ལྡི་ལིར་གཞོན་ནུའི་དབུས་རྒྱུན་གསུམ་གྱིས་དུས་ཡུན་ངེས་མེད་ཀྱི་ཟས་བཅད་ངོ་རྒོལ་གནང་འཆར་ལ་རྒྱ་གར་ཉེན་རྟོག་པས་སྤེལ་མ་བཅུག་པར་ད་ཆར་ཁོང་གསུམ་བཀག་ཉར་བྱས་ཡོད་འདུག
བོད་ཀྱི་གཞོན་ནུ་ལྷན་ཚོགས་ཀྱིས་འདི་ལོའི་འགན་འཛིན་ལྷན་ཚོགས་ཐེངས་ ༤༣ པའི་ཐོག བོད་ནང་གཅིག་རྗེས་གཉིས་མཐུད་ཀྱིས་རང་ལུས་མེར་བསྲེཊ་ཀྱི་གནས་ཚུལ་འབྱུང་བཞིན་པ་རྣམས་ལ་གདུང་སེམས་མཉམ་སྐྱེད་ཆེད། རྒྱ་གར་རྒྱལ་ས་ལྡི་ལིར་དུས་ཡུན་ངེས་མེད་ཀྱི་ཟས་བཅད་ངོ་རྒོལ་གནང་རྒྱུའི་གྲོས་ཆོད་གཏན་འབེབས་བྱུང་བ་ལྟར། ཁ་སང་ཕྱི་ཚེས་ ༣ ཉིན་རྒྱལ་ས་ལྡི་ལིའི་ཇན་ཏར་མན་ཏར་ས་གནས་སུ་སྐུ་མགྲོན་གཙོ་བོ་རྒྱ་གར་གྱི་གྲོས་ཚོགས་འཐུས་མི་དང་པེ་རྗེ་པེ་ཆབ་སྲིད་ཚོགས་པའི་ཚོགས་གཞོན་སྐུ་ཞབས་བྷ་གྷ་སིན་ཀོ་ཤི་ཡཱ་རེ་མཆོག་གདན་ཞུའི་ཐོག གཞོན་ནུའི་ཚོགས་གཞོན་དོན་གྲུབ་ལྷ་དར་ལགས་དང་སྒྲིག་འཛུགས་འགན་འཛིན་སྤེན་པ་ཚེ་རིང་། རིག་གཞུང་འགན་འཛིན་འཇིགས་མེད་གསུམ་གྱིས་ལས་འགུལ་མགོ་འཛུགས་གནང་འཆར་ལ། ལྡི་ལི་ཉེན་རྟོག་པས་བོད་མི་འདུས་སྡོད་ས་གནས་མན་ཇི་ཊི་ལཱ་དང་རོ་ཧི་ནེ་བཅས་ས་གནས་ཁག་ཏུ་ཉེན་རྟོག་པ་འགྲེམ་འཇོག་གིས་མི་མང་མཉམ་ཞུགས་ལ་བཀག་འགོག་བྱས་ཏེ། ཟས་བཅད་ངོ་རྒོལ་ལས་འགུལ་མགོ་འཛུགས་བྱེད་པར་ཆུ་ཚོད་ ༢ ལྷག་འགོར་འགྱངས་བྱས་ཡོད་པ་མ་ཟད། ཁ་སང་དགོང་མོ་རྒྱ་གར་ཉེན་རྟོག་པས་ཟས་བཅད་ངོ་རྒོལ་བ་གསུམ་ཇན་ཏར་མན་ཏར་ས་གནས་སུ་སྡོད་མ་བཅུག་པར་བཙན་འཁྲིད་བྱས་ཡོད་འདུག
དེ་རིང་ཉིན་གུང་ཆུ་ཚོད་ ༡༢ ཙམ་ལ་འདི་གའི་གསར་འགོད་པས་དབུས་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་སུ་བཅར་འདྲི་ཞུས་པར། དེ་རིང་ཞོགས་པར་ཟས་བཅད་ངོ་རྒོལ་གནང་མཁན་གསུམ་ཀློད་གྲོལ་བཏང་ཡོད་ཀྱང་། ཆུ་ཚོད་ ༢ ཙམ་ཕྱིན་རྗེས་སླར་ཡང་འཛིན་བཟུང་བཙན་འཁྲིད་བྱས་ཏེ། ད་ལྟའི་ཆར་ཀོ་ནོར་ཉེན་རྟོག་ལས་ཁུངས་སུ་བཀག་ཉར་བྱས་ཡོད་སྐོར་བརྗོད་བྱུང་།
