གཞོན་ནུའི་ཚོགས་མི་གསུམ་བདག་པོ་རྒྱག་རོགས།

ཨ་འདུས་མིག་ཆུ།

བོད་ཀྱི་རྒྱལ་གཅེས་དཔའ་བོ་ཡིན་ན་བོད་ནང་ལ་ཡོད་དགོས་པར་ལྟ་བ་དང་། མི་རིགས་ཀྱི་སླད་དུ་རང་ཉིད་ཡར་བར་འདོེར་ཐུབ་པའི་རྒྱལ་གཅེས་ལྷག་བསམ་པ་ཞིག་ནའང་བོད་ནང་མ་གཏོགས་མེད་པར་འདོད་པའི་ལྟ་ཚུལ་དེ་ནི། དོན་དངོས་སྟེང་ནས་ནོར་བ་དང་འཁྲུལ་བ་འབའ་ཞིག་གོ།

མི་རིགས་ཀྱི་སླད་དུ། སྐད་ཡིག་གི་དོན་དུ། རིག་གཞུང་གི་ཕྱིར་དུ་རང་ལུས་མེ་ལ་སྲེག་མཁན་དང་། རྒྱའི་བཙོན་ཁང་ལ་འགྲོ་མཁན་ཚོ་ཚང་མ་རྒྱལ་གཅེས་པ་དང་། ཕུགས་བསམ་པ་རྐྱང་རྐྱང་ཆགས་པ་ནི། གཙོ་བོ་རང་དོན་ཡལ་བར་དོར་ཞིང་། སྤྱི་དོན་ཁུར་དུ་འཁྱེར་བའི་རྒྱུ་མཚན་གྱིས་རེད་ལ། ཡང་ན་རང་བདེ་རྒྱབ་ལ་བསྐྱུར་ཞིང་། བོད་མི་སྤྱི་ཡོངས་ཀྱི་བདེ་བ་དོན་དུ་གཉེར་བས་ཡིན་པར་འདོད། རྡོག་རྩ་གཅིག་སྒྲིལ་ཞེས་པ་ནི། ལྟ་གྲུབ་གཅིག་མ་གཅིག་ལ་གཙོ་བོ་མི་ལྟ་ཞིང་། ཚོགས་པ་གཅིག་མི་གཅིག་ཀྱང་གཏན་ནས་མི་ལྟ། བདེན་དོན་འཐབ་རྩོད་བྱེད་པའི་སྐབས་སུ་ཚོགས་པ་ག་ཚོད་མང་ན་ཡང་རྡོག་རྩ་གཅིག་སྒྲིལ་བྱེད་མི་ཐུབ་པ་ཞིག་གཏན་ནས་ཡིན་མི་སྲིད། ལྟ་གྲུབ་མི་མཐུན་པ་ལ་བརྟེན་ནས་ཚོགས་པ་སོ་སོར་གྱེས་དགོས་པ་ཞིག་ཡིན་ཚེ། ཆོས་ལུགས་མཐུན་སྒྲིལ་ཞེས་པ་དེ་ནི་ནམ་མཁའི་པདྨོ་མ་ཡིན་ནམ། ནམ་ཡང་ལྟ་གྲུབ་མི་མཐུན་པ་རྒྱུ་མཚན་དུ་བྱས་ནས། གཞན་གྱི་མགོ་གནོན་དང་ཡ་མེད་ཀྱི་ལས་བྱས་ཚེ། དེ་ལྟའི་བསྟན་པ་དར་བའི་སྤྱི་ཚོགས་དེ་ལ་ནམ་ཡང་བདེ་སྐྱིད་ཅིག་ཡོད་མི་སྲིད། རྒྱུ་མཚན་ནི། མཐུན་སྒྲིལ་གཏན་ནས་མེད་པས་སོ།།

