མིག་མི་འཛུམ།
ཡང་བསྐྱར་རང་སྲེག་གི་མེ་ལྕེ་མཆེད་བྱུང་། ཉེ་བའི་ཆར་རྒྱ་གཞུང་གིས་དཔའ་བོ་དཔའ་མོ་ཚོའི་ཐད་བཀའ་རྒྱ་འདྲ་མིན་བཏང་ཞིང་བྱ་སྤྱོད་འདྲ་མིན་སྤེལ་ཡོད་པ་དང་། གཞུང་ཕྱོགས་ནས་ཀྱང་མེར་བསྲེགས་མཚམས་བཞག་ཡོད་རབས་དང་། དེའི་སྐོར་གྱི་མཚན་གནས་རྗེས་འབྲེལ་ཚང་མ་འཛིན་བཟུང་དང་གཅར་བརྡུང་། ཆད་པ་བཅད་པ། གསང་གནས་འཚོལ་མཁན་ལ་དངུལ་འབོར་ཆེན་གྱི་བྱ་དགའ་ཡོད་རབས་ཀྱི་གསལ་བསྒྲགས་སོགས་བྱས་ནས་འདྲེ་ཉལ་བ་ཕག་གིས་འདྲོགས་སློང་བའི་དཔེ་དེ་བྱས་ཡོད། དེ་བས་ཀྱང་བོད་ནང་གི་ལས་འགུལ་ཆེ་ཕྲ་ཆུང་གསུམ་དང་ལྷག་དོན་དུ་མེར་བསྲེགས་ཀྱི་ལས་འགུལ་འདི་ཏཱ་ལའི་རུ་ཚོགས་ཀྱི་ངན་སྐུལ་ཡིན་རབས་གསར་གནས་གང་སར་ཕུ་བསྒྲགས་མདའ་བསྒྲགས་བྱས་པས་༸བོད་མི་རིགས་ཀྱིས་བཟོད་མི་ཐུབ་པར་གྱུར་ཡོད།
འཇར་མན་གྱི་མོ་ནེ་ཆིའེ（Munich)ནཱ་ཙིའི་བཙོན་ར་ཆེན་མོའི་གྱང་རོའི་སྒོ་འགྲམ་ན། “གལ་ཏེ་སྲིད་གཞུང་གིས་དཔེ་ཆ་སྲེག་འོང་དུས། ངེས་པར་གདོང་དུ་ལངས་ཏེ་སྔོན་འགོག་བྱ་དགོས། དེ་ལྟར་མ་བྱས་ཚེ། དེའི་འཕྲོ་ནས་ཁོ་ཚོས་མི་སྲེག་གི་རེད”ཅེས་བྲིས་པའི་སྐད་ཆ་ཞིག་ཡོད་པ་བཞིན། དེང་སང་རྒྱ་གཞུང་གིས་བོད་ཀྱི་ཆོས་དང་རིག་གཞུང་རྩ་མེད་ཀྱི་ལས་གཞི་དག་མངོན་ལྐོག་ཐམས་ཅད་ནས་རྩོམ་པའི་སྐབས་འདིར། གཞོན་སྐྱེས་དཔའ་བོ་དཔའ་མོ་ཚོས་དེ་མ་བཟོད་པར་རང་ལུས་སྐྱེས་སུ་ཕུལ་ནས་སྲུང་སྐྱོབ་བྱེད་ཀྱི་ཡོད། དོན་དངོས་ཀྱིས་བཤད་ན། སྔ་གཞུག་ཙམ་མ་གཏོགས་རྩ་མེད་བཟོ་རྒྱུ་ནི་གདུག་རྩུབ་ཅན་གྱི་སྲིད་གཞུང་དེའི་དམིགས་ཡུལ་ཡིན་པ་ཁོང་ཚོས་སྔ་མོ་ནས་ཤེས་ཡོད་པས་ཡིན།
