གཟའ་ཕུར་བུའི་ཉིན་ཨ་རིའི་གྲོས་ཚོགས་འཐུས་མི་ ༥༨ ཀྱིས་སྲིད་འཛིན་ཨོ་བྷ་མར་བོད་དོན་ཐོག་ཨ་རིའི་སྣེ་འཁྲིད་ཀྱི་ནུས་པ་འདོན་དགོས་པའི་འབོད་སྐུལ་གནང་འདུག
ཕྱི་ཚེས་ ༢༠ ཉིན་ཨ་རིའི་གྲོས་ཚོགས་འཐུས་མི་ ༥༨ གྱིས་ས་རྟགས་བཀོད་དེ། སྲིད་འཛིན་ཨོ་བྷ་མར་བོད་ཀྱི་གནད་དོན་ཐད་སྣེ་འཁྲིད་རང་བཞིན་གྱི་ནུས་པ་འདོན་དགོས་པའི་འབོད་སྐུལ་གནང་ཡོད་ལ། འབོད་སྐུལ་ཞུ་མཁན་གྲོས་ཚོགས་འཐུས་མིའི་ཁྲོད་དུ་ཨ་རིའི་གྲོས་ཚོགས་འགྲོ་བ་མིའི་ཐོབ་ཐང་ལྷན་ཚོགས་(Tom Lantos Human Rights Commission)ཀྱི་ཚོགས་གཙོ་རྣམ་གཉིས་ཏེ། མའེ་ཁི་ཇོ་སྦིར་(Rep. James McGovern)དང་ཝོ་ཧྥུ་(Rep. Frank Wolf )གཉིས་གཙོས། ཨ་རིའི་དམངས་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀྱི་གྲོས་ཚོགས་འཐུས་རྣམས་མི་ཚུད་ཡོད་འདུག
གྲོས་ཚོགས་འཐུས་མིའི་ཞུ་སྐུལ་ཡི་གེའི་ནང་། རྒྱ་གཞུང་གིས་བོད་མིའི་ཐོག་དྲག་གནོན་དབང་སྒྱུར་གྱི་སྲིད་ཇུས་བཟུང་སྟེ། བོད་མིའི་ཆོས་དད་རང་དབང་དང་མི་རིགས་རང་གི་སློབ་གསོའི་ལས་དོན་ཐད་བཀག་སྡོམ་དང་འགོག་རྐྱེན་བཟོ་བཞིན་པ་བཅས་ལ་སྐྱོན་བརྗོད་བྱས་པ་མ་ཟད། སྲིད་འཛིན་ཨོ་བྷ་མས་བོད་ཀྱི་གནད་དོན་དེ་ནི་ཨ་རིའི་གཞུང་གི་འགྲོ་བ་མིའི་ཐོབ་ཐང་ལས་དོན་ཐད་ནས་གཙོ་གནད་ཅིག་ཏུ་བཟུང་ནས། ཨ་རིའི་ངོས་ནས་འགག་རྩའི་སྣེ་འཁྲིད་ཀྱི་ནུས་པ་བཏོན་ཏེ། དུས་ཡུན་ཐུང་ངུའི་ནང་བོད་ཀྱི་འགྲོ་བ་མིའི་ཐོབ་ཐང་གནས་སྟངས་ལེགས་བཅོས་ཡོང་ཐབས་གནང་དགོས་པའི་སྐོར་དང་། སྲིད་འཛིན་ཨོ་བྷ་མས་ཐེངས་འདིར་ཨ་རིའི་རྒྱལ་སྲིད་དྲུང་ཆེ་གསར་དུ་འདེམས་སྒྲུག་སྐབས། ཐོག་མར་འོས་མི་གང་དེར་བོད་ཀྱི་གནད་དོན་ཐག་གཅོད་ཐད་ནུས་པ་འདོན་རྒྱུའི་འདུན་པ་ཤུགས་ཆེན་པོ་ཡོད་མེད་ལ་གཟིགས་དགོས་པ་བརྗོད་ཡོད་འདུག
ཨ་རིའི་གྲོས་ཚོགས་འཐུས་མི་དེ་དག་གིས་སྲིད་འཛིན་ཨོ་བྷ་མས་སྣེ་འཁྲིད་དེ། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་ལྕམ་ཕེའེ་ལའེ་མཆོག་གིས་ཉེ་སྔོན་བོད་དོན་ཐད་སྤེལ་བའི་བསྒྲགས་གཏམ་ལ་རྒྱབ་སྐྱོར་གནང་ཐོག ཨ་རིའི་མཐུན་ཕྱོགས་རྒྱལ་ཁབ་ཁག་གིས་ཀྱང་བོད་ཀྱི་འགྲོ་བ་མིའི་ཐོབ་ཐང་གནས་སྟངས་གང་མགྱོགས་ལེགས་བཅོས་ཡོང་ཐབས་ཐད་ནུས་པ་བཏོན་ཏེ། རྒྱ་གཞུང་གི་སྲིད་ཇུས་བྱེད་བབས་དབང་གིས་བོད་ནང་གནས་སྟངས་ཛ་དྲག་ཏུ་འགྱུར་བཞིན་པ་དེ་སེལ་དགོས་པ་བརྗོད་འདུག
ཕྱི་ཟླ་ ༡༡ ཚེས་ ༢ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་ལྕམ་ཕེའེ་ལའེ་མཆོག་གིས་བསྒྲགས་གཏམ་སྤེལ་པའི་ནང་། རྒྱ་གཞུང་གིས་བོད་ནང་གི་ཛ་དྲག་གནས་སྟངས་ཞི་འཇམ་ཡོང་སླད། བོད་ནང་དུ་རྒྱལ་སྤྱིའི་རང་དབང་ཅན་གྱི་རྟོག་ཞིབ་པ་དང་གསར་འགོད་པ་ཆེད་གཏོང་གིས་ས་གནས་ས་ཐོག་གི་གནས་སྟངས་ངོ་མ་རྒྱུས་ལོན་བྱེད་འཇུག་དགོས་པ་མ་ཟད། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་ཆོས་དད་རང་དབང་རྟོག་ཞིབ་ཐད། རྒྱལ་ཚོགས་འགྲོ་བ་མིའི་ཐོབ་ཐང་དམིགས་བསལ་ཚོགས་ཆུང་གིས་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་དང་ཆོས་དད་རང་དབང་ཐོག་རྟོག་ཞིབ་ཆེད་འགྲོ་སྐྱོད་ཆོག་པའི་ཆོག་མཆན་སྤྲོད་དགོས་པའི་འབོད་སྐུལ་ཞུས་ཡོད་པ་རེད།
གྲོས་ཚོགས་འཐུས་མི་དག་གིས་ཡག་པོ་གསུངས་འདུག་ཀྱང་ནག་རི་དེའི་བོད་དོན་ཐོག་འགན་འཁུར་ལྡན་པའི་རྒྱ་སྐྱོར་ཞིག་ཁག་པོ་མིན་ནམ་་་་འཇམ་མེ་ཁན་རྒྱ་དོན་དྲུང་ཆེར་མ་བསྐོས་བ་དེའི་བོད་ལ་གྱོང་རེབ་པ་རེད་་་་་་་་་་་་་་་་་་་་་་་་་་་་་་་་་་་་་