བོད་ཕྱི་ནང་མཉམ་འབྲེལ་བྱས་ན་ང་ཚོའི་འཐབ་རྩོད་མེ་འབར་འབར་བྱེད་པའི་ཡིད་ཆེས་ཡོད།

ཕྱི་ཟླ་ ༡ ཚེས་ ༣༠ ནས་ཕྱི་ཟླ་ ༢ ཚེས་ ༢ བར་གྱི་ཉིན་བཞིའི་རིང་རྒྱ་གར་རྒྱལ་ས་ལྡི་ལིར་བཀའ་སྤྱི་གཉིས་ཀྱིས་སྣེ་འཁྲིད་པའི་བོད་མིའི་གདུང་སེམས་མཉམ་སྐྱེད་ལས་འགུལ་མཇུག་སྒྲིལ་བ་དང་བསྟུན་ཏེ། གསར་འགོད་པས་ཕྱོགས་མཐའ་ཁག་ནས་ཕེབས་པའི་ལས་འགུལ་བ་ཁག་ཅིག་ལ། ད་རེབ་ཀྱི་ལས་འགུལ་ཐོག་མཐོང་ཚུལ་གང་འདྲ་བྱུང་ཡོད་མེད་དང་། མ་འོངས་པར་ལས་འགུལ་གང་འདྲ་སྤེལ་དགོས་མིན་ཐད་བསམ་ཚུལ་བསྡུས་ཡོད།  

བལ་ཡུལ་བཀྲ་ཤིས་དཔལ་འཁྱིལ་གཞིས་ཆགས་ཀྱི་རང་ལོ་ ༦༡ ཡིན་པའི་རྒན་བསམ་འགྲུབ་ལགས་སུ་བཅར་འདྲི་ཞུས་པར་ཁོང་གིས། “ཐེངས་འདིར་བཀའ་སྤྱི་ཐུན་མོང་གིས་བཀོད་ཁྱབ་དང་གསལ་བསྒྲགས་གནང་བ་ལྟར། ང་ཚོ་བལ་ཡུལ་བཀྲ་ཤིས་དཔལ་འཁྱིལ་དང་བྱམས་པ་གླིང་། བཀྲ་ཤིས་སྒང་སོགས་གཞིས་ཆགས་ཁག་གསུམ་ནས་མི་ ༣༥ བོད་ནང་སོ་སོའི་ལྟོ་གོས་དང་ལུང་ཚན་བྱེ་བྲག་པ་ཞིག་གི་ཆེད་དུ་མིན་པར། བོད་ཆོལ་ཁ་གསུམ་གྱི་བོད་མི་ཡོངས་རྫོགས་ཀྱི་ཆེད་རང་སྲོག་བློས་གཏོང་གནང་མཁན་རྣམས་དང་། བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཆེད་ས་ཆེན་ལ་གོམ་ཆེན་བརྒྱབ་ཏེ་ཡོང་བ་ཡིན། ཐེངས་འདིའི་ཉིན་བཞིའི་རིང་རྒྱ་གར་གྱི་གནད་ཡོད་མི་སྣ་དང་བོད་དོན་རྒྱབ་སྐྱོར་བ། དགའ་ལྡན་ཁྲི་པ་གཙོས་པའི་བླ་ཆེན་དང་བཀའ་སྤྱི་གཉིས་ཀྱི་མི་སྣ། དེ་བཞིན་ས་གནས་ཁག་འདྲ་མིན་ནས་མི་མང་སྟོང་ཕྲག་མང་པོ་ཕེབས་ཏེ་གདུང་སེམས་མཉམ་སྐྱེད་གནང་སོང་། དེ་ཡག་པོ་རེད། ཡིན་ནའང་བོད་པའི་གནད་དོན་དེ་ད་རེབ་ཀྱི་ལས་འགུལ་འདི་གཅིག་པུས་ཐག་གཅོད་ཐུབ་པ་ཞིག་མིན་དུས། མ་འོངས་པར་མུ་མཐུད་དེ་ལས་འགུལ་སྤེལ་རྒྱུ་གལ་ཆེན་པོ་རེད། བལ་ཡུལ་ནང་ལས་འགུལ་སྤེལ་སྐབས་གཞུང་གི་ཉེན་རྟོག་པ་ཡོང་ནས་གཅར་རྡུང་འཇུ་བཟུང་བྱེད་ཀྱི་ཡོད་ཀྱང་། མི་མང་ཚོས་གང་ཐུབ་ཀྱིས་ལས་འགུལ་སྤེལ་གྱི་ཡོད་པ་རེད” ཅེས་བརྗོད་བྱུང་།

