བཙན་རྒོལ་རྒྱལ་སྐྱོབ།
རྒྱལ་སྤྱིའི་བཅའ་ཁྲིམས་དང་རྒྱལ་ནང་བཅའ་ཁྲིམས་གང་ཞིག་གི་ནང་དུ་ཡང་འགྲོ་བ་མི་སྤྱི་དང་རྒྱལ་ཁབ་དེའི་སྐྱེ་བོ་ཡོད་དོ་ཅོག་ལ་རང་ལུས་སྲུང་སྐྱོབ་ཀྱི་ཁྲིམས་མཐུན་ཁེ་དབང་ཡོད་ཅེས་བསྟན་ཡོད་ཅིང་། དེ་ནི་ཨ་མེ་རི་ཁའི་སྤྱི་འབངས་ཡིན་ན་འདྲ་རྒྱ་ནག་གི་སྤྱི་འབངས་ཡིན་ན་འདྲ་ཁྱད་པར་སྤུ་ཙམ་ཡང་མེད་པའི་སྒོ་ནས་ངོས་ལེན་བྱས་ཡོད་པ་ཞིག་རེད། ཨ་མེ་རི་ཀས་དེ་རིང་བར་དུ་”རྒྱ་ནག་གི་ནང་སྲིད་ལ་ཐེ་གཏོགས་”བྱེད་དོན་གྱི་གནད་འགག་ཆེན་པོ་ཞིག་ཀྱང་”མི་རེ་རེའི་འཚོ་གནས་ཀྱི་ཐོབ་ཐང་འདྲ་མཉམ་”ཞེས་པ་འདིའི་འོག་ནས་བྱུང་བ་འབའ་ཞིག་རེད། དཔེར་ན་རྒྱ་ནག་གི་”དྲུག་བཞིའི་དོན་རྐྱེན་”དང་བོད་ལྗོངས་ཀྱི་”གསུམ་བཅུ་བཞིའི་དོན་རྐྱེན་”ལྟ་བུའི་སྐབས་སུ་ཨ་མེ་རི་ཀས་”ལག་པ་འཕྱིད་ས་”གཙོ་བོ་དེ་ནི་”འགྲོ་བ་མིའི་ཐོབ་ཐང་”མ་ཡིན་ནམ།
ཨ་མེ་རི་ཁའི་སྲིད་དོན་དཔོན་རིགས་དང་ཚོང་ལས་མི་སྣའི་བར་དུ་འགལ་བ་འབྱུང་ས་གཙོ་བོ་ཞིག་ཀྱང་”འགྲོ་བ་མིའི་ཐོབ་ཐང་”དང་”འགྲོ་བ་མིའི་འདྲ་མཉམ་གྱི་ཁེ་དབང་སྲུང་སྐྱོབ་”ཅེས་པའི་ཐ་སྙད་འདིའི་འོག་ནས་འབྱུང་གི་ཡོད་ལ། ཨ་རིའི་ཁེ་ཕན་ཆེན་པོའི་མིག་འོག་ནས་འགྲོ་བ་མིའི་ཐོབ་ཐང་དང་རིན་ཐང་སོགས་ནི་དབྱར་ཁའི་གནམ་ངོ་བཞིན་ཆར་བ་འབབ་ཆོག་ཆོག་དང་ཆར་བ་འབབ་མཚམ་བཞག་ཆོག་ཆོག་ཅིག་ཏུ་ག་དུས་ཡིན་ཡང་གནས་ཡོད་པས། དུས་སྐབས་མང་པོ་ཞིག་ལ་རྒྱ་ནག་གི་དམངས་གཙོ་བ་དང་བོད་ཀྱི་རང་དབང་བ་ཚོའི་མགོ་བོ་རྨོངས་སུ་འཇུག་གི་ཡོད་ཅིང་། དེ་ནི་སྐབས་འགར་”ཨ་རིའི་རྒྱབ་རྟེན་”ཟེར་བ་དེ་ཡང་གཏམ་རྒྱུད་ཁྲོད་ཀྱི་ཁ་ཆེའི་རྒྱལ་པོའི་ན་བཟའ་བཞིན་མཛེས་སྡུག་ལྡན་པའི་མིང་ཙམ་མ་གཏོགས་དངོས་ཡོད་ལག་པས་ནམ་ཡང་རག་མི་ཐུབ་པ་ཞིག་རེད།
