འབར་བཞིན་པའི་བོད།

ཞུ་ཀྲི་ཡོན་གྱིས་བརྩམས། ཝཱཎ། རིག་འཛིན་ལྷུན་གྲུབ་ཀྱིས་བསྒྱུར།

ཕྱི་ཟླ་ ༢ པའི་ཚེས་ ༡༩ ཉིན་དགུང་ཙམ་ལ་རང་ལོ་ ༡༨ སོན་པའི་སྣང་གྲོལ་ལགས་ཀྱིས་བོད་བྱང་ཤར་བར་མ་གྲོང་སྡེའི་ཟམ་ཐང་དགོན་གྱི་ཉེ་འཁྲིས་སུ་རང་ལུས་མེ་རུ་ཞུགས་འབུལ་གནང་ཡོད། ཁོང་གིས་ཞལ་ཆེམས་ཡི་གེ་ཞིག་བཞག་ཡོད་པའི་ནང། ང་མི་འདུག་འགྲོ་རན་བྱུང་ཐལ། ངས་དྲིན་ཅན་བོད་མིའི་དོན་ལ།  ངའི་ཚེ་སྲོག་མེ་ལ་སྐུར་ནས།  ཞེས་བྲིས་ཡོད། ཧན་རྒྱ་རིགས་ནི་ “མི་ངན་” ཡིན་པ་བརྩིས་ཡོད། ཁོང་གིས་ཁྲིམས་ངན་འདིའི་འོག་ནས་འདུག་ཐབས་མེད། རྨ་མེད་པའི་གཅར་རྡུང་བཟོད་རྒྱུར་དཀའ་ཞེས་ཀྱང་བརྗོད་ཡོད།

འདས་པའི་ལོ་གསུམ་གྱི་ནང་བོད་མི་སེར་སྐྱ་གྲངས་བརྒྱ་ལ་ཉེ་བས་རང་ལུས་བསྲེགས་གནང་ཡོད་པ་མ་ཟད།  ཟླ་ ༡༡ ཚེས་ ༤ ནས་ཟླ་ ༡༢ ཚེས་ ༣ བར་གྱི་ནང་མི་གྲངས་སུམ་ཅུ་ཡིས་ཚེ་སྲོག་མེ་ལ་བསྒྲོན། རྒྱ་གཞུང་གིས་དོན་རྐྱེན་རྒྱུད་སྐུལ་ཉེས་འཛུགས་འོག་བོད་མི་རྣམས་དོན་དམ་བཙོན་འཇུག་བརྒྱུད་རང་ལུས་མེར་བསྲེགས་ཀྱི་རླབས་རྒྱུན་འགོག་ཐབས་བྱེད་ཀྱི་ཡོད། དེ་དང་མཉམ་དུ་རྨ་མེད་པའི་གཅར་རྡུང་མུ་མཐུད་ཀྱིན་ཡོད།

