དེ་རིང་རྒྱ་ནག་སྐོར་གྱི་བགྲོ་གླེང་གི་ཉིན་མཐའ་མའི་ཐོག་དམིགས་བསལ་སྐུ་ཚབ་ཟུར་པ་རྒྱ་རིན་བློ་གྲོས་རྒྱལ་མཚན་མཆོག་གིས་རྒྱ་ནག་གི་སྲིད་འཛིན་གསར་པ་ཞཱི་ཅིན་ཕིན་གྱི་སྐབས་ལ། སྲིད་འཛིན་སྔོན་མ་ཧུའུ་ཡི་སྐབས་དང་ཅུང་མི་འདྲ་བར་བོད་རྒྱ་འབྲེལ་མོལ་ཐོག་རེ་བ་ཕྲན་བུ་ཡོད་སྐོར་གསུངས་སོང་།
གངས་སྐྱིད་སྤྱི་ཐབ་ཚོགས་ཁང་དུ་འདས་པའི་ཉིན་གསུམ་རིང་ཚོགས་པའི་རྒྱ་ནག་སྐོར་གྱི་བགྲོ་གླེང་ཚོགས་འདུ་དེ་རིང་མཇུག་བསྒྲིལ་ཡོད་ཅིང་། ཉིན་མཐའ་མའི་བགྲོ་གླེང་ཐོག་༧གོང་ས་མཆོག་གི་དམིགས་བསལ་སྐུ་ཚབ་ཟུར་པ་རྒྱ་རི་བློ་གྲོས་རྒྱལ་མཚན་མཆོག་གིས་གཏམ་བཤད་དང་ཚོགས་བཅར་བ་རྣམས་ཀྱི་དྲི་བར་ལན་འདེབས་གནང་ཡོད། ཁོང་གིས་གཏམ་བཤད་ཀྱི་ཐོག་མར། ད་ནང་ཞོགས་པར་བཀའ་ཟུར་བསོད་ནམས་སྟོབས་རྒྱལ་ལགས་སྐུ་གྲོངས་པའི་གནས་ཚུལ་ཐོས་མ་ཐག་སེམས་པ་སྐྱོ་བོ་བྱུང་ཡོད་པ་དང་། ཁོང་ནི་བོད་ཀྱི་རྩ་དོན་ཆེད་ལྷག་བསམ་རྣམ་དག་གིས་ཕྱག་ལས་གནང་མཁན་རྒྱུན་རིང་ཤོས་གྲས་ཤིག་ཡིན་སྐོར་བཅས་གསུངས་པ་དང་འབྲེལ་ཏེ། བཀའ་ཤག་གིས་གཞུང་འབྲེལ་ཐོག་སྲིད་བྱུས་ཉམས་ཞིབ་ཁང་བཙུགས་པར་སྔགས་བརྗོད་གནང་སོང་།
ཡང་ཁོང་གིས། ང་ཚོར་ག་དུས་ཡིན་ནའང་ནོར་འཁྲུལ་ཞིག་ཡོད་པ་ནི། བགྲོ་གླེང་ཚོགས་འདུ་སོགས་ཀྱི་སྐབས་སུ་རྒྱ་ནག་འཐོར་ཞིག་ཏུ་འགྲོ་རྒྱུ་ཡིན་སྐོར་བརྗོད་མཁན་རྐྱང་སྐད་གཏོང་བ་ལས། སོ་སོའི་བསལ་ཚུལ་དང་མི་མཐུན་པ་བཤད་མཁན་ཚོ་དང་རྒྱང་ཐག་རིང་པོ་བྱེད་པ་དེ་འགྲིག་གི་མེད་པ་དང་། ནམ་རྒྱུན་སོ་སོའི་བསམ་ཚུལ་དང་མཐུན་པ་ཤོད་མཁན་རྐྱང་གི་སྐད་ཆར་དགའ་མོས་དང་ཉན་འདོད་བྱེད་ཀྱི་ཡོད་པ་ནི་ནོར་འཁྲུལ་ཆེན་པོ་ཡིན་པ། བསམ་ཚུལ་མ་འདྲ་བ་དང་ཕྱོགས་གཉིས་ཀྱི་གནས་ཚུལ་ལ་ཉན་ཞིབ་བྱས་ན། སྲིད་བྱུས་ཉམས་ཞིབ་པ་ཚོ་དང་སྲིད་སྐྱོང་མཆོག དེ་བཞིན་ཆབ་སྲིད་མགོ་ཁྲིད་མཁན་ཚོར་ཕན་ཐོགས་ཆེན་པོ་འབྱུང་ངེས་ཡིན་ཞིང་། བསམ་ཚུལ་མི་མཐུན་པ་བརྗོད་མཁན་ཚོར་བདག་པོ་རྒྱག་དགོས་སྐོར་གསུངས་སོང་།
