དཀའ་ཆེན་བློ་བཟང་ཕུན་ཚོགས་ལགས་ནི། ཕྱི་ལོ་ ༡༩༣༥ ལོར་གཙང་ཁུལ་གཞིས་རྩེའི་ནུབ་ངོས་གནས་གྲོང་ཚོའི་བདེ་སྐྱིད་གླིང་ཞེས་པར་སྐུ་འཁྲུངས་ཤིང་། དགུང་ལོ་ ༩ ཐོག་ཆོས་གྲྭ་ཆེན་པོ་བཀྲ་ཤིས་ལྷུན་པོར་ཆོས་ཞུགས་དང་། དགུང་ལོ་ ༡༢ ཐོག་༸པཎ་ཆེན་སྐུ་ཕྲེང་རིམ་བྱོན་གྱི་བཙུགས་བའི་ལྷ་བྲིས་ཁང་དུ་ཞུགས་ཏེ། ༸པཎ་ཆེན་བཅུ་པ་ཆེན་པོའི་སྐུ་བཅར་ལྷ་བྲིས་དབུ་ཆེན་ཆོས་དར་ལགས་དང་། ཤི་ལོག་ལ་སོགས་བརྟེན་ནས་ལྷ་བྲིས་སློབ་གཉེར་གནང་སྟེ་མཁས་པའི་ཡང་རྩེར་སོན་ཞིང་། རིམ་པས་༸པཎ་ཆེན་བཅུ་པ་ཆེན་པོའི་སྐུ་བཅར་ལྷ་བྲིས་གནང་བ་དང་། ༡༩༥༨ ལོར་གཞིས་རྩེ་བདེ་ཆེན་སྐལ་བཟང་ཕོ་བྲང་གི་ཚོན་གསོལ་དང་། ༡༩༦༢ ལོར་ལྷ་སར་བཞུགས་གླིང་རྡོ་རྗེ་ཕོ་བྲང་གི་ཚོན་གསོལ་བཅས་ཀྱི་ཐུགས་འགན་བཞེས་ཡོད་འདུག
ལོ་རབས་ ༦༠ ནང་༸པཎ་ཆེན་བཅུ་བ་ཆེན་པོར་དབུ་ཉེས་ཕོག་སྐབས། དམ་པ་ཁོང་ཡང་མི་ལོ་ ༡༧ རིང་བསམ་ཡས་སུ་བཙོན་འཇུག་ངལ་རྩོལ་བསྒྱུར་བཀོད་དུ་བཞུགས་དགོས་བྱུང་། ༡༩༧༨ ལོར་༸པཎ་ཆེན་ཆེན་སྐུ་ཕྲེང་བཅུ་བ་ཆེན་མོ་བཙོན་གྲོལ་ཐོབ་རྗེས། སླར་ཡང་ཞབས་ཞུ་དང་སྐུ་བཅར་ལྷ་བྲིས་དབུ་ཆེན་གྱི་ཐུགས་འགན་བཞེས་ཏེ། སྔ་ཕྱིར་རིས་མེད་སྐུ་ཐང་ལྔ་ཆགས་ཚན་པ་དང་། བཅུ་གཅིག་ཚན་པ་སོགས་བྲིས་ཐང་དང་། མཆོད་ཁང་ཤར་༸པཎ་ཆེན་སྐུ་གདུང་བཀྲ་ཤིས་རྣམ་རྒྱལ་དང་། ༸པཎ་ཆེན་བཅུ་པའི་གདུང་རྟེན་སྲིད་གསུམ་རྣམ་རྒྱལ་སོགས་ཀྱི་ལྡེབས་བྲིས་ཀྱི་དབུ་ཆེན་ཐུགས་འགན་ཡང་བཞེས་འདུག
