ང་། མེར་འབར་ངེས། ༼༡༽

བུ་ཆུང་ཌི་བསོད་ནམས་ཀྱིས་བརྩམས། བྱམས་པ་ལྷུན་གྲུབ་ནས་བསྒྱུར།

བསྟན་འཛིན་དབང་མོ་ནི་ཕྱི་ལོ་ ༡༩༩༡ ལོར་སྐྱེས་ཤིང་། ཆུང་བྱིས་པའི་དུས་ནས་བདེ་ཆེན་ཆོས་འཁོར་གླིང་ཞེས་པའི་ཨ་ནེ་དགོན་པར་ཞུགས། ཕྱི་ལོ་ ༢༠༡༡ ཟླ་ ༡༡ ཚེས་ ༡༧ ཉིན། མོ་བོད་བྱང་ཤར་ཨ་མདོ་རྔ་པ་ཁུལ་དུ་ཡོད་པའི་སུམ་མདོ་ཟམ་ཁར་ཕྱིན་ནས་རང་ལུས་མེར་བསྲེགས་བཏང་ཡོད།

དེ་ལྟར་མོ་ནི་བོད་ཀྱི་བུད་མེད་ཁྲོད་ནས་རང་ལུས་མེར་བསྲེགས་གཏོང་མཁན་ཐོག་མ་དེ་ཆགས་ཡོད། རང་ལུས་མེར་འཚིག་བཞིན་པའི་སྐབས་སུ། དབང་མོས་ཆོས་ལུགས་བྱེད་སྒོར་བཙན་གནོན་མཚམས་འཇོག་དགོས་པ་དང་། ༧གོང་ས་མཆོག་བོད་དུ་གདན་འདྲེན་ཞུ་དགོས་པའི་འབོད་སྒྲ་བསྒྲགས་ཡོད། མོ་རང་ལོ་ ༢༠ ཡིན། ཕྱི་ལོ་ ༢༠༠༩ ནས་ད་བར་བོད་མི་ ༩༨ ཡིས་རང་ལུས་མེར་བསྲེགས་བཏང་ཡོད་ཅིང་ཁོང་ཚོའི་ཆ་སྙོམས་ཀྱི་ལོ་ཚད་ནི་ལོ་ ༢༥ རེད།

ནང་ཆོས་དང་བོད་ཀྱི་ལེགས་བྱང་གིས་བོད་མི་ནང་ཁུལ་ལ་མཐུན་སྦྲེལ་དང་། ཁོང་ཚོར་རང་མི་རིགས་ཀྱི་ངོ་བོའི་ཚོར་སྣང་སྐྲུན་པའི་ཤུགས་རྐྱེན་ཐེབས་ཀྱིན་ཡོད་པས། པེ་ཅིན་གྱིས་བོད་ཀྱི་ཆོས་ལུགས་ཐོག་ལ་འཛིན་པའི་སྲིད་ཇུས་དེ་ནི་འཇིགས་སྣང་དང་ཡིད་རྟོན་མེད་པ་ཞིག་ལ་གཞི་བཅོལ་ནས་ཡོད། དུས་ཚིགས་ལ་ཕྱིར་མིག་ཅིག་བལྟས་ན། ཕྱི་ལོ་ ༡༩༣༥ ལོར་རྒྱ་དམག་རྒྱང་སྐྱོད་ཀྱི་སྐབས་སུ་རྒྱ་དམར་གྱིས་ནང་ཆོས་གཏོར་བཤིག་བཏང་ཡོད་པ་དང་། དམར་དམག་བོད་ཤར་ཕྱོགས་ནས་བརྒྱུད་སྐབས་ཀྱང་དགོན་སྡེ་དུ་མ་བཅོམ་བརླག་བཏང་ཞིང་། འབྲུ་མཛོད་ཀྱང་མང་པོ་གཞུང་བཞེས་བཏང་།

