ཉེ་ཆར་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲོག་འོག རྒྱ་གར་དང་བལ་ཡུལ་ནང་གི་བོད་པའི་སློབ་གྲྭའི་འཛིན་རིམ་བཅུ་གཅིག་གི་སློབ་མ་ཚོར་ཉིན་དགུའི་རིང་བཙན་བྱོལ་བོད་མིའི་དམངས་གཙོ་དང་བོད་ནང་གི་དངོས་ཡོད་གནས་སྟངས་བཅས་ཀྱི་ཐོག་ཟབ་སྦྱོང་ཞིག་སྤྲད་པ་དང་བསྟུན། གསར་འགོད་པས་བལ་ཡུལ་དང་བཀའ་རྡོར་སྒང་གསུམ་གྱི་སློབ་ཕྲུག་ཁག་ཅིག་དང་གླེང་མོལ་བྱས་ཡོད།
སློབ་བུ་པདྨ་འགྱུར་མེད་ལགས་ནི་བལ་ཡུལ་དོལ་པོའི་ཡུལ་མིའི་ཁྱིམ་ཚང་ཞིག་ཏུ་སྐྱེས་ཤིང་། ད་ཆར་བལ་ཡུལ་རྣམ་རྒྱལ་མཐོ་སློབ་ཀྱི་ཧི་མ་ལ་ཡའི་རི་རྒྱུད་ཀྱི་སློབ་ཕྲུག་གི་ཁོངས་སུ་སློབ་སྦྱོང་བྱེད་ཀྱིན་ཡོད་འདུག ཁོང་གིས་བོད་སྐད་བསྐྱོན་པའི་ཚིག་གི་སྨྲ་བོད་མི་གཙང་མ་ཞིག་ལས་དག་ཅིང་། ཁོང་གིས་བརྗོད་པ་ལྟར་ན་རྣམ་རྒྱལ་མཐོ་སློབ་ནང་སྔོན་འགྲོ་ནས་འཛིན་རིམ་ ༡༢ པར་ཁྱོན་སློབ་ཕྲུག་ ༤༢༠ ཙམ་ཡོད་པ་ལས། ད་ཆར་ཕྱེད་ཀ་ཧི་མ་ལ་ཡའི་རི་རྒྱུད་ཀྱི་ཕྲུ་གུ་ཡིན་འདུག་པ་དང་། དགེ་རྒན་ཡང་ཕྱེད་ཙམ་བལ་ཡུལ་གྱི་ཡུལ་མི་ཆགས་ཡོད་འདུག
ཁོང་ལ་བལ་ཡུལ་གྱི་ཕྲུ་གུ་ཚོ་བོད་པའི་སློབ་གྲྭར་འཛུལ་དོན་གང་ཡིན་དྲིས་པར། “ང་ཚོ་བལ་ཡུལ་གྱི་ཆ་ཤས་ཤིག་ཆགས་ཡོད་ཀྱང་ཆོས་དང་རིག་གཞུང་། སྐད་ཡིག གོམས་གཤིས་སོགས་བོད་པ་དང་གཅིག་པ་རེད། དེར་བརྟེན་མང་པོ་ཞིག་གིས་བོད་པའི་སློབ་གྲྭར་འགྲོ་རྒྱུར་དགའ་བོ་བྱེད་ཀྱི་ཡོད་པ་རེད། ང་རང་སྐྱེས་ས་ལྟ་བུར་མཚོན་ན་བོད་སྐད་ལས་བལ་ཡུལ་སྐད་ཤེས་མཁན་དཀོན་པོ་རེད། རོང་པའི་སློབ་གྲྭར་འགྲོ་རྒྱུར་ཉོབ་སྣང་བྱེད་ཀྱི་ཡོད་པ་རེད”ཅེས་བརྗོད་བྱུང་།
