དེ་རིང་དགོང་དྲོ་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་ཆེན་སྐབས་གསུམ་པ་མཇུག་སྒྲིལ་ཏེ། སྐབས་བཞི་པའི་རྒྱུན་ལས་ ༡༡ གསར་འདེམས་བྱུང་སོང་།
དེ་རིང་ཕྱི་ཚེས་ ༢༣ ཉིན། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཚོམས་ཆེན་ནང་། པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་མི་ ༣༠ ལྷག་འདུ་འཛོམས་ཐོག ཕྱི་དྲོ་ཆུ་ཚོད་ ༢ དང་ཕྱེད་ཀ་ནས་དགོང་མོ་ཆུ་ཚོད་ ༧ དང་ཕྱེད་ཀའི་བར་ཚོགས་པའི་སྒྲིག་གཞི་དང་། ཚོགས་ཆེན་སྐབས་གསུམ་པའི་ཐོག་བཞག་པའི་གྲོས་ཆོད་ཁག དེ་བཞིན། ལས་གཞི་གསར་བ་དང་མ་འོངས་ལས་འཆར་སོགས་ཀྱི་ཐོག་བགྲོ་གླེང་སྦྱང་བཤད་གནང་སྟེ། སྒྲིག་གཞིར་བསྐྱར་བཅོས་དང་གྲོས་ཆོད་གསར་འཇོག་བཅས་གནང་མཐར། སྐབས་རྗེས་མའི་རྒྱུན་ལས་ ༡༡ གསར་དུ་འདེམས་ཐོན་གྱིས། ཁོང་རྣམ་པར་རྟེན་འབྲེལ་གྱི་ཁ་བཏགས་སྒྲོན་ཏེ་ཚོགས་འདུ་ཡོངས་སུ་མཇུག་སྒྲིལ་ཡོད།
འདེམས་ཐོན་བྱུང་བའི་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་སྐབས་བཞི་བའི་རྒྱུན་ལས་རྣམས་ནི། ཆབ་བྲག་ལྷ་མོ་སྐྱབས། སྤྲོ་ཚིགས་ཆོས་གྲགས། རྫ་ཚེ་རིང་བཀྲ་ཤིས། གཅན་ཡུ་མོ། གཡུ་སྒང་འོད་ཟེར། ཨ་རིག་དགེ་མཐོང་། རྡོ་རྗེ་ཚེ་རིང་། ཁ་སྒང་བསམ་གཏན། མེ་འོད། སྨན་གཤེར་བློ་གྲོས། གཟུངས་འདུས་སྐྱིད་བཅས་རེད།
ཐེངས་འདིའི་ཚོགས་ཆེན་ཐོག་མཐུན་ཚོགས་ཀྱི་སྒྲིག་གཞིའི་ཁྱབ་ཚད་ནི་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་མི་ཡོངས་ལ་ཁྱབ་པ་གཏན་འབེབས་དང་། རྒྱུན་ལས་འདེམས་བསྐོ་དང་ལས་བགོ་བྱ་ཕྱོགས་ཐད། སྔོན་འགྲོ་དང་དངོས་གཞི་རིམ་པ་གཉིས་བརྒྱུད་ནས་རྒྱུན་ལས་འདེམས་དགོས་པ་དང་། ཚོགས་གཙོ་ནི་རྒྱུན་ལས་ནང་ཁུལ་ནས་འདེམས་རྒྱུ། རྒྱུན་ལས་ཚོས་རང་གི་ལས་གནས་ཁག་བགོས་ཀྱིས་དབང་ཚད་གཏན་འཁེལ་བྱ་རྒྱུ། དེ་བཞིན། མ་འོངས་པར་སྒྲིག་གཞི་བསྐྱར་བཅོས་བྱ་ཕྱོགས་ཐད་ནས། སྒྲིག་གཞི་དོན་ཚན་གང་རུང་ལ་བསྐྱར་བཅོས་དགོས་ཚེ་ཚོགས་བཅར་བ་སུམ་ཆའི་གཉིས་ཀྱི་རྒྱབ་སྐྱོར་དགོས་པ་བཅས་གསར་སྣོན་གཏན་འབེབས་བྱུང་སོང་།