ལོ་ངོ་ ༢༡ གོང་ང་མཐོ་སློབ་གྲོགས་པོ་ཚོ་དང་མཉམ་དུ་རྒྱ་ནག་གི་ནུབ་ཕྱོགས་མཐར་བསྐྱོད་ཡིན། དེའི་སྐབས་ཞི་བདེ་ལྷིང་འཇགས་ལྟར་སྣང། འོན་ཀྱང། དེང་སྐབས་ཉིན་ལྟར་ཡིད་སྐྱོ་བའི་གནས་ཚུལ་རྐྱང་རྐྱང་ཐོས་ཀྱི་འདུག  ཟླ་ ༡༠ པའི་ནང་ང་ཕྱིར་ལོག་བྱེད་སྐབས་ལོ་གཞོན་གྲྭ་བ་ཞིག་གིས་ང་ཁོང་རང་གི་དགོན་པར་མགྲོན་འབོད་གནང་སོང། ཞིབ་བཤེར་བཀག་སྡོམ་བྱེད་ས་བརྒྱུད་ནས་འགྲོ་སར་དར་འཕྱང་དམར་པོ་ཞིག་གི་ཐོག “བརྟན་ལྷིང་རྒྱུན་སྐྱོང་ཆེད་ཛ་དྲག་གནས་སྟངས་ལ་འཕྲལ་དུ་གདོང་ལེན་བྱེད་དགོས།”  ཞེས་གསལ། ཁོང་གིས་དྲག་ཆས་སྤྲོས་པའི་དམག་མི་མཐོང་པར་ཁོང་ཁྲོ་ཟ་ཡི་འདུག་ཟེར། རྒྱུ་མཚན་ནི་འཛུགས་སྐྲུན་ཆེད་འགྲོ་ལམ་བཀག་བཞག་འདུག  རྒྱང་ཐག་མེ་ལི་ ༣༠ ཙམ་གྱི་སྣང་གྲོལ་གྱི་ཕ་ཡུལ་བར་མར་འགྲོ་བར་དགོང་དྲོ་བར་དུ་བསྒུག་དགོས་བྱུང། སྣུམ་འཁོར་ནང་ང་དང་གཞན་བོད་མི་ན་གཞོན་གཉིས་བཅས་འགྲུལ་པ་གསུམ་ཡོད། 

ངས་ “ཁྱེད་ཚོ་ནང་པ་ཡིན་ནམ།” ཞེས་དྲིས་ཡིན། གཅིག་གིས་༸གོང་ས་ཏཱ་ལའི་བླ་མའི་སྐུ་པར་ཞིག་བྲང་ཁོག་ནས་ཕྱིར་བཏོན་སྟེ་ང་ལ་བསྟན་བྱུང། “ཁོང་ནི་ང་ཚོའི་རྩ་ཆེ་ཤོས་རེད།” ཅེས་ཟེར།  ངས་ཁྱེད་ཚོས་ “རང་ལུས་མེར་བསྲེགས་སྐོར་གོ་ཐོས་བྱུང་ངམ།” ཞེས་ལྟ་ཚོད་ཀྱིས་དྲིས་པ་ཡིན། མཐར་བརྗོད་གཞི་དེའི་ཐོག་བབས་སོང། ཁོ་ཚོས་དོན་རྐྱེན་གྱི་སྐོར་ཤེས་ཀྱི་འདུག

“དགོངས་པ་མ་འཚོམ། ཁྱེད་ཚོ་ཧན་རྒྱ་རིགས་ཚོར་ཁོང་ཁྲོ་ཟ་ཡི་འདུག་གམ།” ཞེས་དྲིས་ཡིན། རྒྱུ་མཚན་ནི། སྣང་གྲོལ་གྱིས་ཞལ་ཆེམས་ནང་ “རྒྱ་ངན་”ཞེས་པའི་ཚིག་འདི་བཀོལ་སྤྱོད་གནང་ཡོད། ཁོ་ཚོས་སྣང་གྲོལ་གྱི་སྐོར་གོ་ཐོས་བྱུང་འདུག  ང་སྣང་གྲོལ་གྱི་ཕ་མར་གདུང་སེམས་མཉམ་སྐྱེད་བྱེད་པར་འགྲོ་རྒྱུ་ཡིན་ཞེས་བརྗོད་པས། ཁོ་ཚོས་སྐད་ཆ་མང་པོ་བཤད་བྱུང།

ཁོ་ཚོ་ཡང་བོད་མི་བརྒྱ་ཕྲག་དང་མཉམ་དུ་ཡོད་པ་དང། བོད་མི་ཚོས་སྣང་གྲོལ་གྲོངས་སར་གུར་དཀར་པོ་ཞིག་ཕུབ་ཡོད་པ་བཅས་ཀྱི་སྐོར་བརྗོད་བྱུང།  གཅིག་གིས་ “ཁོང་ནི་ང་ཚོའི་དཔའ་བོ་རེད”ཅེས་ཟེར།