ཡང་ཁོང་ལ་ཧི་མ་ལ་ཡའི་རི་རྒྱུད་ཀྱི་ཕྲུ་གུ་ཚོས་བོད་ཡིག་སྦྱང་རྒྱུར་དཀའ་ངལ་འཕྲད་ཀྱི་ཡོད་མེད་དྲིས་པར་ཁོང་གིས། “དང་པོ་སློབ་གྲྭར་ཡོང་མ་ཐག་ཚང་མར་དཀའ་ངལ་ཏོག་ཙམ་རེ་འཕྲད་ཀྱི་ཡོད་ཀྱང་། སློབ་ཕྲུག་རྒན་པ་ཚོས་སློབ་ཕྲུག་གསར་པ་ཚོར་བོད་སྐད་བོད་ཡིག་ཐོག་དམིགས་བསལ་སྦྱོང་བརྡར་སྤྲོད་ཀྱི་ཡོད་པ་རེད། སློབ་གྲྭ་ནས་ཐོན་འགྲོ་ཁར་ཁོང་ཚོ་བོད་ཡིག་ཡག་པོ་ཆགས་ཀྱིན་འདུག ཡིག་རྒྱུགས་ཀྱི་གྲུབ་འབྲས་དང་ནམ་རྒྱུན་གྱི་འབྲི་ཀློག་སོགས་བོད་ཕྲུག་ཚོ་ལས་ཧི་མ་ལ་ཡའི་རི་རྒྱུད་ཀྱི་ཕྲུ་གུ་ཚོ་ཡག་པོ་ཡོང་གི་འདུག་”ཟེར་།
རྣམ་རྒྱལ་མཐོ་སློབ་ཀྱི་སློབ་ཕྲུག་འཆི་མེད་དབང་མོ་ནི་བལ་ཡུལ་སྤོག་ར་བོད་མིའི་གཞིས་ཆགས་ནས་ཡིན་པ་དང་། འཛིན་རིམ་བཅུ་བར་པོག་ར་སློབ་གྲྭ་ནས་སློབ་སྦྱོང་བྱས་རྗེས་རྣམ་རྒྱལ་སློབ་གྲྭར་ཡོང་འདུག ཁོ་མོས་བརྗོད་པ་ལྟར་ན། རྣམ་རྒྱལ་སློབ་གྲྭའི་སློབ་ཕྲུག་སྤྱིའི་ཆ་ནས་བོད་ཡིག་ལ་དོ་སྣང་ཆེ་བ་དང་། ལྷག་པར་དུ་ཧི་མ་ལ་ཡའི་རི་རྒྱུད་ཀྱི་ཕྲུ་གུ་ཚོ་བོད་ཡིག་ལ་དོ་སྣང་ཤུགས་ཆེ་བ་ཡོད་འདུག མོ་རང་ཉིད་ལ་མཚོན་ན་དབྱིན་ཡིག་དང་བལ་ཡུལ་ཡི་གེ བོད་ཡིག་གསུམ་ལས་བོད་ཡིག་འབྲི་ཀློག་སླ་པོ་འདུག་ཟེར།
ཁོ་མོར་ནམ་རྒྱུན་སློབ་ཕྲུག་ཚོས་དབྱིན་སྐད་དང་བལ་ཡུལ་སྐད། བོད་སྐད་གསུམ་ལས་ཤུགས་ཆེ་བ་གང་བཤད་ཀྱི་ཡོད་མེད་དྲིས་སྐབས། སློབ་གྲྭའི་ནང་ཚང་མས་བོད་སྐད་རྐྱང་འཆད་ཀྱི་ཡོད་པ་དང་། གལ་སྲིད་བལ་སྐད་བཤད་ན་དགེ་རྒན་ཚོས་བཀའ་སྐྱོན་གཏོང་གི་རེད་ཟེར།