ཐེངས་འདིའི་ཟས་བཅད་ངོ་རྒོལ་གྱི་ལས་འགུལ་འདི་ནི། ཟླ་འདིའི་ཕྱི་ཚེས་ ༡༨ ཉིན་ནས་བཟུང་ཨ་རིའི་གྲོང་ཁྱེར་ནེའུ་ཡོག་ཏུ་རྒྱལ་ཁབ་ཁག་གི་དབུ་ཁྲིད་ལྷན་འཛོམས་ཐོག་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་སྐོང་བཞིན་ཡོད་པ་དེར་དམིགས་ཏེ་མགོ་འཛུགས་གནང་བ་ཞིག་ཡིན་འདུག་ལ། ལས་འགུལ་གྱི་དགེ་འདུན་གཙོ་བོ། ༢༠༡༡ ལོར་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ལས་གསུམ་དབུ་བཞུགས་ཐོག་ཇན་ཏར་མན་ཏར་ས་གནས་སུ་དུས་ཡུན་ངེས་མེད་ཀྱི་ཟས་བཅད་ངོ་རྒོལ་གནང་སྐབས། ཡུ་རོབ་གྲོས་ཚོགས་སྐུ་ཚབས་བསླེབས་ཏེ་ངོ་རྒོལ་བའི་དགོས་འདུན་ཞལ་བཞེས་གནང་བ་ཁག་དང་། འདི་ལོའི་ལོ་སར་ཚེས་ ༡ ཉིན་བཟུང་བོད་ཀྱི་གཞོན་ནུ་ལྷན་ཚོགས་ཀྱིས་ཨ་རིའི་གྲོང་ཁྱེར་ནེའུ་ཡོག་མཉམ་འབྲེལ་རྒྱལ་ཚོགས་ལས་ཁུངས་ཨ་མའི་མདུན་ཐང་དུ་དུས་ཡུན་ངེས་མེད་ཀྱི་ཟས་བཅད་ངོ་རྒོལ་གནང་སྐབས། མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་སྐུ་ཚབ་དང་། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཚོགས་པའི་སྐུ་ཚབ་བཅས་ཆེད་ཕེབས་ཀྱིས་ལས་འགུལ་བའི་དགོས་འདུན་ཐད་ཞལ་བཞེས་གནང་བ་ཁག་མཇུག་སྐྱོང་ལག་བསྟར་ཡོང་བའི་འབོད་སྐུལ་ཞུ་ཆེད་དང་།
ད་ལྟའི་བོད་ནང་གི་དངོས་ཡོད་གནས་སྟངས་དང་བོད་མིའི་མངོན་འདོད་ཤེས་རྟོགས་ཆེད། རྒྱལ་སྤྱིའི་གཞུང་གི་དབུ་ཁྲིད་དང་ཚོགས་སྡེ་ཁག