མཐུན་སྒྲིལ་ཡོད་མེད་ནི་ལྟ་གྲུབ་མང་པོ་ཡོད་མེད་ལ་མི་ལྟ་བར་ལྟ་གྲུབ་གང་འདྲ་ཞིག་ཁྱེར་བའི་ཚོགས་པ་དེར་བརྩི་བཀུར་དང་། གདེང་འཇོག་རེ་བྱེད་ཐུབ་པའི་སྤྱི་ཚོགས་དེར་མཐུན་སྒྲིལ་ཡོད་ལ། ལྟ་གྲུབ་མི་མཐུན་པ་རྩ་མེད་བཟོ་དགོས་པར་འདོད་པའི་བྱ་ལས་སྤྱོད་གསུམ་དང་ལྡན་ལ། རང་གི་ལྟ་གྲུབ་དེ་ལས་གཞན་མི་དགོས་པར་འདོད་པའི་རང་མཆོག་གཞན་དམན་ལྟ་བའི་སྤྱི་ཚོགས་ལ་གཏན་ནས་མཐུན་སྒྲིལ་ཡོད་མི་སྲིད། དེ་ལྟ་ན་སྤྱི་ཚོགས་ཆུང་ལ་ཚོགས་པ་མང་པའི་བཙན་བྱོལ་སྤྱི་ཚོགས་འདིར་གཞོན་ནུ་ཚོགས་པ་གཙོས་བས་ལྟ་གྲུབ་ལ་ངེས་གཏན་མེད་པའི་ཚོགས་པ་ཧ་ཅང་མང་ན་ཡང་། དོན་དངོས་སྟེང་ནས་ལྟ་གྲུབ་མངོན་གསལ་དོད་ཤོས་ནི། བོད་མིའི་སྒྲིག་འཛུགས་དང་། གཞོན་ནུ་ལྷན་ཚོགས་གཉིས་ལྟ་གྲུབ་གསལ་ལ། ཕུགས་ཀྱི་དགོངས་པ་དང་། ལོ་རྒྱུས་ཀྱི་བདེན་དོན་ལ་གཞི་བཅོལ་བའི་ལྟ་གྲུབ་དང་ལྡན་པ་གཙོ་བོ་གཉིས་རེད། འདི་གཉིས་ལས་གཅིག་མེད་སོང་ན། བོད་བཙན་བྱོལ་སྤྱི་ཚོགས་ཀྱི་ཐོད་པ་ནས་མིག་གཅིག་མེད་པར་ཆགས་པ་དང་ཀུན་ནས་མཚུངས།

ཚོགས་པ་གཞན་ཚོར་ལྟ་གྲུབ་དང་ལངས་ཕྱོགས་འདི་ཡིན་གྱི་ངེས་གཏན་མེད་དུས། ལོ་རྒྱུས་ཀྱི་ལྟ་གྲུབ་ལ་གཞི་རྟེན་བཅོལ་བའི་གཞོན་ནུ་ལྷན་ཚོགས་དང་། ཛ་དྲག་གི་དོན་རྐྱེན་མྱུར་དུ་སེལ་བར་ཐབས་བྱུས་བླ་ན་མཐོ་བའི་བོད་མིའི་སྒྲིག་འཛུགས་གཉིས་ལ་རྒྱབ་སྐྱོར་དང་དཔུང་པ་མཉམ་འདེགས་བྱེད་དགོས་པ་ཉིད་དོ།། གཞོན་ལྷན་གྱི་ལངས་ཕྱོགས་བོད་མིའི་སྒྲིག་འཛུགས་དང་མི་མཐུན་པ་རྒྱུ་མཚན་དུ་བྱས་ནས། ཁོང་ཅག་གིས་གང་བྱས་ཀྱི་བྱ་བྱེད་ལས་གསུམ་ཐམས་ཅད་ཆོ་མེད་དང་། དགོས་མེད། དོན་མེད་འབའ་ཞིག་ལ་བལྟས་ནས། ལེགས་ཕྱོགས་ཀྱི་ལས་དོན་ཡང་མི་དགོས་ཐན་ལྟས་ཉིད་དུ་བལྟས་ན། ཡག་རྟགས་ཤིག་དང་མཁས་རྟགས་ཤིག་ཡིན་པར་མི་འདོད་པ་མ་ཟད་། བླུན་རྟགས་འབའ་ཞིག་རེད་ཅེས་མགྲིན་པ་གཟེངས་སུ་བསྟོད་ནས་སྨྲ་བར་སྤོབས།