དེ་བཞིན་ཁོང་གིས་བོད་རྒྱ་འབྲེལ་མོ་བསྐྱར་གསོ་ཡོང་རྒྱུར་༧གོང་ས་མཆོག་གི་མཚན་ཐོག་ནས་མ་གཏོགས་ཡོང་ཁག་པོ་ཡིན་པ་དང་། མཚན་བྱང་ཙམ་མ་ཡིན་པར་བོད་རྒྱ་འབྲེལ་མོལ་གྱི་ལས་དོན་ཐད་ནས་ཀྱང་༧གོང་མཆོག་གི་ཐུགས་འགན་ཞིག་མེད་པར་གྲུབ་འབྲས་འཐོན་དཀའ་བ། དེ་ནི་༧གོང་ས་མཆོག་ལ་ཆབ་སྲིད་ཀྱི་འགན་དབང་ཡོད་མེད་ཀྱི་གནད་དོན་ཞིག་མིན་པར། བོད་རྒྱའི་གནད་དོན་ཐག་གཅོད་ཐད་རྒྱ་བོད་ཕྱོགས་གཉིས་གང་ཐད་ནས་༧གོང་ས་མཆོག་མེད་ཐབས་མེད་སྐོར་གསུངས་སོང་།
མཇུག་ཏུ་ཚོགས་ཞུགས་པ་དག་དང་དྲི་བ་དྲིས་ལན་གྱི་སྐབས་སུ་ཁོང་གིས། རྒྱ་ནག་གི་དཔོན་རིགས་ཁྲོད་བོད་ཀྱི་དཀའ་རྙོག་སེལ་རྒྱུ་ནི་རྒྱ་ནག་གི་བརྟན་བརླིང་དང་འབྲེལ་བ་ཡོད་པ་དང་། ༧གོང་ས་མཆོག་སྐུ་འཚོ་བཞུགས་རིང་བོད་རྒྱའི་གནད་དོན་ཐག་གཅོད་བྱ་རྒྱུ་ཧ་ཅང་གལ་ཆེན་པོ་ཡིན་པའི་བསལ་ཚུལ་འཛིན་མཁན་མང་པོ་ཞིག་ཡོད་སྟབས། བོད་རྒྱ་འབྲེལ་མོལ་ཐད་ཁོང་གིས་རེ་བ་ཞིག་མཐོང་གི་ཡོད་ཚུལ་གསུངས་བྱུང་།
ཚོགས་ཞུགས་པ་ཞིག་གིས་རྒྱ་ནག་དམངས་གཙོ་ཅན་དུ་གྱུར་ན་བོད་དོན་སེལ་འགྲོ་བའི་བསམ་ཚུལ་ཡོང་གི་ཡོད་པའི་ཐོག་གཟིགས་ཚུལ་གང་འདྲ་ཡོད་མེད་དྲིས་པའི་ལན་དུ། རང་ཉིད་ཀྱིས་རྒྱ་ནག་དམངས་གཙོ་ཅན་དུ་གྱུར་ན་བོད་ཀྱི་གནད་དོན་སེལ་ཐུབ་པའི་རེ་བ་ཞིག་མཐོང་གི་མེད་པ་དང་། དུས་ཡུན་གྱི་ཆ་ནས་ཀྱང་བོད་ཀྱི་གནད་དོན་སེལ་རྒྱུ་དེ་རྒྱ་ནག་དམངས་གཙོ་ཅན་དུ་འགྱུར་པར་སྒུག་སྡོད་རྒྱུ་ནི་ངེས་གཏན་མེད་པ་དང་རིང་དྲགས་པ་ཞིག་ཡིན་པའི་ལན་འདེབས་གནང་སོང་།
ཡང་རྒྱ་ནག་གི་མགོ་ཁྲིད་འཕོ་འགྱུར་གྱི་སྐབས་འདིར་བོད་རྒྱ་འབྲེལ་མོལ་ལ་རེ་མཐོང་གི་ཡོད་མེད་དྲིས་པའི་ལན་དུ། ཅིང་ཙི་མེན་ནི་ཅུང་གུ་ཡངས་ཀྱི་ལྟ་བ་འཛིན་མཁན་དང་བོད་ཀྱི་གནད་དོན་ཐོག་དོ་སྣང་ཡོད་མཁན་ཞིག་ཡིན་པ་མ་ཟད། ཁོང་གི་སྐབས་སུ་བོད་རྒྱ་ཞི་མོལ་