ལ་དྭགས་བྱང་ཐང་ནས་ཕེབས་པའི་དགུང་ལོ་ ༧༦ ཡིན་པའི་རྒན་བཅོ་ལྔ་ཕུན་ཚོགས་ལགས་སུ་བཅར་འདྲི་ཞུས་པར་ཁོང་གིས། “ ང་ཚོ་ལ་དྭགས་ལྷོ་བྱང་གཉིས་ནས་མི་ ༡༩༢ ཙམ་ཡོང་ཡོད། ཐེངས་འདིའི་ལས་འགུལ་དེ་བཀའ་སྤྱི་ཐུན་མོང་གི་གོ་སྒྲིག་འོག་ཡག་པོ་བྱུང་སོང་། བོད་པའི་དཀའ་ངལ་དེ་མགྱོགས་མྱུར་ངང་སེལ་ཐུབ་པ་ཞིག་མིན་ཡང་། བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་མཚོན་ཆེད་དང་། འཇིག་རྟེན་འདིའི་ནང་ཡོང་མི་རུང་བ་དང་། མིག་དང་སྣ་བའི་མཐོང་ཐོས་ཀྱི་ཡུལ་དུ་མ་བྱུང་བའི་གནས་ཚུལ་ཞིག་བོད་ནང་འབྱུང་གི་ཡོད་པ་དེ་འཛམ་གླིང་ལ་ཁྱབ་བསྒྲགས་བྱ་རྒྱུ་བོད་མི་སྤྱི་བོ་གནམ་བསྟན་ཡོངས་ཀྱི་ལས་འགན་ཆགས་ཡོད། ད་ལྟའི་ཆར་༸གོང་ས་མཆོག་གི་ལམ་སྟོན་འོག་བོད་ཕྱི་ནང་གཉིས་སུ་ཞི་བའི་ལས་འགུལ་སྤེལ་གྱི་ཡོད་ཀྱང་། གལ་སྲིད་རྒྱ་ནག་གཞུང་བཤད་སྤྱོད་འདི་མུར་བསྡད་པ་ཡིན་ན། བོད་ནང་གི་ལས་འགུལ་ངོ་བོ་འགྱུར་སྲིད་པའི་ཉེན་ཁ་ཧ་ཅང་ཆེན་པོ་རེད། འཛམ་གླིང་ནང་ཐབས་སྐྱོ་བོ་ཞིག་དང་། ༸གོང་ས་མཆོག་གི་བཀའ་དགོངས་དང་འགལ་སྲིད་པའི་ཉེན་ཁ་ཞིག་མཐོང་གི་འདུག ད་ལྟ་བོད་ནང་བོད་མི་ཚོས་འུ་ཐུག་ཏེ་རང་ལུས་མེར་བསྲེཊ་གནང་གི་ཡོད་པ་རེད། རང་དབང་ལུང་པར་ཡོད་པའི་བོད་མི་ཚོས་སེམས་འཚབ་བྱེད་པ་ཙམ་ལས་རྒྱུག་འགྲོ་ས་ཞིག་མེད་ཀྱང་། ནམ་ཞིག་འདིར་ཡོད་པའི་བོད་མི་རྣམས་ཀྱང་འུ་ཐུག་ཏེ་ལས་འགུལ་སྡུག་ཅག་སྤེལ་སྲིད་པ་རེད། བོད་ཕྱི་ནང་གཉིས་ནས་མིའི་ཚེ་སྲོག་གི་འགྲོ་གྲོན་གཏོང་མ་དགོས་པ་ཞིག་བྱུང་ན་ཡག་གི་རེད། དེ་གཙོ་བོ་རྒྱ་ནག་གཞུང་གི་ལག་ཏུ་ཡོད་པ་ཞིག་རེད” ཅེས་བརྗོད་བྱུང་།  

