ཚོགས་ཆེན་བཅོ་བརྒྱད་སྔོན་ལ་བརྩད་དེ་རྗེས་ལ་འཐབ།

རྒྱ་གཞུང་གིས་ཆབ་སྲིད་ལྷན་ཁང་གི་རྒྱུན་ལས་དཔོན་རིགས་ ༧ འདེམས་སྒྲུག་བྱས་རྗེས། རྒྱལ་སྤྱིའི་སྒང་རྒྱ་གཞུང་གི་གླེང་གཞི་ཞི་འཇགས་སུ་གྱུར་ཡོད་ཀྱང་། ཕྱི་ཟླ་ ༡༢ ནང་རྒྱ་དཔོན་ནང་ཁུལ་གྱི་འཁྲུག་འཛིང་བསྐྱར་དུ་ལངས་འདུག

ཉེ་སྔོན་རྒྱ་དམར་ཚོགས་ཆེན་བཅོ་བརྒྱད་པའི་སྟེང་ཆབ་སྲིད་ལྷན་ཁང་གི་རྒྱུན་ལས་མི་བདུན་པོ་གཏན་ཁེལ་རྗེས།  རྒྱལ་སྤྱིའི་སྒང་རྒྱ་གཞུང་གི་ཆབ་སྲིད་གླེང་སློང་དེ་མར་འཇགས་མགོ་བརྩམས་ཡོད། འོན་ཀྱང་ཕྱི་ཟླ་ ༡༢ པའི་ནང་དེ་སྔའི་རྒྱ་ནག་དབུས་གཞུང་ལས་ཁང་གི་འགན་འཛིན་ལིན་ཅིས་ཧྭ་དང་། ཟི་ཁྲོན་ཞིང་ཆེན་དམར་ཤོག་དྲུང་ཆེ་གཞོན་པ་ལི་ཁྲོན་ཁྲིན། རྒྱ་གཞུང་དབུས་དྲིལ་བསྒྲགས་སྡེ་ཁག་གི་མགོ་གཙོ་ལིག་ཆིས་པའོ་བཅས་ལ་གཅིག་མཇུག་གཉིས་མཐུད་ཀྱིས་རྒྱུན་ལྡན་མ་ཡིན་པའི་གནས་ཚུལ་བྱུང་བར་བརྟེན།  རྒྱ་གཞུང་དམར་ཤོག་ནང་ཁུལ་གྱི་ཁྱོ་ཤི་ང་གསོན་གྱི་དབང་ཤུགས་འཐབ་རྩོད་གླེང་གཞི་ཞིག་བསྐྱར་དུ་བསླེབས་མགོ་བརྩམས་ཡོད།

ཟླ་འདིའི་ཕྱི་ཚེས་ ༥ ཉིན་ཨ་རིའི་ནེའུ་ཡོག་དུས་བབ་ཀྱིས་གནས་ཚུལ་སྤེལ་པ་ལྟར་ན། དེ་སྔོན་ཧུའུ་ཅིན་ཐའོ་ཡིས་བློས་འཁེལ་དཔོན་རིགས་ལིན་ཅིས་ཧྭ་ཡི་བུ་ལ་རླངས་འཁོར་བརྡབ་སྐྱོན་བྱུང་བར་བརྟེན་ནས། ལིན་ཅིས་ཧྭ་རྒྱ་གཞུང་ཆབ་སྲིད་ལྷན་ཁང་གི་འཐུས་མིའི་གྲས་སུ་བསླེབས་ཐུབ་མེད། དེ་ནི་ལིན་ཅིས་ཧྭ་ཡི་གནས་ཚུལ་ཁྲོད་ཀྱི་ཕྱོགས་གཅིག་ཡིན་ལ། ཉེ་ཆར་བསྐྱར་དུ་ལིན་ཅིས་ཧྭ་ཡི་བཟའ་ཟླ་དམར་ཤོག་ཚོགས་མི་དང་གཞུང་གི་ལས་གནས་གཉིས་ནས་ཕྱིར་ཕུད་པའི་གནས་ཚུལ་བྱུང་ཡོད་སྟབས། ལིན་ཅིས་ཧྭ་ནི་དམར་ཤོག་ཚོགས་ཆེན་བཅོ་བརྒྱད་པའི་རྗེས་ཀྱི་གསར་འགྱུར་བརྒྱུད་ལམ་གྱི་གླེང་གཞི་གཙོ་བོ་ཞིག་ཆགས་ཡོད་འདུག 