གང་ལྟར་སྲིད་གཞུང་གི་ངོས་ནས་བོད་མི་རེ་རེའི་རྗེས་ལ་དམག་མི་རེ་རེ་གོ་སྒྲིག་མ་བྱས་ཙམ་གྱི་དམ་དྲག་སྲིད་ཇུས་ཤིག་ལག་བསྟར་བྱེད་ཀྱི་ཡོད་པ་དང་། ཐ་ན་གཞུང་གི་གསལ་བསྒྲགས་ཀྱི་ནང་དོན་ཐད་ལ་བལྟས་ན་མེར་བསྲེགས་གནང་མཁན་དང་དེའི་མཚན་གནས་རྗེས་འབྲེལ་ཐམས་ཅད་མི་གྲལ་ལས་འཕུད་ལོས་འོང་སྙམ་པའི་སྡིགས་ར་ཞིག་སྐུལ་ནའང་། ཉིས་སྟོང་བཅུ་གསུམ་གྱི་ལོ་མགོ་འདིར། ཡང་བསྐྱར་བླ་བྲང་ཨ་མཆོག་ནས་དཔའ་བོ་ཚེ་རིང་བཀྲ་ཤིས་ལགས་ཀྱིས་རང་སྲེག་ངོ་རྒོལ་གྱི་དབུ་བསླངས་བྱུང་། དཔའ་བོ་ཁོང་གི་ཡུལ་མི་ཚོར་དམ་པ་ལྷ་ཆོས་དང་འཇིག་རྟེན་མི་ཆོས་གང་ཐད་ནས་བོད་རང་གི་སྲོལ་རྒྱུན་གྱི་ཆོ་ག་ལྟར་སྒྲུབ་ཏུ་མ་བཅུག་པར་བཀའ་འགོད་དམ་དྲག་ཤུགས་ཆེན་བྱས་ཡོད་ཀྱང་། མེར་བསྲེགས་ལས་འགུལ་མཚམས་མི་འཇོག་པ་ཁག་ཐེག་བྱས་ཡོད།
དགྲ་བོའི་ངོས་ནས་རང་སྲེག་ལས་འགུལ་བ་ཚོའི་ནང་མིར་སྡིགས་ར་སྐུལ་བ་དང་མི་མང་གདུང་སེམས་མཉམ་སྐྱེད་ཆེད་ནང་མིར་ཐུག་འཕྲད་བྱེད་དུ་མི་འཇུག་པ། ཆོས་ལུགས་ཀྱི་བྱེད་སྒོ་གང་ཡང་སྤེལ་དུ་མི་འཇུག་པ། མེར་བསྲེགས་གནང་མཁན་གྱི་སྐུ་ཕུང་ལ་བདག་པོ་རྒྱག་མཁན་ནམ་དེར་ཐེ་ཇུས་བྱེད་མཁན་དག་འཛིན་བཟུང་སོགས་བྱས་ཏེ། མ་འོངས་པར་མེར་བསྲེགས་གནང་བར་སྔོན་འགོག་བྱེད་ཀྱི་ཡོད་ཀྱང་། བདག་གི་ངོས་ནས་བསམ་ན། དགྲ་བོའི་དམིགས་ཡུལ་དེར་ལྡོག་ཕྱོགས་ཀྱི་ནུས་པ་ཞིག་ཐོན་པའི་ཉི་མ་ཞིག་ཡོད་ངེས་པ་དཔའ་བོ་ཚེ་རིང་བཀྲ་ཤིས་གཅིག་བུའི་སྟེང་ནས་གསལ་བོར་ཤེས་ཐུབ།
ཡང་གཅིག་བཤད་ན། ད་ལོར་ཀན་ལྷོ་བོད་རིགས་རང་སྐྱོང་ཁུལ་བཙུགས་ནས་ལོ་འཁོར་དྲུག་ཅུ་ཧྲིལ་བོ་འཁོར་བའི་མཛད་སྒོ་ཆེན་པོ་ཞིག་འཚོགས་རྒྱུར་སྟ་གོན་བྱེད་ཀྱི་ཡོད་ལ། ལོ་སྔོན་མ་ནས་གྲ་སྒྲིག་ཨང་གསར་བྱེད་ཀྱི་ཡོད། སྐབས་དེར་མཐའ་སྐོར་གྱི་ཡུལ་སྡེ་གཙོད་འཚོ་བ་ཉེར་གཅིག་དང་འབོ་ར་ཨ་མཆོག