“སེམས་ཁུར་མ་བྱེད། ངས་མ་ཤི་བར་ཞི་བའི་འཐབ་རྩོད་བྱ་རྒྱུ་ཡིན”

ཕྱི་ཚེས་ ༡༥ ཉིན་བལ་ཡུལ་གཞུང་གི་ཁྲིམས་ཁང་ཞིག་གིས་གླིང་ཚ་ཚེ་བརྟན་རྡོ་རྗེ་ལགས་སུ་ལོ་ ༥ དང་ཟླ་ ༥ ཉིན་ ༢༥ ཡི་བཙོན་འཇུག་ཁྲིམས་ཐག་བཅད་ཡོད་པ་དང་། སྐབས་དེར་བལ་ཡུལ་སྣེ་ལེན་ཁང་གི་འབྲེལ་མཐུད་པ་ཚེ་བརྟན་ལགས་དང་། བལ་ཡུལ་གནས་བཞུགས་དོན་ལྡན་ལགས། ས་དཀར་བསྟན་འཛིན་ལགས་གསུམ་ལ་ཁོང་གི་ཅ་དངོས་འགའ་དང་། ཐེངས་འདིར་བལ་ཡུལ་ཁྲིམས་ཁང་ཁྲིམས་ཐག་བཅད་པའི་ཡིག་ཆ་བཅས་སྤྲད་དེ། ཁོང་ལ་ཐུགས་འཁྲལ་གནང་མི་དགོས། ཁོ་རང་ཉིད་ཀྱིས་མ་ཤི་བར་དུ་ཞི་བའི་འཐབ་རྩོད་མཐའ་འཁྱོང་གནང་རྒྱུ་ཡིན་སྐོར་སོགས་བརྗོད་ཡོད་འདུག་ལ། ཐེངས་འདིར་བལ་གཞུང་གིས་ཁོང་ལ་ཁྲིམས་ཐག་བཅད་པའི་ཡིག་ཆ་དེ་སྤྱི་ཚོགས་ནང་འགྲེམ་སྤེལ་གནང་དགོས་པའི་རེ་བཅོལ་ཡང་གནང་ཡོད་འདུག 

བོད་སྐྱོད་གོམ་བགྲོད་པ་གླིང་ཚ་ཚེ་བརྟན་རྡོ་རྗེ་ལགས་སུ་བལ་གཞུང་གིས་ཁྲིམས་ཐག་བཅད་པའི་སྔ་ཕྱིའི་གནས་ཚུལ་བལ་ཡུལ་དུ་གནས་བཞུགས་དོན་ལྡན་ལགས་ཀྱིས་མཁོ་སྤྲོད་གནང་བའི་ནང་འདི་ལྟར་བཀོད་འདུག “ ཟླ་འདིའི་ཕྱི་ཚེས་ ༧ ཉིན་གླིང་ཚ་ཚེ་བརྟན་རྡོ་རྗེ་ལགས་སུ་བལ་ཡུལ་ལག་འཁྱེར་ཞིབ་བཤེར་ལས་ཁུངས་ཀྱིས། དེ་རིང་ཁྱོད་གཏོང་གི་ཡིན། ཁྱོད་གང་དུ་འགྲོ་རྒྱུ་ཡིན། ཞེས་དྲིས་སྐབས་ཚེ་བརྟན་རྡོ་རྗེ་ལགས་ཀྱིས། ང་བོད་དུ་འགྲོ་རྒྱུ་ཡིན། ཞེས་ལན་སྤྲད་པར་ཞིབ་བཤེར་ལས་ཁུངས་ཀྱིས། ང་ཚོས་ཁྱོད་ཕྱིར་རྒྱ་གར་ལ་གཏོང་གི་ཡིན། བོད་དུ་གཏོང་ཐུབ་པ་མ་རེད་ཅེས་བརྗོད་འདུག དེ་མིན། ཉེས་ཆད་སྐོར་གསལ་བཤད་གང་ཡང་བྱས་མི་འདུག་ཀྱང་། དེའི་རྗེས་འགྲོ་བ་མིའི་ཐོབ་ཐང་ཚོགས་པའི་ལས་བྱེད་ཅིག་ས་དཀར་བསྟན་འཛིན་དང་ངེད་གཉིས་ཀྱི་སར་ཡོང་སྟེ་ཚེ་བརྟན་རྡོ་རྗེ་དེ་རིང་གཏོང་རྒྱུ་ཡིན་སྟབས། དངུལ་ཆད་བལ་སྒོར་ ༤༠༠༠ ལྷག་འཁྱེར་ནས་ཁོང་ལེན་དུ་འགྲོ་དགོས་སྐོར་དང་། དུས་ཚོད་འགོར་འགྱངས་བྱས་ན་གཏོང་རྒྱུ་མིན་ཚུལ་སོགས་ཞིབ་བཤེར་ལས་ཁུངས་ཀྱིས་ཁོ་ལ་བཤད་པ་དག་ང་ཚོར་བཤད་སོང་བས། ང་ཚོ་གསུམ་གྱིས་དངུལ་གྲ་སྒྲིག་བྱས་ཀྱང་དུས་ཚོད་ཕྱི་བོ་ཆགས་ཏེ་ཉིན་དེར་འགྲོ་ཐུབ་མ་སོང་། ཕྱི་ཉིན་ས་དཀར་བསྟན་འཛིན་དང་ངེད་གཉིས་ཀྱིས་གསར་འགོད་པ་འགའ་དང་སྣེ་ལེན་ཁང་གི་འབྲེལ་མཐུད་པ་ཚེ་བརྟན་བཅས་ཁྲིད་དེ་ཞིབ་བཤེར་ཁུངས་ལ་སོང་བ་ཡིན། སྔོན་ལ་ང་ཚེ་བརྟན་རྡོ་རྗེ་ཡོད་སར་སོང་ནས་དངུལ་ཆད་སྤྲོད་དགོས་པ་ནི་ཁྲིམས་མཐུན་གྱི་འགྲོ་སྟངས་ཤིག་ཡིན་པས། དངུལ་ཆད་འདི་སྤྲོད་དགོས་སྐོར་བཤད་པ་ཡིན། དེ་དུས་ཁོང་གིས་དངུལ་ཆད་འདི་ལ་བལ་ཡུལ་གཞུང་གི་ཁྲིམས་མཐུན་བདེན་དཔང་ཡིག་ཆ་ཚད་ལྡན་ཡོད་ན་འགྲིག་གི་རེད། དེ་མིན་ལྐོག་དངུལ་གྱི་ཐད་ནས་ལྕཊ་སྒོར་གཅིག་ཀྱང་མི་སྤྲོད་ཁོ་ཐག་ཡིན་ཟེར།