གསར་འགོད་པ་སོགས་བོད་ནང་འཕྲལ་ཏུ་གཏོང་རྒྱུ། ཆུང་སྲིད་པཎ་ཆེན་རིན་པོ་ཆེ་མཆོག་དང་སྤྲུལ་སྐུ་བསྟན་འཛིན་བདེ་ལེགས་གཙོས་པའི་ཆབ་སྲིད་བཙོན་པ་ཡོངས་རྫོགས་མྱུར་ཏུ་ཀློད་གྲོལ་གཏོང་རྒྱུ་དང་། ཉེ་བའི་དུས་ནས་བཟུང་རྒྱ་གཞུང་གིས་བོད་ནང་གཞས་པ་དང་རྩོམ་པ་པོ་བཅས་གནད་ཡོད་མི་སྣ་མང་པོ་ཞིག་འཛིན་བཟུང་བཙོན་འཇུག་བྱེད་བཞིན་པ་ འཕྲལ་ཏུ་མཚམས་འཇོག་བྱ་རྒྱུ། རྒྱ་གཞུང་གིས་རང་ལུས་མེ་བསྲེཊ་གནང་མཁན་རྒྱལ་གཅེས་དཔའ་བོ་དཔའ་མོ་ ༥༡ ལྷག་ལ་ དྲག་སྤྱོད་པ་དང་མི་ཚེ་ཁོངས་འཁྱོལ་གྱི་མེད་པའི་དབང་གིས་ཡིན་ཚུལ་སོགས་མ་ཉེས་ཁ་གཡོག་བྱེད་ཀྱིན་པ་མཚམས་འཇོག་བྱ་རྒྱུ་བཅས་དང་། གོང་གསལ་གྱི་དགོས་འདུན་ཁག་གི་ཐད་འཛམ་གླིང་གི་གཞུང་དང་ཚོགས་སྡེ་ཁག་གིས། བོད་དེ་ལོ་རྒྱུས་ཀྱི་ཐོག་ནས་རང་བཙན་གྱི་རྒྱལ་ཁབ་ཅིག་ཡིན་པའི་ངོས་འཛིན་དང་རྒྱབ་སྐྱོར་གནང་ཡོང་བའི་འབོད་སྐུལ་ཞུ་ཆེད་བཅས་ཡིན་འདུག
མཇུག་ཏུ་ཚོགས་གཙོ་ཚེ་དབང་རིག་འཛིན་ལགས་སུ། བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་བྱས་པའི་ཟས་བཅད་ལས་འགུལ་མགོ་བཙུགས་པའི་ཉིན་དང་པོར། རྒྱ་གར་ཉེན་རྟོག་པས་ཟས་བཅད་བ་འཛིན་བཟུང་དང་མི་མང་བཀག་ཉར་བཅས་བྱས་པའི་གནས་ཚུལ་བྱུང་ཡོད་པ་ལྟར། མུ་མཐུད་འདི་ལྟར་བྱས་ཚེ་ལས་འགུལ་མཚམས་འཇོག་བྱ་དགོས་བྱུང་མིན་དྲིས་པར་ཁོང་གིས། “ ང་ཚོའི་ཐོག་མའི་འཆར་གཞི་ལས་འགུལ་མུ་མཐུད་འགྲོ་རྒྱུ་དེ་རེད། གལ་ཆེ་ཤོས་བོད་ནང་གི་ཛ་དྲག་གི་གནས་སྟངས་འོག་རྒྱལ་གཅེས་དཔའ་བོ་དཔའ་མོ་ ༥༡ རང་ལུས་མེར་བསྲེཊ་བཏང་སྟེ། བོད་རྒྱལ་ཁབ་དང་མི་རིགས་ཀྱི་ཆེད་དུ་རླབས་ཆེན་གྱི་བློས་གཏོང་གནང་ཡོད་པ་རེད། ཛ་དྲག་གི་གནས་སྟངས་འདིའི་སྐབས་སུ་བོད་ཀྱི་གཞོན་ནུ་ལྷན་ཚོགས་ཀྱིས་གདུང་སེམས་མཉམ་སྐྱེད་ཡོད་ཅེས་ཚིག་སྐམ་པོ་ཙམ་མིན་པར། ལག་ལེན་གྱི་ཐོག་ནས་ལས་འགུལ་སྤེལ་བ་ཞིག་དང་། ལས་འགུལ་འདི་བརྒྱུད་དེ་རྒྱལ་སྤྱིའི་ནང་བོད་ནང་གི་ཛ་དྲག་གི་གནས་སྟངས་དེ་ང་ཚོའི་དགོས་འདུན་ལྟར་འགྲོ་ཐུབ་པར་བྱ་རྒྱུ་དེ་ཡིན། ” ཞེས་བརྗོད་བྱུང་།