རྡོ་དཀར་མཛོད་དགེ་སོགས་སྔ་ལོར་མེར་བསྲེགས་གནང་མཁན་དག་གི་ས་གནས་དེ་དག་གི་ནང་དུ་མུ་མཐུད་དེ་མེར་བསྲེགས་གནང་རྒྱུའི་གྲ་སྒྲིག་ཨང་གསར་ཡོད་ངེས་ཡིན། སྐབས་དེར་སྔར་ལས་ལྷག་པའི་མེར་བསྲེགས་དོན་རྐྱེན་ཚབས་ཆེན་འབྱུང་རྒྱུ་ཡིན་པ་ཚོད་དཔག་བྱ་ཐུབ།
རྒྱལ་གཅེས་དཔའ་བོ་སྔོན་མ་དག་གི་སྐབས་ཀྱི་ཉམས་མྱོང་གི་ཐད་ནས་བཤད་ན། བླ་བྲང་ཟ་ཡུས་ནང་གི་དཔའ་བོ་རྡོ་རྗེ་རིན་ཆེན་མེར་བསྲེགས་སྐབས་མི་མང་དང་དྲག་དམག་གིས་སྐུ་ཕུང་འཕྲོག་རྩོད་ཀྱིས་གདོང་ཐུག་དྲག་པོ་ཞིག་བྱུང་བ་དང་། མཐའ་མར་མི་མང་གིས་གདན་འདྲེན་ཞུ་ཐུབ་པ་བྱུང་ཡོད་པ་མ་ཟད། དགོན་པའི་རྒྱབ་ལོགས་ཀྱི་དུར་ཁྲོད་དུ་འཁུར་འགྲོ་བའི་སྐབས་སུ་མི་མང་གི་ཁྲོད་ནས་དཔའ་བོའི་སྐུ་ཕུང་རང་གི་ཁྱིམ་དུ་གདན་འདྲེན་ཞུ་དགོས་པ་རེད། དེ་རིང་བློ་ཐག་ཆོད་པོ་སུ་ཡོད་ན་ཤོག གལ་སྲིད་བློ་ཐག་མི་ཆོད་པ་སུ་ཡོད་ན་ཕྱི་ནུར་རྒྱོབས་ལབ་པས། གྲྭ་བཙུན་དང་ཕོ་མོ་རྒན་གཞོན་མང་བོས་དཔའ་ཁས་ལེན་གྱིས་སྐུ་ཕུང་རང་ཁྱིམ་དུ་གདན་འདྲེན་ཞུས་ཏེ་ཡང་བསྐྱར་བསང་ཆུ་རྫོང་གི་ཁྲོམ་དཀྱིལ་ནས་འཁུར་འོང་སྐབས། གཞོན་སྐྱེས་ཕོ་གསར་ཁག་ཅིག་གིས་གྲི་མགོར་འཇུས་ཏེ་གཡས་གཡོན་ནས་སྲུང་སྐྱོབ་བྱས་ཡོད་པར་བརྗོད་ལ། སུ་ཞིག་གིས་སྔོན་འགོག་དང་སྐུ་ཕུང་བཙན་འཕྲོག་ལྟ་བུ་བྱས་ཚེ། ཆེས་ཡ་སྔ་བའི་དམར་དྲི་བྲོ་བའི་གཏམ་རྒྱུད་ཅིག་བྱུང་ཡོད་པ་ཐག་གིས་ཆོད་འདུག
