བོད་རིགས་མཐོ་རིམ་སློབ་མའི་ཚོགས་ཆེན་ཐེངས་བདུན་པ་དེ་ཁ་སང་ཕྱི་ཚེས་ ༢༦ ཉིན་ལྡི་ལིའི་བསམ་ཡས་གླིང་བོད་སྒར་ཉིན་མོའི་སློབ་གྲྭ་རུ་ཚོགས་མགོ་བརྩམས་ཡོད་འདུག
ལྡི་ལི་མཐོ་སློབ་ཀྱི་སློབ་མ་གཡག་ཕྱུག་ཕུན་ཚོགས་ཆོས་འཕེལ་ལགས་ཀྱིས་གནས་ཚུལ་བཏང་འབྱོར་བྱུང་བ་ལྟར་ན། ཁ་སང་ཕྱི་ཚེས་ ༢༦ ཉིན་ལྡི་ལི་བསམ་ཡས་གླིང་གཞིས་སྒར་ཉིན་མོའི་སློབ་གྲྭའི་མདུན་ཐང་དུ་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་བདུན་པ་དེ་ཚོགས་ཡོད་པ་དང་། ཚོགས་ཆེན་དབུ་འབྱེད་མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཆིབས་བསྒྱུར་བསྐྱངས་ཡོད་ཅིང་། གཞན། ལྡི་ལི་བསམ་ཡས་གླིང་གཞིས་སྒར་གྱི་ས་གནས་མགོ་འཛིན་དང་། བརྒྱ་དཔོན། གཞུང་དང་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་རྣམ་པ་བཅས་མཉམ་ཞུགས་གནང་ཡོད་འདུག
ཚོགས་ཆེན་གཙོ་སྐྱོང་བ་བསོད་ནམས་དར་རྒྱས་ལགས་སུ། ཚོགས་ཆེན་འདིའི་དམིགས་ཡུལ་དང་མཐོ་རིམ་སློབ་མ་ཇི་ཙམ་ཚོགས་ཞུགས་གནང་ཡོད་མེད་སྐོར་བཅར་འདྲི་ཞུས་པར་ཁོང་གིས་“ད་ལན་ཚོགས་ཆེན་འདིའི་ཐོག་ས་གནས་ཁག་ ༡༢ ཀྱི་མཐོ་སློབ་ ༣༡ ནས་སློབ་མ་ ༨༡ ཙམ་འཛུལ་ཞུགས་གནང་ཡོད་ཅིང་། ཚོགས་ཆེན་འདིའི་དམིགས་ཡུལ་གཙོ་བོ་རྒྱ་གར་མཐོ་སློབ་འདྲ་མིན་ནང་སློབ་སྦྱོང་བྱེད་བཞིན་པའི་མཐོ་རིམ་སློབ་མ་རྣམས་ལོ་གཅིག་ལ་ཐེངས་རེ་ཙམ་ཕན་ཚུན་མཉམ་འཛོམས་བྱས་ཏེ། བོད་མི་རིགས་ཀྱི་ཆབ་སྲིད་དང་སྤྱི་ཚོགས། དཔལ་འབྱོར་སོགས་བརྗོད་གཞི་འདྲ་མིན་ཐོག་གྲོས་བསྡུར་དང་ཕན་ཚུན་བསམ་ཚུལ་བརྗེ་རེས་ཀྱི་སྡིངས་ཆ་གསར་བ་ཞིག་བསྐྲུན་ཐུབ་པའི་ཆེད་དུ་ཡིན་”ཞེས་བརྗོད་སོང་།