ང་ཚོ་བར་མ་རུ་བསླེབས་དུས་ས་རུབ་འདུག   ལམ་ཟུར་གློག་སྒྲོན་ཞིག་གི་འགྲམ་དུ་ངའི་འགྲུལ་རོགས་ཤིག་གིས་མི་ཞིག་ལ་ལམ་ཕྱོགས་སྐད་ཆ་དྲིས་མོད། དེས་ཡ་ལན་སྤྲད་མ་སོང། ལམ་གྱི་བཞི་མདོ་ཞིག་ཏུ་ཁོས་སྦག་སྦག་ལ་བཞོན་པའི་མི་གཉིས་ལ་སྐད་ཆ་དྲིས་པ་དང་ཁ་རྩོད་ཤོར་སོང། གྲྭ་བ་ཞིག་སྒེའུ་འཁྲིས་ང་ལ་ལྟ་ཞིབ་བྱེད་པར་བསླེབས་བྱུང། 

ངའི་འགྲུལ་རོགས་ཀྱིས་ “དགོངས་པ་མ་འཚོམ།   ཁོ་ཚོས་ངས་ཁྱེད་རང་འདི་གར་ཁྲིད་པར་གཤེ་གཤེ་བཏང་བྱུང།” ཞེས་ཟེར། འགྲུལ་འཁོར་ཆུང་བ་ཞིག་བསླེབས་ཏེ། མི་གཉིས་མར་མཆོང་འཐོན་བྱས་པ་དང་འགྲུལ་རོགས་ལ་ཁོང་ཁྲོའི་དྲག་རྩུབ་ཀྱིས་གཤེ་གཤེ་བཏང་སོང། ཞེ་སྣང་དང་དྲག་རྩུབ་ཀྱིས་ས་གཞི་ཡོངས་རྫོགས་མུན་པར་ལྟར་བསྒྲིབས་འདུག

གློ་བུར་ཐོག་རྒྱག་འགྲུལ་རོགས་ཀྱིས་ “ང་ཚོ་བོད་པ་ཡིན།” ཞེས་བརྗོད་བྱུང།  ང་ཚོས་བར་མར་མ་ཕྱིན་པར་མཚན་གཅིག་ཉེ་འཁོར་གྱི་གྲོང་སྡེ་ཞིག་ཏུ་བསྡད་པ་ཡིན།  “ང་ཚོ་ནང་པ་ཡིན། འོན་ཀྱང། ཆོག་མཆན་མེད་པར་ང་ཚོ་ལྷ་སར་འགྲོ་མི་ཆོག” ཅེས་ཟེར། ལོ་མང་གོང་ལྷ་ས་ལ་གནས་སྐོར་འགྲོ་མཁན་གྱི་བོད་པ་མང་པོ་མཐོང་རྒྱུ་ཡོད་མོད། འོན་ཀྱང། ད་ཆ་གཅིག་ཀྱང་མི་འདུག

ཉིན་རྗེས་མར་ང་བར་མ་ལ་བསྐྱར་ལོག་བྱས་ཡིན། ངས་ཆུ་ལེན་མཁན་གྱི་ལོ་གཞོན་གྲྭ་བ་ཞིག་ལ་སྣང་གྲོལ་གྱི་སྐོར་སྐད་ཆ་དྲིས་པས། ཁོས་ང་ཚོགས་ཁང་ཆེན་པོ་ཞིག་གི་ནང་ཁྲིད་བྱུང། དེར་གྲྭ་བ་རྒས་སོང་ཞིག་རྐང་པ་སྐྱིལ་ཀྲུང་བྱས་ནས་བསྡད་འདུག ང་ལ་སྣང་གྲོལ་གྱི་འདྲ་པར་མེད་སྟབས། ཁོས་རོགས་པ་བྱེད་ཐབས་མི་འདུག་ཟེར།

