ཧེམ་རཱ་ཇཱིའི་མགོ་ཕྱིར་ཁྱེར་ཡོང་དགོས།

ཉེ་ཆར་ཕྱི་ཚེས་ ༦ ཉིན་རྒྱ་གར་དང་པཱ་ཀི་སི་ཐན་ས་མཚམས་ནས་རྒྱ་གར་མཐའ་སྲུང་དམག་གིས་པཱ་ཀི་སི་ཐན་གྱི་དམག་གཅིག་དམར་གསོད་དང་གཅིག་ལ་རྨས་སྐྱོན་བཏང་རྗེས། ཕྱི་ཚེས་ ༨ ཉིན་པཱ་ཀི་སི་ཐན་མཐའ་སྲུང་དམག་གིས་རྒྱ་གར་མཐའ་སྲུང་དམག་ལ་དྲག་རྒོལ་བྱས་ཏེ། རྒྱ་གར་གྱི་དམག་མི་གཉིས་དམར་གསོད་བྱས་པ་མ་ཟད་གཅིག་གི་ཡན་ལག་གཅོད་འབྲེག་དང་གཞན་དེའི་མགོ་བཅད་དེ་ཁྱེར་ཡོད་ཅིང་། དོན་རྐྱེན་དེ་དག་གི་རྗེས་སུ་རྒྱ་གར་དང་པཱ་ཀི་སི་ཐན་བར་གྱི་གནས་བབ་ཛ་དྲག་ཆེ་རུ་འགྱུར་བཞིན་ཡོད།

གོང་གི་དོན་རྐྱེན་དེ་དག་ཐད་ཨ་རིའི་གཞུང་དང་མཉམ་འབྲེལ་རྒྱལ་ཚོགས་གཉིས་ཀྱིས།ཕྱོགས་གཉིས་བར་མེ་མདའ་རྒྱག་མཚམས་བཞག་སྟེ་ཞི་འགྲིག་ཐག་གཅོད་བྱ་དགོས་པའི་འབོད་སྐུལ་ཞུས་ཡོད་ཀྱང་། མཐའ་མཚམས་སུ་ཕན་ཚུན་བར་མུ་མཐུད་མེ་མདའ་རྒྱག་རེས་བྱེད་བཞིན་ཡོད་འདུག་ལ། རྒྱ་གར་མི་མང་ཁྲོད་གཞུང་གིས་པཱ་ཀི་སི་ཐན་ལ་རྒོལ་ལན་སྤྲོད་ཀྱི་མེད་པར་ངོ་རྒོལ་གྱི་ལས་འགུལ་རིགས་སྤེལ་དང་སྤེལ་མུས་སུ་ཡོད་འདུག

ཁ་སང་གཟའ་ཉི་མའི་ཉིན་བྷི་ཇི་པི་ (BJP) ཁ་གཏད་ཚོགས་པས། རྒྱ་གར་དམག་མི་གཉིས་དམར་གསོད་དང་མགོ་ལག་བཅད་པའི་དོན་རྐྱེན་བྱུང་ནས་ཉིན་དྲུག་ཙམ་འགྲོ་བཞིན་ཡོད་ཀྱང་། སྲིད་བློན་མན་མོ་ཧན་སེན་གྱིས་སྐད་ཆ་གང་ཡང་མ་བཤད་པར་ཁུ་སིམ་སིམ་ཡོད་པ་དང་གཞུང་གིས་ཁ་གསལ་གྱི་ཡ་ལན་ཅི་ཡང་སྤྲོད་ཀྱི་མེད་པར་ངོ་རྒོལ་དང་སྐྱོན་བརྗོད་བྱས་ཡོད།