ཕྱི་ལོ་ ༡༩༥༩ ལོར་རྒྱ་ནག་གིས་བོད་བཙན་བཟུང་བྱས་རྗེས་། པེ་ཅིན་གྱིས་སྐྱི་གཡའ་བའི་སྲིད་ཇུས་གཅིག་རྗེས་གཉིས་མཐུད་དུ་ལག་བསྟར་བྱས་ཤིང་། དེའི་མཐའ་མཇུག་ཏུ་རིག་གནས་གསར་རྗེས་ཆེན་མོ (༡༩༦༦_༧༦) བྱུང་། སྐབས་དེར་བོད་ཀྱི་གྲྭ་བཙུན་གྱི་དགོན་སྡེ་བརྒྱ་ཆའི་ ༩༠ ལྷག་གཏོར་བཅོམ་བྱས་པ་དང་། དེ་བཞིན་གནའ་བོའི་ཕྱག་དཔེ་མང་པོ་ཡང་གཏོར་བརླག་བྱས་ཡོད། དེ་ནི་ཨ་རིའི་ནང་གི་གཙུག་ལག་སློབ་གཉེར་ཁང་ཡོངས་རྫོགས་རྩ་གཏོར་བཏང་བ་དང་འདྲ་སྟེ། བོད་ཀྱི་དགོན་སྡེ་རྣམས་ནི་སློབ་གསོ་དང་ཤེས་རིག་གི་ལས་དོན་སྒྲུབ་སའི་བསྟི་གནས་སུ་གྱུར་ཡོད་པས་སོ།།

ཕྱི་ལོ་ ༢༠༠༠ ལོ་ནས་བཟུང་པེ་ཅིན་གྱིས་གསར་དུ་བོད་ས་ཁྱོན་ཡོངས་ལ་“རྒྱལ་གཅེས་ཆོས་གཅེས་” གྱི་ལས་འགུལ་ཤུགས་ཆེན་སྤེལ་ཡོད། དེ་ནི་གྲྭ་བཙུན་གྱི་དགོན་སྡེ་ཁག་ཏུ་དམིགས་སུ་དཀར་ནས་ཆེས་གདུག་རྩུབ་དྲག་པོའི་ཐོག་ནས་ལག་བསྟར་བྱས་ཡོད་ལ། གྲྭ་བཙུན་རྣམས་དགོན་སྡེ་ཁག་ཏུ་སློབ་སྦྱོང་བྱ་རྒྱུ་དང་། ཁ་བྲལ་རིང་ལུགས་པ་ལ་ངོ་རྒོལ་བྱེད་ཀྱིན་ཡོད་པའི་དཔང་རྟགས་དང་། ད་དུང་ཏཱ་ལའི་བླ་མས་“རྒྱལ་ནང་ཆིག་སྒྲིལ་”གཏོར་བཤིག་གཏོང་གི་ཡོད་ཅེས་པའི་རྒྱ་གཞུང་གི་ཡིག་ཆ་ལ་རྒྱབ་སྐྱོར་ཆེད་འབྲི་རྒྱུགས་གཏོང་དུ་འཇུག་གི་ཡོད། ལྷག་པར་དུ་རྒྱ་གཞུང་གིས་དར་དམར་ས་ཡ་མང་པོ་དང་། མའོ་དང་རྒྱ་ནག་གི་མགོ་ཁྲིད་གཞན་ཁག་གི་འདྲ་པར་འགྲེམས་སྤེལ་བྱས་ཏེ། དགོན་སྡེ་ཁག་ལ་དེ་དག་༧གོང་ས་མཆོག་དང་བླ་མ་གཞན་རྣམས་ཀྱི་སྐུ་པར་བཤམ་སར་འཇོག་དགོས་པར་བཙན་སྐུལ་བྱེད་ཀྱིན་ཡོད།

ཕྱི་ལོ་ ༢༠༠༧ ལོའི་ཟླ་བ་ ༧ པའི་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབུས་ཆོས་དོན་ལྷན་ཁང་ནས་ཀླ་ཀློའི་དམར་ཕྱོགས་ཚོགས་པས་བོད་ཀྱི་བླ་མ་རྣམས་ཀྱི་ཡང་སྲིད་སྟངས་འཛིན་བྱེད་ཆེད། བཀའ་རྒྱ་ཨང་རིམ་ ༥ པ་ཞེས་པའི་སྒྲིག་གཞི་ཚན་པ་ཞིག་བཏོན་ཡོད། རྒྱལ་སྤྱིའི་འགྲོ་བ་མིའི་ཐོབ་ཐང་གི་བསྒྲགས་གཏམ་དང་རྒྱ་ནག་གི་རྩ་ཁྲིམས་ནང་གཙུག་ཏུ་བཀོད་པ་ལྟར། འདི་ནི་བོད་ཀྱི་ནང་ཆོས་ཉམས་བཞེས་དང་ཆོས་དད་རང་མོས་ལ་ཆེས་མཐར་ཐུག་གིས་ཐེ་ཇུས་བྱས་པའི་ཚབས་ཆེན་གྱི་མནར་གཅོད་ཅིག་ཡིན། ཡང་སྲིད་ངོས་འཛིན་ནི་བོད་བརྒྱུད་ནང་བསྟན་བླ་ཆེན་རྣམས་ཀྱི་སྐྱེ་བ་ཕྱི་མའི་བརྒྱུད་རིམ་གྱི་ཐུན་མོང་མ་ཡིན་པའི་ལམ་ལུགས་ཤིག་རེད། འདི་འདྲའི་བར་མ་ཆད་པའི་རྒྱུད་པ་དེ་ནི་བླ་མ་གོང་མས་རྒྱུད་ཀྱི་ཡོན་ཏན་རྣམས་དེ་ཡི་ཡང་སྲིད་གསར་པ་ལ་འཕོ་བར་བྱེད་པར་གལ་གནད་ཆེན་པོ་ཆགས་ཡོད།

