རྒྱལ་འཚོང་བའི་ཉེས་མིང་ཁྲིམས་ཆད།

པཱ་ཀི་སི་ཐན་གྱིས་སྨན་པ་ཨ་ཧྥི་རེ་ཌེ་ལ་རྒྱལ་འཚོང་བའི་ཉེས་ཁྲིམས་བཅད་པར་བརྟེན། ཨ་རི་གཞུང་གིས་ཨ་སྒོར་ས་ཡ་ ༣༣ ཀྱི་རོགས་དངུལ་གཅོད་རྒྱུ་ཡིན་པར་བསྒྲགས་འདུག

ཉེ་མལ་པཱ་ཀི་སི་ཐན་གྱི་ཁྲིམས་ཁང་ཞིག་གིས་ཨ་ཧྥི་རེ་ཌེ་ (Afridi) ཟེར་པའི་སྨན་པ་ཞིག་གིས་བྷེན་ལཱ་ཌན་འཚོལ་ཞིབ་ཐད་ཨ་རིའི་གསང་བའི་ལས་ཁུངས་ལ་རོགས་པ་བྱས་པའི་ཉེས་མིང་འོག ལོ་ ༣༣ གྱི་བཙོན་འཇུག་ཁྲིམས་ཐད་བཅད་ཡོད་པ་དང་། གནད་དོན་དེར་ཨ་རི་གཞུང་གིས་སྔ་ཕྱིར་པཱ་ཀི་སི་ཐན་གྱི་བྱེད་སྟངས་དེ་དྲང་བདེན་མིན་པའི་སྐྱོན་བརྗོད་བྱས་ཡོད་པ་མ་ཟད། རྒྱལ་སྤྱིའི་ཉེས་ཅན་པ་ཨང་དང་པོ་བྷེན་ལཱ་ཌན་འཛིན་བཟུང་བྱ་རྒྱུ་དེ་ཨ་རི་དང་པཱ་ཀི་སི་ཐན་གཉིས་ཀར་འགན་ཡོད་པ་ཞིག་ཡིན་སྟབས། སྨན་པ་ཨ་ཧྥི་རེ་ཌེ་འཕྲལ་དུ་བཙོན་གྲོལ་བྱ་དགོས་པའི་ནན་སྐུལ་བྱས་ཡོད་པ་རེད།

པཱ་ཀི་སི་ཐན་གཞུང་གིས་སྨན་པ་ཨ་ཧྥི་རེ་ཌེ་ནི་པཱ་ཀི་སི་ཐན་གྱི་མི་སེར་ཡིན་པ་དང་། ཁོས་སོ་སོའི་རྒྱལ་ཁབ་ཀྱི་བདེ་སྲུང་ལ་འགན་མ་ཁུར་པར་གསང་པའི་སྒོ་ནས་རྒྱལ་ཁབ་གཞན་གྱི་གསང་ཉུལ་བ་བྱས་ཏེ་རྒྱལ་འཚོང་གི་ལས་དོན་བསྒྲུབས་པར་ཉེས་ཆད་བཏང་པ་ཞིག་ཡིན་པ་དང་། ཉེས་ཅན་མི་སྣ་འཛིན་བཟུང་བྱ་རྒྱུར་ཨ་རིའི་གཞུང་གིས་པཱ་ཀི་སི་ཐན་གཞུང་དང་མཉམ་འབྲེལ་བྱ་དགོས་ཡོད་ཀྱང་། དེ་ལྟར་མ་བྱས་པར་པཱ་ཀི་སི་ཐན་གཞུང་ལ་གསང་བའི་སྒོ་ནས་མི་སེར་ལ་གསང་ཉུལ་བྱས་བཅུག་པ་དང་། གསང་སྟབས་ཀྱིས་པཱ་ཀི་སི་ཐན་གྱི་རྒྱལ་ཁོངས་སུ་འཛུལ་ཏེ་བྷེན་ལཱ་ཌན་དམར་གསོད་བཏང་པ་བཅས་ནི་ཨ་རིའི་པཱ་ཀི་སི་ཐན་གྱི་བདག་དབང་ལ་བརྩི་བཀུར་མ་བྱས་པ་དང་། སྨན་པ་ཨ་ཧྥི་རེ་ཌེ་ལ་པཱ་ཀི་སི་ཐན་གྱི་ཁྲིམས་ཁང་ནས་ཐག་གཅོད་བྱས་པ་ཞིག་ཡིན་སྟབས།་ཨ་རི་དང་པཱ་ཀི་སི་ཐན་གཉིས་ཀྱིོས་རྒྱལ་ཁོངས་སོ་སོའི་ཁྲིམས་ལུགས་ལ་བརྩི་སྲུང་བྱ་དགོས་པའི་ལན་འདེབས་བྱས་འདུག