གསར་འགོད་པ། དོན་གོ
ཡག་པོ་རེད་ཐུགས་རྗེ་ཆེ།
བོད་ཀྱི་གཞོན་ནུ་ཚོགས་པ་འདི་བཙན་པོའི་གདུང་རབ་ངོ་མ་ཞིག་ཡིན། ཁོང་རྣམས་ཀྱིས་ལས་དོན་གང་གནང་ཀྱང་འདས་པའི་ཕ་མེས་རྣམས་ཀྱི་ཞབས་རྗེས་འཆོལ་བཞིན་ཡོད་པ་ནི་རྟག་ཏུ་ཡི་རང་དང་རྒྱབ་བསྐྱོར་ཞུ་བཞིན་ཡོད། དེ་བཞིན་དུ་རང་བཙན་སྨྲ་བ་གསུམ་ལ་ཡང་གུས་བཀུར་ཞུ་རྒྱུ་ཡིན།
ཐེངས་འདིར་གཞོན་ནུ་ལྷན་ཚོགས་ཀྱིས་སོ་སོར་ནུས་པ་ག་ཚོད་ཅིག་ཡོད་པ་ཤེས་ཡོད་ཤག་ཡིན། འདས་པའི་ལོ་ངོ་ལྔ་བཅུ་རིང་རྟ་རྒན་ཐུགས་རྗེ་བཀའ་དྲིན་ལ་བན་རྒན་དབུས་ལ་ཕེབས་ཐུབ་བྱུང་ཡོད་པ་ཤེས་ཡོད།
གཞོན་ནུའི་སྒྲིག་འཛུགས་ནི་བཙན་བྱོལ་ནང་གི་གཞུང་འབྲེལ་མིན་པའི་ཚོགས་པ་ཆེ་ཤོས་གཅིག་དང་སྟོབས་ཤུགས་ཆེ་ཤོས་གཅིག་ཡིན། གཞོན་ནུ་ཚོགས་པས་རང་ཉིད་ཀྱི་སྟོབས་ཤུགས་ལ་བརྟེན་ནས་བོད་མི་རིགས་འདིའི་ཆེད་དུ་ལས་འགུལ་རབས་དང་རིམ་པ་མང་པོ་སྤེལ་ཡོད། ཁོང་ཚོས་ད་བར་གནང་པའི་ལས་འགུལ་རྣམས་བོད་བསྟན་སྲིད་ཀྱི་ཆེད་དུ་རེད་ལ་བོད་མི་རིགས་ཀྱིའང་ཆེད་དུ་རེད། དེར་བརྟེན་ང་ཚོས་གཞོན་ནུ་ཚོགས་པར་ལོག་མཐོང་གནང་པ་ཡིན་ན་ཅུང་མི་འགྲིག་པར་སེམས། དེ་བས་བཞུགས་སྒར་གྱི་སྲང་ལམ་དུ་རང་བཙན་པར་འདོད་ཅིང་ཁ་བཤད་ལག་ལེན་གཅིག་ཀྱང་མེད་པའི་མི་སྣ་འགའ་ཡོད་ཅིང་མི་དེ་རིགས་ཀྱིས་གཞོན་ནུའི་ལས་འགུལ་ལ་ཞུགས་ཀྱི་མེད་ལ་དབུ་མའི་ལས་འགུལ་ལའང་ཞུགས་ཀྱི་མེད། མི་དེ་རིགས་ཀྱི་ལས་ཀ་གཙོ་བོ་ནི་བོད་རང་བཙན་ཡིན་ལུགས་དང་བོད་གཞུང་ལ་སྐྱོན་བརྗོད་ཁོ་ན་བྱ་རྒྱུ་ལས་གཞན་གང་ཡང་མེད། དེ་དག་ནི་སྲིན་བྱ་ངོ་མ་ཡིན་པ་ལས་ལག་ལེན་པ་ཞིག་གཏན་ནས་མ་རེད། དེར་བརྟེན་ཁ་བཤད་ལག་ལེན་མེད་པའི་མི་རིགས་ཀྱི་བྱ་སྤྱོད་ལ་བརྟེན་ནས་གཞོན་ནུར་སྐྱོན་བརྗོད་དང་ལོག་མཐོང་གནང་ཚེ་ཅུང་མ་འགྲིག་པར་སེམས།