དེ་ནས་ང་ཚོ་ལས་ཁུངས་སུ་སོང་སྟེ་སྣེ་ལེན་ཁང་གི་འབྲེལ་མཐུད་པ་ཚེ་བརྟན་ལགས་ཀྱིས་ང་ཚོས་དངུལ་ཆད་སྤྲད་ནས་མི་འཁྲིད་ཀྱི་ཡིན། ཞེས་བཤད་པར། ལས་བྱེད་ཚོས་ཏོག་ཙམ་སྒུག་དང་ང་ཚོས་ཐག་གཅོད་བྱ་དགོས་ཟེར། གསར་འགོད་པ་དང་ང་ཚོས་ཕལ་ཆེར་ཆུ་ཚོད་ ༢ རིང་སྒུག་མཐར། སྣེ་ལེན་འབྲེལ་མཐུད་པ་ཚེ་བརྟན་སྐད་བཏང་སྟེ་དངུལ་ཆད་ཀྱི་སྟེང་དུ་ང་ཚོར་རྔན་པ་ཞིག་སྤྲོད་དང་གཏོང་གི་ཡིན་ཟེར། དེར་ང་ཚོས་ངོས་ལེན་མ་བྱས་སྟབས། འོ་ན་རྗེས་ཀྱི་གཟའ་ཟླ་བའི་ཉིན་ཤོག་དང་ཐག་གཅོད་བྱ་ཟེར། དེའི་རྗེས་བདུན་ཕྲག་གཅིག་རིང་ཐག་གཅོད་གང་ཡང་བྱས་མ་སོང” ཞེས་བཀོད་འདུག