ཨ་རི་ཡིན་ཡང་འདྲ་རྒྱ་ནག་ཡིན་ཡང་ཆོག ཕྱོགས་གཉིས་ཀའི་ངོས་ནས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཕྱོགས་སུ་བཟང་ངན་གཉིས་ཀའི་ཕྱོགས་ནས་འཛམ་གླིང་ནང་ཤུགས་རྐྱེན་ཆེན་པོ་ཞིག་སྤྲོད་ཐུབ དེ་ལས་ཨ་རིའི་ཕྱོགས་ཀྱིས་དྲག་པོའི་མཚོན་ཆའི་ཁ་གཏད་དེ་དབུས་ཤར་ཨེ་ཤི་ཡ་དང་ཡིག་ཐོག་ཡིག་བརྩེགས་ཀྱི་ཆབ་སྲིད་ཀྱི་གནོན་ཤུགས་སྤྲོད་ས་དེ་རྒྱ་ནག་གཙོ་བོ་ཞིག་ཆགས་བསྡད་ཡོད། དཔེར་ན་གཅན་གཟན་གྱི་རྒྱལ་པོར་གྱུར་པའི་སེང་གེ་དེས་ཁ་ཆེན་པོ་ཞིག་གདངས་ཏེ་མདུན་གྱི་སྲོག་ཆགས་དེ་བཟའ་བཞིན་པའི་སྐབས་སུ་དེའི་རྒྱབ་གཟུགས་ཀྱིས་ཀྱང་སྲོག་ཆགས་གཞན་དག་ལ་འཇིགས་སྣང་སློང་ཐུབ་པ་བཞིན་རེད།
དམག་ཆེན་གཉིས་པའི་དུས་ནས་བཟུང་རྒྱ་ནག་དང་ཨ་རི་གཉིས་ཀྱི་འབྲེལ་བ་དེ་མི་མངོན་པ་ནས་མངོན་པ་དང་། མངོན་པ་ནས་ཛ་དྲག་ཏུ་མངོན་པའི་ཕྱོགས་སུ་མྱུར་ཚད་ཧ་ཅང་མཐོ་བོའི་སྒོ་ནས་བསྐྱོད་ཅིང་། ཨ་རིའི་རྒྱ་ནག་གཅིག་གི་ལངས་ཕྱོགས་ཀྱི་རྒྱབ་སྐྱོར་འོག་རྒྱ་ནག་གི་གཟུགས་བརྙན་དེ་འཛམ་གླིང་སྟེང་གློག་ལས་མྱུར་བའི་སྒོ་ནས་ཚད་མཐོར་སོན་པ་མ་ཟད། ཐེ་ཝན་དང་བོད་ལྟ་བུ་ཚོར་བ་རྣོ་བའི་ས་ཁུལ་དག་ཀྱང་ཨ་རིའི་”ཆབ་སྲིད་ཀྱི་སྤྲོ་སྐྱིད་”གཏོང་སའི་གླིང་ཁ་མཛེས་སྡུག་ལྡན་པ་རེ་རེར་བསྒྱུར་པ་དང་། ཨ་རིར་ཁེ་ཕན་ཡོད་དུས་ལྷ་རྫས་དང་གལ་སྲིད་ཁེ་བཟང་མེད་ན་གདོན་རྫས་སུ་བསྒྱུར་ཆོག་ཆོག་གི་ཅ་ལག་ལས་སྐལ་དམན་པ་འདི་གཉིས་ཀྱི་སྟེང་འཚོ་སྡོད་བྱས་ཡོད་པའི་མི་གྲངས་ས་ཡ་དུ་མའི་ལས་དབང་དེ་ཨ་རིའི་”ཆབ་སྲིད་ཀྱི་རྐང་ཤུབས་”གཉིས་སུ་གྱུར་ཡོད་པས། གསར་པ་ནས་རྙིང་པ་དང་། རྙིང་པ་ནས་དྲི་མ་ཅན། དྲི་མ་ཅན་ནས་གཡུག་ཆོག་ཆོག་གི་གོ་རིམ་བསྟར་ཆགས་སུ་གནས་བསྡད་ཡོད་པ་རེད།