དེ་བཞིན། ཚོགས་པའི་མ་འོངས་པའི་ལས་འཆར་གྱི་ཐད་ནས། ལོ་གསུམ་རེའི་མཚམས་སུ་བཙན་བྱོལ་སྤྱི་ཚོགས་ཁྲོད་ཀྱི་རྩོམ་པ་པོ་དང་བརྩམས་ཆོས་རྩེ་གྲས་བདམས་ཏེ་བྱ་དགའ་སྤྲོད་རྒྱུ། བོད་ནང་རྒྱའི་བཙོན་འོག་ཏུ་མནར་གཅོད་མྱོང་བཞིན་པའི་བོད་རིགས་རྩོམ་པ་པོ་རྣམས་ཀྱི་གནས་ཚུལ་སྐོར་ནས་སྙན་ཐོའི་དེབ་ཅིག་གསར་འདོན་བྱ་རྒྱུ། མ་འོངས་པར་རྩོམ་པ་པོ་མཐུན་ཚོགས་ཀྱི་དྲ་རྒྱ་དང་ཚགས་པར་སྟེང་འགོད་ཀྱིན་རྩོམ་ཡིག་དག་ལ་རྩོམ་ཡོན་སྤྲོད་ཐུབ་རྒྱུའི་ཐད་འབད་བརྩོན་ཐབས་འཚོལ་གནང་རྒྱུ་སོགས་ལས་འཆར་ཁག་ཅིག་ཀྱང་མང་མོས་གཏན་འབེབས་བྱས་ཡོད་པ་རེད།
གསར་འགོད་པ། ཚེ་རིང་རྒྱལ།
![Ren Quanniu said the Henan Provincial Justice Department revoked his licence over comments he made in court in a 2018 case [File: Leo Ramirez/ AFP]](https://tibettimes.net/wp-content/uploads/2025/07/Untitled-2-360x180.jpg)
དགའ་བསུ་ཞུ།
སྤྲོ་ཚིག་ཆོས་གྲགས་ལགས་ཕོ་གསར་རྫིག་པོ་ཞིག་ཆགས་འདུག དམིགས་བསལ་བཀྲིས་བདེ་ལེགས་ཞུ།
རྒན་ཆབ་བྲག་ཕོ་ཉ་གཙོ་བྱས་པའི་རྩོམ་པ་པོའི་རྒྱུན་ལས་རྣམ་པར་འཚམས་ཞུ་བཀྲ་ཤིས་བདེ་ལེགས་དང་བོད་གངས་ཅན་གྱི་རིག་གཞུང་སྔ་ན་མེད་བྱས་རྗེས་རླབས་ཆེན་འཇོག་ཐུབ་པར་ཤོག
རྒྱུན་ལས་གསར་པ་ཚོར་འཚམས་འདྲི་ཞུ། གསར་རྙིང་རྩིས་སྤྲོད་དང་འབྲེལ་བའི་ལས་དོན་གནང་སྐབས། ཚོགས་པའི་དམིགས་ཡུལ་གཞི་རྒྱ་ཆེ་རུ་གཏོང་དགོས་པ་དང། གནང་ཐུབ་པ། གནང་དགོས་པ། རྩ་དོན་ལ་ཕན་ངེས་ཅན་གྱི་ལས་འཆར་སྤུས་དག་ཐད་ད་དུང་ཉིན་ཁ་ཤས་འགྱངས་དགོས་ཀྱང་རྒྱུན་ལས་ལྷན་འཛོམས་ཐོག་གནང་ཐུབ་ན་མ་འོངས་པར་ཕན་རླབས་ཆེ་བར་མཐོང་ལ། ལས་དོན་ཐོག་དུས་ཚོད་གཏོང་ཐུབ་པ་དང་འཇོན་པ། འཆར་སྣང་དང་རེ་བ། གསར་གཏོད་ཀྱི་སྤྱང་གྲུང་ལྡན་པ་བཅས་རྒྱུན་ལས་ལས་བགོས་སྐབས་སུ་རྩ་འཛིན་བྱ་དགོས་པར་བསམས་ཀྱི་ཡོད། ལས་དོན་ལམ་ལྷོང་ཡོང་བའི་སྨོན་འདུན་བཅས།།