པོག་ར་ཨེ་སི་ཨོ་ཨེ་སི་སློབ་གྲྭའི་སློབ་བུ་བསྟན་འཛིན་བུ་བཟང་ནི་པོག་ར་བོད་མིའི་གཞིས་ཆགས་ནས་ཡིན་འདུག ཁོང་གིས་བརྗོད་པ་ལྟར་ན། སྤོག་ར་ཨེ་སི་ཨོ་ཨེ་སི་སློབ་གྲྭར་སློབ་ཕྲུག་ ༥༠༠ ལྷག་ཡོད་ཅིང་། འཛིན་རིམ་བཅུ་གཅིག་དང་བཅུ་གཉིས་ནང་བོད་ཕྲུག་དང་རོང་པ་གཉིས་ཕྱེད་ཀ་ཕྱེད་ཀ་ཆགས་ཡོད་པ་དང་། དེ་ནི། འཛིན་རིམ་བཅུ་བ་ཐོན་རྗེས་བོད་པའི་སློབ་ཕྲུག་མང་པོ་ཞིག་སློབ་གྲྭ་གཞན་ལ་འགྲོ་ཡི་ཡོད་སྟབས། ས་མིག་མི་སྟོང་ཆེད་རོང་པ་ལེན་གྱི་ཡོད་པ་དང་། འཛིན་རིམ་བཅུ་བ་མར་འདབས་ཀྱི་སློབ་ཕྲུག་བརྒྱ་ཆ་ ༩༠ ཙམ་བོད་ཕྲུག་རྐྱང་ཡིན་འདུག སྤྱི་ཡོངས་ནས་བཤད་ན་དབྱིན་ཡིག་ལ་དབྱིངས་ཡོད་མཁན་མང་བ་ཡིན་པར་བརྗོད་བྱུང་ལ། སློབ་གྲྭའི་ལས་བྱེད་དང་དགེ་རྒན་ཕྱེད་ཀ་བོད་དང་ཕྱེད་ཀ་ཡུལ་མི་ཆགས་ཡོད་འདུག
ཡང་ཁོང་ལ་སློབ་གྲྭའི་ནང་ཆབ་སྲིད་ལས་འགུལ་རིགས་སྤེལ་གྱི་ཡོད་མེད་དྲིས་པར། གཟའ་ལྷག་པའི་༧གོང་ས་མཆོག་གི་བླ་གཟའི་ཉིན་ཞོགས་པར་བསང་གསོལ་ཞལ་འདོན་རིགས་འཆར་ཅན་ཡིན་པ་ལས། ལྷག་དཀར་ལས་འགུལ་སོགས་ཆབ་སྲིད་ལས་འགུལ་རིགས་སྤེལ་གྱི་མེད་པ་དང་། བོད་ནང་གི་གནས་ཚུལ་ཛ་དྲག་ཆགས་པ་སོགས་བྱུང་ཚེ། ས་གནས་བཀྲ་ཤིས་གླིང་བོད་མིའི་གཞིས་ཆགས་ཀྱི་ལས་འགུལ་ནང་མཉམ་ཞུགས་བྱེད་ཀྱི་ཡོད་པ་ལས། སློབ་གྲྭ་རང་གི་ངོས་ནས་ཆབ་སྲིད་ལས་འགུལ་རིགས་སྤེལ་གྱི་མེད་ཟེར།
སྤོག་ར་ཨེ་སི་ཨོ་ཨེ་སི་སློབ་གྲྭའི་སློབ་ཕྲུག་ཀརྨ་སྒྲོལ་མ་ནི་པོག་ར་བྱམས་པ་གླིང་བོད་མིའི་གཞིས་ཆགས་ནས་ཡིན་འདུག ཁོ་མོས་ “ང་རང་ནམ་རྒྱུན་དབྱིན་ཡིག་གི་དེབ་ཀློག་རྒྱུར་དགའ་བོ་ཡོད། འབྲི་ཀློག་ཀྱང་དབྱིན་ཡིག་སླ་བ་འདུག འོན་ཀྱང་། ཨ་མས་ང་ལ་བོད་ཡིག་ཡག་པོ་སྦྱོང་ཟེར་གྱི་འདུག ”ཅེས་དང་། རྗེས་མ་བོད་པའི་སྤྱི་ཚོགས་ནང་ལས་ཀ་བྱ་འདོད་ཡོད་ཟེར། ཁོ་མོར་འཛིན་གྲྭ་ ༡༢ ཐོན་རྗེས་ག་རེ་བྱ་འཆར་ཡོད་མེད་དྲིས་སྐབས། བལ་ཡུལ་ནས་འཛིན་རིམ་ ༡༢ ཐོན་རྗེས་སློབ་ཕྲུག་མང་ཆེ་བ་རྒྱ་གར་ནང་མཐོ་སློབ་འཚོལ་དུ་འགྲོ་བཞིན་ཡོད་པ་དང་། དེ་ནི། བལ་ཡུལ་ལས་རྒྱ་གར་ནང་གི་མཐོ་སློབ་ཐོན་པར་མཐོང་ཆེ་བ་སྤྲོད་ཀྱི་ཡོད་པས་ཡིན་སྐོར་དང་། མོ་རང་ཡང་བྱུང་ན་རྒྱ་གར་གྱི་མཐོ་སློབ་ཅིག་ཏུ་འགྲོ་འཆར་ཡོད་ཚུལ་བརྗོད་བྱུང་།
གཞན་བཀའ་རྡོར་སྒང་གསུམ་གྱི་སློབ་ཕྲུག་ཁག་ཅིག་དང་གླེང་མོལ་བྱེད་སྐབས། བཀའ་སྦུག་གཏན་སློབ་ཀྱི་སློབ་ཕྲུག་ཚེ་བརྟན་རྣམ་རྒྱལ་ལགས་ཀྱིས་སློབ་གྲྭ་ཟེར་ན་འདྲ་གང་ལྟར། བཀའ་བློན་སྦུག་དང་རྡོ་རྗེ་གླིང་སོགས་ཀྱི་བོད་མི་མང་ཆེ་བ་ཁ་འཐོར་དུ་གནས་ཡོད་པ་དང་། ལྷག་པར་དུ་ས་གནས་དེ་དག་ཏུ་རྒྱ་གར་གྱི་མི་སེར་ཡིན་མཁན་བལ་བོའི་མི་རིགས་ཤུགས་ཆེན་པོ་ཡིན་པ་དང་། ཁོ་ཚོ་བོད་པ་དང་འདྲ་བོ་ཡོད་སྟབས། བོད་ཕྲུག་ཕལ་ཆེ་བ་ཁོ་ཚོ་དང་འགྲོག་འདྲིས་བྱེད་ཀྱི་ཡོད་པ་མ་ཟད། ཁོ་ཚོའི་ཞན་ཤུགས་ཐེབས་ཏེ་བོད་སྐད་བོད་ཡིག་ལ་འཐུས་ཤོར་དང་བོད་པའི་ངོ་བོ་འགྱུར་བཞིན་ཡོད་སྐོར་ཧ་ཅང་སེམས་ཚོར་ཆེན་པོས་བརྗོད་བྱུང་།
གསར་འགོད་པ། བནྡེ་སྐྱབས།
༼བོད་ཀྱི་དུས་བབ་ཚགས་པར་ལས་འདིར་བཀོད།༽
འདིར་གསར་འགོད་པས་ངེས་པར་བཅོས་དགོས་པའི་ཆ་ཞིག་ནི། བལ་ཡུལ་རྣམ་རྒྱལ་མཐོ་སློབ་ཏུ་འཛིན་རིམ་དྲུག་པ་ནས་བཅུ་གཉིས་བར་ཡིན་པས་ལས། སྔོན་འགྲོ་ནས་བཅུ་གཉིས་བར་མིན།