ཕྱི་ཚེས་ ༨ ཉིན་དམར་གསོད་ཐེབས་མཁན་རྒྱ་གར་དམག་མི་གཉིས་ལས་སུ་ཌར་སེན་( Sudhakar Singh) གྱི་ཡན་ལག་གཅོད་འབྲེག་དང་། ཧེམ་རཱ་ཇཱི་(Hemraj) ཡི་མགོ་བཅད་དེ་ཁྱེར་ཡོད་སྟབས། ཧེམ་རཱ་ཇཱི་ཡི་བཟའ་ཟླ་ནང་མི་ཚོས་ཟས་བཅད་ངོ་རྒོལ་བྱས་ནས་ཉིན་ཉིན་དྲུག་པ་འགྲོ་བཞིན་ཡོད་པ་དང་། ད་ཆར་ཟས་རིགས་ཙམ་མ་ཟད་ཆུ་སོགས་གཤེར་ཁུའི་རིགས་ཀྱང་མ་འཐུང་པར་ཟས་བཅད་དུ་བསྡད་ཡོད་འདུག་ལ། ཁོ་ཚོས་རྒྱ་གར་སྤྱི་ཁྱབ་དམག་དཔོན་བྷེག་རམ་སེན་(Bikram Singh) དངོས་སུ་ཁོ་ཚོའི་སར་ཡོང་སྟེ། ཧེམ་རཱ་ཇཱི་ཡི་མགོ་པཱ་ཀི་སི་ཐན་གྱི་ལག་ནས་ཕྱིར་ཁྱེར་ཡོང་རྒྱུ་ཁག་ཐེག་མ་བྱས་པར་ཟས་བཅད་ངོ་རྒོལ་མཚམས་འཇོག་རྒྱུ་མིན་ཚུལ་བརྗོད་འདུག

དེ་རིང་ཕྱི་ཚེས་ ༡༤ ཉིན་རྒྱ་གར་སྤྱི་ཁྱབ་དམག་དཔོན་བྷེག་རམ་སེན་གྱིས་བསྒྲགས་གཏམ་ཞིག་སྤེལ་ཏེ། པཱ་ཀི་སི་ཐན་གྱིས་དམག་མི་ས་མཚམས་བརྒལ་ཏེ་རྒྱལ་གར་གྱི་དམག་མིའི་སྟེང་དྲག་རྒོལ་བྱས་པ་དང་། ལྷག་པར་དུ་དམར་གསོད་ཐེབས་མཁན་གྱི་ཡན་ལག་གཅོད་འབྲེག་དང་མགོ་བཅད་དེ་ཁྱེར་པ་ནི་གུ་ཡངས་གཏོང་ཐབས་མེད་པ་དང་ནམ་ཡང་བཟོད་སྒོམ་བྱ་ཐབས་བྲལ་བ་ཞིག་ཡིན་སྐོར། པཱ་ཀི་སི་ཐན་ལ་ཡ་ལན་གང་འདྲ་སྤྲོད་མིན་གྱི་ཐག་གཅོད་ནི་གཞུང་གི་ལག་ཏུ་ཡོད་ཀྱང་། མཐའ་མཚམས་སུ་ཡང་བསྐྱར་པཱ་ཀི་སི་ཐན་ཕྱོགས་ནས་དྲག་རྒོལ་བྱུང་པ་ཡིན་ན། ཁོ་ཚོས་མཐའ་གཅིག་ཏུ་ཕར་རྒོལ་བྱ་རྒྱུ་ཡིན་སྐོར་བརྗོད་འདུག

ཡང་ཁོང་གིས་ཧེམ་རཱ་ཇཱི་ཡི་བཟའ་མི་ཚོའི་སེམས་ཚོར་ལ་བསམ་ཤེས་བྱེད་ཐུབ་པ་ཞིག་ཡིན་པ་དང་། དཔའ་བོའི་ནང་མིར་ཕྱོགས་གང་ཐད་ནས་རོགས་རམ་ཞུ་ངེས་ཡིན་པ། ཕྱི་འབྲེལ་བརྒྱུད་ཧེམ་རཱ་ཇཱི་ཡི་མགོ་ཕྱིར་ནང་མིར་རག་ཐབས་བྱ་རྒྱུ་ཡིན་སྐོར་བརྗོད་འདུག

གསར་འགོད་པ། བནྡེ་སྐྱབས།