ལོ་གཞོན་གྲྭ་བ་དེས་ཁོ་རང་དང་ན་མཉམ་ཚོར་དྲིས་ཀྱང། ལན་རགས་མ་བྱུང། ལམ་དུ་ཡར་མར་འགྲོ་མཁན་ཚོས་ཀྱང་མགོ་པོ་གཡུག་གི་འདུག འཛུགས་སྐྲུན་བྱེད་སའི་ས་ཁུལ་དེར་ཡང་སུས་ཀྱང་ཤེས་རྟོགས་བྱུང་མི་འདུག གྲོང་སྡེའི་དམའ་རིམ་སློབ་གྲྭའི་སྒོ་སྲུང་དམག་མི་ཞིག་ལ་སྐད་ཆ་དྲིས་པས། སྣང་གྲོལ་ནི་སློབ་ཕྲུག་ཅིག་ཡིན་པ་ཤེས་རྟོགས་བྱུང། དམག་མི་དེས་ལམ་སྟོན་ལྟར་ངས་ཉེ་འཁོར་གྱི་རྒྱའི་རྒྱལ་དར་ལྷབ་ལྷུབ་གཡོ་པའི་སྡོད་ཁང་དེར་ཕྱིན་མོད། འོན་ཀྱང། མི་མང་ཚོས་གྲོང་སྡེ་དེར་འབྲིང་རིམ་སློབ་གྲྭ་མེད་རེད་ཅེས་ཟེར།

བར་མ་ནས་ཕྱིར་ལོག་བྱེད་སའི་གཞུང་ལམ་ནི།  ཉིན་རྒྱབ་ཆུ་ཚོད་དང་པོ་ནས་སྒོ་ཕྱེ་ཡི་འདུག   ས་ཕྱོགས་དེ་ནས་ང་འཐོན་དགོས་ཆགས་བྱུང། གཙང་ཆུའི་ངོགས་སུ་ཤིང་སྡོང་དབྱར་བ་དག་ཉི་འོད་དང་བསྡེབས་ཤིང། གོས་དམར་གྱོན་པའི་ལོ་གཞོན་གྲྭ་བ་སྐོར་ཞིག་སློབ་གཉེར་ལ་གཞོལ་བཞིན་འདུག  ང་མི་འདོད་བཞིན་དུ་གླ་འཁོར་ཞིག་གི་ནང་བསྡད་ཡིན། ང་ལོ་མང་རིང་ནས་ས་ཆ་གང་སར་འགྲུལ་བསྐྱོད་བྱེད་མྱོངས་མོད། ཅི་ཞིག་སྟོར་བ་ལྟ་བུའི་ཚོར་བ་ནི་བྱུང་མྱོངས་མེད།

ལམ་གཞུང་མར་བསྐྱོད་ནས་མེ་ལི་གཅིག་ཙམ་རྗེས།  སྒང་ཤོང་ཅན་གྱི་གྲོང་གསེབ་ཅིག་གི་འགྲམ་དུ་ངས་གླ་འཁོར་ཁ་ལོ་བ་བཀག་ཡིན། ངས་རེ་ཞུ་སྐྱར་ཟློས་ཡང་ཟློས་བྱས་མཐར་ལམ་ཟུར་གྱི་ཚོང་བདག་ཅིག་གིས་གཞི་ནས་སྣང་གྲོལ་གྱི་ཁྱིམ་ཚང་གི་འགྲོ་ལམ་བསྟན་བྱུང། ཁྱོ་ཤུག་བགྲེས་སོང་གཉིས་ཀྱིས་སྒང་གཤོང་གི་སྟོད་ཕྱོགས་ཁང་པ་དེར་མཛུབ་མོ་བཙུག་སོང།

