ཟླ་འདིའི་ཕྱི་ཚེས་ ༡༦ ཉིན་གྱི་དགོང་མོ་ཨ་རིའི་ཉུག་ཡོག་ཧའོ་ཐིར་སློབ་ཆེན་ནང་། གླུ་མ་རིག་འཛིན་སྒྲོལ་མས་གླུ་གཞས་ཆེད་ལེན་དགོང་ཚོགས་བསྡུ་རྒྱུ་རེད།
ཟླ་འདིའི་ཕྱི་ཚེས་ ༡༦ ཉིན་གྱི་ཨ་རིའི་ཉིན་རྒྱབ་ཆུ་ཚོད་ ༦ པའི་སྟེང་ཉུག་ཡོག་ཧའོ་ཐིར་སློབ་ཆེན་ནང་། སྙན་གྲགས་ཅན་གྱི་བོད་ཀྱི་གཞོན་སྐྱེས་གླུ་མ་རིག་འཛིན་སྒྲོལ་མ་ལགས་ཀྱི་གླུ་གཞས་ཆེད་ལེན་དགོང་ཚོགས་ཤིག་བསྡུ་རྒྱུ་ཡིན་པ་དང་། གླུ་གཞས་ཆེད་ལེན་དགོང་ཚོགས་དེ་ནི་ཁོ་མོ་ཐེངས་འདིར་ཨ་རིར་ཕྱོགས་བསྐྱོད་ཀྱི་སྐབས་དང་བསྟུན་ནས། ཁོ་མོའི་གླུ་གཞས་ལ་དགའ་མོས་དང་རྒྱབ་སྐྱོར་བྱེད་མཁན་ཕྱི་བསྡོད་གྲོགས་པོ་རྣམས་ལ་ཆེད་དམིགས་ཀྱིས་གོ་སྒྲིག་གནང་བ་ཞིག་ཡིན་འདུག
གླུ་མ་རིག་འཛིན་སྒྲོལ་མའི་གླུ་ལེན་དགོང་ཚོགས་དེ་ནི། ཕྱིའི་རྒྱལ་ཁབ་ནང་ཁོ་མོས་གླུ་གཞས་ཆེད་ལེན་དགོང་ཚོགས་བསྡུས་པ་ཐོག་མ་དེ་ཆགས་ཡོད་ལ། དགོང་ཚོགས་ཀྱི་འཛིན་བྱང་རིན་གོང་ཨ་སྒོར་ ༣༠ ཡིན་པ་དང་། ཐེངས་འདིའི་གླུ་གཞས་ཆེད་ལེན་དགོང་ཚོགས་ཐོག་བསྡུ་ཉར་བྱུང་བའི་དངུལ་རྣམས། ཁོ་མོ་རང་ཉིད་ཀྱིས་ཕ་ཡུལ་དཔའ་རིས་ས་ཁུལ་དུ་སློབ་གསེང་སྐབས་སྒྲུབ་བཞིན་པའི་བོད་དབྱིན་ཟབ་སྦྱོང་འཛིན་གྲྭ་དག་གི་ཆེད་དུ་གཏོང་རྒྱུ་ཡིན་འདུག
གླུ་མ་རིག་འཛིན་སྒྲོལ་མ་ལགས་ཀྱིས། ཉེ་བའི་ལོ་ངོ་གཉིས་གསུམ་གྱི་ནང་དཔའ་རིས་ས་ཁུལ་གྱི་གྲོང་གསེབ་ཁག་བཅུ་གཉིས་ལྷག་ནང་། ཁྱོན་བསྡོམས་བོད་རིགས་བྱིས་པ་ ༦༠༠ ཙམ་ལ་ལོ་རེའི་དགུན་ཁའི་གུང་གསེང་སྐབས་བོད་ཡིག་འཛིན་གྲྭ་སྒྲུབ་ཏེ། སྙུ་གུ་དང་འབྲི་དེབ། ཀློག་དེབ་སོགས་སློབ་ཆས་ཚང་ཁོ་མོ་རང་ཉིད་ཀྱིས་མཐུན་སྦྱོར་གནང་བཞིན་ཡོད་པ་དང་། འཛིན་ཁང་གི་ཐད་ནས་ས་གནས་སོ་སོའི་གནས་བབ་བསྟུན་ནས་གཞུང་སློབ་ཁང་དང་ཁྱིམ་ཚང་གི་སྦྲ་གུར་སྡོད་ཁང་སོགས་རང་ངོས་ནས་གྲ་སྒྲིག་བཞིན་ཡོད་པ་རེད།