ཨ་རི་ནཱ་ཅལ་མངའ་སྡེའི་མེའོ་གཞིས་ཆགས་ནས་ཕེབས་པའི་རབ་བརྟན་ཚེ་རིང་ལགས་སུ་བཅར་འདྲི་ཞུས་པར་ཁོང་གིས།“ སྤྱིར་བཏང་ང་ཚོའི་གཞིས་ཆགས་ལ་མཚོན་ན་ས་ཆ་ཁུག་ཀྱོག་དང་འགྲིམ་འགྲུལ་སྟབས་བདེ་བོ་མེད་ས་ཞིག་རེད། ཡིན་ནའང་ད་རེབ་བཀའ་སྤྱི་གཉིས་ཀ་མཉམ་རུབ་ཐོག་ལས་འགུལ་སྤེལ་རྒྱུའི་བཀོད་ཁྱབ་གནང་བ་ལྟར། ང་ཚོའི་རྒན་གཞོན་ཕོ་མོ་༦༠ལྷག་འདིར་ཡོང་བ་ཡིན།ཐེངས་འདིའི་གཞུང་འབྲེལ་ལས་འགུལ་འདི་སྔོན་ཆད་ཀྱི་གཞུང་འབྲེལ་མིན་པའི་ལས་འགུལ་དག་དང་མི་འདྲ་བར་མི་མང་པོ་ཕེབས་འདུགརྣམ་པ་འདིར་བལྟས་པ་ཡིན་ན་བོད་མི་ཚོར་མགོ་ཁྲིད་མཁན་མེད་པ་མ་གཏོགས།མི་མང་མཉམ་ཞུགས་ཡོང་མིན་ལ་སེམས་འཁྲུལ་རྩ་བ་ནས་མི་འདུག་བསམ་པའི་ཚོར་སྣང་བྱུང་སོང་།ང་ཚོའི་ལས་འགུལ་གྱི་དམིགས་ཡུལ་གཙོ་བོ།ཉིན་གཅིག་གཉིས་ཙམ་མིན་པར་ལས་འགུལ་རྒྱུན་སྐྱོང་བྱས་ཏེ་རྒྱ་ནག་ལ་བརྡ་ལན་དང་ཤུགས་རྐྱེན་ཐེབས་ཐུབ་པ་ཞིག་བྱ་རྒྱུ་གལ་ཆེན་པོ་རེད”ཅེས་བརྗོད་བྱུང་།

ངྷ་རམ་ས་ལ་ནས་ཕེབས་པའི་རིན་ཆེན་དོན་འགྲུབ་ལགས་སུ་བཅར་འདྲི་ཞུས་པར་ཁོང་གིས“ ང་ལ་མཚོན་ན་རང་ཉིད་བོད་ནས་བཙན་བྱོལ་དུ་ཡོང་མཁན་ཞིག་དང་ཆབ་སྲིད་ཀྱི་སྐྱབས་བཅོལ་བ་ཞིག་ཡིན་པའི་ཆ་ནས།ད་རེབ་འགྲོ་སོང་ཆ་ཚང་རང་ངོས་ནས་བཏང་སྟེ་ལས་འགུལ་ནང་ཞུགས་པ་ཡིན། སྲིད་སྐྱོང་དང་སྤྱི་འཐུས་ཚོགས་གཙོ་གཞོན་གཉིས་གཙོས་པའི་གནད་ཡོད་ཚང་མས་སྣེ་འཁྲིད་དེ་ལས་འགུལ་ཡག་པོ་བྱུང་སོང་། ད་རེབ་ཙམ་མིན་པར་མ་འོངས་པར་ཡང་མགོ་འཁྲིད་ཚོས་སྐད་ཆ་ཉུང་ཙམ་དང་ལས་ཀ་མང་ཙམ་བྱས་ན་ཡག་པོ་འདུག ལྷག་པར་དུ་འཐབ་རྩོད་ལ་ཁ་ཕྱོགས་གསལ་བོ་ཞིག་དགོས་ཀྱི་འདུག