དཔེ་འདི་བཞིན་དུ་སེམས་ཐག་ཆོད་པའི་བོད་མི་རིགས་ལ་མཚོན་ན། མི་རིགས་དང་རྒྱལ་ཁབ་ཀྱི་དོན་དུ་ཁྱོད་ཤི་ང་ཤིའི་དུས་ཚོད་འདི་ལ། རང་གི་མངོན་འདོད་མ་འགྲུབ་བར་དུ་སུ་གང་གིས་བློས་གཏོང་གི་སྙིང་སྟོབས་དེ་གཞོམ་མི་ནུས་པ་ནི་ས་རུས་ཐང་གསལ་ཡིན། མི་སུམ་ཅུར་བསམ་པ་སུམ་ཅུའི་དཔེ་བཞིན། འུ་ཐུག་ན་དེ་བས་ཀྱང་ཚབས་ཆེ་བའི་མཇུག་འབྲས་ངན་པ་འབྱུང་སྲིད། བོད་པ་ཚོར་དྲག་སྤྱོད་ཀྱི་ཆ་རྐྱེན་མང་བོ་ཡོད་དེ། འུ་ཐུག་པ་དང་ཁོང་ཁྲོ་སློང་རྒྱུ་མང་དྲགས་ན། བོད་སར་ཡོད་པའི་རྒྱ་ནག་གི་སློབ་གྲྭ་དག་གི་ནང་དུ་མཆོངས་ནས་བྱིས་པ་ཚོ་དམར་གསོད་གཏོང་སྲིད་ལ། སྣུམ་མཛོད་དང་གལ་ཆེའི་གློག་མཛོད་དག་ཀྱང་གཏོར་སྲིད།
༢༠༡༣ ། ༡ ། ༡༥ ལ་བྲིས།
ད་རིང་མིག་མི་འཛུམ་པའི་དཔྱད་རྩོམ་དོན་སྙིང་ལྡན་པ་དང་གནས་ལུགས་ཡོད་པ་ཞིག་སྤེལ་འདུག་པས་རྒྱབ་སྐྱོར་ཡོད། དེ་མིན་དུས་ཀུན་ཏུ་བོང་རྒན་ཁ་ཤས་ནི་ཕྱི་དགྲ་དང་ཐུག་དུས་མར་དང་། ནང་གཉེན་དང་ཐུག་དུས་ལྕགས་ཟེར་བ་ལྟར་་དུས་ཀུན་ཏུ་རང་གཞུང་དང་༧གོང་ས་མཆོག་སོགས་བྱས་པ་ཅན་གྱི་མི་སྣའི་གཅིག་མ་འགྲིག་གཉིས་མ་བྱས་རང་ཟེར་ནས་སྡུག་སྐད་རྒྱག་ཡ་དང་། ནང་ཁུལ་དཀྲུགས་ཤིང་སློང་གང་ཐུབ་བཟོ་མཁན་དག་གིས་ནི་འདི་ལྟ་བུ་ཞིག་བློ་ཡུལ་དུ་ཡང་ཤར་མ་མྱོང་བ་ཞིག་རེད་འདོད་
དྲ་གྲོགས་མིག་མི་འཛུམ་ལགས། ཡུན་རིང་མ་མཇལ་སྐུ་ཁམས་བཟང་ལགས་སམ།
རེད་ཡ། མི་འུ་ཐུག་ན་ག་རེ་ཡིན་ཡང་བྱེད་སྲིད་པ་རེད། འོན་ཀྱང་བོད་མི་རིགས་འདི་བྱམས་སྙིང་རྗེ་དང་ལྷ་ཆོས་རིང་ལུགས་ལྟ་གྲུབ་ཀྱི་སློབ་གསོ་མང་དྲག་པ་མིན་དྲོ། རེད་དེ་ཁ་ནང་ལ་བསྐོར་ཡོང་དུས་དཔའ་དམ་བཤམས་རྒྱུར་ཐེ་ཚོམས་ཅི་ཡང་མི་འདུག། དེས་ན་སྐུ་ཉིད་ཀྱིས་དངོས་ཐོག་བདེན་འཚོལ་གྱི་གཏམ་དེར་ཁ་རྩེར་བྱང་སེམས་འཁྱེར་ནས་ཁོག་ནང་ཞེ་སྡང་མེ་ལྟར་འབར་བའི་གཟན་ཤམ་གྱོན་པའི་བོང་བུ་རྨིག་རྩེ་མ་དེ་ཚོས་རྒོལ་རྒྱུ་གདོན་མི་ཟའོ།