དཔའ་རིས་བལ་བཟའ་བཀྲ་ཤིས་དཔལ་ཡོན་སྡེ་བའི་གྲོང་གསེབ་ཁྱིམ་ཚང་དཀྱུས་མ་ཞིག་ནས་འཚར་ལོངས་བྱུང་བའི་བོད་ཀྱི་གཞོན་སྐྱེས་གླུ་མ་འདིས། བོད་ཤར་ཕྱོགས་རྒྱ་བོད་མཐའ་མཚམས་ཁུལ་གྱི་དཔའ་རིས་ས་ཆའི་གྲོང་གསེབ་ཁག་ཏུ་བོད་ཀྱི་སྐད་ཡིག་གི་ཚེ་སྲོག་གསར་བ་ཞིག་སྐྲུན་བཞིན་ཡོད།
ཚོགས་ཡུལ་ས་གནས་ཁ་བྱང་།
Hunter College
425 E 25th St First Ave, Manhattan NY 10010
Direction: subway #6 to 23 ST.
འབྲེལ་བ་གནང་ཡུལ་ཁ་པར་ཨང་གྲངས། ༦༤༦ ༤༢༡ ༩༥༥༨ ( 646-421-9558)
གསར་འགོད་པ། ཚེ་རིང་རྒྱལ།
ངག་གི་འགྱུར་ཁུག་དང་དབྱངས་རྟའི་སྒྱུ་རྩལ་ལ་རང་དབང་བརྙེས་པའི་གླུ་མ་རིག་འཛིན་སྒྲོམ་མ་ལགས་ནི། ཁ་རྩང་ཨ་རིར་ལེན་ཞིག་ཡོང་བ་དེ་སྐྱེ་བོ་ཀུན་གྱིས་ཆེས་དོ་སྣང་དང་གུས་བཀུར་འོས་པ་ཞིག་རེད། གང་ཡིན་ཞེ་ན་དེ་སྔོན་བོད་ལ་མཚོན་ནའང་གླུ་པ་གླུ་མ་སོགས་བརྗོད་ན་གྲངས་ཀྱིས་མི་ལོང་པ་ཤིག་བྱུང་ཡོད་ནའང་། ཕལ་མོ་ཆེས་ས་ཁུག་དང་ལུང་ཁུག་རྣམས་སུ་ཤགས་གླུ་འདྲ་བླངས་ཏེ་བསྡད་སྟབས་དེ་ཙམ་དུ་ཕྱིར་གོ་རྒྱུ་མེད་པ་ཤ་སྟག་རེད། ད་ཐེངས་ཁོ་མོ་ཨ་རིར་ཡོང་བ་དེ་བོད་པའི་གླུ་པ་དང་གླུ་མ་ཀུན་གྱི་སྙན་གྲགས་དང་ཆེ་ཐང་སོགས་དང་འབྲེལ་བ་དམ་པ་མ་ཟད་མོ་རང་སྒེར་གྱི་སྙན་གྲགས་ལ་ཡང་འབྲེལ་བ་ཡོད། ལྷག་པར་སྐབས་འདིར་ཁོ་མོས་ཨ་རིའི་མི་དམངས་རྣམས་ལ་བོད་པའི་གླུ་གཞས་དང་འགྱུར་ཁུག་སོགས་ལ་བག་ཆག་ལེགས་པོ་ཞིག་འཇོག་ཐུབ་ཚེ། འབྱུར་འགྱུར་བོད་ཀྱི་གླུ་པ་དང་གླུ་མ་སོགས་ཀྱི་སྡིངས་ཆའི་དེ་ཚད་མཐོ་རུ་འགྲོ་བ་དང། གླུ་མ་རང་ཉིད་ཀྱི་མཛེས་ཤིང་སྡུག་པའི་བྱད་གཟུགས་དང་། ཡིད་དུ་འོང་བའི་རྣམ་འགྱུར་གྱིས་བརྒྱན་པའི་གླུ་གཞས་དེ་དག་ལ་དགའ་ཞེན་དང་རྒྱབ་སྐྱོབ་མཁན་ཉིན་རེ་བཞིན་དུ་མང་དུ་འགྲོ་སྲིད། མ་ཟད་ཨ་རིར་གནས་པའི་ཤ་ཁྲག་གཅིག་པའི་སྤུན་ཟླ་རྣམས་ལ་ཕ་ཡུལ་དྲན་པའི་དྲན་གླུ་དང་། གཞན་ཡུལ་གནས་པའི་ཚོར་འདུ་འདྲ་མིན་ཞིག་ཀྱང་སྲིད། འོན་ཀྱང་བདག་ལྟ་བུར་མཚོན་ནངའ་གླུ་གཞས་སོགས་ལ་དེ་ཙམ་དུ་དགའ་ཞེན་མེད་མཁན་ཞིག་ཡིན་ཡང་མོ་རང་ལ་མཐའ་གཅིག་ཏུ་རྒྱབ་སྐྱོར་བྱེད་ཀྱིན་ཡོད། འདབ་པ་ཚེ་དབང་མགོན་པོས།
གླུ་མ་རིག་འཛིན་སྒྲོལ་མས་བོད་མི་རིགསས་ཀྱི་སྲོག་རྩར་གྱུར་བའི་སྐད་དང་ཡི་གེ་ཡར་རྒྱས་གོང་འཕེལ་ཡོང་བའི་ལས་དོན་སྒྲུབ་བཞིན་པའི་བྱ་བ་ལམ་དུ་འགྲོ་བ་དང་།
གང་ཉིད་ཚེ་རིང་ནད་མེད་ཡོང་བའི་་སྨོན་འདུན་ཞུ།
བོད་མི་རིགས་དང་སྐད་ཡིག་ལ་དུངས་བ་ཟབ་པའི་བོད་གངས་ཅན་པའི་ངག་གིས་ཕྱུག་པའི་གྲོང་གསེབ་གླུ་མ་རིག་འཛིན་སྒྲོལ་མ་མཆོག་ནུབ་ཕྱོགས་ཨ་རི་ནང་དུ་མ་འོངས་གངས་ཅན་པའི་སྲོག་རྩ་དག་གི་ཆེད་དུ་རིག་རྕལ་སྤྲོ་ཚོགས་ཞིག་གོ་སྒྲིག་བྱེད་བཞིན་པ་དེ་ལ་བཀྲ་ཤིས་བདེ་ལེགས་དང་ཆབས་ཅིག་ཐ་སྙད་ཁ་ཤས་ཤིག་འདིར་བཞག་ན་བསམ་ཡོད།
བདག་གིས་བསམ་ཚུལ་ཡིན་ན་ནུབ་ཕྱོགས་ཨ་རི་དང་ཡོ་རབས་སོགས་གནས་སྡོད་གངས་ཅན་པའི་ཕུ་ནུ་མིང་སྲིང་སུ་ཡིན་ཡང་ད་ཐེངས་ཁོ་མོ་ལ་ཨ་སྒོར་སུམ་ཅུ་རྒྱབ་སྐྱོར་ཞིག་བྱས་བ་ཡིན་ན་ཡག་པོ་ཡོད་པར་བསམ། བདག་ལྟ་བུ་ཡིན་ན་མ་འོངས་བར་གང་མགྱོགས་ངང་ཕ་ཡུལ་དུ་ལོག་ནས་ཁོ་མོ་དང་ཁོ་མོ་ལྟ་བུའི་གངས་ཅན་སྐད་ཡིག་དང་མ་འོངས་བའི་སོན་རྩ་དག་གིས་ཆེད་དུ་ཁོང་ཚོ་མཉམ་ཏུ་ལས་ཀ་བྱེད་འདོད་ཡོད།
དེའི་རྐྱེན་ཀྱིས་བོད་མི་སུ་འདྲ་ཞིག་ཡིན་ཡང་ཨ་སྒོར་སུམ་བཅུའི་རྒྱབ་གནང་བར་སྙིང་ཁོང་རུས་བའི་སྟེང་ནས་འབོད་སྐུལ་ཞུ་བཞིན་ཡོད