མ་འོངས་པར་བོད་ནང་དང་ཕྱིའི་རྒྱལ་ཁབ་ཁག་ནང་འདི་ལས་ལྷག་པའི་ལས་འགུལ་སྤེལ་ཏེ། བོད་ནང་གི་བོད་མི་ཚོས་བཙན་བྱོལ་ནང་གི་བོད་པ་ཚོས་དཀའ་ལས་བརྒྱབ་བསམ་པ་ཞིག་བཟོ་ཐུབ་པ་ཡིན་ན། བོད་པའི་འཐབ་རྩོད་དེ་མེ་འབར་འབར་བྱེད་ཡོང་གི་རེད་སྙམ་པའི་ཡིད་ཆེས་ཡོད། བོད་ནང་གི་བོད་མིའི་འབོད་སྒྲ་གཙོ་བོ་༧གོང་ས་མཆོག་བོད་ལ་གདན་འདྲེན་ཞུ་རྒྱུ་དེ་ཡིན་སྟབས། ཕྱི་ལོགས་སུ་ཡོད་མཁན་ཚོས་མངོན་འདོད་དེའི་ཐོག་ལ་ཤུགས་རྒྱག་དགོས་པ་རེད”ཅེས་བརྗོད་བྱུང་།

རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་གི་གྲྭ་བཟོད་པ་རྒྱ་མཚོ་ལགས་སུ་བཅར་འདྲི་ཞུས་པར་ཁོང་གིས་ “ ང་རང་ཉིད་ལ་མཚོན་ན། རང་ཉིད་རང་དབང་ལྡན་པའི་རྒྱལ་ཁབ་ནང་གནས་སྡོད་བྱས་པའི་བོད་མི་ཞིག་ཡིན་པའི་ཆ་ནས་རང་ངོས་ནས་འགྲོ་སོང་བཏང་སྟེ་ལས་འགུལ་ནང་མཉམ་ཞུགས་བྱས་པ་ཡིན། སྤྱིར་བཏང་ང་ཚོ་ཏཱ་དབོན་ཁམས་ཚན་གཅིག་པུའི་གྲྭ་བ་ ༣ ལས་འགུལ་ནང་ཞུགས་ཡོད། ཐོག་མ་སོ་སོའི་བསམ་པར་ད་རེབ་བཀའ་སྤྱི་གཉིས་ཀྱིས་གོ་སྒྲིག་གནང་གི་ཡོད་སྟབས་མི་ཧ་ཅང་མང་པོ་ཡོང་གི་རེད་བསམ་སོང་། ཡིན་ནའང་དེ་སྔོན་ཚོད་དཔག་བྱས་པ་ལྟར་མི་མང་པོ་འཛོམ་ཐུབ་མི་འདུག གོ་སྒྲིག་གི་ཐད་ནས་ང་ཚོ་བཙན་བྱོལ་བ་ཞིག་ལ་མཚོན་ན། རྒྱ་གར་གྱི་གནད་ཡོད་དཔོན་རིགས་དང་ཆོས་ལུགས་ཀྱི་དབུ་ཁྲིད། དགའ་ལྡན་ཁྲི་པ་དང་ཀིརྟི་རིན་པོ་ཆེ་བཅས་བླ་ཆེན་དང་གནད་ཡོད་མི་སྣ་མང་པོ་ཕེབས་ཡོད་སྟབས། ཡིད་ཚིམ་པ་བྱུང་སོང་ལ་ཁོང་རྣམ་པའིོ་བཀའ་སློབ་ལ་ཉན་སྐབས་རེ་བ་འདུག་བསམ་པ་དྲན་སོང” ཞེས་བརྗོད་བྱུང་།

སྦིར་བོད་ཚོགས་ནས་ཕེབས་པའི་དར་རྒྱས་ལགས་སུ་བཅར་འདྲི་ཞུས་པར་ཁོང་གིས། “ ད་རེབ་ཀྱི་ལས་འགུལ་ནང་སྦིར་བོད་ཚོགས་ནས་མི་ ༢༥ མཉམ་ཞུགས་བྱས་ཡོད། བཀའ་སྤྱི་གཉིས་ཀྱིས་མི་མང་ལ་སྡོད་ས་དང་ཞལ་ལག