ལམ་དབུས་མའི་དགོས་དོན་བསྒྲུབས་ནས། དེ་ནས་གཞི་ནས་རང་བཙན་དགོས་ན་ཡང་སྒྲུབ་པའི་དུས་དང་གོ་སྐབས་ཡོད།
འོནད་ཀྱང་ད་ལྟ་༸གོང་ས་ཆེན་མོ་བཅུ་བཞི་པ་བཞུགས་རིང་ལ་བོད་རྒྱའི་དཀའ་རྙོག་བསལ་བར། བོད་རང་བཙན་རྩོད་པ་འདིས། གཉིས་ཕན་དབུས་མའི་ལམ་གྱི་སྒྲུབ་འབྲས་སོན་པ་ལ་གནོད་པ་དང་། དུང་རྒྱང་འགྲོ་བ་མཐོང་མི་ཐུབ་པ། ཨ་ཡིན་ནམ།
ངས་སྒེར་ལ་མི་དགའ་ནས་འདིར་བཤད་པ་མིནད་ཀྱང་། སྤྱི་ལ་བསམས་ནས་བཤད་ཐལ་ཤོར་བས། ཀུན་གྱིས་དཔྱད་པར་འཚལ། །
ཆུང་མ་དང་། མི་ཚེ་བློས་བཏང་ནས་བོད་རང་གི་ཆེད་དུ་འབད་བརྩོན་གནང་མཁན་བསྟན་འཛིན་བརྩོན་འགྲུས་དང་། རང་ཉིད་སྡོད་ཁང་ཙམ་ལ་ཡང་དོན་གཉེར་མི་བྱེད་པར་མི་ཚེ་བོད་ཀྱི་ཆེད་དུ་འབུལ་མཁན་ལྷ་བཟང་ཚེ་རིང་། གཏམ་དང་སྙན་གྲགས་ལ་མི་ལྟ་བར་སུ་དང་གང་ལ་ཐུག་ཀྱང་བོད་དོན་གླིང་མཁན་འཇམས་དབྱངས་ནོར་བུ་ལགས་བཅས་ལ། ཟློག་ས་གཅིག་སྒྲིལ་མི་བྱེད་ཟེར་མཁན་དེས་སུ་དང་ལྡོག་ས་གཅིག་སྒྲིལ་བྱེད་ཀྱི་ཡིན། ཁོ་ཚོ་མ་མཐའ་ཡང་བོད་པ་ཡིན་པས། མཐུན་ལམ་བྱེད་དགོས་བསམ་པ་མེད་ན། ཁྱེད་རང་གིས་ནམ་ཡང་བོད་དང་བོད་མིར་ཕན་པའི་ལས་ཤིག་བྱེད་མི་ཐུབ་ལ། ཁྱེད་དང་འདྲ་བ་ལ་སུ་ཡང་ཡིད་ཆེས་བྱེད་མི་སྲིད། རྒྱལ་བའི་དགོངས་གཞི་སྒྲུབ་མཁན་དེ་ཁྱེད་ལྟ་བུ་ཞིག་ཡིན་མི་སྲིད།
དྲ་གྲོགས་དག་ལ་བསྐྱར་དུ་ཞུ་རྒྱུར།
འཇམ་ནོར་ལ་འཁུ་སེམས་དང་འཁོན་འཛིན་བཅངས་དགོས་དོན་གང་ཡང་མེད། ཡིན་ན་ཡང་༸་གོང་ས་མཆོག་གིས་ཐུགས་ཕམ་པའི་བཀའ་སློབ་གནང་དགོས་དོན་ནི་མི་དེ་དག་གིས་འཆལ་གཏམ་དང་དཀྲུག་ཤིང་ཟུར་ཟ་སྣ་ཚོགས་བྱས་ནས་གོང་ས་མཆོག་གིས་ལམ་སྟོན་འོག་ཤར་བསྐྱོད་གནང་བཞིན་པའི་བོད་མིའི་སྒྲིག་འཛུགས་ལ་དམའ་འབེབ་དང་ཁུངས་ལུང་མེད་པའི་གཞི་མེད་ཉེས་འཛུགས་ཀྱི་ལས་འགུལ་སྤེལ་ནས་མི་མང་པོ་མགོ་རྨོངས་ཐབས་དང་།རང་ཉིད་ཆབ་སྲིད་པ་གྲགས་ཅན་ཞིག་ཡིན་ཁུལ་རྣམ་འགྱུར་གྱི་སྒོ་ནས་བོད་མི་མང་པོ་ཞིག་བསླུ་ཐབས་བྱས་པ་དང་། བྱེད་བཞིན་པ་རེད།
བོད་མིའི་ནང་ཁུལ་གཅིག་སྒྲིལ་ལ་གནོད་པའི་ལས་འགུལ་རིམ་པ་སྤེལ་བ་ལ་བརྟེན་ནས་བྱུང་བ་རེད།མི་སྣ་གཙོ་བོ་འཇམ་ནོར་དང་ལྷག་བསམ་ཚེ་རིང་བསྟན་འཛིན་བརྩོན་འགྲུས་བཅས་རེད། རྣམ་པ་ཚོས་མ་ཤེས་པ་དང་མ་གོ་བ་ཡོང་མི་སྲིད་པ་ཞིག་པ་རེད།
མི་ད་དག་གིས་བོད་དོན་ལ་ཕན་པའི་ལས་ཀ་སྣེ་གཅིག་བྱས་མྱོང་མེད། མི་དེ་དག་ལ་འཆར་གཞི་གང་ཡང་མེད། གྲ་སྒྲིག་གང་ཡང་མེད། དོན་དངོས་དང་མཐུན་པའི་བསམ་ཤེས་མེད།
ཚིག་སྟོང་སྒྲོགས་པ་ཁོ་ན་རེད། གྲ་སྒྲིག་གང་ཡང་མེད་ལག་སྟོང་རེད། འཆར་གཞི་གང་ཡང་མེད་པའི་བསམ་སྟོང་རེད། མི་དེ་དག་ལ་བོད་རང་བཙན་ལེན་ཐབས་ཀྱི་དམིགས་བསལ་གྱི་འཆར་གང་ཡོད། གྲ་སྒྲིག་གང་ཡོད། ལས་འགུལ་གང་སྤེལ་མྱོང་ཡོད། ཕྱིར་མིག་བལྟས་ན་མི་ཤེས་མཁན་སུ་ཡོད།མི་དེ་དག་གིས་སྐད་ཆ་གང་བཤད་ཐམས་ཅན་༸གོང་ས་མཆོག་དང་བོད་མིའི་སྒྲིག་འཛུགས་ཀྱི་ལངས་ཕྱོགས་དང་སྲིད་བྱུས་དེ་དག་ལ་གཏོང་བ་ཤ་སྟག་རེད།
གཞོན་ནུ་ཚོགས་པའི་ཡི་རང་དང་བསྔགས་བརྗོད་ཡོད་ཀྱང་མི་དེ་དག་གི་རྗེས་སུ་མི་འབྲང་བར་རེ་བ་ཡོད།
དགོས་པ།
རང་བཙན་བོད་པས་སྒྲུབ་དཀའ། །
བོད་མིར་རང་བཙན་ཕན་དཀའ། །
ཕན་པ།
དུས་རབས་ཉེར་གཅིག་བོད་མིར། །
དབུ་མ་གཅིག་ཉིད་ཕན་སྲིད། །
ཚོགས་གཙོ་ཚེ་དབང་། ལྷག་བསམ་དང་འཇམ་ནོར་གསུམ་གནས་གཅིག་ཏུ་དུས་གཅིག་ལ་བོད་རང་བཙན་ཆེད་དུ་ལུས་སྲོག་ལོངས་སྤྱོད་གཏོང་ཐུབ་པའི་དུས་ཚོད་ཅིག་ཤར་སྲིད་དམ། ! ! ! ? ? ?
