ཡོད་’’ཅེས་སྐྱོན་བརྗོད་བྱས་པ་དང་། རྒྱལ་བ་རིན་པོ་ཆེས་རྒྱ་ནག་གིས་མི་སེར་སྤེལ་བའི་སྲིད་ཇུས་དང་སྡུག་རྩུབ་ལ་གཞིགས་ཏེ་‘‘ཧེ་ཐུ་ལེས་འཇུའུ་མི་རིགས་ལ་དམར་གསོད་བྱས་པ་དང་མཚུངས་’’ཞེས་གསུངས་ཡོད། བོད་ཀྱི་རྩོམ་པ་པོ་ཞིག་གིས་ནན་བརྗོད་གྱིས་‘‘ཉིས་སྟོང་བརྒྱད་ཀྱི་ས་བྱི་ལོའི་ཞི་རྒོལ་ལ་བརྟེན་ནས་བྱུང་བའི་དྲག་གནོན་གྱི་སྲིད་ཇུས་དེ་ནམ་ཡང་བཟོད་སྒོམ་བྱེད་མི་ཐུབ་པར་གྱུར་ཡོད་’’ཅེས་དང་། ལོ་གཉིས་ཀྱི་གོང་ནས་བཟུང་། བོད་ཀྱི་སློབ་གྲྭ་ཁག་ཏུ་བོད་ཡིག་སློབ་ཁྲིད་བྱེད་མི་ཆོག་པ་དང་། ཐ་ན་སློབ་ཆུང་ཁག་ཏུའང་བོད་ཡིག་འཁྲིད་མི་ཆོག་པ་བཟོས་ཡོད་ཟེར།

བོད་ཀྱི་ལས་བྱེད་པ་ཞིག་གིས་‘‘ཉིས་སྟོང་བརྒྱད་ཀྱི་གོང་དུ། རྒྱ་གཞུང་གིས་མཚམས་མི་ཆད་པར་ཧ་ཅང་བསྐྱར་ཟློས་ཀྱིས་ང་ཚོ་བོད་མི་རིགས་ནི་རྗེས་ལུས་ཡིན་པ་དང་། ངེས་པར་དུ་རྒྱ་འགྱུར་གྱིས་དེབ་རབས་ཅན་དུ་འགྱུར་དགོས་ཚུལ་བཤད་ནའང་། བོད་ཀྱི་ཆོས་པ་དང་། ཤེས་ཡོན་པ། ཐ་ན་ལུག་རྫི་ཡན་ཆད་ཀྱིས་རྒྱ་གཞུང་གི་མུན་ནག་སྡུག་རྩུབ་འདི་ལ་བརྟེན་ནས་ངེས་ཤེས་གསལ་པོ་ཞིག་རྙེད་པ་ནི། རྒྱ་ནག་གིས་བོད་ཀྱི་སྐེ་དུམ་བུར་བྲེགས་ཏེ་བོད་གསོན་ནའང་འདྲ། འཆི་ནའང་འདྲ། རྒྱ་ནག་གིས་བཙན་བཟུང་བྱ་རྒྱུ་ཡིན་པ་འདིས། བོད་པ་རྣམས་ཀྱིས་ཀྱང་རང་ཉིད་བོད་པ་ཡིན་པའི་འདུ་ཤེས་འདི་ལྟ་བུ་ཞིག་བོད་ཀྱི་ལོ་རྒྱུས་ནང་དུ་བྱུང་ཡོད་པ་མ་རེད་’’ཅེས་བརྗོད་བྱུང་།

འཆི་བ། གྱེན་ལངས་ཀྱི་རྣམ་པ་ནི་ཕྱོགས་ངོས་མི་འདྲ་བ་མང་པོ་ཞིག་གི་ངོས་ནས་ཡོང་གི་ཡོད། ཀན་ལྷོ་རྨ་ཆུ་རྗོང་གི་སློབ་འབྲིང་དུ་དགེ་རྒན་གྱི་ཕྱག་ལས་གནང་མཁན་བུད་མེད་ཅིག་གིས་བོད་ཡིག་འཁྲིད་མི་ཆོག་པའི་སྲིད་ཇུས་ལ་རང་ལུས་མེར་བསྲེགས་གཏོང་མཁན་ཞིག་དང་འབྲེལ་ནས་བཤད་རྒྱུར་‘‘ང་ཚོས་ཧ་ཅང་གཟབ་གཟབ་ཀྱིས་བོད་མི་ནང་ཁུལ་དུ་བོད་ཀྱི་མིང་ཚིག་ཁོ་ན་ཉིད་བེད་སྤྱོད་ཇེ་མང་དུ་གཏོང་གི་ཡོད་པ་དང་། བོད་པ་ཚོས་སྔོན་ཆད་རྒྱ་ཚིག་མང་པོ་ཞིག་བེད་སྤྱོད་གཏོང་གི་དེ་དག་རིམ་གྱིས་བོད་ཚིག་ནང་གསར་བོས་བྱས་ཏེ་བེད་སྤྱོད་གཏོང་གི་ཡོད་’’ཟེར། སྤྱི་ཟླ་གསུམ་པའི་ཚེས་གསུམ་གྱི་ཉིན། དགུང་ལོ་ཉི་ཤུར་སོན་པའི་ཚེ་རིང་སྐྱིད་ཀྱིས་རང་གི་ལུས་ཐོག་ཏུ་སྣུམ་གྱིས་ཟིན་པའི་དར་གོས་བྐླུབས་ཤིང་དེའི་སྟེང་དུ་ལྕགས་སྐུད་ཀྱིས་བསྡམས་རྗེས། རྨ་ཆུ་རྫོང་ཐོག་ཏུ་མ་ཐོན་གོང་དུ་སྐུ་ལུས་མེར་བསྲེགས་བཏང་ཞིང་། ཁོ་མོའི་འཆི་ཁའི་སྡུག་བསྔལ་ནི་སྐར་མ་ཁ་ཤས་ལས་འགོར་མི་འདུག དེ་མ་ཐག་ཉེན་རྟོག་པ་རྣམས་ཀྱིས་མཐའ་ནས་བསྐོར་ཅིང་མི་དམངས་ཀྱི་ལག་ནས་དོན་རྐྱེན་འདི་པར་དུ་བླངས་པའི་ལག་འཁྱེར་ཁ་པར་རྣམས་བཙན་འཁྱེར་བྱས་ཡོད་འདུག

རེབ་གོང་གི་རྩོམ་པ་པོ་ཞིག་གིས་ནན་བརྗོད་ཀྱིས‘‘ནང་ཆོས་ཀྱི་གཞུང་དུ་རང་སྲོག་གཅོད་པ་ནི་བཀག་འགོག་གནང་ཡོད་ནའང་། རང་དབང་གི་སྒོ་ནས་རང་གི་ཆོས་ལུགས་ལ་དད་མོས་བྱེད་མི་ཆོག་པའི་གནས་སྟངས་འདི་འདྲའི་འོག་ཏུ། རང་ལུས་མེར་སྲེག་གི་ལས་འགུལ་འདི་འོས་པ་ཞིག་དང་། བོད་མིའི་བདེན་པའི་ཆེད་དུ་ཆེས་མཐའ་མཇུག་གི་བྱེད་ཐབས་སྟེ་རང་ལུས་མེར་སྲེག་གི་ལས་འགུལ་འདིས་ང་ལ་སྤོབས་པ་གནང་བྱུང་’’ཟེར། ཡང་། ཁོང་གིས་བསྐྱར་སྣོན་གྱིས་ཚུལ་དུ་‘‘རྒྱལ་བ་རིན་པོ་ཆེས་འཚེ་བ་མེད་པའི་ལྟ་གྲུབ་ཀྱི་སྐོར་ལ་བཀའ་སློབ་གནང་གི་ཡོད་པ་དེ་བོད་མི་རྣམས་ཀྱི་སེམས་ཁམས་སུ་ཐིམ་ཡོད་སྟབས། བོད་པ་ཚོས་ཀྱང་རྩ་དོན་འདིར་བརྩི་བཀུར་གནང་གི་ཡོད་པ་དང་། རྒྱ་དམར་གྱི་སྲིད་ཇུས་ལ་འཚེ་བ་མེད་པའི་སྒོ་ནས་རང་ལུས་མེར་སྲེག་གི་ལས་འགུལ་འདི་ལྟ་བུས་མ་རྒོལ་ཐབས་མེད་དུ་གྱུར་ཡོད་’’ཟེར། བོད་མི་མང་པོ་ཞིག་གིས་རང་ལུས་མེར་སྲེག་གི་ལས་འགུལ་འདི་ནི་ཨུ་ཐུག་ཐབས་ཟད་ཀྱི་བྱ་སྤྱོད་ཅིག་ཏུ་མི་སེམས་པར། དེ་ལས་ལྡོག་སྟེ་ནུས་ལྡན་གྱི་ལས་འགུལ་ཞིག་ཏུ་དྲན་གྱི་ཡོད་པ་འདྲ། སྙན་ངག་པ་སྐལ་བཟང་གིས་‘‘ཟད་མཐའ་བྲལ་བའི་སྡུག་བསྔལ་དང་སྟོབས་ཤུགས་ཉམས་ཟད་ཀྱི་ལོ་ཟླ་དུ་མ་འགོར་རྗེས་ཀྱི་དེ་རིང་། རང་ལུས་མེར་སྲེག་གི་ལས་འགུལ་འདིས་བོད་པ་ཚོར་བློ་ཡུད་ལས་འདས་པའི་རེ་བའི་ཚོར་བ་ཞིག་སྦྱིན་ཡོད་ལ། བོད་པ་ཚོར་གཅིག་སྒྲིལ་གྱི་འདུ་ཤེས་ཤིག་བསླངས་ཡོད་པ་མ་ཟད། མི་རང་ངོས་ནས་འཐབ་རྩོད་སྤེལ་དགོས་པར་དྲན་སྐུལ་བཏང་ཡོད་’’ཅེས་བརྗོད་བྱུང་། 

འགྱུར་ལ་ཐུགས་དོགས་མཆིས་ཚེ་མ་ཕྱི་(http://www.liberation.fr/monde/01012399001-lorsque-2000-tibetains-se-seront-immoles)ལ་གཟིགས་རོགས།