དེ་བཞིན་ཉིན་བཞིའི་རིང་གི་ལས་འགུལ་དེ་འཆར་གཞི་དང་གོ་རིམ་ལྡན་པ་ཞིག་བྱུང་སོང་། དྲིལ་བསྒྲགས་ཀྱི་ཐད་ནས་ཀྱང་རྒྱལ་སྤྱི་དང་རྒྱ་གར་གྱི་བརྒྱུད་ལམ་ཁག་མང་པོ་ཡོང་གི་འདུག་ཅེས་སྲིད་སྐྱོང་མཆོག་གིས་གསུངས་བྱུང་། གཙོ་བོ་ང་ཚོས་བོད་ནང་གི་བོད་མི་ཚོའི་རེ་བ་དང་མངོན་འདོད་རྒྱལ་སྤྱིར་བསྐྱལ་དགོས་སྟབས། ད་རེབ་གང་ལ་གང་འཚམ་ཞིག་འགྲུབ་ཡོད་པ་རེད་བསམ་གྱི་འདུག བོད་ནང་ལ་མཚོན་ན་ད་བར་མི་ ༡༠༠ མ་ཟིན་ཙམ་གྱིས་རང་ལུས་མེར་བསྲེཊ་གནང་བ་རེད། རང་ལུས་མེར་བསྲེཊ་རེ་རེ་བྱུང་སྐབས་སེམས་ནང་མ་སྐྱིད་པ་ཡོང་གི་འདུག ང་ཚོ་མི་འབོར་ཉུང་ཉུང་ཡིན་སྟབས་མ་འོངས་པར་མེར་སྲེཊ་མཚམས་འཇོག་གནང་སྟེ། དུས་སྟོན་ལྟར་ཉིན་གཅིག་གཉིས་ཙམ་མིན་པར་བཀའ་སྤྱི་གཉིས་ཀྱིས་སྣེ་འཁྲིད་དེ་ལས་འགུལ་སྣ་ཚོགས་མུ་མཐུད་སྤེལ་ཏེ། རྒྱལ་སྤྱིར་བོད་དོན་ངོ་འཕྲོད་པ་ཞིག་དང་རྒྱ་ནག་སུན་པོ་བཟོ་དགོས་ཀྱི་འདུག ” ཅེས་བརྗོད་བྱུང་།

གྷོ་པ་པུར་བོད་ཁྱིམ་ནས་ཕེབས་པའི་སློབ་ཕྲུག་བསྟན་འཛིན་ཆོས་གྲགས་ལགས་སུ་བཅར་འདྲི་ཞུས་པར་ཁོང་གིས “ ད་རེབ་ང་ཚོའི་སློབ་གྲྭའི་ངོས་ནས་དགེ་སློབ་ ༡༠༠ ཙམ་མཉམ་ཞུགས་བྱས་ཡོད། ལས་འགུལ་གང་འདྲ་ཞིག་སྤེལ་ཡང་མགོ་ཁྲིད་མཁན་ཡག་པོ་ཞིག་དགོས་རྒྱུ་དེ་གལ་ཆེན་པོ་རེད། མགོ་ཁྲིད་མཁན་ཡག་པོ་ཡོད་ན་མི་མང་ལ་ག་རེ་བཤད་ཀྱང་བསྒྲུབ་ཀྱི་རེད། སྔོན་མ་བོད་ནང་མི་རེ་རེ་མེར་བསྲེཊ་བཏང་བའི་གནས་ཚུལ་ཐོས་སྐབས་སེམས་ནང་ཚོར་བ་ཆེན་པོ་ཡོང་གི་འདུག ད་ལྟ་མི་བརྒྱ་མ་ཟིིན་ཙམ་གྱིས་མེར་བསྲེཊ་བཏང་ཡོང་ན་ཨ་ཅོག་ནང་གོམ་ལོབས་སུ་སོང་སྟེ་ཚོར་བ་མེད་པ་ཆགས་འདུག ངས་བལྟས་ན་རང་ལུས་མེར་བསྲེཊ་བཏང་སྟེ་བོད་ཀྱི་གནད་དོན་སེལ་རྒྱུར་རེ་བ་ཆེན་པོ་མཐོང་གི་མི་འདུག དེ་ལས་ས་ང་ཚོའི་ལས་འགུལ་སྤེལ་སྐབས་ས་གནས་གཅིག་ཁོ་ན་མིན་པར་བོད་ནང་དང་རྒྱ་གར། ཕྱི་རྒྱལ་ཡུལ་གྲུ་ཁག་བཅས་བོད་མི་གནས་སྡོད་ཀྱི་ས་གནས་ཡོངས་སུ་ཉིན་གཅིག་དུས་གཅིག་ལ་སྤེལ་བ་ཡིན་ན། བོད་མིའིོ་རྡོག་རྩ་ཆིག་སྒྲིལ་དང་གདུང་སེམས་མཉམ་སྐྱེད་ཀྱི་ནུས་པ་སྟོན་ཐུབ་ཀྱི་རེད་ལ། རྒྱལ་སྤྱི་དང་རྒྱ་ནག་ནང་ལའང་རང་བཞིན་གྱིས་ཤུགས་རྐྱེན་ཆེན་པོ་ཐེབས་གི་རེད་བསམ་གྱི་འདུག ” ཅེས་བརྗོད་བྱུང་།  