བུ་ཆུང་ནུབ་རྒྱ་ལགས་ཀྱིས་གནས་ཚུལ་བཏང་འབྱོར་ལྟར་ན། རྒྱ་ནག་གཞུང་གིས་བོད་མི་རིཊ་ཀྱི་མི་ལོ་སྟོང་ཕྲག་རིང་གི་བློ་གྲོས་ཀྱི་ཉིང་བཅུད་ལས་གསར་བསྐྲུན་དང་ཉར་ཚགས་བྱས་པའི་སྐུ་གསུང་ཐུགས་རྟེན་རྣམས། རིག་གནས་གསར་བརྗེ་དང་རྙིང་བཞི་རྩ་གཏོར་བྱེད་སྐབས་རྩ་མེད་བཟོས་པ་དང་། ལོ་རབས་ ༨༠ པའི་ནང་བོད་མི་མང་ལ་ཆོས་ལུགས་དད་མོས་ཀྱི་རང་དབང་ཕྲན་བུ་ཐོབ་ཀྱང་། ཕྱག་མཆོད་དང་དད་བཀུར་ཞུ་སའི་ཐུགས་རྟེན་རྩ་བ་ནས་མེད་པའི་དཀའ་ངལ་སེལ་ཆེད། དམ་པ་ཁོང་གིས་༸པཎ་ཆེན་བཅུ་བ་ཆེན་པོའི་ལྗགས་བཀོད་དང་ཀྲུང་གོ་ནང་བསྟན་མཐུན་ཚོགས་ཀྱིས་ཞུས་ངོ་བཞིན། གྲུབ་མཐའ་རིས་མེད་ཀྱི་སྐུ་ཐང་ལྔ་ཆགས་ཚན་པ་དང་བཅུ་གཅིག་ཚན་པ་སོགས་བྲིས་རྗེས་པར་དུ་བཏབ་ནས་བཀྲམས་པ་དང་། ལྷག་པར་དུ་ལོ་རབས་ ༨༠ པ་ནས་སྨན་ཐང་གསར་བའི་ལུགས་ཀྱི་ལྷ་བྲིས་པ་གཡང་པ་ཕུན་ཚོགས་རྡོ་རྗེ་སོགས་ལྷ་བྲིས་གྲགས་ཅན་ ༢༥ ལྷག་སྐྱེད་སྲིང་། བྲིས་རྒྱུན་ལ་མཁོ་བའི་ཐིག་རྩ་དང་དཔེ་རིས་དཀོན་པའི་དཀའ་ངལ་ལ་གཟིགས་ཏེ། དཔེ་རིས་མང་པོ་ཁུངས་གཏུགས་དང་དགེ་བའི་བཤེས་གཉེན་གྱི་མན་ངག དམ་པ་ཁོང་རང་གི་ཉམས་མྱོང་དང་རིག་པས་ཁ་བརྒྱན། ལྷ་བྲིས་པ་ཨ་མདོ་བྱམས་པ་དང་བསྟན་པ་རབ་རྒྱས། བཀྲ་ཤིས་ཚེ་རིང་། རིག་འཛིན་དཔལ་འབྱོར། འཕྲིན་ལས་མཆོག་འཕེལ། སྟོབས་རྒྱས་སོགས་ལ་གོ་བསྡུར་གནང་སྟེ། སངས་རྒྱས་བྱང་སེམས་དང་ཡི་དམ་ཞི་ཁྲོའི་ལྷ་ཚོགས་ཀྱི་ཆ་ཚད་དཔེ་རིས་དང་བཅས་པ་གསལ་བའི་༼རི་མོ་དོན་ལྡན་ཀུན་གསལ་མེ་ལོང་༽ཞེས་པའི་དཔྱད་དེབ་བརྩམས་གནང་མཛད་འདུག
གསར་འགོད་པ། དོན་གོ
དཀའ་ཆེན་བློ་བཟང་ཕུན་ཚོགས་མཆོག་སྐུ་གཤེགས་པར་མྱ་ངན་གྱིས་གུས་འདུད་ཞུ།