ཟླ་འདིའི་ཕྱི་ཚེས་ ༢༤ ཉིན་ཉིན་གྱི་དགོང་དྲོ་དྷ་སྟེང་བོད་ཁྱིམ་སློབ་ཕྲུག་ཚོགས་ཆུང་གི་གོ་སྒྲིག་འོག སློབ་གྲྭའི་སློབ་མ་ ༥༠༠ ལྷག་གིས་བོད་བསྟན་སྲིད་མི་རིཊ་ཀྱི་ཆེད་དུ་རང་སྲོག་བློས་བཏང་གནང་བའི་རྒྱལ་གཅེས་དཔའ་བོ་དཔའ་མོ་འདས་གསོན་ཡོངས་དང་། དེ་དག་གི་ནང་མི་ཚོར་གདུང་སེམས་མཉམ་སྐྱེད་ཆེད། སློབ་གྲྭ་ནས་ཐེག་ཆེན་ཆོས་གླིང་གཙུག་ལག་ཁང་གི་རྒྱལ་གཅེས་དཔའ་བོའི་རྗེས་དྲན་རྡོ་རིང་གི་མདུན་ཐང་བར་ངག་བཅད་གོམ་བགྲོད་དང་། དེར་བསྔོ་སྨོན་མཆོད་འབུལ་བཅས་གནང་ཡོད་པ་མ་ཟད། སློབ་མ་ཚོས་འཛམ་གླིང་མཉམ་འབྲེལ་རྒྱལ་ཚོགས་གཙོས་རྒྱལ་སྤྱིའི་ཚོགས་སྡེ་ཁག་གིས། ད་ལྟའི་བོད་ནང་གི་ཛ་དྲག་གི་གནས་སྟངས་ཞི་འཇཊ་ཡོང་ཆེད་རྒྱབ་སྐྱོར་གནང་དགོས་པའི་དགོས་འདུན་ཞིག་ཀྱང་བཏོན་འདུག
སློབ་མ་ཚོའི་དགོས་འདུན་ཡི་གེའི་ནང་། དང་པོ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་ངེས་པར་མཚམས་འཇོག་བྱ་དགོས། གཉིས་པ། བོད་ནང་དུ་རྒྱལ་གཅེས་དཔའ་བོ་དཔའ་མོ་རྣམས་ཀྱིས་སྐུ་ལུས་མཆོད་མེར་ཕུལ་བ་དེ། བོད་ནང་བོད་ཀྱི་ཆོས་དང་རིག་གཞུང་། སྐད་ཡིག་དང་ཡུལ་གོམས་གཤིས་ལུགས་དང་བཅས་པར་རང་དབང་མེད་པའི་རྟགས་མཚན་ཡིན་སྟབས། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས་ངེས་པར་དུ་རྟོག་ཞིབ་གནང་བའི་འབོད་སྐུལ་ཞུ་རྒྱུ། གསུམ་པ། བོད་ཀྱི་ཁོར་ཡུག་ལ་གཏོར་བཤིག་ཚད་མེད་བཏང་བ་དེས་འཛམ་གླིང་གི་རང་བྱུང་ཁོར་ཡུག་ལའང་རང་བཞིན་གྱིས་དོ་ཕོག་ཡོང་གི་ཡོད་པས། རྒྱལ་སྤྱིའི་ཁོར་ཡུག་ཚོགས་པ་གཙོས་མཉམ་འབྲེལ་རྒྱལ་ཚོགས་ནས་རྟོག་ཞིབ་ངེས་པར་གནང་དགོས་པའི་འབོད་སྐུལ་ལན་བརྒྱར་ཞུ་རྒྱུ་ཡིན། ཞེས་བཀོད་འདུག
གསར་འགོད་པ། དོན་གོ
སྐབས་རེ་འདི་ལྟར་འོས་འཚམ་གྱི་སློབ་མའི་ལས་འགུལ་སྤེལ་དུ་བཅུག་ནའང་ཤིན་ཏུ་ལེགས་པོ་རེད།
གཅིག་ནས་སློབ་མའི་ལས་འགུལ་ཡིན་པས་ཤུགས་རྐྱེན་ཧ་ཅང་ཆེན་པོ་རེད།
གཉིས་ནས་འབྲེལ་ཡོད་སློབ་མ་དག་གི་སེམས་ཁ་ཁེངས་འགྲོ་བས་ལེགས་པོར་མཐོང་།
ཐུགས་རྗེ་ཆེ།
མ་འོངས་བོད་ཀྱི་སོན་རྩའི་དགོས་འདུན་གསུམ་ག་མྱུར་དུ་འགྲུབ་པའི་སྨོན་ལམ་ཡོད་དོ། །