ལྡེ་ར་རྡུན་ཚེ་རིང་དོན་ལྡན་གཞིས་ཆགས་ནས་ཕེབས་པའི་ཨ་ཅག་བསོད་ནམས་སྒྲོལ་མ་ལགས་སུ་བཅར་འདྲི་ཞུས་པར་ཁོང་མོས། “བཀའ་སྤྱི་གཉིས་ཀྱི་གོ་སྒྲིག་ལྟར། ད་རེབ་ང་ཚོ་གཞིས་ཆགས་ཀྱི་མི་ ༡༠ བོད་ནང་རང་ལུས་མེར་བསྲེཊ་གནང་མཁན་རྣམས་ལ་གདུང་སེམས་མཉམ་སྐྱེད་ཆེད་ཡོང་བ་ཡིན། ལས་འགུལ་གྱི་གོ་སྒྲིག་གི་ཐད་ནས་མི་མང་ལ་སྡོད་ས་དང་ཟ་མ་གོ་སྒྲིག་གནང་ཡོད་པ་མ་ཟད། དགའ་ལྡན་ཁྲི་རིན་པོ་ཆེ་དབུས་པའི་བླ་ཆེན་དང་རྒྱ་གར་གནད་ཡོད་དཔོན་རིགས་མང་པོ་ཕེབས་ཏེ་བཀའ་སློབ་གསུང་བཤད་དང་། གོམ་བགྲོད་དང་ཟས་བཅད། བསྔོ་སྨོན་བཅས་ཀྱི་ཐད་ཧ་ཅང་ཡག་པོ་བྱུང་སོང་། གཙོ་བོ། བོད་ནང་རྒྱ་གཞུང་གིས་དྲག་གནོན་འོག་བོད་མི་ཚོ་འདུག་ཐབས་མེད་པའི་གནས་སུ་བསྐྱལ་ཡོད་སྟབས། མ་འོངས་པར་བཀའ་སྤྱི་མཉམ་རུབ་ཀྱི་ཐོག་ནས་ལས་འགུལ་སྔར་ལས་ཤུགས་ཆེ་པོ་སྤེལ་རྒྱུ་གལ་ཆེན་རེད་དྲན་ཡོད། གཉིས་པ་ད་རེབ་ཀྱི་ལས་འགུལ་ནང་ཞུགས་མཁན་མང་ཆེ་བ་རྒན་འཁོགས་ཤ་སྟག་ཡིན་པ་འདྲ་ཞིག་ཏུ་མཐོང་སོང་། མ་འོངས་པར་གཞོན་པ་ཚོས་འགུལ་དཀྱོག་རྒྱག་དགོས་ཀྱི་འདུག རྒན་པ་ཚོས་ཀྱང་གཞོན་པ་ཚོ་བོད་པའི་འཐབ་རྩོད་གནང་མཁན་ཞིག་བཟོ་ཐུབ་དགོས་ཀྱི་འདུག” ཅེས་བརྗོད་བྱུང་།

མོན་གྷོ་གཞིས་ཆགས་ནས་ཕེབས་པའི་སྲིད་ཆོས་སྒྲོལ་མ་ལགས་སུ་བཅར་འདྲི་ཞུས་པར་ཁོང་མོས “ ད་རེབ་ང་ཚོའི་གཞིས་ཆགས་ཀྱི་མི་ ༢༨༥ ཙམ་ལས་འགུལ་ནང་ཞུགས་ཀྱི་ཡོད། ལས་འགུལ་འདི་བཀའ་སྤྱི་གཉིས་ཀྱི་གོ་སྒྲིག་གནང་གི་ཡོད་དུས། གནད་ཡོད་མི་སྣ་དང་མི་མང་པ་འཛོམས་ཏེ་ལས་འགུལ་ཡག་པོ་བྱུང་སོང་། བོད་ནང་ལ་མཚོན་ན། ༸གོང་ས་མཆོག་གིས་ནམ་རྒྱུན་བོད་ཀྱི་བདག་པོ་གཞིས་སྡོད་མི་མང་ཡིན་གསུང་གི་ཡོད་པ་ལྟར། བོད་མི་བརྒྱ་མ་ཟིན་ཙམ་གྱིས་རང་ལུས་མཆོད་མེར་ཕུལ་བ་རེད། ཡིན་ནའང་། རྒྱ་གཞུང་གིས་རྐང་བཙུགས་ནས་མི་གསོད་མི་དགོས་པར་རང་ཤི་རྒྱག་པར་ཁོག་ན་དགའ་སྤྲོ་སྐྱེ་བཞིན་ཡོད་པ་འདྲ་ཞིག་ཏུ་མཐོང་སོང་། ང་ཚོས་རང་ལུས་མེར་བསྲེཊ་མཚམས་འཇོག་བྱས་ཏེ་ཐབས་ལམ་གཞན་གྱི་ཐོག་ནས་ལས་འགུལ་སྤེལ་དགོས་པ་རེད་བསམ་གྱི་འདུག ལས་འགུལ་འདིའི་ནང་དགའ་ལྡན་ཁྲི་རིན་པོ་ཆེ་མཆོག་དང་བཀའ་ཟུར་ཀིརྟི་རིན་པོ་ཆེ་བཅས་ཀྱིས་ཕྱག་རྟེན་བཟུང་སྟེ་ལས་འགུལ་ནང་ཞུགས་གནང་ཡོད་པ་རེད་དེ། རྩ་བའི་ཆ་ནས་ལས་འགུལ་བ་མང་ཆེ་བ་རྒན་པ་རྐྱང་རྐྱང་རེད། མ་འོངས་པར་གཞོན་སྐྱེས་ཚོ་ཞུགས་ཐུབ་པ་གནང་དགོས་ཀྱི་འདུག ” ཅེས་བརྗོད་བྱུང་།

བཙུན་དགོན་སྒྲོལ་མ་གླིང་གི་ཨ་ནེ་ཕུན་ཚོགས་ལམ་སྒྲོན་ལགས་སུ་བཅར་འདྲི་ཞུས་པར་ཁོང་མོས། “ང་ཚོའི་དགོན་པའི་གཞུང་གིས་འགྲོ་སོང་བཏང་སྟེ་མི་ ༦༨ མཉམ་ཞུགས་བྱས་ཡོད། སྤྱིར་ང་ཚོའི་འཐབ་རྩོད་དེ་མི་རིགས་ཤིགས་དང་རྒྱབ་ཁབ་ཅིག་གི་འཐབ་རྩོད་ཡིན་སྟབས། ཉིན་ཤས་རིང་གི་ལས་འགུལ་ཙམ་གྱིས་འགྲུབ་ཡོང་བ་ཞིག་མིན་ཡང་། བཀའ་སྤྱི་གཉིས་ཀྱིས་བོད་ནང་གི་ཛ་དྲག་གི་གནས་སྟངས་མྱུར་སྐྱོབ་བྱ་ཆེད་ལས་འགུལ་སྤེལ་གྱི་ཡོད་སྟབས། ད་རེབ་ཀྱི་ལས་འགུལ་འདི་དང་། དེའི་སྔོན་སྤྱི་འཐུས་ཀྱི་ཞུ་གཏུག་ལས་འགུལ། བདེན་པའི་མེ་ལྕེ་སྐོར་སྐྱོད་སོགས་མགོ་འཛུགས་སྟངས་ནས་མཇུག་སྒྲིལ་སྟངས་བར་ཚགས་ཚུད་དང་ཡག་པོ་བྱུང་སོང་བསམ་གྱི་འདུག མ་འོངས་པར་བོད་ནང་གི་བོད་མི་ཚོས་རྒྱ་གཞུང་གིས་དྲག་གནོན་བྱས་མིན་ལ་མ་ལྟོས་པར། རྡོག་རྩ་ཆིག་སྒྲིལ་དང་རིག་གཞུང་སོགས་ཀྱི་ཐད་འབད་པ་བྱེད་བཞིན་པ་བཞིན། ང་ཚོའི་ངོས་ནས་ཀྱང་འབད་པ་བྱ་རྒྱུ་ཧ་ཅང་གལ་ཆེན་པོ་རེད” ཅེས་བརྗོད་བྱུང་།