མདང་དགོང་རྒྱ་གར་བྱང་ཕྱོགས་བཞུགས་སྒར་ངྷ་རམ་ས་ལར་ཕྱི་ལོ་གསར་པའི་ཁ་བ་ཐོག་མ་དེ་བབས་སོང་།
ཉེ་ལམ་ཞིག་ནས་བཞུགས་སྒར་ངྷ་རམ་ས་ལའི་གནམ་གཤིས་གློ་བུར་དུ་ཇེ་འཁྱག་ཏུ་སོང་ཡོད་པ་དང་། ཕྱི་ཚེས་ ༡༧ ཉིན་ནས་ངྷ་ས་ཁུལ་དུ་ཆར་བ་རྒྱུན་ཆད་མེད་པར་བབས་ཏེ། ཁ་སང་ཕྱི་ཚེས་ ༡༨ ཉིན་གནམ་གཤིས་སྔར་ལས་ཇེ་འཁྱག་ཏུ་ཕྱིན་ཏེ་ཆར་བ་ཤུགས་ཆེན་བཏང་ཞིང་། མདང་ནུབ་མཚན་གུང་ཆུ་ཚོད་ ༢ པ་ཙམ་ནས་ལོ་གསར་པའི་ཁ་བ་ཐོག་མ་དེ་བབས་སོང་། ད་ལོའི་ཁ་བའི་ཐུག་ཚད་ལོ་སྔོན་མ་དང་བསྡུར་ན་ཅུང་སྲབ་པོ་ཡིན་སྟབས། ངྷ་ས་ཁུལ་གྱི་ལམ་ཁ་དང་འགྲིམ་འགྲུལ་སོགས་ལ་གནོན་སྐྱོན་ཆེར་མེད་ཀྱང་། ད་ནང་ཞོགས་པར་མེག་གྷན་ཁུལ་ཧྲིལ་བོར་ཁ་བས་གཡོགས་ཡོད་པ་མ་ཟད། གངས་ཅན་སྐྱིད་གཤོངས་ཀྱི་ལས་ཁུངས་ཁག་གི་ཁང་སྟེང་དུའང་ཁ་བ་སྲབ་པོ་རེ་ཆགས་འདུག་ལ། ས་གནས་རྒྱ་གར་བ་དང་བོད་མི། ཕྱོགས་ཡོང་ཡུལ་སྐོར་སྤྲོ་འཆམ་པ་སོགས་ཀྱིས་ཁ་བའི་ནང་དུ་པར་རྒྱག་པ་དང་ཕན་ཚུན་ལ་ཁ་བས་གཞུ་རེས་བྱས་ཏེ་རྩེད་མོ་རྩེད་བཞིན་འདུག
ངྷ་རམ་ས་ལའི་གནམ་གཤིས་རྟོག་ཞིབ་ཚན་པས་བརྗོད་གསལ་ལ། མ་འོངས་པའི་ཆུ་ཚོད་ ༤༨ རིང་ངྷ་རམ་ས་ལའི་གནམ་གཤིས་དེ་རྒྱུན་ལྡན་མིན་པ་ཆགས་སྲིད་སྟབས། ས་གནས་མང་ཚོགས་ཀྱིས་ལ་བ་མཐུག་པོ་གྱོན་ཏེ་སོ་སོའི་འཕྲོད་བསྟེན་ལ་དོ་སྣང་བྱེད་དགོས་པའི་འབོད་སྐུལ་ཞུས་འདུག
གསར་འགོད་པ། བནྡེ་སྐྱབས།
ཁ་བ་དཀར་པོ་ཨ་སྔོན་གནམ་ནས་བབས།།
ཁ་བ་དཀར་པོའི་ས་གཞིའི་རྡུར་རྣམས་བཅོམ།།
ཁ་བ་མ་བབས་རྡ་སའི་གླིང་ལ་བབས།།
ཁ་བའི་བུ་ཆུང་ཡ་མཚན་ལྟེད་མོར་འཁོར།།
རེད། གསར་འགྱུར་ཟེར་ན་དངོས་གནས་རེད། འོན་ཀྱང་ཁ་སང་ཝཱ་ར་ཎ་སཱིར་ཡང་སེར་རྡེའུ་ཅན་གྱི་ཆར་བ་ཤུགས་ཆེན་ཞིག་འབབ་སོང་། དུས་ཚོད་ལྔ་ཡས་མས་རེད། རྒྱ་གར་ཧ་སངས་སངས་འདྲ་བྱེད་ཀྱིན་འདུག
