བོད་མི་ཞིག་ལ་ཁྲིམས་ཆད།

རྒྱ་གཞུང་གིས་འབའ་རྫོང་གི་ཞི་རྒོལ་སྐབས་འཛིན་བཟུང་བྱས་པའི་བོད་མི་ཞིག་ལ་ལོ་གཅིག་དང་ཟླ་དྲུག་གི་བཙོན་འཇུག་ཁྲིམས་ཐག་བཅད་འདུག

 འདི་ལོའི་ཕྱི་ཟླ་ ༣ ཚེས་ ༡༤ དང་ ༡༥ བཅས་ཉིན་གཉིས་རིང་བོད་མདོ་སྨད་མཚོ་སྔོན་ཞིང་ཆེན་མཚོ་ལྷོ་ཁུལ་འབའ་རྫོང་དུ། འབའ་ཤིང་ཁྲི་དགོན་པའི་དགེ་འདུན་པ་དང་ས་གནས་མི་མང་གིས། རྒྱ་གཞུང་གི་དྲག་གནོ་དབང་བསྒྱུར་སྲིད་ཇུས་ལ་ངོ་རྒོལ་བྱས་ཡོད་པ་དང་། གནས་ཚུལ་དེར་རྐྱེན་བྱས་ཏེ་རྒྱ་གཞུང་གིས་སྔ་ཕྱིར་ཤིང་ཁྲི་དགོན་པའི་དགེ་འདུན་པ་ ༡༠ གཙོས་བོད་མི་ཁག་ཅིག་འཛིན་བཟུང་གིས་ཁྲིམས་ཆད་དང་ཁག་ཅིག་བཀག་ཉར་བྱས་ཡོད་པ་ལྟར། ཉེ་ལམ་སྐབས་དེར་འཛིན་བཟུང་བྱས་པའི་བོད་མི་ཁག་ཅིག་ཀློད་གྲོལ་བཏང་ཡོད་ཀྱང་། དབུ་འཁྱུད་པར་ཁང་གི་སྦྱིན་བདག་ཚེ་རིང་དབང་རྒྱལ་ལགས་ལ་ལོ་ ༡ དང་ཟླ་ ༦ བཙོན་འཇུག་ཁྲིམས་ཐག་བཅད་འདུག  

བཙན་བྱོལ་ཏུ་ཡོད་པའི་ཁོང་གི་ཉེ་འབྲེལ་ཞིག་གིས་གསར་ལམ་དུ་བརྗོད་པ་ལྟར་ན། རྒྱ་ནག་གཞུང་གིས་རང་ལོ་ ༣༦ ཡིན་པའི་ཚེ་རིང་དབང་རྒྱལ་ལགས། སྐབས་དེའི་ལས་འགུལ་གྱི་སྣེ་འཁྲིད་པ་ཡིན་པའི་ཉེས་མིང་འོག་ཕྱི་ཚེས་ ༡༥ ཉིན་འཛིན་བཟུང་བཙན་འཁྲིད་བྱས་ཏེ། བདུན་ཕྲག་གཅིག་རིང་བཀག་ཉར་འདྲི་བརྩད་བྱས་རྗེས་ཀློད་གྲོལ་བཏང་ཡོད་ཀྱང་། ཉིན་གཉིས་ཀྱི་རྗེས་སུ་ཡང་བསྐྱར་འཛིན་བཟུང་གིས་ཟླ་ ༩ ལྷག་གི་བཀག་ཉར་བྱས་ཡོད་འདུག ཕྱིས་སུ་རྒྱ་གཞུང་གིས་ཁོང་ལ་ལོ་ ༢ ནས་ ༣ བར་གྱི་ཁྲིམས་ཐག་གཅོད་རྒྱུ་ཡིན་པའི་གནས་ཚུལ་གོ་འཕྲལ། ཕྱི་ཟླ་ ༥ བའི་ཚེས་ ༢༠ ཉིན་ཁོང་གི་ནང་མིས་རྒྱ་ནག་ནང་ཁུལ་ནས་ཁྲིམས་རྩོད་པ་གཉིས་གླས་ཡོང་སྟེ་གཞུང་ལ་ཁྲོམས་རྩོད་བྱས་ཡོད་ཀྱང་། གྲུབ་འབྲས་མ་བྱུང་བར་ཕྱི་ཟླ་ ༡༢ ཚེས་ ༢༡ ཉིན་ཁོང་ལ་སྐབས་དེའི་ལས་འགུལ་སྣེ་འཁྲིད་མཁན་ཡིན་པའི་ཉེས་མིང་འོག་ཁྲིམས་ཐག་བཅད་ཡོད་འདུག

གནས་ཚུལ་ཡོང་ཁུངས་གཞན་ཞིག་གིས་བརྗོད་ན། ཚེ་རིང་དབང་རྒྱལ་ལགས་ལ་ཁྲིམས་ཐག་བཅད་རྗེས་འབའ་རྫོང་དུ་བཀག་ཉར་བྱས་ཡོད་པ་དང་། བདུན་ཕྲག་གཅིག་གི་རྗེས་སུ་ས་གནས་གཞན་དུ་འཁྲིད་རྒྱུ་ཡིན་འདུག

ཚེ་རིང་དབང་རྒྱལ་ལགས་ནི། མཚོ་ལྷོ་ཁུལ་འབའ་རྫོང་རྨ་བྱང་ཤང་གཡུ་སྔོགས་གྲོང་སྡེ་བྲག་དམར་རུ་ཁག་ནས་ཡིན་པ་དང་། མ་མིང་ལ་གཡང་ཁོ་དང་བཟའ་ཟླའི་མིང་ལ་རིག་གསེར་མཚོ་འབོད་ཀྱི་ཡོད་འདུག་ལ། ད་དུང་ཁོང་གི་ཁྱིམ་དུ་ལོ་ ༩༠ ཞིང་མིག་གཉིས་ལོང་བ་ཡིན་པའི་ཨ་ནེ་བསྟན་འཛིན་སྒྲོལ་མ་འབོད་པ་ཞིག་ཀྱང་ཡོད་འདུག ཉེ་ཆར་ཁོང་འཛིན་བཟུང་བྱས་རྗེས་རྒྱ་གཞུང་གིས་ཁོང་གི་ཁྱིམ་ལ་སྔོག་བཤེར་བྱས་པ་མ་ཟད། གློག་ཀླད་གཉིས་དང་ཅ་དངོས་སོགས་གཞུང་བཞེས་བཏང་ཡོད་འདུག