གཞོན་ནུ་ལྷན་ཚོགས་ཀྱི་ཚོགས་མི་འགའ་ཞིག་གིས་མི་རིགས་ཀྱི་བདེན་དོན་དང་། རྒྱལ་ཁབ་ཀྱི་རྩ་དོན་ཆེད་དུ་ཟས་བཅད་ངོ་རྒོལ་བྱས་ཏེ། ང་ཚོའི་ཁ་ཐོག་དང་མིག་ཐོག་ནས་མཆི་ལ་ཉེ་བཞིན་པའི་སྐབས་འདིར། བཙན་བྱོལ་ལ་མང་བའི་ཚོགས་པ་གཞན་དག་གིས་ཁོང་ཅག་གི་སླད་དུ་མར་མེ་ཁྲོམ་སྐོར་ཙམ་ཡང་མ་བྱས་པ་ནི། ངོ་མ་ཡིད་སྐྱོ་ལ་སེམས་རྨུགས་པའི་གནས་འབའ་ཞིག་རེད་ཨང་། འུ་ཅག་བཙན་བྱོལ་ཚོགས་པ་དག་གིས་བཙན་བྱོལ་ནས་ལས་འགུལ་སྤེལ་བ་དག་ལ་གདུང་སེམས་མཉམ་སྐྱེད་མི་བྱེད་པར་བོད་ནང་གཅིག་པོ་ནས་གནས་ཚུལ་ཞིག་བྱུང་བར་བསྒུགས་པ་ནི། ཅི་འདྲའི་ཐབས་རྡུགས་ཤིག་མ་རེད་དམ། བོད་ཕྱི་ནང་གཉིས་ཀ་ནས་མི་རིགས་ཀྱི་སླད་དུ་ཚེ་སྲོག་གིས་བདེན་དོན་རྩོད་ལེན་བྱེད་མཁན་མང་པོ་ཡོད་པས་འདྲ་མཉམ་གྱི་ལྟ་ཚུལ་བཟུང་ནས་ཕན་ཚུན་ལ་རྒྱབ་སྐྱོར་དང་། རོགས་འདེགས་བྱེད་ཐུབ་ན། དེ་ནི་ཁ་འཐོར་དགུ་འཐོར་དུ་གནས་བའི་མི་རིགས་འདིའི་མཐུན་སྒྲིལ་གྱི་ནུས་པ་ཐོན་པའི་གནད་གཙོ་བོ་རེད་སྙམ།

རྒྱལ་གཅེས་དཔའ་བོ་རུ་འབོད་འོས་ལ། མི་རིགས་བདེ་སྡུག་ལ་བློ་སེམས་མཐའ་དག་བཅོལ་བའི་ཟས་བཅད་ངོ་རྒོལ་བ་རྣམས་ང་ཚོའི་ཁ་ཐོག་མིག་ཐོག་ནས་ཤི་སོང་ན། སྐབས་དེར་ངོ་རྒོལ་འདྲ་བྱས། མིག་ཆུ་རེ་འདོན་ཁུལ་བྱས་ཀྱང་དགེ་མཚན་ག་རེ་འདུག་ཨང་། ད་ལྟའི་དཔའ་བོ་ཟས་བཅད་ངོ་རྒོལ་བ་གསུམ་གྱི་དགོས་འདུན་དེ་ཉིད་མངོན་གྱུར་ཡོང་ཐབས་སུ་ངེས་པར་མང་ཚོགས་རང་བཞིན་གྱི་ངོ་རྒོལ་ལས་འགུལ་ཞིག་སྤེལ་དགོས་ཀྱི་འདུག གཙོ་བོ་མཉམ་སྦྲེལ་རྒྱལ་ཚོགས་ལ་ཁ་གཏད་པའི་ལས་འགུལ་ཞིག་སྤེལ་ནས། ཟས་བཅད་ངོ་རྒོལ་བ་གསུམ་གྱི་ཚེ་སྲོག་སྐྱོབ་ཐབས་བྱ་དགོས་ཀྱི་འདུག

ཁོང་ཅག་གི་ངོ་རྒོལ་སར་ཆུ་རེ་འཁྱེར་ཁ་བཏགས་རེ་བཟུང་ནས་མིག་ཆུ་འདོན་ཁུལ་བྱེད་པ་ནི། མགོ་བདེ་དྲན་འཕྲུལ་ལ་གོམས་པའི་བྱེད་ཐབས་ཤིག་ཡིན་པ་ལས། རྒྱལ་གཅེས་པ་འདི་དག་གི་བདེ་སྡུག་ལྷག་བསམ་ངོ་ཤེས་པའི་རྒྱབ་སྐྱོར་ཞིག་རེད་གཏན་ནས་མི་འདོད། དོན་དངོས་གཞོན་ནུའི་ལངས་ཕྱོགས་གང་ཡིན་གཙོ་བོ་མ་ཡིན་པར། འདི་དག་གི་རྒྱལ་གཅེས་ལྷག་བསམ་དང་། རང་དོར་སྤྱི་ཕན་གྱི་ལས་བཟང་ལ་མཐོང་ཆེན་དང་རིན་ཐང་ཞིག་སྤྲོད་དགོས་པར་སེམས་ལ། ལྷག་པར་བལྟས་བལྟས་རིག་རིག་ལ་རྒྱལ་གཅེས་པ་འདི་དག་མཆི་ལམ་དུ་འགྲོ་མ་བཅུག་ན་མི་འགྲིག་གམ། རྒྱ་གར་ཉེན་རྟོགས་པས་འདི་དག་གི་ཚེ་སྲོག་མ་བསྐྱབས་པའི་སྔོན་ལ་ང་རང་ཚོ་རང་ཉིད་ཀྱི་ངོས་ནས་གཞོན་ནུའི་ལས་འགུལ་བ་དག་ལ་གདུང་སེམས་མཉམ་བསྐྱེད་ཡོད་པ་ཞིག་དང་། མཉམ་སྦྲེལ་རྒྱལ་ཚོགས་འགུལ་སྐྱོད་ཅིག་ཡོད་པ་ཞིག་བྱས་ནས། བླ་ན་མེད་པའི་ཚེ་སྲོག་གི་རྒྱུན་བཟང་འདི་ཉིད་སྐྱོབ་ཐབས་བྱ་དགོས།