ཁ་བ་དཀར་པོ་མཐོང་དུས།།
ཁ་བ་གངས་ཅན་དྲན་བྱུང་།།
རང་ཡུལ་ཁ་བ་དཀར་པོ།།
ཡིད་ལ་ལྷམ་མེར་འཆར་སོང་།།
ངྷ་སར་ཁ་བ་ཅི་ཙམ་བབས་ན་སེམས་པ་དེ་ལས་འཁྱག་གི ངྷ་སའི་འཁོར་ཡུག་ན་གནས་བའི་བཙན་བྱོལ་བ་ཚོ་གླ་ཁང་རེའི་ནང་དུ་གླ་བརྒྱངས་རེ་བྱས་ནས་གློག་གི་ཐབ་ཀའི་ཉེ་སར་བཅར་ཚུལ་ལ་བལྟས་ན། ཁ་བ་ཐོག་ཏུ་མ་བབས་པར་སེམས་ནང་ལ་འབབ་པ་དང་འདྲ་གི
སེམས་ལ་འབབ་པའི་གསར་འགྱུར་ཞིག་བྲིས་འདུག དུས་བབ་ཚང་གིས་ལོ་ལྟར་ངྷ་སར་ཁ་བ་བབས་པའི་གནས་ཚུལ་རེ་སྤེལ་ཡོང་དུས་སེམས་པ་དྲན་ལྷང་ལྷང་ཞིག་བཟོས་ཡོང་གི་འདུག
ཁ་བ་དཀར་པོ།
ཁ་བ། གྲང་བསིལ་བསིལ་དང་། འདར་སིག་སིག་གིས་བབས་ཏེ།
གཡའ་རྫ་ནགས་གསུམ་དང་།
རི་ལུང་ཐང་གསུམ་གྱི་ས་གཞི་ལེབ་མོ་དེ་དཀར་བོང་བོང་དུ་བསྒྱུར་སོང་།
ས་མཐའི་གདུང་ཡུས་རུམ་གང་དང་བཅས་ཏེ། ང་སྒོ་ལ་བུད་དེ།
དཀར་འཚུབ་འཚུབ་ཀྱིས་བབས་པའི་ཁྱོད་ཉིད་ཀྱི་ཡོང་ཁུངས་དང་འབབ་སྟངས་ལ་དཔྱད་དེ།
བསམ་གཞིགས་ཁྲི་ཕྲག་གི་རུས་གདུང་ལ་བསྡད་ཙ་ན།
དགའ་སྐྱོ་ཆགས་གསུམ་གྱི་མིག་ཆུ་ནུར་མོ་ཞིག་གིས་ངོ་གདོང་བཀབས་སོང་། ཡོངས་སུ་བཀབས་སོང་།
ཁ་བ། ཁྱོད། གླང་ཆེན་ཁ་འབབ་ཀྱི་རླབས་སྒྲ་དང་འགྲོགས་ནས་ཕྱི་རྒྱལ་ལ་བཙན་འཛུལ་དུ་ཡོང་བ་ཨེ་ཡིན།
ཁྱོས། མི་ལོ་ལྔ་བཅུའི་ཁ་བྲལ་གྱི་གདུང་བ་མ་ཐེག་པར་ཕེབས་བསུའི་སྟ་གོན་བཤམས་པ་ཨེ་ཡིན།
ཁྱོས། མི་རིགས་དང་ལོ་རྒྱུས་ཀྱི་གླེགས་བམ་བློས་མ་ཐོངས་པར་ས་མཚམས་བདག་བཟུང་བྱེད་དུ་ཡོང་བ་ཨེ་ཡིན།
ཁྱོད། གཤིན་པོ་འབུམ་ཕྲག་གི་རྣམ་ཤེས་དང་མཉམ་དུ་སྲིད་དབང་དམར་པོའི་རང་གཟུགས་དེ་ཐེར་འདོན་བྱེད་དུ་ཡོང་བ་ཨེ་ཡིན།