ལ་མཐོང་ཆེན་གྱིས་སྐུ་ཚབ་ཚོ་རྒྱ་ནག་ཏུ་ཕྱིན་སྐབས་རྒྱ་ནག་གི་མགོ་ཁྲིད་ཚོར་ཐུག་འཕྲད་ཡག་པོ་ཡོང་གི་ཡོད་ཀྱང་། ཧུའུ་ཅིན་ཐའོ་དེ་ལས་ལྡོག་སྟེ་ལྟ་བ་མཁྲེགས་འཛིན་བྱེད་མཁན་ཞིག་ཡིན་པ་མ་ཟད། ཁོའི་སྐབས་སུ་རྦད་དེ་སྒོ་བརྒྱབ་ནས་འཐབ་ཕྱོགས་གཅིག་གྱུར་ཁང་གི་མི་སྣ་ལས་ཐུག་འཕྲད་བྱེད་བཅུག་མེད་པ། ཞཱི་ཅིན་ཕིན་གྱིས་ད་སྔ་ཕྱི་ཕྱོགས་ལ་འབྲེལ་བ་བྱེད་སྟངས་ལ་བལྟས་ན་ཅིང་ཙི་མེན་གྱི་གཤིས་ཀ་འདྲ་བོ་ཞིག་མཐོང་གི་ཡོད་པ་དང་། ཧུའུ་ཅིན་ཐའོ་ལས་ད་ལྟའི་མགོ་ཁྲིད་ཞཱི་ཅིན་ཕིན་གྱི་སྐབས་སུ་བོད་རྒྱ་འབྲེལ་མོལ་ལ་རེ་བ་ཞིག་མཐོང་གི་ཡོད་སྐོར་གསུངས་སོང་།
གསར་འགོད་པས་ཐེངས་འདིའི་བགྲོ་གླེང་ཐོག་གཏམ་བཤད་གནང་མཁན་ལྡི་ལི་ནེ་རོ་སློབ་ཆེན་དུ་འབུམ་རམས་པར་སློབ་གཉེར་བྱེད་མཁན་བློ་བཟང་དབྱངས་མཚོ་ལགས་སུ། བོད་ཀྱི་སྲིད་བྱུས་ཉམས་ཞིབ་ཁང་གི་སྐོར་ལ་བཅར་འདྲི་ཞུས་པར་ཁོང་མོས། ཉམས་ཞིབ་པ་དག་ལ་མཚོན་ན་འབུམ་རིམ་པ་སོགས་སློབ་སྦྱོང་མཐོ་བོ་ཐོན་པ་དེ་འདྲ་རེད་དྲན་མ་སོང་ཚུལ་དང་། ཉམས་ཞིབ་པ་བསྡུ་སྟངས་ཐད་ནས་ཀྱང་ཆེད་དུ་ཡིག་རྒྱུགས་བཏང་སྟེ་ལས་བགོས་བརྒྱབ་པ་དེ་འདྲ་མིན་ཡང་། སློབ་སྦྱོང་དང་ཉམས་མྱོང་བསགས་ན་རིམ་པས་ཡར་རྒྱས་འགྲོ་བ་དང་། མ་འོངས་པར་ལས་གཞི་འདིར་གྲུབ་འབྲས་གང་འཚམ་འཐོན་རེ་ཡོད་སྐོར་བརྗོད་བྱུང་།
དྲྭ་གྲོགས་ཚོ། བཙན་བྱོལ་སྒྲིག་འཛུགས་དང་། རྒྱ་རི་བློ་གྲོས་གཅིག་པུར་མདུང་རྩེ་མ་གཏོད། ཁོང་ཚོ་ཚང་མ་གཞན་དབང་སྟབས་བསྟུན་རེད། རྒྱ་ནག་གི་ངོས་ནས་དོ་ཁུར་དང་ཁས་ལེན་མ་བྱས་ན་ཁོང་ཚོར་བྱེད་ཐབས་རང་བཞིན་གྱིས་བྲལ་ལོ།
ཆབ་སྲིད་པ་ཞེས་པ་ནི་དངོས་གནས་རྒྱུས་མངའ་ལོ་རྒྱུས་ནི་དེ་བས་དཀའ་བའི་གནད་རང་རེད་འདུག ད་ཆ་བོད་དོན་འདི་ནི་སེལ་རྒྱུར་ལོ་རྒྱུན་ག་ཚོད་འགོར་སུ་ཀྱང་བརྗོད་དཀའ་བ་ཞིག་ཡིན་ངེས། ལྟོས་དང་གཅིག་གི་ཞྭ་མོ་གཅིག་ལ་བསྐོན་བཞིན་བཞིན་བོད་གཞུགས་དཔའ་བོ་དཔའ་མོའི་རྣམ་ཤེས་གང་དུ་འདྲེན་མིན་ཆ་མ་འཚལ། སྔ་མོའི་བོད་རྒན་གཏམ་དཔེ་རྒྱ་འདོགས་པས་ཕུང། བོད་རེ་བས་ཕུང་ཞེས་པའི་གཏམ་དཔེ་དེས་ཅི་མི་བདེན།