པེ་ཅིན་གནམ་བདེའི་སྒོ་ཐང་གི་དྲུག་བཞིའི་དོན་རྐྱེན་དང་སྐབས་དེའི་བོད་ནང་གི་ཟིང་ཆ་གཉིས་ཀྱིས་ཨ་རིའི་རྒྱ་ནག་ལ་འཛིན་པའི་ཆབ་སྲིད་ཀྱི་མིག་རབ་རིབ་གཉིས་ཕྱེས་པ་ནས་བཟུང་སྟེ། མི་རིགས་ཐ་དད་དང་དམིགས་ཡུལ་ཐ་དད་ཡིན་པའི་ཆ་རྐྱེན་གྱིས་བསྐྲུན་པའི་ཟློས་གར་རང་བཞིན་གྱི་ངོ་རྒོལ་དོན་རྐྱེན་འདི་གཉིས་ཀྱིས། ཨ་མེ་རི་ཀའི་ཆབ་སྲིད་པ་ཚོའམ་ཡང་ན་སྲིད་འཚོང་བ་ཚོར་གོ་སྐབས་ངེས་ཅན་ཞིག་ཐོབ་སྟེ། རྒྱ་ནག་གི་ནང་སྲིད་ལ་ཐེ་ཇུས་བྱེད་པའི་གོ་སྐབས་ཆེན་པོ་ཞིག་ལྷ་ཡིས་གནང་བ་བཞིན་ཐོབ་པ་དང་། ཁེ་བཟང་གང་ན་མང་ཚེ་དེའི་ཕྱོགས་སུ་བསྐྱོད་པའི་ཨ་རིའི་ཆབ་སྲིད་པ་འདོད་རྔམ་ཅན་འདི་རིགས་ཀྱིས་རྒྱ་རིགས་ཀྱི་མི་གྲངས་མང་ཞིང་དེས་རྒྱ་ནག་གི་སྲོག་རྩ་བཟུང་ཡོད་པ་དེ་ལམ་སེང་ཤེས་རྟོགས་བྱུང་བས། རྒྱ་རིགས་དམངས་གཙོ་དོན་གཉེར་བ་ཚོའི་ཕྱོགས་སུ་གོམ་པ་དྲུག་ཅུ་བདུན་ཅུ་སྤོས་ཡོད་ན། བོད་རིགས་གྲངས་ཉུང་ཞིང་མཐའ་འཁོབ་ཏུ་གནས་པ་ཚོའི་ཕྱོགས་སུ་གོམ་པ་བཅུ་ཉི་ཤུ་ལས་སྤོས་མེད་པ་རེད་ལ་སྤོ་འདོད་ཀྱང་མེད་པ་རེད།
འདིར་ང་ཚོས་འདས་པའི་ལོ་ངོ་ཉི་ཤུའི་ནང་ཕྱི་མིག་ཅིག་བལྟས་ཚེ། ཁོ་བོས་གོང་དུ་བཤད་པའི་སྐད་ཆ་དག་ལ་ཐལ་ཆ་ཅི་ཡང་མེད་པ་དེ་ཤེས་རྟོགས་ཐུབ་པ་སྟེ། རྒྱ་རིགས་དམངས་གཙོ་དོན་གཉེར་བ་ཝེ་ཅིན་ཧྲིན་དང་ཝང་ཏན་སོགས་རྒྱ་རིགས་དམངས་གཙོ་དོན་གཉེར་བ་ཚོར་ཨ་རིའི་ཕྱོགས་ནས་ཉེན་སྐྱོབ་ཁོར་ཡུག་མཁོ་སྤྲོད་བྱས་ཡོད་པ་དང་། ལིག་ཞོ་པོ་དང་ཡིས་ཅེ་སོགས་ལ་ཡོངས་ཁྱབ་ཏུ་མངོན་པ་དང་མངོན་གསལ་མིན་པའི་རྒྱབ་སྐྱོར་ཚད་མཐོ་ག་འདྲ་ཞིག་བྱས་ཡོད་ང་ཚོས་ཤེས་གསལ་བཞིན་ཡིན་