དེ་རིང་ཕྱི་ཚེས་ ༡ ཉིན། སུད་སུ་མངའ་སྡེ་ཨ་རོ་བོད་མའི་ཚོགས་ཆུང་གི་གོ་སྒྲིག་འོག བོད་ནང་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་བའི་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་དང་། ས་གནས་མི་མང་ད་ལྟའི་བོད་ནང་གི་ཛ་དྲག་གནས་སྟངས་ཐད་རོགས་སྐྱོར་འབོད་སྐུལ་ཞུ་ཆེད། མངའ་སྡེ་ཨ་རོ་མེ་འཁོར་འབབ་ཚུགས་སུ་གོམ་བགྲོད་ཀྱི་ལས་འགུལ་ཞིག་མགོ་འཛུགས་གནང་ཡོད་འདུག
འདིའི་ཐད་ལས་འགུལ་གོ་སྒྲིག་པ་བསོད་ནམས་ལགས་ཀྱིས་ངོ་སྤྲོད་གནང་བ་ལྟར་ན། ཐེངས་འདིའི་ལས་འགུལ་ནང་དང་བླངས་བོད་མི་ ༣༥ མཉམ་ཞུགས་གནང་ཡོད་འདུག་ལ། ཀེ་ལོ་མུ་ཊར་ ༩༠ ལྷག་ཡོད་པའི་མངའ་སྡེ་ཨ་རོ་ཡི་མེ་འཁོར་ས་ཚུགས་ནས་རྒྱལ་ས་བྷན་གྱི་མེ་འཁོར་ས་ཚུགས་བར་གྱི་གོམ་བགྲོད་སྐབས། ལས་འགུལ་བ་ཚོས་བོད་ནང་རང་ལུས་མེར་བསྲེཊ་ཀྱིས་རྒྱ་ནག་གཞུང་ལ་ངོ་རྒོལ་སྐད་འབོད་གནང་མཁན་རྒྱལ་གཅེས་དཔའ་བོ་དཔའ་མོ་ཡོངས་ཀྱི་སྐུ་པར་དང་ཁ་ཆེམས་ཡི་གེ་བཅས་འཕྱར་ཏེ། ས་གནས་ཀྱི་གྲོང་གྲོང་ཁྱེར་དང་གྲོང་རྡལ་རིམ་པའི་ནང་བོད་དོན་དྲིལ་བསྒྲགས་དང་མི་མང་ལ་ད་ལྟའི་བོད་ནང་ཛ་དྲག་གནས་སྟངས་ཐད་རྒྱབ་སྐྱོར་ཡོང་བའི་འབོད་སྐུལ་ཞུ་རྒྱུ་ཡིན་འདུག
རྡོག་རྩ་གཅིག་ཏུ་དྲིལ་ཏེ།།རྐང་པ་མཉམ་དུ་འགུལ་ན།།རྫུན་དང་གཡོ་རྒྱུ་ཅན་གྱི།།ངན་པ་ལྷང་དུ་འབུད་ངས།།