lobsang ལགས། གཞོན་ནུའི་ཚོགས་མི་རེ་ཟུང་གི་བྱེད་སྤྱོད་ནི་ཐ་དད་རེད། རྩ་བའི་གཞོན་ནུ་ཚོགས་པ་ནི་བོད་ཀྱི་བསྟན་པ་དང་ཆབ་སྲིད་ལ་འགན་འཁུར་མཁན་གྱི་ཚོགས་པ་ཞིག་ལ་ངོས་འཛིན་ཞུ་གི་ཡོད་པས་གཞོན་ནུ་ཚོགས་པས་རང་གི་སྒྲིག་གཞིར་དམིགས་ཡུལ་དོན་ཚན་བཞི་ཡོད་པའི་དང་པོར། གཞིས་བྱེས་བོད་མི་ཡོངས་ཀྱི་བློ་གཏོད་རེ་ཡུལ་གཅིག་ཉིད་༧གོང་ས་༧སྐྱབས་མགོན་ཆེན་པོའི་དབུ་ཁྲིད་ལམ་སྟོན་ཡང་དག་མུན་སེལ་འོག་ཤར་བསྐྱོད་བྱ་རྒྱུ་གཞི་རྩར་བཟུང་ཐོག་བོད་གཞུང་འབངས་ཀྱི་སྤྱི་དོན་ལ་ལྷག་བསམ་འཁུར་ལེན་རྨང་གཞིར་འཁྱེར་བ། ཞེས་གསལ་བ་བཞིན་སྒྲིག་གཞི་ལ་རྩ་འཛིན་གྱིས་དུས་བསྟུན་བསམ་ཤེས་ངེས་པར་གནང་དགོས་ལ་དེ་ལྟར་གནང་ངེས་སྙམ་ཡིད་ཆེས་བརྟན་པོ་ཡོད།
ད་ལམ་ཟས་བཅད་ལ་བར་ཆད་བྱུང་བར་བློ་ཕམ་དང་། ཟས་བཅད་དུ་བཞུགས་མཁན་དཔའ་བོ་གསུམ་ལ་རྗེས་སུ་ཡི་རང་དང་བསྔགས་བརྗོད་ཡོད། ཁྱེད་རྣམ་པས་གཙོས་ང་ཚོ་ཚང་མས་སེམས་ཤུགས་ཆག་མི་ཉན། མིའི་ལུང་པར་རང་གི་བསམ་པ་བཞིན་བྱེད་རྒྱུ་པག་པོ་རེད། དེར་བརྟེན་ལས་དོན་གང་ཞིག་ཡིན་རུང་ང་ཚོ་མི་ཡུལ་དུ་གྱུར་ཡོད་པ་དེ་མ་བརྗེད་པར་ངེས་པར་མཁྱེན་པ་དགོས།
ཟས་བཅད་གནང་མཁན་གསུམ་གྱི་ཆོད་སེམས་དང་སྙིང་སྟོབས་ལ་རྗེས་སུ་ཡི་རང་ཞུ།