ཕྱི་ཚེས་ ༡༥ ཉིན་ཚེ་བརྟན་རྡོ་རྗེ་ལགས་ཀྱིས་ཁོ་རང་གི་ཟིན་བྲིས་ནང་གནས་ཚུལ་ཞིག་བཀོད་པའི་ནང་། “ དེ་རིང་ང་རང་ཐོག་ཁང་གི་ལས་ཁུངས་ཨ་མའི་ནང་སྐད་བཏང་སོང་། ལས་གཙོ་བ་དེས་ང་ལ་ཁྱོད་དེ་རིང་ཀློད་གྲོལ་གཏོང་དགོས་ན། ང་ཚོ་ལ་བལ་སྒོར་སྟོང་ཕྲག་ལྔ་བཅུའི་ཉེས་ཆད་སྤྲོད་དང་ཁྱོད་རང་སོང་ཆོག་ཟེར། ངས་སྐད་ཆ་ཞིག་དྲིས་ན་འགྲིག་གམ་ཞེས་དྲིས་པར། འགྲིག་གི་རེད་ཟེར། ག་རེ་བྱས་ནས་ངས་སྒོར་མོ་དེ་དག་སྤྲོད་དགོས་པ་རེད་ཅེས་དྲིས་དུས། དེ་ནི་ཁྱེད་རང་རྒྱལ་ཁབ་འདིར་ལག་ཁྱེར་གང་ཡང་མེད་པར་འཛུལ་བའི་ཉེས་ཆད་རེད་ཟེར། དེ་ནི་ཁྲིམས་ཐོག་གི་ཐག་གཅོད་རེད་དམ་ཞེས་དྲིས་དུས། ཁྲིམས་ཐོག་གི་ཐག་གཅོད་མ་རེད། ང་ཚོའི་ལས་ཁུངས་ཀྱི་ཐག་གཅོད་རེད་ཟེར། ངས་དུས་དེ་རིང་བར་དུ་ཁྱེད་ཅག་གཞུང་གི་ཁྲིམས་ལ་བརྩི་སྲུང་གིས་སྐད་ཆ་ཚིག་གཅིག་ཀྱང་མ་བཤད་པར་སྒུག་ནས་བསྡད་པ་དེ་ལ་གྲུབ་འབྲས་གང་ཡང་མ་བྱུང་བ་རེད་དམ། ང་ལ་ཁྲིམས་ཐོག་ནས་ཐག་གཅོད་གཙང་མ་མ་བྱས་པ་དང་། ང་རང་གི་ཉེས་པ་འདི་རེད་ཅེས་ཁྲིམས་ཐོག་ནས་གཏན་འབེབས་མ་བྱས་བར་དུ། ཁྱོད་ཚོར་སྒོར་གཅིག་ཀྱང་སྟེར་རྒྱུའི་གྲ་སྒྲིག་ང་ལ་རྩ་བ་ནས་མེད་ཅེས་བཤད་པ་ཡིན། སྐབས་དེར་མི་དེ་ཁོང་ཁྲོ་དང་བཅས་འདི་ནི་ང་ཚོའི་རྒྱལ་ཁབ་རེད། ཁྱེད་ཅག་སྤྲང་འཁྱམས་པ་ཚོའི་གནས་ཚང་མ་རེད་ཅེས་འཇིགས་རྔམ་བསྟན་ཏེ་ང་ལ་སྐད་ཆའི་འཕྲོ་བཤད་དུ་བཅུག་མ་སོང་། དེ་ནས་ང་རང་ཕྱིར་བཀག་བསྐྱིལ་ཁང་དུ་བཅུག་སོང་། ཁོས་བཤད་འཕྲོས་ལ་ཉན་ན་ཁོང་ཚོས་ལས་ཁུངས་ནས་ང་རང་ལ་ཁྲིམས་འདི་ཐག་གཅོད་བྱས་པ་རེད་ཟེར་ནས་བདེན་དབང་ཡི་གེ་གང་ཡང་མེད་པར། བར་ནས་སྒོར་མོའི་ཉེས་ཆད་འཁུར་དུ་བཅུག་ནས་གཏོང་འདོད་པ་དེ་རེད་འདུག” ཅེས་བཀོད་འདུག

ཕྱི་ཚེས་ ༡༥ ཉིན་གྱི་སྔ་དྲོར་ཚེ་བརྟན་རྡོ་རྗེ་ལགས་སུ་འདྲི་རྩད་རྗེས་ཕྱིར་བཀག་བསྐྱིལ་ཁང་དུ་བཅུག་མ་ཐག ཁོས་དོན་ལྡན་ལགས་སུ་ཁ་པར་བཏང་བའི་སྐོར་དོན་ལྡན་གྱིས་ངོ་སྤྲོད་གནང་དོན། “ཚེ་བརྟན་རྡོ་རྗེས་ང་ལ་ཁ་པར་ཡོང་ནས་དེ་རིང་གཅིག་བྱས་ན་ང་ལ་ཁྲིམས་ཐག་གཅོད་ན་ཐང་གི་ཟེར། དེ་ནས་ངས་ས་དཀར་བསྟན་འཛིན་ལ་བཤད་ནས་ངེད་གཉིས་ཁོང་ལ་ལྟ་རུ་སོང་བ་ཡིན། ཁོས་ང་ལ་དེ་རིང་ང་ཁྲིམས་ཐག་བཅད་ནས་བཙོན་ཁང་དུ་འཁྲིད་པ་ཡིན་ན། ཁྱོད་ང་རང་གི་ཅ་ལག་ལེན་དུ་ཡོང་དགོས་པ་རེད་ཟེར” ཅེས་བཀོད་འདུག 