མོད། ལས་སྐལ་དམན་པའི་བོད་རིགས་དཔའ་མོ་ཚེ་རིང་འོད་ཟེར་དང་དཔའ་བོ་དོན་གྲུབ་དབང་ཆེན་སོགས་རྩོམ་འབྲི་དང་གློག་བརྙན་བཟོ་སྐྲུན་གྱི་ལམ་ནས་བོད་དོན་ཁྱབ་བསྒྲགས་བྱེད་མཁན་ཚོར་ཨ་རིའི་ངོས་ནས་རྒྱབ་སྐྱོར་ག་ཚོད་ཅིག་བྱས་ཡོད་དམ། ཁོང་གཉིས་ཨ་རིར་སྨན་བཅོས་དང་སློབ་སྦྱོང་གི་མིང་ཐོག་ནས་གདན་འདྲེན་མི་ཞུ་བའི་གནས་ལུགས་རྩ་བ་དེ་གང་ལ་ཐུག་ཡོད་དམ། དོན་ངོ་མར་རྒྱ་ནག་གི་ཝེ་ཅིན་ཧྲེང་དང་ཝང་ཏན་གཉིས་དང་བོད་ཀྱི་སྐུ་ཞོགས་དཔལ་ལྡན་རྒྱ་མཚོ་དང་རྟ་ནག་འཇིགས་མེད་བཟང་པོ་གཉིས་ཏེ་འགྲོ་བ་མིའི་ཐོབ་ཐང་གི་ཆེད་དུ་རང་སྲོག་འབེན་དུ་བཞག་པའི་མི་བུ་འདི་བཞི་ལ་ཁྱད་པར་ག་རེ་ཤོར་སོང་བ་རེད།
ལྷག་པར་དུ་རྩོམ་ཡིག་འདི་འབྲི་དགོས་པའི་དོན་སྙིང་ལྟེ་བ་ཞིག་སྟེ། ལོ་གསར་རྙིང་འདི་གཉིས་ཀའི་ནང་དུ་བོད་ཕྱི་ནང་གཉིས་ཀ་ནས་བོད་མི་སུམ་ཅུ་སོ་གྲངས་ཤིག་གིས་བོད་མི་ས་ཡ་དྲུག་གི་འགྲོ་བ་མིའི་ཐོབ་ཐང་དང་རིག་གཞུང་སྲུང་སྐྱོབ། ཆོས་ལུགས་ཀྱི་དབུ་ཁྲིད་བོད་ལ་གདན་ཞུ་སོགས་ཀྱི་འབོད་སྒྲ་སྒྲོག་བཞིན་ཆེས་གཅེས་སུ་འོས་པའི་རང་རང་གི་ཚེ་སྲོག་དེ་དག་ཐེ་ཚོམ་ཅི་ཡང་མེད་པའི་སྒོ་ནས་མཐོང་ན་འཇིགས་སུ་རུང་ཞིང་དྲན་ན་སེམས་པ་སྐྱོ་བའི་དྲག་ཏུ་འབར་བའི་མེ་དམར་པོའི་ཀློང་དུ་བསྟིམས་སོང་ཡང་། ཨ་རིའི་གཞུང་དང་མི་དམངས་ཀྱིས་སེམས་འགུལ་ཐེབས་པའི་གསལ་སྒྲོག་དང་ཚེ་འདས་དེ་ཚོའི་ནང་མིར་ཐུག་འཕྲད་སེམས་གསོ་ལྟ་བུ་ཅི་ཞིག་གནང་ཡོད། ཡིན་ན་ཡང་རྒྱ་རིགས་ཁྲིམས་རྩོད་པ་ལོང་པ་ཁྲེན་རང་ཁྱིམ་ནས་ཨ་རིའི་རྒྱལ་ཁབ་ཀྱི་ཚབ་མཚོན་གཞུང་ཚབ་ལས་ཁུངས་སུ་ཁྲིད་པ་དང་། ཨ་རིའི་གཞུང་ཚབ་ཆེན་མོ་རྒྱ་རིགས་སྒེ་རེ་ལོག་དང་ཨ་རིའི་དམིགས་བསལ་ཆེད་གཏོང་