མི་ཉག་བཙན་པོ་ལགས། ཁྱེད་ཀྱིས་དེ་ལྟར་བཤད་རྒྱུ་ཡོད་དམ། འཇམ་དབྱངས་ནོར་བུ་ནི་བོད་བཙོང་མཁན་མ་རེད་ལ། གནའ་ནས་ད་བར་བོད་དོན་ཁོ་ན་བསམ་ནས་ཡོང་པ་དེ་འདྲ་རེད། ལྟ་བ་མི་འདྲ་པ་ཡོད་སྲིད་མོད། ཁོང་ལ་འདི་ལྟར་གནང་པ་ནི་དྲང་བདེན་མ་རེད། མ་གཞི་ནས་གཞོན་ནུ་ལ་རྒྱབ་སྐྱོར་བྱེད་པ་དང་འཇམ་ནོར་ལ་རྒྱབ་སྐྱོར་མ་བྱེད་པ་ནི་ཁོང་ལ་འཁོན་འགྲེས་འདྲ་ཡོད་ན་མ་གཏོགས་དེ་འདྲ་བཤད་རྒྱུ་མ་རེད།
གཞོན་ནུའི་ཟས་བཅས་ངོ་རྒོལ་གནང་མཁན་གསུམ་ལ་རྗེས་སུ་ཡི་རང་དང་བསྔགས་བརྗོད་ཡོད། ཡིན་ན་ཡང་། ༡ ༽ ད་ནས་བཟུང་འཇམ་དབྱངས་ནོར་བུ་དང་ལྷ་བཟང་ཚེ་རིང་སྨྱོན་པ་སོགས་ཁ་སྟོང་ནང་གི་ཚིག་སྟོང་བཤད་མཁན་ཚོས་རྗེས་སུ་མི་འབྲང་རྒྱུའི་རེ་བ་ཞུ། ༢༽ དེ་ནས་གཞོན་ནུ་ལྷན་ཚོགས་མིན་ན་ཡང་གཞོན་ནུས་ཚོགས་མི་ཁ་ཤས་ཀྱིས་༧སྐྱབས་མགོན་རིན་པོ་ཆེའི་བློ་ཕམ་བཅུག་པ་ལ་གཞོན་ནུས་ངོས་ནས་དགོངས་སེལ་ཞུ་རྒྱུའི་རེ་བ་ཞུ། ༣༽ དེ་ནས་ཁ་རྒྱག་པ་བཤད་མཁན་གྱི་འཇམ་དབྱངས་ནོར་བུ་དང་ལྷ་བཟང་ཚེ་རིང་སོགས་མདུན་ལ་ཐོན་ནས་ལས་འགུལ་སྤེལ་རྒྱུའི་རེ་བ་བཅས་ཞུ།
ཟས་བཅད་ངོ་རྒོལ་གནང་ན་ཤི་ཐུབ་ན་ཡག་གི་རེད། དེ་མིན་འཁྲབ་སྟོན་རེད། འཁྲབ་སྟོན་ལ་ནི་སུན་ལ། ཞལ་འདེབས་བསྡུ་བ་ལ་ནི་དེ་བས་ཀྱང་སུན་ནོ་ཞེས་ཞུ་རྒྱུ་ཡིན།། ད་དངོས་གནས་ཤི་ན་ཤི་རན་པའི་དུས་ཚོད་ཏག་ཏག་འཁེལ་འདུག
གཞོན་ནུ་ནས་ཟས་བཅད་ལས་འགུལ་ཡི་རང་དང་རྒྱབ་སྐྱོར་ཡོད་ཀྱང་། ད་ནས་བཟུང་འཇམ་དབྱངས་ནོར་བུའི་རྗེས་འབྲང་དང་ཁོ་དང་མཉམ་དུ་དོན་མེད་ཀྱི་ལས་འགུལ་མ་སྤེལ་རོགས་ཞུ་རྒྱུ་ཡིན།