ལྟ་གྲུབ་མང་པོ་ཡོད་པའི་སྤྱི་ཚོགས་དེ་ཉིད་ངན་པ་ཞིག་ཡིན་པའི་ངེས་པ་མེད་ཀྱང་། ལྟ་གྲུབ་ཕན་ཚུན་ལ་བརྩི་བཀུར་དང་། རོགས་འདེགས་མེད་ན་དེ་ནི་ངོ་མ་སྤྱི་ཚོགས་དེ་ཉིད་རྒུད་མཐར་འགྲོ་བའི་སྤྱི་ཚོགས་ཤིག་ཡིན་ངེས་ལ། ཡང་ན་ག་ཚོད་ཁ་སྙན་སྙན་དང་ངོ་འཛུམ་འཛུམ་འདྲ་བྱས་ཀྱང་རྡོག་རྩ་གཅིག་སྒྲིལ་མེད་པའི་སྤྱི་ཚོགས་ཡ་མ་བརླ་ཞིག་ཡིན་པ་ཐག་གིས་བཅད་ནས་བཤད་ཆོག དེ་ལྟ་ན་ང་ཚོའི་ཁ་ཐོག་མིག་ཐོག་ནས་མི་རིགས་དང་རྒྱལ་ཁབ་ཀྱི་རྩ་དོན་སླད་དུ་ཉིན་གཅིག་ཙམ་མ་ཡིན་པར་དུས་ཡུན་རིང་པོའི་ནང་ཟས་བཅད་ཆུ་བཅད་ཀྱི་བགྱི་བ་དང་ལེན་བྱེད་བཞིན་པའི་གཞོན་ནུའི་ཚོགས་མི་དག་གི་དཀའ་སྡུག་ལ་གོ་ཤེས་བསམ་ཤེས་བྱ་དགོས་ཀྱི་འདུག་ལ། མ་ཟད་ཤིང་སྡོང་ཞིག་གམ་རྡོ་ལོག་ཅིག་རྒྱ་གར་རྒྱལ་ས་ལྡི་ལིར་རིལ་བསྡད་པ་མ་ཡིན་པར་ང་ཚོའི་ཤ་རུས་གདུང་རྒྱུད་གཅིག་པའི་མི་བུ་གསུམ་གྱིས་རླབས་ཆེན་ཚེ་སྲོག་བློས་གཏོང་བྱེད་བཞིན་པ་ཤེས་ན་བཟང་།

མདོར་བསྡུས་ན་ཁོང་ཅག་གི་ཚེ་སྲོག་སྐྱོབ་པ་ལ་ཁོང་ཚོས་གནས་སྐབས་རང་བཏོན་པའི་རྩ་དོན་གྱི་དོན་རྩ་དེ་དག་མངོན་གྱུར་ཡོང་བར་ཚོགས་པ་སྐྱིད་སྡིག་ཁག་གཙོས་པའི་བོད་མིའི་སྒྲིག་འཛུགས་དང་བཅས་པ་མཉམ་སྦྲེལ་རྡོག་རྩ་གཅིག་སྒྲིལ་གྱིས་རྒྱལ་ཚོགས་སོགས་ལ། སྐད་འབོད་ཁྲོམ་སྐོར་དང་། སྙན་ཞུ་གཏམ་གླེང་སོགས་གང་བྱ་དགོས་སར་ཚང་མར་བྱས་ནས། གཞོན་ནུའི་རྒྱུན་ལས་གསུམ་ཤི་སོང་ནའང་འགྱོད་པ་མེད་ཅིག་ངེས་པར་བཟོ་དགོས་ཀྱི་འདུག་སྙམ་པ་དེའོ།།