ཆོས་ཉམས་ལེན་བྱེད་མཁན་རྣམས་ཏེ་དབང་མོ་ལྟ་བུར་མཚོན་ན། ནང་པའི་ཆོས་ཀྱི་ནང་དུ་ཁོང་ཚོའི་ཚེ་སྲོག་དེ་ཤིན་ཏུ་དགོས་གལ་ཆེན་པོར་བརྩིས་ཡོད། ཁོང་ཚོས་ཆོས་ཀྱི་ཉམས་བཞེས་དང་ལེགས་འགྲུབ་ཀྱི་འཚོ་བ་གཅིག་ལ་སྙེག་ཕྱིར། རང་རང་གི་ནང་མི་རྣམས་རྒྱབ་ཏུ་བསྐྱུར་ཞིང་འཇིག་རྟེན་འདི་རྩ་ནས་དོར་ཏེ་འདས་ཟིན། འདི་འདྲའི་འཆར་གཞི་ལྡན་པའི་ཐོག་ནས་ནང་ཆོས་རྩ་བརླག་གཏོང་བ་དེ་ནི། རྩ་ཆེན་གྱི་འཇིག་རྟེན་འདི་ཡི་ནང་དུ་གཞི་རྩའི་ཐོག་ནས་ཚད་ལས་འདས་པའི་མི་སྤྱོད་ཅིག་ཏུ་གྱུར་ཡོད། མི་མང་གི་གཟེར་ཟུག་སྟོན་སའི་རྒྱུད་ལམ་མེད་སྟབས་གནས་སྟངས་དེ་ཚབས་ཆེར་བཏང་ཡོད། རང་སྲོག་བློས་བཏང་གིས་མེ་སྲེག་བྱེད་མཁན་གྲྭ་པ་དང་ཨ་ནེ་དེ་དག་གི་སེམས་ལ། ཡང་ཡང་ཁོང་ཚོའི་སྡུག་བསྔལ་རྣམས་གསལ་སྟོན་དང་ལེགས་བཅོས་ཤིག་ཡོང་ཐབས་ཀྱི་གདམ་ཀའི་གནད་དོན་ཞིག་ཡོད་པར་ཚོར་གྱིན་མེད།

གང་ལྟར་ཀྱང་། བོད་མི་ཚོས་རང་ལུས་མེར་བསྲེགས་བྱེད་པའི་རྒྱུ་རྐྱེན་དེ་པེ་ཅིན་གྱིས་ཆོས་ལུགས་ལ་དམ་དྲག་བྱེད་པ་གཅིག་པུས་ག་ལ་ཡིན། ཕྱི་ལོ་ ༢༠༡༢ ཟླ་ ༣ ཚེས ༣ ཉིན་ཚེ་རིང་སྐྱིད་ཀྱིས་བོད་ཤར་ཕྱོགས་རྨ་ཆུའི་གཙང་འགྲམ་གྱི་རྨ་ཆུ་གྲོང་སྡེ་ནང་རང་ལུས་མེར་བསྲེགས་བཏང་ཡོད། མོ་ནི་འབྲོག་ཁྱིམ་ཆུང་ཆུང་ཞིག་ཏུ་སྐྱེས་ཤིང་རང་ལོ་ ༡༠ ལ་སོན་སྐབས་སློབ་གྲྭར་འགྲོ་མགོ་ཚུགས། ཟླ་བ་ ༣ པའི་ཚེས་ ༣ ཉིན་མོ་དེར། མོ་མི་མང་གི་གསང་སྤྱོད་ཅིག་ནས་ལུས་པོར་མེ་རླབས་འཕྱུར་རེར་ཕྱིར་ཐོན་ཅིང་། གྱེན་རྒོལ་གྱི་ཁུ་ཚུར་གནམ་ལ་འཕྱར་བཞིན་ས་གནས་དེའི་ཁྲོམ་སར་བརྒྱུགས་ནས་སླེབས་སྐབས། དེར་ཡོད་རྒྱ་མི་ཚལ་ཚོང་བ་ཚོས་མོའི་འགྲོ་ལམ་བཀག་པ་དང་། འབར་བཞིན་པའི་མོར་རྡུང་རྡེག་ཀྱང་བཏང་ཡོད་སྟབས། ཚེ་རིང་སྐྱིད་གནས་དེ་གར་འཆི་ལམ་དུ་སོང་། མོ་ནི་རང་ལོ་ ༡༩ ཡིན།