རྒྱ་རི་རིན་པོ་ཆེ་མཆོག་ད་སྐབས་དམིགས་བསལ་སྐུ་ཚབ་ཡིན་པ་ཡིན་ན་ཁོང་གིས་ཁ་སང་གི་བཀའ་མོལ་དེ་གནང་ཡོད་པ་མ་རེད། ཧོ་ཅིན་ཐོ་དང་རྒྱ་རི་རིན་པོ་ཆེ་གཉིས་ཀྱི་ལས་ཡུན་སྐབས་གཅིག་ལ་འཁེལ་ཡོད་པ་རེད། སྐབས་དེར་བོད་རྒྱའི་འབྲེལ་མོལ་ཐོག་གྲུབ་འབྲས་གང་ཡང་སོན་ཡོད་པ་མ་རེད། ནོར་འཁྲུལ་དང་འཐུས་ཤོར་དུས་འགྱངས་ཡོངས་རྫོགས་ཀྱི་འགན་དེ་རྒྱ་ནག་སྲིད་འཛིན་གྱི་མགོ་ལ་གཡོག་གི་ཡོད་པ་རེད། སྤྱིར་བཏང་འདི་དག་ཚང་མ་རྒྱ་གཞུང་ལ་འགན་ཡོད་པ་ཞིག་རེད་མོད། འོན་ཀྱང་སོ་སོའི་ཕྱོགས་ནས་མ་འབྱོན་པ་དེ་ཡང་ཁ་བསངས་པོས་བཤད་དགོས་པ་རེད། ངོས་ལེན་བྱ་དགོས་པ་རེད།
དྲ་བདག་དང་དྲ་མཆན་མཆན་གཟིགསམཁན་ཡངས་ལ་དགོངས་སེལ་ཞུ། གོང་གསལ་གུས་རང་གིས་བྲིས་པའི་མཆན་དེར་ཡིག་ནོར་མང་པོ་ཤོར་འདུག་པར་ནོར་བཅོས་གཤམས་གསལ་བཞིན་བཅོས་རོགས།
༡་་་་་མོས་མཐུན་གང་ཡང་མེད་་་་་༢སྔར་བཞིན་རྒྱ་ནག་སྲིད་གཞུང་གིས་ཆབ་སྲིད་་་་་༣་་་་་་་་་་་་
བོད་པ་ཚོར་རྒྱ་ནག་གི་སྐོར་ལ་བགྲོ་གླེང་བྱེད་རྒྱུ་ཅང་ལྷག་མེད། བོད་པ་ཚོས་བོད་པ་རང་ངོས་ནས་ལངས་ཕྱོགས་བརྟན་པོ་དང་། ཁ་ཕྱོགས་གསལ་པོ། ལས་དོན་འཁྱུག་མེད་ཅིག་བྱ་རྒྱུ་དེ་གལ་ཆེ་ཤོས་ཡིན། ད་ལྟ་བར་དུ་བོད་མི་མང་ལ་མགོ་སྐོར་འདྲ་བོ། བོད་དོན་ཐད་ཕན་ནུས་གང་ཡང་མེད་པ་འདི་འདྲ་རྐྱང་རྐྱང་བྱས་ནས་རྩ་ཆེའི་དུས་ཚོད་རྣམས་བསྐྱལ་བ་རེད། བགྲོ་གླེང་འདི་ནི་རྒྱ་ནག་གི་སྲིད་ཇུས་ཀྱི་ཁ་གསལ་གཏིང་གསལ་གྱི་ཆ་ལ་རྒྱུས་ལོན་དང་གོ་རྟོགས་མེད་པའི་མཚོན་བྱེད་རང་རེད་ཟེར། སྡུག་སྐད་འདི་ལ་མོ་མཐུན་གང་མེད། འདས་པའི་ལོ་ངོ་མང་པོའི་རིང་དུ་༧གོང་ས་ཡིད་བཞིན་ནོར་བུའི་དབུས་བོད་མིའི་རྒན་རབ་པ་དག་གིས་འབད་པར་ལྷོད་མེད་གནང་བར་ཡིད་རངས