དེ་བཞིན། དམར་ཤོག་ཚོགས་ཆེན་བཅོ་བརྒྱད་པའི་རྗེས་སུ་གསར་དུ་རྒྱ་དམར་དབུས་འཐུས་མི་ལྷན་ཚོགས་ཀྱི་རྗེས་སྣོན་འཐུས་མིའི་ཁྲོད་འདེམས་སྒྲུག་བྱས་མ་ཐག་པའི་ཟི་ཁྲོན་ཞིང་ཆེན་དམར་ཤོག་དྲུང་ཆེ་གཞོན་པ་ལི་ཁྲོན་ཁྲིན་གློ་བུར་དུ་དམར་ཤོག་ཚོགས་མི་དང་གཞུང་གི་ལས་གནས་གཉིས་ནས་ཕྱིར་ཕུད་བཏང་ཡོད་ལ། ལི་ཁྲོན་ཁྲིན་གྱི་རྒྱབ་ལྗོངས་ནི་ཧ་ཅང་རྙོག་འཛིང་ཆེ་བར་མ་ཟད། རྒྱལ་སྤྱིའི་བརྒྱུད་ལམ་ཁག་ཏུ་ལི་ཁྲོན་ཁྲིན་ནི་ཀྲིག་ཡུང་ཁཱང་གིས་ཐད་ཀར་བསྐོ་འཐེན་བྱས་པ་ཞིག་ཡིན་སྐོར་གྱི་གླེང་སློང་ཡང་འབྱུང་བཞིན་ཡོད།

ལི་ཁྲོན་ཁྲིན་ཏང་སྲིད་ལས་གནས་ནས་ཕྱིར་ཕུད་པ་དང་མཉམ་དུ། དེ་སྔའི་ཟི་ཁྲོན་ཞིང་ཆེན་གྱི་དམར་ཤོག་དྲུང་ཆེ་ལིག་ཆིས་པའོ་ཡང་གློ་བུར་བདུན་ཕྲག་གཅིག་རིང་མཐོང་རྒྱུ་མེད་པར་གྱུར་པ་དང་། ལིག་ཆིས་པའོ་ནི་དམར་ཤོག་ཚོགས་ཆེན་ ༡༨ པའི་རྗེས་སུ་ཆབ་སྲིད་ལྷན་ཁང་གི་འཐུས་མི་ ༢༥ གྲས་སུ་འདེམས་སྒྲུག་བྱས་ཡོད་པ་མ་ཟད། རྒྱ་གཞུང་དབུས་དྲིལ་བསྒྲགས་སྡེ་ཁག་གི་མགོ་གཙོར་བསྐོ་འཇོག་བྱས་ཡོད་ལ། རྒྱ་ནག་གཞུང་འབྲེལ་གསར་ལམ་ཁག་ཏུ་ཟླ་སྔོན་མའི་ཕྱི་ཚེས་ ༢༩ ཉིན་ལིག་ཆིས་པའོ་གཙོས་པའི་གཞུང་འབྲེལ་ཤོག་ཁག་ཅིག་བྱང་ཀོ་རི་ཡ་དང་ཁམ་བྷོ་ཌི་ཡ། ཝེ་ཐི་ནམ་རྒྱལ་ཁབ་བཅས་སུ་བསྐོར་སྐྱོད་ལ་འགྲོ་རྒྱུ་ཡིན་བསྒྲགས་ཡོད་ཀྱང་།  ལིག་ཆིས་པའོ་གློ་བུར་དུ་འགྲོ་བསྐྱོད་ཐུབ་མེད་པར་ཁོའི་ཚབ་ཏུ་ལིས་ཅན་ཀོ་ཕྱིན་ཡོད་འདུག  