ཚེ་རིང་སྐྱིད་ཀྱིས་རང་ལུས་མེར་བསྲེགས་གཏོང་དགོས་དོན་ནི། པེ་ཅིན་གྱིས་བོད་མིའི་ངོ་བོ་རྩ་བརླག་གཏོང་བའི་ཆེས་ལྐོག་གྱུར་དང་བསླུ་བྲིད་ཅན་གྱི་སྲིད་ཇུས་གཉིས་ཏེ། འབྲོག་པ་ཚོ་གནས་སྤོ་མི་ཆོག་པར་གཏན་འཇགས་སྡོད་དགོས་པའི་བཙན་བཀའ་གཏོང་བ་དང་། བོད་པའི་སློབ་གྲྭ་ཁག་ཏུ་རྒྱ་ཡིག་བསླབ་གཞིའི་ཐབས་ལམ་དུ་འཇོག་དགོས་པར་བཙན་སྐུལ་བྱས་པ་གཉིས་ཀྱི་རྐྱེན་པས་ཡིན། དེ་ཡང་། འབྲོག་པ་ཚོའི་གནས་གཞིས་གསར་ཆགས་བྱ་རྒྱུ་དེ་ནི་ ༡༩༥༦ ལོར། མི་དམངས་བཅིང་གྲོལ་དམག་གི་དམག་སྤྱི་ཆེན་མོ་ཀྲོ་ཏེ་ཡིན་པའི་དུས་སུ་མགོ་ཚུགས་ཤིང་། ཁོས་འབྲོག་པ་ཚོར་“སྤྱི་ཚོགས་རིང་ལུགས་ཅན་དུ་བསྒྱུར་བའི་མཐུན་སྦྱོར་” གྱི་ཆེད་གཞིས་ཆགས་དགོས་པའི་བཀའ་རྒྱ་བཏང་ཡོད།

གང་ལྟར་ཀྱང་། འབྲོག་པ་ཚོ་གནས་གཞིས་གཏན་ཆགས་བྱ་རྒྱུ་དེ་ནི་དོན་དངོས་སུ་ ༡༩༩༠ གོ་གྲངས་ནང་མགོ་འཛུགས་བྱས། ཁོང་ཚོས་འབྲོག་སའི་རྩྭ་ཐང་ར་བས་རྒྱ་གཅོད་བྱེད་རྒྱུ་དང་གནས་གཞིས་ཆགས་སུ་བཅུག་པ་དག་ནི། ཁོར་ཡུག་སྲུང་སྐྱོབ་ཀྱི་ཆེད་དུ་ཡིན་ཚུལ་རྒྱུ་མཚན་བགྲང་གི་ཡོད་པ་རེད་ལ། པེ་ཅིན་གྱིས་འབྲོག་པ་ཚོར་བཙན་དབང་གིས་ཕྱུགས་ཟོག་རྩྭ་སར་འཚོ་བ་མཚམས་འཇོག་དགོས་པ་བྱས་ཤིང་། འབྲོག་པ་ཚོའི་ “གནའ་སྲོལ་ཅན་” དང་“རྗེས་ལུས་ཅན་”གྱི་འཚོ་བ་སྐྱེལ་བཏང་དེས། ཕྱུགས་ཟོག་འཚོ་གནས་རྣམས་ཀྱི་ས་ཆ་འཕྲོ་བརླག་གཏོང་བའི་མཇུག་འབྲས་བཟོ་བཞིན་ཡོད་པར་ཁག་དཀྲི་བཞིན་ཡོད།