དེ་ནི་འདམ་བག་གི་བརྒྱབ་པའི་ཁང་པ་ཆུང་ཆུང་ཞིག་སོ་ཕག་གི་གྱང་གིས་མཐའ་བསྐོར་ཡོད་པ་དང།  ཕྱོགས་གཅིག་ཏུ་དར་ལྕོག་ལྷབ་ལྷུབ་ཏུ་གཡོ་བཞིན་འདུག  ལྕགས་སྒོ་ལ་སྒོ་ལྕགས་ཤིག་བརྒྱབ་འདུག  ཉེ་འགྲམ་གྱི་སྐྱེ་དམན་བུ་ཕྲུག་ཁྲིད་པ་ཞིག་གིས་སྣང་གྲོལ་ངོ་ཤེས་ཀྱི་ཡོད་ཟེར།  ཁོང་གི་ཕ་མ་དག་ཐག་རིང་གི་འབྲོག་སར་བསྡད་ཡོད་རེད་ཅེས་བརྗོད་བྱུང། ཁོ་མོས་བརྗོད་དོན། ཁོང་གྲོངས་བའི་ཉིན་དེར། ཁོ་བས་གོས་གསར་པ་གྱོན་པ་དང། ལུས་པོ་བཀྲུས་ཤིང་མགོའི་སྐྲ་ཡང་གཙང་སེང་བཏུབ་འདུག ཁོས་མི་རྣམས་ལ་ཁོ་རང་རྫིག་པོ་ཡོད་མེད་སྐད་ཆ་དྲིས་ཀྱི་འདུག་ཟེར།

ངས་ཇི་ལྟར་བྱས་ནས་རང་ཉིད་ཀྱི་སྡུག་བསྔལ་བརྗོད་དགོས་མིན་མ་ཤེས་མོད། བུད་མེད་དེར་རྒྱ་སྒོར་ ༥༠༠ ཐམ་པ་སྣང་གྲོལ་གྱི་ཕ་མར་སྤྲོད་རོགས་ཞེས་མངགས་པ་དང། ཧན་རྒྱ་རིགས་ཤིག་གུས་བདུད་ཞུ་པར་བསླེབས་པའི་སྐོར་བརྗོད་རོགས་ཞུས་ཡིན།

སྣང་གྲོལ་དང་གཞན་བོད་མི་ཚོ་རང་དབང་ཆེད་འཆི་བཞིན་ཡོད་རུང། ང་ཚོ་ཧན་རྒྱ་རིགས་ཚོས་ཁ་ཁུ་སིམ་མེར་འདུག་པར་ང་ལ་བློ་ཕམ་ཡོད།  ང་ཚོའི་འཚོ་གནས་ནི་ཁེར་རྐྱང་དང་ནང་ཁུལ་འཁྲུག་འཛིང་། ཞེ་འཁོན་དང་གཏོར་བཤིག་ཁྲོད་སོ་སོའི་ཆག་སྒོ་སོ་སོས་མྱོང་བཞིན་ཡོད། གནས་འདི་ནི་ང་ཚོ་ཐུན་མོང་གིས་སྤྱོད་བཞིན་ཡོད། འདི་ནི་ཐུན་མོང་གི་ཁྱིམ་གཞི་དང་ཐུན་མོང་གི་འོས་འགན། ཐུན་མོང་གི་རྨི་ལམ་ཡིན་པ་མ་ཟད། ཐུན་མོང་གིས་སྲུང་སྐྱོབ་བྱེད་ཡུལ་ཞིག་ཀྱང་ཡིན།

ཞུ་ཀྲི་ཡོན་Xu Zhiyongནི་ཁྲིམས་རྩོད་པ་དང་འགྲོ་མིའི་ཐོབ་ཐང་ཞུ་གཏུགས་བྱེད་མཁན་ཞིག་ཡིན།

མ་རྩོམ་གྱི་དྲ་ཐག http://www.nytimes.com/2012/12/13/opinion/tibet-is-burning.html?_r=0