ཚོགས་གཙོ་རྒན་ལྷ་མོ་མཆོག་འདེམས་ན་ལེགས། རྒན་ལྷ་མོ་ནི་བོད་ཕྱི་ནང་གཉིས་ལ་རྒྱུས་མངའ་ཡོད་པའི་རྩོམ་པ་པོ་ཤེས་ཡོན་ཅན་ཞིག་ཡིན། རྩོམ་པ་པོ་མཐུན་ཚོགས་འདིའི་གཞི་རྐང་ཡག་པོ་ཞིག་ཚུགས་ཚེ་ད་གཟོད་ཚོགས་གཙོ་གཞན་ལའང་གོ་སྤྲད་ཆོག་ཀྱང་། ད་དུང་ལོ་ཁ་ཤས་ལ་རྒན་ལྷ་མོས་འཛིན་སྐྱོང་ཡོང་རྒྱུར་རེ་སྐུལ་ཞུ།
པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་རྒྱུན་ལས་སྙིང་པ་དེ་ཚོར་ལོ་དུ་མའི་རིང་གླ་ཕོགས་མེད་པར་ལྷག་བསམ་གྱིས་ཕྱག་ལས་གནང་པར་ཐུགས་རྗེ་བླ་ལྷག་ཏུ་ཆེ་ཞུ་རྒྱུ་དང་། རྒྱུན་ལས་གསར་པ་ཚོར་བཀྲིས་བདེ་ལེགས་ཞུ་བ་དང་ཆབ་ཅིག་ཕྱོགས་ཡོངས་ནས་ཚོགས་པ་ཡར་རྒྱས་སུ་གཏོང་པའི་རེ་བ་དང་འབོད་སྐུལ་ཞུ།
རྒྱུན་ལས་རྣམ་པར་འཚམས་འདྲི་བཀྲ་ཤིས་བདེ་ལེགས་ཞུ།
ལས་གཞི་གསར་བ་༼གསར་པ་༽དང་མ་འོངས་ལས་འཆར་སོགས་ཀྱི་ཐོག་བགྲོ་གླེང་སྦྱང་བཤད་གནང་སྟེ། སྒྲིག་གཞིར་བསྐྱར་བཅོས་དང་གྲོས་ཆོད་གསར་འཇོག་བཅས་གནང་མཐར། སྐབས་རྗེས་མའི་རྒྱུན་ལས་ ༡༡ གསར་དུ་འདེམས་ཐོན་གྱིས། ཁོང་རྣམ་པར་རྟེན་འབྲེལ་གྱི་ཁ་བཏགས་སྒྲོན་ཏེ་ཚོགས་འདུ་ཡོངས་སུ་མཇུག་སྒྲིལ་ཡོད།
འདེམས་ཐོན་བྱུང་བའི་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་སྐབས་བཞི་བའི་༼བཞི་པའི་༽རྒྱུན་ལས་་་་་་་
ཆབ་བྲག་ལྷ་མོ་སྐྱབས་ལགས་ལ་མང་གཙོའི་གོ་རྟོགས་མེད་པ་རེད་དམ། ཡང་ན། རྒྱ་མིའ་སློབ་གསོ་མྱངས་ནས་ཕེབས་སྟབས་མའོ་ཙེ་ཏུང་གི་ཤན་ཤུགས་ཐེབས་དྲག་པ་རེད། གང་ལྟར་དཔོན་ས་དེ་གཏོང་ས་མ་རེད། ཨ་ལ་ཁ་མཚར་ཡིན། བཀྲ་ཤིས་བདེ་ལེགས་ཡོད།
དེ་ཐེངས་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་མི་མང་ཆེ་བ་གཞོན་རབས་པ་རྐྱང་རྐྱང་འདེམས་ཐོན་བྱུང་འདུག་པས་དགའ་བོ་བྱུང་།ཡིན་ན་ཡང་མ་འོངས་པར་ཚོགས་པ་འདི་སྔར་ལས་ལྷག་པའི་ཡར་རྒྱས་གཏོང་རྒྱུ་དང་།ག་གོར་རྙོག་གླེང་མེད་པར་ཚོགས་པའི་ལས་དོན་མཇུག་སྐྱོང་མཐར་ཕྱིན་པ་ཞིག་བྱེད་རྒྱུ་ནི་གུས་པའི་རེ་བ་ཉག་གཅིག་ཡིན།མཐར་ཐེངས་འདིའི་ཚོགས་མི་གསར་བ་ཡོངས་ལ་མཚམས་འདྲི་བཀྲིས་བདེ་ལེགས་ཞུ།