དོན་ལྡན་ལགས་ཀྱིས་མུ་མཐུད་དུ་བཀོད་དོན། ” ཕྱི་ཚེས་ ༡༥ ཉིན་གྱི་ཕྱི་དྲོའི་ཆུ་ཚོད་ ༣།༡༠ ཡས་མས་སུ་ཁོང་གིས་ང་ལ་ཁ་པར་འབྱོར་ཏེ། ང་ད་ལྟ་བཙོན་ཁང་ལ་ཁྲིད་རན་སོང་བས། ཁྱོད་ངའི་ཅ་ལག་ལེན་དུ་ཡོང་རོགས་ཟེར། དེ་ནས་ང་ཁོང་གི་སར་སླེབས་སྐབས་སྣེ་ལེན་ཁང་གི་འབྲེལ་མཐུད་པ་ཚེ་བརྟན་ལགས་ཕེབས་འདུག དེ་ནས་ཚེ་བརྟན་རྡོ་རྗེ་ཡིས་ཁོང་གི་ཅ་ལག་ཚང་མ་ངའི་ལག་ཏུ་བཞག་སྟེ། “ སེམས་ཁུར་མ་བྱེད། ངས་མ་ཤི་བར་ཞི་བའི་འཐབ་རྩིོད་བྱ་རྒྱུ་ཡིན” སོགས་ཀྱི་སྐོར་ནས་ཁ་བརྡ་མང་པོ་ཞིག་བྱས་སོང་ལ། ད་དུང་ཁྲིམས་ཁང་གིས་ཐག་གཅོད་བྱས་པའི་ཡིག་ཆ་དེ་ཚེ་བརྟན་གྱི་ལག་ཏུ་ཡོད་པས། དེ་བསྐྱར་དཔར་བྱས་ཏེ་མང་ཚོགས་ནང་འགྲེམས་སྤེལ་བྱོས་ཟེར། དེ་ནས་ངས་ཁོང་ལ་ཁོ་རང་གི་ཅ་ལག་དེ་དག་ག་རེ་བྱེད་དགོས་མིན་དྲིས་དུས། ཅ་ལག་དེ་དག་གཞན་སུ་ལའང་སྤྲོད་མི་དགོས། ཁྱོད་ཀྱིས་ཉོར་སྡོད་དང་ཉིན་ཞིག་ངས་ཁྱོད་ལ་ལན་ཞིག་སྤྲད་ཡོང་ཟེར”ཅེས་སོགས་བཀོད་འདུག

མཇུག་ཏུ་དོན་ལྡན་ལགས་ཀྱིས་གསལ་བཤད་ཅིག་གནང་ཡོད་པའི་ནང “གསར་འགྱུར་ནང་ཚེ་བརྟན་རྡོ་རྗེ་ཡི་ཅ་ལག་བལ་ཡུལ་ཉེན་རྟོག་པས་འཁྱེར་སོང་ཟེར་བ་དེ་བདེན་པ་མ་རེད” ཅེས་དང་། “ཁ་སང་བར་གྱི་ཉིན་ ༢༥ རིང་ཨ་ཚེ་དང་ས་དཀར་བསྟན་འཛིན། ངེད་གསུམ་ནས་རེས་མོས་ཀྱིས་ཁོང་ལ་ཟ་མ་བསྐྱལ་བ་དང་། དགོས་མཁོ་གང་ཡོད་རོགས་རམ་བྱས་པ་ཡིན། འདི་གཞན་ལ་བསྒྲགས་དགོས་པ་ཞིག་མིན་ཡང་། འགའ་ཤས་ཀྱིས་ཁ་ནས་སྙན་སྙན་འགྲིག་འགྲིག་རེ་བཤད་དེ། དོན་ལ་སོ་སོའི་བདེ་འཇགས་ཁོ་ན་ལས་མི་བསམ་པས། འདིའི་རིགས་ལ་གསལ་བཤད་ཅིག་ཞུ་འདོད་བྱུང” ཞེས་བཀོད་འདུག