སྐུ་ཚབ་ཀྱིས་ལག་པ་དང་ལག་པ་འཇུས་ཏེ་བྱམས་བརྩེ་ཆེན་པོའི་རྣམ་འགྱུར་ཚད་མེད་བསྟན་པ། ཡང་དེ་ནས་སྨན་ཁང་དུ་བསྐྱལ་རྗེས་སུ་ཁོང་ལ་ཨ་རིའི་བསྐྱོད་པའི་སྒོ་མོ་ཆེ་ཆེར་ཕྱེས་པ་སོགས་ལ་བལྟས་པ་ཡིན་ན། འཛམ་གླིང་འདིར་བཙན་པོའི་གཉའ་གནོན་དང་གཉོམ་ཆུང་གི་རྒྱབ་རྩ་ཡིན་པར་གྲགས་པའི་ཨ་མེ་རི་ཁའི་གཞུང་འདིའི་མིག་ལམ་དང་རྣ་ལམ་དུ། རྒྱ་རིགས་དམངས་གཙོ་དོན་གཉེར་བ་ཚོ་དང་ཁོ་ཚོའི་འབོད་ཚིག་འོག་གི་རྒྱ་མི་རིགས་དང་། བོད་རིགས་ཚེ་སྲོག་མཆོད་སྦྱིན་བྱེད་མཁན་དེ་དག་དང་ཁོ་ཚོའི་འཆི་ཁའི་འབོད་སྒྲའི་ཀློང་གི་བོད་རིགས་གཉིས་ལ་ཁྱད་པར་ཅི་ཞིག་ཤོར་སོང་བ་རེད།
ཉིན་འགའི་སྔོན་ཁོ་བོ་ས་འདིའི་ཚོང་ཁང་ཆེན་པོ་ཞིག་གི་གྲུ་ཟུར་དུ་ཡོད་པའི་འཚིག་ཇ་འཐུང་ས་ཞིག་ཏུ་བསྐྱོད་པ་ཡིན་ལ། དེའི་སྒོ་འགྲམ་དུ་འཛམ་གླིང་གི་ཚགས་པར་ཆེ་ཤོས་གྲས་<<ཉིག་ཡོར་དུས་བབ་>>དང་ཞིང་ཆེན་འདིའི་སྦྲག་ཚགས། ས་གནས་དུས་བབ་སོགས་བཤམས་ཡོད་པའི་མདུན་ཤོག་སྟེང་དུ་རྒྱ་མི་ཁྲེན་དང་ཨ་རིའི་གཞུང་ཚབ་ཆེན་མོ་སྒེ་རེ་ལོག་སོགས་ལྷན་འཛོམས་ཀྱི་འདྲ་པར་ཆེན་པོ་དག་ཧ་ཅང་མངོན་གསལ་དོད་པོའི་སྒོ་ནས་མཐོང་རྒྱུ་འདུག་ཅིང་། དེ་མ་ཐག་ཁོ་བོའི་སེམས་ནང་ལོ་སྔོན་མའི་ལོ་མཇུག་ཏུ་བདག་གིས་འདི་གའི་སྤྱི་དམངས་དཔེ་མཛོད་ཁང་ཞིག་ཏུ་<<ཉིག་ཡོར་དུས་བབ་>>ཅིག་གི་ཤོག་ངོས་ལྔ་པ་དྲུག་པ་གང་རུང་ཞིག་གི་ཟུར་མཐའ་ཞིག་ན་བོད་པའི་ཨ་ནེ་ཞིག་གིས་རང་ལུས་མེར་བསྲེགས་བཏང་བའི་སྐོར་གྱི་གསར་འགྱུར་མཐེ་བོང་གི་ཚད་ཙམ་ལས་མེད་པ་ཞིག་བྲིས་ཡོད་པ་དེ་བཀླགས་པ་དེ་ལམ་སེང་དྲན་སོང་བས། རང་གི་ཁེ་སྤོགས་གཅིག་པོ་མ་གཏོགས་མི་བསམས་པའི་ཨ་རིའི་དཔོན་རིགས་ཁག་ཅིག་དང་ཨ་རིའི་ཚོང་པ་གནག་སེམས་ཧ་ཅང་ཆེ་བ་སྐོར་ཞིག་དང་། རྒྱ་ནག་གི་དཔོན་རིགས་འདི་ཚོས་དོན་ངོ་མར་འགྲོ་བ་མིའི་ཐོབ་ཐང་གི་ཆེད་དུ་གྲང་དམག་རྒྱག་གི་ཡོད་དམ་ཁེ་སྤོགས་བཟའ་རེས་བྱེད་ཀི་ཡོད་ཁོ་བོས་དུས་ད་ལྟ་བར་ཧ་ཅང་རྟོགས་དཀའ་བར་འདུག་ལ། བདག་གིས་འདི་ནས་ཨ་རིའི་གཞུང་འབྲེལ་དཔོན་རིགས་ཚོས་ཏྰ་ལའི་བླ་མར་གསེར་གྱི་གཟེངས་རྟགས་སྤྲད་པ་དེ་ལས་ཀྱང་བོད་ནང་མི་ལུས་དམར་མཆོད་བྱེད་པའི་དུས་ཚོད་ཧ་ཅང་ཛ་དྲག་ཆེ་བའི་དུས་འདིར་ཨ་མེ་རི་ཁའི་གཞུང་གིས་རང་གི་ཁེ་སྤོགས་དང་རྒྱ་མི་རིགས་ཀྱི་ངོ་དཀར་ནག་འཚོ་རྒྱུ་འདི་རེ་ཞིག་ཟུར་དུ་བཞག་ནས་བོད་མི་རིགས་ཀྱི་ཆེད་དུ་སྐད་ཆ་ཏོག་ཙམ་ཞིག་བཤད་རོགས་གནངས་ཞེས་ཞུ་རྒྱུ་ཡིན། གང་ཡིན་ཞེ་ན་བོད་མི་རིགས་འདི་ཡང་འཛམ་གླིང་གི་མི་རིགས་གཞན་དག་དང་ཁྱད་པར་རྒྱ་ནག་མི་རིགས་དང་འདྲ་བར་བདེ་བ་འདོད་ཅིང་སྡུག་བསྔལ་མི་འདོད་པའི་ས་སྟེང་གི་སྲོག་ལྡན་གྱི་སྤྱི་ཚོགས་ཤིག་ཡིན།
རྩོམ་ཡིག་འདི་མཇུག་མ་རྫོགས་གོང་བཤད་ན་འདོད་པའི་སྐད་ཆ་ཞིག་ནི། ཨ་རིའི་གཞུང་དང་མི་དམངས་གཉིས་ཀའི་ངོས་ནས་ལོ་ངོ་འདི་སྙེད་ཅིག་ལ་རྒྱ་ནག་གིས་བཟོས་པའི་ལྷམ་དང་ལྭ་བ་གྱོན། རྒྱ་ནག་གིས་བཟོས་པའི་ཅ་ལག་ཁྱིམ་དུ་བརྩིགས། རྒྱ་ནག་གིས་བཟོས་པའི་གློག་ཀླད་དང་ཁ་པར་ལག་ཏུ་ཐོགས་ནས་འཚོ་བ་བསྐྱལ་དང་སྐྱེལ་བཞིན་ཡོད་པས། རྒྱ་མི་དམར་ཕྱོགས་ཡིན་ན་འདྲ་རྒྱ་མི་དམང་གཙོ་བ་ཡིན་ཡང་རུང་གལ་སྲིད་རྒྱ་མི་ཞིག་ཡིན་ན་དེའི་ངོ་དཀར་ནག་འཚོས་དང་འཚོ་བཞིན་པའི་དུས་རབས་འདིར། བོད་ནང་སྲོག་ཆགས་གྲོག་མའི་སྟེང་དུ་རྐང་པ་སྤོ་རྒྱུར་ཡང་འཚེར་སྣང་བྱེད་པའི་བྱམས་སེམས་ཅན་གྱི་བོད་མི་རེ་རེས་འུ་ཐུག་ཐབས་ཟད་ཀྱིས་རང་རང་གི་དལ་བརྒྱད་འབྱོར་བཅུ་ཚང་བའི་མི་ལུས་རིན་པོ་ཆེ་དེ་ཚོ་མེར་བསྲེགས་གཏོང་ཐེངས་རེ་རེར། ངའི་མིག་ལམ་དུ་སྲིད་འཛིན་ཨོ་སྦ་མའི་ཆབ་སྲིད་པ་མགོ་བདེ་བོའི་གཟུགས་རིས་དེ་མི་ཤར་བར་རྒྱག་གཅིག་མཆོང་གཅིག་ཡིན་པའི་ སྔོན་ཆད་ཀྱི་ཨ་རིའི་སྲིད་འཛིན་རྗོར་རྗེ་དགྲ་རྦད་ལུ་སྦུ་ཞི་དྲན་ཡོང་ཞིང་། དེ་བས་ཐེངས་རྗེས་མའི་ཨ་རིའི་སྲིད་འཛིན་འོས་བསྡུའི་སྐབས་སུ་ངས་སྲིད་འཛིན་ཨོ་སྦ་མར་འོས་ཤོག་འཕེན་གྱི་མིན་ཞེས་འདིར་བརྗོད་འདོད་བྱུང་།
བཤད་ཚད་བདེན་པ་རེད། འོན་ཀྱང་ང་ཚོས་སྡུག་ཡུལ་བཤད་ནས་ཅི་ཕན། རྒྱལ་ཁབ་ཀྱི་འགོ་ཁྲིད་ཚང་མས་སོ་སོའི་མི་དམངས་ཀྱི་རྒྱབ་སྐྱོར་ཐོབ་དགོས་དུས་སོ་སོའི་མི་དམངས་དང་རྒྱལ་ཁབ་ཀྱི་ཁེ་ཕན་གཅོ་བོ་བཟུང་ནས་གཏམ་བཤད་དང་ལག་ལེན་ཚང་མ་དེའི་ཐོག་འགྲོ་གི་རེད། ཨ་རེའི་གཞུང་དམངས་བྱང་ཆུབ་སེམས་པ་མ་རེད། མ་གཞི་ནས་བོད་མིའི་རང་དབང་བོད་མིས་རྩོད་ནས་ལེན་དགོས་པ་ལས་སུས་ཀྱང་རྩོད་ལེན་རྣལ་མ་ཞིག་དང་རྒྱབ་སྐྱོར་སླད་མེད་ཅིག་མེད་པ་མཐོང་ཆོས་རེད།
ཐེངས་རྗེས་མའི་ཨ་རིའི་སྲིད་འཛིན་འོས་བསྡུའི་སྐབས་སུ་ངས་ཀྱང་སྲིད་འཛིན་ཨོ་སྦ་མར་འོས་ཤོག་འཕེན་གྱི་མིན།
ཨ་རི་བོད་པའི་ཨ་ཕ་ནི་མ་རེད། མགོ་བདེ་བོ་བྱེད་རྒྱུ་ནི་རྒྱལ་ཁབ་ཅིག་གི་སྲིད་སྐྱོང་སྟངས་ཚུལ་མཐུན་ཞིག་རེད། ད་ཁྱོད་ཚོ་ལ་ཁེ་ཕན་གྱི་གོ་སྐབས་ཤིག་བསྐྲུན་ཡོད། ཁ་ཞིག་གྲགས་རོགས་བྱོས་ཟེར་ན་ལོགས་ཀ་རེད། མ་གཞི་ནས་ཨ་རིས་རོགས་བྱས་ནས་ང་ཚོའིདོན་དག་འགྲིག་འགྲོ་གི་རེད་བསམ་མཁན་འདྲ་ཨེ་ཡོད་ན།