ཇོ་མོ་གླང་མའི་དབུ་རྩེ་ནས་མཆེད་པའི་མེ་ཏོག་དཀར་པོ་སྟེ། ངའི་འཇིག་རྟེན་ནས་བབས་པའི་བདུད་རྩི་སིལ་མ།
ཅུང་ཙམ་འགོར་བ་ན། སྐོམ་དྲགས་པ་དང་།
དྲན་དྲགས་པའི་ངས་ཁྱོད་ལ་སྦར་བཞབས་གཅིག་གིས་ཁམ་བུ་གང་དོ་ཡིས་འགམས་ཚེ།
ཁངས་ཀྱི་ཐིགས་པ་རེ་རེ་ལུས་ཕུང་ཧྲིལ་བོའི་རྩ་ཁམས་སུ་ཁྱབ།
དེ་དུས། ཁྱོད་དང་ང་ཡི་ཐུན་མིན་གྱི་བདག་སྒྲ་ཐོབ་ས་སྟེ།
ཁ་བ་ཅན་གསལ་ལེར་ལྷང་ངེར་འཆར་བྱུང་ལ།
བཙན་ཤེད་དང་ཉེས་གཏག་གི་མཚོན་འོག་ན་མྱངས་པའི་སྡེ་འབངས་དེའི་ཤུགས་རིང་ནར་མོ་དེ་ཡང་གོ་ཡོང་གི
ཁ་བ། ཁྱོད། རང་རྐང་བརྟན་པོ་དང་རེ་བ་མཐོན་པོས་སླེབས་ཡོང་ན།
ཁྱོས། མི་ཡི་བདག་དབང་དང་ས་ཆའི་ཁྱབ་ཁོངས་གསུངས་ཡོང་ན།
ཁྱོས། དམ་ཚིག་གཙང་མ་དང་གཞུང་དྲང་ཁྲེལ་ཡོད་གནང་ཡོང་ན།
ཁྱོད། ཤི་བོའི་ཁ་ཆེམས་དང་གསོན་པོའི་དྲན་གདུང་གིས་འཐམས་ཡོང་ན།
ང་ལ་ཡང་། འགན་འཁྲི་ལྕི་མོ་ཞིག་དང་།
གོ་རྟོགས་མཐོན་པོ་ཞིག་དགོས་པའི་གསལ་བརྡ་བཏང་བ་ཤེས་ཏེ།
རང་གིས་རང་ལ་ཁོ་ཐག་ཆད་དེ་བརྒྱལ་འགྲོ།
༢༠༡༡/༠༡/༡༥སྟེ། ཁངས་ཆེན་བབས་པའི་ཉིན་དེར་རྡ་རམ་ས་ལ་ནས་བྲིས།
དྷ་སར་ཁ་བ་བབས་སོང་། །
ཁ་བ་དཀར་པོ་བབས་སོང་། །
ཁ་བ་འཁྱགས་པ་ཆགས་སོང་། །
འཁྱགས་པ་མིག་ཆུར་བཞུར་བགྱིད། །
དགའ་སྣང་དང་སྐྱོ་སྣང་། དྲན་སྣང་གསུམ་མཉམ་དུ་སྐྱེས་སོང་། ད་དུང་ང་ཚོས་ཁ་བ་འབབ་ཐེངས་རྩིས་ཏེ་ག་ཚོད་སྡོད་དགོས་པ་རེད། དྲན་གདུང་དང་སྐྱོ་གདུང་རིམ་ནས་ཅི་ཙམ་བསྒུག་དགོས་པ་རེད།
དཀར་པོ་གངས་ཀྱི་ཁ་བ་བབས་སོང་།།
སེམས་པ་སྐྱིད་པའི་གངས་རྩེད་བརྩེར་འགྲོ།།
ཞེ་བློ་ཕམ་པའི་སེམས་ངལ་ཐམས་ཅད།།
རེ་ཞིག་བསྐྱུར་ཏེ་ང་ཚོ་དགའ་དང་།།
གསར་འགྱུར་འདི་དངོས་གནས་སྙིང་རྗེ་བོ་ཡིད་ལ་འཐད་པ་ཞིག་འདུག འདི་ལ་འདྲ་པར་ཁ་ཤས་ཤིག་ཡོད་ན་དེ་བས་ཀྱང་སྙིང་རྗེ་བ་ལ།།