གཟའ་ལྷག་པའི་ཉིན་ཧྥ་རན་སིས་རྒྱལ་ཚོགས་བདེ་འཇཊ་ལྷན་ཁང་ནང་མཱ་ལེ་ཡི་ནང་གི་ཧྥ་རན་སིའི་དམག་དཔུང་ཕྱིར་འཐེན་ཐོག་རྒྱལ་ཚོགས་བདེ་འཇགས་དམག་དཔུང་གཏོང་དགོས་ཟེར།
ཕྱི་ཚེས་ ༦ ཉིན་ཧྥ་རན་སིས་རྒྱལ་ཚོགས་བདེ་འཇགས་ལྷན་ཁང་ནང་། མི་རིང་པར་མཱ་ལེ་(Mali) ནང་གི་ཧྥ་རན་སིའི་དམག་དཔུང་ཕྱིར་འཐེན་དང་། མཱ་ལེ་ནང་གི་ཟིང་འཁྲུག་ཞི་འཇགས་དང་དྲག་སྤྱོད་པ་རྩ་མེད་གཏོང་རྒྱུའི་འགན་དེ་རྒྱལ་ཚོགས་ལ་རྩིས་སྤྲོད་ཐོག རྒྱལ་ཚོགས་བདེ་འཇགས་དམག་དཔུང་མཱ་ལེ་ནང་གཏོང་དགོས་པའི་གྲོས་མགོ་བཏོན་ཡོད་པ་རེད།
ཉེ་སྔོན་ཨ་ཧྥི་རི་ཀའི་མཱ་ལེ་རྒྱལ་ཁབ་ཀྱི་བྱང་ཕྱོགས་ཁུལ་དུ་ཡོད་པའི་ཁ་ཆེ་སྒྲིག་འཛུགས་ཤོག་དང་རྒྱལ་སྤྱིའི་ཨལ་ཁ་ཊ་དྲག་སྤྱོད་ཤོག་ཁག་མཉམ་འབྲེལ་ཐོག གཞུང་གི་ཁ་གཏད་དུ་ལངས་པ་མ་ཟད་མཱ་ལེ་ཡི་བྱང་ཕྱོགས་ཀྱི་གྲོང་ཁྱེར་དང་ས་ཁུལ་མང་པོ་ཞིག་ཁོ་ཚོའི་སྟངས་འཛིན་འོག་ཤོར་སྟབས། མཱ་ལེ་སྲིད་འཛིན་གྱི་ཧྥ་རན་སིར་དམག་རོགས་གཏོང་རྒྱུའི་འབོད་སྐུལ་ཞུས་པ་ལྟར། ཧྥ་རན་སི་གཙོས་རྒྱལ་ཁབ་ཁག་ཅིག་གིས་མཁའ་དམག་དང་དྲག་ཆས་དམག་མི་སྟོང་ཕྲག་འགའ་མཱ་ལེ་རྒྱལ་ཁོངས་སུ་བཏང་སྟེ་བྱང་ཕྱོགས་ཁུལ་གྱི་ངོ་རྒོལ་ཤོག་ཁག་ལ་ཁ་གཏད་དང་ཁོ་ཚོའི་སྟངས་འཛིན་འོག་ཤོར་པའི་ས་ཁུལ་མང་པོ་ཞིག་ཕྱིར་འཕྲོག་ཡོད།
མཱ་ལེ་ནི་དེ་སྔ་ཧྥ་རན་སིའི་དབང་སྒྱུར་ས་ཁུལ་ཞིག་ཡིན་པ་དང་ ༡༩༦༠ ལོར་རང་བཙན་ཐོབ་པ་ཞིག་ཡིན།
གསར་འགོད་པ། བནྡེ་སྐྱབས།