་དང་། ཁོང་ཚོས་བཀའ་དྲིན་དུས་ནམ་བརྗེད་མི་རུང་། ད་དུང་ཡང་སྔར་བཞིན་རྒྱ་ཁག་ཆབ་སྲིད་དང་རྒྱ་སྤྱིའི་གནས་བབ་སོགས་ལ་ཡང་ཡང་དཔྱད་ཞིབ་གཞིར་བཟུང་ཐོག་སྔར་བཞིན་འབད་བརྩོན་བཞིན་པར་རྒྱབ་སྐྱོར་ཡོད། དེ་སྔར་གཞུང་གིས་མི་མང་མགོ་བསྐོར་བཏང་ཚུལ་བཤད་པ་ནི་རྒྱུ་མཚན་མེད་པས་ཉོག་གཏམ་དང་དཀྲུགས་ཤིང་ཁོ་ན་ལས་མ་འདས། ཡང་ན་སོ་སོའི་མ་ཤེས་ནས་མགོ་བོ་རྨོངས་པར་གཞན་གྱིས་མགོ་བོ་བསྐོར་བར་ངོས་འཛིན་ཡིན་ན་ནི་ཁག་མེད། ད་དུང་མིག་རྒྱང་རིང་ཙམ་བྱོས། དེ་མིན་དུས་ཚོད་མ་ཆོད་པའི་བཟོ་འདྲ་བཟོས་ནས་ཡིག་ཉོག་སྤེལ་ནས་ཅི་བྱེད། སྙིང་འདྲ་ཡང་རྗེ་གྱིན་འདུག་མི་ངན་འདི་དག་ལ་སྐབས་རེ་་་་་་་་་་་་་་་་་་་་་་་་
་་་་ ཧུའུ་ཅིན་ཐའོ་དེ་ལས་ལྡོག་སྟེ་ལྟ་བ་མཁྲེགས་འཛིན་བྱེད་མཁན་ཞིག་ཡིན་པ་མ་ཟད། ཁོའི་སྐབས་སུ་རྦད་དེ་སྒོ་བརྒྱབ་ནས་འཐབ་ཕྱོགས་གཅིག་གྱུར་ཁང་གི་མི་སྣ་ལས་ཐུག་འཕྲད་བྱེད་བཅུག་མེད་པ། ཞཱི་ཅིན་ཕིན་གྱིས་ད་སྔ་ཕྱི་ཕྱོགས་ལ་འབྲེལ་བ་བྱེད་སྟངས་ལ་བལྟས་ན་ཅིང་ཙི་མེན་གྱི་གཤིས་ཀ་འདྲ་བོ་ཞིག་མཐོང་གི་ཡོད་པ་དང་། ཧུའུ་ཅིན་ཐའོ་ལས་ད་ལྟའི་མགོ་ཁྲིད་ཞཱི་ཅིན་ཕིན་གྱི་སྐབས་སུ་བོད་རྒྱ་འབྲེལ་མོལ་ལ་རེ་བ་ཞིག་མཐོང་གི་ཡོད་སྐོར་གསུངས་སོང་། ་་་ཟེར།
རྒྱ་ནག་གི་དོན་དག་ནི་རྒྱ་ཕྱོགས་ནས་སྲ་ཐག་ཆོད་ཅིག་བྱེད་ཀྱིན་ཡོད་པས། བོད་པ་ཚོར་རྒྱ་ནག་གི་སྐོར་ལ་བགྲོ་གླེང་བྱེད་རྒྱུ་ཅང་ལྷག་མེད། བོད་པ་ཚོས་བོད་པ་རང་ངོས་ནས་ལངས་ཕྱོགས་བརྟན་པོ་དང་། ཁ་ཕྱོགས་གསལ་པོ། ལས་དོན་འཁྱུག་མེད་ཅིག་བྱ་རྒྱུ་དེ་གལ་ཆེ་ཤོས་ཡིན། ད་ལྟ་བར་དུ་བོད་མི་མང་ལ་མགོ་སྐོར་འདྲ་བོ། བོད་དོན་ཐད་ཕན་ནུས་གང་ཡང་མེད་པ་འདི་འདྲ་རྐྱང་རྐྱང་བྱས་ནས་རྩ་ཆེའི་དུས་ཚོད་རྣམས་བསྐྱལ་བ་རེད། བགྲོ་གླེང་འདི་ནི་རྒྱ་ནག་གི་སྲིད་ཇུས་ཀྱི་ཁ་གསལ་གཏིང་གསལ་གྱི་ཆ་ལ་རྒྱུས་ལོན་དང་གོ་རྟོགས་མེད་པའི་མཚོན་བྱེད་རང་རེད།