ཁ་སང་ཕྱི་ཚེས་ ༢༤ ཨ་རིའི་རྒྱལ་དོན་དྲུང་ཆེ་ཧཱེ་ལ་རེ་ཁཱི་ལེན་ཝོན་གྱིས། པཱ་ཀི་སི་ཐན་གཞུང་གིས་སྨན་པ་ཨ་ཧྥི་རེ་ཌེར་ཉེས་འཛུག་ཁྲིམས་ཐག་བཅད་པ་དེར་ངོ་རྒོལ་ཡོད་པ་དང་། དམག་དོན་དེའི་ཐད་མུ་མཐུད་པཱ་ཀི་སི་ཐན་གཞུང་གི་དཔོན་རིགས་ཚོ་དང་གླེང་སློང་བྱ་རྒྱུ་ཡིན་པར་བརྗོད་ཡོད་པ་མ་ཟད། ཨ་རིའི་གྲོས་ཚོགས་ནས་ལོ་ལྟར་པཱ་ཀི་སི་ཐན་གཞུང་ལ་རོགས་དངུལ་སྤྲོད་ཀྱི་ཡོད་པ་ལས། ལོ་རྗེས་མའི་རོགས་དངུལ་ལས་ཨ་སྒོར་ས་ཡ་ ༣༣ མེད་པར་གཏོང་རྒྱུ་ཡིན་ཚུལ་བསྒྲགས་འདུག

པཱ་ཀི་སི་ཐན་ཁྲིམས་ཁང་གིས་བརྗོད་པ་ལྟར་ན། བྷེན་ལཱ་ཌན་དམར་གསོད་བཏང་པའི་བདུན་ཕྲག་གསུམ་ཙམ་གྱི་མཚམས་སུ་སྨན་པ་ཨ་ཧྥི་རེ་ཌེ་ལ་བྷེན་ལཱ་ཌན་གཡོ་བཙོང་བྱས་པའི་དོགས་གཞིའི་འོག་འཛིན་བཟུང་བྱས་ཡོད་པ་དང་། ཁོང་འཛིན་བཟུང་བྱས་རྗེས་འདྲི་གཅོད་རིམ་པར་བྱས་མཐར། སྨན་པ་ཨ་ཧྥི་རེ་ཌེ་ཡིས་ཨ་རིའི་གསང་བའི་ལས་ཁུངས་ཀྱི་བཀོད་མངགས་འོག ནད་གཞི་སྔོན་འགོག་གི་ལས་གཞི་ཞིག་སྤེལ་ཏེ། བྷེན་ལཱ་ཌན་སྦས་སྐོང་བྱས་ཡོད་པའི་དོགས་གཞི་ཅན་གྱི་ས་ཁུལ་ཁག་ནང་གི་མི་མང་དང་བྱིས་པ་ཚོར་འགོག་ཁབ་བརྒྱབ་པ་བརྒྱུད། བྷེན་ལཱ་ཌན་དང་ཤ་ཁྲག་གི་འབྲེལ་བ་ཡོད་པ་ཞིག་གི་ཁྲག་རིགས་བརྟག་དཔྱད་བརྒྱུད་བྷེན་ལཱ་ཌན་གྱི་སྡོད་གནས་ཤེས་རྟོགས་དང་གཡོ་བཙོང་བྱས་ཡོད་སྐོར་བརྗོད་ཡོད་པ་རེད།