མཆན་འདེབས་པོ་ཞིག་གིས་ས་རཱ་མཐོ་སློབ་ཏུ་གསར་འབྱོར་བ་ཚུད་ཀྱིན་མེད་པར་ཧི་མ་ལ་ཡ་བ་ཚོ་ལས་སླ་པོར་ཚུད་ཀྱིན་འདུག་ཟེར། དེ་ནི་མ་བརྟག་བྱུང་རྒྱལ་དུ་སྨྲས་པའི་གཏམ་ཞིག་སྟེ། ས་རཱའི་མཐོ་རིམ་རིག་གནས་འཛིན་གྲྭར་ཚུད་པར་ཤེས་ལྡན་བོད་མི་སུས་ཚུད་རྒྱུགས་ནང་བཞུགས་ནའང་འགྲིག རྒྱུགས་མ་ལོན་ཚེ་བྱ་ཐབས་མེད། དེ་ལ་དམིགས་བསལ་གང་ཡང་མེད་པས་ཤེས་དགོས་པའི་གནད་ཡིན།
ཧི་མ་ལ་ཡའི་སློབ་ཕྲུག་ཚོར་དམིགས་བསལ་གྱི་ས་དམིགས་ཤིག་ཡོད་པ་ནི་དེ་སྔོན་སྐུ་སྒེར་ཡིག་ཚང་ནས་དགོངས་པ་ཆེ་བཞེས་ཀྱིས་སློབ་ཡོན་མཐུན་འགྱུར་གནང་སྟེ། ཧི་མ་ལ་ཡའི་དགེ་རྒན་འོས་སྦྱོང་འཛིན་གྲྭ་ཚུགས་སྲོལ་ཡོད་པ་དེ་ད་མུས་ལྟར་ལས། མཆན་འདེབས་པོས་བརྗོད་པ་ལྟར་མིན་པས་ཡིད་འཇགས་འཚལ།།
བོད་ཕྲུག་ལས་ཧི་མ་ལའི་ཕྲུ་གུ་ཚོ་བོད་ཡིག་ཡག་པ་ཡོད་པའི་རྒྱུ་མཚན་གཙོ་བོ་ནི་ཧི་མ་ལའི་རི་རྒྱུད་ཀྱི་ཕྲུ་གུ་ཚོ་ལ་དམིགས་གསལ་ཆེན་པོ་ཡོད་པས་ཡིན་གྱི་རེད། དེ་སྔོན་ང་ས་ར་སློབ་གྲྭར་ཚུད་རྒྱུགས་བཏང་བར་ཕྱིན་པ་ཡིན་དེ་དུས་གསར་འབྱོར་བ་བོད་ཡིག་ལ་དོ་སྣང་ཡོད་པ་བོད་ཡིག་སྦྱང་འདོད་གྲགས་པོ་ཡོད་མཁན་མང་དག་ཞིག་ཚུད་རྒྱུགས་མ་ལོང་ནས་མང་དག་ཞིག་མིག་ཆུ་ཡང་གཏོང་གིན་འདུག། དེ་དུས་ཧི་མ་ལའི་བུ་ཕྲུག་རྣམས་ཚུད་རྒྱུགས་ཙམ་ཡང་བཏང་མི་དགོས་པར་སློབ་གྲྭ་དེར་སློབ་སྦྱོངས་བྱེད་རྒྱུའི་གོ་སྐབས་འདུག། བོད་པའི་སྐད་ཡིག་བསྲུང་སྐྱོབས་ཆེད་སྐུ་ངལ་ཚད་མེད་སྐྱོན་ནས་ཕེབས་པའི་གསར་འབྱོར་བ་ཚོར་དེ་འདྲའི་གོ་སྐབས་ཀྱང་མི་འདུག་ད་དུང་དེ་ལས་ལྡོག་ཏེ་བོད་ཕྲུག་ཚོ་ལས་ཧི་མ་ལའི་རི་རྒྱུད་ཀྱི་ཕྲུ་གུ་ཚོ་བོད་ཡིག་ཡག་པ་འདུག་ཟེར་བརྗོད་ནུས་པའི་ཡག་པོ་རེད་བརྗེས་སུ་གསར་འབྱོར་བ་ཚོར་སློབ་སྦྱོངས་ཀྱི་གོ་སྐབ་མང་ཙམ་གནང་རོགས་གནང་།།