ཡང་ཁོང་གིས་“ཚོགས་ཆེན་འདིའི་བརྒྱུད་མཐོ་རིམ་སློབ་མ་རྣམས་འཇིག་རྟེན་འདིའི་ནང་ཆེས་ཡི་གར་འོང་བའི་ཡར་རྒྱས་ཀྱི་རྩ་བ་ལྟ་བུ་མན་ངག་གསུམ་སྟེ། རང་མགོ་རང་ཐོན་དང་རང་ངོ་རང་ཤེས་རང་འགན་རང་འཁུར་གྱི་ལྟ་གྲུབ་གསུམ་རྒྱུན་འཁྱོངས་བྱེད་ཐུབ་ཐབས་དང་མཐོ་སློབ་འདྲ་མིན་ནང་སློབ་སྦྱོང་བྱེད་བཞིན་པའི་སློབ་མ་རྣམས་ལ་བོད་པའི་སྤྱི་ཚོགས་ཁྲོད་ཆེད་ལས་མཁས་པ་དང་། རིགས་གཅིག་རྐང་འཛིན་པའི་མི་སྣ་གསོ་སྐྱོང་བྱེད་ཐུབ་པར་རང་ཉིད་ནས་མགོ་བརྩམས་དགོས་པ། བོད་མིའི་སྤྱི་ཚོགས་ནང་རང་ནུས་གང་ཡོད་ཀྱིས་ཞབས་འདེགས་གྲུབ་ཐུབ་པར་བྱ་རྒྱུ་དེ་གལ་གནད་ཆེན་པོ་ཡིན་པ་ཧ་གོ་བའི་ཆེད་དུ་ཡིན་”ཞེས་བརྗོད་སོང་།
ཐེངས་འདིའི་མཛད་སྒོའི་ཐོག་མཐོ་རིམ་སློབ་མ་ཡོངས་ཀྱི་ཚབ་ཞུས་ནས་བོད་མི་རིགས་ཀྱི་བདེན་པའི་འཐབ་རྩོད་ཆེད་དུ་རང་ལུས་མཆོད་མེར་ཕུལ་མཁན་དཔའ་བོ་དཔའ་མོ་རྣམས་ཀྱི་ཚེ་སྲོག་བློས་གཏོང་གི་རླབས་ཆེན་སྙིང་སྟོབས་ལ་གུས་བརྩི་དང་གདུང་སེམས་མཉམ་སྐྱེད་མཚོན་ཆེད་ཆེ་བསྟོད་གཟེངས་རྟགས་ཤིག་ཀྱང་འབུལ་བཞེས་མཛད་ཡོད་པ་དང་། གཞན་བོད་དབྱིན་གཉིས་ཀྱི་རྩོམ་ཡིག་འགྲན་བསྡུར་ནང་ཨང་རིམ་རྩེར་སོན་རྣམས་ལ་ཡང་བྱ་དགའ་དང་ལག་འཁྱེར་ཕུལ་ཡོད་པ་རེད།
དེ་རིང་གི་ཚོགས་ཆེན་འདིའི་ཐོག་བོད་དོན་ལས་འགུལ་ཐོག་ལོ་ངོ་ ༤༠ ལྷག་ཙམ་རིང་ཕྱག་ལས་གནང་མྱོང་མཁན་བོད་དོན་རྒྱབ་སྐྱོར་བ་དང་། པར་ལེན་གསར་འགོད་པ་“ལྦི་ཇེཡི་ཀ་རན་དི་”(Vijay Kranti)མཆོག་ལ་ཐུགས་རྗེའི་ལེགས་ཕུལ་གྱི་ཕྱག་རྟགས་ཕུལ་ཡོད་ཅིང་། ཚོགས་ཆེན་འདི་མུ་མཐུད་ཕྱི་ཚེས་ ༢༦ ནས་ ༢༩ བར་ཁྱོན་ཉིན་བཞིའི་རིང་འཚོགས་རྒྱུ་གཏན་འཁེལ་ཡོད་པ་རེད།
བསམ་པ་དོན་གྲུབ་ཀྱི་སྐད་ཆར་རྒྱུ་མཚན་འདུག ཚོགས་འདུའི་བརྗོད་གཞི་ལ་རང་ངོ་རང་ཤེས་དང་རང་འགན་རང་འཁུར་ཟེར་བ་ཞིག་འདུག མཐོ་རིམ་སློབ་མའི་ཚོགས་ཆེན་སྔོན་མ་དག་གི་སྐབས་སུའང་བརྗོད་གཞི་འདི་རང་རེད། སློབ་མ་ཚོས་ད་དུང་རང་ངོ་རང་ཤེས་ཀྱི་མི་འདུག་ལ་རང་འགན་ཡང་འཁུར་གྱི་མི་འདུག