འདིར་ཨ་རིའི་མིག་ནང་གི་རྒྱ་བོད་མི་རིགས་གཉིས། ཅེས་པའི་ཟིན་བྲིས་འདི་ལ་གསར་དུ་གོ་རྒྱུ་ཅི་ཡང་མི་འདུག་ལགས། གང་ཡིན་ཞེ་ན་ད་སྐབས་རྒྱ་ནག་གི་ཤིན་དཔའ་གསར་འགྱུར་ཞེས་པའི་ནང་དུ་བཀོད་ཡོད་པའི་དམར་པོའི་ལྟ་བ་རྣམས།འདིར་དོན་བསྒྱུར་བྱས་ནས་བྲིས་འདུག སྤྱིར་མི་སུ་ཞིག་གི་སྐད་ཆ་ཞིག་བཤད་ན་བརྒྱ་ཆའི་བརྒྱ་ཡང་དག་ཡིན་མི་སྲིད་ལ། བརྒྱ་ཆའི་བརྒྱ་རྗུན་པ་ག་ལ་ཡིན། དེས་ན་ཁྱེད་ཀྱིས་ཆར་མན་མོའོ་ཙེ་ཏུང་སོགས་རྒྱ་ནག་དམར་ཕྱོགས་པའི་ལྟ་བ་འགའ་རེད་འདིར་བཀོད་པ་ལ་རྗེས་ལོན་བྱེད་རྒྱུ་ཡོད་སྲིད། མ་ཟད་བོད་དང་རྒྱ་ནག་གི་སེམས་ཁམས་འདྲ་བོ་ཡོད་ཕྱིར་མི་མང་པོ་ཞིག་འདི་ལ་དགའ་ཡང་སྲིད།
འོན་ཀྱང་ང་ཚོ་བོད་པ་ཚང་ནི། ནམ་རྒྱུན་བོད་རེ་བས་ཕོངས་ཞེས་པ་ལྟར་མི་གཞན་ཞིག་རེ་བ་འཆའ་དྲག་པའི་དབང་གིས་དེང་སང་རྒྱལ་ཁབ་གཞན་དག་དང་། གྲོགས་པོ་གཞན་དག་ལ་བློ་ཕམ་གང་མང་འབྱུངས་དང་འབྱུང་བཞིན་པ་རེད། དངོས་གནས་བཤད་ན་འདི་ནི་ང་ཚོའི་སྐྱོན་རེད། རྒྱལ་ཁབ་དང་མ་ཟད་གང་ཟག་རྒེར་པ་སུ་ཞིག་ཡིན་ནའང་རང་མགོ་རང་གི་ཐོན་དགོས་མ་གཏོགས་གཞན་ལ་ལེ་ལན་འཇོག་ས་མེད།
ལྷག་པར་དུ་ཨ་རི་ལྟ་བུའི་རྒྱལ་ཁབ་ཆེན་པོ་ཚོ་ལ་མཚོན་ན་འཛམ་གླིང་གི་སྟེང་ན་དོན་སྐྱེན་ཆེ་ཤོས་དང་། མི་གྲངས་མང་ཉུས་སོགས་གྱི་ཁེ་ཕན་ལ་བལྟ་སྲིད་མ་གཏོགས། བོད་པ་ཚང་ངོ་ཆེ་རྒྱུ་ཨེ་ཡོད་མི་ཤིས།
དེས་ན་རང་མགོ་རང་ཐོན་ཕྱོགས་ལ་འཆར་གཞི་འཇོག་དགོས། དེ་མིན་དེས་མ་ཐོན། འདིས་མ་ཉན་སོགས་ལེ་བརྡ་དེད་ནས་མི་ཚེ་བསྐྱལ་བསྡད་ན་བོད་པའི་མདུན་ལམ་ད་སྔོན་ནང་བཞིན་ཞིག་ཡིན་རྒྱུ་རེད་ལགས།
བདེན་པ་རེད། སྡིག་དཔོན་མའོ་ཡིས་༼ཨ་མེ་རི་ཀ་ནི་ཤོག་བུའི་སྟག་ཡིན་༽ཞེས་བཤད་མྱོང་བའི་གཏམ་དེ། ཨ་རིའི་སྲིད་འཛིན་ཟུར་བ་སྦིལ་ཁི་ལིན་ཀྲོན་གྱིས་བདེན་པར་གྱུར་པའི་གཞི་སྒྲོམ་བསླངས་པ་དང་། ཨོ་སྦ་མ་ནག་རིལ་གྱིས་གཏམ་དེ་བདེན་ཐོག་དངོས་སུ་བསྐྱལ་ཡོད།