ཁམས་སྐྱེ་རྒུ་མདོ་ཉ་འཚོ་ཟིལ་དཀར་དགོན་པའི་གྲྭ་བསྟན་འཛིན་ཤེས་རབ་ལགས་ལ། ལོ་གཅིག་གི་ཁྲིམས་ཐག་བཅད་འདུག
འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཁམས་སྐྱེ་རྒུ་མདོ་ཁྲི་འདུ་རྫོང་རྫ་སྟོད་ཤང་དར་དམར་སྡེ་བ་ནས་ཡིན་པའི་ཉ་འཚོ་ཟིལ་དཀར་དགོན་པའི་གྲྭ་བསྟན་འཛིན་ཤེས་རབ་ལགས་ལ། ལོ་ ༡ གི་དུས་བཀག་ཁྲིམས་ཐག་བཅད་དེ་ཟི་ལིང་གི་ཁྲིམས་ཁང་དུ་བཙོན་འཇུག་བཀག་སྐྱིལ་བྱས་ཡོད་པ་དང་། ཟླ་གསུམ་གྱི་སྔོན་ལ་ནང་མི་དང་ཐུག་འཕྲད་བྱེད་མི་ཆོག་པའི་སྐོར་རྒྱ་གཞུང་ཉེན་རྟོག་པས་ཁ་པར་བརྒྱུད་ཁོང་གི་ནང་མིར་བཤད་ཡོད་འདུག
ད་ལྟའི་ཆར་གྲྭ་བསྟན་འཛིན་ཤེས་རབ་ལགས་བཙོན་འཇུག་བྱེད་དགོས་དོན་གསལ་བོ་ཤེས་རྟོགས་བྱུང་མི་འདུག ཡིན་ནའང་། འདི་ལོའི་ཕྱི་ཟླ་ ༢ ཚེས་ ༨ ཉིན་ཉ་འཚོ་ཟིལ་དཀར་དགོན་གྱི་གྲྭ་མང་དང་མི་མང་གིས་རྒྱ་གཞུང་ལ་ཞི་བའི་སྐད་འབོད་བརྒྱབ་ཡོད་པ་ལྟར། སྐབས་དེར་ཁོང་མཉམ་ཞུགས་བྱས་པར་རྒྱ་གཞུང་གིས་ངོས་འཛིན་གྱིས་འཇུ་བཟུང་བྱས་པ་ཞིག་ཡིན་པར་ཚོད་དཔག་བྱེད་ཀྱི་ཡོད་འདུག
འདི་ལོའི་ཕྱི་ཟླ་ ༡༠ ཚེས་ ༡ ཉིན་གྲྭ་བསྟན་འཛིན་ཤེས་རབ་ལགས། རྫ་སྟོད་ཡུལ་ཚོ་ནས་རྒྱ་མི་ཉེན་རྟོག་པས་འཇུ་བཟུང་བཙན་འཁྲིད་བྱས་རྗེས། ཁོང་གི་ནང་མི་སྤུན་མཆེད་རྣམས་ཀྱིས་ཉེས་རྟོག་ལས་ཁུངས་ལ་འབྲེལ་བ་བྱས་ཏེ། ཁོང་ས་གནས་གང་དུ་བཀག་ཉར་བྱས་ཡོད་མེད་དང་། ཁོང་གི་གནས་སྟངས་ག་འདྲ་ཆགས་ཡོད་མེད་འདྲི་རྩད་བྱས་ཡོད། རྒྱ་གཞུང་ཉེན་རྟོག་པས་ཁོང་གང་དུ་ཡོད་པ་དང་། འཇུ་བཟུང་བྱེད་དགོན་པའི་རྒྱུ་མཚན་སོགས་གང་ཡང་འགྲེལ་བརྗོད་མེད་པར་གར་སོང་ཆ་མེད་དུ་གྱུར་ཡོད་འདུག
ཉ་འཚོ་ཟིལ་དཀར་དགོན་གྱི་གྲྭ་བསྟན་འཛིན་ཤེས་རབ་ལགས་ནི་ལོ་ ༢༨ ཡིན་པ་དང་། ཕའི་མིང་ལ་འཇམ་ཆོས་དང་། མའི་མིང་ལ་པདྨ་བདེ་སྐྱིད་ཟེར་ལ། སྤུན་མཆེད་བདུན་ཡོད་པའི་གྲས་ནས་ཁོང་ལྔ་པ་དེ་ཡིན་འདུག
གསར་འགོད་པ། ཚེ་རིང་རྒྱལ།