སྔ་རྗེས་སུ་བྱུང་བའི་རྒྱ་གཞུང་མཐོ་རིམ་དཔོན་རིགས་ཀྱི་རྒྱུན་ལྡན་མ་ཡིན་པའི་ཚུལ་དེ་དག་གིས།  རྒྱ་གཞུང་གི་ཆབ་སྲིད་ལྷན་ཚོགས་ནི་སྔར་བཞིན་ཁྱོ་ཤི་ང་གསོན་གྱི་གནས་སྟངས་ཤིག་གི་འོག་ཡོད་པ་མངོན་ཡོད་ལ། རྒྱ་ནག་ཝེ་པའོ་གནས་འཕྲིན་དྲ་བའི་སྟེང་ “ཚོགས་ཆེན་བཅོ་བརྒྱད་པའི་སྔོན་ལ་རྩོད། ཚོགས་ཆེན་བཅོ་བརྒྱད་པའི་རྗེས་སུ་འཐབ”ཅེས་པའི་སྐད་ཆ་ཞིག་ཁྱབ་ཡོད་པ་ལྟར། རྒྱ་གཞུང་དམར་ཤོག་ནང་ཁུལ་ཤོག་ཁག་བར་གྱི་དབང་ཤུགས་ཁེ་ཕན་འཐབ་རྩོད་དེ་ནི།  ཤོག་ཁག་ཕན་ཚུན་གྱི་ཕྱོགས་གཏོགས་དཔོན་རིགས་གཅིག་འདྲུད་གཅིག་གནོན་གྱི་རྣམ་པ་ཞིག་ཆགས་ཡོད།

ལོ་རྗེས་མའི་དཔྱིད་མགོར་འཚོགས་འཆར་གྱི་རྒྱ་གཞུང་ཚོགས་ཆེན་གཉིས་མ་འཚོགས་བར་དུ།  རྒྱ་གཞུང་ཆབ་སྲིད་ལྷན་ཁང་གི་རྒྱུན་ལས་རྣམས་ཀྱི་ལས་ཀ་དང་གོ་གནས་ད་དུང་གཏན་འབེབས་བཟོ་ཐུབ་མེད་ལ། དེ་ནི་རྒྱ་གཞུང་དཔོན་རིགས་ནང་ཁུལ་དབང་ཤུགས་འཐབ་རྩོད་ཤུགས་ཆེ་རུ་འགྲོ་བའི་རྒྱུ་རྐྱེན་ཞིག་ཆགས་ཡོད། རྒྱལ་སྤྱིའི་གསར་ལམ་ཁག་ནང་མ་འོངས་རྒྱ་གཞུང་མི་དམངས་འཐུས་མིའི་ཚོགས་གཙོའི་འགན་འཁུར་རྒྱུ་ཡིན་པའི་ཀྲང་ཏིག་ཅཱང་གིས།  དེ་སྔོན་སྤྱི་ཚོགས་ཐོག་རྒྱ་གཞུང་སྐབས་གསར་པའི་རྒྱུན་ལས་མི་བདུན་གྱི་གྲས་སུ་བསླེབ་རྒྱུར་རེ་བ་ཆེ་ཤོས་ཀྱི་གྲས་སུ་ཡོད་ཀྱང་། རྗེས་སུ་ཚོགས་ཆེན་བཅོ་བརྒྱད་པའི་ཐོག་རྒྱུན་ལས་མི་བདུན་ཁྲོད་བསླེབས་མ་ཐུབ་པས་ཐཱུན་ཤོག་ཁག་གི་ལིས་ཡོན་ཁྲའོ་ཡི་ལག་ནས། ཧོང་ཀོང་དང་ཨོ་མཱན་ལས་དོན་ཚོགས་ཆུང་གི་ཚོགས་གཙོའི་གོ་དབང་འཕྲོག་རྩིས་ཡོད་པ་དང་། ལིས་ཡོན་ཁྲའོ་ལ་རྒྱལ་ཁབ་ཀྱི་སྲིད་འཛིན་གཞོན་པའི་མིང་ཐོག་ནས་ཚོགས་ཆུང་གི་ཚོགས་གཙོ་གཞོན་པ་མ་གཏོགས་རེག་རྒྱུ་མིན་པའི་ཚོད་དཔག་བྱེད་བཞིན་ཡོད།