ཁྱེད་རང་རིག་སློབ་པ་ཞིག་རེད། འདི་རང་ངོ་ཤེས་དགོས་པ་དེ་རེད། ཁྱེད་རང་མཐོ་རིམ་སློབ་གསོ་མྱོང་མཁན་ཚིག་རེད། འདི་རང་འགན་འཁུར་དགོས་པ་དེ་རེད། འདི་གཉིས་གཞི་རྩར་བཟུང་སྟེ་ད་གཟོད་ཕྱག་ལས་ག་རེ་གནང་དགོས་ཀྱི་འདུག ཕྲག་ཏུ་བབ་པའི་འོས་འགན་གང་ཞིག་རེད། འདི་དག་གསལ་བོ་དག་པོ་ཤེས་དགོས།
ཚོགས་འདུ་ཚོགས་ཏེ་སེམས་ལ་དྲན་ཚུལ་དང་ཁ་ནས་འཐོན་ཚད་བཤད་རྒྱུ་དང་། གྲོས་ཆོད་འདྲ་མིན་བཞག་སྟེ་ངོ་ཤེས་གྲོགས་པོ་སྒྲིག་རྒྱུ་འདི་མཐོ་རིམ་སློབ་མ་ཞིག་གི་འོས་འགན་རེད་དམ། ལྷག་པར་དུ་སྐབས་སྔོན་མའི་ཚོགས་ཆེན་དག་གི་སྐབས་སུ། མི་མང་གི་ནང་ལ་ཞུགས་ཏེ་ངོ་རྒོལ་སྐད་འབོད་རྒྱག་རྒྱུ་དང་བྱ་དགའ་གཟེངས་རྟགས་སྤྲོད་རྒྱུ་དེ་འདྲའི་གྲོས་ཆོད་བཞག་འདུག་ལ་རེ་ཟུང་ལག་བསྟར་ཡང་བྱས་སོང་། འདི་ཙམ་དང་། ཡང་ན་འདི་དག་མཐོ་རིམ་སློབ་མ་ཞིག་གི་ལས་འགན་རེད་དམ།
རེད་རེད། རྩོམ་ཡིག་འགྲན་བསྡུར་གྱི་བརྗོད་གཞི་གང་ཡིན་མིན་དང་། སུ་སུ་ལ་ཨང་དང་པོ་ཐོབ་ཡོད་མེད་དེ་ཚོ་གསལ་བོ་བཤད་དགོས་པ་གལ་ཆེན་པོ་རེད། ངས་གོ་ཐོས་ལ་བོད་ཡིག་ཐོག་གི་རྩོམ་ཡིག་འགྲན་བསྡུར་གྱི་བརྗོད་གཞི་མེར་སྲེག་དང་འབྲེལ་བའི་བོད་དོན་སྐོར་ཡིན་པ་དང་། ཨང་དང་པོ་རྩོམ་པ་པོ་སེར་ཤུལ་རིན་ཆེན་དོན་གྲུབ་ལགས་རེད་ཟེར་གྱི་འདུག དབྱིན་ཡིག་ཧ་གོ་མ་སོང་། དེ་ཚོ་ཤེས་མཁན་ཡོད་ན་གསུང་རོགས་ཞུ།
ཚོགས་ཞུགས་བ་ཚང་མར་འཚམས་འདྲི་ཞུ་རྒྱུ་ཡིན།
མ་གཞི་ཚོགས་འདུ་ཚོགས་པ་དེ་ཡག་པོ་འདུག དེ་ལས་ཀྱང་གལ་ཆེ་བ་དེ་མཐོ་རིམ་སློབ་མ་ཞིག་ཡིན་པའི་ངོས་ནས་རྩོམ་ཡིག་འགྲན་བསྡུར་ལྟའི་བའི་ཤེས་རིག་ཡོན་ཏན་གྱི་འདུ་འགོད་ཆེན་པོ་ཞིག་ཡོད་པ་ཡིན་ན་ཧ་ཅང་མིང་དོན་མཚུངས་པ་རེད་དྲན་ཡོད།
གནས་ཚུལ་ཞིབ་ཚགས་མོ་དང་ཚིག་སྦྱོར་ཧ་ཅང་བདེ་བོ་བྲིས་འདུག་ཀྱང་། སྐུ་མགྲོན་གཙོ་བོ་མཆོག་གིས་ག་རེ་གསུང་ཡོད་མེད་དང་ད་རེས་ཀྱི་ཚོགས་འདིའི་ཐོག་ཏུ་གྲོས་གཞི་གཙོ་བོ་ག་རེ་ཡོད་མེད་ཀྱི་མཛད་རིམ་མེད་པ་དེ་ཞན་སྐྱོན་ཆེན་པོ་ཞིག་ཏུ་མཐོང་ཐོང་། གསར་འགོད་པའི་ཞན་ཆ་དེ་གཉིས་ཁ་སྐོང་གནང་རྒྱུར་རེ་སྐུལ་ཞུ་བཞིན་ཡོད།