གཞན་ཡང་། པའོ་ཞི་ལའེ་གྱི་གནད་དོན་གྱིས་བསླངས་པའི་རྒྱ་དམར་དཔོན་ཤོག་ནང་ཁུལ་དབང་ཤུགས་སྙོམས་སྒྲིག་མ་ཐུབ་པའི་འཁྲུག་རྩོད་དེ་ད་དུང་མུ་མཐུད་གནས་ཡོད་ལ། སྲིད་དོན་དབྱེ་ཞིབ་པ་དག་གིས་མ་འོངས་པར་རྒྱ་གཞུང་དམར་ཤོག་སྲིད་སྟེགས་སྟེང་དོན་རྐྱེན་གཅིག་ལ་གཏམ་རྒྱུད་གཉིས་བྱུང་སྲིད་པ་དང་། གཅིག རྒྱ་གཞུང་གིས་མི་མང་གི་མཐོང་ལམ་དུ་རུལ་སུངས་ལ་ཁ་གཡར་ཏེ་དམར་ཤོག་ནང་ཁུལ་དཔོན་ཤོག་འཐབ་རྩོད་ཁྲོད་ཕམ་ཉེས་བྱུང་པའི་དཔོན་རིགས་རྣམས་རིམ་པས་ཐག་གཅོད་བྱ་སྲིད་པ་དང་། གཉིས།  རྒྱ་གཞུང་གིས་མུ་མཐུད་དུ་པའོ་ཞི་ལའེ་ཡི་གྱོད་དོན་གྱིས་མཚོན་པའི་ཅཱང་ཧུའུ་གཉིས་ཀྱི་དབང་ཤུགས་འཐབ་རྩོད་ཀྱི་གཏམ་རྒྱུད་རྣམས་ཕྱི་ལོག་གི་རྒྱལ་སྤྱིའི་བརྒྱུད་ལམ་ཁག་ཏུ་མུ་མཐུད་གླེང་གཞི་བཟོ་སྲིད་པ་དེ་རེད།  ཡིན་ནའང་། རྒྱ་གཞུང་དཔོན་ཤོག་སུས་ཀྱང་བརྗོད་མི་སྲིད་པ་དེ་ནི་རྒྱ་གཞུང་དམར་ཤོག་ནང་ཁུལ་དབང་ཤུགས་འཐབ་རྩོད་དང་གཅིག་ལ་གཅིག་བརྟེན་གྱི་གནས་ཚུལ་དངོས་དེ་ཡིན་པ་དང་།  རྒྱ་གཞུང་གིས་བརྗོད་པའི་རུལ་སུངས་བཀག་སྡོམ་དང་། དམར་ཤོག་ནང་ཁུལ་དབང་ཤུགས་འཐབ་རྩོད་ལ་བརྟེན་ནས་རྒྱ་ནག་རང་དབང་དམངས་གཙོ་འགྱུར་བར་རེ་བའི་རྨི་ལམ་དེ་ནི་ནམ་ཡང་འགྲུབ་ཐུབ་མེད་པ་ཞིག་ཡིན་པའི་ངོས་འཛིན་བྱས་ཡོད་འདུག

གསར་འགོད་པ། ཚེ་རིང་རྒྱལ།

༼བོད་ཀྱི་དུས་བབ་སྤྱིའི་འདོན་ཐེངས་ ༥༧༥ ལས་བདམས་བཀོད་བྱས།༽